1, 2. Ӕнӕзӕрдӕхудтӕй цӕрыныл кӕй фӕархайӕм, уый Йегъовӕйӕн ӕхсызгон цӕмӕн вӕййы? Ӕрхӕсс цӕвиттон.

МАД йӕ гыццыл лӕппуимӕ дуканийӕ рацыд. Ӕвиппайды сывӕллон дзыхълӕуд фӕкодта – йӕ къухы ис хъазӕн. Ферох ӕй хъазӕн йӕ бынаты сӕвӕрын кӕнӕ йӕ мадӕн зӕгъын, цӕмӕй йын ӕй балхӕна. Сывӕллон кӕуын райдыдта. Мад ӕй ӕрсабыр кодта ӕмӕ иумӕ дуканимӕ баздӕхтысты, цӕмӕй лӕппу хъазӕн фӕстӕмӕ ратта ӕмӕ дуканигӕсӕй хатыр ракура. Афтӕ куы бакодта, уӕд мадӕн йӕ цӕсгом фырцинӕй ныррухс. Цымӕ цӕмӕн?

² Ныййарджытӕн тынг ӕхсызгон вӕййы, сӕ сывӕллӕттӕ куы фембарынц, сайын кӕнӕ давын раст кӕй нӕу. Ӕмӕ уый зӕгъӕн ис нӕ уӕларвон Фыдӕй дӕр, «рӕстдзинады Хуыцауӕй» (Псалом 31:5). Нӕ уырнындзинад куыд фидардӕр кӕны ӕмӕ куыд фӕлтӕрдджындӕр кӕнӕм, афтӕ нӕ тынгдӕр фӕфӕнды, цӕмӕй ӕнӕзӕрдӕхудт уӕм, ма сайӕм ӕмӕ, ӕцӕг цы у, уый дзурӕм. Уый Йегъовӕйӕн тынг ӕхсызгон вӕййы. Мах фӕнды, цӕмӕй йын йӕ зӕрдӕ рухс кӕнӕм ӕмӕ йӕ уарзтӕй хайджын уӕм. Ӕмӕ уымӕ гӕсгӕ нӕ бон у апостол Павелау зӕгъын: «Мах алы хъуыддаджы дӕр фӕнды ӕнӕзӕрдӕхудтӕй архайын» (Дзуттӕгтӕм 13:18). Уӕдӕ аныхас кӕнӕм, иуӕй-иу хатт нын ӕнӕзӕрдӕхудтӕй архайын уӕлдай зын цавӕр цыппар фӕзилӕны вӕййы,  уыдоныл. Уый фӕстӕ та базондзыстӕм, адӕймаг ӕнӕзӕрдӕхудт куы вӕййы, уӕд цавӕр арфӕдзинӕдтӕй схайджын вӕййы.

3–5. а) Хи сайын тӕссаг кӕй у, уый Хуыцауы Ныхас куыд ӕмбарын кӕны? б) Цы нын баххуыс кӕндзӕн, цӕмӕй нӕхи ма сайӕм?

³ Фыццаджыдӕр адӕймаг хъуамӕ сахуыр уа, цӕмӕй йӕхи ма сайа. Уый ӕнӕххӕст адӕймагӕн ӕнцон нӕу. Зӕгъӕм, Йесо Лаодикийы чырыстӕттӕн загъта, сӕхи кӕй сайынц, уымӕн ӕмӕ афтӕ хъуыды кодтой, ӕмӕ хъӕздыг сты, афтӕмӕй та уырнындзинадӕй уыдысты «мӕгуыр, куырм ӕмӕ бӕгънӕг» – ӕцӕгдӕр уыдысты кӕуинаг уавӕры (Раргомад 3:17). Сӕхи кӕй сайдтой, уымӕй сӕ уавӕр ноджы фыддӕр кодта.

⁴ Чи зоны, дӕ зӕрдыл ӕрлӕууой Иаковы ныхӕстӕ дӕр: «Кӕд исчи йӕхи Хуыцауӕн кувӕг адӕймагыл нымайы, йе ’взаджы рохтыл та нӕ хӕцы, уӕд йӕхи сайы, ӕмӕ ахӕмӕн йӕ дин ницы у» (Иаковы 1:26). Не ’взаджы рохтыл куы нӕ хӕцӕм, фӕлӕ афтӕ куы хъуыды кӕнӕм, ӕмӕ нын Йегъовӕ уӕддӕр нӕ лӕггадӕй райгонд уыдзӕн, уӕд нӕхи сайдзыстӕм. Афтӕмӕй Йегъовӕйы цӕсты нӕ лӕггад уыдзӕн «ницы», бынтон дзӕгъӕлы. Цы нын баххуыс кӕндзӕн, цӕмӕй нӕхи ахӕм бӕллӕхӕй бахизӕм?

⁵ Ацы стих цы скъуыддзагӕй ист у, уым Иаков, Хуыцауы Ныхасы цы рӕстдзинад ис, уый абарста кӕсӕнимӕ. Иаков уынаффӕ радта, цӕмӕй Хуыцауы ӕнаипп закъон лӕмбынӕг иртасӕм ӕмӕ-иу, цы базонӕм, уымӕ гӕсгӕ нӕ цард ивӕм. (Бакӕс Иаковы 1:23–25.) Библи нын ӕххуыс кӕны, цӕмӕй нӕхи ма сайӕм ӕмӕ-иу фенӕм, фӕхуыздӕр кӕнын нӕ цы хъӕуы, уый (Йеремийы хъарӕг 3:40; Аггей 1:5). Нӕ бон ма у Йегъовӕмӕ кувын, цӕмӕй-иу нын нӕ зӕрдӕтӕм ныккӕса ӕмӕ нын ӕххуыс  кӕна нӕ хъӕндзинӕдтӕ фенынӕн ӕмӕ нӕ фӕивын цы хъӕуа, уый фӕивынӕн (Псалом 139:23, 24). Мӕнгарддзинад у, афтӕ ӕнцонтӕй фенӕн кӕй нӕй, ахӕм хъӕндзинад, ӕмӕ ацы миниуӕгмӕ хъуамӕ нӕ уӕларвон Фыды цӕстӕй кӕсӕм. Ӕмбисӕндты 3:32 стихы фыст ис: «Мӕнгард адӕймаг Йегъовӕйӕн ӕнад у, рӕстзӕрдӕ чи у, уыдон та сты йе ’ввахс хӕлӕрттӕ». Йегъовӕ нын баххуыс кӕндзӕн, цӕмӕй ацы хъуыддагмӕ дӕр ӕмӕ нӕхимӕ дӕр йӕ цӕстӕй кӕсӕм. Дӕ зӕрдыл дар, Павел цы загъта, уый: «Мах... фӕнды ӕнӕзӕрдӕхудтӕй архайын». Нырма уый гӕнӕн нӕй, ӕмӕ ӕххӕст суӕм, фӕлӕ нӕ тынг фӕнды, цӕмӕй алы хъуыддаджы дӕр ӕнӕзӕрдӕхудт уӕм, ӕмӕ ууыл архайгӕ дӕр кӕнӕм.

6. Лӕг дӕр ӕмӕ ус дӕр ӕнӕзӕрдӕхудт цӕмӕн хъуамӕ уой ӕмӕ афтӕмӕй сӕхи цавӕр бӕллӕхтӕй бахиздзысты?

⁶ Чырыстон бинонтӕй хъуамӕ алчидӕр ӕнӕзӕрдӕхудт уа ӕмӕ сӕм сайынӕн ӕмӕ мӕнг ныхӕстӕн сӕ кой дӕр хъуамӕ ма уа. Уымӕ гӕсгӕ лӕг ӕмӕ ус хъуамӕ ӕргом ныхас кӕной ӕмӕ сӕ кӕрӕдзийӕ мацы ӕмбӕхсой. Хъуамӕ сӕхи хизой ӕвзӕр ӕмӕ чъизи хъуыддӕгтӕй. Ахӕм хъуыддӕгтӕм хауы, исчи сӕ йӕ цардӕмбалӕй дарддӕр ӕндӕр искӕимӕ йӕхи афтӕ куы дара, цыма йӕ зӕрдӕмӕ цӕуы, интернеты уылты искӕимӕ сусӕгӕй куы зонгӕ кӕна кӕнӕ порнографимӕ куы кӕса. Чырыстӕттӕй иуӕй-иутӕ сӕ цардӕмбӕлтты сусӕгӕй ахӕм ӕвзӕр митӕ кӕнын райдыдтой. Фӕлӕ уый сайдыл нымад у. Дӕ хъус-ма ӕрдар, паддзах Давид, Хуыцауы иузӕрдион лӕггадгӕнӕг, цы загъта, уымӕ: «Ӕз никуы бадтӕн мӕнгард адӕмимӕ ӕмӕ, йе ’цӕг цӕсгом чи ӕмбӕхсы, уыдонимӕ нӕ лымӕн кӕнын» (Псалом 26:4). Кӕд дын бинонтӕ ис, уӕд ахӕмӕй макуы мацы сараз, цӕмӕй дӕ уый фӕстӕ дӕ цардӕмбалӕй де ’цӕг цӕсгом ӕмбӕхсын бахъӕуа!

7, 8. Сывӕллӕттӕн Библийӕ цавӕр цӕвиттонтӕ баххуыс кӕндзысты, цӕмӕй ӕнӕзӕрдӕхудт адӕймӕгтӕ суой?

 ⁷ Хорз уыдзӕн, ныййарджытӕ сӕ сывӕллӕттӕн Библийы цӕвиттонты фӕрцы куы амоной, сайын ӕмӕ гӕдыныхӕстӕ кӕнын ӕвзӕр кӕй у. Зӕгъӕм, ис дзы ахӕм ӕвзӕр цӕвиттонтӕ: Ахан цыдӕртӕ адавта ӕмӕ уый басусӕг кӕныныл архайдта; Гиези асайдта лӕвӕрттӕ ӕмӕ ӕхцайы тыххӕй; Иудӕ Искариот ӕхцатӕ давта ӕмӕ Чырыстийы ауӕй кодта (Йесо Навин 6:17–19; 7:11–25; 2 Паддзӕхты 5:14–16, 20–27; Матфейы 26:14, 15; Иоанны 12:6).

⁸ Фӕлӕ Библийы ис хорз цӕвиттонтӕ дӕр. Зӕгъӕм, Иаков йӕ фырттӕн загъта, цӕмӕй, сӕ голджыты кӕй ссардтой, уыцы ӕхцатӕ фӕстӕмӕ аластаиккой, уымӕн ӕмӕ, дам, ӕвӕццӕгӕн, чидӕр фӕрӕдыд ӕмӕ уын сӕ уӕ голджыты уый тыххӕй нывӕрдта. Кӕнӕ райсӕм Йеффайы ӕмӕ йӕ чызджы хабар. Чызг, йӕ фыд цы дзырд радта, ууыл сразы, кӕд уый тыххӕй йӕхи бирӕ цӕмӕйдӕрты фӕцух кодта, уӕддӕр, ӕмӕ Йеффай йӕ дзырд сӕххӕст кодта. Йесо нӕ фӕтарст знӕт адӕмы раз зӕгъын, кӕй агурут, уый ӕз дӕн, зӕгъгӕ, цӕмӕй Библийы пехуымпарад сӕххӕст кодтаид, стӕй цӕмӕй йе ’мбӕлтты бахъахъхъӕдтаид (Райдиан 43:12; Тӕрхонгӕнджыты 11:30–40; Иоанны 18:3, 11).  Ацы цӕвиттонтӕй уӕлдай ма Хуыцауы Ныхасы ис бирӕ хӕзнатӕ, ӕмӕ сӕ фӕрцы ныййарджытӕн сӕ бон у сӕ сывӕллӕтты ахуыр кӕнын, цӕмӕй ӕнӕзӕрдӕхудт адӕймӕгтӕ суой ӕмӕ ацы миниуӕгӕн алкӕддӕр аргъ кӕной.

9. Ныййарджытӕ сӕхи цӕмӕй хъуамӕ хизой, цӕмӕй сӕ сывӕллӕттӕн фӕзминаг уой, ӕмӕ уый ахсджиаг цӕмӕн у?

⁹ Фӕлӕ ныййарджытыл ис стыр хӕс: сӕ сывӕллӕтты цӕуыл ахуыр кӕнынц, уый сӕхӕдӕг дӕр хъуамӕ аразой. Апостол Павел загъта: «Искӕй ахуыргӕнгӕйӕ, дӕхи куыд нӕ ахуыр кӕныс? Иннӕтӕн афтӕ куы дзурыс, ма дав, зӕгъгӕ, уӕд дӕхӕдӕг куыд давыс?» (Ромӕгтӕм 2:21). Иуӕй-иу ныййарджытӕ сӕ сывӕллӕттӕн фӕдзурынц, цӕмӕй ма сайой ӕмӕ ма давой, фӕлӕ сӕхӕдӕг та сайгӕ дӕр фӕкӕнынц ӕмӕ давгӕ дӕр. Ӕмӕ сывӕллон нал фембары, раст куыд у, уый. Чи зоны, уыцы ныййарджытӕм ӕвзӕр нӕ фӕкӕсы гыццыл исты радавын ӕмӕ исты гӕдыныхӕстӕ акӕнын. Ӕмӕ сӕхи фӕрӕстытӕ кӕнынц, зӕгъгӕ, «иууылдӕр афтӕ кӕнынц» кӕнӕ «уый цӕй сайд у». Фӕлӕ давд давд у, фӕнды зынаргъ дзаума уа, фӕнды аслам. Сайд та сайд у, ныхас цӕуылфӕнды ма цӕуа ӕмӕ дзы мӕнгдзинад цасфӕнды ма уа, уӕддӕр *. (Бакӕс Лукайы 16:10.) Сывӕллӕттӕ уайтагъд бамбарынц, сӕ ныййарджытӕ дзургӕ иу кӕй кӕнынц, кӕнгӕ та – ӕндӕр. Ӕмӕ ныййарджытӕ афтӕ кӕй фӕкӕнынц, уый арӕх сывӕллӕттӕн зиан ӕрхӕссы (Ефесӕгтӕм 6:4). Фӕлӕ сын сӕ ныййарджытӕ фӕзминаг куы уой, уӕд сӕ рауайдзӕн, ацы мӕнгард дунейы йӕ цардӕй Йегъовӕйы чи кадджын кӕны, ахӕм адӕймӕгтӕ (Ӕмбисӕндтӕ 22:6).

10. Нӕ хотӕ ӕмӕ не ’фсымӕртимӕ ныхас кӕнгӕйӕ нӕ зӕрдыл цы хъуамӕ дарӕм?

¹⁰ Ӕмбырд нын стыр ӕххуыс у, цӕмӕй ӕнӕзӕрдӕхудт уӕм ӕмӕ мӕнг ныхӕстӕ ма кӕнӕм. 12-ӕм сӕрӕй базыдтам, цы дзурӕм, уымӕ нӕ хъус лӕмбынӕг кӕй хъуамӕ дарӕм, уӕлдайдӕр не ’мчырыстӕтты ’хсӕн куы уӕм, уӕд. Бирӕ нӕ хъӕуы, цӕмӕй ӕнӕуи ныхас дам-думтӕм ӕмӕ суанг фыдкоймӕ дӕр рахиза. Исты хабар куы фехъусӕм, фӕлӕ, ӕцӕг у ӕви нӕ, уый бӕлвырд куы нӕ зонӕм, афтӕмӕй йӕ иннӕтӕн куы дзурӕм, уӕд мӕнг ныхӕстӕ парахат кӕндзыстӕм. Уымӕ гӕсгӕ хуыздӕр у, цӕмӕй не ’взаджы рохтыл хӕцӕм (Ӕмбисӕндтӕ 10:19). Стӕй, бӕлвырд цы фӕзонӕм, уый дӕр алы хатт ӕнӕмӕнг иннӕтӕн дзурын нӕ фӕхъӕуы. Чи зоны, хабар махмӕ нӕ хауы кӕнӕ йӕ искӕмӕн куы радзурӕм,  уӕд уый уарзондзинадыл дзурӕг нӕ уыдзӕн (1 Фессалоникӕгтӕм 4:11). Чидӕр та рӕхуыст ныхас фӕкӕны ӕмӕ уый ӕвзӕр нӕ фӕхоны, зӕгъгӕ, дам, ӕргом ныхасы къӕм нӕй. Фӕлӕ нӕ ныхас алкӕддӕр хъуамӕ уа фӕлмӕн ӕмӕ иннӕтӕн удӕнцой хӕсса. (Бакӕс Колоссӕгтӕм 4:6.)

11, 12. а) Уӕззау тӕригъӕд чи саразы, уыдонӕй иуӕй-иутӕ сӕ уавӕр куыд фӕфыддӕр кӕнынц? б) Хӕйрӕг уӕззау тӕригъӕдты тыххӕй цавӕр мӕнг хъуыдытӕ хъары ӕмӕ нӕ бон куыд у семӕ тох кӕнын? в) Йегъовӕйы организациимӕ баст хъуыддӕгты ӕнӕзӕрдӕхудт кӕй стӕм, уый цӕмӕй уыдзӕн бӕрӕг?

¹¹ Уӕлдай ахсджиаг у, цӕмӕй хистӕр нӕлгоймӕгты ма сайӕм. Уӕззау тӕригъӕд чи ракӕны, уыдонӕй иуӕй-иутӕ сӕ уавӕр ноджы фӕфыддӕр кӕнынц – сӕ тӕригъӕд басусӕг кӕныныл фӕархайынц ӕмӕ сӕ хистӕр нӕлгоймӕгтӕ куы фӕфӕрсынц, ӕцӕгдӕр тӕригъӕд сарӕзтой ӕви нӕ, уӕд сӕ асайынц. Ӕмӕ ма суанг сӕхи афтӕ дӕр февдисынц, цыма Йегъовӕйӕн лӕггад кӕнынц, сусӕгӕй та ӕвзӕр митӕ фӕкӕнынц. Зӕгъӕн ис, ахӕм адӕймаг йӕ алы къахдзӕфыл дӕр кӕны сайгӕ (Псалом 12:2). Иннӕтӕ та кӕд хистӕр нӕлгоймӕгтӕн цыдӕртӕ схъӕр кӕнынц, уӕддӕр сӕ ахсджиаг хабӕрттӕ басусӕг кӕнынц (Хъуыддӕгтӕ 5:1–11). Арӕх хабар афтӕ уый тыххӕй рауайы, ӕмӕ адӕм феууӕндынц, Хӕйрӕг цы мӕнг хъуыдытӕ хъары, уыдоныл. (Кӕс рамкӕ « Хӕйрӕг уӕззау тӕригъӕдты тыххӕй цы мӕнг хъуыдытӕ хъары».)

¹² Хъуамӕ ма ӕнӕзӕрдӕхудт уӕм ӕмӕ ма сайӕм, Йегъовӕйы организациимӕ баст хъуыддӕгты нӕ цавӕрдӕр фарстатӕн дзуапп фыссын куы хъӕуа, уӕд дӕр. Зӕгъӕм, уый хауы нӕ уацамынды хыгъдмӕ. Йе та пионерӕй кӕнӕ ӕндӕр хуызы лӕггад кӕныны тыххӕй курдиат куы дзаг кӕнӕм, уӕд-иу хъуамӕ ныффыссӕм, не ’нӕниздзинады хабар ӕмӕ иннӕ хабӕрттӕ дӕр ӕцӕгӕй куыд сты, уый. (Бакӕс Ӕмбисӕндтӕ 6:16–19.)

13. Нӕ хотӕ ӕмӕ не ’фсымӕртимӕ кусгӕйӕ ӕнӕзӕрдӕхудт уӕм, уымӕ цы хауы?

 ¹³ Уымӕй уӕлдай ма ӕнӕзӕрдӕхудт хъуамӕ уӕм, не ’мчырыстӕттимӕ иумӕ куы кусӕм, уӕд дӕр. Хъуамӕ йӕ ӕмбарӕм, куыст иу хъуыддаг кӕй у, нӕ лӕггад та – ӕндӕр. Куысты иу адӕймаг вӕййы хицау, иннӕ та – кусӕг. Кӕд нӕм не ’фсымӕртӕ кӕнӕ нӕ хотӕ кусынц, уӕд-иу сын хъуамӕ, цы мыздыл баныхас кодтам, уый афоныл бафидӕм. Стӕй сын кӕд закъонмӕ гӕсгӕ цавӕрдӕр льготӕтӕ ӕмбӕлы кӕнӕ ууыл нӕхӕдӕг семӕ баныхас кодтам, уӕд-иу сын уыдон дӕр хъуамӕ раттӕм (1 Тимофеймӕ 5:18; Иаковы 5:1–4). Ӕмӕ кӕд нӕхӕдӕг нӕ хотӕй кӕнӕ не ’фсымӕртӕй искӕмӕ кусӕм, уӕд та хъуамӕ, нӕ куыстмӕ цы хауы, уый ӕнӕзӕрдӕхудтӕй кӕнӕм (2 Фессалоникӕгтӕм 3:10). Афтӕ хъуамӕ ма хъуыды кӕнӕм, ӕмӕ, иугӕр не ’фсымӕр у, уӕд нын иннӕ кусджытӕй уӕлдай уыдзӕн фылдӕр улӕфты бонтӕ ӕмӕ льготӕтӕ (Ефесӕгтӕм 6:5–8).

14. Иумӕ цавӕрдӕр куыст чи кӕны, уыцы чырыстӕттӕ рагацау цӕуыл хъуамӕ ахъуыды кӕной ӕмӕ цӕмӕн?

¹⁴ Зӕгъӕм, чырыстӕттӕ иумӕ цыдӕр куыст кӕнын сфӕнд кодтой, ӕмӕ дзы хъуамӕ кӕнӕ ӕхца ӕрӕвӕрой, кӕнӕ та иу иннӕмӕн кредит ратта. Библийы ис иу ахсджиаг ӕмӕ хорз уагӕвӕрд: цӕуылфӕнды ма баныхас кӕнат,– гӕххӕтт ын скӕнут! Зӕгъӕм, Йереми зӕхх куы балхӕдта, уӕд ӕвдисӕнты раз скодта дыууӕ гӕххӕтты ӕмӕ сӕ стӕй бафснайдта (Йереми 32:9–12; ноджыдӕр кӕс Райдиан 23:16–20). Не ’мчырыстӕттимӕ исты куысты фӕдыл гӕххӕтт куы скӕнӕм, алцыдӕр дзы бӕстон куы ныффыссӕм, стӕй йыл ӕвдисӕнты раз нӕ къух куы ӕрӕвӕрӕм, уӕд уый ууыл дзурӕг нӕ уыдзӕн, ӕмӕ кӕрӕдзийыл не ’ууӕндӕм. Афтӕ куы бакӕнӕм, уӕд нӕхи бахиздзыстӕм кӕрӕдзи зӕрдӕхудтӕй, фыдӕнхъӕл ничи никӕмӕй фӕуыдзӕн, стӕй уӕд афтӕ нӕ рауайдзӕн, ӕмӕ, кӕрӕдзи кӕй нӕ бамбӕрстам,  уый тыххӕй ӕмбырд ныддихтӕ. Иумӕ цавӕрдӕр куыст чи кӕны, уыцы чырыстӕттӕ хъуамӕ сӕ зӕрдыл дарой: иу куыст дӕр уый аргъ нӕу, цӕмӕй ӕмбырды фарн ӕмӕ иудзинад фехӕла * (1 Коринфӕгтӕм 6:1–8).

15. Адӕймаг куыстимӕ баст хъуыддӕгты сайа, уымӕ Йегъовӕ цы цӕстӕй кӕсы ӕмӕ чырыстӕттӕ дӕр уымӕ цы цӕстӕй хъуамӕ кӕсой?

¹⁵ Чырыстӕттӕ ӕрмӕст ӕмбырды хъуамӕ ма уой ӕнӕзӕрдӕхудт. Павел загъта, зӕгъгӕ, «мах алы хъуыддаджы дӕр фӕнды ӕнӕзӕрдӕхудтӕй архайын» (Дзуттӕгтӕм 13:18). Не Сфӕлдисӕджы фӕнды, цӕмӕй куыстимӕ баст хъуыддӕгты дӕр ӕнӕзӕрдӕхудт уӕм. Ӕрмӕст Ӕмбисӕндты чиныджы цалдӕр хатты ис фыст, сайгӕ чи кӕны, ахӕм уӕзбарӕнты тыххӕй (Ӕмбисӕндтӕ 11:1; 20:10, 23). Раджы заманты уӕзбарӕнтӕй ӕмӕ барӕн къустӕй барстой, цы ӕлхӕдтой, уый дӕр ӕмӕ-иу ын цы ’хцатӕй фыстой, уыдон дӕр. Хинӕйдзаг уӕйгӕнджытӕм-иу уыди дыууӕ хуызы уӕзбарӕнтӕ ӕмӕ, сайгӕ чи кодта, ахӕм барӕн къустӕ, цӕмӕй ӕлхӕнджыты сайдтаиккой *. Йегъовӕ йе сӕфт уыны ахӕм хъуыддӕгтӕй! Цӕмӕй йӕ уарзтӕй нӕхи ӕнӕхай ма фӕкӕнӕм, уый тыххӕй хъуамӕ куысты хъуыддӕгты ӕнӕзӕрдӕхудт уӕм ӕмӕ искӕй фӕсайыныл хъуыды дӕр ма кӕнӕм.

16, 17. Абон цавӕр мӕнгард хъуыддӕгтӕ сты парахат ӕмӕ ӕцӕг чырыстӕттӕ сӕхи цӕмӕй хизынц?

¹⁶ Хӕйрӕг ацы дунейы хицау кӕй у, уымӕ гӕсгӕ  диссаг нӕу, нӕ алыварс адӕм уыйбӕрц мӕнгард хъуыддӕгтӕ кӕй кӕнынц, уый. Гӕнӕн ис, ӕмӕ нӕ ацы дуне алы бон дӕр рӕдийын кӕна. Зӕгъӕм, бирӕтӕ куыстмӕ куы фӕцӕуынц, уӕд сӕхи тыххӕй мӕнг хабӕрттӕ ныффыссынц, сӕ раздӕры куысты сын цыма хорз ном уыди ӕмӕ цыма уыцы куыст рагӕй кӕнынц ӕмӕ йӕ хорз зонынц. Иммиграцийы, хъалонты ӕмӕ страховкӕйы гӕххӕттытӕ куы фӕдзаг кӕнынц, уӕд дӕр фӕсайынц, цӕмӕй сӕ хъуыддаг рауайа. Скъоладзаутӕ ӕмӕ студенттӕй бирӕтӕ фӕсайынц экзаменты кӕнӕ, контролон куыстытӕ, рефераттӕ ӕмӕ сочиненитӕ куы фӕфыссынц, уӕд. Интернетӕй ӕндӕр искӕй куыст рафыссынц, ӕмӕ йӕ цыма сӕхӕдӕг ныффыстой, афтӕ йӕ раттынц. Бирӕтӕ та мӕнгард хицӕуттӕн фӕдӕттынц гӕртӕмттӕ, цӕмӕй сын сӕ хъуыддаг саразой. Ӕмӕ ацы дунейы ӕндӕр дӕр куыд хъуамӕ уа, кӕд ӕмӕ дзы бирӕтӕ сты «хиуарзон, ӕхцауарзаг... хорздзинадӕн аргъ кӕнын нӕ зонынц» (2 Тимофеймӕ 3:1–5).

¹⁷ Ӕцӕг чырыстӕттӕ сӕхи хизынц ахӕм хъуыддӕгтӕй. Чи зоны, хатт искӕмӕ афтӕ кӕса, ӕмӕ ӕнӕзӕрдӕхудт уай ӕмӕ ма сайай, уый ницы пайда у, уымӕн ӕмӕ афтӕ зыны, цыма, сайгӕ чи кӕны, уыдонӕн бирӕ ӕнтысы ӕмӕ цардӕй къӕртт ӕппарынц (Псалом 73:1–8). Чырыстӕттӕ та, чи зоны, ӕхцайӕ фӕтыхсынц, уымӕн ӕмӕ сӕ фӕнды «алы хъуыддаджы дӕр» ӕнӕзӕрдӕхудтӕй архайын. Цымӕ ахӕм цард уый аргъ у, цӕмӕй дӕхи цӕмӕйдӕрты фӕцух кӕнай? Уӕдӕ! Ӕнӕзӕрдӕхудт адӕммӕ ӕнхъӕлмӕ кӕсы арфӕдзинӕдтӕ. Цымӕ цавӕртӕ?

18. Ӕнӕзӕрдӕхудт адӕймаджы ном дын уа, уый стыр хорзӕх цӕмӕн у?

¹⁸ Ӕнӕзӕрдӕхудт ӕмӕ ӕууӕнкджын адӕймаджы ном дын уа, уый стыр хорзӕх куыннӕ у. (Кӕс рамкӕ  « Алы хъуыддаджы дӕр ӕнӕзӕрдӕхудт дӕн?».) Алы адӕймагӕн дӕр йӕ бон у, цӕмӕй йӕхицӕн ахӕм ном скӕна! Уый адӕймагӕн йӕ курдиӕттӕй, йӕ хъӕздыгдзинадӕй, йе ’ддаг бакастӕй, цы бинонты ’хсӕн схъомыл, уымӕй кӕнӕ ма йӕ бар ноджыдӕр кӕуыл нӕ цӕуы, ӕндӕр ахӕм хъуыддӕгтӕй аразгӕ нӕу. Фӕлӕ уӕддӕр бирӕтӕ сӕхицӕн хорз ном не скӕнынц. Ӕнӕзӕрдӕхудт ӕмӕ ӕууӕнкджын адӕм бирӕ нӕй (Михей 7:2). Чи зоны дыл иуӕй-иутӕ худой, кӕй нӕ давыс кӕнӕ кӕй нӕ сайыс, уый тыххӕй, фӕлӕ дын иннӕтӕ та аргъ кӕндзысты ӕмӕ дыл ӕууӕнддзысты. Йегъовӕйы Ӕвдисӕнтӕй йӕ бирӕтӕ сӕхиуыл бавзӕрстой, ӕууӕнкджын кӕй уыдысты, уый фӕрцы-иу ӕхцайӕ кӕй нӕ фӕтыхстысты. Зӕгъӕм, давгӕ кӕнӕ сайгӕ чи кодта, уыцы кусджыты-иу куыстӕй ратардтой, Йегъовӕйы Ӕвдисӕнты та-иу ныууагътой. Кӕнӕ-иу афтӕ уыд, ӕмӕ-иу сӕ, ӕууӕнкджын адӕм кӕм хъуыд, ахӕм ранмӕ куыстмӕ райстой.

19. Ӕнӕзӕрдӕхудт куы уӕм, уӕд ныл уый куыд фӕзындзӕн ӕмӕ нын Йегъовӕйы раз цавӕр ном уыдзӕн?

¹⁹ Дӕхиуыл ахӕм хабӕрттӕ куы не ’рцӕуа, уӕддӕр бамбардзынӕ, ӕнӕзӕрдӕхудт цард ноджы стырдӕр арфӕдзинӕдтӕ кӕй хӕссы. Фыццаджыдӕр дын уыдзӕн сыгъдӕг цӕсгом. Павел ныффыста: «Нӕ зӕрдӕ нӕхиуыл ницӕмӕй худы» (Дзуттӕгтӕм 13:18). Уымӕй уӕлдай, цавӕр ном дын ис, уый нӕ уарзӕгой уӕларвон Фыд дӕр уыны. Ӕмӕ уый та, ӕнӕзӕрдӕхудт чи у ӕмӕ сайгӕ чи нӕ кӕны, ахӕм адӕмы тынг уарзы. (Бакӕс Псалом 15:1, 2; Ӕмбисӕндтӕ 22:1.) Ӕнӕзӕрдӕхудт куы уӕм, уӕд нӕхи Хуыцауы уарзтӕй ӕнӕхай нӕ фӕкӕндзыстӕм, ӕмӕ уымӕй хуыздӕр та ницы ис. Ныр та ӕркӕсӕм, цы фарстайыл аныхас кодтам, уыимӕ баст чи у, ӕндӕр ахӕм фарстамӕ: Йегъовӕ куыстмӕ цы цӕстӕй кӕсы?