1. Yihooway baakko ehiyoogeeti ay mala asatee? Eti ayyaanaaban tishshi giidi deˈana bessiyoy aybissee?

YESUUSI: “Aawau tumaappe goinniyaageeti ayyaanaaninne tumatettan goinniyo wodee matattiis; . . . asi baayyo goinnana mala, Aawai koyiyoogeeti hageetu malaa” yaagiis. (Yohaannisa 4:23) Yihooway nena demmidoogaadan, hegaa mala asata demmiyo wode, eta baakkonne ba Naˈaakko ehees. (Yohaannisa 6:44) Hegee gita bonchoba! Gidikkonne, Seexaanay cimmiyoogan erettidaagaa gidiyo gishshau, Geeshsha Maxaafaa tumaa siiqiyaageeti, “Godaa ufaissiyaabai aibakko” ubbatoo shaakki erana bessees.—Efisoona 5:10; Ajjuutaa 12:9.

2. Tumu haymaanootiyaa worddo haymaanootiyaara walakkiyaageeta Yihooway waati xeelliyaakko qonccissa.

² Siina Deriyaa matan Israaˈeeleti banttau xoossa medhanaadan Aaroona oychido wode aybi hanidaakko qoppa. Aarooni loˈˈo woy iita geennan eta qofaa maayidi worqqaappe maraa medhiis; yaatidi, hegee Yihoowa kalˈˈatiyoogaadan yootiis. I: “Wontto GODAA baalaa gallassa gidana” yaagiis. Tumu haymaanootiyaa worddo haymaanootiyaara walakkiyo he hanotan, Yihoowayyo aybinne siyettibeennee? Akkay. I, eeqau goynniya heezzu shaˈa gidiyaageeti hayqqanaadan oottiis. (Kessaabaa 32:1-6, 10, 28) Hegaappe nuuni ay tamaariyoo? Nuuni Xoossaa siiquwan deˈanau koyiyaaba gidikko, ‘tunabaa bochana’ bessenna. Qassi tumau mishettiyoogan, tumaa moorana danddayiya aybippenne naagana bessees.—Isiyaasa 52:11; Hizqqeela 44:23; Galaatiyaa 5:9.

3, 4. Erettida meezetanne baalata, Geeshsha Maxaafaa baaso siraataa, qofan wottidi pilggana bessiyoy aybissee?

³ Kaddiyo timirttiyaa teqqiya, kiitettidaageeti hayqqi simmin, Geeshsha Maxaafaa tumaa siiqenna, banttana Kiristtaane giyaageeti  denddidosona. Eti eeqa goyno meezeta, baalatanne Kiristtaanetikka bonchana bessees yaagiyo boncho geetettiya gallassata maayidi hegaadan oottiyoogaa doommidoogee azzanttiyaaba. (2 Tasalonqqe 2:7, 10) Ha baalatuppe amaridaageeta neeni beˈiyo wode, he baalaati Xoossaagaa gidennan, ha alamiyaa ayyaanaa waati qonccissiyaakko akeeka. Xaaxi waaxi xeelliyo wode, alamiyaa baalata issi mala oottiya hanotay deˈees. Hegeekka, eti ashuwaa amuwaa denttettoosona; qassi “Gita Baabiloono” erissiya malaata gidida, worddo haymaanoote ammanuwaanne iita ayyaanaa oosuwaa minttettoosona. * (Ajjuutaa 18:2-4, 23) Erettida meezeti daroti doommidoy, sheneyiya eeqa goyno meezetuppe gidiyoogaa Yihooway ba huuphe eriyoogaakka hassaya. Hegaa mala baalata i ha wodiyankka ixxiyoogau siree baawa. Yihooway ha allaalliyaa xeelliyo hanotay, nuna keehippe qofissiyaaba gidana bessennee?—2 Yohaannisa 6, 7.

⁴ Nuuni tumu Kiristtaane gidiyoogaadan, daro baalati Yihoowa ufayssennaagaa eroos. SHin nuuni etappe issuwaaninne shaahettennaadan wozanappe murttana koshshees. Hegaa mala baalatun Yihooway ufyttennay aybissakko akeekiyoogee, nuuni Xoossaa siiquwan deˈennaadan oottiya aybippenne haakkanau murttido murttiyan minnanaadan oottees.

5. Yesuusi Tisaase 25n yelettibeennaagaa waatidi erana danddayiyoo?

⁵ Geeshsha Maxaafay Yesuusi yelettido gallassay bonchettidoogaa yootenna. Ubba i yelettido gallassay erettenna. SHin i yelettido biittan balggo wode gidida, Tisaase 25n yelettibeennaagaa erana danddayoos. * Yesuusi yelettido wode, bantta “dorssaa wudiyaa  qamma heemmiiddi, dembban aqiya asati [deˈiyoogaa]” Luqaasi xaafidoogaappe hegaa erana danddayoos. (Luqaasa 2:8-11) Eti kumetta layttaa ‘dembban aqiyaaba’ gidikko, hegaadan xaafiyoogee koshshiyaaba gidenna. Gidikkokka, Beetaliheemen iray bukkiyoonne shachay wodhiyo he balggo wodiyan, dorssa wudee soo geliyo gishshau, henttanchati ‘dembban aqokkona.’ Hegaa bollikka, Roome biittaa kawoy, Augisxxoosi asay qoodettanaadan awaajjido gishshau, Yooseefinne Mayraama Beetaliheeme biidosona. (Luqaasa 2:1-7) Roome haaruwan kasenne undduudiiddi deˈiya asaa, Kawoy wolqqaama balgguwan bantta yelettido biitti baanaadan azazennaagee qoncce.

6, 7. (a) Ufayssa masqqalaa meezetuppe darotu doomettay aybippee? (b) Ufayssa Masqqalaa wode imotaaninne Kiristtaaneti immiyo imotan deˈiya dummatettay aybee?

⁶ Ufayssa Masqqalaa doomettay Geeshsha Maxaafaappe gidenna. SHin, Satern geetettiya goshsha xoossa bonchiyo, Saternaaliyaa geetettiya Roometu baalaa milatiya beni eeqa baalatuppe doommiis. Hegaadankka, Niwu Kaatolik Insaykiloppiidee, Mitra geetettiya xoossau goynniyaageetu qoodaadan, Tisaase 25y “ooninne xoonenna awa ayfiyaa yeletaa bonchiyo gallassa” yaagees. Gujjidikka, “Ufayssa Masqqalay doomettidoy, awau goynniyoogee Roome biittan keehippe aakkido wodiyaana” yaagees. Hegeekka, Yesuusa hayquwaappe simmin heezzu xeetu laytta gidiya wodee aadhi simmiina.

⁷ Eeqau goynniyaageeti bantta baalata bonchiyo wode, issoy issuwau imotaa immoosonanne gibiraa kessoosona; hegee ha wodiyankka ufayssa masqqalaa wode meeze gididaba. Asay ha wodiyankka issoy issuwau imota immiyaaba gidikkokka, beni Roome biittan ufayssa masqqalaa wode immiyo imotaappe daro baggay, “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagiya, 2 Qoronttoosa 9:7 maaraadaana gidenna. Tumu Kiristtaaneti siiqoy denttettin immoosona; issi gallassa naagidi immana bessiyaabadan etau siyettenna. Qassi hara uray kushiyaa zaarees giidikka naagokkona. (Luqaasa 14:12-14; Oosuwaa 20:35) Hegaa bollikka, eti ufayssa masqqalaa wode dirbbaappenne he wodiyan daroti geliyo  wolqqaama acuwaappe shemppidoogan keehippe ufayttoosona.—Maatiyoosa 11:28-30; Yohaannisa 8:32.

8. Xoolinttiyaa paydiyaageeti Yesuusau imotaa i yelettido gallassi immidonaa? Qonccissa.

⁸ SHin issi issi asati, xoolinttiyaa paydiyaageeti Yesuusi yelettido gallassi ayyo imota immibookkonaayye? yaagidi palamettana danddayoosona. Akkay; eta imotay beni wode issi erettida ura bonchiyoogaa bessanau oottiyo meeze gididaba. (1 Kawotu 10:1, 2, 10, 13; Maatiyoosa 2:2, 11) Ubba eti yiidoy Yesuusi yelettido qammaana gidenna. Eti yiyo wode Yesuusi deˈiyoy mehiyau miyoobaa wottiyo qoriyaana gidennan soona. He wode i biron yelettida gacino naˈa gidennan, daro agina gidido naˈa.

9. Geeshsha Maxaafay yootiyo, yelettido gallassaa bonchido baalatun aybi hanidee?

⁹ Naˈi yelettiyoogee ubbatoo keehi ufayssiyaaba gidikkokka,  Xoossaa ashkkarati bantta yelettido gallassaa bonchidoogaa Geeshsha Maxaafay yootenna. (Mazamure 127:3) Hegee balettidi odettennan attidabee? CHii; ayssi giikko, naaˈˈu asati, giishin Gibxxe Kawoynne Heeroodis Anttiphaasi yelettido gallassaa bonchidoogee xaafettiis. (Doomettaabaa 40:20-22; Marqqoosa 6:21-29) Gidikkokka, he naaˈˈu hanotatunkka iitabay oosettidoogaa, ubba qassi naaˈˈantto hanotan Xammaqiya Yohaannisa qooree muucettidoogaa yootees.

10, 11. Beni wode Kiristtaaneti yelettido gallassaa bonchiyoogaa aybidan xeellidonaa? Aybissi?

¹⁰ Ze Worild Buuk Insaykiloppiidiyaa geetettiya maxaafay, “Beni Kiristtaaneti o yeleta gallassa bonchiyoogaanne gidin, eeqa goyno meezedan xeelloosona” yaagees. Leemisuwau, beni wode Giriiketi, yelettiya urassi huuphiyan huuphiyan issi ayyaana meretay he sohuwaa yiyoogaanne sinttappekka a naagiyoogaa ammanoosona. Ze Loor of Berzideys geetettiya maxaafay, he ayyaana merettay,  “yeleta gallassay he naˈaa yeleta gallassaara issi mala gidido issi xoossaara geema gidida ogiyan gayttidaagaa” yaagees. Yeleta gallassay, daro layttau xoolinttiyaa paydiyoogaaranne i deˈiyo ginaa xeelliyoogaara gayttidaba gididi deˈiis.

¹¹ Beni wode deˈida Xoossaa ashkkarati, yelettido gallassaara gayttida meezeti eeqaa goynuwaappenne iita ayyaanaa oosuwaappe doommido gishshau ixxiyoogaa xalla gidennan, bantta kaalliyo kandduwaa maaraappe denddidaagankka ixxoosona. Hegaadan giyoy aybissee? He asati bantta yeleta gallassaa bonchettana bessiya keehi gitabadan xeellenna, bantta huuphiyaa kawushshiya asata. * (Mikiyaasa 6:8; Luqaasa 9:48) Hegaappe, eti alˈˈo gidida deˈo imotau Yihoowa bonchoosonanne galatoosona. *—Mazamure 8:3, 4; 36:9; Ajjuutaa 4:11.

12. Nuuni hayqqiyo gallassay nu yeleta gallassaappe waanidi loˈˈo gidana danddayii?

¹² Ammanettidi hayqqidaageeta ubbata Xoossay hassayiyo gishshau, sinttanau eti deˈuwaa demmanaagee tuma gididaba. (Iyyooba 14:14, 15) Eranchchaa 7:1y: “Waagai al77o gidido lo77o shittuwaappe lo77o sunttai aadhdhees; yelettiyo gallassaappekka haiqqiyo gallassai lo77o” yaagees. Nu “sunttay,” nuuni ammanettidi oottiyo oosuwan Xoossay nuna xoqqu ootti xeelliyoogaa malaatees. Kiristtaaneti bonchanaadan azazettido mexi issi baalay, yeleta gallassaara gidennan hayqo gallassaara gayttidaba; hegeekka a xoqqa “sunttay” nu atotettau waannaba gidido Yesuusa hayquwaara gayttidaba.—Luqaasa 22:17-20; Ibraawe 1:3, 4.

13, 14. Paasikaa baalaara gayttidaagan aahuwan erettida meezetuyyo denddoy aybee?

¹³ Kiristtoosa dendduwaa baala giidi asay ubbasan yootiyo  Paasikaa geetettiya baalau denddoy worddo haymaanootiyaa. Phuuphulleenne harbbaynnoy Paasikaa baalaara waanidi gayttidonaa? Insaykiloppiidiyaa Biritaanikaa geetettiya maxaafay, phuuphullee “ooratta deˈuwaaranne dendduwaara gayttidaagan keehippe erettida malaata” yaagees. Asay harbbaynnuwaa daro wodiyaassi yelettiyoogau malaata oottidi goˈettiiddi takkiis. Yaatiyo gishshau, Paasikaa baalay Kiristtoosa dendduwaa bonchiyoogaa milatanaadan laamettidaba gidikkonne, hegee tumuppe yelettiyoogaa bonchiyo baala. *

¹⁴ Yelettiyoogaa bonchiyo hegaa mala sheniyaabaa ba Naˈaa dendduwaa hassayanau goˈettiyoogan Yihooway ufyttanee? Mule ufayttenna! (2 Qoronttoosa 6:17, 18) Geeshsha Maxaafay ubba, Yesuusa dendduwaa bonchanaadan azazenna. Yaatiyo gishshau, Paasikaa Yesuusa dendduwaa hassayanau bonchiyoogee, ammanettennaagaa keehippe bessiyaaba.

15. Halowiine baalau denddoy aybee? He baalaa bonchiyo gallassaa doorido gaasoy ayba gidana danddayii?

¹⁵ SHareechotanne azzaqo malatissiya, daganttiyaabatuuninne hara alleeqettida hegaa malabatun erettida, Halowiine woykko Geeshshatu Ubbaa Gallassaappe kasetiya qammaa giidi bonchiyoogee, beni wode Biritaaniyaaninne Ayrilandde biittan deˈida, Seltte geetettiya asatun doomettiis. Etu qoodan Hidaare 1 heeran, aginay goobaniyo wode, eti Samahin geetettiya baalaa bonchoosona. Hegau birshshettay “Boniyaa Wurssettaa” yaagiyoogaa. Eti Samahina bonchiyo wodiyan, asaanne ayyaana alamiyaa shaakkiyaabay qaarettiyoobadan ammanoosona. Loˈˈo ayyaanatinne iita ayyaanati he wodiyan saˈan toylattoosona giidikka ammanoosona. Hayqqida asatu shemppoti bantta soo simmoosona  giidi qoppoosona. So asay qassi he simmi yiida moytilleta ufayssanau giidi qumaanne ushshaa wottees. Ha wodiyan naati, moytille woykko shareecho malatissiyaabaa maayidi sooppe soo biyo wode, asay eta mokki ekkana xayikko, daganttana yaagidi yashissoosona. Yaatiyoogan, eti halchennan Samahina baalaa bonchiyoogee haˈˈikka deˈanaadan oottoosona.

16, 17. (a) Ekkanaunne gelanau giigetti uttida Kiristtaaneti, heeran bullachaa wode meeze oottidobata Geeshsha Maxaafaa baaso siraataa maaran pilggana koshshiyoy aybissee? (b) Ruuziyaa woykko hegaadan harabaa laaliyoogaa malatiya meezeta xeelliyaagan, Kiristtaaneti akeekana koshshiyaabay aybee?

¹⁶ Mata wode, “machchiyaagaa cenggurssainne bullashettiyaari cenggurssai sinttanau [Gita Baabilooni] giddon siyettenna.” (Ajjuutaa 18:23) Aybissi? Issi gaasoy, bullacha gallassaappe doommidi aqo deˈuwaa tunissana danddayiya, a oottiyo iita ayyaanaa oosuwaa gishshataassa.—Marqqoosa 10:6-9.

¹⁷ Meezee ubbasan issi mala gidenna. Qohennaba milatiya issi issi meezetuyyo doomettay, machiyaagaunne bullashettiyaariyyo woykko eta imattatuyyo loˈˈo ‘qaada’ amottiyo, Baabiloonetu oosuwaara gayttidaba gidana danddayees. (Isiyaasa 65:11) Hegaa mala meezetuppe issoy ruuziyaa woykko hegaadan harabaa eta bolli laaliyoogaa gujjees. Hegaa mala oosoy, qumay hanqqettida iita ayyaanatu hanqqoy wodhanaadaaninne machiyaagaanne bullashettiyaaro eti qohennaadan oottees giidi ammaniyoogaappe doommiis. Gujjidikka, daro wodiyaappe doommidi, ruuzee yelettiyoogaara, ufayssaaranne adussa wodiyau deˈiyoogaara geema ogiyan gayttiis. Xoossaa siiquwan deˈana koyiyaageeti ubbay, hegaa mala moorettida meezetuppe haakkiyoogee qoncce.—2 Qoronttoosa 6:14-18.

18. Bullachaa kessanau keeridaageeta gidin bullachau xeegettidaageetikka kaallana koshshiya Geeshsha Maxaafaa baaso siraatay awugee?

¹⁸ Hegaara issi mala hanotan, Yihoowa ashkkarati bullachaaninne bullachaa giigissotun, Kiristtaaneti bessiyaagaadan bonchettennadan oottiya ha alamiyaa meezetuppe woykko haratu zoriya wozanaa qumˈˈana danddayiyaabaappe haakkoosona.  Leemisuwau, qohiya cashshay woykko pokko qiree eta doonaappe kiyenna. Qassi mati ekkidanne gelidaageeta gidin, haratakka yiilloyana danddayiya hanotan haasayiyoogaappe woykko qiriyoogaappe haakkoosona. (Leemiso 26:18, 19; Luqaasa 6:31; 10:27) Hegaadankka, eti bantta huuhpiyaa kawushshiyoogaa gidennan, ‘miishshan ceeqettiyoogaa’ qonccissiya wolqqaamanne aaho bullachaa kessiyoogaappekka haakkoosona. (1 Yohaannisa 2:16) Neeni bullachanau qoppidaba gidikko, ne bullachay aadhi simmin neeni hegaa hassayiyo wode, zilˈˈettiyooba gidennan ufayttiyooba gidanaadan Yihooway koyiyoogaa dogoppa. *

19, 20. Burccukkuwaa denttiyoogaa woykko domˈˈissiyoogaa doomettaa xeelliyaagan issi xuufee woygii? Ha meezee Kiristtaanetussi bessennaba gididoy aybissee?

¹⁹ Bullachaaninne issippe shiiqidi miyo uyiyo hegaa mala sohuwan, burccukkuwaa denttiyoogee woykko domˈˈissiyoogee meeze gididaba. Intternaashinaal Handdibuuk on Alkkoohool end Kalcher geetettiya 1995n kiyida xuufee: “Ushshsaa burccukkuwaa denttiyoogee woykko domˈˈissiyoogee . . . beni wode worddo xoossatuyyo shiishshiyo, boncho geetettiya ushshaa yaarshshuwaa meeziyaappe attidaba gidida . . . ‘gamˈˈa!’ woykko ‘ne payyatettaassi!’ yaagidi loˈˈobaa amottidi qanttan woossiyoogau malaata” yaagees.

²⁰ Daro asay burccukkuwaa denttiyoogee woykko domˈˈissiyoogee, haymaanootiyaara woykko malaara gayttidaba gidiyoogaa akeekennan aggana danddayees. SHin woyniyaa burccukkuwaa xoqqu oottiyoogee, “saluwau” giishin, asappe bolla gidida wolqqau woosaa shiishshiyoogaadan xeelettana danddayees; hegee Geeshsha Maxaafan deˈiyaagaara moggenna hanotan anjjuwaa demmanau woossiyoogaa.—Yohaannisa 14:6; 16:23. *

21. Etau denddoy haymaanootiyaara gayttidaba gidana xayikkonne, Kiristtaaneti haakkana bessiya erettida baalati awugeetee? Aybissi?

²¹ Ha wodiyan alamiyan kanddoy shoraa xayi xayi bees; hegeekka, Gita Baabiloona tamaarissiyooban woykko oottiyooban minttettiyooba. Issi issi biittan, attuma asay attuma asaaranne maccaasay maccaasaara asho gaytotettaa polees. He biittati he asatu deˈuwaa nashshiyoogaa bessiya, shori baynna durssay deˈiyo baalaa bonchiyoogaa kaafoosona. Hegaa mala hanotay deˈiyoosan beettiyoogee woy hegaa beˈiyoogee ‘Yihoowa siiqiya urau’ bessiyaabee? I hegaadan oottiyoogee iitabaa wozanappe ixxiyoogaa bessii? (Mazamure 1:1, 2; 97:10, NW) “Pattennabaa xeellenna mala, ta aifeta teqqa” yaagidi woossida yettanchaagaa mala xeelaa oyqqiyoogee ayba loˈˈobee!—Mazamure 119:37.

22. Issi Kiristtaanee issi baalan shaahettana bessiyaakko bessennaakko ba zoriya wozanan goˈettidi qofaa qachana danddayiyoy awudee?

²² Alamiyaa baalati bonchettiyo wodetun, issi Kiristtaaniyaa hanotay, i he baalaa bonchiyaaba haratuyyo milatenna mala, naagettana bessees. PHauloosi “Simmi intte ai miikkonne, woi ai uyikkonne, woi intte ai oottikkonne, ubbabaa Xoossaa bonchchuwaassi oottite” yaagidi xaafiis. (1 Qoronttoosa 10:31; sinttaa 158-9n deˈiya, “ Eratettan Qofaa Qachiyoogaa” yaagiya saaxiniyaa xeella.) Gidikkokka, issi meezee woykko baalay worddo haymaanootiyaara gayttidaba gidana xayikko, polotikaara woykko ba biittaa siiqiyoogaara gayttidaba gidana xayikko, qassi Geeshsha Maxaafaa baaso siraataa kanttennaagaa gidikko, issi Kiristtaanee hegan shaahettana bessiyaakko woy bessennaakko baayyo qofaa qachana danddayees. Hegaadankka, haratuyyo xube gidenna mala qoppana bessees.

23, 24. Yihoowa geeshshatetta maarata xeelliyaagan waatidi loˈˈo ogiyan markkattana danddayiyoo?

²³ Daro asay erettida baalata bonchiyoogaa so asaaranne laggetuura gayttiyo loˈˈo injjedan xeellees. Issi uri nuuni kaalliyo Geeshsha Maxaafaa maaraa, siiqo bessenna hanotadan woykko  bessennabadan bala ogiyan xeelliyaaba gidikko, Yihoowa Markkati so asaaranne laggetuura ufayssiya wodiyaa issippe aattiyoogaa xoqqu ootti xeelliyoogaa kehatettana qonccissana danddayoos. (Leemiso 11:25; Eranchchaa 3:12, 13; 2 Qoronttoosa 9:7) Nuuni siiqiyoogeetuura layttaa giddon ubbatoo issippe gayttiyoogan ufayttoos. SHin Xoossaanne a geeshsha maarata siiqiyo gishshau, hegaa mala ufayssiya wodeti i ixxiyo meezetun moorettana mala koyokko.—Sinttaa 156n deˈiya, “ Tumu Goynoy Daro Ufayssaa Demissees” yaagiya saaxiniyaa xeella.

²⁴ Issi issi Yihoowa Markkati, wozanappe eranau koyiyaageetuyyo, Tumuppe Geeshsha Maxaafay Tamaarissiyoy Aaybee? * yaagiya maxaafaa shemppuwaa 16n deˈiya qofaa qonccissidi, loˈˈo ayfiyaa demmidosona. Gidikkonne, nu hoollee he uri tumu goynuwaa kaallanaadan maaddanaassappe attin, palamettidi xoonanaassa gidennaagaa hassaya. Yaatiyo gishshau, ne “haasayai ubba wode, siyanau kehiyaagaanne ufaissiyaagaa,” qassi bonchuwaanne ashkketettaa bessiyaagaa gido.—Qolasiyaasa 4:6.

25, 26. Yelidaageeti bantta naati ammanuwaaninne Yihoowa siiqiyoogan diccanaadan waati maaddana danddayiyoonaa?

²⁵ Nuuni Yihoowa Markkata gidiyoogaadan, loytti tamaarida. Nuuni issi issibata ammaniyoynne oottiyoy, qassi harabatuppe haakkiyoy aybissakko eroos. (Ibraawe 5:14) Yaatiyo gishshau, yelidaageetoo, intte naati Geeshsha Maxaafaa baaso siraatata akeekanaadan tamaarissite. Hegaadan oottiyoogan, eta ammanuwaa mintteeta; bantta ammanuwaa xeelliyaagan oychiyaageetuyyo Geeshsha Maxaafan baasettida zaaruwaa immanaadan maaddeeta; qassi Yihooway eta siiqiyoogaa ammanettenaadan ootteeta.—Isiyaasa 48:17, 18; 1 PHeexiroosa 3:15.

²⁶ Xoossaayyo “ayyaanaaninne tumatettan” goynniyaageeti ubbay, Geeshsha Maxaafan baasettibeenna baalatuppe haakkiyoogaa xalla gidennan, bantta deˈo ubban ammanettidaageeta gidanaukka baaxetoosona. Ha wodiyan daroti ammanettiyoogaa danddayettennabadan xeelloosona. SHin Xoossaa ogeti ubbatoo aybippenne aadhiyoogaa, kaalliya shemppuwan beˈana.