1, 2. Busana naki Yehova akatsema akalhangira thukalengaho eribya b’okwenene? Iha eky’erileberyako.

MAMA na kaghalha kiwe bakahulhuka omwa duka mwa haghuma. Kitsumbukirania, kaghalha kiwe aka kak’imana, ikanakukubere. Omwa byalha mune edole eya kalyalhusaya omwa duka. Mukakibirirawa erisubyayo aha kalyalhusayayo kutse eribwira mama wako kathi akaghulire yo. Kakabya kabiriyibulha-bulha, kakabirikira mama wako kathi akawathikaye. Akakaghumaya n’erisubayo haghuma nako okwa duka erisubya y’edole n’eriyasaba ekighanyiro. Omw’ikolha eki, mama wako akatsema kutsibu. Busana naki?

² Mughulhu mungyi ababuthi bakatsema kutsibu bakalhangiraabaana babu ibanemw’igha omughaso ow’eribya b’okwenene. Kwabine bithya oku Thatha wethu ow’elhubulha, “Nyamuhanga w’ekwenene.” (Esyonyimbo 31:5) Akabya akasamalira ithune mulholha embere erikulha-kulhana bunyakirimu, akatsema akalhangira thukalengaho eribya b’okwenene. Kundi thwanzire erimutsemesya n’eriyibika omo lhwanzo lhwiwe, thukakanganaya eriyowa lya Paulo akabugha athi: “Thwanzire eribya b’okwenene omwa myatsi yosi.” (Abaebrania 13:18, NW) Thulebaye esyonzira nkulhu-nkulhu ini omwa ngebe omwa thwanga yisanga okwa bundi buthuku ikyabirithukalira eribya b’okwenene. N’enyuma waho thukendi lebya emighisa eya thwangabana busana n’eribya b’okwenene.

3-5. (a) Ekinywe kya Nyamuhanga kikathukunga kithi okwa kabi akali omw’iyitheba ithw’ibene-bene? (b) Ni kyahi ekikendi thuwathikya eriyirebya nga thune b’okwenene?

³ Ekindu ky’erimbere ekikathukalira ly’eriyiminya nga thune  b’okwenene. Kyolhobire ithwe abandu abathahikene eriyitheba ithw’ibene-bene. Ng’eky’erileberyako, Yesu mwabwira Abakrisitayo abe Laodikia athi babya ibabiriyitheba ibobene-bene omw’irengekania bathi ni baghuda, omwa kwenene ibabya ‘bera, ndimethime n’entumbu’ bunyakirimu​—ahathe erithika-thika emibere ey’obulighe. (Eribisulirwa 3:17) Eriyitheba eri mulyaleka emibere eya babyamu iyongera eribya y’akabi.

⁴ Kandi wangan’ibuka Yakobo ngoku mwakunga athi: ‘Omundu amaghanirya athi akakwama ekisomo kya ndeke, nikwa isyali kunga olhulimi lhwiwe, akayitheba, n’ekisomo kiwe ni kya busa.’ (Yakobo 1:26) Thwamalengekania thuthi thwangana kolesya olhulimi lhwethu lhwa nabi kandi ithwa ramya Yehova omwa nzira eya akaligha, ithukendibya ithukayitheba ithw’ibene-bene. Ithukendibya ithukalhuhira busa thukaramya Yehova. Ni kyahi ekyanga thubalya okwa nzira ey’akabi ng’eyi?

⁵ Omwa milhondo iya n’eyo, Yakobo akasosekanaya ekwenene y’Ekinywe kya Nyamuhanga ng’ekisasamira kutse ekiyo. Akathuhabulha athi thulhangire ndeke omughambo wa Nyamuhanga owahikene n’erikolha esyombinduka ngoku kitholere. (Soma Yakobo 1:23-25.) E Biblia yangana thuwathikya eriyirebya nga thune b’okwenene n’erilebya ekya thutholere erikolha nuku thwanga minya ah’erithasyuwania. (Ekiriro 3:40; Hagai 1:5) Kandi thwangana saba Yehova thuthi athulengeko kutse athulebaye, erithuwathikya erilhangira aha thwabirisobya n’erilengaho erilhungulhaho. (Esyonyimbo 139:23, 24) Erithendibya b’okwenene ni mubere w’obuthebya, kandi thutholere ithwalhangiragho ngoku Thatha wethu ow’elhubulha akalhangiragho. Emisyo 3:32 hakabugha hathi: ‘Abahengemire ni nye okwa Mwami Mukulhu; nikwa obwira bwiwe buli haghuma n’abathunganene.’ Yehova angana thuwathikya nuku thuyowe ngoku akayowa n’erithoka eriyilhangira ngoku akathulhangira. Wibuke Paulo ngoku mwabugha athi: ‘Thwanzire eribya b’okwenene.’ Omwa buthuku buno sithwanga hikana, aliriryo thwanzire kutsibu kandi thukalengaho kutsibu eribya b’okwenene.

6. Busana naki abathahenie batholere ibakanirania omwa kwenene, kandi busana n’eki, ni bitsibu byahi ebya bakayihighulhako?

⁶ Eribya b’okwenene w’omubere owatholere iniaminyikalya eka  y’Ekikrisitayo. Busana n’ekyo, omulhume n’omukali bakathekawa erikanirania omwa kwenene. Omwa butheke bw’Omukristayo simutholere mukabya nahake emitse mibi n’eyithisirire ng’ey’eriyanzirirya okwa yuthe mukali wawu kutse mwira wawu, eribya n’abanywani okwa Intaneti omwa bubiso-biso, kutse erilebya ebindu eby’obutswatswa omwa nzira yosi-yosi. Abandi Bakristayo abathahenie babiriyingirya omwa mitse mibi ng’eyi abanze babu isibakyasi. Erikolha ekindu ng’eki sikiri kanganaya okwenene. Omwami omuthaleghulha Dawudi mwabugha athi: ‘Sindi siba n’abandu bathya-bathya, kandi sindi ligha erighenda n’abathebya.’ (Esyonyimbo 26:4) Wamabya iwuna thahirye, si wuyingiraye omwa mitse eyanga leka iwabya muthebya kutse eribisa omwanze wawu ebya wukakolha!

7, 8. Ni by’erileberyako byahi ebiri omwa Biblia ebyanga wathikya baana eriminya omughaso ow’eribya b’okwenene?

⁷ Ni ky’amenge ababuthi erikolesya eby’erileberyako ebiri omwa Biblia bakakangirirya abaana babu omughaso ow’eribya b’okwenene. Erithakangania eby’erileberyako ebithuwene, hali omwatsi ng’owa Akana, oyuwiba n’erianza eribisirira eky’abirikolha; Gehazi, oyuwabiha busana n’erianza erihebwa esyosente; na Yuda, oyuwiba n’erikolesya obuthebya akanza erithisya Yesu.​—Yosua 6:17-19; 7:11-25; 2 Abami 5:14-16, 20-27; Matayo 26:14, 15; Yoane 12:6.

⁸ Eby’erileberyako ebyuwene, hali omwatsi ng’owa Yakobo, oyuwabwira baghalha biwe athi basubulhaye esyosente esyo babana omwa syongunza syabu kundi mwayowa athi syangabya isyahirawamu busana n’erithandalhwa; omwatsi owa Yafeti  na mwali wiwe, oyuwaligha erikolha ngoku thatha wiwe ayilhagha nomwakine indi mukyamuyithaghisya eriyihayo kutsibu; n’omwatsi wa Yesu, oyuwayikanganaya omwa buthubaha okwa syonzighu siwe nuku obuminyereri bwanga bererera n’eritheya abanywani biwe. (Enzuko 43:12; Abatsweri 11:30-40; Yoane 18:3-11) Eby’erileberyako bike ebi byangana wathikya ababuthi erilhangira omwatsi w’omughaso owali omwa Kinywe kya Nyamuhanga owanga bawathikya erikangirirya abaana babu nuku banze n’erilhangira eribya mundu w’okwenene ngoku ni kindu ky’omughaso.

9. Ni kyahi eky’ababuthi batholere ibayihighulhako bamabya banzire eribya ky’erileberyako eky’eribya b’okwenene embere sy’abaana babu, kandi busana naki eky’erileberyako eki ni ky’omughaso?

⁹ Erikangirirya ng’eri likaha ababuthi b’olhukwamirwa lhunene. Omukwenda Paulo mwabulya athi: ‘Neryo iwe wukakangirirya abandi, siwuli yikangiriraya kwehi? Iwe wukathulhagho wuthi, omundu syibe, nawu wukiba kwehi?’ (Abanya Roma 2:21) Abandi babuthi bakatabura abaana babu omw’ibakangirirya eribya b’okwenene kandi ibo isibali b’okwenene. Bangan’uwanirirya obwibi bw’ehindu hike-hike n’ebinywe ebithe by’ekwenene omw’ibugha bathi “Thamyee, bakalengekanaya bathi omundu angan’iba ehindu ng’ehi” kutse “Indya muya.” Omwa kwenene, eriba n’iba, nomukyangabya indi ekindu ekiryibawa sikiwithe mughaso, kandi eribiha n’ibiha, nomumwangabya imukakanaya oko mwatsi owasosire athi kutse amabehi awowanga kania n’omwangabya make kutse manene. * (Soma Luka 16:10.) Kikanguhira abaana erilhangira emyatsi y’obuthebya kandi eki kyangana batsandya. (Abanya Efeso 6:4) Nomwabine, omughulhu bak’ighira okwa babuthi babu eribya b’okwenene, ibangana kulha ibane mupipa Yehova omwa kihugho ekithe b’okwenene kino.​—Emisyo 22:6.

10. Erikwamana n’erikanirania n’abikirirya balikyethu omwa kwenene, ni kunga lyahi erya thutholere ithwabya ithun’ibukire?

¹⁰ Eribya haghuma n’Abakrisitayo balikyethu kikathuha esyonzira nyingyi esya thwanga kanganiryamu okwenene. Ngoku thw’igha  omwa Sura 12, thutholere ithwa yitheya thukakolesya ekihembo kyethu eky’erikania, kwilhabirirya okwa baghalha bethu n’abali bethu ab’obunyakirimu. Ebya thukakanaya omwa masatha byanganalhua mw’olhuthongo lhubi, kutse erihangirira abandi! Thwamakania oko mwatsi isithwasi enzuko yawu, ithwanganabya ithukongera eritsatsanga amabehi, busana n’ekyo ni kibuya erikakirya eminywe yethu. (Emisyo 10:19) Okwa lhundi lhuhandi, thwanganabya ithunasi ngoku ni kwenene, aliriryo ekyo sikirimanyisaya kithi thutholere ithwa lhalhania gho. Ng’eky’erileberyako, omwatsi anganabya isyathuhambireko, kutse kyanganabya isikyuwene erikania kugho. (1 Petero 4:15) Abandi bakana kolesaya ebinywe by’obutsurumi neryo ibabugha bathi balhwe bahikire, aliriryo ebinywe byethu bitholere ibyabya mw’olhukogho n’olhwanzo.​—Soma Abanya Kolosai 4:6.

11, 12. (a) Abandi abakakolha ebibi ebikalire bakaleka ibyakanyirira omu nziraki? (b) Ni mabehi nga wahi awa Sitani akakulha-kulhanaya erikwamana n’amalholho awakalire, kandi thwanga rwanisya amabehi aya wa thuthi? (c) Thwanga kangania thuthi ngoku thuli b’okwenene omwa kithunga kya Yehova?

¹¹ Kwilhabirirya ni kikulhu eribya b’okwenene embere sy’abakasondolha omwa kithunga. Abandi abakakolha ebibi ebikalire bakaleka ibyakanyirira omw’ilengesya eribibisirira n’eritheba abasyakulhu b’ekithunga omughulhu bakababulhaya. Abandu ng’aba bakatsuka eribya omwa ngebe ey’embandi ibiri, eribya nga  bakakolera Yehova ibane mukolha ebindu ebikendi bakolya okwa kibi ekikalire. Ekikalhwiririramu, emibere ng’eyi yikaleka ebyosi ebihambire okwa mundu oyu ibyabya ini by’amabehi. (Esyonyimbo 12:2) Abandi bakabwira abasyakulhu b’emyatsi mike ey’ekwenene ibana bisire esyonzumwa nkulhu-nkulhu. (Emibiri 5:1-11) Erithendi bugha ekwenene ng’eri, mughulhu mungyi likasa busana n’erikirirya amabehi awa Sitani akakulha-kulhanaya.​—Lebaya akasanduko “ Amabehi wa Sitani Erikwamana n’Amalholho Awakalhakalire”.

¹² Kandi ni kikulhu erithulha ekwenene omughulhu ekithunga kya Yehova kikathusaba erisubirya okwa bibulyo ebihandikire. Ng’eky’erileberyako, omughulhu thukaha eripoti ey’omubiiri wethu ow’erithulira, thutholere ithwa yitheya nuku sithuhandike ebithe by’ekwenene. Kuthya, omughulhu thukasuliriraya efomu ey’erisaba olhusunzo lhulebe olhw’omubiiri, sithutholere thukahandika ebithahikire ebihambire okwa mibere eya thulimu ng’erilhwalha kutse n’eyindi myatsi eyihambire okwa ngebe yethu.​—Soma Emisyo 6:16-19.

13. Thwangabya thuthi b’okwenene thwamabya ithukakolangana omwa by’esuburu n’omwikirirya mulikyethu?

¹³ Kandi eribya b’okwenene embere sy’abikirirya balikyethu mwamuli n’omwatsi ow’eby’obusubure. Okwa bundi buthuku, baghalha bethu n’abali bethu Abakrisitayo bangana kolangana omwa by’obusubure. Batholere ibayitheya erilhangira bathi omwatsi ng’oyu sibali hambanaya gho n’eriramya erikabya okwa Kisenge ky’Obwami kutse omwa mubiiri w’erithulira. Emyatsi ey’obusubure yanganabya ahakathi-kathi k’omwinye mubiiri n’oyukamukolera. Thwamakolesya baghalha bethu na bali bethu, thutholere ithwa bakolera ekwenene, eribathuhira okwa ndambi, esyosente esya mulighireneko, n’amaghoba awatheghekirwe kutse awakayithaghisibawa omwa bilhaghiro. (1 Timoteo 5:18; Yakobo 5:1-4) Okwa lhundi lhuhandi, mughalha wethu kutse mwali wethu amabya iniakathukolesaya, thutholere ithwakolha omubiiri wosi owatholere obuhingyi bwethu. (2 Abanya Tesalonika 3:10) Si thulengekanaye erilhangirwa omwa nzira y’embaghane busana n’obughuma bwethu obw’obunyakirimu obwa thuwithe n’abandi, erilengekania thuthi oyukathukolesaya atholere iniathuha obuthuku obw’erithendi kolha,  amaghoba, kutse eyindi ndundi eyithe yanga hebwa abandi bakoli.​—Abanya Efeso 6:5-8.

14. Omughulhu Abakrisitayo bakakolha esuburu yo haghuma, ni kyahi ekya batholere ibabya ibanasi, kandi busana naki?

¹⁴ Kyangabya kithi mwamakolha esuburu ya haghuma, obundi imwa hira esyosente syenyu sy’omwa kindu kirebe kutse eriyayibweka syo? E Biblia yikahira h’omusingyi mukulhu kandi ini w’omughaso: Ebyosi mubihire omwa busakangyi! Ng’eky’erileberyako, omughulhu Yeremia aghulha eririma, mwahebwa ebaruha ey’endaghano eya lhusaya mw’esindi baruha, iyine hamibirweko n’abalhangiri kutse abema, kandi mwabika ya ndeke busana n’ekyosi-kyosi ekyanga buthuka. (Yeremia 32:9-12; kandi thasyalebaya Enzuko 23:16-20.) Omughulhu wukakolha esuburu haghuma n’abikirirya balikyenyu, erihira emyatsi yosi y’omwa busakangyi mwa ndeke, iyine hamibirweko, kandi iyine kw’abema sikirimanyisaya kithi siwubayikethere. Aliwe, kikaleka ihathabya erithendi yitheghererangania, eriyiponera, n’erikangalhukana eryanga baghabulha. Omukristayo wosi-wosi oyukakolha esuburu haghuma n’abalikyabo atholere iniabya inian’ibukire ngoku esuburu ng’eyi siyitholere yikatsandya obughuma n’obuholho obuli omwa kithunga. *​—1 Abanya Korinto 6:1-8.

15. Yehova akalhangira athi emikolere y’esuburu eyithe mw’okwenene, kandi Abakrisitayo bakalhangira bathi omutse owali ehosi-hosi oyu?

¹⁵ Abakrisitayo eribya b’okwenene siriri subulira omwa kithunga kisa. Paulo mwabugha athi: “Thwanzire eribya b’okwenene omwa myatsi yosi.” (Abaebrania 13:18, NW) Bikabya bikahika okwa myatsi y’esuburu ey’ekihugho, Omuhangiki wethu akayithagha ithwabya b’okwenene. Ekitabu ky’Emisyo kisa, kikakanaya mirundi mingyi okwa hirengyi hy’amabehi. (Emisyo 11:1; 20:10, 23) Omwa buthuku bwa kera, kyabya kindu kya buli kiro erikolesya ebilo n’ehirengyi omwa by’obusubure nuku banga lenga ebindu ebikaghulhawa n’esyosente esikabighulha. Abasuburi abathe mw’okwenene ibakakolesaya  ehirengyi hibiri muthina-muthina n’ebilo ebithahikire eritheba n’eriba abakaghulha n’abakaghulhaya. * Emikolere ng’eyi ni nye oku Yehova! Erithoka eriyibika omo lhwanzo lhwiwe, thutholere ithwayihighulha okwa suburu yosi-yosi eyithe mw’okwenene.

16, 17. Ni mikolere yahi eyithe mw’okwenene eyoswire omwa kihugho ekya munabwire, kandi ni kyahi eky’Abakrisitayo ab’okwenene bathe banga kolha?

¹⁶ Kundi Sitani y’omuthabali w’ekihugho kino, sikiri thuswekaya erilhangira ngoku erithendibya b’okwenene rikanyirire. Thwangana lengwako buli kiro erikolha ebithe mw’okwenene. Omughulhu abandu bangyi bakahandika ebibahambireko bakasondya omubiiri, kyasibwe ngoku bakabiha n’erilhabirirania, eriyitunga-tungira esyobaruha esikakanganaya ngoku batholere, n’eribiha bathi basi binene. Omughulhu abandu bakasuliriraya esyofomu esy’erisuba omwa kindi kihugho, esy’emisolho, n’esindi fomu ng’esi, mughulhu mungyi bakaha eby’erisubirya ebithahikire nuku bangabana ekya bakanza. Abanya sukuru bangyi bak’iba ebizamu, kutse omughulhu bakabwirawa bathi bahandike emyatsi mirebe, bangana ghenda okwa Intaneti neryo ibakopa ebya bakabanako, ibabithwalha ngan’ibo balyabihandika. Kandi omughulhu abandu bawithe ebya bakakolha n’abakulhu-bakulhu abalibathangania, mughulhu mungyi bakabahemberera nuku bangabana ekya bakanza. Emitse ng’eyi yitholere iyabya iyiri omwa kihugho ekiri mw’abandu bangyi ‘abakayanza, n’erianza ebindu, isibanzire ekibuya.’​—2 Timoteo 3:1-5.

¹⁷ Abakrisitayo ab’okwenene babirighunzerera erithendi sangira nahake omwa mitse eyosi-yosi ng’eyi. Okwa bundi buthuku, ekikaleka ikyakalha eribya b’okwenene kiri kithi abandu abathe mw’okwenene bakabya nga babawithe okwa bindu nibya n’erighoba kutsibu omwa kihugho ekya munabwire. (Esyonyimbo 73:1-8) Ekyo kine aho, Abakrisitayo bangana ghalhwa busana n’eribulha esyosente kundi banzire eribya ibane b’okwenene “omwa myatsi yosi.” Nina ky’omughaso eriaghalhwa thuthya? Ee! Aliriryo busana naki? Ni mighisa yahi eyikalhwiririra omw’ibya b’okwenene?

18. Busana naki eriminywa ng’omundu w’okwenene ni ky’omughaso munene?

¹⁸ Ni bindu bike buyira ebya wukendi syabana omwa ngebe ebiwithe mughaso munene kwilhaba eriminywa ng’omundu oyuli b’okwenene n’omuyiketherwa. (Lebaya akasanduko “ Indi mw’Okwenene Erihika Okwa Lhulengoki?” okwa lhupapura 167.) Kandi kilengekanayeko​—omundu wosi-wosi angana minywa ng’oyuli mw’okwenene! Sikiri sighikira okwa ebya wukathoka erikolha, ebya wuwithe, obubuya okwa mubiri, aha wulhuire, kutse eyindi nzumwa yosi-yosi eya wuthasi. Nomwabine, abanene bakalemawa eribya n’emibere eyanga leka ibakanibwako ndeke. Si kindu kya buli kiro. (Mika 7:2) Abandi bangana kusekerera busana n’eribya mundu w’okwenene, aliriryo abandi bakendi lhangira ngoku wuli mundu w’okwenene, kandi ekikendi lhwiririramu, bakendi kuyikethera n’erikusikya. Abema ba Yehova abanene babirikilhangira ngoku eribya b’okwenene kyabirileka ibathoka eribana esyosente. Sibali bingawa okwa mibiiri yabu omughulhu abakoli abathe mw’okwenene bakabingawa, kutse babiribana ah’erikolera omughulhu abawithe emibiiri bakasondaya kutsibu abakoli abali b’okwenene.

19. Eribya n’engebe eyiri mw’emibere ey’okwenene kikahamba kithi okwa bunya muthima-thima bwethu n’obughuma bwethu na Yehova?

¹⁹ Mbulha wamayisanga omwa mibere eyiri ng’eyi kutse eyihi, wukendi lhangira ngoku eribya mundu w’okwenene kikalhwiririra mw’emighisa mingyi. Wukendi bana omughisa ow’eribya n’obunya muthima-thima obuhenirye. Omukwenda Paulo mwasakanga athi: “Thuyikethere ngoku thuwithe obunya muthima-thima obuwene.” (Abaebrania 13:18, NW) Eryongera okw’ekyo, Thatha wethu ow’olhwanzo ow’elhubulha syangabya athe thalhangira emibere yawu mibuya ng’eyi, kandi akanza abandu abali b’okwenene. (Soma Esyonyimbo 15:1, 2; Emisyo 22:1.) Omwa kwenene, eribya b’okwenene kikendi kuwathikya eriyibika omo lhwanzo lhwa Nyamuhanga, kandi ekyo ky’ekihembo ekinene ekya thwanga bana. Thuthasyalebaya omwatsi owakwamireko owahambene n’oyu: amalengekania wa Yehova awahambire okw’ikolha.