1, 2. Чьма Йаһоwа ша дьбә чахе дьвинә кö әм дьхwазьн рʹаст у дьлпʹак бьн? Бь мәсәле шьровәкә.

ДЕ ТʹӘВИ кöрʹе хwәйи бьчʹук жь дькʹане дәрте. Гәдә ньшкева дьсәкьнә у тьште дәсте хwәда дьньһерʹә. Әwи жь дькʹане тьштәк һьлдабу сәва пе бьлизә у бир кьрьбу wәки дайнә дәwсе, йан жи дийа хwәрʹа бежә кö жерʹа бькʹьрʹә. Әw дәстпедькә бьгьри. Де бәр дьле wида те у жерʹа дьбежә, кö әw пашда һәрʹә у әwи тьшти пашда бьдә у бахшандьне бьхwазә. Чахе зарʹ һәма öса жи дькә, де пʹьрʹ ша дьбә у фьрнаq дьбә зарʹа хwәрʹа. Чьма?

² Бь рʹасти де-бав гәләк ша дьбьн чахе дьвиньн кö зарʹа wан рʹаст у дьлпʹак ә. Öса жи әм дькарьн бежьн дәрһәqа баве хwәйи ль әʹзмана, «Хwәдайе рʹастийе» (Зәбур 31:5, ИМ). Йаһоwа гәләк ша дьбә чахе дьвинә кö әм рʹöһʹанида мәзьн дьбьн у дьхwазьн рʹаст у дьлпʹак бьн. Чьмки әм дьхwазьн дьле Хwәде ша кьн у нава һʹьзкьрьна wида бьминьн, ләма жи ча кö Паwлос гот «әм...дьхwазьн кö һәр тьшти рʹаст бькьн» (Ибрани 13:18). Wәрен әм бьньһерʹьн һәла дь жийинеда кʹижан чар дәрәщада мәрʹа чәтьн ә рʹаст у дьлпʹак бьн. Паше әме пебьһʹәсьн һәла рʹасти у дьлпʹаки чь кʹәрәма тинә.

3-5. (а) Кʹьтеба Пироз чь дьбежә дәрһәqа тʹәлька хwәхапандьне? (б) Чь ве али мә бькә сәва кö әм һьндава хwәда рʹаст у дьлпʹак бьн?

³ Бәре пешьн әм гәрәке һин бьн кö һьндава хwәда рʹаст у дьлпʹак бьн. Рʹаст ә әв йәк нә һеса йә,  чьмки мәрьве гöнәкʹар һеса дькарә шаш бе хwәхапандьнеда. Иса, Мәсиһийед Лаwдькйайирʹа гот, wәки әwана хwәха хwә дьхапиньн, wана тʹьре кö әwана дәwләти нә, ле бь рʹасти әwана рʹöһʹанида «бәләнгаз, кор у тәʹзи» бун. Рʹасти жи әwана чьqас гöнә бун! (Әʹйанти 3:17). Лаwдькйайи бь хwәхапандьне кʹәтьбунә һʹаләки чәтьн.

⁴ Öса жи әм дькарьн биньнә бира хwә гьлийе Аqуб: «Һәрге йәк хwә хwәденас һʹәсаб дькә у зьмане хwә нькарә, әw хwәха хwә дьхапинә, хwәденасийа wи пʹучʹ ә» (Аqуб 1:26). Бәле, кʹи кö зьмане хwә нькарә у әwи тʹьре Йаһоwа хьзмәткьрьна wи qәбул дькә, бь ве йәке әw хwәха хwә дьхапинә. Хьзмәткьрьна öса бәр чʹәʹве Хwәде пʹучʹ ә. Ле чь wе али мә бькә, wәки әм нәкʹәвьнә тʹәлька хwәхапандьне?

⁵ Аqуб рʹастийа хәбәра Хwәде бәрамбәри нәйнике дькә. Әw мә һелан дькә wәки әм хwә бьньһерʹьн ве нәйникеда, демәк qануне Хwәдейә кʹамьлда у чьда кö лазьм ә хwә бьгöһезьн. (Бьхунә Аqуб 1:23-25.) Кʹьтеба Пироз мә һин дькә кö әм рʹаст у дьлпʹак бьн һьндава хwәда у бьвиньн һәла чьда лазьм ә әм хwә бьгöһезьн (Луринед Йерәмйа 3:40; Һагай 1:5). Хенщи ве йәке, әм дькарьн Йаһоwарʹа дöа бькьн у һиви жь wи бькьн, кö әw дьле мә бьньһерʹә у али мә бькә, кö шаши у кәмасйе мә мәва әʹйан бьн, wәки әм хwә рʹаст кьн (Зәбур 139:23, 24). Нәрʹасти, әв һәйә сьстбун. Баве мәйи ль әʹзмана нәфрʹәт дькә нәрʹастийе, әм жи гәрәке нәрʹастийе нәфрʹәт бькьн. Дь Кʹьтеба Мәтʹәлок 3:32-да те готьне: «Хöдан жь рʹешаша дькәрьһә, ле бәле һәвалтийа wи бь рʹастанрʹа йә». Йаһоwа дькарә али мә бькә кö әм сәр нәрʹастийе öса бьньһерʹьн ча кö әw дьньһерʹә у öса хwә бьвиньн ча кö әw мә дьвинә. Бинә бира хwә Паwлос чь гот: «Әм . . . дьхwазьн кö һәр тьшти рʹаст бькьн» Ньһа әм нькарьн бь тʹәмами кʹамьл бьн, ле әм бь дьл у щан дьхwазьн кö һʹәму тьшти рʹаст бькьн.

6. Чьма гәрәке Мәсиһи һьндава һәвда рʹаст у дьлпʹак бьн у чь гәрәке нәкьн?

⁶ Рʹасти у дьлпʹакийа Мәсиһийа дь малбәтеда, гәрәке бе кʹьфше. Ләма жи жьн у мер гәрәке һәвдöрʹа һʹәлал бьн у жь һәвдö тʹö тьшти вәнәшерьн. Зәwаща Мәсиһийада гәрәке тʹöнә бьн тьштед öса хьраб у нәтʹәмьз, чаwа флирт тʹәви кәсәки йан жи һәләqәтийа дьзива бь интернете у öса жи һʹәму щурʹә порнографи. Йазьх, һьнә Мәсиһийед кö зәwащеда ньн, дьзикава тьште öса дькьн. Ле әв йәк нәрʹасти йә. Дина хwә бьде Даwьд пʹадшайе хwәдехоф чь гот: «Әз бь дәрәwинарʹа рʹунаньм у бь дöруйанрʹа намәшьм» (Зәбур 26:4). Һәрге мер йан жьна тә һәйә, тʹö щар тьштед öса нәкә чь кö тö бьхази жь жьн йан мере хwә вәшери.

7, 8. Кʹижан мәсәлед жь Кʹьтеба Пироз дькарьн али зарʹа бькьн, wәки һин бьн рʹаст у дьлпʹак бьн?

⁷ Де бав wе баш бькьн, һәрге бь мәсәлед Кʹьтеба Пироз зарʹе хwәрʹа нишан кьн кö чьqас фәрз ә рʹаст у дьлпʹаки. Әwана дькарьн шьровәкьн дәрһәqа нәрʹастийе Акʹан кö һьм дьзи кьр, у һьм жи хwәст дьзийа хwә вәшерә. Öса жи дькарьн гьли кьн дәрһәqа Гәһази, йе кö бона кʹара хwә дәрәw кьр. У дәрһәqа Щьһудайе Исхәрйоти, йе кö пʹәрә дьзи у qәлпи кьр, сәва Иса бьдә гьртьне (Йешуа 6:17-19; 7:11-25; 2 Пʹадшати 5:14-16, 20-27; Мәтта 26:14, 15; Йуһʹәнна 12:6).

 ⁸ Öса жи wе баш бә, wәки зарʹарʹа шьровәкьн дәрһәqа wан мәрийа йе кö мәсәлед баш ьн. Мәсәлә, Аqуб кöрʹед хwә һелан кьрьн, кö пашда бьдьн wан пʹәра кʹижан кö бь тʹәхмина wи шаш бьбун у кьрьбунә тʹорбе wан. Qиза Йәфтаһ созе баве хwә пʹепәс нәкьр у ани сери, рʹаст ә әв йәк жерʹа һеса нибу ле йәкә әwе кьр. Иса нәтьрсийа жь wан мәрийа йед кö һатьбун wи бьгьрьн у хwәха wанарʹа гот кö әw ә Иса. Әwи әw йәк кьр wәки пʹехәмбәртийе бинә сәри у һәвалед хwә хwәй кә (Дәстпебун 43:12; Һʹакьмти 11:30-40; Йуһʹәнна 18:3-11). Дь Кʹьтеба Пирозда диса гәләк мәсәлед майин жи һәнә, бь аликʹарийа кʹижана де бав дькарьн зарʹедхwә һин кьн, wәки әwана рʹасти у дьлпʹакийе һʹьз кьн у qимәт кьн.

9. Һәрге де бав дьхwазьн дәрһәqа рʹастийе у дьлпʹакийе мәсәла баш бьн сәва зарʹед хwә, әwана чь гәрәке нәкьн у әв йәк чьма фәрз ә?

⁹ Ле әw йәк бәс нинә кö тʹәне зарʹарʹа шьровәкьн. Паwлосе шанди ньвиси: «Ле бәле аwа тö кö һәвале хwә һин дьки, хwәха хwә һин наки? Даннасин дьки, кö нәдьзьн, ле тö дьдьзи?» (Рʹомайи 2:21). Һьнә де-бав тʹәне хәбәр дьдьн бона рʹасти у дьлпʹакийе, ле анәгори готьна хwә накьн. Бь wе йәке әwана бона зарʹед хwә дьбьнә мәсәләкә хьраб. Дьбәкә әwана бона дьзикә бьчʹук аһа бежьн «ижар чь, öса гьшк жи дькьн» йан жи «дә чь йә, әw дәрәwәкә нә гьран ә». Ле бь рʹасти дьзи, һәйә дьзи, фьрqи тʹöнә qимәте wи тьшти чьqас ә, у дәрәw жи дәрәw ә, фьрqи тʹöнә дәрһәqа чь йә у чьqас нәрʹаст һатийә готьне. (Бьхунә Луqа 16:10.)  * Зарʹ зәʹф зу qәлпийе тʹәхмин дькьн, у әw дькарә хьраб ль сәр wана һʹöкöм бә (Әфәси 6:4). Ле һәрге зарʹ жь мәсәла де-баве хwәйә баш, рʹастийе у дьлпʹакийе һин бә, әw чахе мәзьн бә wе наве Йаһоwа пироз кә дь ве дьнйа нәрʹастда (Мәтʹәлок 22:6).

10. Әм дәрһәqа чь гәрәке бир нәкьн фәсал бьн, сәва кö һәләqәтийа мә тʹәви хушк-бьра рʹаст у һʹәлал бә?

¹⁰ Бь сайа һәләqәтийа мә тʹәви хушк-бьра, әм рʹасти у дьлпʹакийе һин дьбьн. Ча әм жь сәре 12 пеһʹәсийан, әм гәрәке фәсал бьдьн хәбате пʹешкʹеша хәбәрдане, илаһи тʹәви хушк-бьред рʹöһʹани. Чьмки хәбәрдан, һеса дькарә дәрбази гәвәстийе бә һәла һе бöхдана жи! Мәсәлә, һәрге әм тьштәки дьбьһен у сәд сәләфи ньзаньн рʹаст ә йан на у щики дьн гьли дькьн, бь ве йәке әм тʹәви дәрәwина дьбьнә йәк. Ләма жи wе рʹьнд бә кö әм зьмане хwә бькарьбьн (Мәтʹәлок 10:19). Хенщи ве йәке чь кö әм дьбьһен һәрге рʹаст бә жи, нә щайиз ә гьли кьн. Чьмки дьбәк әw йәк qә нә шьхöле мә йә, һьн жи бь ве йәке найе кʹьфше һʹьзкьрьна мә (1 Тʹесалоники 4:11). Һьнәк сәрʹт хәбәр дьдьн у һʹәсаб дькьн кö әwана рʹаст ьн, ле хәбәрдана мә гәрәке нәрм у мәʹрифәти бә. (Бьхунә Колоси 4:6.)

11, 12. (а) Мәрьве кö гöне гьран кьрийә, әw чь щурʹәйи хwәха гöне хwә һе гьран дькә? (б) Кʹижан ә нәрʹастийед Шәйтʹан дәрһәqа гöне гьран, у ча әм дькарьн нәһельн сәр мә һʹöкöм бә? (в) Ча әм дькарьн һьмбәри тʹәшкиләта Йәһоwа рʹаст бьн?

¹¹ Зәʹф фәрз ә рʹаст у дьлпʹак бьн тʹәви wана, кʹи кö дь щьватеда щабдарийа һьлдьдьн сәр хwә. Дьqәwьмә кö  һьнәк, гöне гьран бькьн у чахе рʹуспи дь щьватеда жь wан бьпьрсьн, дьбәк әwана дәрәwа бькьн у кьред хwә вәшерьн. Бь ве йәке әwана гöне хwә һе гьран дькьн. Мәсиһийед öса бь жийина дöрʹути дьжин, әwана дьдьнә кʹьфше кö Йаһоwарʹа хьзмәт дькьн, ле бь рʹасти әwана нава гöнед гьранда ньн у бь дәрәwа дьжин (Зәбур 12:2). Һьнәк жи рʹуспийарʹа ниви рʹаст дьбежьн ле тьштед фәрз вәдьшерьн (Кʹаред Шандийа 5:1-11). Гәләк щар мәри ләма тьште öса дькьн, чьмки дькʹәвьнә бьн һʹöкöме Шәйтʹан у нәрʹастийе баwәр дькьн. Бьньһерʹә чаргоше « Дәрәwед Шәйтʹан Дәрһәqа Гöнед Гьран»).

¹² Öса жи гәрәке һьмбәри тʹәшкиләта Йаһоwа рʹаст у һʹәлал бьн, чахе әм щаба хwә дьньвисьн у öса дьдьн. Мәсәлә, чахе әм һʹәсабе хьзмәта хwә дьдьн әм һʹәму тьшти рʹаст дьньвисьн, йан на? У öса жи әм чахе бона qöльхкьрьнәке кʹахазе тʹьжә дькьн, әм гәрәке öса нәньвисьн кö рʹастийе пенәһʹәсьн бона сьһʹәт-qәwата мә йан жи бона һәр тьштед майин. (Бьхунә Мәтʹәлок 6:16-19.)

13. Әм ча дькарьн тʹәви хушк йан бьре хwә рʹаст у дьлпʹак бьн, чахе тʹәви һәв дьхәбьтьн?

¹³ Әм гәрәке öса жи рʹаст у һʹәлал бьн тʹәви хушк-бьра, чахе тʹәви һәв хәбате дькьн. Әм гәрәке бир нәкьн, wәки щьватеда йан жи wәʹде хьзмәте гәрәке пьрсед хәбатева мьжул нәбьн. Һәрге әм, хушк йан бьра бал хwә дьдьнә хәбате, әм гәрәке һьндава wан рʹаст у дьлпʹак бьн, wәʹдеда һәqе хәбата wан бьдьн у һаqаси, чьqас кö мә пешда хәбәр дайә. Öса жи әм гәрәке бьqәдиньн wан һʹәму борщдарийа чь кö бь qануне жь мә те хwәстьне (1 Тимотʹейо 5:18; Аqуб 5:1-4). Чахе әм дьхәбьтьн бал мәсиһи, әм гәрәке хәбате wәʹдәда дәстпекьн у wәʹде хәбате бьхәбьтьн, нә кö wәʹдә öнда кьн (2 Тʹесалоники 3:10). Һәрге хwәйе хәбате хушк йан бьре мә йә, әw борщдар нинә фьрqийе дайнә ортʹа мә у хәбәтчийед дьн, мәсәлә рʹожед аза, йан жи пʹәра һе зедә бьдә мә, у тьштед дьнда (Әфәси 6:5-8).

14. Әw Мәсиһийед кö һәврʹа дьбьнә һәвалпʹар, чь тьштәки бь аqлайи гәрәке бькьн у чьма?

 ¹⁴ Ле ча гәрәке бькьн чахе тʹәви Мәсиһи дәстпедькьн хәбатәке нивәкʹар бькьн, демәк чахе һәрдö жи гәрәке пʹәра бькьнә нава хәбате йан жи щурʹәки майин? Дәрһәqа тьштед öса дь Кʹьтеба Пирозда принсипәкә фәрз ньвисар ә, кö гәрәке һʹәму тьшт бе ньвисаре у qöлкьрьне бона избат кьрьне! Мәсәлә, чахе Йерәмйа әʹрд кʹьрʹи, әwи әw кʹьрʹин-фьротан бәр шәʹда сәр дö кʹахаза ньвиси у әw кʹахаз рʹьнд вәшартьн сәва кö чахе лазьм бә, әw дәрхә (Йерәмйа 32:9-12; öса жи бьньһерʹә Дәстпебун 23:16-20). Әм жи гәрәке öса бькьн, сәр кʹахаз һʹәму тьшти һур бь һур бьньвисьн у бәр шәʹда qол кьн. Әва йәка найе һʹәсабе кö әм амьнийа хwә һәв найньн. Ле дәwсе әw йәк али мә дькә кö әм һәв фәʹм кьн, жь һәв нәхәйидьн у шәрʹ-дәʹв нәкʹәвә ортʹа мә у жь һәв нәqәтьн. Һʹәму Мәсиһи гәрәке бир нәкьн, wәки нәщайиз ә кö бона хәбате әʹдьлайи у йәктийа щьвате зийане бьстинә (1 Корьнтʹи 6:1-8).  *

15. Хwәде ча дьньһерʹә сәр нәрʹастийе пьрсед хәбатеда у Мәсиһи гәрәке чь щурʹәйи бьн һьндава нәрʹастийе кö ве дьнеда бәла буйә?

¹⁵ Мәсиһи гәрәке рʹаст у дьлпʹак бә нә тʹәне дь щьватеда. Паwлос ньвиси: «Әм . . . дьхwазьн кö һәр тьшти рʹаст бькьн» (Ибрани 13:18). Әʹфрандаре мә гәләк дьхwазә wәки әм рʹаст у дьлпʹак бьн алийе хәбатеда. Мәсәлә, дь Кʹьтеба Мәтʹәлокда чар щара те кʹьфшкьрьне wәки чьqас фәрз ә кö мезин рʹаст бьн (Мәтʹәлок 11:1; 20:10, 23). Бәре бь мезина у бь кәвьре мезина тьштед фьротане у пʹәрә дькʹьшандьн. Бал аршвершкьред нә дьлпʹак һәбу дö щурʹә мезин у кәвьре мезина  сәва qәлпийе бькьн у бьхапиньн. * Йаһоwа тьштед öса нәфрʹәт дькә! Сәва кö әм бьминьн нава һʹьзкьрьна Хwәдеда әм гәрәке рʹаст у дьлпʹак бьн һәр щурʹә пьрсед хәбатеда.

16, 17. Рʹожа иройин мәрьв чь щурʹә qәлпийа дькьн у Мәсиһийед рʹаст чь qьрар кьрьнә?

¹⁶ Әм әʹщебмайи наминьн кö дәр-доре мә педа дәрәw у хапандьн һәйә, чьмки әм заньн кö Шәйтʹан Мире-щьна сәрwертийе ль сәр дьнйайе дькә. Ләма жи әм һәр рʹож дькарьн бькʹәвьнә щерʹьбандьнед öса кö нәрʹастийе бькьн. Сәва кö хәбатәки бьстиньн, һьнә мәрв тʹьме нәрʹастийе дьбежьн дәрһәqа хwәндьна хwә у зедә дьдьнә кʹьфше кö хәбатеда щерʹьбанди нә у дәрһәqа тьштед майин нәрʹаст дьбежьн. Öса жи кʹәнге мәри тʹьжә дькьн бланка имиграсионе, бланка һәqдайине у чахе дьхwазьн аликʹарийа сотсиали жь дәwләте бьстиньн әwана әʹламәтийед нәрʹаст дьдьн. Гәләк шагьртед мәкʹтәбе дьхапиньн кʹәнге теста йан жи егзамина дьдьн. Öса жи хwәндкʹаре институте готаре кәсәки дьн мәсәлә, интернетеда дьвиньн у дьбежьн кö йан чь әв йа wан ә. Гәләк мәрьв сәва кö әви тьшти бьстиньн чь кö дьхwазьн, тьштәки дьдьнә хьзмәткʹаред дәwләте ча рʹöшәт. Әм бона ве йәке qә әʹщебмайи наминьн, чьмки Кʹьтеба Пирозда һатийә готьне кö «Мәрьве бьбьнә хwәһʹьз, пʹәрәһʹьз . . . нәйаред qәнщийе» (2 Тимотʹейо 3:1-5).

¹⁷ Мәсиһийед рʹаст qьрар кьрьнә тʹö щар тьштед öса нәкьн. Әw йәк һеса нинә, чьмки öса те кʹьфше кö мәрьве qәлп у нәрʹаст бәхтәwар ьн у пешда дьчьн, щийе бьльнд дьгьрьн ве дьнеда (Зәбур 73:1-8). Дьqәwьмә кö Мәсиһийи алийе һәбунеда зьраре кʹәвьн чьмки дьхwазьн  «һәр тьшти» рʹаст бькьн. Ле һежа йә öса зьраре кʹәвьн? Бешьк һежа йә! Зани чьма? Чьмки мәрийед рʹаст wе гәләк кʹәрәма бьстиньн.

18. Чахе наве мәрьва һәйә кö әw дьлпʹак у бь итʹбар ә, чьма әв йәк зәʹф те qимәткьрьне?

¹⁸ Чахе наве мәрьва һәйә кö әw дьлпʹак у бь итʹбар ә, wә йәке четьр тьштәк тʹöнә (Бьньһерʹә чаргоше « Әз Чьqаси Рʹаст у Дьлпʹак ьм?»). Бьдә һʹәсабе хwә, кö жь мә һәр кәс дькарә наве öса qазанч кә! Чьмки әв йәк гьредайи нинә фәрәсәтва, һәбунева, рʹәнг рʹуйе мәрьвава, щурʹе qöльхева у тьштед майинва. Иро һьндьк мәрьв дьхәбьтьн кö наве баш qазанч кьн, ләма жи мәрьве бь наве баш һьндьк ьн (Миха 7:2). Хенщи wе йәке тʹәне һьнәк мәрьв дьлпʹакийе qимәт дькьн, әwана һәла һе дькʹәньн жи сәр мәрьвед дьлпʹак. Ле һәнә мәрьвед öса жи, йед кö qәдьре мәрьвед дьлпʹак дьгьрьн у амьнийа хwә wан тиньн. Гәләк Шәʹдед Йаһоwа тʹәхмин кьрьнә кö дьлпʹакийе wанарʹа кʹар анийә алийе һәбунеда. Гәләк щар wана хәбата хwә öнда нәкьрийә, ле һәвалхәбатчийе wанә нәдьлпʹак wе дәме хәбата хwә öнда кьрьнә. Öса жи гәләк щийа хәбатчийед дьлпʹак дьхwазьн у Шәʹдед Йаһоwа һьлдьдьн хәбате.

19. Рʹасти у дьлпʹаки ча дькарә һʹöкöм бә сәр һәләqәтийа мә тʹәви Йаһоwа у исафа мә?

¹⁹ Рʹасти у дьлпʹаки wе тәрʹа жи гәләк кʹәрәма бинә. Мәсәлә, исафа тә wә тʹәмьз бә. Паwлосе шанди ньвисийә: «Әм әʹсәйи заньн кö исафа мә рʹьһʹәт ә» (Ибрани 13:18). Һе зедә, рʹасти у дьлпʹакийа тә, Хwәде әʹсәйи тʹәхмин дькә. Чьмки баве мәйи әʹзмана мәрьвед рʹаст у дьлпʹак һʹьз дькә. (Бьхунә Зәбур 15:1, 2; Мәтʹәлок 22:1.) Бәле, кʹәрәма лапә мәзьн wе әw бә кö һәрге тö рʹаст у дьлпʹак би тöйе нава һʹьзкьрьна Хwәдеда бьмини. Ле сәва кö нава һʹьзкьрьна Хwәдеда бьмини, лазьм ә öса жи хәбатчи би у жь хәбата хwә шабуне бьстини. Ве пьрседа wә али мә бькә сәре дьн.