1, 2. Ntakhara heeni Yehova onnahakalala vaavaa onooneiye wiilipixerya wahu okhala awookololowa? Mulikanyihe.

MAI MMOHA ni mwanawe anakhuma mulooxa. Moohilekela, mwaana owo onneemela, ethoi awe enooniherya otikhina. Owo opharenle yoothatano okunxeiye mulooxa. Ocuwanle okookiha naari waaveka amannya wi ethume. Owo onnakhala awuukhuwa nave onnaveka nikhaviheryo. Amannya annammaaliha nave annakookela olooxa wi akookihe yoothatano ni aveke nikhurumuwelo. Vaavaa mwaana oneereiyeno eyo, amannya annahakalala. Ntakhara heeni?

² Asitiithi annahakalala owoona anamwane aya ehuseryaka okhweleya wa okhala awookololowa. Nave ti yeeyo eneereya ni Tiithi ahu a wirimu “Muluku ékhaikhai.” (Salmo 31:5) Aawoonaka munnuwelo ahu woomunepani, owo onnasiveliwa nthowa na wiilipixerya wahu okhala awookololowa. Woona wi nnachuna omuhakalaliha ni wiikhapelela mu osivela wawe nikhaleno moonelo mmohamoha wa murummwa Paulo olonce: “Ninnakhwela wetxa ni wokololowa mwa sothene.” (Ahebri 13:18, BNM) Hankooni nthokororye makupa maxexe a okumi anooniherya wi ti woovila okhala awookololowa. Voocharela nnahaala othokororya mareeliho anakhumelela wa okhala awookololowa.

3-5. (a) Masu a Muluku ananlopola hai wa yawoopiha ya wiiwoka mukhatiihu? (b) Tiheeni enahaala onikhaviherya okhala awookololowa mukhatiihu?

³ Nikacamiho nahu noopacerya ori ohuserya okhala awookololowa  wa hiyo mukhatiihu. Ntoko achu oohiphaameya ti wookhweya wiiwoka. Yesu aaloca wa Akiristu a Laotikaya wi awo yaaniiwoka mukhataaya nthowa na woona wi yaari alipa ooreela eniiha yaari “óháwa ni évasi, ni óthaleliwa” mmakupa oomunepani—chiryene mukhalelo woothananiha. (Yawupulula 3:17) Wiiwoka waya pahiru waacererya mukhalelo wawoopiha.

⁴ Akhweya nyuwaano munnuupuwela yoolopola ya murummwa Yakoopo olonce: “Mukina yowo oniséra wi tomulapa Muluku, ahinamaka nlumi nawe, nyenya oniwoka m’murimani mwawe, omulapa waya Muluku wa mutchu’la ti watherutheru.” (Yakobo 1:26) Wakhala wi nnuupuwela wi nnanwerya opharihela moonanara nlumi nahu nave tho nivahe malapelo aweemereryiwa ni Yehova, pahiru nnamwiiwoka. Malapelo ahu wa Yehova anahaala okhala atheru. Tiheeni enahaala onikhaviherya osepa mukhalelo yoola woonanara?

⁵ Mmakupa mamohamoha, Yaakopo onalikanyiha Masu a Muluku ntoko eweheryo. Owo onnanceenyerya waalikhela Malamulo awookololowa a Muluku ni opaka matorokelo. (Mwaalakhanye Yakopo 1:23-25.) Piipiliya onahaala onikhaviherya okhala awookololowa wa mukhatiihu ni woona tiheeni nnaphwanelaahu weera wi niphwanelele. (Wikhupanyerya 3:40; Axeu 1:5) Hiyaano tho nnaphwanela ovekela wa Yehova ni omveka wi anaalikhele, anikhaviheryaka woona ni weemererya yoocheka eri yoothene. (Salmo 139:23, 24) Ohookololowa, mukhalelo onahaala onivolowela moohisuwela, nave nnaphwanela woona ntoko Tiithi ahu a wirimu onooneiye. Masiposipo 3:32, BNM, onnaloca: “Apwiya annamuthanya mutakhali, awo annatàna ni atxhu awokololowa.” Yehova onahaala onikhaviherya okhalano moonelo mmohamoha ntoko owo oreiyeno ni wiisoona mukhatiihu ntoko onanooneiye. Muupuwele wi Paulo ooloca: “Ninnakhwela wetxa ni wokololowa.” Hinnawerya okhala oophaameya hiihaano, nyenya nnachuna okhala awookololowa.

6. Ntakhara heeni atheli anaphwanela okhala awookololowa mukina ni mukhwaawe, nave yawoopiha taani anasepaaya moorweela wa weerano hiiha?

⁶ Wookololowa onaphwanela okhala mukhalelo wawooneya va emusi Yeekiristu. Mulopwana ni muthiyana, anaphwanela ovaanela mmukhalelo wootaphuwa ni wa wookololowa. Mu othela Weekiristu honaphwanela okhalavo makhalelo oonanara ni ooriipiheya ntoko wooseelelana ni muchu yoowo ohiri oothelana anyu, opaka ompwana mu interneti, ni makhalelo ari oothene a epwitikiri. Akiristu akina annakhalano makhalelo yaala oonanara nave anniipithiha wa oothelana aya. Weerano hiiha onooniherya ohookololowa. Moone masu a mwene oororomeleya Tavite: “Nkikilanthe vathi ni atchu atherutheru; nari otchananano atchu awikhuwa.” (Salmo 26:4) Wakhala wi nyuwaano moothela naari mootheliwa, mulakelele ohivolowela meecelo yaawo yaahaala oweerihaani wiipithiha omuchu anyu wa oothelana anyu!

7, 8. Sootakiherya taani sa Piipiliya sinahaala waakhaviherya anamwane ohuserya okhweleya wa wookololowa?

⁷ Vaavaa asitiithi anaahusihaaya anamwane aya, yaahaala okhala ya mphurelo opharihela sootakiherya sa Piipiliya. Awo ananwerya opharihela sootakiherya soonanara ntoko ya Akani, yoowo iyale nave eererya ovitha yeeyo iyaleiye, Kehasi, yoowo oonthe wi iphwanyerye ichu soomwiilini, ni Yuuta, yoowo ari mpava nave aamutuminhe Yesu.—Yosuwa 6:17-19; 7:11-25; 2 Mamwene 5:14-16, 20-27; Mateyu 26:14, 15; Yohane 12:6.

⁸ Ntoko sootakiherya saphaama,  asitiithi anaphwanela opharihela yaweereya ya Yaakopo yoowo aaceenyenrye anamwane awe wi ekookihe ikhorowa heiho yaaphwannyaaya mmirupani mwaya ntakhara wi owo uupuwela wi saarimucuwaliwa; yaweereya ya Yefita ni mwanawe, yaawo ni wiiveleela yaakhwanihenrye nlakano nenlo yaapankaaya; ni Yesu, yoowo isooneihale moolipa murima variyari va muloko woonanara wi akhwaaniherye sa miririmo ni aakhapelele asinthamwene awe. (Mapacereryo 43:12; Amuthoriha 11:30-40; Yohane 18:3-11) Sootakiherya heiha sinanwerya waakhaviherya asitiithi waahusiha anamwane aya osivela ni ocicimiha wookololowa.

9. Tiheeni asitiithi anaphwanelaaya osepa waakhanle wi awo anachuna ovaha ntakiheryo na wookololowa wa anamwane aya, nave ntakhara heeni ti wookhweleya ovaha ntakiheryo naphaama?

⁹ Murici mutokweene wa asitiithi waahusiha anamwane vooloca sa wookololowa. Murummwa Paulo oorepa: “Yowe nto onahusiha mukina, honihusiha mwanene? Yowe onalaleyerya wi mutchu ahíye, onníya weyo mwanene?” (Aroma 2:21) Anamwane akina annakhala awuukhuwa vaavaa asitiithi anaahusihaaya wookololowa eniiha awo yooniheryaka makhalelo ohookololowa. Akhweya annakuphelela ichu ikhaani aniiyaaya, naari wootha wa vakhaani eriki: “Khuu, akaneene aasuwela wi achu annakuxa ichu heiha, naari wii wootha wa vakhaani pahiru tahi woonanara.” Mweeparipari, wiiya honayeva naari honannuwa, moohipwacha esisapo ya echu eyo yiiyiwe, nave tho wootha honayeva naari honannuwa moohipwacha mwaheene naari winnuwa waya. * (Mwaalakhanye Luka 16:10.) Ti wookhweya anamwane osuwela owoka nave ananwerya ovoloweliwa. (Aefeso 6:4) Nyenya, vaavaa anahuseryaaya okhala awookololowa moorweela wa yootakiherya ya asitiithi aya awo ananwerya wunnuwa phaama ni omucicimiha Yehova mu elapo yeela yoohookololowa.—Masiposipo 22:6.

10. Kasope taani nnaphwanelaahu okhalano vaavaa nnalocaahu ni asinthamwene a malapelo?

¹⁰ Waataana ni asinthamwene Eekiristu ikwaha sincipale sinnanivaha ikari sa wooniherya wookololowa weeparipari. Ntoko nihusenryaahu mu Mwaha 12, nnaphwanela okhalano kasope mmukhalelo nnapharihelaahu yamahala ya oloca, xaxaxa ni anna vamoha ni arokora oomunepani. Ochekula wa mahiku oothene akhweya onnatorokeya okhala waapa, ophiyerya okhala wootha! Wakhala wi ninnaloca echu nihinasuwelaahu phaama, akhweya nnahaala omwaramwaxa ichu sa wootha. Mwawiihiiha ti yaphaama okhalano kasope mwa yeele nnalocaahu. (Masiposipo 10:19) Mmakupa makina, akhweya ninnasuwela wi echu eyo ti yeeparipari, nyenya eyo henataphulela wi nnaphwanela omwaramwaxa. Ntoko yootakiherya, akhweya tahi murici ahu oloca sa mwaha yoowo, naari hiwi okhale woophwanelela oloca sa yoowo. (1 Atesalonika 4:11) Achu akina annaloca moowali yiisaakihaka wi awo tawookololowa ni eeparipari, nyenya hiyaano nnaphwanela okhala achu analoca mmukhalelo woophaameya.—Mwaalakhanye Akolose 4:6.

11, 12. (a) Yaawo anavolowela meerelo oonanara anaaceererya hai mwaha? (b) Sawootha taani Satana onavuwiheiye vooloca sa soocheka itokotoko, nave nnii nikhooce hai? (c) Nnii nooniherye hai wookololowa ni marehereryo a Yehova?

¹¹ Ti wookhweleya okhala a wookololowa xaxaxa ni yaale  anahoolela muloko. Akina yaawo anavolowela meerelo oonanara annaaceererya mwaha moorweela wa weererya ovitha yoocheka ni wootha vaavaa asitokweene anakohaaya sa mwaha yoowo. Ophiyerya tho annakhalano ekumi ya mikwaha miili, yoothaka wi anamulapela Yehova, elukuluku emohamoha yeerakano soocheka itokotoko. Mweeparipari, meerelo yaala anneeriha wi okumi wa muchu yoowo okhale wa wootha. (Salmo 12:2) Akina annaaleela asitokweene iparipari vakhaani ehiyaka sookhweleya. (Saweriwa Tarummwa 5:1-11) Mukhalelo yoola woohookololowa ikwaha sincipale onneereya nthowa na weemererya mukhalelo woowoka wa Satana.—Moone ekaaxa “ Sawootha sa Satana Vooloca sa Soocheka Itokotoko.”

¹² Ti wookhweleya tho okhala a wookololowa ni marehereryo a Yehova vaavaa nnarepaahu yooveka. Ntoko yootakiherya, vaavaa nnarepaahu soolokoha sa muteko wa mmacani wiiliwiili nnaphwanela okhala eeparipari. Moolikana, vaavaa nnarepaahu yooveka ya ekari ya muteko ori woothene, hannaphwanela wootha vooloca sa mukhalelo ahu wa okumi ni muteko ahu wa Muluku.—Mwaalakhanye Masiposipo 6:16-19.

13. Nnii niwerye hai okhala a wookololowa wakhala wi nnapaka maroca ni asinnihu?

¹³ Wookololowa wahu ni asinthamwene a malapelo onnaphariheleya muteko mu opaka maroca. Ikwaha ikina, anna ni arokora Eekiristu akhweya annapaka maroca vamoha. Awo anaphwanela wiikasopa wi ehipweseherye maroca ni malapelo anavahaaya mu Empa ya Omwene ni mu orummwa. Maroca akhweya anamvolowela namalapa ni pwiya awe. Wakhala wi munna namalapa anyu, munaphwanela omuthokororya mmukhalelo wa wookololowa, omwaakheliha ikhorowa mvaanenlaanyu nave mu elukuluku aya, ni mphurelo ori woothene wa ovaanela wanyu mwawiiwanana ni nlamulo. (1 Timoteo 5:18; Yakopo 5:1-4) Mmakupa makina, wakhala wi nnamulapa munna nnaphwanela okhala oowetha mmuteko. (2 Atesalonika 3:10) Hannaphwanela oweherya othokororyiwa  mmukhalelo wa vameekhaaya nthowa na okhala munna oomunepani, ntoko wi pwiya ahu ookhalano murici wa onivaha wiichuuwa, mphurelo ni ichu ikina anamalapa akina ahiraayano.—Aefeso 6:5-8.

14. Ephoole taani nnaphwanelaahu okhalano vaavaa nnapakaahu maroca ni munna, nave ntakhara heeni?

¹⁴ Hanka vooloca sa maroca anamvolowela munna, yoowo onarehererya naari onapoleiha ikhorowa? Piipiliya onnanivaha malakiheryo oophara muteko ni ookhweleya: Soothene murepele! Ntoko yootakiherya, vaavaa Yeremiya aathummeiye emaca, owo aarepela mu ikwaha piili, erivo tho anamoona nave aakhapelela phaama. (Yeremiya 32:9-12; Moone tho Mapacereryo 23:16-20.) Vaavaa nnarepaahu variyari va maroca ni anna, henataphulela wi nnaakhwa minikwa, oopiili aneerela namoona. Moohiyana, eyo ennakhaviherya osepa ohiiwexexa, okururyeya, ophiyerya tho ohiiwanana onahaala oruuhela okawanyeya. Akiristu oothene yaawo anapaka maroca ni anna anaphwanela osuwela wi honaphwanela woopopiha waataana ni murecele wa muloko va nthowa na maroca. *—1 Akorinto 6:1-8.

15. Yehova onoona hai vooloca sa maroca oohookololowa, nave Akiristu anoona hai meerelo yaala awunlaana?

¹⁵ Wookololowa wa Mukiristu honaphariheleya pahiru mmulokoni. Paulo ooloca: “Mukhale awokololowa mu sothene.” (Ahebri 13:18, BNM) Vaavaa nnapakaahu maroca ni achu ahiri a mmuloko, Mpatuxa ahu onaweherya wi nikhale awookololowa. Pahiru liivuru a Masiposipo onnaloca ikwaha xexe sa miphimo soowoka, naari soohookololowa. (Masiposipo 11:1; 20:10, 23) Mu elukuluku yakhalai, waari wawunlaana ophariheliwa miphimo mu maroca wi iphimiweno ichu saathummwa naari ikhorowa soolivelano. Anamatumiha oohiroromeleya  ni awiiya yaapharihela mikhalelo miili sa miphimo wi ewiiyere ni waawoka anamathuma aya. * Yehova onniicha meerelo yaala! Wi niikhapelele mu osivela wawe, nnaphwanela wiilipixerya osepa mukhalelo ori woothene wa maroca oohookololowa.

16, 17. Meerelo taani oohookololowa ari awunlaana mu elapo yeela yamutano, nave tiheeni Akiristu eeparipari analakelelaaya weera?

¹⁶ Woona wi Satana mulamuleli a elapo yeela yavathi, hinnatikhina ophwanya makhalelo yaala mmakupa oothene. Nihiku nnihiku nnahaala weehiwaka wi nikhale ohookololowa. Vaavaa achu anarepaaya ekaarata wi ephwanye muteko ti wa wunlaana wootha ni waaceererya, yoothaka wi aakhalano mavyakelo a muteko yaawo ahiraayano. Vaavaa achu anarepaaya epaaxo ya ovolowa elapo yookhopela, oliva musokho, naari epaaxo ya waakiha ekumi aya, ti wawunlaana awo ovaha maakhulo ahiri eeparipari wi yaakhwanihe yeeyo enachunaaya. Anaxikola ancipale annatakiherya variyari va weehiwa, naari wi annavolowa mu interneti ekuxawo soothene anachunaaya nave eperekha ntoko apanke mukhataaya eniiha ehiri yaawo apanke. Nave tho vaavaa achu anavolowaaya mu ikupweete soohiroromeleya ti wawunlaana opaka makhwankwa wi ewerye ophwanya yeeyo enachunaaya. Ti yeela enawehereya wa elapo yeela ancipale aryaaya “awisivela mkhataya, ósivela icharama, . . . óhásivela aphama.”—2 Timoteo 3:1-5.

¹⁷ Akiristu eeparipari ari oolakelela wi ehivolowele mukhalelo mmoharu mano wa meerelo yaala. Eneeriha wi wookololowa okhale woovila ti wi achu yaale anavolowela makhalelo ohookololowa anakhala ntoko wi annakhumelela phaama ni oya vahoolo mu elapo yeela. (Salmo 73:1-8) Ikwaha ikina, Akiristu ananwerya othoiwa ikhorowa nthowa na wiilipixerya okhala awookololowa “mu Sothene.” Apwanne ti woochuneya  wiilipixerya? Aai! Nyenya ntakhara heeni? Mareeliho taani anarweela wa okhalano meecelo awookololowa?

18. Ntakhara heeni meecelo aphaama ta esisapo etokweene?

¹⁸ Hiyaavo echu ya esisapo etokotoko mu okumi opwaha okhala muchu a meecelo a awookololowa ni oororomeleya. (Moone ekaaxa “ Kiri Awookololowa Ophiyerya Mweero Taani?”) Nave muupuwele ela: Muchu ori oothene onanwerya okhalano meecelo aphaama! Eyo henarweela wa mavyakelo, oreela, ophwaneliwa, masuwelelo, naari echu ekina muhinaweryaanyu. Naamwi hiiha, ancipale haano meecelo aphaama yaawo ari oochuneya. (Mikeya 7:2) Akina akhweya anahaala owaakaahani wa nthowa na okhala awookololowa, nyenya akina anahaala osiveliwa nave wa nthowa na yeeyo anahaala woororomelaani ni woocicimihaani. Anamoona a Yehova ancipale yaavahiwa phatamari wa nthowa na okhala awookololowa. Awo yaatitelela ophara muteko vaavaa anamalapa ohookololowa yiikariwaaya, naari yaaphwanya muteko vaavaa asipwiya aya yaachunaaya achu awookololowa.

19. Ti mwawiihai wookololowa onavolowelaaya yawuupuxerya-ya-murima ni waataana wahu ni Yehova?

¹⁹ Wakhala wi yoheereya ni nyuwo naari hooye, nyuwaano munahaala woona wi okhala a wookololowa onnaruuha mareeliho. Munahaala okhalano yawuupuxerya-ya-murima yaphaama. Paulo oorepa: “Hiyano ninnupuwela wi murima ahu ti waphama.” (Ahebri 13:18, BNM) Opwaha yeeyo, wookololowa wanyu horwa ocuwaliwa ni Tiithi ahu a wirimu oosivela, nave owo onnaasivela achu awookololowa. (Mwaalakhanye Salmo 15:1, 2; Masiposipo 22:1.) Okhala awookololowa onahaala wookhaviheryaani wiikhapelela mu osivela wa Muluku, nave ola phatamari mutokweene muchu onaweryeiye okhalano. Mmwaha onacharela nnahaala othokororya Mukhalelo woolikana ni wookololowa: Moonelo wa Yehova vooloca sa muteko.