1. Йаһоwа мәщале дьдә мәрьвед чь щурʹәйи wәки незики wи бьн, у әwана чьма гәрәке рʹöһʹанида һʹьшйар бьн?

ИСА гот: «Йед рʹаст дьһʹәбиньн wе бь рʹöһʹ у рʹасти Баве бьһʹәбиньн, чьмки Бав йед аһа дьһʹәбиньн дьгәрʹә» (Йуһʹәнна 4:23). Чахе Йаһоwа мәрьвед wи щурʹәйи дьвинә, әw мәщале дьдә wан, wәки незики wи у кöрʹе wи бьн (Йуһʹәнна 6:44). Qәдрәки чьqас мәзьн ә! Йед кö рʹастийа Кʹьтеба Пироз һʹьз дькьн гәрәке «бьзаньбьн кö чь ль Хöдан хwәш те», чьмки Шәйтʹан хальфандьнеда һоста йә (Әфәси 5:10; Әʹйанти 12:9).

2. Йаһоwа чаwа дьньһерʹә ль сәр wан мәрийа, йед кö һʹәбандьна рʹаст у qәлп тʹәви һәв дьхьн? Шьровәкә.

² Бьфькьрә дәрһәqа wе йәке чь qәwьми ль бәр чʹийайе Синайе чахе Исраелийа готьнә Һарун wәки wанарʹа хöдан чекә. Һарун qайил бу у wанарʹа голька зерʹ чекьр. Ле әwи öса жи wанарʹа әʹлам кьр, wәки әве гольке бьдьн бәр чʹәʹве хwә ча Йаһоwа Хwәде. Һәрун wанарʹа гьлийе öса гот: «Әw щәжьна Хwәдан ә [Йаһоwа, ДТʹ]». Щьмәʹта Исраели һʹәбандьна рʹаст у qәлп тʹәви һәв хьстьн. Ле гәло әw йәк Йаһоwа хwәш һат? Һьлбәт на, чьмки әм заньн кö әwана һатьнә щәзакьрьне у wәкә 3 000 мәрьвед пʹутпʹарьст мьрьн (Дәркʹәтьн 32:1-6, 10, 28, ПКʹМ). Жь ве йәке әм чь һин дьбьн? Сәва кö әм хwә нава һʹьзкьрьна Хwәдеда хwәй кьн, әм гәрәке «дәсте хwә ль йе мьндар нәхьн» у гәрәке һʹәбандьна рʹаст тʹәмьз хwәй кьн (Ишайа 52:11; Һәзәqел 44:23; Галати 5:9).

3, 4. Чахе әм дәрһәqа щәжьн у әʹйд-qәйдед иройин леколин дькьн, чьма әм гәрәке дина хwә бьдьнә принсипед Кʹьтеба Пироз?

 ³ Шандийед Иса нәдьһиштьн кö нава һʹәбандьна рʹастда тьштед нәрʹаст бәла бьн. Ле йазьх паши мьрьна wан, һьнә Мәсиһи дәстпекьрьн әʹйд-qәйд у щәжьнед ве дьнйайе бькьн. Әwана һеди-һеди öса һини wан әʹйд-qәйд у щәжьна һатьн кö әw һʹәсаб кьрьн әʹйд-qәйдед Мәсиһити. Жь wе йәке һатә кʹьфше кö wана һʹәбандьна рʹаст һʹьз нәдькьрьн (2 Тʹесалоники 2:7, 10). Дь ви сәрида wе бе готьне дәрһәqа чәнд жь wан щәжьн у әʹйд-qәйда. У әме бьвиньн кö дь wан әʹйдада нә кö рʹöһʹе Хwәде те кʹьфше, ле рʹöһʹе wе дьнйайе. Әв һʹәму щәжьн у әʹйд-qәйд мәрийа һелан дькьн кö бькʹәвьнә һʹәйра хwәстәка бәдәне. У öса жи бь wан һʹәму щәжьн у әʹйд-qәйда, һʹәбандьна qәлп у сербази зедә дьбә у ләма әм фәʹм дькьн, кö әв һʹәму тьшт тʹәви «Бабилона Мәзьн» гьредайи йә (Әʹйанти 18:2-4, 23). * Бь рʹасти һʹиме wан әʹйда жь wәʹде бәреда дәстпебуйә, wи чахи мәрьва wәʹде әʹйда гәләк тьштед мьрʹдар дькьрьн. Әм гәрәке бир нәкьн, wәки Йаһоwа хwәха әw тьшт дьдитьн. Ләма жи әw щәжьн у әʹйд-qәйд кö иро тенә кьрьне, бәр чʹәʹве Хwәде рʹәш ьн. Ле ньһерʹандьна Йаһоwа бона мә жь һʹәму тьшти фәрзтьр ә (2 Йуһʹәнна 6, 7).

⁴ Әм ча Мәсиһийед рʹаст, заньн кö һәнә әʹйд кö Хwәде хwәш найен. Чьмки әw әʹйд һʹәбандьна qәлпва гьредайи нә, мәсәлә, тәʹв һʹәбандьнева у диса гәләк тьштед дьнва. Әм гәрәке дьле хwәда мьqим сафи кьн wәки тʹәвгьредана мә тʹәви wан әʹйда тʹöнә бә. Ньһа әме хәбәр дьн бона чәнд мәʹнийа, кö чьрʹа әw әʹйд Хwәде хwәш найен. Әв йәк wе али мә бькә wәки әм хwә жь wан әʹйда дур хwәй кьн, сәва кö әм нава һʹьзкьрьна Хwәдеда бьминьн.

5. Чьма әм дькарьн баwәр кьн, wәки Иса һатийә буйине нә 25 Кануна Пешьн, нә жи 7 Чьләйе?

⁵ Дь Кʹьтеба Пирозда тʹö тьшт нәһатийә готьне дәрһәqа әʹйда буйина Иса. Бь рʹасти әм ньзаньн кö Иса кʹижан рʹоже һатә буйине. Ле әм сәд сәләфи дькарьн бежьн кö Иса нә 25 Кануна Пешьн һатийә буйине нә жи 7 Чьләйе, чьмки әв һәр дö рʹож жи ниве зьвьстане нә, у wи чахи ль wе дәре гәләк сар ә. Мәсәлә, Луqа ньвиси кö чахе Иса һатә буйине «ль wьр чоле шьван һәбун, кö wе шәве хwәйитийа кәрийе пәзед хwә дькьрьн» (Луqа 2:8-11). Һәрге шьван тʹәмамийа сале ль чоле буна, wәки öса нә чьма Луqа кʹьфш кьр кö wәʹде буйина Иса шьван ль чоле бун. Ле бь рʹасти зьвьстане шьван wе чоле нибуна, чьмки зьвьстане ль Бәйтʹләһме сар ә у бәрф ә, ләма шьван кәрийед хwә һöндöрʹда хwәй дькьрьн. Һьн жи һьнге Аwгустойе Qәйсәр әʹмьр кьр, кö һʹәму мәрьв бенә навньвисаре, у Усьв тʹәви Мәрйәм чунә Бәйтʹләһме (Луqа 2: 1-7). Найе баwәркьрьне кö Qәйсәр зьвьстане щьмәʹт сәре рʹийа хьста, чьмки әв щьмәʹт öса жи wи у сәрwертийа Рʹомайа рʹази нибун.

6, 7. (а) Әʹйда буйине жь кʹö һатийә һьлдане? (б) Чь фьрqи һәйә ортʹа пʹешкʹешдайина мәрьва бона әʹйда буйине у пʹешкʹешдайина Мәсиһийа?

⁶ Дәстпебуна әʹйда буйине жь Ньвисаред Пироз нинә, әв дәстпебуйә бәре жь һʹәбандьнед qәлп. Мәсәлә, ча әʹйда сатурнал йа рʹомайа. Әw әʹйд дьһатә кьрьне сәва пирозкьрьна хöдане әʹрдбещәркьрьне Сатурн. Дь «Енсиклопедийа Тʹәзә йа Католикада» те готьне: йед кö сәре хwә бәр Митра датанин, 25 Кануна Пешьн әʹйда «буйина тәʹве» дәрбаз дькьрьн. «Әʹйда буйина Иса жи wи чахи дәстпебу, чахе һʹәбандьна тәʹве гәләк бәла бьбу нава Рʹомайада», демәк wәкә сесьд сал паши мьрьна Иса.

⁷ Wәʹде wан әʹйда мәрьва кʹеф дькьрьн у пʹешкʹеш дьданә һәв, һәма öса рʹожа иройин жи әʹйда буйина  Иса дәрбаз дькьн. Ча бәре öса жи ньһа wәʹде ве әʹйде пʹәшкʹешдайьн мьqабьли wан гьлийа йә, йед кö дь 2 Корьнтʹи 9:7-да ньвисар ә: «Дьле һәр кәсирʹа чьqас дәрбаз дьбә, бьра һаqаси жи бьдә, нә кö бьдә ле дьле wи пәй бә йан бь борщдарийе бә, чьмки Хwәде йе бь дьл у әʹшq дьдә һʹьз дькә». Мәсиһийе рʹаст пʹешкʹеша дьдьнә һәв жь һʹьзкьрьне у бона ве йәке һивийа рʹожәкә мәхсус ниньн. У öса жи әwана һивийе ниньн, кö дәwса пʹешкʹеша хwә тьштәки бьстиньн. (Луqа 14:12-14; бьхунә Кʹаред Шандийа 20:35). Гәләк мәрьв wәʹде ве әʹйде гәләк щәфе дькʹьшиньн у дькʹәвьнә бьн дәйна, ле хьзмәткʹаред Хwәде ша нә кö жь wан хәрщ у щәфа хьлаз бунә (Мәтта 11:28-30; Йуһʹәнна 8:32).

8. Гәло стәйрнас рʹожа буйина Иса пʹешкʹеш данә wи? Шьровәкә.

⁸ Дьбәк һьнәк бежьн: нә ахьр стәйрнаса жи пʹешкʹеш данә Иса рʹожа буйина wи. Бь рʹасти wана пʹешкʹеш  бона рʹожа буйина wи нәдан. Wан wәхта бь пʹешкʹеша qәдьр дьданә кʹьфше һьндава мәрьвед навдар (1 Пʹадшати 10:1, 2, 10, 13; Мәтта 2:2, 11). Хенщи wе йәке стәйрнас чунә бал Иса нә кö wе шәве чахе әw һатә буйине. Бь рʹасти чахе әwана һатьн, Иса ида афьрʹда нибу, әw малда бу у ида чәнд мәһи бу.

9. Wәʹде wан әʹйдед рʹожа буйине, йед кö дь Кʹьтеба Пирозда һатьнә ньвисаре, чь qәwьмийә?

⁹ Рʹаст ә буйина зарʹе тʹьме жи мәʹнийа шабуне йә, ле Кʹьтеба Пирозда найе готьне, wәки хьзмәткʹаред Хwәде әʹйда рʹожа буйине дькьрьн (Зәбур 127:3). Дьбәкә wана дькьр ле дь Кʹьтеба Пирозда нәһатә ньвисаре? На, чьмки дь Кʹьтеба Пирозда дәрһәqа дö әʹйдед рʹожа буйине  те готьне, жь wана йәк йа Фьрәwьне Мьсьре бу, йа дьн жи йа Һеродәсе Антипас бу. (Бьхунә Дәстпебун 40:20-22; Марqос 6:21-29). Ле wәʹде wан һәр дö әʹйда жи тьштед хьраб qәwьмин, мәсәлә, wәʹде әʹйда буйина Һеродәсе Антипас, сәре Йуһʹәнна Ньхöмдар һатә жекьрьне.

10, 11. Хьзмәткʹаред Хwәдейә бәре ча дьньһерʹин ль сәр әʹйда рʹожа буйине у чьма?

¹⁰ Енсиклопедийа «Wорлд Бук» дьбежә кö «Мәсиһийед бәре дәрбазкьрьна әʹйда рʹожа буйине һʹәсаб дькьрьн әʹйда пʹутпʹарьста». Мәсәлә, Йунанийед бәре баwәр дькьрьн кö wәʹде буйина һәр мәрики рʹöһʹәк те, wәки нава тʹәмамийа жийина wи ле хwәй кә. Дь кʹьтебәкеда йа кö дәрһәqа әʹйда рʹожа буйине дьбежә, һатийә ньвисаре кö «әw рʹöһʹ гьредайи йә тʹәви хöданәки, йе кö рʹожа буйина wи мәрьви һатийә буйине». Әʹйда буйине зәʹф зудава һәйә, у әw тʹьме стәйрнасийе у һороскопийева тʹәвгьредайи бу.

¹¹ Хьзмәткʹаред Хwәдейә бәре, әʹйда рʹожа буйине дәрбаз нәдькьрьн нә тʹәне жь бо wе йәке кö әw әʹйд тʹәви пʹутпʹарьстийе у сербазийе гьредайи йә, ле öса жи, чьмки әwана мәрьвнә мьлук бун. Wана буйина хwә һʹәсаб нәдькьрьн ча тьштәки öса фәрз у мәзьн, wәки бона wе рʹоже әʹйде бькьн (Миха 6:8; Луqа 9:48). * Ле дәwсе wана пәсне Хwәде дьдан у рʹазибуна хwә wирʹа дьданә кʹьфше бона жийине (Зәбур 8:3, 4; 36:9; Әʹйанти 4:11). *

12. Рʹожа мьрьне ча дькарә жь рʹожа буйине хwәштьр бә?

 ¹² Дь кʹьтеба Wаиз 7:1-да ньвисар ә: «Наве qәнщ жь руне беһнхwәш [бинхwәш] у рожа мьрьне, жь рожа буйина зьламәки хwәштьр ә». Чьма Кʹьтеба Пироз öса дьбежә? Һәрге әм һʹәму qәwата хwә дьдьнә хәбате wәки шьхöле Хwәде бькьн, әме «наве qәнщ» бәр Хwәде qазанч кьн. Мәрьвед öса тʹьме бира Хwәдеда ньн, һәрге әwана бьмьрьн жи Хwәде ль ахьрийе wана жь мьрьне рʹакә (Ибо 14:14, 15). Ләма Кʹьтеба Пироз дьбежә кö рʹожа мьрьне жь рʹожа буйине хwәштьр ә. У ләма жи Кʹьтеба Пироз фәрмане дьдә мә wәки әм тʹәне әʹйдәке дәрбаз кьн, әв һәйә әйда рʹожа мьрьна Иса, нә кö әйда буйина wи. Чьмки Иса һʹәта мьрьне «наве qәнщ» хwәй кьр бәр Хwәде, у бь сайа wе йәке әм гьшк жи хьлазбуне дьстиньн (Ибрани 1:3, 4; Луqа 22:17-20).

13, 14. Һʹиме әʹйда Пасха жь кʹидәре йә?

¹³ Мәрьв әʹйда Пасха (Һекәсор) һʹәсаб дькьн ча әʹйда сахбуна Иса, ле бь рʹасти әв жь һʹәбандьна qәлп дәстпебуйә. Ле һек (һьнә wәлатада öса жи кʹеwрушк) ча гьредайи йә тʹәви Пасхе? Дь Әнсиклопедийа Британикада те готьне wәки һек «дьһатә һʹәсабе симбола дәстпебуна әʹмьр у сахбуйин» ле кʹеwрушк жи симбола бәрдарийе. Ләма жи әм дькарьн бежьн кö Пасха бь рʹасти тʹәви бәрдарийе гьредайи йә, ле әв йәк рʹьнд һатә вәшартьне бь әʹйда сахбуна Иса. *

¹⁴ Гәло Йаһоwа qәбул дькә wәки әw әʹйда нәтʹәмьз, йа кö тʹәви бәрдарийе гьредайи йә, бьбә симбола сахбуна Иса? Һәлбәт на! (2 Корьнтʹи 6:17, 18). Кʹьтеба Пироз  нә дьвежә нә жи изьне дьдә, wәки рʹожа сахбуна Иса кʹьфш кьн. Ле һьнә мәрьв һе тьштәки хьраб дькьн, чьмки рʹожа сахбуна Иса бь наве хöдане бәрдарийе кʹьфш дькьн.

15, 16. (а) Чьма бук у зәʹва гәрәке һʹәму әʹрф-әʹдәта леколин бькьн бь аликʹарийа Кʹьтеба Пироз? (б) Бук у зәʹва дәрһәqа әʹрф-әʹдәтед öса ча кö тʹәбахшькенандьн чь гәрәке бьдьнә һʹәсаб?

¹⁵ Әʹйанти 18:23-да бона Бабилона Мәзьн те готьне: «Wе иди дәнге бук-зәʹве жи тʹö щар нав тәда нәйе бьһистьне». Әw чь те һʹәсабе? Иро зәwаща мәрийа жь рʹожа дәʹwатева дәстпедьбә qьрʹеж бә. Чьмки Бабилона Мәзьн мәрийа һелан дькә wәки әʹрф-әʹдәтед кö сербазийева гьредайи бькьн. Ләма жи зутьрәке Бабилона Мәзьн wе бе кʹöтакьрьне (Марqос 10:6-9).

¹⁶ Дь һәр wәлатәкида әʹрф-әʹдәтед wан һәнә. Һьнәк жь wан те бежи безийан ьн, ле бь рʹасти һʹиме wан жь Бабилона Мәзьн дәстпедьбә. Әв әʹрф-әʹдәт йан чь бук у зәʹверʹа, йан жи меванарʹа, wе бәхтәwарийе бинә (Ишайа 65:11). Мәсәлә, тʹәбахе датиньн бьн ньгед бук у зәʹве, wәки әwана бьшкеньн, йан чь «бь wе йәке әwана жь рʹöһʹе хьраб тенә хwәйкьрьне» (Armenian Encyclopedia). Бешьк, әwед кö дьхwазьн хwә нава һʹьзкьрьна Хwәдеда хwәй кьн, wе гәләк дур хwә бьгьрьн жь әʹрф-әʹдәтед öса нә тʹәмьз. (Бьхунә 2 Корьнтʹи 6:14-18).

17. Бь кʹижан принсипед Кʹьтеба Пироз гәрәке бук у зәʹва öса жи меван рʹебәри бьн?

¹⁷ Хьзмәткʹаред Хwәде хwә дур дьгьрьн жь wан әʹрф-әʹдәтед wе дьнйайе, йед кö wе ләкʹе бинә сәр зәwаща wан, йан wе бьбә кәвьре лькʹöмандьне бона кәсәки. Мәсәлә, әwана ль сәр дәʹwата qәрфе хwә мәрьва накьн, һʹәнәкед бенамуси набежьн, у тьштед öса набежьн wәки бук-зәʹве йан жи меван шәрм кьн (Мәтʹәлок 26:18,  19; Луqа 6:31; 10:27). Хьзмәткʹаред Хwәде мәрьвнә мьлук ьн, ләма әwана дәʹwат бь хәрщед гьран дәрбаз накьн, wәки öса нәйе кʹьфше кö жь бо «кʹöбар-бабахийе» һәбука хwә дьхwазьн бьдьнә кʹьфше (1 Йуһʹәнна 2:16). Тö чахе һазьрийа дәʹwате дьвини, бира нәкә кö Йаһоwа дьхwазә, wәки чахе тö әве рʹожа мәхсус бини бира хwә, ша би, нә кö пʹошман би. *

18, 19. Дь кʹьтебәкеда чь те гьли кьрьне дәрһәqа салхихwарьне, у чьрʹа Мәсиһи әwи qәйдәйи qәбул накьн?

¹⁸ Ль сәр дәʹwата у кʹефа qәйдә йә салхийа вәхwьн. Дь кʹьтебәкеда öса һатә ньвисар: «Вәхwарьна салхийа жь әʹдәтәки бәре һатийә. Wи чахи мәрьв пʹешкʹешед пироз бь ичʹке дьанин хwәданед хwәрʹа . . . сәва кö дöа бькьн wәки мәрәм у мьразед wан бенә сери. У wана дöайе хwә öса хьлаз дькьр «һәр бьжи», йан жи, «сьһʹәт qәwат би» («Intеrnational Handbook on Alcohol and Culturе», 1995).

¹⁹ Гәләк мәри дь салхийада тьштәки религи йан жи пʹучʹһʹәбандьне навиньн. Ле чахе мәри кʹаса хwә бәрбь «әʹзман» бьльнд дькьн те бежи жь qәwатәке кʹәрәма дьхwазьн, бь рʹастийе әw йәк мьqабьли һинкьрьнед кʹьтеба Пироз ә (Йуһʹәнна 14:6; 16:23). *

20. Чьма әм гәрәке хwә дур бьгьрьн жь wан һьнә әʹйда жи, йед кö дьбәкә религийайева гьредайи ниньн?

²⁰ Бабилона Мәзьн öса дькә кö алийе намусийеда һʹале дьнйайе һе хьраб дьбә. Һьнә wәлатада тенә  дәрбазкьрьне әʹйд у кʹефед мәзьн, wәʹде кʹижана мәрьв бенамуси дьрʹәqьсьн. Wәʹде wан әʹйда жийина һомосексуали у ләзбийәни те пәсьндайине. Гәло щайиз ә әwед кö Йаһоwа һʹьз дькьн, һәрʹьн wан әʹйда йан жи бьньһерʹьн? Гәло бь ве йәке wе бе кʹьфше кö әwана бь рʹасти нәфрʹәт дькьн хьрабийе? (Зәбур 1:1, 2; 97:10). Wәрә әм чʹәʹв бьдьнә зәбурбежәки йе кö гьлийе öса гот: «Чʹавен мьн жь тьштен вала вә бьзьвьринә» (Зәбур 119:37).

21. Кʹижан дәрәщада мәсиһи дькарә сафи кә тʹәви әʹйде бә йан на?

²¹ Рʹожед әʹйдед ве дьнйайе, Мәсиһи гәрәке бь рʹабун-рʹуньштандьна хwә бьдә кʹьфше кö әw тʹәви wан әʹйда набә. Паwлосе шанди тʹәми да: «Һәрге һун бьхwьн, вәхwьн, йан чь шьхöли кö һун бькьн, һәр тьшти бона шькьрдайина Хwәде бькьн» (1 Корьнтʹи 10:31; бьньһерʹә чаргошә « Сафикьрьна бь Аqьлайи»). Ле һәрге әʹйд политикева, религийева у мьләтһʹьзийева гьредайи нинә у нәжи мьqабьли принсипед Кʹьтеба Пироз ә, һьнге мәсиһи дькарә хwәха сафи кә кö тʹәви wе әʹйде бә йан на. Ле гәрәке бона мәрьвед майин жи бьфькьрә, wәки бона wан нәбә кәвьре лькʹöмандьне.

22, 23. Әм ча дькарьн шәʹдәтийа баш бьдьн дәрһәqа нормед Йаһоwайә рʹаст?

²² Бона гәләк мәрьва әʹйд мәщал ә сәва кö тʹәви малбәте у һәвала тʹоп бьн. Ләма жи һьнә мәрьв бь шашбуне дьфькьрьн, wәки Шәʹдед Йаһоwа рʹаст накьн кö тʹәви wана әʹйда накьн, бь wе йәке әwана жь мәрьватийа хwә дур дькʹәвьн. Wи чахи әм дькарьн wан мәрьварʹа бь һʹьзкьрьне шьровәкьн, wәки Шәʹдед Йаһоwа пʹьрʹ qимәт дькьн тʹәви малбәте у һәвала wәʹдә дәрбаз кьн, ле сәва wе йәке әwана һивийа рʹожәкә мәхсус ниньн  (Мәтʹәлок 11:25; Wаиз 3:12, 13; 2 Корьнтʹи 9:7). Әм дькарьн тʹәви һәвала у малбәте тʹәмамийа сале кʹәнге бьхwазьн һьнге жи тʹоп бьн. Ле чахе әм тʹәви wан wәʹдә дәрбаз дькьн әм нахwазьн әʹдәт у әʹрәфатед öса бькьн, йед кö Хwәде беһöрмәт дькьн, чьмки әм Йаһоwа у нормед wи һʹьз дькьн (Бьньһерʹә чаргошә « Хьзмәткьрьна Рʹаст Шабуна Мәзьн Тинә»).

²³ Һьнә Шәʹдед Йаһоwа әве пьрсе мәрьвед дьлсахрʹа рʹьнд шьровәдькьн бь кʹьтеба «Чь Һин Дькә Кʹьтеба Пироз?» сәре 16. * Ле бир нәкә, wәки нета мә әw ә кö дьле мәрьва бькʹьрʹьн, нә кö избат кьн кö әw мәрьв нәрʹаст ә. Кʹьтеба Пироз дьбежә: «Бьра хәбәрдана wә мәʹрифәти у хwекьри бә» (Колоси 4:6).

24, 25. Де бав ча дькарьн али зарʹед хwә бькьн wәки баwәрийа wан qәwи бә у һʹьзкьрьна wан һьндава Йаһоwа зедә бә?

²⁴ Әм Шәʹдед Йаһоwа рʹьнд һатьнә һинкьрьне. Әм фәʹм дькьн кö һʹиме баwәрийа мә чь йә, у чьрʹа әм һьнә тьшт накьн (Ибрани 5:14). Де бавно ләма жи һун гәрәке зарʹед хwә һин кьн, wәки әwана бьфькьрьн сәр принсипед Кʹьтеба Пироз. Бь wә йәке һуне баwәрийа wан qәwи кьн, у али wан бькьн кö бь аликʹарийа Кʹьтеба Пироз щаба хwә бьдьн wан мәрийарʹа, йед кö баwәрийа wан дькьнә бьн шьке. Хенщи wе йәке зарʹед хwә бьдьнә баwәркьрьне, кö Йаһоwа wан һʹьз дькә (Ишайа 48:17, 18; 1 Пәтрус 3:15).

²⁵ Йед кö Хwәдерʹа «бь рʹöһʹ у рʹастийе» qöльх дькьн, нә кö тʹәне хwә дур дьгьрьн жь әʹйд у әʹрәфатед ве дьнйайе, ле öса жи дьхәбьтьн кö дьлпʹак бьминьн дь һʹәму дәрәщед жийинеда (Йуһʹәнна 4:23). Һьнәка тʹьре чәтьн ә дьлпʹак бьминьн wе дьнйа нәрʹастда. Ле сәре 14-да әме пебьһʹәсьн wәки житьна бь принсипед Хwәде тʹьме кʹаре тинә.