1, 2. Ke e su be nɛ a maa baptisi nihi ɔ, mɛnɔmɛ nɛ a bua jɔɔ wawɛɛ?

KE O bɔni Yehowa sɔmɔmi jehahi babauu ji nɛ ɔ, atsinyɛ jemi ko be he kaa o nu baptisimi munyuhi fuu ngɛ Yehowa Odasefohi a kpokpa nɔ kpehi kɛ a kpɔ mi kpehi a sisi. Se kɛ̃ ɔ, be tsuaa be nɛ o maa na kaa nihi nɛ hii si ngɛ hɛ mi sɛ ɔmɛ a nɔ ɔ te si nɛ a kplɛɛ nɔ kaa a baptisi mɛ ɔ, o náa bua jɔmi saminya. Ke e su jamɛ a be ɔ, tue buli ɔmɛ kɛ bua jɔmi nyaa, nɛ a gbɔɔ a dɛ mi kɛ he wami. Ke o na kaa ni kpahi hu ba fĩ Yehowa se ɔ, o bua jɔɔ saminya nɛ eko ɔ, vonyu po jeɔ o hɛ mi. Hyɛ bɔ nɛ wa bua jɔɔ ngɛ be nɛ ɔmɛ a mi ha!

² Eko ɔ, kpehi nɛ wa yaa daa jeha ngɛ he nɛ wa ngɛ ɔ a sisi pɛ nɛ wa naa nihi nɛ a baptisiɔ mɛ, se bɔfo ɔmɛ lɛɛ a naa daa. Daa otsi ɔ, nimli akpehi abɔ ba piɛɔ Yehowa sɔmɔli nɛ a ngɛ zugba a nɔ ɔ a he. Anɛ o ma nyɛ maa po ‘bua jɔmi nɛ baa ngɛ hiɔwe’ ɔ he foni ngɛ o juɛmi mi ke bɔfo ɔmɛ na enɛ ɔ lo? (Luka 15:7, 10) Atsinyɛ jemi ko be he kaa ke bɔfo ɔmɛ na nɔ yami nɛ ɔ, a bua jɔɔ saminya!​​—Hagai 2:7.

3. Mɛni he je nɛ Satan ngɛ nyɛɛe kɛ ngɛ yae kɛ ngɛ bae kaa “jata nɛ ngɛ huae ɔ,” nɛ mɛni e ngɛ hlae nɛ e pee?

³ Se bɔfo komɛ ngɛ nɛ ke a na nɛ a ngɛ nihi baptisie ɔ, a mi mi fuɔ wawɛɛ. Ke Satan kɛ daimonio ɔmɛ na nɛ nimli akpehi abɔ ngɛ a he yue ngɛ je yaya nɛ ɔ he ɔ, e woɔ mɛ abofu wawɛɛ. E dɔɔ mɛ, ejakaa Satan fĩa kaa pi suɔmi nitsɛ nɛ nimli ngɛ ha Yehowa he je nɛ a ngɛ lɛ jae ɔ. E tsɔɔ kaa ke  adesahi kɛ ka nɛ nya wa kpe ɔ, a ti nɔ ko be Yehowa anɔkuale yee. (Kane Hiob 2:4, 5.) Be tsuaa be nɛ nɔ ko maa ma e juɛmi nya si nɛ e maa jɔɔ e he nɔ kɛ ha Yehowa a, Satan peeɔ lakpatsɛ. Ngɛ blɔ ko nɔ ɔ, daa otsi ngɛ jeha mi ɔ, nimli akpehi abɔ woɔ Satan mi mi la. Enɛ ɔ he ɔ, e be nyakpɛ kaa e ngɛ “nyɛɛe kɛ ngɛ yae kɛ ngɛ bae kaa jata nɛ ngɛ huae, nɛ ngɛ nɔ ko hlae nɛ e tsɔtslɔɔ e mi”! (1 Petro 5:8) “Jata” nɛ ɔ ngɛ hlae nɛ e puɛ huɛ bɔmi nɛ ngɛ waa kɛ Mawu wa kpɛti ɔ.​​—La 7:1, 2; 2 Timoteo 3:12.

4, 5. (a) Mɛni blɔ enyɔ a nɔ Yehowa gu kɛ tsɔɔ kaa Satan be manye yee? (b) Mɛni nɔ mi mami anɔkuale Kristofo no ko ma nyɛ ma ná?

⁴ E ngɛ mi kaa he nyɛlɔ nɛ e kɛ wɔ ngɛ hwue ɔ he ngɛ gbeye mohu lɛɛ, se e sɛ kaa waa nu sawale. Mɛni he je? Ejakaa Yehowa gu blɔ enyɔ a nɔ kɛ tsɔɔ kaa “jata nɛ ngɛ huae”  nɛ ɔ be manye yee. Mɛni ji blɔ nɛ ɔmɛ? Kekleekle ɔ, Yehowa gba kaa a ma he “nimli asafo,” nɛ a ji anɔkuale Kristofohi a yi wami kɛ gblee “haomi ngua” a mi. (Kpojemi 7:9, 14) Gbamihi nɛ Mawu gba kɛ fɔ si ɔ maa ba mi kokooko. Enɛ ɔ he je ɔ, e sa nɛ Satan nɛ le kaa e nine be Mawu we bi tsuo a nɔ sue gblegbleegble.

⁵ Nɔ́ enyɔne nɛ tsɔɔ kaa Satan be manye yee ɔ jeɔ kpo ngɛ anɔkuale munyu ko nɛ Mawu sɔmɔlɔ anɔkualetsɛ ko nɛ hi si blema a tu ɔ mi. Gbalɔ Azaria de Matsɛ Asa ke: ‘Be abɔ nɛ nyɛ pɛtɛ Yehowa he nɛ ɔ, lɛ hu e kɛ nyɛ ngɛ.’ (2 Kronika 15:2; kane 1 Korinto Bi 10:13.) A ngma nɔ hyɛmi níhi fuu ngɔ pue si nɛ tsɔɔ kaa blema a, Satan nyɛ we nɛ e tsɔtslɔɔ Mawu sɔmɔli nɛ ngɔ a he kɛ mɛtɛ Mawu he ɔ a mi. (Hebri Bi 11:4-40) Mwɔnɛ ɔ, ke Kristofo no ko kɛ e he mɛtɛ Mawu he ɔ, e ma nyɛ maa te si ngɔ wo Abosiami nɛ́ e ye e nɔ kunimi po. Ngɛ anɔkuale mi ɔ, Mawu Munyu ɔ de kɛ nɔ mi mami ke: “Nyɛɛ te si kɛ wo Abosiami, nɛ e maa tu nyɛ nya fo.”​​—Yakobo 4:7.

6. Mɛni blɔhi a nɔ Satan guu nɛ e kɛ Kristofohi hwuɔ ta kaa ni kakaakahi?

⁶ Satan be nyɛe maa ye Mawu we bi tsuo a nɔ kunimi ngɛ ta nɛ waa kɛ lɛ ngɛ hwue ɔ mi. Se ke wa ti nɔ tsuaa nɔ hyɛ we nɛ hi ɔ, e ma nyɛ ma tsɔtslɔɔ e mi. Satan le kaa e ma nyɛ ma tsɔtslɔɔ wa mi ke ji e puɛ huɛ bɔmi nɛ ngɛ waa kɛ Yehowa wa kpɛti ɔ. Mɛni Satan peeɔ konɛ e nyɛ nɛ e tsu enɛ ɔ he ní? E tuaa wɔ wawɛɛ, e tuaa wɔ kakaaka, nɛ e tuaa wɔ ngɛ blɔ nɛ ngɛ nigii nɔ hulɔ. Satan guu blɔ nɛ ɔmɛ a nɔ titli kɛ tsuɔ ní. Nyɛ ha nɛ wa susu a he nɛ waa hyɛ.

7. Mɛni he je nɛ Satan je e hɛ kɛ pi Yehowa we bi wawɛɛ ɔ?

⁷ Tuamihi nɛ nya wa. Bɔfo Yohane ngma ke: “Je ɔ, Abosiami lɛ ngɛ nɔ yee.” (1 Yohane 5:19) Munyu nɛ ɔ ji kɔkɔ bɔmi kɛ ha anɔkuale Kristofohi tsuo. Akɛnɛ Satan nine su  adesahi tsuo nɛ a pee we Mawu suɔmi nya ní ngɛ je ɔ mi ɔ a nɔ momo he je ɔ, amlɔ nɛ ɔ lɛɛ, e je e hɛ kɛ pi nihi nɛ e nine sui a nɔ lolo ɔ. Jamɛatsɛmɛ ɔmɛ ji Yehowa we bi. (Mika 4:1; Yohane 15:19; Kpojemi 12:12, 17) E mi mi fu wawɛɛ, ejakaa e le kaa be bɔɔ kɛkɛ nɛ e piɛ ha lɛ. Enɛ ɔ he ɔ, e mia e halɛ mi saminya kɛ wo wa he. Mwɔnɛ ɔ, e ngɛ e nyagbe mɔde bɔe konɛ e puɛ huɛ bɔmi nɛ ngɛ waa kɛ Mawu wa kpɛti ɔ.

8. Mɛni bɔfo Paulo ngɛ tsɔɔe benɛ e de ke waa kɛ mumi yayamihi “ngɛ ta hwue” ɔ?

⁸ E tuaa wɔ kakaaka. Bɔfo Paulo bɔ nyɛmimɛ Kristofohi kɔkɔ ke: ‘He nyɛli nɛ waa kɛ ngɛ ta hwue ɔ ji mumi yayami asafo nɛ ngɛ hiɔwe níhi a mi.’ (Efeso Bi 6:12) Mɛni he je nɛ Paulo ngɔ munyu nɛ ji “ngɛ ta hwue” ɔ kɛ tsu ní ɔ? Ejakaa, Hela munyungu nɛ a tsɔɔ sisi ke “ngɛ ta hwue” ɔ tsɔɔ nihi nɛ a ngɛ kunɔ nɔe nɛ a fua a sibi. Lɔ ɔ he ɔ, munyungu nɛ Paulo kɛ tsu ní ɔ ma nɔ mi kaa wa ti nɔ tsuaa nɔ kɛ mumi yayamihi ngɛ kunɔ nɔe. Nihi heɔ mumi yayamihi yeɔ wawɛɛ ngɛ he nɛ wa ngɛ ɔ jio, a he we yi jio, e sa nɛ be tsuaa be ɔ, e hi wa juɛmi mi kaa kɛ je benɛ wa jɔɔ wa he nɔ ha Yehowa a, waa kɛ mumi yayamihi bɔni kunɔ nɔmi. Ke Kristofo no ko jɔɔ e he nɔ pɛ, e kɛ e he wo kunɔ nɛ ɔ mi. Enɛ ɔ he je nɛ Paulo na kaa e he hia nɛ e wo Kristofohi nɛ a hi Efeso ɔ he wami si abɔ kaa a “da si kpɛii” ɔ nɛ!​​—Efeso Bi 6:11, 13, 14.

9. (a) Mɛni he je Satan kɛ mumi yayami ɔmɛ ngɔɔ “ga tsɔmi” slɔɔtohi kɛ tsuɔ ní ɔ? (b) Mɛni he je nɛ Satan hlaa kaa e puɛ wa juɛmi, nɛ mɛni wa maa pee kɛ tsi e mɔde bɔmi ɔ nya? (Hyɛ daka nɛ ji, “ Hyɛ Nɛ Hi Ngɛ Satan Ga Tsɔmi ɔ He!”) (d) Amlɔ nɛ ɔ, mɛni ga tsɔmi he wa ma susu?

⁹ E tuaa wɔ ngɛ blɔhi nɛ a ngɛ nigii nɔ. Paulo wo Kristofohi he wami kaa a da Satan “ga tsɔmi ɔmɛ” a nya. (Efeso Bi 6:11) Mo kadi kaa Paulo de ke “ga tsɔmi ɔmɛ.” Pi ga blɔ kake nɔ nɛ mumi yayami ɔmɛ guu, mohu ɔ, a guu ga blɔhi fuu a nɔ konɛ a nine nɛ su nihi a nɔ. Kristo se nyɛɛli komɛ nyɛ da ka komɛ a nya, se a nɔ si ngɛ ka kpahi a mi pee se. Enɛ ɔ tsɔɔ kaa Abosiami kɛ mumi yayami ɔmɛ toɔ wa ti nɔ tsuaa nɔ je mi bami he hɛ wawɛɛ nɛ a naa wa gbɔjɔmihi.  Lɔ ɔ se ɔ, a daa gbɔjɔmi nɛ ma nyɛ ma puɛ waa kɛ Mawu wa kpɛti ɔ nɔ kɛ kaa wɔ. Se bua jɔmi sane ji kaa wa ma nyɛ ma yɔse Abosiami ga tsɔmi ɔmɛ, ejakaa Baiblo ɔ je mɛ kpo heii. (2 Korinto Bi 2:11) Ngɛ womi nɛ ɔ mi ɔ, wa sɛ hlami nɛ wa susu e ga tsɔmihi nɛ ji, he lo nya níhi fuu a se dimi, huɛ yaya bɔmi, kɛ ajuama bɔmi he. Amlɔ nɛ ɔ, ha nɛ wa susu Satan ga tsɔmi ɔmɛ ekpa ko hu he nɛ waa hyɛ. Lɔ ɔ ji mumi yayamihi kɛ ní tsumi.

10. (a) Mɛni ji mumi yayamihi kɛ ní tsumi? (b) Kɛ Yehowa buɔ mumi yayamihi kɛ ní tsumi ha kɛɛ, nɛ kɛ mo hu o buu lɛ ha kɛɛ?

¹⁰ Ke nɔ ko kɛ mumi yayamihi loo daimoniohi tsuɔ ní ɔ, lɔ ɔ tsɔɔ kaa nɔ ɔ kɛ daimoniohi ngɛ bɔe tɛɛ. Ní komɛ nɛ ke nɔ ko peeɔ nɛ lɔ ɔ tsɔɔ kaa nɔ ɔ kɛ mumi yayamihi ngɛ ní tsue ɔ ekomɛ ji klaami, kunya tsumi, kablɛ fimi, kɛ gbogboehi a ní bimi. Kaa bɔ nɛ wa le ɔ, Yehowa buɔ mumi yayamihi kɛ ní tsumi kaa “níhi nɛ a hiɔ.” (5 Mose 18:10-12; Kpojemi 21:8) Akɛnɛ e sa kaa wɔ hu waa “nyɛ yayami kulaa” he je ɔ, e sɛ kulaa kaa waa kɛ mumi yayamihi bɔɔ. (Roma Bi 12:9) Ngɛ anɔkuale mi ɔ, ke wa peeɔ nɔ́ ko jã a, lɔ ɔ tsɔɔ kaa wa je wa Yehowa, nɛ ji wa hiɔwe Tsɛ ɔ se!

11. Mɛni he je nɛ e maa pee kunimi yemi ngua ha Satan ke ji e nyɛ nɛ e sisi wɔ nɛ waa kɛ wa he wo mumi yayamihi kɛ ní tsumi mi? Mo ha enɛ ɔ he nɔ hyɛmi nɔ́.

¹¹ Akɛnɛ ke nɔ ko kɛ mumi yayamihi tsuɔ ní nɛ lɔ ɔ tsɔɔ kaa nɔ ɔ je Yehowa se he je ɔ, Satan mwɔ e yi mi kpɔ kaa e ma ha nɛ wa ti ni komɛ waa kɛ wa he nɛ wo mi. Be fɛɛ be nɛ Satan maa sisi Kristofo no ko nɛ e kɛ e he maa wo mumi yayamihi kɛ ní tsumi mi ɔ, Satan naa kaa e ye kunimi ngua. Mɛni he je? Mo susu nɔ hyɛmi nɔ́ nɛ ɔ he nɛ o hyɛ: Ke nɔ ko nyɛ nɛ e sisi ta bulɔ ko nɛ e je e tabo ɔ se kɛ ya piɛɛ a he nyɛli ɔmɛ a he ɔ, ta buli a nyatsɛ nɛ da a he nyɛli ɔmɛ a tabo ɔ nya a bua jɔɔ wawɛɛ nitsɛ. Eko ɔ, e kɛ ta  bulɔ ɔ nɛ a nine su e nɔ ɔ maa fĩa kɛ tsɔɔ kaa a ye kunimi. E maa pee jã kɛ ye a he nyɛli ɔmɛ a nyatsɛ ɔ he fɛu. Jã kɛ̃ nɛ ke Kristofo no ko ngɔ e he ya wo mumi yayamihi kɛ ní tsumi mi ɔ, lɔ ɔ tsɔɔ kaa e je blɔ kua Yehowa, nɛ e kɛ e he ya wo Satan kudɔmi sisi. Mo susu bɔ nɛ Satan kɛ bua jɔmi maa ngɔ nɔ se blɔ tsɔɔlɔ nɛ ɔ kɛ tsɔɔ kaa e ye kunimi ha a he nɛ o hyɛ! Anɛ wa ti nɔ ko suɔ nɛ Abosiami nɛ ye kunimi lo? Dɛbi! Pi nɔ se blɔ tsɔɔli ji wɔ.

12. Mɛni blɔ nɔ Satan guu kɛ sisiɔ wɔ konɛ wa bua nɛ jɔ mumi yayamihi kɛ ní tsumi he?

¹² Ke wa yuɔ wa he ngɛ mumi yayamihi kɛ ní tsumi he ɔ, Satan be wa nɔ kunimi yee ke e ngɔ lɔ ɔ kɛ ka wɔ. Enɛ ɔ he ɔ, e yɔse kaa e sa nɛ e puɛ wa juɛmi. Kɛ gu mɛni blɔ nɔ? E hlaa blɔhi a nɔ nɛ e maa gu kɛ puɛ Kristofohi a juɛmi konɛ a ‘tsɛ yayami ke kpakpa, nɛ a tsɛ kɛ kpakpa ke yayami.’ (Yesaya 5:20) Blɔ nɛ Satan guu nɔ kɛ peeɔ enɛ ɔ kɛ je blema nɛ e yeɔ manye ji kaa e tleɔ sane bimihi si ngɛ nɔ juɛmi mi. Enɛ ɔ he ɔ, ke e suɔ kaa e ma puɛ nɔ ko juɛmi ɔ, jamɛ a blɔ ɔ nɔ nɔuu nɛ e guu.

13. Kɛ ji bɔ nɛ Satan ngɔ sane bimi nɛ haa nɔ juɛmi peeɔ lɛ enyɔɔnyɔ ɔ kɛ tsu ní ha kɛɛ?

¹³ Moo to bɔ nɛ Satan gu blɔ nɛ ɔ nɔ kɛ tsu ní blema a ha a he hɛ. E bi Hawa ngɛ Eden abɔɔ mi ke: ‘Anɛ Mawu de nyɛ niinɛ ke tso ɔmɛ nɛ ngɛ ngmɔ ɔ mi ɔ, nyɛ ko ye ekoeko nɔ yiblii lo?’ Ngɛ Hiob be ɔ mi ɔ, benɛ bɔfo ɔmɛ pee kpe ko ngɛ hiɔwe ɔ, Satan bi Mawu ke: ‘O susu kaa yaka gu lɛ Hiob yeɔ mo gbeye ɔ?’ Nɛ ngɛ Yesu zugba a nɔ sɔmɔmi ní tsumi ɔ sisije ɔ, Satan de lɛ ke: ‘Ke Mawu bi ji mo ɔ, fã tɛ nɛ ɔmɛ nɛ a plɛ abolo.’ Mo susu he nɛ o hyɛ. Ngɛ Yesu blɔ fa mi ɔ, maa pee otsi ekpa nɛ sɛ hlami ɔ, Yehowa de ke: ‘Imi nitsɛ ye bi nɛ i suɔ ji nɛ ɔ nɛ, i ngɛ e he bua jɔmi saminya.’ Satan ngɛ Yehowa he fɛu yee ngɛ munyu nɛ ɔ nɛ e tu ɔ he.​​—1 Mose 3:1; Hiob 1:9; Mateo 3:17; 4:3.

14. (a) Mɛni blɔ nɔ Satan guu kɛ haa nɛ nihi a yi mi peeɔ enyɔɔnyɔ ngɛ mumi yayamihi kɛ ní tsumi he? (b) Mɛni he wa ma susu piɔ?

 ¹⁴ Mwɔnɛ ɔ, Abosiami ngɛ blɔ nɛ ɔ kɛ̃ nɔ gue kɛ ngɛ hlae nɛ wa yi mi nɛ pee wɔ enyɔɔnyɔ ngɛ bɔ nɛ mumi yayamihi kɛ ní tsumi yeɔ nɔ awi ha a he. Aywilɛho sane ji, e nyɛ nɛ e puɛ Kristo se nyɛɛli komɛ a juɛmi. A juɛmi bɔni mɛ enyɔɔnyɔ peemi ngɛ mumi yayamihi kɛ ní tsumi mi ní peepee komɛ a he. E peeɔ mɛ kaa mumi yayami kɛ ní tsumi ní peepee komɛ ngɛ nɛ tɔmi ko be he tsɔ. (2 Korinto Bi 11:3) Mɛni blɔ nɔ wa maa gu kɛ ye bua nyɛmimɛ nɛ ɔmɛ konɛ a dla a susumi? Mɛni blɔ nɔ wa maa gu konɛ Satan ga tsɔmi ɔ nɛ ko ná wa nɔ he wami? Bɔ nɛ pee nɛ wa nyɛ nɛ wa ha sane bimi nɛ ɔmɛ a heto ɔ, nyɛ ha nɛ wa susu níhi enyɔ nɛ Satan gu ga blɔ nɔ nɛ e kɛ mumi yayamihi kɛ ní tsumi ní peepeehi futu ɔ a he nɛ waa hyɛ. Lɔ ɔmɛ ji hɛja jemi kɛ hiɔ tsami.

15. (a) Kɛ nihi nɛ ngɛ Pusinɔ he ma amɛ a mi ɔ buu mumi yayamihi kɛ ní tsumi ha kɛɛ? (b) Mɛni blɔ nɔ je ɔ susumi ngɛ mumi yayamihi kɛ ní tsumi he ɔ ná Kristo se nyɛɛli komɛ a nɔ he wami ngɛ?

¹⁵ Ngɛ Pusinɔ he ma amɛ a mi titli ɔ, nihi bui mumihi a tsɛmi, hiami aloo aze kpɛmi, kɛ mumi yayamihi kɛ ní tsumi ní peepee kpahi kaa tɔmi ngɛ a he. A ngmaa mumi yayamihi kɛ ní tsumi ní peepeehi a he munyuhi ngɛ womihi a mi, a jeɔ ngɛ tiivi nɔ, sinihi kɛ kɔmpiuta nɔ fiɛmihi a mi kaa a ji fiɛmi níhi, aloo níhi nɛ ke nɔ ko peeɔ ɔ, lɔ ɔ tsɔɔ kaa e hɛ mi tɛ̃, nɛ e yi nɔ awi. Sinihi kɛ womihi nɛ a pee ngɛ mumihi a tsɛmi he ɔ pɔ he wawɛɛ, enɛ ɔ he ɔ, nihi nɛ a bua jɔ he ɔ tsɔ kuuhi ngɛ he. Enɛ ɔ tsɔɔ heii kaa daimonio ɔmɛ nyɛ nɛ a sisi nihi nɛ a susu kaa oslaa be mumi yayamihi kɛ ní tsumi he. Anɛ enɛ ɔ ná Kristofohi a nɔ he wami lo? E na a ti ni komɛ a nɔ he wami. Ngɛ mɛni blɔ nɔ? Kaa nɔ hyɛmi nɔ́ ɔ, benɛ Kristofo no ko hyɛ mumi yayamihi a he sini ko  ta a, e de ke, “Sini kɛkɛ nɛ i hyɛ, i kɛ mumi yayamihi tsu we ní.” Mɛni he je nɛ oslaa ngɛ susumi nɛ ɔ he?

16. Mɛni he je nɛ e ngɛ oslaa kaa waa kɛ sinihi nɛ kɔɔ mumi yayamihi kɛ ní tsumi he ɔ ma je wa hɛja?

¹⁶ E slo mumi yayamihi kɛ ní tsumi ngɛ mumi yayamihi kɛ ní tsumi ní peepeehi a hyɛmi he mohu lɛɛ, se lɔ ɔ tsɔɔ we kaa oslaa be mumi yayamihi kɛ ní tsumi ní peepeehi a hyɛmi he. Mɛni he je? Mo susu he nɛ o hyɛ: Mawu Munyu ɔ tsɔɔ kaa Satan kɛ e daimonio ɔmɛ be he wami nɛ a kɛ maa le nɔ́ nɛ ngɛ wa juɛmi mi. * Enɛ ɔ he ɔ, kaa bɔ nɛ wa de kɛ sɛ hlami ɔ, ja mumi yayami ɔmɛ to wa he hɛ saminya loko a ma nyɛ maa le níhi nɛ ke a kɛ ka wɔ ɔ, a nine maa su wa nɔ. Ní nɛ ɔmɛ eko ji níhi nɛ waa kɛ jeɔ wa hɛja. Ke Kristofo no ko je mi bami tsɔɔ kaa e bua jɔɔ sinihi aloo womihi nɛ kɔɔ klaami, kablɛ fimi, nihi nɛ mumi yayamihi sɛ a mi, kɛ mumi yayamihi kɛ ní tsumi ní peepee kpahi a he ɔ, nɔ ɔ ngɛ mumi yayami ɔmɛ nɔ́ ko dee. Enɛ ɔ tsɔɔ kaa e ngɛ mɛ e gbɔjɔmi tsɔɔe! Nɔ́ nɛ mumi yayami ɔmɛ maa pee ji, a maa da Kristofo no nɛ ɔ gbɔjɔmi ɔ nɔ, nɛ a kɛ lɛ maa hwu kɛ ya si benɛ a maa ye e nɔ kunimi. Ngɛ anɔkuale mi ɔ, ni komɛ kɛ mumi yayamihi a ní peepeehi je a hɛja nɛ nyagbenyagbe ɔ, a plɛ pee nihi nɛ a kɛ mumi yayamihi tsuɔ ní.​​—Kane Galatia Bi 6:7.

17. Mɛni ga blɔ nɔ eko ɔ, Satan maa gu kɛ ka nihi nɛ be he wami?

¹⁷ Pi hɛja jemi nɛ wa suɔ pɛ nɔ nɛ Satan daa kɛ kaa wɔ, se e daa nɔmlɔ tso mi he wami nami nɛ wa hia a hu nɔ. Ngɛ mɛni blɔ nɔ? Ke Kristofo no ko be he wami nɛ e tsa hluu se e jɔɛ ɔ, eko ɔ, e kɔni mi maa wo nyu. (Marko 5:25, 26) Satan kɛ daimonio ɔmɛ ma nyɛ maa da lɔ ɔ nɔ kɛ ka lɛ. Daimonio ɔmɛ ma nyɛ maa ka nɔ ko nɛ e be he wami nɛ e pee yeyeeye ɔ konɛ e ya hla hiɔ tsami blɔ nɔ tomihi nɛ kɛ “kunya  tsumi he wami” aloo mumi yayamihi ngɛ tsakpa. (Yesaya 1:13, NW) Ke daimonio ɔmɛ nyɛ nɛ a gu ga blɔ nɛ ɔ nɔ kɛ sisi hiɔtsɛ ko ɔ, huɛ bɔmi nɛ ngɛ e kɛ Mawu a kpɛti ɔ ma puɛ. Ngɛ mɛni blɔ nɔ?

18. Mɛni hiɔ tsami blɔ nɔ tomi komɛ nɛ e sa kaa Kristofo no nɛ yu e he ngɛ he, nɛ mɛni he je?

¹⁸ Yehowa bɔ Israel bi nɛ ngɔ a he kɛ wo mumi yayamihi kɛ ní tsumi mi ɔ kɔkɔ ke: “Ke nyɛ wo nyɛ nine nɔ nɛ nyɛ ngɛ sɔlee ɔ, i be nyɛ hyɛe.” (Yesaya 1:15) Niinɛ, wa sume kaa wa maa pee nɔ́ ko nɛ be hae nɛ Yehowa nɛ bu wa sɔlemi tue konɛ e ye bua wɔ, titli ɔ, benɛ wa be he wami. (La 41:3) Enɛ ɔ he ɔ, e sa kaa anɔkuale Kristofo no nɛ yu e he ngɛ hiɔ tsami blɔ nɔ tomihi nɛ a kɛ mumi yayamihi tsuɔ ní ngɛ mi ɔ a he. * (Mateo 6:13) Ke e pee jã a, Yehowa maa ye bua lɛ.​​—Hyɛ daka nɛ e yi ji, “ Anɛ E Ji Mumi Yayamihi Kɛ Ní Tsumi Niinɛ Lo?”

19. (a) Mɛni Abosiami sisi nihi fuu nɛ a he ye ngɛ he wami nɛ e ngɛ ɔ he? (b) Mɛni nyaziahi e sa kaa anɔkuale Kristofohi nɛ a yu a he ngɛ he?

¹⁹ Be mi nɛ nihi fuu nɛ ngɛ Pusinɔ he ma amɛ a mi ɔ bui oslaa nɛ ngɛ Satan he wami he ɔ, nihi nɛ a ngɛ je ɔ mi he  kpahi lɛɛ a buu Satan kaa e ngɛ he wami. Abosiami sisi nihi ngɛ ma nɛ ɔmɛ a mi nɛ a he ye kaa e ji he walɔ kpanaa. Ni komɛ ngɛ nɛ mumi yayamihi a he gbeye náa nɔ́ tsuaa nɔ́ nɛ a peeɔ ngɛ a si himi mi ɔ nɔ he wami. Nyaziahi nɛ tsɔɔ kaa daimoniohi ngɛ he wami wawɛɛ pɔ he. A pɔɔ nyazia nɛ ɔmɛ siami kɛ bua jɔmi, nɛ e haa nihi a nya kpɛɔ a he. Anɛ e sa kaa wɔ hu waa sia nyazia nɛ ɔmɛ eko lo? Dɛbi. E sɛ nɛ anɔkuale Mawu ɔ sɔmɔli nɛ a pee jã ngɛ yi mi tomi titli enyɔ komɛ a he je.

20. Kɛ nɔ ko ma plɛ kɛ gbɛ Satan lakpa munyuhi kɛ fĩa be mi nɛ e hɛ be e he nɔ ha kɛɛ?

²⁰ Kekleekle ɔ, ke nɔ ko deɔ nihi bɔ nɛ daimoniohi tsuɔ ní ha a, jamɛatsɛ ɔ ngɛ Satan suɔmi nya ní pee. Mɛni he je? Mawu Munyu ɔ ma nɔ mi kaa Satan nyɛɔ nɛ e tsuɔ nyakpɛ níhi mohu, se e bɔ wɔ kɔkɔ kaa “lakpa nyakpɛ ní” kɛ ‘sisimi’ nɔ e guu kɛ tsuɔ ní. (2 Tesalonika Bi 2:9, 10) Akɛnɛ  Satan ji nɔ sisilɔ kpanaku he je ɔ, e le bɔ nɛ e ma plɛ nihi nɛ suɔ mumi yayamihi kɛ ní tsumi ɔ a juɛmi ha konɛ a he lakpa munyuhi nɛ a ye. Eko ɔ, nimli nɛ ɔmɛ ma he ye kaa a na nɔ́ ko loo a nu gbi ko, nɛ a maa sɛɛ ha nihi kaa e ji anɔkuale munyu. Be mi nɛ a yaa nɔ nɛ a sɛɛɔ kɛ haa nihi ɔ, jã kɛ̃ nɛ a woɔ he zã. Ke Kristofo no ko gbɛ sane nɛ ɔmɛ kɛ fĩa a, Abosiami suɔmi nya ní ji nɔ́ nɛ e ngɛ pee ɔ nɛ, “ejakaa lakpatsɛ kpanaku ji lɛ.” E ngɛ Satan lakpa munyuhi gbɛe kɛ ngɛ fĩae.​​—Yohane 8:44; 2 Timoteo 2:16.

21. Mɛni he munyu wa suɔ kaa wa maa tu?

²¹ Yi mi tomi enyɔne ɔ ji, ke Kristofo no ko kɛ mumi yayamihi bɔ hyɛ po ɔ, e sɛ nɛ e kɛ nyɛmimɛ nɛ pɔ he ní sɛɛmi kɛ je a hɛja. Mɛni he je? A wo wɔ ga ke: “Waa hyɛ Yesu, ejakaa e nɔ wa hemi kɛ yemi ɔ daa si ngɛ.” (Hebri Bi 12:2) Niinɛ, e sa kaa waa ngɔ wa juɛmi kɛ ma Kristo nɔ se pi Satan nɔ. E sa nɛ wa kadi kaa benɛ Yesu ngɛ zugba a nɔ ɔ, jinɛ e ko nyɛ de e kaseli ɔmɛ níhi fuu nɛ Satan ma nyɛ maa pee kɛ níhi nɛ e be nyɛe maa pee, se e kɛ mɛ sɛɛ we mumi yayamihi a he ní. Mohu ɔ, Matsɛ Yemi sɛ gbi ɔ ji nɔ́ nɛ Yesu tu he munyu titli. Lɔ ɔ he ɔ, akɛnɛ wa ngɛ Yesu kɛ e kaseli ɔmɛ kasee he je ɔ, wa suɔ nɛ waa tu “Mawu ní nguangua amɛ” pɛ a he munyu.​​—Bɔfo Ɔmɛ A Ní Tsumi 2:11; Luka 8:1; Roma Bi 1:11, 12.

22. Mɛni wa ma nyɛ maa pee konɛ ‘bua jɔmi nɛ ba ngɛ hiɔwe’?

²² E ji anɔkuale kaa Satan guu ga tsɔmihi, kɛ mumi yayamihi kɛ ní tsumi nɔ konɛ e kɛ puɛ huɛ bɔmi nɛ ngɛ waa kɛ Yehowa wa kpɛti ɔ. Se ke wa nyɛ yayami nɛ wa pɛtɛ nɔ́ kpakpa he ɔ, Abosiami be blɔ nae kɛ sisi wɔ konɛ waa ngɔ wa he kɛ wo mumi yayamihi kɛ ní tsumi mi kɔkɔɔkɔ. Wa mwɔ wa yi mi kpɔ kaa wa maa yu wa he ngɛ mumi yayamihi kɛ ní tsumi he kulaa. (Kane Efeso Bi 4:27.) Ke wa ya nɔ nɛ wa ‘da Abosiami ga tsɔmi ɔmɛ a nya’ kɛ ya si benɛ a ma kpata e hɛ mi ɔ, mo susu ‘bua jɔmi nɛ maa ba ngɛ hiɔwe’ ɔ he nɛ o hyɛ!​​—Luka 15:7; Efeso Bi 6:11.