1, 2. Nama kebuah Jehovah rindu ati meda kitai bebendar deka ngereja utai enggau lurus? Terangka.

SEIKU INDAI enggau anak lelaki iya pansut ari kedai. Enda memukai anak iya ngetu. Iya baka ke takut, laban enda ingat mulaika ayam ke diambi ari kedai tauka ngasuh indai iya meli ayam nya ke iya. Iya madahka indai iya. Indai iya mai iya nikal baru ke kedai nya. Anak iya mulaika ayam nya, lalu minta ampun. Pengawa iya ngasuh indai iya gaga ati. Nama kebuah?

² Anak ke ngereja utai enggau lurus ngagaka ati apai indai. Kitai mega ngagaka ati Apai ti di serega, ke “rinduka atur ti lurus,” enti kitai mansang ba pengarap, lalu bebendar deka ngereja utai enggau lurus. (Masmur 37:28) Laban kitai deka ngerinduka ati Petara sereta meruan dalam pengerindu Iya, kitai nitihka utai ti dipadah rasul Paul: “Ngereja utai ti badas berari.” (Hebrew 13:18) Aram kitai berandau baka ni kitai nunjukka pengelurus ba empat pekara, taja pan kekadang tusah dititihka. Udah nya, kitai beratika sekeda berekat ti deka diulih.

3-5. (a) Baka ni Bup Kudus nangkan kitai pasal penusah ti ulih nyadi enti nipu diri empu? (b) Nama ulih nulung kitai ngereja utai enggau lurus?

³ Ketegal kitai enda sempurna, kitai tusah deka ngereja utai enggau lurus. Chunto, orang Kristian ba Laudisia  ngumbai diri “kaya, bisi semua utai.” Tang, Jesus madahka sida “seranta, buta sereta telanjai” ba pengarap. (Pemandang 3:17) Ketegal nipu diri, sida majak ngemediska diri.

⁴ Kingatka, James meri jaku tangkan: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.” (James 1:26) Enti kitai ngumbai sembah kitai diterima Jehovah, tang enda nemu nagang dilah diri, kitai nipu diri empu. Sembah kitai ngagai Jehovah nadai guna. Baka ni kitai ulih nyeliahka pekara tu?

⁵ Ba bup ti sama, James ngumbai pemendar ari Bup Kudus baka cheremin. Iya meransang kitai beratika ajar Bup Kudus, lalu nguji berubah. (Bacha James 1:23-25.) Bup Kudus ulih nulung kitai ngembuan pengelurus ngambika ulih berubah. (Sabak Kenang 3:40; Hagai 1:5) Kitai mega ulih besampi ngagai Jehovah ngambika Iya meresa kitai, nulung kitai nemu sereta mutarka pengurang diri. (Masmur 139:23, 24) Ngereja utai enggau enda lurus ukai utai ti manah. Nya alai, kitai patut ngembuan runding ti sama enggau Apai ti di serega. Jaku Dalam 3:32 madah: ‘Jehovah begedika orang ke ngereja penyai [orang ke enda lurus], tang Iya ngaga orang ke lurus nyadika pangan Iya.” Kingatka jaku Paul: “Deka ngereja utai ti badas.” Kemaya hari tu kitai enda sempurna, tang kitai bebendar deka ngereja utai enggau lurus.

6. Nama kebuah orang ke udah kawin patut beterus terang enggau pangan diri, lalu nama ulih diseliahka seduai iya?

⁶ Ruang bilik orang Kristian patut bisi pengelurus.  Nya alai, laki bini patut beterus terang enggau pangan diri. Orang Kristian ke udah kawin enda patut nguntik orang bukai, bisi ambai lalai ba Internet, tauka meda pornografi. Sekeda orang Kristian ke udah kawin ngelalaika penyalah tu ari kaling sida. Tu pengawa ti enda lurus. Peratika jaku Raja David: “Aku enda begulai enggau orang ke bula, lalu aku enggai begulai enggau orang ke pura-pura ngapa.” (Masmur 26:4) Enti nuan udah kawin, anang sekali-kali ngereja utai ti ngasuh nuan pepura enggau kaling nuan!

7, 8. Nama chunto ari Bup Kudus ke ulih nulung anak beberatka pengelurus?

⁷ Apai indai patut ngena chunto ari Bup Kudus kena ngajar anak sida pasal pengelurus. Chunto orang ke nadai pengelurus iya nya Achan, ke ngenchuri lalu nguji ngelalaika penyalah iya; Gehasi, ke bula ketegal deka bulih penguntung; sereta Judas Iskariot, ke ngenchuri lalu pepura ba mua Jesus.—Josua 6:17-19; 7:11-25; 2 Raja 5:14-16, 20-27; Matthew 26:14, 15; John 12:6.

⁸ Chunto orang ke bisi pengelurus iya nya Jakop, ke ngasuh bala anak iya mulaika duit ti ditemu ba mua guni, laban nya engka ketegal saru; Jeptah enggau anak  indu iya, ke ngamatka semaya Jeptah enggau Petara taja pan tusah; sereta Jesus, ke berani madahka diri ba mua bala mayuh ke jai kena ngamatka jaku Bup Kudus, lalu nyelamatka bala murid iya. (Pemungkal 43:12; Pengulu 11:30-40; John 18:3-11) Chunto ari Bup Kudus tu ulih nulung apai indai ngajar anak sida beberatka pengelurus.

9. Nama patut diseliahka apai indai enti sida deka nyadi teladan ke bala anak, lalu nama kebuah teladan nya beguna?

⁹ Ngajar anak pasal pengelurus endang tanggungjawap apai indai. Rasul Paul nanya: “Kita ngajar orang bukai, kati kita enda ngajar diri empu? Kita ngajar orang, enda nyagi orang ngenchuri, kati kita ngenchuri?” (Rome 2:21) Sekeda apai indai ngenusutka runding anak laban sida ngasuh anak ngereja utai enggau lurus, tang sida empu enda. Sida engka madahka ngenchuri utai ti enda berega enggau bebula nya ulih laban ku sida, “Enda ngawa, ngambi mimit aja” tauka “Enda ngawa bula enti iya enda ngenusahka orang.” Iya ke amat, enchuri tetap enchuri, enda ngira utai ke dichuri nya berega tauka enda, lalu bula tetap bula, enda ngira nama pemula nya. * (Bacha Luke 16:10.) Anak jampat nemu sekalika apai indai bula tauka enda, lalu tu engka ngasuh anak nyadi orang ke enda lurus. (Epesus 6:4) Taja pia, enti anak belajar ari teladan apai indai ke bisi pengelurus, sida deka nyadi orang ke ngemuliaka Jehovah ba dunya ti nadai pengelurus tu.—Jaku Dalam 22:6.

10. Nama patut dikingatka kitai maya bejaku enggau bala menyadi Kristian?

¹⁰ Begulai enggau bala menyadi Kristian meri peluang ngemansangka pengelurus ba diri empu. Baka ke udah dipelajar ba Pelajar 12, kitai patut bejimat maya bejaku enggau bala menyadi Kristian. Jaku randau enggau pangan diri ulih ngujungka kitai bejakuka orang tauka betenah! Enti kitai ngulang cherita ke empai temu amat tauka enda, kitai engka madahka utai bula. Nya alai, manah agi kitai enda ibuh nampung cherita nya. (Jaku Dalam 10:19) Pia mega, taja pan kitai nemu cherita nya endang amat, ukai reti iya kitai patut nusui iya. Chunto, cherita nya engka nadai kaul enggau kitai tauka enda patut disebut. (1 Tesalonika 4:11) Sekeda orang ngumbai enda mereti lebuh bejaku enda ngawa, asalka utai ti disebut iya amat. Tang, jaku kitai patut seruran badas sereta ngenyamaika ati orang.—Bacha Kolosi 4:6.

11, 12. (a) Nama digaga sekeda orang ke ngereja penyalah ti besai? (b) Nama sekeda pemula Sitan pasal penyalah ti besai, lalu baka ni kitai ngelaban iya? (c) Baka ni kitai nunjukka diri enda bula ba gerempung Jehovah?

 ¹¹ Kitai mega enda patut bula ngagai tuai gempuru. Sekeda orang ke ngereja penyalah ti besai nguji ngelalaika penyalah sida, lalu bebula ke tuai gempuru maya ditanya. Orang ke baka nya pepura nyembah Jehovah. Enggau tu, iya nyadi orang ke bula. (Masmur 12:2) Bisi mega ngelalaika sekeda pekara, lalu enda madah ngagai tuai gempuru cherita ke amat. (Kereja Rasul 5:1-11) Tu ketegal sida arapka pemula ti datai ari Sitan.—Peda kutak “ Pemula Sitan Pasal Penyalah ti Besai.”

¹² Kitai mega enda patut bula maya ngisi pom ari gerempung Jehovah. Chunto, maya kitai nulis riput pasal pengawa nginjil enggau ngajar, tulis meh utai ke amat. Pia mega, maya kitai ngisi pom kena megai pengawa ba gerempung Jehovah, kitai anang bula nulis pasal pengerai diri tauka pasal diri empu.—Bacha Jaku Dalam 6:16-19.

13. Baka ni kitai ulih mengkang ngereja utai enggau lurus maya bedagang enggau menyadi ke sama pengarap?

¹³ Kitai mega patut ngereja utai enggau lurus maya bedagang tauka bekereja. Kekadang, bala menyadi Kristian bedagang enggau pangan diri. Sida patut bejimat ngambika enda nyampurka pengawa dagang enggau sembah. Sida enda patut berandau pasal pengawa dagang ba Palan Gempuru tauka maya nginjil. Pia mega entara tuke enggau orang ke bekereja. Enti kitai ngaji bala menyadi Kristian, kitai patut mayar gaji sida nitihka haribulan enggau penyampau ti  udah disemaya, lalu nyediaka utai ti patut diterima orang ke bekereja, nitihka undang-undang. (1 Timoti 5:18; James 5:1-4) Pia mega, enti kitai digaji bala menyadi Kristian, kitai enda patut “ngular” tauka ngelusu. (2 Tesalonika 3:10) Kitai mega enda patut ngarapka diri bulih manah agi utai ari orang bukai ketegal bekereja enggau menyadi sama pengarap.—Epesus 6:5-8.

14. Lebuh orang Kristian bekunsi bedagang, nama utai ti patut diperatika sida enggau manah, lalu nama kebuah?

¹⁴ Baka ni enti pengawa dagang ke ngasuh kitai sama-sama ngelabur tauka nginjau duit? Bup Kudus nyediaka ajar ti beguna: Semua utai patut digaga ngena surat, lalu disain! Chunto, lebuh Jeremiah meli tanah, iya ngaga surat, nyain iya, milih orang ke saksi, lalu nyimpan iya ngambika dikena dudi hari. (Jeremiah 32:9-12; peda mega Pemungkal 23:16-20.) Taja pan kitai begagaka surat, tu ukai reti iya kitai enda pechayaka pangan diri. Tang, tu nulung kitai nyeliahka penanggul ti ulih nyadi dudi hari. Kingatka, menyadi Kristian ti bekunsi bedagang enda patut ngelakka pengawa dagang ngerusak pemaik enggau kaul entara pangan diri. *—1 Korint 6:1-8.

15. Baka ni asai ati Jehovah meda pengawa ti enda lurus maya bedagang, lalu nama penemu orang Kristian pasal pekara tu?

¹⁵ Orang Kristian ukai semina ngereja utai enggau lurus ba gerempung Jehovah. Paul madah: “Ngereja utai ti badas berari.” (Hebrew 13:18) Lebuh bekereja,  Jehovah deka kitai ngereja utai enggau lurus. Bup Jaku Dalam madahka sekeda chara dikena orang nipu maya nimbang tauka nakar utai. (Jaku Dalam 11:1; 20:10, 23) Kelia menya, orang nimbang utai tauka duit ngena dachin maya bedagang. Orang bedagang ke nipu ngena dua bengkah dachin; siti dikena meli, siti agi dikena nyual. Kedua-dua dachin nya diubah kena nipu orang bukai. Jehovah begedika pengawa tu! Ngambika meruan dalam pengerindu Iya, kitai patut nyeliahka semua pengawa ti enda lurus.

16, 17. Nama pengawa ti enda lurus ke dikereja orang kemaya hari tu, lalu nama patut diseliahka orang Kristian ti bendar?

¹⁶ Ketegal dunya tu di baruh kuasa Sitan, nya alai pengawa ti enda lurus bisi ba sebarang endur. Tu ngasuh kitai tusah deka ngereja utai enggau lurus. Lebuh ngisi pom kena minta kereja, mayuh orang nipu pasal pengelandik, peneleba enggau pasal diri empu. Pia mega, maya orang ngisi pom deka nyadi rayat menua bukai, mayar chukai, meli insuran sereta utai bukai, selalu iya sida nulis utai ke enda amat. Mayuh nembiak sekula nipu maya peresa tauka niru kereja orang bukai ari Internet, lalu ngumbai nya asil kereja sida empu. Orang mega selalu meri suap ngagai pengereja pengawa ke enda lurus, kena ngulihka utai ti dikedeka sida. Utai tu nyadi laban mayuh orang ba dunya tu “semina berundingka diri empu aja, angkunka duit, . . . begedika utai ti badas.”—2 Timoti 3:1-5.

¹⁷ Orang Kristian ti bendar nyeliahka semua pengawa ti enda lurus nya. Kekadang tusah deka ngereja tu laban orang ke ngereja utai enggau enda lurus baka ke mujur sereta bulih penguntung lebih agi ari orang ke  ngereja utai enggau lurus. (Masmur 73:1-8) Pia mega, orang Kristian engka rugi ketegal sida “deka ngereja utai ti badas berari.” Kati bisi penguntung enti ngereja utai enggau lurus? Bisi! Nama kebuah? Nama berekat iya?

18. Nama kebuah ngereja pengawa enggau lurus mai berekat?

¹⁸ Orang ke ngereja utai enggau lurus deka tampak nama sereta ulih dikearapka. (Peda kutak “ Kati Aku Seruran Lurus?”) Semua orang ulih ngereja utai enggau lurus! Tu ukai bepanggai ba pengelandik, pengaya, gamal, penatai, tauka utai bukai. Tang, tusah deka tetemuka orang ke ulih ngereja utai enggau lurus. (Mikah 7:2) Sekeda orang engka ngeleseka nuan, tang bisi mega orang rinduka nuan ketegal ngereja utai enggau lurus, lalu sida deka arapka sereta bebasaka nuan. Mayuh ari Saksi-Saksi Jehovah bulih penguntung ketegal ngereja pengawa enggau lurus. Sida enda dibuai kereja sereta senang deka bulih kereja.

19. Baka ni pengelurus bekaul enggau ati ti beresi sereta kaul kitai enggau Jehovah?

¹⁹ Ngereja pengawa enggau lurus endang mai berekat ti besai. Nuan deka bisi ati ti beresi. Paul nulis: “Kami nemu ati diri beresi.” (Hebrew 13:18) Nambahka nya, Jehovah meda kitai ngereja pengawa enggau lurus, lalu Iya rinduka orang ti lurus. (Bacha Masmur 15:1, 2; Jaku Dalam 22:1.) Amat, pengelurus ulih nulung kitai meruan dalam pengerindu Petara, lalu tu berekat ti pemadu besai. Aram kitai beratika pekara tu: Penemu Jehovah pasal kereja.