1, 2. Ngatta magayayà si Jehova nu masinganna i appursigi tam nga mabbalin tu mapammakatalakkan? Iyilustra.

NANAW i yena anna i anàna ta pallakuan. Gavvà nagimmang i abbing nga maggudu-gudu. Agga-tammìna i tadday nga gayam nga nalàna ta pallakuan. Nakattammanna nga itoli yatun onu ipagatang nakuan ta yenana. Siminangì megafu ta vurunna, tapus kinagina yatun ta yenana. Pinakalma na yena i anàna tapus nattoli ira ta pallakuan tape metoli na abbing i gayam anna makippakoma. Durante nga kukukuanna yatun, kuruga magayayà i yena. Ngatta?

² Kanayun nga magayayà i maganà nu masingadda nga ammu na ánada i importansia na pabbalin tu mapammakatalakkan. Kunnatun gapa ta nelangitan nga Yama tam, i Dios nga mapammakatalakkan. (Salmo 31:5) Durante nga masinganna nga mammanakam ittam ta espiritual, magayayà yaya ta appursigi tam nga mabbalin tu mapammakatalakkan. Megafu ta kayà tam nga mapagayayà yaya anna mattalupaddian ta ayâna, matagenò tam gapa i natagenò ni apostol Pablo nga nangikagi: “Karagatammi nga mattolay nga mapammakatalakkan ta ngamin nga ganna-gannug.” (Hebreo 13:18, NW) Gigiammuattam i appa nga importante nga aspeto na pattolay nga awayyana tu mariga nga mabbalin tu mapammakatalakkan. Kabalinna, ammuattam gapa i bendision nga parresultanna.

3-5. (a) Anni i tabarang na Biblia meyannung ta pangilloko ta baggi? (b) Anni i makoffun tape mabbalin tu realistiko i pagimamma ta baggi tam?

³ Mariga i mabbalin nga realistiko ta pagimamma ta baggi tam. Mabì tam laman nga melloko i baggi tam megafu ta imperfekto tam. Angngariganna, nekagi ni Jesus ta Cristiano ira ta Laodicea nga inillokoda i baggída ta pannonò nga riku ira, ngem ta kakuruganna, ‘awan tu anna-annida, uba, anna vuling ira paga’ ta espiritual​—kuruga kakkallò. (Nepakannammu 3:17) Mas nga nabbalin tu delikadu i situasiodda megafu ta pangillokoda ta baggída.

⁴ Takkilalammu gapa nga netabarang ni Santiago: “I sinni laman nga magabbo tu relihioso yaya ngem arian na nga fugaddan i zila na, ilogo na laman i baggi na anna awan tu kebalinan na relihion na.” (Santiago 1:26) Illokowattam laman i baggi tam, nu irasottam nga alawatan lagapa ni Jehova i paddayarayotam maski nu marake i pangiyusa tam ta zila tam. Mabbalin tu awan tu kuenta na paddayarayotam kani Jehova. Kunnasi tam nga malillitan yatun?

⁵ Tatun lagapa nga kapitulo, negitta ni Santiago ta ispeho i uvovug na Dios. Netabaranna nga usitakkattam i awan tu pakkuranganna nga dob na Dios anna ulian i kata-katoletam. (Bibbigammu i Santiago 1:23-25.) Makoffun i Biblia tape mabbalin tu realistiko i pagimamma tam ta baggi tam anna tape masingan i kawagan nga papprogresuan. (Silasigo 3:40; Hageo 1:5) Awayyatam gapa ipakimallò kani Jehova nga usitakkanna ittam, anna mappoffun sa tape masingan anna metunung tam i serioso nga pakkurangattam. (Salmo 139:23, 24) Maruddu nga ari mataga-tagenò nga pakkafian i pabbalin tu ari mapammakatalakkan. Mawag nga parigattam i pagimamma ni Jehova tatun. Kagian na Proverbio 3:32: “Kalussaw ni Jehova i tolay nga minangngilloko, ngem i madukkò nga pakikofunna ay egga ta matunung ira.” Moffunan ittam ni Jehova nga maparigan i panagenòna anna  imammatan i baggi tam nga kagitta na pagimammana. Daddammammu i kinagi ni Pablo: “Karagatammi nga mattolay nga mapammakatalakkan.” Imperfekto tam, ngem kakayà tam nga mabbalin tu mapammakatalakkan.

6. Ngatta mawag tu ari nga malladda-laddug i magatawa ta kataggi-tadday, anna anni ira i malillitadda nga peligro?

⁶ Mapammakatalakkan nakuan i ngamin nga familia na Cristiano. Mawag gafu nga ari nga malladda-laddug i magatawa ta kataggi-tadday. Lillitadda nakuan i makatakì anna i madaping nga annangngua kagitta na pangipasingan tu romantiko nga interes ta ariadda atawa, sekreto nga pakirelasion ta Internet, onu pangiyusa tu maski anni nga klase na pornograpia. Nakua yatun na karuan nga natawan nga Cristiano tapus ilimagda ta atawada. Ari ira nga mapammakatalakkan. Innammu i nakagi na matalò nga si Patul David: “Ari ngà mevulu ta totolay ira nga awan tu kebilangad-da; ari ngà melivu-livu ta minaggappa-appe ira.” (Salmo 26:4) Nu natawan ka ngana, ari ka vuluvuga magangngua tu gannug nga manenta nikaw nga ilimag i kukukuammu ta atawam!

7, 8. Anni ira nga ehemplo ta Biblia i makoffun ta ána tape mabbalin ira tu mapammakatalakkan?

⁷ Makasta nu mangiyusa i maganà ira tu angngarigan ta Biblia nu itudduda ta ánada i importansia na pabbalin tu mapammakatalakkan. Egga ira i marake nga ehemplo—si Acan nga nakkokò  anna ginakkagna nga ilimag i kingnguana; si Gehazi nga nalladdug para ta material nga gannug; anna si Judas nga nakkokò anna nalladdug tape mepagafùna si Jesus.—Josue 6:17-19; 7:11-25; 2 Patul Ira 5:14-16, 20-27; Mateo 26:14, 15; Juan 12:6.

⁸ Egga gapa ira i makasta nga ehemplo—si Jacob nga nanabarang ta ánana nga itolída i kuartu nga nalegadda ta sakuda megafu ta awayyana nga mali i nekepappanna tatun; si Jefte anna i anàna nga babay, nga nattuppal ta promesa na yamana maski nu dakal nga sakrifisio yatun sa; anna si Jesus nga magutù nga nangiyammammu ta baggína ta aruban na totolay nga sigga-paran nga mamatay, tape matuppal i profesiya anna maprotektan i kokkofunna. (Genesis 43:12; Ukum Ira 11:30-40; Juan 18:3-11) Yaw laman i karuan ira ta makasta nga ehemplo nga egga ta Biblia nga makoffun ta maganà ira tape metudduda ta ánada i importansia na ayâ anna pabbalin tu mapammakatalakkan.

9. Kunnasi nga metuddu na maganà ta ánada i pabbalin tu mapammakatalakkan? Ngatta importante i makasta nga ehemplóda?

⁹ Responsibilidad na maganà nga tudduan i ánada. Neyavù ni Pablo: “Nu matudduam-mu i karuan, ngatta ta ariam-mu tudduan i baggim laggapa? Ilammuyag mu, ‘Ari ka makkoko’ ngem makkoko ka!” (Roma 2:21) Maguluan i ána megafu ta ituttuddu na maganàda nga mapammakatalakkan nakuan ira ngem ariadda mabba meyaplika yatun. Baka irasonadda i pakkokò anna i palladdugda gukaban na pangikagi tu “Ariammu mavurung, baddi laman nga gannug yatun ta makakkua” onu “Ari mabba nga madammo nga palladdug yatun.” Ta kakuruganna, baddi onu dakal nga gannug​—pakkokò lagapa yatun. Kunnatun gapa ta palladdug, maski simple onu madammo, palladdug lagapa yatun. * (Bibbigammu i Lucas 16:10.) Mabi laman nga  mammuan na abbing ira nu appe-mapammakatalakkan i tadday anna marake i efektona yaw nira. (Efeso 6:4) Ngem nu magigiammuda ta maganàda i pabbalin tu mapammakatalakkan, siguradu nga dumakal ira nga egga paganassidda kani Jehova maski nu ari tu mapammakatalakkan i totolay ta pallevùda.​—Proverbio 22:6.

10. Anni i mawag nga daddammattam nu meyannung ta pakiyuvovug ta kapangngurug tam?

¹⁰ Aru i tiansa tam nga mabbalin tu mapammakatalakkan nu kavulu tam i kapangngurug tam. Nagigiammu tam ta Kapitulo 12 nga mawag i pagimmugug ta pangiyusa tu regalu nga paguvovug, neerulay ta wawwaragi tam ta espiritual. Mabi laman nga mattuppal ta tsismis, anna maski panara-daral i simple nga paggiristoria! Nu iyistoria tam i gannug nga ari gamma siguradu nu kurug, baka makewarà tam tu laddug. Yatutta mas makasta nu ariattam ngana laman ikakkagi. (Proverbio 10:19) Nu karuan, awayyana tu egga ammu tam nga kurug gapa, ngem arianna kayà kagian nga mawag tu iyistoria tam yatun. Angngariganna, baka awan gamma tu koneksionna nikaw, onu ari makasta  nga paggiristorian. (1 Tesalonica 4:11) Irasonan na karuan nga makkakkagi laman ira tu kurug yari tu neyistoriada, ngem kanayun nakuan nga makasta i paguvovug tam.—Bibbigammu i Colosas 4:6.

11, 12. (a) Kunnasi nga mas pinadammo na karuan i liwàda? (b) Anni ira i Sataniko nga kinaladdug meyannung ta madammo nga liwà, anna kunnasi tam yatun nga malabanan? (c) Kunnasi tam mepasingan nga mapammakatalakkattam ta organisasion ni Jehova?

¹¹ Mas nakuan nga makkagi tam tu kurug ta elder ira. Mas maddammò i liwà na karuan nu ilimagda yatun ta elder ira anna nu malladdugda nu mapakkiavutan ira. Mabbalin paga tu doble-kara i pattoleda. Massesserbi ira kani Jehova ngem ariadda gamma immangan nga kuan i madammo nga nakaliwatadda. Kinaladdug i interu nga pattoleda. (Salmo 12:2) Pilian laman na tanakuan i ikagida ta elder ira ngem ilimagda i importante ira nga detalye. (Kingngua 5:1-11) Maruddu nga naggafu yatun ta kinaladdug nga ituttuddu ni Satanas.​—Innammu i kahon nga “ Sataniko nga Kinaladdug Meyannung ta Madammo nga Liwi-liwà.”

¹² Mawag gapa nga mapammakatalakkattam ta organisasion ni Jehova nu maf-fill-up tu form ira. Angngariganna, nu mar-report tam, siguraduan nga fustu i ngamin nga netura tam. Kunnatun gapa nu maf-fill-up tam ta aplikasion para ta tanakuan paga ira nga pribiliehio, ariattam nakuan ilimag nu egga takì tam onu anni laman nga personal nga informasion.​—Bibbigammu i Efeso 4:25.

13. Kunnasi nga makapattalupaddiattam nga mapammakatalakkan ta pakipattrabahu ta kapangngurug tam?

¹³ Mapammakatalakkattam nakuan gapa ta pakittrabahu ta kapangngurug tam. Egga tiempo nga maka-transaksion na tadday nga Cristiano i kapangngurugna. Nu kunnatun, mawag tu ibitada nga paggiristorian yatun ta Kingdom Hall onu ta ministerio. Nu nangà i boss nga Saksi tu trabahador nga kapangngurugna, mawag tu mapammakatalakan yaya  ta pattratu sa; suelduanna segun ta nakka-anugutan anna iyawà i benefisio ira nga ikiddaw na gobierno. (1 Timoteo 5:18; Santiago 5:1-4) Nu sittam gapa i empleyadu, mawag tu mattrabahu tam ta kumpleto nga oras nga nakka-anugutan nga katumbas na sueldo. (2 Tesalonica 3:10) Ariattam ekspektan i mas makasta nga pattratu nittam, gitta na obligadu ira nga mangiyawà tu bakasion, benefisio onu tanakuan paga nga bentaha nga awan ta ari Saksi nga katrabahu.​—Efeso 6:5-8.

14. Nu massosio i Cristiano ira, anni nakuan i kuadda, anna ngatta?

¹⁴ Kunnasi nu egga kasosiom​—puunan onu pagatù? Nangiyawà i Biblia tu praktikal nga prinsipio: Mangngua tu katurakan! Angngariganna, turi ta giminatang si Jeremias tu davvun, nappakua yaya tu dua nga kopia na dokumento nga finirman na testigu ira anna nepappanna tape egga sangaw i basehadda. (Jeremias 32:9-12; innammu gapa i Genesis 23:16-20.) Arianna kayà kagian nga ari ka mattalò ta kapangngurugmu nu egga firmadu nga katurakan anna egga ira mamakurug nga saksi. Makoffun yaw tape malillitan i ari nga pakkara-intindian, pakkadismaya, anna paddarama. Daddamman nakuan na makkasosio ira nga Cristiano nga ari nakuan metali i pattaradday anna imammo na kongregasion para laman ta negosio. *​—1 Corinto 6:1-8.

15. Anni i pagimamma ni Jehova ta paddarogas ta negosio? Anni nakuan i pagimamma na Cristiano ta ngamin nga klase na paddarogas?

¹⁵ Ari laman nga ta unag na kongregasion nga mapammakatalakkan i Cristiano. Kinagi ni Pablo: “Karagatammi nga mattolay nga mapammakatalakkan ta ngamin nga ganna-gannug.” (Hebreo 13:18, NW) Nu meyannung ta negosio, kayà na Namaratu nittam nga mapammakatalakkattam. Ta  libru ngana laman na Proverbio mamì-appa nga nepasingan nga ari kayà ni Jehova i darogas nga akkilowan. (Proverbio 11:1; 20:10, 23) Gari, maruddu nga meyusa i akkilowan tape makilo i nagatang anna i nepaga nga kuartu. Mangiyusa i darogas ira nga negosiante tu ari fustu nga akkilowan tapenu maddarogas. Kalussaw ni Jehova i kunnatun! Tape makapattalupaddian ta ayâna, mawag nga lillitattam i ngamin nga klase na paddarogas.

16, 17. Anni ira nga situasion nga ari mapammakatalakkan i aru nga totolay? Anni i determinado nga kuan na Cristiano ira?

¹⁶ Ari nga kakkadda-kaddag nga napakaru i ari mapammakatalakkan megafu ta si Satanas i mammaguray taw nga mundo. Kanayun nga egga tentasion nittam nga mabbalin tu kunnatun. Nu maf-fill-up tu résumé, maruddu nga sosobran na karuan i binalidda anna malladda-laddug ira meyannung ta ekspiriensa ta trabahu. Maski gapa ta paf-fill-up tu papeles ta pagabroad, pappaga tu tax, insurance, anna pangalawà tu benefisio ta gobierno, malladda-laddug ira tape malàda i kayàda. Aru gapa nga estudiante i mangopia onu makkodiko, anna mangipasa tu report nga kinopiada laman ta Internet onu ta tanakuan tapus palawanadda nga ira mismu i nagangngua. Nu makitransaksion i karuan ta kurakot nga opisyales na gobierno, maruddu nga mangiyawà ira tu suhol tape malàda i kayàda. Ekspektattam i kunnaw megafu ta egga ittam ta mundo nga “ayatan na totolay i baggi da laman, anna kuartu laman i agga-nono da, . . . ikalussaw da noka i mapia.”​—2 Timoteo 3:1-5.

¹⁷ Determinado i kurug ira nga Cristiano nga ari makiparte tatun nga annangngua. Mariga mittan i pabbalin tu mapammakatalakkan megafu ta gitta na mas makasta i pattolay danuri na ari mapammakatalakkan. (Salmo 73:1-8) Tapus, dehadu ta finansial i Cristiano ira megafu ta karagatadda nga mabbalin tu mapammakatalakkan “ta ngamin nga ganna-gannug.” Sulit kari yatun nga  sakrifisio? Siyempre gapa! Ngatta? Anni i bendision ira na mapammakatalakkan?

18. Ngatta dakal i benefisio na pabbalin tu mapammakatalakkan?

¹⁸ Baddi laman i malegan nga ganna-gannug ta pattoletam nga mas nabalor anne ta makasta nga reputasion kagitta na mapammakatalakkan nga tolay. (Innammu i kahon nga “ Mapammakatalakkannà Kari Kanayun?”) Nonopammu yaw: Maski sinni awayyana nga mapeggan tu kunnatun nga reputasion! Ari nga nakadepende yatun ta talento, kinariku, itsura, estado ta pattolay, onu maski anni paga nga ariammu nga kontroladu. Ngem aru i ari makasta i reputasiodda. (Mikas 7:2) Awayyana nga uyawaddaka na karuan ta pabbalimmu tu mapammakatalakkan, ngem appresian yatun na tanakuan yari tu mattalò ira nikaw anna irespetoda ka. Nabenefisiowan ta finansial i aru nga Saksi ni Jehova megafu ta mapammakatalakkan ira. Nabbayag ira ta trabahuda maski nu nalsa i karuan ta ari ira nga mapammakatalakkan, onu nakaleg ira tu trabahu megafu ta aru i magala-aleg tu mapammakatalakkan ira nga empleyadu.

19. Anni i efektona ta konsensia anna ta relasiottam kani Jehova i pattolay nga mapammakatalakkan?

¹⁹ Maski nu ari paga nga nesimmu i kunnatun nikaw, dakal lagapa i benefisio na pabbalin tu mapammakatalakkan. Mapeggakka tu marenu nga konsensia. Netura ni Pablo: “Mangurug kami nga marenu i konsensiami.” (Hebreo 13:18) Ari paga vuluvuga nga kattamman ni Jehova i kunnatun nga reputasion anna ayatanna danuri mapammakatalakkan. (Bibbigammu i Salmo 15:1, 2; Proverbio 22:1.) Makoffun i pabbalin tu mapammakatalakkan tape makapattalupaddiakka ta ayâ na Dios. Yatun i kadakallan nga bendision nga malawàmu. Tumunug nga gigiammuattam i pagimamma ni Jehova ta trabahu.