1, 2. Akoz Zeova i kontan kan i vwar zefor ki nou fer pour nou onnet? Donn en legzanp.

EN MANMAN i sorti dan laboutik ansanm avek son pti garson. En sel kou, sa pti garson i arete e i soke pour vwar sa pti zouzou dan son lanmen ki i ti pran pour gete dan laboutik. I’n oubliye met laba oubyen demann son manman pour aste sa zouzou. I enkyet, alor i kriy son manman. An retour son manman i asir li ki tou keksoz i oke e i retourn avek li dan laboutik pour ki i kapab rann sa zouzou e ekskiz son lekor. Pandan ki i fer sa, sa manman i zwaye e i vreman fyer. Akoz?

² Bann paran i touzour fyer kan zot vwar ki zot zanfan pe aprann sa lenportans pour zot onnet. Zeova, nou Papa ki dan lesyel i osi santi parey, akoz i “sa Bondye laverite.” (Psonm 31:5) I vreman kontan pour vwar ki nou pe fer bokou zefor pour nou onnet anmezir ki nou vin pli matir spirityelman. Vi ki nou anvi reste dan son lanmour e fer li plezir, nou annan sa menm santiman ki zapot Pol ti eksprimen: “Nou oule fer sa ki byen [oubyen “onnet,” NW] dan tou sirkonstans.” (Ebre 13:18) Annou egzamin kat domenn dan lavi kot nou kapab parler vwar li difisil pour nou onnet. Apre sa, nou pou vwar bann byenfe ki nou kapab gannyen kan nou onnet.

3-5. (a) Ki mannyer Parol Bondye i averti nou lo danze ki kapab annan kan nou anbet nou lekor? (b) Kwa ki pou ed nou pour onnet avek nou lekor?

³ Nou premye defi se pour aprann onnet avek nou lekor. I vreman fasil pour nou anbet nou lekor vi ki nou enparfe. Par egzanp, Zezi ti dir bann Kretyen Laodise ki zot ti pe anbet zot lekor par krwar ki zot ti ris me ki anfet zot ti “pov, aveg e touni” spirityelman. Zot ti dan en sitiasyon vreman malere. (Revelasyon 3:17) Vi ki zot ti pe anbet zot lekor, sa ti fer sitiasyon vin pli pir.

⁴ Ou osi kapab rapel ki disip Zak ti averti: “En dimoun ki krwar i relizye, si i pa met en labrid avek son lalang, i pe anbet son lekor. Son [“ladorasyon,” NW] i pa vo nanryen.” (Zak 1:26) Si nou krwar ki nou kapab mal servi nou lalang e kontinyen ador Zeova dan sa bon fason, nou tronpe akoz nou pou zis anbet nou lekor. Lafason ki nou ador Zeova pa pou vo nanryen, i pou anven. Kwa ki pou kapab ed nou evit sa move semen?

⁵ Dan sa menm sapit, Zak i konpar parol Bondye ki laverite konman en laglas. I konsey nou pour egzamin lalwa parfe Bondye e fer bann azisteman kot i neseser. (Zak 1:23-25) Labib i kapab ed nou pour onnet avek nou lekor e vwar ki nou devret fer pour amelyore. (Lamantasyon 3:40; Agai 1:5) Nou osi kapab priy Zeova e demann li pour egzamin nou e sa pou ed nou pour admet nenport gro febles ki nou annan e esey koriz zot. (Psonm 139:23, 24). Malonnekte i en febles ki tronp nou e nou devret vwar li parey nou Papa ki dan lesyel i vwar li. Proverb 3:32 i dir: “Zeova i deteste en dimoun rize, me I pros avek bann ki drwat.” Zeova i kapab ed nou pour santi parey li e fer nou vwar nou lekor parey li i vwar nou. Mazinen, Pol ti dir: ‘Nou oule fer sa ki byen.’ La konmela nou pa pou kapab  parfe, me senserman nou ti a kontan e nou pe fer bokou zefor pour nou onnet.

6. Akoz bann koup marye i devret onnet avek kanmarad e ki danze zot merit evite alor?

⁶ Lonnekte i devret en mark ki idantifye bann fanmir Kretyen. Alors, msye ek madanm i devret fran e onnet avek kanmarad. Ler de Kretyen in marye, napa plas pour bann pratik sal ki fer ditor, parey rod latraksyon avek en lot dimoun ki pa ou konzwen, annan en relasyon avek lezot an sekre lo Internet ouswa get diferan form pornografi. Serten Kretyen ki’n marye in kasyet sa bann move kondwit avek zot konzwen inosan. Sa i apel malonnet. Remark parol Lerwa David, en zonm fidel: “Mon pa’n asiz avek bann anbeter; e mon pa frekant bann ki kasyet sa ki zot ete.” (Psonm 26:4) Si ou’n marye, pa zanmen annan bann kondwit ki kapab enfliyans ou pour kasyet sa ki ou ete avek ou konzwen!

7, 8. Ki legzanp dan Labib ki kapab ed bann zanfan pour aprann valer ki lonnekte i annan?

⁷ I vreman saz pour bann paran servi legzanp dan Labib kan zot pe ansenny zot zanfan valer ki lonnekte i annan. Lo kote negatif, i annan bann resi parey sa enn lo Akann ki ti vole e esey kasyet son move aksyon, Geazi ki ti koz manti pour li  benefisye finansyerman e Zida ki ti vole e koz manti pour fer ditor Zezi.​—Zozye 6:17-19; 7:11-25; 2 Lerwa 5:14-16, 20-27; Matye 26:14, 15; Zan 12:6.

⁸ Lo kote pozitif, i annan bann resi parey sa enn lo Zakob ki ti ankouraz son bann garson pour retourn avek sa larzan ki zot ti vwar dan zot sak akoz i ti santi ki zot ti’n kapab fer en tronpri. I osi annan legzanp fiy Yifta ki ti onor sa ve ki son papa ti’n fer, par fer en gran sakrifis. E Zezi osi ki avek kouraz ti idantifye son lekor devan en group dimoun ki ti pe vin aret li pour ki profesi ti ganny akonplir e osi pour protez son bann zanmi. (Zenez 43:12; Ziz 11:30-40; Zan 18:3-11) Sa detrwa legzanp i kapab donn bann paran en lide konsernan bann lenformasyon enportan ki Parol Bondye i annan e ed zot afen ki zot ava kapab ansenny zot zanfan pour kontan e apresye lonnekte.

9. Ki paran i devret evite si zot anvi kit en legzanp lo lonnekte pour zot zanfan swiv e akoz sa kalite legzanp i enportan?

⁹ Sa kalite lansennyman i anmenn en gro responsabilite lo bann paran. Zapot Pol ti demande: “Ou ki ansenny lezot, akoz ou pa ansenny ou prop lekor? Ou ki ansennyen ki fodre pa vole akoz ou vole?” (Romen 2:21) Serten paran i ansenny zot zanfan ki zot devret onnet me zot zot fer tou lekontrer dan zot fason azir, alor sa zanfan i konfize. Zot kapab esey zistifye bann pti keksoz ki zot vole e konman en lekskiz zot dir: “Ar sef i konnen ki i annan anplwaye ki pou pran en pe pour zot” ouswa zot dir: “Sa ti zis en pti mansonz sa, napa nanryen mal avek sa.” An realite, vol pti keksoz ouswa vol gro keksoz tousala vole menm. Pti mansonz oubyen gro mansonz lo nenport size tousala mansonz menm. * (Lik 16:10) Bann zanfan i fasilman detekte en keksoz ipokrit e i kapab annan en gran  lefe lo zot. (Efezyen 6:4) Parkont, kan zot aprann lonnekte atraver legzanp zot paran, petet ler zot pou gran zot pou rann glwar Zeova dan sa lemonn malonnet.​—Proverb 22:6.

10. Ki lavertisman nou devret gard antet an rapor avek en konversasyon ant bann konpanyon Kretyen?

¹⁰ Nou annan sa loportinite pour devlop lonnekte kan nou asosye avek lezot frer ek ser Kretyen. Parey nou’n aprann dan Sapit 12, nou devret fer atansyon lafason ki nou servi nou abilite pour koze, espesyalman parmi nou bann frer ek ser spirityel. Bavardaz ouswa menm rimer i fasilman kapab devlope dan nou bann konversasyon tou le zour! Nou kapab ede pour propaz en mansonz si nou repet en keksoz ki nou pa ni menm asire si i vre, alor i pli byen pour nou vey sa ki nou dir. (Proverb 10:19) De lot kote, nou kapab konn en keksoz ki vre, me sa pa vedir ki nou devret akont li. Par egzanp, sa size i kapab pa konsern nou ouswa i pa pou demontre labonte anver nou frer ek ser si nou koz lo la. (1 Tesalonisyen 4:11) Serten dimoun i koz dan en fason brit akoz zot dir ki zot pe koz fran, me nou parol i devret touzour bon e agreab.​—Kolosyen 4:6.

11, 12. (a) Dan ki fason serten ki’n enplike dan bann pese grav in agrav zot sitiasyon? (b) Ki serten mansonz Satan i promote konsernan bann pese grav e ki mannyer nou kapab rezet zot? (c) Ki mannyer nou kapab montre ki nou onnet avek lorganizasyon Zeova?

 ¹¹ I tre enportan ki nou onnet avek bann ansyen dan kongregasyon. Kan bann ansyen i koz avek bann ki’n fer en fot grav, zot kapab agrav sitiasyon par esey kasyet zot pese e koz manti. Sa bann dimoun i menm konmans viv de kalite lavi par pretann ki zot servi Zeova anmezir ki zot viv en lavi kot zot pe pratik sa ki mal. Anfet, sa kalite latitid i kapab fer ki sa dimoun i viv en lavi ipokrit. (Psonm 12:2) Lezot i kasyet sa ki’n vreman arive e akont bann ansyen zis en pti bout sa ki’n pase. (Akt 5:1-11) Zot pa onnet akoz zot krwar bann mansonz ki Satan i promote.​—Vwar bwat “ Mansonz ki Satan i promote konsernan pese grav.”

¹² I enportan osi ki nou onnet avek lorganizasyon Zeova kan nou pe ranpli bann form. Par egzanp, kan nou ekrir nou rapor predikasyon, nou pa devret fer trik. Pareyman, kan nou ranpli en form pour kek privilez dan servis nou pa devret zanmen kasyet leta nou lasante ouswa okenn lezot domenn.​—Proverb 6:16-19.

13. Ki mannyer nou kapab reste onnet si nou fer biznes avek en lot Kretyen?

¹³ Nou devret onnet osi dan domenn biznes. Parler bann frer ek ser Kretyen i kapab fer bann tranzaksyon biznes avek kanmarad. Zot devret fer sir ki sa pa enterfer avek zot ladorasyon kot Lasal Rwayonm e dan predikasyon. Sa relasyon travay i kapab ant en anplwayer ek son anplwaye. Si nou anploy bann frer ouswa bann ser, nou devret fer sir ki nou tret zot dan en fason onnet, setadir pey zot atan e donn zot sa saler ki zot ti tonm dakor lo la e osi bann benefis ki’n ganny aranze ouswa etablir par lalwa. (1 Timote 5:18; Zak 5:1-4) De lot kote, si nou’n ganny  anploye par en frer oubyen en ser, nou devret donn tou dan travay pour sa lapey ki nou pe gannyen. (2 Tesalonisyen 3:10) Nou pa ekspekte ganny pli byen trete akoz nou annan menm krwayans, konmsi nou anplwayer i drwa nou bann zour konze, benefis ouswa lezot lavantaz ki lezot travayer pa gannyen.​—Efezyen 6:5-8.

14. Kan de Kretyen i angaz zot dan en biznes ansanm, ki prekosyon saz zot devret pran e akoz?

¹⁴ Me si nou anvi konmans en biznes avek en lot Kretyen, petet par envestir ouswa pret en sonm larzan? Labib i annan en prensip enportan e pratik: Met tou lo en papye! Par egzanp, kan Zeremi ti aste en bout later, i ti fer de dokiman pour sa zafer, ti annan temwen e i ti anmas byen sa dokiman konman referans pour pli tar. (Zeremi 32:9-12; vwar osi Zenez 23:16-20.) Kan nou pe fer biznes avek en frer oubyen ser Kretyen, tou detay i devret ganny byen prepare, sinyen e annan temwen. Me sa pa vedir ki zot napa konfyans dan kanmarad. O kontrer, i ede pour evit bann mal konprenezon ouswa menm anpes bann dezakor devlope. Nenport Kretyen ki pe fer biznes ansanm i devret gard antet ki okenn tranzaksyon biznes ki zot pe lans zot ladan pa devret detrir linite ek lape dan kongregasyon. *​—1 Korentyen 6:1-8.

15. Ki mannyer Zeova i santi anver bann aksyon malonnet dan biznes e ki mannyer bann Kretyen i reazir anver sa bann pratik popiler?

¹⁵ En Kretyen pa devret zis onnet dan kongregasyon. Pol ti dir: ‘Nou oule fer sa ki onnet dan tou sirkonstans.’ (Ebre 13:18) Nou Kreater i vreman kontan lonnekte dan biznes. Dan liv Proverb tousel, kat fwa i refer avek bann balans ki ti ganny servi pour vol lezot. (Proverb 11:1;  16:11; 20:10, 23) Dan letan lontan, balans ek pwa ti souvan ganny servi dan bann tranzaksyon biznes pour kapab pez bann marsandiz ek larzan ki ti ganny servi pour aste zot. Bann marsan malonnet ti servi de diferan kalite pwa ek en balans ki pa ti egzakt pour tronp e vol zot kliyan. * Zeova i ay sa bann pratik! Pour reste dan son lanmour, definitivman nou bezwen evit tou sort pratik malonnet.

16, 17. Ki kalite aksyon malonnet ki popiler dan sa lemonn e ki bann vre Kretyen in deside pour fer?

¹⁶ Satan ki pe diriz sa lemonn alors nou pa sirprann ki i annan en kantite aksyon malonnet toultour nou. Tou le zour nou kapab ganny tante pour azir dan en fason malonnet. Souvandfwa kan bann dimoun pe ranpli en form pour rod en plas travay, zot souvan koz manti e egzazere, zot envant bann louvraz ki zot pa’n fer ek leksperyans ki zot napa. Kan zot ranpli bann form imigrasyon, taks, lasirans ek lezot, souvandfwa zot donn bann fo lenformasyon pour ki zot ganny sa ki zot oule. Bokou zelev i kopi dan bann legzanmen ouswa kan pe ekrir bann konpozisyon ek rapor pour lekol. Zot menm al lo Internet e kopi sa ki zot dekouver e fer krwar ki zot ki’n fer sa. E kan bann dimoun i rankontre bann zofisye malonnet, zot souvan ofer gous pour zot ganny sa ki zot oule. Nou ekspekte vwar sa kalite latitid dan en lemonn kot zonm i “egois, kontan larzan, . . . [e] lennmi sa ki fer dibyen.”​—2 Timote 3:1-5.

¹⁷ Bann vre Kretyen in deside pour pa partisip dan okenn sa bann pratik. Lonnekte i kapab en defi parler vi ki bann ki enplike dan sa bann pratik malonnet i paret pe reisi e annan lavantaz dan sa lemonn. (Psonm 73:1-8)  Antretan, bann Kretyen i kapab pe soufer dan domenn finansyel akoz zot reste onnet ‘dan tou sirkonstans.’ Eski sa sakrifis i vo lapenn? Byensir! Me akoz? Ki byenfe nou gannyen kan nou azir dan en fason onnet?

18. Akoz en repitasyon konman en dimoun onnet i annan en gran valer?

¹⁸ Napa bokou keksoz ki ou kapab trouve dan lavi ki annan plis valer ki en repitasyon konman en dimoun onnet e enn ki lezot i annan konfyans ladan. (Vwar bwat “ Ki degre onnet mon ete?”) E mazinen, nenport dimoun i kapab annan sa kalite repitasyon! I pa depan lo ou talan, larises, laparans, ran sosyal ouswa lezot fakter ki an deor nou kontrol. Toudmenm, bokou pa reisi annan en bon repitasyon. I vreman rar. (Mika 7:2) Serten i kapab sikann ou si ou onnet, me lezot i apresye ou lonnekte e zot pou rekonpans ou akoz zot pou annan respe pour ou e annan konfyans dan ou. Bokou Temwen Zeova in vwar ki zot in benefisye bokou finansyerman kan zot onnet. Zot ankor pe travay pandan ki lezot ki ti malonnet in perdi zot plas travay ouswa zot ganny en travay kot ti pe rod bann dimoun onnet.

19. Ki mannyer en lavi ki onnet i kapab annan lefe lo nou konsyans ek nou relasyon avek Zeova?

¹⁹ Ki swa sa i ariv avek ou oubyen non, ou pou trouve ki lonnekte i anmenn bann pli gran byenfe. Ou pou annan en konsyans kler. Pol ti ekrir: “Nou sir ki nou annan en konsyans kler.” (Ebre 13:18) Deplis nou Papa lanmour i touzour remark nou bon repitasyon e i kontan bann dimoun onnet. (Psonm 15:1, 2; Proverb 22:1) Wi, annan lonnekte pou ed ou pour reste dan lanmour Bondye e sa i sa pli gran rekonpans ki nou kapab gannyen. Aprezan annou diskit en lot size ki lo menm laliny: Pwennvi Zeova lo travay.