TLAMACHTILI 14
Nochipa ma tijchiuakaj tlen xitlauak
“Tinemij xitlauak iixpa [toTeotsij] uan keja nopa tijnekiskiaj tijchiuasej nochipa.” (HEBREOS 13:18.)
1, 2. Xikixnexti kenke Jehová tlauel yolpaki kema kiita tijchiuaj kampeka tijchiuasej tlen xitlauak.
XIMOILJUI se pilokichpiltsi yajki tlakoua iuaya inana. Teipa ni pilokichpiltsi tlauel momajmatia pampa kiita kikuitejki se ajauili. Kiilkajki kiiljuis inana ma kikouili. Peua choka pampa tlauel kikuesoua tlen kichijki. Inana kiyolchikaua uan sansejko yauij kikauatij nopa ajauili. ¡Inana tlauel yolpaki pampa kiita kikuepa nopa ajauili!
2 Kema tetajmej kiitaj ininkoneuaj kichiuaj tlen xitlauak, tlauel yolpakij. Uan toTata Jehová, ‘Dios tlen temachtli’, nojkia tlauel yolpaki (Salmo 31:5). Kema kiita tijchiuaj kampeka tijchiuasej tlen xitlauak, Jehová tlauel yolpaki. Tlaj tijnekij ma yolpaki uan nojua ma techiknelijto, moneki tijchijtosej kej apóstol Pablo kiijtok: “Tinemij xitlauak iixpa [toTeotsij] uan keja nopa tijnekiskiaj tijchiuasej nochipa” (Hebreos 13:18). Achtoui ma tikitakaj se keski tlamantli tlen tijmatij ouij tijchiuasej, uan teipa tikitasej kenijkatsa techpaleuia kema tijchiuaj tlen xitlauak.
AMO MA TIMOKAJKAYAUAKAJ
3-5. 1) ¿Kenijkatsa kiijtoua Biblia uelis timokajkayauasej? 2) ¿Tlake techpaleuis ma tikitakaj tlaj timokajkayajtokej?
3 Moneki amo timokajkayauasej. Kemantika amo tikitaj tlaj timokajkayauaj pampa titlajtlakolejkej. Kej nopa kinpanok Cristo itokilijkauaj katli itstoyaj ipan altepetl Laodicea, maske tlatominpiayayaj, Jesús kiijtok sejse tlen inijuantij eliyayaj “teikneltsitsij, popoyotsitsij uan xolomej” pampa amo kuali tlaneltokatoyaj (Apocalipsis 3:17). Tlauel amo kuali tlen kinpanok pampa ininselti mokajkayajtoyaj.
4 Santiago 1:26 kiijtoua: “Intla se akajya kiijtoua [kuali] kineltoka toTeko, pero axmomokuitlauia ika tlen kiijtoua [...], uajka yajaya san moyolkajkayaua. Axtleno ipati itlaneltokilis”. Tlaj timoiljuiskiaj Jehová kipatiita tlen tijchiuaj kema tijtekipanouaj maske tikijtouaj tlen amo kuali, nojkia san timokajkayauaskiaj uan san tlapik tijueyichiuaskiaj. Uajka, ¿tlake uelis tijchiuasej tlaj amo tijnekij timokajkayauasej?
5 Ipan sekinok versículos, Santiago kiijtoua toTeotsij itlanauatiljuaj tlen ijkuilijtok ipan Biblia tlauel xitlauak, uan kiixnextia ika se teskatl kampa uelis “timotlachilisej” uan kej nopa tikitasej tlake moneki tijpatlasej (xijpoua Santiago 1:23-25). Biblia techpaleuia tijmatisej tlake nojua techpoloua tijchiuasej ipan tonemilis (Lamentaciones 3:40; Hageo 1:5). Nojkia moneki tikiljuisej Jehová ma kiita tlake timoyoliljuiaj, ma techpaleui tijmatisej tlake amo kuali tijchijtokej uan ma techpaleui ayokmo tijchiuasej (Salmo 139:23, 24). Maske uelis tojuantij amo tikitaj tlaj timokajkayajtokej, moneki tikilnamiktosej toTeotsij kena kiita. Proverbios 3:32 kiijtoua Jehová “kikualankaita nopa tlakatl tlen uijkoltik iojui, pero kiniknelia tlen itstokej xitlauakej iixpa”. Jehová techpaleuis ma timoitakaj kej ya techita uan ma tijchiuakaj tlen ya kineki. Kej Pablo, “tijnekiskiaj tijchiuasej nochipa [tlen xitlauak]”. Maske ipan ni tonali ouij tijchiuasej tlen xitlauak pampa titlajtlakolejkej, moneki tijchiuasej kampeka ika nochi toyolo tijchiuasej tlen xitlauak.
AMO MA TIKINKAJKAYAUAKAJ TOCHAMPOYOUAJ
Tlaj tijchiuasej tlen xitlauak, amo kema tijnekisej titlakajkayauasej
6. ¿Kenke katli mosenkajtokej amo kinamiki mokajkayauasej, uan tlake amo kinamiki kichiuasej?
6 Katli mosenkajtokej amo kinamiki kikajkayauasej ininsiua o ininueue, kiixtokasej seyok yon kiixmatisej ichtakatsi seyok ipan Internet o kitlachilisej pornografía. Sekij toikniuaj kej nopa kinkajkayajtokej ininsiua o ininueue. ¡Nelia tlauel amo kuali tlen kichijtokej! Amo kema ma tijkajkayauakaj tosiua o toueue. Moneki ma tijchiuakaj kej kiijtok David: “Axkema ninejnentok ininuaya tlakamej tlen tlakajkayauaj, niyon axnimouikatok ininuaya tlen kipiaj ome ininxayak” (Salmo 26:4).
7, 8. ¿Kenijkatsa tetajmej uelis kinmachtisej ininkoneuaj ika Biblia ma kichiuakaj tlen xitlauak?
7 Tetajmej nojkia moneki kinmachtisej ininkoneuaj amo ma tlakajkayauakaj. Moneki kinnextilisej ika Biblia amo ma kichiuakaj kej se keskij maseualmej kichijkej. Kej Acán katli tlachtejki uan amo kinekiyaya ma kimatikaj; o Giezi katli istlakatik pampa kinejki ma kitlamajmakakaj, uan Judas katli kiichtekiyaya tomij uan kiixpanok Jesús pampa kichijki ma kiitskikaj (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).
8 Nojkia moneki kinnextilisej kenijkatsa sekinok kichijkej tlen kuali. Kej Jacob, kema kimatki ikoneuaj kipantijkej tomij ipan ininkoxtal, kiniljuik ma kikuepakaj. O Jefté iichpoka, maske tlauel kiouijmatki, kichijki tlen itata kiijtojtoya. O tlen Jesús kichijki, kema kiitskitoj ikualankaitakauaj amo majmajki uan kiijtok ajkia eliyaya. Ya kinekiyaya ma moaxiti tlen kiijtoua Biblia uan nojkia kinekiyaya kuali ma itstokaj iuampoyouaj (Génesis 43:12; Jueces 11:30-40; Juan 18:3-11). Ni san se keski textos tlen uelis kinpaleuis tetajmej kinmachtisej ininkoneuaj ma kinekikaj kichiuasej tlen xitlauak.
9. ¿Kenke konemej moneki kiitasej inintatauaj kichiuaj tlen xitlauak, uan tlake amo kinamiki kichiuasej?
9 Konemej moneki kiitasej inintatauaj kichiuaj tlen xitlauak. Pablo kiijtok: “[Tlaj] inkinmachtiaj sekinok, ¿para tlen axinmomachtiaj [...] inkichiuasej tlen xitlauak? Inkiniljuiaj sekinok ma axtlachtekikaj, pero inmojuantij intetlachtekiliaj” (Romanos 2:21). Konemej amo kimatij tlaj kinneltokasej inintatauaj o amo, pampa maske kiniljuiaj moneki kichiuasej tlen xitlauak, kemantika inintatauaj tlakajkayauaj o kikuij se tlenijki tlen amo ininaxka. Uan kema kichiuaj nopa, kiijtouaj: “San nijkajkayajki se kentsi” o “Nijkuik pampa inijuantij kimajtokej nochi mouikiliaj ni tlamantli”. ¿Kuali tijchiuasej nopa? Amo. Maske amo patiyo tlen tijkuisej, kiijtosneki titlachtekij; uan maske san se kentsi tiistlakatisej, kiijtosneki titlakajkayauaj (xijpoua Lucas 16:10). * Konemej kimatij kema tlakajkayauaj inintatauaj, yeka uelis kema moskaltiaj nojkia tlakajkayauaj (Efesios 6:4). Tlaj tetajmej kichiuaj kampeka kichiuasej tlen xitlauak, ininkoneuaj nojkia kej nopa kichiuasej uan kiueyichiuasej Jehová maske miakej amo kuali monejnemiltiaj (Proverbios 22:6).
AMO MA TIKINKAJKAYAUAKAJ TOIKNIUAJ
10. ¿Kenke moneki kuali timoiljuisej tlen tikijtosej?
10 Nochipa moneki ma tijchiuakaj tlen xitlauak kema tiitstokej ininuaya toikniuaj uan ma titechiuilikaj tlen kuali. Kej tikitakej ipan tlamachtili 12, moneki kuali timoiljuisej tlake tikijtosej, pampa ueliskia tikijtosej se tlenijki tlen amo panotok o ueliskia tikistlakauisej se toikni. Yeka, amo kinamiki tikiniljuisej sekinok tlen tijkaktokej, pampa uelis san se istlakatili (Proverbios 10:19). Uan tlaj nelia panok tlen tijmatij, amo kinamiki titeiljuijtinemisej, pampa tijnextiskiaj amo titeikneliaj uan timokalakijtinemij kampa amo kinamiki (1 Tesalonicenses 4:11). Nojkia amo ma tikinyolkokokaj toikniuaj maske uelis melauak tlen tikiniljuiaj. Moneki nochipa tikinnojnotsasej ika kuali (xijpoua Colosenses 4:6).
11, 12. 1) ¿Kenijkatsa kiueyiliaj nopa kuesoli katli tlajtlakolchijtokej? 2) ¿Kenijkatsa Satanás kineki techkajkayauas kema tojuantij o seyok tlajtlakolchijtok, uan tlake moneki tijchiuasej? 3) ¿Kenijkatsa tijnextiaj amo tiistlakatij kema toikniuaj techtlajtlaniaj se keski tlamantli?
11 Tlauel amo kinamiki tikinkajkayauasej toikniuaj ueuejtlakamej. Tlaj se akajya amo kiniljuia ueuejtlakamej se ueyi tlajtlakoli tlen kichijtok, uan san istlakati kema kitlajtlaniaj, san kiueyilia nopa kuesoli. Kej nopa kinextiskia ‘kipia ome ixayak’ pampa kineki kinextis kitekipanoua toTeotsij uan nojkia tlajtlakolchiua (Salmo 12:2). Nojkia tlauel mokuapoloskia tlaj amo kiniljuiskia ueuejtlakamej nochi tlen kichijki (Hechos 5:1-11). Katli tlakajkayauaj kichiuaj kej Satanás pampa yaya se istlakatiketl (ipan iamayo 164 uan 165, xikita nopa recuadro “ Diablo kineki ma tiistlakatikaj”).
12 Nojkia amo kinamiki tiistlakatisej kema ipan se amatl techtlajtlaniaj se keski tlamantli. Uan amo kinamiki tiistlakatisej kema tikijkuilouaj keski horas nelia titlajtolmoyajkej ipan se mestli. O tlaj tijnekij nojua ma techtekimakakaj ipan Jehová itlanechikol, moneki tikijkuilosej nochi tlen techpanotok o tlaj tijpiaj se kokolistli (xijpoua Proverbios 6:16-19).
13. ¿Kenijkatsa uelis tijnextisej tijchiuaj tlen xitlauak kema titekitij ininuaya toikniuaj?
13 Nojkia moneki tijnextisej tijchiuaj tlen xitlauak kema titekitij ininuaya toikniuaj. Amo kinamiki titlanamakasej o titlainamasej ipan kali kampa timosentiliaj yon kema titlajtolmoyauaj. Uan tlaj tikintekimakasej toikniuaj, moneki nima tikintlaxtlauisej uan tikinmakasej tlen tekichiuanij tlanauatiaj (1 Timoteo 5:18; Santiago 5:1-4). Tlaj se toikni techtekimakatok, moneki kuali titekitisej (2 Tesalonicenses 3:10). Maske titekitij iuaya se toikni, amo kinamiki timoiljuisej tojuantij kena uelis techmakas sekinok tlamantli o techkauas nochipa ma tikisakaj kualka (Efesios 6:5-8).
14. ¿Tlake moneki tijchiuasej tlaj tijnamakaj o tijkouaj se tlenijki, uan kenke?
14 ¿Tlake uelis tijchiuasej tlaj timotlaneuisej tomij o tlaj iuaya seyok toikni sansejko tijtekiuiaj totomij? Biblia kiijtoua nochipa moneki tikijkuilosej tlen tijchiuasej. Jeremías kej nopa kichijki. Kema kikojki se tlali kiijkuilok ipan ome amatl ininixpa sekinok, uan teipa kimakak itekipanojka ma kiajokuili (Jeremías 32:9-12; nojkia xikita Génesis 23:16-20). Tlaj kema tijnamakaj o tijkouaj se tlenijki tikijkuilouaj uan tijtlaliliaj tofirma, amo kiijtosneki amo timotemachiaj ipan nopa maseuali, nopa san techpaleuis amo ma timokualanikaj. Tlaj se toikni techkouilis o technamakiltis se tlenijki, amo kinamiki timokualanisej iuaya o ininuaya sekinok toikniuaj san pampa amo tijchijkej tlen timokajtoyaj (1 Corintios 6:1-8). *
AMO MA TIKINKAJKAYAUAKAJ SEKINOK MASEUALMEJ
15. ¿Kenijkatsa kiita Jehová kema tetlachtekiliaj katli tlanamakaj, uan tlake tijchiuaj tojuantij?
15 Cristo itokilijkauaj nojkia moneki kichiuasej tlen xitlauak ika sekinok maseualmej. Kej Pablo, tijnekij tijchiuasej tlen “xitlauak” uan “keja nopa tijnekiskiaj tijchiuasej nochipa” (Hebreos 13:18). ToTeotsij tlauel kipatiita kema tijchiuaj tlen xitlauak kema titlanamakaj o titlakouaj. Ipan Proverbios najpa kiijtoua kenijkatsa toTeotsij tlauel kikualankaita kema amo asitok tlatamachiuaj (Proverbios 11:1; 20:10, 23). Uejkajkia kitekiuiyayaj balanzas tlen ika kitamachiuayayaj tlen kinamakayayaj uan tlen kikouayayaj, uan nojkia kitamachiuayayaj nopa oro uan plata tlen ika kintlaxtlauiyayaj. Miakej tlanamakanij tetlachtekiliyayaj pampa kipixtoyaj se balanza tlen amo kuali tlatamachiuayaya. * Jehová amo kipaktia kema kichiuaj nopa. Yeka, tlaj tijnekij nojua ma techiknelijto Jehová, amo kinamiki titetlachtekilisej.
16, 17. ¿Kenijkatsa tlakajkayauaj miakej maseualmej, uan tlake timosentlalijtokej tijchiuasej katli tijtekipanouaj toTeotsij?
16 Ipan ni tonali miakej nochipa tlakajkayauaj pampa Satanás kinnauatia maseualmej, yeka katli tijtekipanouaj toTeotsij uelis kemantika nojkia tijnekiskiaj titlakajkayauasej. Miakej istlakatij kema motekitlajtlaniaj, kema kiijkuilouaj keski impuestos tlaxtlauaj o kema moijkuilouaj ipan se seguro o sekinok tlamantli. Katli momachtiaj nojkia kinkajkayauaj inintlamachtijka pampa san kiixkopinaj se exámen o kikixtiaj ipan Internet tlen kintlajtlaniaj uan kiijtouaj inijuantij kichijkej. Uan miakej kintlaxtlauiaj tekichiuanij pampa kinekij ma kichiuakaj tlen inijuantij kinekij. Nochi ni tlamantli pano pampa miakej ‘kikokoliaj nochi tlen kuali’, ‘moikneliaj ininseltitsitsij uan tlauel kinekij miak tomij’ (2 Timoteo 3:1-5).
17 Maske timosentlalijtokej amo titlakajkayauasej, kemantika tijmatij ouij. Uelis tikitstokej kenijkatsa katli tlakajkayauaj kuali itstokej uan tlauel tlapijpiaj, uan toTeotsij itekipanojkauaj kemantika amo kipiaj tomij pampa nochipa kichiuaj tlen xitlauak (Salmo 73:1-8). Maske kemantika ouij, nelia tlauel kuali tlaj tijchiuaj tlen xitlauak. Ma tikitakaj kenijkatsa techpaleuia kema amo titlakajkayauaj.
TLAUEL TECHPALEUIA KEMA AMO TITLAKAJKAYAUAJ
18. ¿Kenke tlauel ipati tijchiuasej tlen xitlauak?
18 Miakej tlauel kipatiitaj kema se akajya amo tlakajkayaua (ipan iamayo 167, xikita nopa recuadro “ ¿Nelia amo nitlakajkayaua?”). Nochi uelis kiampa techixmatisej. Tlauel ipati tlaj amo titlakajkayauasej maske uelis amo titlatominpiaj, tiixtlamatij o amo techixmatij miakej (Miqueas 7:2). Maske miakej techpinajtisej pampa tijchiuaj tlen xitlauak, sekinok techtlepanitasej uan motemachisej ipan tojuantij. Uan uelis kampa titekitij kuali techtlaxtlauisej pampa amo titlakajkayauaj. Miakej Jehová itlajtoltemakauaj tlauel kinpaleuijtok kema amo tlakajkayauaj, pampa amo kinkixtiaj kampa tekitij uan kemantika kintekitlaliaj kampa moneki itstosej katli amo tlakajkayauaj.
19. ¿Kenijkatsa tlaj tijchiuaj tlen xitlauak techpaleuia kuali ma timouikakaj iuaya Jehová uan kuali ma tijpiakaj totlalnamikilis?
19 Maske uelis ipan moteki amo kej nopa mitspaleuijtok, kena uelis mitspaleuis ipan monemilis pampa kuali tijyolmatis. Kej Pablo kiijtok, “tijmatij ipan toyolo [o totlalnamikilis] para tinemij xitlauak” (Hebreos 13:18). Nojkia tlauel tiyolpakisej pampa tijmatij toTeotsij kipatiita kema tijchiuaj tlen xitlauak, uan ya nojua techiknelijtos (xijpoua Salmo 15:1 uan 2, uan Proverbios 22:1). Nelia se ueyi tlateochiualistli pampa tijchiuaj tlen xitlauak. Nama ma tikitakaj kenijkatsa kiita toTeotsij kema titekitij.
^ párr. 9 Tlaj se akajya nochipa teistlakauia pampa tekualankaita, eyij ueuejtlakamej moneki kitlalnamiktisej.
^ párr. 14 Ipan sekinok tlamachtili “¿Kenijkatsa tijsenkauasej kuesoli ika se toikni katli iuaya titekitij?”, kiijtoua tlake moneki kichiuasej kema toikniuaj katli sansejko tekitij mokualaniaj.
^ párr. 15 Ika se balanza kitamachiuayayaj tlen kinamakayayaj uan ika seyok tlen ika tlakouayayaj; kiampa nochipa kitlaniyayaj miak tomij. Nochipa kitekiuiyayaj balanzas tlen amo asitok tlatamachiuayaya.
