1. Nin-bʋs buud la a Zeova boond tɩ b wa yẽ nengẽ, la bõe yĩng tɩ b segd n baood n bãngd sẽn tat a Zeova yam wakat fãa?

A ZEZI yeelame tɩ wẽn-tũudb hakɩkã “na n waooga Ba a Wẽnnaam ne b sɩɩs la ne sɩda. Tɩ bõe, yaa neb a woto la Wẽnnaam baood tɩ b waoog bãmba.” (Zã 4:23) A Zeova sã n yã ned sẽn dat n sɩd waoog-a, a boonda a soabã t’a wa yẽ ne a Biigã nengẽ, wa a sẽn maan to-to ne yãmbã. (Zã 6:44) Woto sɩd yaa zu-zẽkr tɛkẽ! La a segd n bao n ‘bãnga sẽn tat Zusoabã yam’ wakat fãa, bala a Sʋɩtãan yaa zãmb soaba.—Efɛɛz rãmba 5:10; Wilgri 12:9.

2. Wãn to la a Zeova get neb nins sẽn dat n dɩk ziri tũudmã yɛl n naag tũudum hakɩkã pʋgẽ wã?

² D ges yell ning sẽn zĩnd Sinayi tãngã sɛɛgã, Israɛll nebã sẽn wa n kos a Aarõ t’a maan wẽnnaam n kõ-bã. A Aarõ sak n maana sãnem nag-bila, n wilg tɩ makda a Zeova. A yeela woto: “Beoog na n yɩɩ kibs [a Zeova] waoogr yĩnga.” La a Zeova basame tɩ b rɩk ziri tũudmã yɛl n naag tũudum hakɩkã pʋgẽ bɩ? Ayo. A kɩtame tɩ b kʋ sẽn pʋʋs-b bõn-naandgã, neb sẽn na ta tus a tãabo. (Yikri 32:1-6, 10, 28) Woto wilgda tõnd tɩ yɩl n pa Wẽnnaam nonglmã pʋgẽ, d segd n laka d mens ne “bõn-dẽgd” la d ra naag yɛl sẽn pa sõma la ziri tũudum hakɩkã pʋgẽ ye.—Ezai 52:11; Ezekɩɛll 44:23; Galat dãmba 5:9.

3, 4. Kibs rãmbã la rog-n-migsã wɛɛngẽ, bõe yĩng tɩ d segd n bao n bãng Biiblã sẽn yet bũmb ningã?

 ³ Tʋm-tʋmdbã ra pa sakd tɩ ziri tũudmã yɛl kẽ tũudum hakɩkã pʋgẽ ye. La zu-bʋko, b kũumã poore, kiris-neb ne yʋʋrã sẽn pa nong sɩdã sɩnga ziri tũudmã rogs-n-migs la b kibs rãmb maanego, n yetẽ tɩ yaa kiris-neb kibs rãmba. (2 Tesalonik rãmba 2:7, 10) D na n goma kibs kãens kẽer yelle. Y na n yãame tɩ b sɩd pa tat Wẽnd yam, bala yɛl nins nebã sẽn maand sasa kãensã wã wilgdame tɩ yaa dũniyã yam la b tara, lakae pa Wẽnnaam vʋʋsem sõngã ye. Dũniyã kibs rãmb wõnda taab yɛl wʋsg pʋsẽ: Kibs sasa, b maanda ziri tũudum yɛla, tɩt la zĩn-dãmb yɛla, yɛl sẽn wilgd tɩ b tẽedame tɩ yaab rãmbã tara sɩɩs sẽn ket n vɩ, la b maand yɛl sẽn pidsd b yĩngã ratem wẽnse, la woto fãa wilgdame tɩ kibs-kãensã yita “Babilon kãsengã” pʋgẽ. * (Wilgri 18:2-4, 23) Ning-y y yamẽ me t’a Zeova meng miime tɩ kibs rãmbã wʋsg sẽn be rũndã-rũndã wã yii ziri tũudmã yel-maandɩ sẽn yaa wẽns wʋsgã pʋgẽ. La rũndã-rũndã me, a nifẽ yel-kãensã yaa bõn-dẽgdo. Dẽnd tõnd me nifẽ, kibs-kãensã segd n yɩɩ bõn-dẽgdo.—2 Zã 6, 7.

⁴ Tõnd sẽn yaa kiris-neb hakɩkã, d miime tɩ kibs rãmb kẽer pa tat a Zeova yam ye. La d segd n modgame n da kẽes d meng b pʋsẽ baa bilf ye. D na n tẽega bũmb ning sẽn kɩt tɩ kibs la rog-n-migs kẽer pa tat a Zeova yamã, tɩ sõng-d tɩ d lak d mens ne rẽ n tõog n pa Wẽnnaam nonglmã pʋgẽ.

5. Bõe n kɩt tɩ d mi vẽeneg t’a Zezi pa rog yʋʋm-sar kiuug rasem 25?

⁵ Biiblã pa gomd a Zezi rogem daar tẽegr kibs yell ye. D pʋd n pa mi a Zezi rogem daar takɩ ye. La d mii vẽeneg  t’a pa rog yʋʋm-sar kiuug rasem 25, sẽn yaa waood wakat Israɛllã ye. * D tẽeg t’a Luk yeelame t’a Zezi rogmã sasa tɩ ‘pe-kɩɩmbã ra bee weoogẽ.’ (Luk 2:8-11) Pe-kɩɩmbã sã n da minim n bee weoogẽ yʋʋmdã fãa pʋgẽ, a Luk ra pa na n gom rẽ yelle, bala ra pa na n tall yõod ye. La sẽn mik tɩ Betlehɛm, yʋʋm-sar kiuugã ra yaa waoodo, saas la neez sasa wã yĩnga, yaa vẽeneg tɩ pe-kɩɩmbã ra na n paga b piisã, la bãmb me ra pa na n tɩ be weoogẽ yʋng ye. Sẽn paase, a Sezaar Ogust da kõo noor tɩ b sõd nebã, t’a Zozɛf ne a Maari kẽng Betlehɛm wakat kãngã. (Luk 2:1-7) La yaa vẽeneg t’a Sezaar sẽn da mi tɩ nebã pa nong Rom naamã yĩnga, a ra pa na n saag n kõ noor tɩ b leb b ba-yiyã waoodã sẽn tar pãngã sasa ye.

6, 7. a) Yɛl wʋsg nebã sẽn maand Nowɛllã sasa wã yii yɛ? b) Bõe n wilgd tɩ nebã sẽn kõt taab kũun to-to Nowɛllã sasa wã pa wa kiris-ned sẽn tog n kõ kũun to-to wã?

⁶ Biiblã pa gomd Nowɛllã yell ye. Nowɛllã yaa kibs sẽn yi ziri tũudmã kibs rãmb wala Rom Saturnallã pʋgẽ. Yaa kibs b sẽn da maand a Saturn sẽn yaa bãmb koob wẽnnaamã yĩnga. Sebr a ye (Nouvelle Encyclopédie catholique [ãngil.]) yeelame tɩ neb nins sẽn pʋʋsd wẽnd ning b sẽn boond t’a Mitra wã ra maanda wĩntoogã rogem daar tẽegr kibs yʋʋm-sar kiuug rasem 25, la tɩ Nowɛllã sɩnga wakat ning neb wʋsg sẽn da pʋʋsd wĩntoogã Rom tẽngã pʋgẽ wã, sẽn zems yʋʋm kobs-tã Kirist kũumã poore.

⁷ Kibs-kãensã sasa, nebã ra nong n kõta taab kũuni, la b rɩt rɩ-nood buud toor-toore. La rũndã-rũndã, yaa woto me la nebã maand Nowɛll daare. Sẽn paase, nebã sẽn kõt taab kũunã pa zems ne 2 Korẽnt dãmba 9:7 sẽn yetã ye. Be b  yeta woto: “Bɩ ned kam fãa kõ wa sẽn zems a sẽn da tags a sũur pʋgẽ, ka ne neng gãneng walla modgr ye, tɩ bõe, Wẽnnaam nonga ned ning sẽn kõt ne sũ-noogo.” Kiris-neb hakɩkã kõta nebã kũun b sẽn nong-bã yĩnga, la b pa gũud raar takɩ n na n kõ kũun ye. B pa gũud me tɩ nebã kõ-b n lebs ye. (Luk 14:12-14; Tʋʋma 20:35) Sẽn paase, b sũur yaa noogo, b sẽn paam b mens ne Nowɛllã sẽn wat ne yɩɩr la yaams ninsã. Kɩtdame me tɩ b pa kẽesd b mens sam pʋgẽ wa kẽer sẽn maand sasa kãngã wã ye.—Matɩe 11:28-30; Zã 8:32.

8. Ãds bagbã talla b kũunã n tɩ kõ a Zezi a rogmã kibs yĩng bɩ? Wilg-y y leokrã võore.

⁸ La kẽer yetame tɩ yam dãmbã bɩ ãds bagbã talla kũun n tɩ kõ a Zezi a rogmã kibs yĩnga. Woto pa sɩd ye. Pĩnd wẽndẽ wã, nebã ra nong n kõta naab bɩ nin-bedr kũuni. Dẽnd b  talla kũunã n tɩ kõ a Zezi, b sẽn da mi t’a na n wa yɩɩ naabã yĩnga. (1 Rĩm dãmba 10:1, 2, 10, 13; Matɩe 2:2, 11) B pʋd n pa wa a Zezi rogmã daar yʋng ye. B pa wa mik a Zezi rũms rɩɩb koglg pʋgẽ ye. B waa kiis a wãn poore, n mik t’a bee ne a roagdbã roog pʋgẽ.

9. Bõe n maan rogem daar tẽegr kibs nins Biiblã sẽn gomd b yellã sasa?

⁹ Baa ne biig rogem sẽn yaa sũ-noog bũmbã, Biiblã pa gomd wẽn-tũudb hakɩk sẽn maan b rogem daar tẽegr kibs yell ye. (Yɩɩl Sõamyã 127:3) B yĩmame n pa togs bɩ? Ayo, bala Biiblã gomda Ezipt Faraõ a ye la a Herood Ãntipas rogem daar tẽegr kibs yelle. (Sɩngre 40:20-22; Mark  6:21-29) La b yiibã fãa kibsã pa baas neer ye. Sẽn yɩɩd fãa a Herood Ãntipas nengẽ wã, bala yaa wakat kãng la a kɩt tɩ b fiuug a Zãmbatiis zugã.

10, 11. Pipi kiris-nebã tagsg ra yaa wãn to ne rogem daar tẽegr kibsã, la bõe yĩnga?

¹⁰ Sebr a ye (The World Book Encyclopedia) yeelame tɩ “pipi kiris-nebã ra geta ned rogem daar tẽegr kibsã wa ziri tũudmã yel-maandɩ.” Wala makre, pĩnd wẽndẽ gɛrk rãmbã ra tẽedame tɩ kinkirg n wat ninsaal fãa rogmẽ, n kell n kogl-a a yõor tɛka. Sebr a ye (Coutumes et usages des anniversaires [ãngil.]) yeela woto: “Kinkir-kãng ra tara zems-n-taar buud ne wẽnd ning rogem daar sẽn zems ne nedã rogem daarã.” Rogem daar tẽegr kibs rãmbã ne ãdsã bagrã la oroskopã sẽn sɩng n tũud taab daar zãra.

¹¹ Pa rogem daar tẽegr kibs rãmbã sẽn yit ziri tũudmã pʋgẽ, la sẽn naag ne zĩn-dãmb yɛlã yĩng bal n kɩt tɩ pĩnd wẽndẽ wẽn-tũudb hakɩkã ra pa maand-bã ye. B sẽn da yaa sik-m-mens rãmbã yĩngã me, b ra pa get tɩ b rogmã daar tara yõod wʋsg hal tɩ b segd n maand kibs ye. * (Miise 6:8; Luk 9:48) B ra pẽgda a Zeova la b pʋʋsd-a bark a sẽn kõ-b vɩɩmã yĩnga. *—Yɩɩl Sõamyã 8:4, 5; 36:10; Wilgri 4:11.

12. Bõe yĩng tɩ d tõe n yeel tɩ ned kũum daar n são a rogem daare?

¹² A Zeova tẽra neb nins fãa sẽn kell n tũ-a n tãag b kũumã yelle, la a na n vʋʋg-b lame. (Zoob 14:14, 15) Koɛɛg Soab 7:1 yeta woto: “Yʋ-sõng n são tɩdar kaam sẽn yaa sõma. La ned kũum daar n são a rogem daare.” Yaa d sã n maand Wẽnnaam daabã wakat fãa la d tar “yʋ-sõng” a nifẽ. Sẽn paas me, yaa a Zezi kũumã daar yell la b kõ kiris-nebã  noor tɩ b tẽegdẽ, pa a rogmã daar ye. “Yʋ-sõng” ning a sẽn da tar Wẽnnaam nifẽ a kũumã sasa wã kɩtame tɩ tõnd tõe n paam fãagre.—Luk 22:17-20; Hebre dãmba 1:3, 4.

13, 14. Bõe yĩng tɩ kiris-neb hakɩkã pa maand Pakã?

¹³ Kiris-neb ne yʋʋrã yetame tɩ Pakã yaa Kirist vʋʋgrã tẽegr kibsa. La Kirist yeelame tɩ b maand kibs n tẽegd a vʋʋgrã yell bɩ? Ayo. Sɩngrẽ wã, Pakã ra yaa Zʋɩf rãmbã kibs sẽn da tẽegd Israɛll nebã Ezipt yiibã, la nebã wa n tẽedame tɩ Pakã tẽegda a Zezi vʋʋgrã. Pipi kiris-nebã pa maan Pak sẽn tẽegd a Zezi vʋʋgr ye. Sebr a ye (Encyclopædia Britannica) yetame tɩ b pa gomd Pak sẽn tẽegd a Zezi vʋʋgr yell Kãab-paalgã pʋgẽ ye. Pipi kiris-nebã pʋd n da pa yãk ray n getẽ tɩ yaa ra-sõms Wẽnnaam nifẽ ye.

¹⁴ A Zeova na bas tɩ b maan kibs sẽn yi ziri tũudmã pʋgẽ n tẽeg a Biigã vʋʋgr yell sɩda? Abada! (2 Korẽnt dãmba 6:17, 18) Biiblã pa kõ noor bɩ sor tɩ b maan a Zezi vʋʋgrã tẽegr kibs ye. Dẽnd nebã sẽn maand woto n boond rẽ tɩ Pakã yaa wẽng wʋsg Wẽnnaam nifẽ.

15. Yʋʋm-paalg kibsã sɩnga yɛ?

¹⁵ Neb wʋsg maanda yʋʋm-paalg kibsi. La sɩnga yɛ? Sebr a ye (The World Book Encyclopedia) yeela woto: “Yaa yʋʋmd 46 sẽn deng a Zezi rogmã la Rom naab a Zill Sezaar yãk yʋʋm-vẽkr pipi daar fãa tɩ b na n maand yʋʋm-paalg kibsi. Rom dãmbã ra maanda kibs-kãng b wẽnnaam a Zanus sẽn yaa rig-noy la kʋɩlens ne sɩngr wẽnnaamã yĩnga. B rɩka a Zanus yʋʋrã n pʋd yʋʋm-vẽkr kiuugã, tɩ b boond ne farend tɩ janvier. A Zanus ra tara nens a yiibu, t’a ye get taoor t’a to wã get poorẽ.” Daar ning b sẽn maand kibsã, la bũmb nins b sẽn maandã pa yembr zĩig fãa ye. Kibsã sasa, nebã nong n yũuda rãam wʋsg la saood sao-yoodo. La Rom dãmb 13:13  yeta woto: “Bɩ d kẽng tɩrg wa wĩntoogo, ka ne deem nins sẽn ka sõma wã ye, ka ne dã-tɩgr la raglem la yoob ye, ka ne mo-beed la sũ-kiir ye.” *

16, 17. a) Bõe yĩng tɩ kiris-neb sẽn segend b kãadem segd n gũus n da maan bũmb sẽn kɩɩsd Biiblã noyã? b) Bõe la kiris-nebã segd n bãnge, bũmb nins nebã sẽn fãeed pʋg-paalã ne a sɩdã wɛɛngẽ?

¹⁶ Ka la bilfu, ned “kõn le wʋm pʋg-paal ne a sɩd koɛɛg [Babilon kãsengã] pʋg ye.” (Wilgri 18:23) Bala Babilon kãsengã meng na n menemame, a “bagrã yĩnga,” la yel-yood nins a sẽn kɩt tɩ nebã maand kãadem kibs rãmbã sasa tɩ tõe n dẽgem kãadmã Wẽnnaam nifẽ a kõomã daar mengã yĩnga.

¹⁷ Tẽng fãa tara a rog-n-mik la a yel-maandɩ. Kẽer tõe n wõnda yaa sõma, yaool n yit pĩnd wẽndẽ ziri tũudmã pʋgẽ. Tõe n yaa yɛl nebã sẽn da maand kãadem kibs rãmbã sasa n tagsdẽ tɩ rẽ n na n kɩt tɩ b “zu-noog wẽndã” ning pagã ne a sɩdã, la neb nins sẽn wa kãadmã kibsã barka. (Ezai 65:11, Sebr Sõngo) Wala makre, nebã nong n fãeeda pʋg-paalã ne a sɩdã mui bɩ sɛb b sẽn wõrse, bɩ bũmb a to sẽn yaa zom-zom. Tõe tɩ woto yita pĩnd wẽndẽ dãmbã sẽn da tẽed tɩ rɩɩb kɩtdame tɩ zĩn-dãmbã sũy sig tɩ b pa maan pʋg-paalã ne a sɩdã wẽngã. Sẽn paase, nebã ra sɩng n tẽedame tɩ mui tõe n waa ne rogem, sũ-noogo, la yõ-woko. Ned ning fãa sẽn dat n pa Wẽnnaam nonglmã pʋgẽ segd n laka a meng fasɩ ne yel-kãensã sẽn yit ziri tũudmã pʋgã.—2 Korẽnt dãmba 6:14-18.

18. Biiblã sagl-bʋs la rao ne pag sẽn segend b kãadem kibsi, ne neb nins b sẽn boolã segd n tũ?

¹⁸ Neb nins sẽn tũud a Zeova wã lakda b mens ne bũmb  nins fãa sẽn tõe n kɩt tɩ b kãadmã kibsã pa ta Wẽnnaam yamã, bɩ sẽn tõe n nams neb a taab sũur-kasetã. Wala makre, gom-dẽgd bɩ gom-yood sẽn ningd pʋg-paalã ne a sɩdã yãnde, la sãamd neb a taab sũyã. (Yelbũna 26:18, 19; Luk 6:31; 10:27) B leb n pa maand b kãadem kibs tɩ yɩ kãseng sẽn na yɩl n wilg b tarem ye. (1 Zã 2:16) Yãmb sã n segenda y kãadem kibsi, bɩ y ra yĩm t’a Zeova ratame tɩ y sã n wa tẽeg rẽ bɩ y sũur yɩ noogo, la y ra maan y bãngẽ ye. *

19, 20. Bõe la sebr a yembr yeel nebã sẽn dɩkd b vɛɛr dãmb n kogsd taabã wɛɛngẽ, la bõe yĩng tɩ kiris-ned pa segd n maan dẽ?

¹⁹ Kãadem kibs bɩ tigr a to sasa, nebã sã n wa yũud rãam, b nong n kogsda b vɛɛr dãmbã ne taaba. Sebr a yembr (Le Guide international des alcools et des cultures [ãngil.]) sẽn yi yʋʋmd 1995 yeela woto: “Nebã sẽn mi n dɩkd b vɛɛr dãmb n kogs taab bɩ n zẽk yĩngrã yita pĩnd wẽndẽ yel-maandɩ pʋgẽ. B ra mi n dɩkda bõn-yũudl n kõt b wẽnnaam dãmbã n kot yõ-wok bɩ laafɩ.”

²⁰ Neb wʋsg tõeeme n pa get tɩ nebã sẽn mi n dɩkd b vɛɛr dãmb n kogsd taabã yaa ziri tũudum yel-maandɩ ye. La bãng-y tɩ zẽk vɛɛr n tees yĩngrã tõe n wilgdame tɩ f kota bark yĩngr pãn-dãmb nengẽ. Sãnda kɩrgda rãamã tẽng n kõ b yaab rãmb la b yaool n yũ. La woto fãa yaa bũmb sẽn kɩɩsd Biiblã sẽn yetã.—Zã 14:6; 16:23. *

21. Kibs bʋs buud la kiris-nebã segd n lak b mens ne, la bõe yĩnga?

²¹ Babilon kãsengã kɩtame tɩ nebã manesem tar  sãoongo. D yãta rẽ kibs kẽer sasa. Tẽns kẽer pʋsẽ, b maanda kibs rãmb yʋʋmd fãa tɩ nebã saood sao-yoodo, tɩ wakat ninga, rap sẽn gãe rap la pagb sẽn gãe pagb maand defile tɩ nebã get-ba. Ned sẽn nong a Zeova segd n naag n maana kibs kãensã bɩ n ges-b bɩ? A sã n maan woto a sɩd wilgdame t’a kisa sẽn yaa wẽng sɩda? (Yɩɩl Sõamyã 1:1, 2; 97:10) Yaa sõma tɩ tõnd me maan wa yɩɩl gʋlsdã, n kos a Zeova woto: “Bɩ y kɩt tɩ m wẽneg n da ges bõn-zaals ye.”—Yɩɩl Sõamyã 119:37.

22. Sã n wa yaa kibs bʋs buud la kiris-ned fãa tõe n yãk a sã n na n maaname bɩ a pa na n maane?

²² Nebã sã n wa maand kibs sẽn pa segd ne kiris-neda, kiris-neb hakɩkã segd n gũusame n da maan bũmb sẽn na n kɩt tɩ neb a taabã wa tẽ tɩ bãmb me naag n maandame ye. A Poll yeela woto: “Yãmb sẽn dɩta, walla yãmb sẽn yũuda, walla yãmb sẽn maand bũmb a taaba, bɩ y maan fãa Wẽnnaam waoogr yĩnga.” (1 Korẽnt dãmba 10:31; ges-y seb-neng 158-159 zĩ-gũbrã sẽn yet tɩ:  “D sẽn na n maan yam-yãkr sẽn yaa sõma to-to.”) La sã n yaa vẽeneg tɩ kibs bɩ rog-n-mik ning pa naag ziri tũudum yɛla, a pa tẽngã yʋʋr yĩng bɩ politik yĩnga, la a pa kɩɩsd Biiblã noyã, yaa kiris-ned fãa n yãkde. La baasg zãnga, a segd n gũusame t’a yam-yãkrã ra wa koms ned tẽeb ye.

23, 24. Wãn to la d tõe n sõng nebã tɩ b bãng a Zeova noyã?

²³ Neb wʋsg getame tɩ kibs daare, b tõe n paam n tigma ne b roagdb la b zo-rãmba. Dẽnd ned sã n yeel tɩ tõnd sẽn tũud Biiblã noyã n pa naagd n maand kibs rãmbã, d pa nong neba, bɩ tɩ d yaa dem-dem wʋsgo, d tõe n maaga d yĩng n wilg-a t’a Zeova Kaset rãmbã me miime tɩ tigim ne f roagdb la f zo-rãmb yaa sõma. (Yelbũna 11:25; Koɛɛg Soaba 3:12, 13; 2 Korẽnt dãmba  9:7) D nong n tigimda ne d roagdb la d zo-rãmb wakat-wakat yʋʋmdã fãa pʋgẽ. La d sẽn nong a Zeova la d rat n tũ a noyã yĩnga, d pa rat n sãam tigis-kãens ne yel-maandɩ sẽn pa tat a yam ye.—Ges-y seb-neng 156 zĩ-gũbrã sẽn yet tɩ: “ Tũudum hakɩkã kõta sũ-noog hakɩka.”

²⁴ A Zeova Kaset rãmb n tũnug ne Biiblã sɩd yetame tɩ bõe? * sebrã sak 16 n sõng neb tɩ b bãng Biiblã sẽn yet kibs rãmbã wɛɛngẽ. Tẽeg-y tɩ d sẽn datã yaa sõng nebã tɩ b bãng Biiblã sẽn yetã, pa wilg tɩ b tudgame ye. Bɩ y waoog nebã, n kell n bʋk y sũuri, la y “kɩt tɩ yãmb goamã [tall, NW] bark wakat fãa n paam yamsem noom.”—Kolos rãmba 4:6.

25, 26. Wãn to la roagdbã tõe n sõng b kambã tɩ b tall tẽeb sẽn tar pãnga, la b nong a Zeova wʋsgo?

²⁵ Tõnd sẽn yaa a Zeova Kaset rãmbã, d mii d sẽn maande. D mii bũmb ning sẽn kɩt tɩ d tẽed yɛl kẽerã, la bũmb ning sẽn kɩt tɩ d maand yɛl kẽer la d pa maand yɛl sãnda wã. (Hebre dãmba 5:14) Woto yĩnga, roagdba, sõng-y y kambã tɩ b wʋm Biiblã noyã võor sõma. Y sã n maan woto, na n sõng-b lame tɩ b paam tẽeb sẽn tar pãnga, la kɩt tɩ b tõog n leok ned ning fãa sẽn na n sok-b bũmb b tẽebã wɛɛngẽ. Woto na n kɩtame tɩ b bãng t’a Zeova sɩd nong-b lame.—Ezai 48:17, 18; 1 Pɩɛɛr 3:15.

²⁶ Sẽn waoogd-b Wẽnnaam “ne b sɩɩs la ne sɩdã” lakda b mens fasɩ ne kibs la rog-n-migs nins fãa sẽn pa tat Wẽnnaam yamã, la b modgdame me n yɩt pʋ-peelem dãmb bũmba fãa pʋgẽ. Rũndã-rũndã, neb wʋsg getame tɩ pʋ-peelem pa tar yõod ye. La wala d sẽn na n yã sak ning sẽn pʋgdã pʋgẽ wã, wakat fãa Wẽnnaam noyã tũub n nafd ned n yɩɩda.