1, 2. Efuh Jeova el engan ke pacl ma el liye lah kuht kwacfeacng in suwohs ac pwacye in ma nuhkewa? Sang sie mwe puhpuhlyuck an.

OASR sie ninac ac tuhlihk mukul se nahtuhl suc tuhkweni tufoki liki stoh se. Tuhlihk sac tui ac el luhman fosrngahlah ac tuhfal. El sruok mwe sritacl srihsrihk se ke pahol, ma el sruhkwack ke stoh sac ac muhlkuhnlah in fohlohkohnlah kuh in siyuck sin ninac kiyacl ah in molwelah. El fosrngahlah ne pwacnacng el tuhng. Ninac kiyacl uh ahkmihsyellah ac usacl fohlohk nuh luun stoh sac, na tuhlihk sac taltal kuluk ac fohlohkohnlah mwe sritacl sac. Ke el oruh ma inge, insiacn ninac se inge arlacna engan. Efuh?

² Pahpah ac ninac uh arlacna engan in liye ke tuhlihk nahtuhltahl uh etwaclah yohk srihpaciyac in pwacye ac suwohs. Ac ma inge oacpacna puhlakihn luhn Pahpah tuhmwacsr inkuhsrao, suc “God luhn ma pwacye.” (Psalm 31:5, BMK) El liye kuht ke kuht kapkapwack ac fototoyang nuh sel uh. El arlacna engan in liye ke kuht kwacfeacng in suwohs ac pwacye uh. Ke srihpen kuht luhngse in ahkenganyacl ac in muhtana in luhngse lal uh, puhlakihn lasr uh oacna puhlakihn lal mwet sap Paul inge: “Kuht kena tuh orekma lasr in suwohs pacl nuhkewa” ac in ma nuhkewa. (Hebrew 13:18) Lwelah kuht in lohacng ahkwoyac nuh ke inkacnek ahkosr ke moul lasr ma ke kuhtuh pacl uh ac upac nuh sesr in pwacye ac suwohs kac. Tohkoh, kuht ac fah tuni kuhtuh mwe insewowo ma tuhkuh kac uh.

3-5. (a) Kahs luhn God uh sensenkihn kuht fuhkah ke mwe sensen ma kuht kuh in sun kuht fin lwelah nuhnak lasr uh in kiyacpwekuhtlac? (b) Meac ac kuh in kahsre kuht in pwacye nuh sesr sifacna?

³ Sie ma upac nuh sesr uh pa kuht in etwaclah in pwacye nuh sesr sifacna. Ke srihpen kuht mwet sesuwohs, arlacna fihsracsr nuhnak lasr uh in sifacna kiacpwekuhtlac. Ke sie mwe puhpuhlyuck, Jesus el fahk nuh sin mwet Christian fin acn Laodicea lah eltahl sifacna kiacpweltahllah in nuhnkuh muh eltahl kahsruhp. Tuhsruhktuh, eltahl “suhkahsruhp, kohfluhfohl, ac kun” ke ma pwacye uh, sie mwe ahsor na yohk. (Fwackyuk 3:17) Nuhnak kikiacp laltahl inge oruh ohiyac ma eltahl oasr kac tari uh in mwe sensen liki na meet ah.

⁴ Kom kuh pac in esam ke mwet tuhma lutlut James el fahk kahs in sensen inge: “Yac oasr mwet nuhnkuh muh el ahkfalye oakwuck luhn alu uh? El fin tiac karihngihn lohohl, ac wacngihn srihpen alu lal ac el sifacna kiacpwellah.” (James 1:26) Kuht fin nuhnkuh na muh kuht kuh in orekmakihn lohohsr ke inkacnek suhfal ac srackna alu nuh sin Jeova, kuht sifacna kiyacpwe kuht. Alu lasr nuh sin Jeova uh ac wacngihn srihpac. Meac ac kuh in kahsre kuht in tiac nuhnkuh ohinge?

⁵ Ke fuhs ekahsr meet liki ma James el fahk inge, el luhmahlah ma pwacye ke kahs luhn God uh nuh ke sie selnguhn. El ahkkweye kuht in liye masap suwohs luhn God inge ac ahkfalye eklac ma kuht enenuh in oruh uh. (Riti James 1:23-25.) Bible uh ac kuh in kahsre kuht in pwacye nuh sesr sifacna ac in akihlen ma kuht enenuh in ahkwoyelah sesr uh. (Eoksra 3:40; Haggai 1:5) Kuht enenuh pac in puhruhe ac siyuck Jeova elan tuni insiacsr ac kahsre kuht in akihlen ac ahksuwohsye kuhtwena ohiyac sesuwohs lasr uh. (Psalm 139:23, 24) Tiac fihsracsr kuht in sifacna akihlen  mwe muhnahs lasr uh ke ohiyac ma tiac suwohs sesr uh, pwacnacng kuht enenuh in oacna nuhnak luhn Pahpah tuhmwacsr suc inkuhsrao ke ma inge. Soakas 3:32 el fahk: “LEUM GOD El sruhnga mwet orekma kuluk [“mwet kuhtasrihk,” NW], a El insracelak nuh sin mwet suwohswohs.” Jeova el kuh in kahsre kuht in nuhnak oacna el ac in tuni kuht sifacna oacna el. Esam lah Paul el tuh fahk: “Kuht kena tuh orekma lasr in suwohs pacl nuhkewa.” Kuht tiac kuh in suwohswohs ke pacl inge, tuhsruhktuh kuht kwacfeacng in pwacye ac suwohs in ma nuhkewa.

6. Efuh kuh siacnyacn se enenuh in pwacye nuh sin sie sin sie, ac meac kuhtuh mwe sensen ma eltahl enenuh in fahsr liki uh?

⁶ Sie ohiyac ma enenuh in ahkkahlwemyeyuck ke sucu luhn mwet Christian uh pa in pwacye ac suwohs. Ke srihpac se inge, mukul tuhma ac muhtwacn kiyac uh enenuh in ahkkahlwemye ma nuhkewa nuh sin sie sin sie ac in pwacye nuh sin sie sin sie. Mwet Christian uh fahsr liki orekma kuluk ma ac kuh in ahkngalye sie sin sie, oacna in fihlacng kuh orek pwacr nuh sin mwet sahyac ma eltahl tiac pahyuck nuh se. Eltahl tiac kuh in wihkwihk in ahko ke inkacnek luhn internet kuh finne in liyeyuck petsac fohkfohk ke kuhtwena luhmah. Kuhtuh mwet Christian pahyuck uh muhtwacwacack in oruh ma kuluk inge ac okanlah  ma inge sin mukul tuhmwacltahl kuh muhtwacn kiyacltahl uh. Tiac pwacye kuh suwohs ma inge. Lohacng nuh ke kahs lal Tohkohsrah David inge: “Nga tiac asruoki yurin mwet lusrohngtwen; wacngihn ip luhk yurin mwet wosounkahs” kuh mwet kuhtasrihk. (Psalm 26:4) Kom fin pahyuck, nik kom oruh kuhtwena ma ma ac kuh in srihfe kom in okanlah sie ma nuh sin mukul tuhmom kuh muhtwacn kiyom an!

7, 8. Mwe srihkasrak fuhkah ke Bible ma ac kuh in kahsruh ac luti tuhlihk uh in luhngse ac ahksacohkye ohiyen pwacye ac suwohs?

⁷ Ke pahpah ac ninac uh luti nuh sin tuhlihk nahtuhltahl uh yohk srihpaciyac in pwacye ac suwohs, wo eltahl in tuhkweni orekmakihn mwe srihkasrak in Bible uh. Eltahl kuh in orekmakihn mwe srihkasrak kuluk kacl Achan, ke el pihsrapasr ac srihke in okanlah ma inge; Gehazi, ke el kikiacp tuh in oasr ma el eis kac; ac Judas, ke el pihsrapasr ac kikiacp tuh in ahkkulukyacl Jesus.​—Joshua 6:17-19; 7:11-25; Luo Tokosra 5:14-16, 20-27; Matthew 26:14, 15; John 12:6.

⁸ Eltahl kuh pac in orekmakihn mwe srihkasrak wo kacl Jacob, ke el kwacfe tuhlihk nahtuhl ah in fohlohkohnlah mani ma eltahl konwacack ke bag laltahl ah mweyen el puhla muh sahp mwet se tahfonglac fihliyac kac. Sie pac pa tuhlihk muhtwacn se nahtuhl Jephthah ah, ke el ahkos wuhlelah luhn pahpah tuhmwacl ac kihsackuhnlah ma pucspucs ke moul lal; ac kacl Jesus, ke el puhlaik in fahkwack lah suc el uh ye muhtuhn un mwet kuluk sac tuh in ahkpwacyeye kahs pahluh ac loangelah kawuck lal ah. (Genesis 43:12; Mwet Nununku 11:30-40 *; John 18:3-11) Mwe srihkasrak inge ac kuh in ahkkahlwemye nuh sin pahpah ac ninac ke kuhtuh mwe lutlut wo ma ac kuh in konweyuckyak ke Kahs luhn God uh. Ac ma inge ac kahsreltahl in  luti tuhlihk nahtuhltahl uh in luhngse ac ahksacohkye ohiyen pwacye ac suwohs.

9. (a) Meac pahpah ac ninac uh enenuh in fahsr liki eltahl fin luhngse in oakiyac sie mwe srihkasrak wo nuh sin tuhlihk nahtuhltahl uh ke ohiyen pwacye ac suwohs? (b) Ac efuh kuh arlacna yohk srihpen mwe srihkasrak laltahl uh?

⁹ Oasr kunohkohn yohk luhn pahpah ac ninac in luti ac oakiyac mwe srihkasrak wo nuh sin tuhlihk nahtuhltahl uh. Mwet sap Paul el siyuck: “Kom luti mwet sahyac, ac efuh kom tiac luti kom sifacna? Kom fahkwack muh, ‘Nik kom pihsrapasr,’ ac kom, kom tiac pihsrapasr?” (Rome 2:21) Kuhtuh pahpah ac ninac uh ahkfohsyeack tuhlihk nahtuhltahl uh ke eltahl luti nuh seltahl ma pwacye ac suwohs uh, tuhsruhktuh eltahl sifacna tiac oruh ma inge. Sahp eltahl oraclah muh tiac arlac kuluk ke srihpen orekma in pihsrapasr kuh kahs kikiacp inge ma na srihsrihk ac eltahl fahk kain in kahs inge, “O, ma fihliyucki kuht in eis” kuh sahp “Oasr pacl ma tiac kuluk in kikiacp.” Ke ma na pwacye uh, finne yohk kuh srihk, pihsrapasr uh srackna kuluk. In oacpacna, finne tiac ma yohk srihpac se kuh kuhtuh na kahs  lasr uh tiac pwacye, kikiacp uh srackna kuluk. * (Riti Luke 16:10.) Tuhlihk uh arlacna sa in akihlen orekma kuhtasrihk uh ac ma inge ac kuh in ahkkulukye kapkapwack laltahl uh. (Ephesus 6:4) Tuhsruhktuh, ke pacl se eltahl etwaclah ke mwe srihkasrak wo luhn pahpah ac ninac in pwacye ac suwohs, eltahl ac kuh in kapkapwack in ahkmuhtahlye inen Jeova ke facl se inge ma nwacnwaclah ke orekma sesuwohs.​—Soakas 22:6.

10. Meac kuht enenuh in sensenkihn ac esam ke pacl ma kuht sramsram nuh sin mwet lili wiyacsr uh?

¹⁰ Asruoki lasr nuh sin mwet lili wiyacsr uh acse pacl wowo pucspucs nuh sesr in kapkapwack ke ohiyen pwacye ac suwohs lasr uh. In oacna ma kuht tuh lotwelah ke Sapta 12, kuht enenuh in taran ke inkacnek ma kuht orekmakihn mwe sang se ma ituckuh nuh sesr inge in sramsram, yohkna inmahsrlon mwet lili wiyacsr uh. Sramsram lasr ke lwen nuhkewa uh ac kuh in eklac oacna kahs in lwesrihk ma ahkkulukye mwet sahyac! Kuht fin kalweni in sruhmuhn sie sramsram ma kuht tiac etuh fin pwacye, kuht wi kahsruh in fahkwelihk kahs kikiacp ingacn. Pwacnacng ac wo kuht in arlacna taran ke ma kuht fahk uh. (Soakas 10:19) Tuhsruhktuh, kuht fin etuh muh pwacye sie ma, tiac kalmac pa wo kuht in sruhmuhn. Ke sie mwe puhpuhlyuck, sahp wacngihn ma lasr nuh ke ma sramsramkihnyuck ingacn ac tiac wo kuht in wi sramsram kac. (Sie Thessalonica 4:11) Kuhtuh mwet uh fahk muh wona in orekmakihn kahs tiac kuhlwacng uh mweyen ma pwacye pa eltahl fahk ingacn, tuhsruhktuh kahs lasr uh enenuh in kuhlwacng ac mwe insewowo in lohng ke pacl nuhkewa.​—Riti Colossae 4:6.

11, 12. (a) Ke inkacnek fuhkah kuhtuh mwet uh ahkupacye ma kuluk laltahl uh? (b) Meac kuhtuh kahs kikiacp ma Satan el oraclah ke ma kuluk upac uh, ac kuht ac lain fuhkah? (c) Kuht ac ahkkahlwemye fuhkah lah kuht pwacye nuh ke u luhn Jeova uh?

 ¹¹ Arlacna yohk srihpac kuht in pwacye nuh sin mwet kol lasr ke congregation uh. Kuhtuh mwet suc oraclah ma kuluk upac inge ahkupacye ma kuluk laltahl uh ke eltahl srihke in okanlah ma kuluk inge ac kikiacp nuh sin mwet elder ke pacl ma eltahl kihsen siyuck nuh seltahl kac uh. Kain in mwet ohinge uh ac kuh in moulkihn moul luo, ma oraclah muh el kuhlwacnsuhpuh Jeova ac ke pacl sacn pacna el oruh ma kuluk upac. Kain in ohiyac inge ac kuh in oruh moul luhn sie mwet in nwacnwaclah ke kikiacp. (Psalm 12:2) Kuhtuh mwet uh fahk kuhtuh na ke ma pwacye uh nuh sin mwet elder ac okanlah ma yohk srihpac uh. (Orekma 5:1-11) Kain in orekma kikiacp inge ma tuhkuh sin mwet suc luhlahlfongi ke kahs kikiacp lal Satan uh.​—Liye pohk se inge “ Kahs Kikiacp Lal Satan ke Ma Kuluk Upac.”

¹² Arlacna yohk srihpac kuht in pwacye pac nuh ke u luhn Jeova uh ke pacl ma kuht nwacna pwepuh ac topuk kihsen siyuck nuh kac uh. Ke sie mwe puhpuhlyuck, ke pacl ma kuht nwek report nuh ke orekma in luti lasr uh, kuht taran kuht in tiac suhmuhslah ma suhtuhuh. In oacpacna, ke kuht nwek application nuh ke kuhtwena kunohkohn sacohk, kuht enenuh in tiacna sang kuhtwena ma suhtuhuh ke mas lasr ac kuhtuh pac ma sahyac kacsr.​—Riti Soakas 6:16-19.

13. Kuht ac sruokyac fuhkah ohiyen pwacye ac suwohs lasr uh fin oasr oakwuck ke business inmahsrlosr ac sie mwet lili wiyacsr?

¹³ Pwacye lasr nuh sin mwet lili wiyacsr uh arlacna yohk srihpac kuht fin orek business. Oasr pacl ma mwet lili wiyacsr uh ac kuh in orek oakwuck ke business nuh sin mwet lili wiyacltahl uh. Enenuh eltahl in arlacna taran eltahl in tiac sramsram ke kuhtwena ma ma kuhpahsr nuh ke  business laltahl uh ke pacl ma eltahl oasr ke Lohm in Toeni ac ke orekma in luti uh. Sahp inmahsrlon mwet lili luo ingacn, sie pa mwet orekma ac mwet se sahyac an pa kol orekma lal uh. Fin oasr mwet suc orekma lom ke congregation uh, kom enenuh in pwacye nuh sel ac sang molol ke pacl fal ac ke luhpah se ma komtacl inseselac kac ke muhtwacwackiyac an. Kom enenuh pac in ukwe oakwuck luhn government nuh ke benefits luhn mwet orekma se lom an. (Sie Timothy 5:18; James 5:1-4) Kuht fin orekma luhn sie mwet ke congregation uh, kuht enenuh in sang kuhiyacsr ke orekma lasr uh in fal nuh ke molosr. (Luo Thessalonica 3:10) Kuht tiac kuh in nuhnkuh muh ac orek wo nuh sesr ke srihpen kuht mwet lili. Kuht tiac pac kuh in nuhnkuh muh mwet kol se lasr inge el enenuh in use pacl in monglac ac ma wo pucspucs sahyac ma el ac tiac oruh kuh sang nuh sin sie mwet orekma sahyac ma tiac oasr ke congregation uh.​—Ephesus 6:5-8.

14. Ke pacl ma mwet lili uh tuhkweni orek business yurin sie sin sie, kahs in kahsruh fuhkah eltahl enenuh in orekmakihn uh ac efuh?

¹⁴ Ac fuhkah fin mwet lili luo tuhkweni orek business ac eltahl kewana enenuh sie loan kuh mani yohk ma enenuh in som nuh kac? Bible uh ahkkahlwemye kahs in kahsruh na yohk srihpac se inge: Suhmuhslah ma nuhkewa! Ke sie mwe puhpuhlyuck, ke pacl se Jeremiah el molwelah ipin acn se, el oraclah nahtuhl sie copy ke pwepuh inge. Oasr mwet loh lal kac ac el okanlah pwepuh sac ke sie acn wo ma el ac kuh in sifwil orekmakihn el fin enenuh ke pacl fahsruh uh. (Jeremiah 32:9-12; liye pac Genesis 23:16-20.) Ke pacl ma kom orek business yurin mwet lili wiyom an, fin sie mwet lili el luhngse in oraclah in wo pwepuh nuh kac, sain ac in oasr mwet loh kac, tiac kalmac pa el suhlahlahlfongi kom. Tuhsruhktuh, ma inge ac kahsruh muhkwena in wacngihn mwe elyah, ma upac kuh kuhtwena mwe fohs tok. Kuhtwena mwet lili suc orek business nuh sin mwet lili  sahyac uh enenuh in esam eltahl in tiac sang business laltahl uh in kuhnahoslah inse sefanna ac mislac ke congregation uh. *​—Sie Corinth 6:1-8.

15. Meac puhlakihn luhn Jeova ke mwet suc kuhtasrihk in orek business, ac fuhkah puhlakihn luhn mwet Christian nuh ke kain in orekma kuhtasrihk ma mwet pucspucs inge oruh?

¹⁵ Ohiyac pwacye ac suwohs luhn mwet lili uh tiac ma na nuh ke congregation ac nuh sin mwet lili uh muhkwena. Paul el fahk: “Kuht kena tuh orekma lasr in suwohs pacl nuhkewa [“in ma nuhkewa,” BMK].” (Hebrew 13:18) Jeova el luhngse kuht in pwacye ke orekma nuhkewa lasr uh. Ke puk luhn Soakas, oasr fuhs ahkosr ma sramsramkihn yohk srihpaciyac in orekmakihn mwe paun suwohs. (Soakas 11:1; 20:10, 23) In pacl meet ah, kwacna orekmakihnyuck mwe paun in srihkeyac luhpan ma eltahl moli uh wi mani laltahl in sang moli. Mwet kuhka kuhtasrihk uh orekmakihn kain in mwe paun kikiacp nuh sin customer laltahl uh. * Jeova el sruhnga kain in orekma inge! In muhtana in luhngse lal uh, kuht enenuh in tiacna oruh kuh wi ke kuhtwena inkacnek kuhtasrihk luhn business.

16, 17. Kain in ohiyac fuhkah ma tiac suwohs ahkkahlwemyeyuck fin facluh ke pacl inge, ac meac mwet Christian pwacye uh tu na kuh kac?

¹⁶ Ke srihpen Satan pa mwet kol luhn facl se inge, kuht tiac lut in etuh lah orekma tiac suwohs uh orek ke yen nuhkewa.  Ke kais sie lwen sahp kuht sun mwe sruhf ma srihfe kuht in kuhtasrihk. Ke pacl ma mwet uh sihmihs résumé laltahl nuh ke sie orekma ma eltahl nwacna nuh kac, eltahl kwacna kikiacp ac laheslah ma pwacye uh, kuh sifacna kihnacack ma wo kacltahl ac sang ma tiac sikyak na pwacye. Ke pacl ma mwet uh nwacna pwepuh ke immigration, tax, insurance ac kuhtuh pac oakwuck sahyac luhn government in sang kahsruh, eltahl kwacna kikiacp in nwek tuh eltahl in kuh in eis ma eltahl luhngse uh. Tuhlihk lutlut pucspucs eltahl pihsrapasr ke pacl in test kuh ke pacl ma eltahl nwek pwepuh laltahl nuh ke lutlut ac. Eltahl oacyacpac pihsre ma ke internet uh ac oraclah muh ma eltahl sifacna oraclah. Ac ke pacl ma mwet pucspucs eltahl orek pwacpa nuh sin mwet orekma kuhtasrihk ke government, eltahl kwacna orek eyeinse in eis ma eltahl luhngse uh. Kuht etuh lah kain in orekma kuluk inge ac nuh na sikyak ke sie facl suc nwacnwaclah ke mwet suc “nuhnkuh kaclos sifacna, luhngse mani, . . . ac kwase ma wo.”​—Luo Timothy 3:1-5.

¹⁷ Mwet Christian pwacye uh sulaclah in tu na kuh ac tiac wi ke kuhtwena kain in orekma inge. Sie srihpac ma oruh upac in pwacye kuhtuh pacl uh pa ke mwet suc tiac pwacye inge eltahl eis ma wowo pucspucs ke orekma kuhtasrihk laltahl uh. (Psalm 73:1-8) Tuhsruhktuh nuh sin mwet Christian uh, eltahl ac pihlacsraclah in sun ma upac ke mani ke srihpen eltahl luhngse in sruokyac na ohiyac pwacye ac suwohs laltahl uh “pacl nuhkewa [“in ma nuhkewa,” BMK].” Yac oasr srihpac kuht in pwacye ac suwohs, finne kalmac pa kuht ac sun mwe kweok? Ahok! Efuh? Ma wo fuhkah ac kuh in tuhkuh ke ohiyen pwacye ac suwohs uh?

18. Efuh kuh ma na sacohk se pa in etweyuck oacna sie mwet pwacye ac suwohs?

¹⁸ Tiac puhs ma kom ac konwacack ke moul ma sacohk  liki sie ine wo in etweyuck oacna sie mwet pwacye ac kuh in luhlahlfongiyuck. (Liye pohk se inge “ Yac Nga Suwohs ac Pwacye In Ma Nuhkewa?”) Srihke nuhnkuh lah, oacna sie mwet ac kuh in etweyuck ke ohiyac wowo inge! Ohiyac wo inge ahkkahlwemyeyuck tiac ke srihpen kom lahlmwetmwet, kahsruhp, kahto, kuh ke kuhtuhpac ma sahyac. Finne ohinge, mwet pucspucs eltahl tiac kuh in ahkkahlwemye ohiyac wo inge in etweyuck oacna sie mwet suc kuh in luhlahlfongiyuck. Sesahlah kom in konwacack kain in mwet ohinge uh. (Micah 7:2) Kuhtuh mwet uh ac kuh in ahkkulukye kom ke srihpen pwacye lom uh, tuhsruhktuh oasr mwet sahyac ma ac arlacna ahksacohkye ohiyac wo lom uh ac eltahl kuh in luhlahlfongi kom ac suhnakihn kom. Puhs sin Mwet Loh luhn Jeova konwacack lah pwacye laltahl uh sang mwe insewowo yohk nuh seltahl ke orekma laltahl uh. Eltahl srackna orekma finne mwet sahyac suc weluhltahl orekma uh sisilac ke srihpen eltahl tiac pwacye. Eltahl konwacack pac orekma ke pacl ma enenweyuck mwet suc pwacye ac suwohs.

19. Kuht fin ahkkahlwemye ohiyen pwacye ac suwohs ke moul lasr uh, ma inge ac sang kahsruh fuhkah nuh ke nuhnak ac puhlakihn lasr wekuhnacng fototo lasr nuh sin Jeova?

¹⁹ Ma inge fin sikyak nuh sum kuh finne tiac, kom ac kuh in konwacack lah yohk mwe insewowo ma kom ac kuh in eis ke kom ahkkahlwemye ohiyen pwacye ac suwohs. Kom ac insewowo ke srihpen nuhnak ac puhlakihn wo lom. Paul el suhmuhslah: “Kuht puhlakihn na pwacye lah wacngihn ma suhfal lasr.” (Hebrew 13:18) Oacyacpac, Pahpah tuhmasr inkuhsrao el liye orekma lom inge ac el luhngse mwet pwacye ac suwohs uh. (Riti Psalm 15:1, 2; Soakas 22:1.) Ahok, ohiyen pwacye ac suwohs uh kahsre kom in muhtana in luhngse luhn God ac pa inge mwe insewowo se ma yohk emeet uh. Lwelah kuht in tuni mwe lutlut se tohkoh uh ma ac kuhpahsr nuh kac an, pa nuhnak luhn Jeova ke orekma.