1. Йегъовӕ йӕхимӕ цавӕр адӕмы ӕрбакӕны ӕмӕ, Хуыцауы зӕрдӕмӕ цы цӕуы, уый ӕппынӕдзух цӕмӕн хъуамӕ бӕлвырд кӕной?

ЙЕСО загъта: «Ӕцӕг кувӕг адӕм нӕ уӕларвон Фыдӕн кувдзысты Хуыцауы сыгъдӕг тыхы разамындмӕ гӕсгӕ ӕмӕ рӕстдзинадмӕ гӕсгӕ, уымӕн ӕмӕ нӕ уӕларвон Фыд ахӕм кувӕг адӕмы агуры йӕхицӕн» (Иоанны 4:23). Йегъовӕ ахӕм адӕмы куы ссары – дӕу куыд ссардта, афтӕ,– уӕд сӕ йӕхимӕ ӕмӕ йӕ Фыртмӕ ӕрбакӕны (Иоанны 6:44). Цӕй стыр кад у уый! Библийы цы рӕстдзинад ис, уый чи уарзы, уыдон хъуамӕ «ӕппынӕдзух бӕлвырд кӕной, нӕ Хицауы зӕрдӕмӕ цы цӕуы, уый», уымӕн ӕмӕ Хӕйрӕг сайынмӕ дӕсны у (Ефесӕгтӕм 5:10; Раргомад 12:9).

2. Раст дин мӕнг динимӕ чи схӕццӕ кӕны, уыдонмӕ Йегъовӕ цы цӕстӕй кӕсы? Бамбарын ӕй кӕн.

² Ӕрхъуыды-ма кӕнӕм, раджы заманты Синайы хохы цур цы хабӕрттӕ ӕрцыд, уыдон. Израилӕгтӕ Ааронӕн загътой, цӕмӕй сын хуыцау сарӕзтаид. Аарон сразы ӕмӕ сызгъӕрин род сарӕзта, цыма Йегъовӕйы номыл уыд, афтӕ, ӕмӕ адӕмӕн загъта: «Райсом уыдзӕн бӕрӕгбон Йегъовӕйы номыл». Цымӕ, раст дин мӕнг динимӕ кӕй схӕццӕ кодтой, уымӕ Йегъовӕ куыдфӕндыйы цӕстӕй ракаст? Уый афтӕ нӕ уыд. Родӕн чи куывта, уыдонӕй ӕртӕ мины бӕрц ныццагъта (Рацыд 32:1–6, 10, 28). Уыцы хабарӕй зондӕн райсӕн цы ис? Кӕд нӕ нӕ фӕнды,  цӕмӕй Хуыцауы уарзтӕй нӕхи ӕнӕхай фӕкӕнӕм, уӕд-иу хъуамӕ, «чъизи цы у, ахӕмӕй мацӕмӕ бавналӕм» ӕмӕ нӕ лӕггад мацӕмӕй фӕчъизи кӕнӕм (Исай 52:11; Йезекил 44:23; Галатӕгтӕм 5:9).

3, 4. Ацы дунейы ӕгъдӕуттӕ ӕмӕ бӕрӕгбӕттӕ иртасгӕйӕ Библийы уагӕвӕрдтӕ нӕ зӕрдыл цӕмӕн хъуамӕ дарӕм?

³ Цалынмӕ апостолтӕ удӕгас уыдысты, уӕдмӕ архайдтой, цӕмӕй чырыстӕттӕ, раст дины ныхмӕ чи сси ӕмӕ йӕ чи ныууагъта, уыдоны ахуырӕдтыл ма ныххӕцыдаиккой. Фӕлӕ сӕ мӕлӕты фӕстӕ, рӕстдзинад чи нӕ уарзта, фӕлӕ йӕхи чырыстон чи хуыдта, уыдон мӕнг дины ӕгъдӕуттӕ ӕмӕ бӕрӕгбӕттӕ кӕнын райдыдтой ӕмӕ сӕ схуыдтой чырыстон ӕгъдӕуттӕ ӕмӕ бӕрӕгбӕттӕ (2 Фессалоникӕгтӕм 2:7, 10). Уыцы бӕрӕгбӕттӕй иуӕй-иутыл куы ныхас кӕнӕм, уӕд-иу дӕ хъус ӕрдар, Хуыцауы зондахаст сӕ кӕй нӕ зыны, фӕлӕ дунейы зондахаст. Ацы дунейы бӕрӕгбӕттӕ цӕмӕйдӕр ӕмхуызон сты: сты тӕригъӕдджын буары монцтӕ ӕфсадынӕн ӕмӕ баст сты мӕнг дины ӕгъдӕуттимӕ ӕмӕ хинтӕ-кӕлӕнтимӕ – уыдон та сты «Стыр Вавилоны» бӕрӕггӕнӕнтӕ * (Раргомад 18:2–4, 23). Стӕй дӕ рох ма уӕд, Йегъовӕ йӕхӕдӕг кӕй уыдта, абоны зындгонд бӕрӕгбӕттӕй бирӕтӕ мӕнг динты ӕлгъаг хъуыддӕгтӕй ӕмӕ ’гъдӕуттӕй куыд равзӕрдысты, уый. Кӕй зӕгъын ӕй хъӕуы, абон дӕр ахӕм бӕрӕгбӕттӕ Хуыцауы цӕсты ӕлгъаг сты. Уӕдӕ нын Йегъовӕйы хъуыдыйӕ ахсджиагдӕр цы хъуамӕ уа? (2 Иоанны 6, 7).

⁴ Мах зонӕм, кӕцыдӕр бӕрӕгбӕттӕ Йегъовӕйы зӕрдӕмӕ кӕй нӕ цӕуынц. Фӕлӕ хъуамӕ нӕхицӕн фидарӕй зӕгъӕм, уыцы бӕрӕгбӕттӕм ӕппындӕр кӕй ницы бар  дардзыстӕм. Цавӕрдӕр бӕрӕгбӕттӕ Йегъовӕйы зӕрдӕмӕ цӕуылнӕ цӕуынц, уый куы базонӕм, уӕд нӕ ноджы тынгдӕр фӕнддзӕн, цӕмӕй нӕхи хизӕм, Хуыцауы уарзтӕй ӕнӕхай цӕй тыххӕй фӕуыдзыстӕм, уыдӕттӕй.

5. Йесо 25 декабры кӕнӕ 7 январы кӕй нӕ райгуырд, уый кӕцӕй зонӕм?

⁵ Бирӕтӕ Рождество нымайынц Чырыстийы гуырӕнбоныл. Фӕлӕ Библийы никуы ис фыст, ӕмӕ чидӕр Йесо Чырыстийы гуырӕнбон бӕрӕг кодта. Уӕвгӕ, бӕлвырдӕй цы бон райгуырд, уый бӕрӕг дӕр нӕу. Фӕлӕ нӕ бон у фидарӕй зӕгъын, 25 декабры кӕнӕ 7 январы кӕй нӕ райгуырд, уымӕн ӕмӕ, кӕм райгуырд, уым уыцы рӕстӕг вӕййы зымӕг ӕмӕ дзы вӕййы уазал *. Зӕгъӕм, Лука ныффыста, зӕгъгӕ, Йесо куы райгуырд, уыцы рӕстӕг фыййӕуттӕ «быдыры цардысты» ӕмӕ сӕ дзугтӕ хъахъхъӕдтой (Лукайы 2:8–11). Быдыры ӕнӕхъӕн афӕдзы дӕргъы куы цардаиккой, уӕд уый кой не скодтаид. Фӕлӕ Вифлеемы уыцы рӕстӕг уазал къӕвдатӕ ӕмӕ мит кӕй фӕуары, уымӕ гӕсгӕ фос дардтаиккой скъӕтты ӕмӕ фыййӕуттӕ дӕр быдыры нӕ цардаиккой. Уымӕй уӕлдай, Иосиф ӕмӕ Марийӕ ацыдысты Вифлееммӕ, уымӕн ӕмӕ Ромы паддзах Август бардзырд радта, цӕмӕй адӕм сӕхи ныффыстаиккой (Лукайы 2:1–7). Фӕлӕ уый зымӕгон нӕ уыдаид, уымӕн ӕмӕ адӕм ӕнӕуи дӕр Ромы хицауадӕй разы нӕ уыдысты, ӕмӕ сӕ паддзах сӕ фыдӕлты горӕттӕм ахӕм уазал рӕстӕг куы ’рвыстаид, уӕд сызмӕстаиккой.

6, 7. а) Рождествойы ӕгъдӕуттӕй бирӕтӕ куыд равзӕрдысты? б) Ӕцӕг чырыстӕттӕ лӕвӕрттӕ куыд фӕкӕнынц, уый куыд хицӕн кӕны, Рождествойы рӕстӕг адӕм лӕвӕрттӕ куыд фӕкӕнынц, уымӕй?

 ⁶ Рождествойы тыххӕй Библийы ницы ис фыст. Уыцы ӕгъдау равзӕрд, раджы заманты-иу мӕнгхуыцӕуттӕн кувӕг адӕм кӕй кодтой, уыцы бӕрӕгбӕттӕй, зӕгъӕм, ромаг Сатурналийӕ, тыллӕджы хуыцау Сатурны номыл кӕй кодтой, уыцы бӕрӕгбонӕй. Иу энциклопедийы фыст ис: «Рождество 25 декабры бӕрӕг кӕнын райдыдтой ӕрмӕстдӕр 4 ӕнусы. Ӕвӕццӕгӕн, уый тыххӕй, ӕмӕ чырыстон аргъуаны фӕндыд, цӕмӕй адӕм мауал куывтаиккой, Ромы паддзахады тынг кадджын чи уыд, уыцы рагон ирайнаг хуыцау Митрӕйӕн. Митрӕйы гуырӕнбон дӕр бӕрӕг кодтой 25 декабры» (Мир русской культуры).

⁷ Мӕнгхуыцӕуттӕн кувӕг адӕм-иу сӕ бӕрӕгбӕтты рӕстӕг кӕрӕдзийӕн лӕвӕрттӕ кодтой ӕмӕ-иу минас кодтой, абон Рождествойы рӕстӕг куыд фӕкӕнынц, афтӕ. Фӕлӕ абон куыд у хабар, афтӕ уӕд дӕр ацы бӕрӕгбонмӕ кӕрӕдзийӕн лӕвӕрттӕ куыд кодтой, уый Библимӕ гӕсгӕ нӕ уыд. 2 Коринфӕгтӕм 9:7 стихы фыст ис: «Уӕдӕ алчидӕр кӕнӕд, йӕхицӕн куыд загъта, афтӕ – мацы кӕнӕд ӕвӕндонӕй кӕнӕ тыххӕй кӕнӕгау, уымӕн ӕмӕ Хуыцау, зӕрдиагӕй чи дӕтты, уый уарзы». Ӕцӕг чырыстӕттӕ лӕвӕрттӕ кӕнынц зӕрдиагӕй ӕмӕ уый тыххӕй цавӕрдӕр бӕлвырд бонмӕ нӕ фенхъӕлмӕ кӕсынц. Стӕй нӕ фенхъӕлмӕ кӕсынц, сӕхицӕн дӕр сын лӕвӕрттӕ кӕй скӕндзысты, уымӕ (Лукайы 14:12–14; бакӕс Хъуыддӕгтӕ 20:35). Уымӕй уӕлдай, чырыстӕттӕ цин кӕнынц, уыцы бӕрӕгбоны рӕстӕг иннӕтау сӕ сӕр сӕ кой кӕй не свӕййы ӕмӕ сӕ хӕстӕ исын кӕй нӕ фӕхъӕуы (Матфейы 11:28–30; Иоанны 8:32).

8. Стъалыдӕснытӕ Йесойӕн лӕвӕрттӕ йӕ гуырӕнбонмӕ скодтой? Бамбарын ӕй кӕн.

⁸ Чи зоны, исчи бафӕрса: «Ӕмӕ стъалыдӕснытӕ Йесойӕн  лӕвӕрттӕ йӕ гуырӕнбонмӕ не скодтой?» Нӕ, уый афтӕ нӕу. Уыдон ын лӕвӕрттӕ йӕ гуырӕнбонмӕ не ’рбахастой. Уыцы заманты уыди ахӕм ӕгъдау, ӕмӕ-иу кадджын адӕймагӕн лӕвӕрттӕ скодтой, ӕмӕ-иу уымӕй равдыстой, кӕй йӕ нымайынц, уый (1 Паддзӕхты 10:1, 2, 10, 13; Матфейы 2:2, 11). Уымӕй уӕлдай, Йесомӕ стъалыдӕснытӕ, куы райгуырд, уыцы ’хсӕв не ’рбацыдысты. Куы йӕм ӕрбацыдысты, уӕдмӕ Йесо ноггуырд нал уыди ӕмӕ кӕвдӕсы нӕ хуыссыд, фӕлӕ цард хӕдзары.

9. Библийы цы гуырӕнбонты кой ис, уыдоны рӕстӕг цы ’рцыд?

⁹ Сывӕллоны райгуырд алкӕддӕр цины хабар вӕййы. Фӕлӕ Библийы никуы ис фыст, ӕмӕ Хуыцауы лӕггадгӕнджытӕ сӕ гуырӕнбонтӕ кодтой (Псалом 127:3).  Кӕд, мыййаг, Библи чи фыста, уыдоны уый тыххӕй ныффыссын рох фӕци? Нӕ, рох сӕ нӕ фӕци, уымӕн ӕмӕ дзы дыууӕ гуырӕнбоны кой ис – Египеты фараоны ӕмӕ Ирод Антипӕйы гуырӕнбоны кой. (Бакӕс Райдиан 40:20–22; Марчы 6:21–29.) Дыууӕ гуырӕнбоны рӕстӕг дӕр хорзӕй ницы ’рцыд. Фараоны гуырӕнбоны йӕ лӕггадгӕнджытӕй сӕ иуӕн йӕ сӕр акъуырдтой. Паддзах Ироды гуырӕнбоны цы хабар ӕрцыд, уый та уымӕй фыддӕр уыд – акъуырдтой Хуыцауы лӕггадгӕнӕг Аргъауӕг Иоанны сӕр.

10, 11. Фыццаг чырыстӕттӕ гуырӕнбонтӕм цы цӕстӕй кастысты ӕмӕ цӕмӕн?

¹⁰ Иу энциклопедийы фыст ис: «Фыццаг чырыстӕттӕ кӕйфӕнды гуырӕнбон бӕрӕг кӕнын дӕр нымадтой мӕнгхуыцӕуттӕн кувӕг адӕмы ӕгъдауыл» (The World Book Encyclopedia). Грекъӕгты уырныдта, адӕймагӕн йӕ райгуырды рӕстӕг йӕ фарсмӕ кӕй вӕййы йӕ зӕды хай ӕмӕ йӕ уӕдӕй фӕстӕмӕ кӕй фӕхъахъхъӕны. Иу чиныджы  та фыст ис, зӕгъгӕ, дам, уыцы зӕд «цыдӕр ӕнахуыр хуызы баст уыд, адӕймаг цы хуыцауы гуырӕнбоны райгуырд, уыимӕ» (The Lore of Birthdays). Стӕй ма гуырӕнбонтӕ рагӕй фӕстӕмӕ дӕр ӕнгом баст сты астрологиимӕ ӕмӕ гороскоптимӕ.

¹¹ Уӕдӕ раджы заманты Хуыцауы лӕггадгӕнджытӕ гуырӕнбонтӕ нӕ бӕрӕг кодтой, мӕнгхуыцӕуттимӕ ӕмӕ хинтӕ-кӕлӕнтимӕ баст ӕгъдӕуттӕй кӕй равзӕрдысты, уый тыххӕй. Стӕй ма сӕ нӕ бӕрӕг кодтой, сӕ райгуырдмӕ ӕмӕ цардмӕ цы цӕстӕй кастысты, уый тыххӕй дӕр. Уыцы сӕрныллӕг, бонзонгӕ нӕлгоймӕгтӕ ӕмӕ сылгоймӕгтӕ сӕ райгуырд ахӕм ахсджиаг хъуыддагыл нӕ нымадтой, цӕмӕй йӕ бӕрӕг кодтаиккой * (Михей 6:8; Лукайы 9:48). Уыдон кадджын кодтой Йегъовӕйы ӕмӕ дзы бузныг уыдысты, цард сын кӕй радта, уый тыххӕй * (Псалом 8:3, 4; 36:9; Раргомад 4:11).

12. Мӕлӕты бон райгуырды бонӕй хуыздӕр цӕмӕй у?

¹² Хуыцауӕн мӕлӕты онг иузӕрдионӕй чи лӕггад кодта, уыдон дзы рох не сты ӕмӕ сӕ фидӕны ӕнӕмӕнг райгас кӕндзӕн (Иов 14:14, 15). Екклесиасты 7:1 стихы фыст ис: «Хорз ном хуыздӕр у зынаргъ сойӕ, ӕмӕ адӕймагӕн йӕ мӕлӕты бон хуыздӕр у йӕ райгуырды бонӕй». Хуыцауӕн иузӕрдионӕй кӕй лӕггад кӕнӕм, уый фӕрцы нын йӕ разы ис «хорз ном». Стӕй куыд зонӕм, афтӕмӕй, Библимӕ гӕсгӕ чырыстӕттӕ хъуамӕ бӕрӕг кӕной ӕрмӕстдӕр иу бон, ӕмӕ уый та райгуырдимӕ баст нӕу, фӕлӕ мӕлӕтимӕ – Йесо Чырыстийы мӕлӕтимӕ.  Йӕ кадджын «номы» фӕрцы нӕ бон у фервӕзын (Дзуттӕгтӕм 1:3, 4; Лукайы 22:17–20).

13, 14. Куадзӕн куыд равзӕрд?

¹³ Куадзӕн нымайынц Чырыстийы райгасы боныл, ӕцӕгӕй та равзӕрд мӕнг динӕй. Цымӕ Куадзӕны ӕйчытӕ цӕмӕн вӕййы? Иу энциклопедийы фыст ис, зӕгъгӕ, ӕйчытӕ «нысан кӕнынц ног цард ӕмӕ райгасдзинад» (Encyclopædia Britannica). Уӕдӕ ӕцӕгӕй Куадзӕн баст у тыллӕджы ӕмӕ зӕнӕг кӕныны хуыцауӕн кувыны ӕгъдӕуттимӕ, ӕмӕ дзы скодтой, Чырысти кӕй райгас, уый номыл бӕрӕгбон *.

¹⁴ Цымӕ Йегъовӕйы зӕрдӕмӕ цӕуы, йӕ Фырты райгасдзинад ын ахӕм ӕлгъаг ӕгъдӕуттимӕ кӕй бӕттынц, уый? Кӕй зӕгъын ӕй хъӕуы, нӕ! (2 Коринфӕгтӕм 6:17, 18). Библийы нӕй фыст, Чырысти кӕй райгас, уый бӕрӕг кӕнын кӕй хъӕуы. Стӕй дзы афтӕ дӕр нӕй фыст, зӕгъгӕ уӕ кӕд фӕнды, уӕд уӕ бон у уыцы хабар бӕрӕг кӕнын. Ӕмӕ ма уый номыл мӕнг хуыцауимӕ баст бӕрӕгбон кӕнай, уый та ноджы фыддӕр у.

15. Хеллоуин куыд равзӕрд ӕмӕ йӕ кӕд бӕрӕг кӕнынц, уый цымыдисаг цӕмӕй у?

¹⁵ Хеллоуины ӕгъдӕуттӕ баст сты кӕлӕнгӕнджытимӕ ӕмӕ фыдгӕнӕг тыхтимӕ, стӕй дзы фенӕн вӕййы алы ӕнахуыр дзауматӕ. Ацы бӕрӕгбон фӕзынд раджы заманты, Английы ӕмӕ Ирландийы чи цард, уыцы кельттӕм. 1 ноябрмӕ ӕввахс-иу мӕй цалхыдзаг куы сси, уӕд-иу кельттӕ сарӕзтой бӕрӕгбон Самайн, ома «сӕрды кӕрон». Афтӕ хъуыды кодтой, зӕгъгӕ, дам, Самайны  рӕстӕг, ӕнӕуынгӕ тыхтӕ кӕм цӕрынц, уыцы дуне ӕмӕ, адӕм кӕм цӕрынц, уыцы дуне кӕрӕдзийӕ ницыуал фӕхицӕн кӕны, стӕй, дам, хӕрзгӕнӕг тыхтӕ дӕр ӕмӕ фыдгӕнӕг тыхтӕ дӕр зӕххыл фӕрацу-бацу кӕнынц. Чи амард, уыдоны удтӕ та, дам, сӕ хӕдзармӕ ӕрцӕуынц, ӕмӕ сын сӕ бинонтӕ хӕрд ӕмӕ нозт ӕрцӕттӕ кӕнынц, цӕмӕй сӕм ма смӕсты уой. Абон дӕр сывӕллӕттӕ сӕхи афтӕ саразынц, цыма ӕнӕуынгӕ тыхтӕ ӕмӕ кӕлӕнгӕнджытӕ сты, ӕмӕ хӕдзӕрттыл адджинӕгтӕ кургӕ фӕзилынц ӕмӕ хӕдзары хицӕуттӕм фертхъирӕн кӕнынц, зӕгъгӕ, дам, нын адджинаг куы нӕ раттат, уӕд, дам, уӕхимӕ кӕсут. Ӕмӕ афтӕмӕй, зӕгъӕн ис, бӕрӕгбон Самайны ӕгъдӕуттӕ сӕфын нӕ уадзынц, кӕд уый сӕхӕдӕг не ’мбарынц, уӕддӕр.

16, 17. а) Сӕ цард баиу кӕнынмӕ чи хъавы, уыдон чындзӕхсӕвы ӕгъдӕуттӕ Библийы уагӕвӕрдтӕм гӕсгӕ лӕмбынӕг цӕмӕн хъуамӕ раиртасой? б) Чырыстӕттӕ сӕ зӕрдыл цы хъуамӕ дарой хызисыны ӕгъдау ӕмӕ ӕндӕр ахӕм ӕгъдӕутты тыххӕй?

¹⁶ Стыр Вавилоны ӕгъдӕуттӕй бирӕтӕ баст сты хинтӕ-кӕлӕнтимӕ, ӕмӕ уыцы ӕгъдӕуттӕй чи фӕчъизи, ахӕм чындзӕхсӕвтӕ Хуыцауы цӕсты сыгъдӕг не сты (Марчы 10:6–9). Уӕдӕ Раргомады 18:23 стихы дӕр уымӕн ис фыст, зӕгъгӕ, тагъд афтӕ уыдзӕн, ӕмӕ Стыр Вавилонӕй никуыуал «райхъуысдзӕн сиахсы ӕмӕ чындзы хъӕлӕс».

¹⁷ Алы бӕстӕйӕн дӕр йӕхи ӕгъдӕуттӕ ис. Иуӕй-иутӕм дзы, гӕнӕн ис, зӕрдӕ мацӕмӕй фехсайа. Фӕлӕ сӕм лӕмбынӕгдӕр куы ’ркӕсӕм, уӕд ӕй базонӕн ис, Вавилоны ӕгъдӕуттӕй кӕй равзӕрдысты. Уыцы ӕгъдӕуттӕ фӕкӕнынц, цӕмӕй лӕг ӕмӕ усӕн кӕнӕ сӕ уазджытӕн «амонд» ӕрхӕссой (Исай 65:11). Уыдонӕй иу у хызисыны ӕгъдау. Хызисӕг Сӕрызӕды хӕцъилы хъӕдӕй чындзы  хызыл схӕцы, ӕмӕ стӕй Сӕрызӕды хӕцъил зынгӕ ран бафидар кӕнынц, ома, дам, ӕй цӕмӕй чындз уына ӕмӕ дзы рох ма уа, Сӕрызӕд ӕм йӕ цӕст кӕй дары. Хызисӕг чындзы цӕсгом куы байгом кӕны, уӕд чындзмӕ раттынц мыдыкъус, ӕмӕ сылгоймӕгтӕн куыдхистӕрӕй мыдӕй ахӕрын кӕны. Сылгоймӕгтӕ йын фӕарфӕтӕ кӕнынц, ацы мыд куыд адджын у, дӕ къаимӕ афтӕ адджынӕй фӕцӕр, зӕгъгӕ. Кӕй зӕгъын ӕй хъӕуы, кӕй нӕ фӕнды, цӕмӕй Хуыцауы уарзтӕй ӕнӕхай фӕуа, уый йӕхи ахӕм ӕгъдӕуттӕй хиздзӕн. (Бакӕс 2 Коринфӕгтӕм 6:14–18.)

18. Чындзӕхсӕв чи кӕны, уыдон сӕхӕдӕг дӕр ӕмӕ сӕ уазджытӕ дӕр сӕ зӕрдыл Библийӕ цавӕр уагӕвӕрдтӕ хъуамӕ дарой?

¹⁸ Йегъовӕйы лӕггадгӕнджытӕ ма сӕхи хизынц, чырыстон чындзӕхсӕв чи фегад кӕндзӕн кӕнӕ кӕмӕндӕр цӕлхдур чи суыдзӕн, ахӕм хъуыддӕгтӕй. Зӕгъӕм, нӕ фӕкӕнынц ӕлхыскъ кӕнӕ ӕнӕгъдау, дӕлгоммӕ ныхӕстӕ, йе та чындз ӕмӕ сиахс кӕнӕ уазджытӕ кӕй тыххӕй фефсӕрмы уой, ахӕм хынджылӕг митӕ кӕнӕ хъазӕн ныхӕстӕ (Ӕмбисӕндтӕ 26:18, 19; Лукайы 6:31; 10:27). Стӕй ӕмбисонды хъӕздыг чындзӕхсӕвтӕ дӕр нӕ фӕкӕнынц, цӕмӕй афтӕ ма рауайа, ӕмӕ сӕ «мулкӕй ӕппӕлынц» (1 Иоанны 2:16). Кӕд чындзӕхсӕв кӕнынвӕнд кӕныс, уӕд дӕ рох ма уӕд, Йегъовӕйы кӕй фӕнды, цӕмӕй-иу уыцы бон дӕ зӕрдыл ӕхсызгонӕй ӕрлӕууа ӕмӕ мацӕуыл фӕсмон кӕнай *.

19, 20. Сидтытӕ уадзыны ӕгъдау куыд фӕзынд, уый тыххӕй иу чиныджы цы фыст ис ӕмӕ чырыстӕттӕн сидтытӕ уадзын цӕуылнӕ ’мбӕлы?

¹⁹ Чындзӕхсӕвты ӕмӕ бадтыты арӕх фӕуадзынц сидтытӕ  ӕмӕ сӕ агуывзӕтӕ кӕрӕдзийыл бакъуырцц кӕнынц. Иу чиныджы фыст ис, зӕгъгӕ, дам, абон фынгыл сидтытӕ кӕй фӕуадзынц, уый, дам, ӕвӕццӕгӕн, баззад раджы заманты цӕрӕг адӕмы ӕгъдауӕй. Сӕ хуыцӕуттӕй-иу кӕйдӕр тыххӕй цыдӕр ракуырдтой, ома-иу сӕм скуывтой, ӕмӕ-иу сын цӕмӕй сӕ куывд фехъуыстаиккой, уый тыххӕй-иу сын кувинаг нозт рауагътой. Ӕмӕ ма-иу загътой, уыцы адӕймаджы цӕрӕнбон бирӕ уӕд, кӕнӕ, макуы мацӕмӕй схъӕрзӕд, зӕгъгӕ («International Handbook on Alcohol and Culture», 1995 аз).

²⁰ Бирӕтӕ сидт куы рауадзынц, уӕд афтӕ нӕ фӕхъуыды кӕнынц, ӕмӕ уый дины ӕгъдау у. Фӕлӕ адӕймаг нуазӕн уӕлӕмӕ куы сисы, уӕд афтӕ фӕуайы, цыма арфӕ «уӕлӕрвтӕй», ома цавӕрдӕр ӕнӕуынгӕ тыхӕй, агуры. Ӕмӕ уый та Фыстадмӕ гӕсгӕ раст нӕу (Иоанны 14:6; 16:23) *.

21. Динимӕ баст чи нӕу, ахӕм зындгонд бӕрӕгбӕттӕй иуӕй-иутӕ цавӕртӕ сты ӕмӕ сӕ чырыстӕттӕ сӕхи цӕмӕн хъуамӕ хизой?

²¹ Ацы дунейы ӕгъдау бонӕй-бонмӕ кӕй сӕфы, уый комкоммӕ кӕнӕ фӕсаууонӕй у Стыр Вавилоны аххос. Зӕгъӕм, иуӕй-иу бӕстӕты алы аз дӕр фӕкӕнынц карнавалтӕ – ӕнӕгъдау кӕфтытӕ кӕм фӕкӕнынц, ахӕм бӕрӕгбӕттӕ. Стӕй ма дзы фӕархайынц гомосексуалисттӕ ӕмӕ лесбиянкӕтӕ дӕр ӕмӕ ахӕм цардыуаг афтӕ февдисынц, цыма рӕсугъд ӕмӕ хорз цыдӕр у. Цымӕ раст уыдзӕн, Йегъовӕйы чи уарзы, уыцы адӕймаг ахӕм бӕрӕгбӕттӕм куы цӕуа кӕнӕ сӕм куы кӕса? Афтӕ зӕгъӕн дзы уыдзӕн, ӕмӕ ӕвзӕрдзинадӕй ӕцӕгдӕр йе сӕфт уыны? (Псалом 1:1, 2; 97:10). Иу псаломзарӕггӕнӕг Хуыцаумӕ куывта: «Ницӕйаг цы у, ахӕмӕй мӕ мацӕмӕ бауадз  кӕсын» (Псалом 119:37). Ӕмӕ хорз уаид, мах дӕр ахӕм зондыл хӕст куы уаиккам.

22. Чырыстонӕн йӕхи бон кӕд у аскъуыддзаг кӕнын, цавӕрдӕр бӕрӕгбоны архайдзӕн ӕви нӕ?

²² Ацы дунейы кӕй кӕнынц, уыцы бӕрӕгбӕтты рӕстӕг чырыстон хъуамӕ уа къӕрцхъус, цӕмӕй афтӕ мачи ахъуыды кӕна, ӕмӕ уый дӕр бӕрӕгбоны архайы. Павел ныффыста: «Хӕргӕ кӕнат, нуазгӕ кӕнат ӕви ӕндӕр исты аразат,– алцыдӕр аразут Хуыцауы кадӕн» (1 Коринфӕгтӕм 10:31; кӕс ма рамкӕ « Зондджын уынаффӕтӕ хӕсс»). Фӕлӕ бӕлвырдӕй зӕгъӕн куы уа, ӕмӕ цавӕрдӕр ӕгъдау кӕнӕ бӕрӕгбон мӕнг динимӕ ӕмӕ политикӕимӕ баст нӕу, стӕй Библийы уагӕвӕрдты ныхмӕ нӕу, уӕд алы чырыстонӕн дӕр йӕхи бон у аскъуыддзаг кӕнын, архайдзӕн дзы ӕви нӕ. Фӕлӕ ма хъуамӕ иннӕтыл дӕр хъуыды кӕна, цӕмӕй сын цӕлхдур ма суа.

23, 24. Нӕ бон куыд у адӕмӕн ӕмбарын кӕнын, Йегъовӕйы закъӕттӕ пайда цӕмӕй сты, уый?

²³ Бирӕтӕ бӕрӕгбӕттӕ тынгдӕр уый тыххӕй фӕкӕнынц, цӕмӕй сӕ бинонтимӕ ӕмӕ се ’мбӕлттимӕ рӕстӕг арвитой. Ӕмӕ, чи зоны, исчи афтӕ хъуыды кӕна, зӕгъгӕ, Библи цы дзуры, ууыл афтӕ фидар хӕцӕм, ӕмӕ нӕ уый тыххӕй нӕ хиуӕттӕ дӕр нал хъӕуынц. Уӕд ын нӕ бон у фӕлмӕнӕй бамбарын кӕнын, Йегъовӕйы Ӕвдисӕнтӕн ӕхсызгон кӕй вӕййы сӕ бинонтимӕ ӕмӕ се ’мбӕлттимӕ рӕстӕг ӕрвитын (Ӕмбисӕндтӕ 11:25; Екклесиаст 3:12, 13; 2 Коринфӕгтӕм 9:7). Зынаргъ нын чи у, уыдонимӕ фембӕлын ӕмӕ сыл фӕцин кӕнын нӕ бон вӕййы афӕдзы дӕргъы кӕдфӕнды дӕр. Фӕлӕ, Хуыцауы кӕй уарзӕм ӕмӕ нӕ йӕ закъӕттӕ ӕххӕст кӕнын кӕй фӕнды, уымӕ гӕсгӕ уыцы рӕстӕг  ахӕмӕй ницы араздзыстӕм, цӕмӕй йӕ фӕхъыг кӕнӕм. (Кӕс рамкӕ « Ӕцӕг Хуыцауӕн лӕггад кӕнын хӕссы стыр циндзинад».)

²⁴ Йегъовӕйы Ӕвдисӕнтӕй иуӕй-иутӕ сыгъдӕгзӕрдӕ адӕмимӕ хорз аныхас кӕнынц, ацы фарстайы фӕдыл нӕ литературӕйы цы хъуыдытӕ ис, уыдоныл. Фӕлӕ хъуамӕ нӕ зӕрдыл дарӕм, махӕн нӕ нысан уый кӕй нӕу, цӕмӕй адӕймагыл ныхасӕй фӕтых уӕм. Мах фӕнды адӕймаджы зӕрдӕмӕ фӕндаг ссарын. Уӕдӕ адӕмӕн аргъ кӕн, сабырӕй сын дзуапп дӕтт ӕмӕ дӕ «дзыхыныхас алкӕддӕр уӕд фӕлмӕн ӕмӕ зӕрдӕмӕдзӕугӕ» (Колоссӕгтӕм 4:6).

25, 26. Ныййарджытӕн сӕ бон куыд у сӕ сывӕллӕттӕн ӕххуыс кӕнын, цӕмӕй сӕ уырнындзинад фидар кӕна ӕмӕ Йегъовӕйы уарзой?

²⁵ Йегъовӕ нӕ кӕй ахуыр кӕны, уый фӕрцы зонӕм, цӕуылдӕр цӕмӕн ӕууӕндӕм ӕмӕ цавӕрдӕр хъуыддӕгтӕ цӕмӕн аразӕм кӕнӕ цӕуылнӕ аразӕм, уый (Дзуттӕгтӕм 5:14). Уымӕ гӕсгӕ ныййарджытӕ хъуамӕ сӕ сывӕллӕтты ахуыр кӕной Библийы уагӕвӕрдтыл арф хъуыды кӕнын. Афтӕмӕй сын сӕ уырнындзинад фидар кӕндзысты ӕмӕ сын ӕххуыс кӕндзысты, цӕмӕй, сӕ уырнындзинадӕй сӕ чи фӕрса, уыдонӕн дзуапп Фыстадӕй дӕттой. Уый фӕрцы ма зондзысты, Йегъовӕ сӕ тынг кӕй уарзы, уый (Исай 48:17, 18; 1 Петры 3:15).

²⁶ Уӕдӕ куыд федтам, афтӕмӕй, Хуыцауӕн йӕ «сыгъдӕг тыхы разамындмӕ гӕсгӕ ӕмӕ рӕстдзинадмӕ гӕсгӕ» чи кувы, уыдон сӕхи хизынц, Хуыцауы зӕрдӕмӕ чи нӕ цӕуы, уыцы бӕрӕгбӕттӕй. Фӕлӕ ма уымӕй уӕлдай архайынц, цӕмӕй алы хъуыддаджы дӕр ӕнӕзӕрдӕхудт уой (Иоанны 4:23). Абон бирӕты хъуыдымӕ гӕсгӕ ацы миниуӕг ницы пайда у. Фӕлӕ иннӕ сӕрӕй базондзыстӕм, Хуыцауы закъӕттӕм гӕсгӕ чи цӕры, уый фӕсмойнаг кӕй никуы фӕвӕййы.