1, 2. Сууга чӧҥӱрилери кемдерди сӱӱндирет?

ИЕГОВА КУДАЙГА иштеп баштаганыҥ удай берген болзо, сен курултайларда чӧҥӱрилери керегинде куучын-эрмекти кӧп катап уккан болорыҥ. Је сен мындый туштажуларда канча да катап болгон болзоҥ, залда баштапкы јерлерде отурып алган улустыҥ ӧрӧ туруп, чӧҥӱрилериниҥ сурактарына каруулар берип турганын кӧрӱп, јаантайын ӧкпӧӧрип турган болорыҥ. Залдагы улус бу ок ӧйдӧ тыҥ сӱӱнгенинеҥ улам изӱ колчабыжып, кӱӱлей берет. Иегованыҥ јанына туруп алган база бир бӧлӱк баалу улусты кӧрӱп тура, кӧзиҥ јаашталып турган болор. Мындый ӧйдӧ бис сӱреен тыҥ сӱӱнедис!

² Бис улустыҥ сууга чӧҥӱрилгенин бир јылга тоолу ла катап кӧрӧдис, је ангелдер мындый учуралдарды бистеҥ канча катапка кӧп кӧрӱп јат. Бастыра јердиҥ ӱстинде кажы ла неделе муҥдар тоолу улус Иегованыҥ организациязыныҥ јердеги бӧлӱгине кожулып турганын кӧрӱп, «теҥериде» јаан сӱӱнчи болуп турганын сананып кӧр (Лука 15:7, 10). Ангелдер Кудайдыҥ албатызыныҥ тоозы мынайып кӧптӧп турганын кӧрӱп, сӱреен тыҥ сӱӱнип јадылар (Аггей 2:7).

3. Сатана нениҥ учун «ыркыранган каракула чылап базып јӱрӱ» ле ол нени эдерге албаданат?

³ Је кӧскӧ кӧрӱнбес кезик јайаандар улустыҥ сууга  чӧҥӱрилгенин кӧрӱп, тыҥ калјуурып јадылар. Сатана ла оныҥ кӧрмӧстӧри быјарсыган телекейдеҥ чыгып турган муҥдар тоолу улусты кӧрӱп, айдары јок ачуурканадылар. Нениҥ учун дезе Сатана улустыҥ кемизи де Иеговага акту јӱрегинеҥ иштебей јат ла јаан ченелтелер тушта Кудайга кем де чындык артпас деп маказырап айткан. (Иов 2:4, 5 кычыр.) Иеговага кем-кем јӱрӱмин учурлап јатканыла Сатананы тӧгӱнчи деп кӧргӱзип јат. Анайып, сӱрлеп айтса, Сатана кажы ла неделеде јаагына муҥдар катап тажыдып јат. Оныҥ учун Сатананыҥ «кемди јуда салайын деп бедиреп, ыркыранган каракула чылап базып јӱргени» кайкамчылу эмес (Петрдыҥ 1-кы самаразы 5:8). Бу «каракула» Кудайла бистиҥ колбуларыс ӱрелип калзын деп эмезе бисти Кудайдаҥ чек туура јӱре берзин деп, кӧгӱс јанынаҥ јуда саларга албаданат (Сарын 7:1, 2; 2 Тимофейге 3:12).

4, 5. а) Иегова Сатананыҥ каршузы не ле немеге јетпезин деп нени эткен? б) Чындык христиан кижи неде алаҥзыбас аргалу?

 ⁴ Бис калју ӧштӱле де тартыжып турган болзоос, ӧйинеҥ ӧткӱре коркыбас керек. Нениҥ учун? Не дезе Иегова бу «ыркыранган каракулага» не ле немеге каршузын јетиретен јайым бербеген. Канайып? Баштапкызында, јууктап келеткен «ачу-коронды [улу тӱбекти, ЈТ]» «кара-бајырт» чындык христиандар ӧдӱп чыгар деп, Иегова судурлап айткан (Ачылта 7:9, 14). Кудайдыҥ судурлары јаантайын бӱдет. Оныҥ учун Иегова Кудайдыҥ бастыра албатызын бойына бактырып болбозын Сатана да билер.

⁵ Экинчизинде, Кудай Сатананыҥ каршузы не ле немеге јетпезин деп јайым бербегени јебрен ӧйдӧ Кудайга чындык болгон ишчиниҥ сӧстӧринеҥ кӧрӱнет. Судурчы Азария Аса каанга мынайып айткан: «Иеговала кожо болзогор, Ол до слерле кожо болор» (2 Летопись 15:2; 1 Коринфтегилерге 10:13 кычыр). Кудайла јуук колбуларын кичееп турган улусты Сатана качан да јудып болбогоны озогы ӧйдиҥ темдеринеҥ кӧрӱнет (Еврейлерге 11:4—40). Бӱгӱнги кӱнде Кудайла колбулары јуук христиан кижи Сатанага удура туруп, оны јеҥип те алар аргалу. Кудайдыҥ Сӧзи бисти: «Кӧрмӧскӧ удура турыгар, ол слердеҥ кача берер» — деп бӱдӱмјилеп јат (Иаковтыҥ самаразы 4:7).

6. Сатана кажы ла христиан кижиле канайып тартыжат?

⁶ Сатана кӧгӱс тартыжуны јеҥип болбос, је бис сергелеҥ болбозобыс Сатанага јем болуп калардаҥ айабазыс. Ол бисти јудып аларга, Иеговала курчубысты уйададарга албаданат. Ол мындый амадузына канайып јединет? Калју табарулар эдет, кажы ла кижиле тартыжат, куурмакту керектер эдет. Сатананыҥ бу ӱч аргазын кӧрӱп ийеектер.

7. Сатана Иегованыҥ Керечилерине нениҥ учун калју табарулар эдет?

 ⁷ Калју табарулар. Элчи Иоанн бичиген: «Телекей дезе бӱткӱлинче јаманныҥ табында» (Иоанныҥ 1-кы самаразы 5:19). Бу сӧстӧр ончо чындык христиандарга чеберлензин деп бичилген. Сатана кудайы јок бӱдӱн телекейди јудып алган болордо, эмди ого багынбаган улусты — Иегованыҥ Керечилерин јудып аларга, ол оноҥ тыҥ калју табарулар эдип баштаган (Михей 4:1; Иоанн 15:19; Ачылта 12:12, 17). Ӧйи ас болгонын билип, ол коркышту тыҥ атыйланып, табаруларын там тыҥыдып јат. Бӱгӱнги кӱнде ӧйи тӱгенгелекте, Кудайла јуук колбуларысты бузарга болуп, ол бастыра кӱчиле албаданат.

8. Бис кӧскӧ кӧрӱнбес калју тындарла «тартыжып» турганыс деп айдып, Павел нени айдарга сананган?

⁸ Кажы ла кижиле тартыжу. Элчи Павел ака-эјелерди корулаарга: «Бис... теҥеридеги јаманныҥ тындарына удура тартыжып јадыбыс» — деп айткан (Ефестегилерге 6:12). Павел тузаланган грек тилдеҥ кӧчӱрилген «тартыжу» деген сӧс тудужып кӱрежерин темдектейт. Анайып Павел бу сӧстиҥ болужыла, кӧскӧ кӧрӱнбес калју тындарла кажы ла кижи тартыжып јат деп кӧргӱзет. Бистиҥ јерде улус калју тындарга бӱдӱп те, бӱтпей де турган болзо, бис Иеговага јӱрӱмисти учурлап салганысла, кӱрежетен кебиске чыгып келгенис деп ундыбас учурлу. Кажы ла христиан кижи бу тартыжуда, ас ла салза, учурланганынаҥ ала тартыжып јат. Оныҥ учун Павелдиҥ Эфестеги христиандарды турумкай болзын деп јаҥыс катап кӱӱнзетпегенин кайкабай јадыс (Ефестегилерге 6:11, 13, 14).

9. а) Сатана ла оныҥ кӧрмӧстӧри нениҥ учун јӱзӱн-јӱӱр тузактар тузаланат? б) Нениҥ учун Сатана бистиҥ кӧрӱм-санаабысты ӱреп саларга албаданат, је бис оноҥ канайып коруланар аргалу? (« Сатананыҥ тӧгӱнинеҥ чеберлен!» деген рамканы кӧрӱгер.) в) Эмди кандый тузакты шӱӱп кӧрӧрибис?

⁹ Куурмакту керектер. Павел христиандарды Сатананыҥ «куурмакту керектерине» удура тартыжарына  кычырган (Ефестегилерге 6:11). Павелдиҥ бу сӧсти кӧп тоодо тузаланганын ајаруга ал. Калју тындардыҥ јӱзӱн-јӱӱр тузактарды тузаланганы тегиндӱ эмес. Кудайдыҥ ишчилериниҥ кезиги бир ченелтени ӧдӧ берзе, экинчизине тӱжӱп калат. Оныҥ учун Дьявол ло оныҥ кӧрмӧстӧри бистиҥ уйан јерлеристи табып аларга, кажыбысты ла ширтеп, кӧгӱс јанынаҥ уйан јерлеристи бойыныҥ амадузына тузаланат. Карын, бис Дьяволдыҥ тузактарына тӱшпес аргалу, нениҥ учун дезе олор керегинде Агару Бичикте бичилип калган (2 Коринфтегилерге 2:11). Бу бичикте мындый тузактарды шӱӱп кӧргӧнис: акча-јӧӧжӧгӧ тартылары, каршу јетиргедий улусла куучындажары ла балыр јӱрӱм јӱрери. Эмди Сатананыҥ база бир тузагын — спиритизмди кӧрӱп ийеектер.

10. а) Спиритизм ол не? б) Иегова спиритизмге кандый кӧрӱмдӱ, сениҥ кӧрӱмиҥ кандый?

¹⁰ Спиритизмле, ӧскӧртӧ айтса демонизмле, уружып турган кижи кӧрмӧстӧрлӧ кӧнӱ колбу тудат. Белгелеери, тарма, тармалап айткан сӧстӧр, ӧлгӧндӧрлӧ куучындажары — бу спиритизмниҥ јӱк кезик бӱдӱмдери. Бу ончо неме Иеговага јескинчилӱ болот (Јаҥды такыганы 18:10—12; Ачылта 21:8). Јаман керектерди бистер де кӧрӧр кӱӱнис јок болор учурлу, оныҥ учун калју тындарла колбу тудар арга бедиреери санаабыска да келбес керек (Римдегилерге 12:9). Олорло колбу тутсабыс, теҥеридеги Иегова Адабысты садып ийгенисти кӧргӱзер эдис!

11. Сатана кемди-кемди спиритизмле уружарына тартып алза, нениҥ учун сӱӱнер эди? Тем куучындап беригер.

¹¹ Је спиритизмле урушканы — Иегованы садып ийгени болгондо, Сатана кезигисти бу керекке кийдирерге умзанат. Христиан кижи демонизмле колбу тудуп баштаза, Сатана тыҥ сӱӱнип јат. Нениҥ учун? Мындый темди сананып ийзеҥ: эки черӱ бой-бойына удура туруп,  јуулажат. Бир черӱниҥ башчызы экинчи черӱниҥ черӱчилин садынып ийзин деп бӱдӱмјилеп, бойына тартып алза, ол тыҥ сӱӱнип јат. Ол керек дезе черӱниҥ башчызын уйаттап јамандаарга, садынып ийген кижиле мактанар да эди. Анайып ла христиан кижи спиритизмле уружып турза, ол биле тура Иегованаҥ јана базып, Сатанага садынып јат. Сатана садынган кижиле канайып сӱӱнип мактанбас эди! Дьявол јеҥип алганына сӱӱнзин деп, бистиҥ кемибис-кемибис кӱӱнзеер беди? Јок, эмей! Бис садынчак улус эмезис.

12. Сатана спиритизмге бистиҥ кӧрӱмисти солыырга, кандый эп-арга тузаланат?

¹² Спиритизмди кӧрӧр кӱӱнис јок болзо, Сатана ого бисти качан да тартып болбос. Оныҥ учун ол бистиҥ санаабысты солыырга албаданат. Канайып? Сатана бисти «јакшыны јаманнаҥ, јаманды јакшынаҥ» ылгаштырып болбозын деп, кандый ла аргалар тузаланат (Исаия 5:20). Оныҥ озодоҥ бери тузаланып келген эп-аргазы — алаҥзуга экелетен сурактар.

13. Сатана алаҥзуга экелетен сурактарды канайып кӧдӱрет?

¹³ Сатана бу эп-аргала озогы ӧйдӧ канайып тузаланганына ајарып ийзеҥ. Эдем садта ол Еванаҥ: «Садтагы агаштардыҥ бирӱзиниҥ де јиилегин Кудай слерге јидиртпей турганы чын эмеш пе?» — деп сураган. Иовтыҥ ӧйинде, теҥериде ангелдер јуулыжып турарда, Сатана: «Иов Кудайга акту јӱрегинеҥ иштеп турган эмеш пе?» — деп сурак кӧдӱрген. Иисус јерде иштеп баштаарда, Сатана Оны мынайып ченеген: «Сен Кудайдыҥ Уулы болзоҥ, бу таштарга калаш боло берзин деп айт». Бу учуралда Сатана Иегованыҥ алты неделе озо: «Бу Мениҥ сӱӱген Уулым, Оныҥ Бойында Мениҥ јакшылыкту табым» — деп айткан сӧстӧрине ӧчӧп каткырганын сананып ийзеҥ (Башталганы 3:1; Иов 1:9; Матфей 3:17; 4:3).

14. а) Сатана спиритизм јанынаҥ улустыҥ санаазын канайып булгап јат? б) Бис эмди нени шӱӱп кӧрӧрис?

 ¹⁴ Бӱгӱнги кӱнде Сатана бу эп-аргала спиритизм каршу јетирбей турган деп кӧргӱзерге тузаланат. Анайып ол кезик христиандардыҥ санаазын булгап салган. Мынаҥ улам олор спиритизмниҥ кезик бӱдӱмдери каршу јетирбей јат деп сананат (2 Коринфтегилерге 11:3). Мындый христиандарга санаазын солыырга канайып болужар? Сатана бистиҥ санаабысты анайып булгабаган деп, канайып бӱдӱмјиленер? Бу сурактыҥ каруузын билип аларга, Сатананыҥ куурмакту тӧгӱнинеҥ улам, соот-јыргалдарга ла су-кадыкты кичеерине кирип калган спиритизмниҥ бӱдӱмдерин кӧрӱп ийеектер.

15. а) Кӱнбадыш ороондордо спиритизмге улустыҥ кӧрӱми кандый? б) Мындый кӧрӱм кезик христиандарга кандый салтарын јетирген?

¹⁵ Анчада ла кӱнбадыш ороондордо оккультизмди, тарманы ла спиритизмниҥ ӧскӧ дӧ бӱдӱмдерин улус там ла керекке албай барган. Кинолордо, бичиктерде, телеберилтелерде ле компьютерный ойындарда демонизм јилбилӱ ле каршу јок деп кӧргӱзилет. Оккультизмле колбулу кезик кинолор ло бичиктер улуска сӱрекей тыҥ јарап јат. Чындап та, кӧрмӧстӧр улусты оккультизмнеҥ каршу болбой јат деп бӱдӱмјилеп салган. Христиандар база мынайып сананат па? Кезиги анайып сананып баштаган. Мындый тем кӧрӱп ийеектер: бир христиан кижи оккультизмле колбулу киноны кӧрӧлӧ, мынайып айткан: «Мен кино кӧрдим, спиритизмле урушпадым». Мынайып сананганы нениҥ учун каршулу?

16. Оккультизмле колбулу соот-јыргалды талдаары нениҥ учун каршулу болот?

¹⁶ Спиритизмле уружары ла оныла уружып турганын кӧрӧри эки башка неме де болзо, је оккультизмле колбулу  керектерди кӧрӧри каршулу эмес деп сананбас керек. Нениҥ учун? Агару Бичикте Сатана да, оныҥ кӧрмӧстӧри де бистиҥ санаабысты кычырып болбос деп айдылат *. Оныҥ учун калју тындар, ӧрӧги айдылганыла болзо, бистиҥ не керегинде сананып турганысты билип аларга ла кӧгӱс уйан јерлеристи таап аларга, эдип турган керектеристи ле талдап турган соот-јыргалдарысты лаптап кӧрӱп јадылар. Христиан кижи тармаачы улусту, ӧзӧк-буурына кӧрмӧстӧр кирген улусту ла тармалап айткан сӧстӧрлӱ кинолор кӧрӱп эмезе бичиктер кычырып турган болзо, кӧрмӧстӧр андый кижиге не јарап турганын билип алат. Анайып ол бойыныҥ уйан јерин кӧргӱзип берет. Мынаҥ улам кӧрмӧстӧр андый кижиниҥ уйан јериле тузаланып, оныла оноҥ тыҥ тартыжат, сӱрлеп айтса, оны јарынына јыгып ийерге албаданат. Кезик христиандар оккультизимле колбулу соот-јыргалдарды талдаганынаҥ улам, спиритизмле јилбиркеп, учы-тӱбинде оныла уружып баштаган. (Галаттарга 6:7 кычыр.)

17. Кандый бир оорула ооруп турган улустыҥ айалгазыла Сатана канайып тузаланардаҥ айабас?

¹⁷ Сатана бистиҥ јӱк ле соотонор кӱӱнисти эмес, је су-кадыгысты кичеер керексинижисти де бойыныҥ амадузына тузаланарга албаданат. Канайып? Су-кадыгы уйадап бараткан христиан кижи эмденетен јакшы эп-арга бедиреп тура, чӧкӧп баштаар болор (Марк 5:25, 26). Сатана ла оныҥ кӧрмӧстӧри мындый айалганы тузаланардаҥ айабас. Олор андый кижини кӧрмӧстӧрдиҥ кӱчиле, ол эмезе спиритизмле, эмденип турган процедураларды тузаланарына кӱӱнзедер болор (Исаия 1:13). Кӧрмӧстӧрдиҥ мындый тузагы иштей берзе, ооруп турган христиан кижиниҥ Иеговала колбулары уйадай берер болор. Канайып?

18. Христиан кижи эмденетен кандый эп-аргалардаҥ ла процедуралардаҥ кыйар учурлу ла нениҥ учун?

 ¹⁸ Кӧрмӧстӧрдиҥ кӱчине баштанып турган израильтяндарга Иегова мынайып айткан: «Колыгарды сунуп, болуш суразагар, Мен туура кӧрӧдим. Слер кӧп мӱргӱп те турган болзогор, Мен укпай јадым» (Исаия 1:15). Бис јаантайын, керек дезе ооруп та турзаас, мӱргӱӱлиске чаптык јетиргедий ле Иегованыҥ болужын аларга буудак болгодый керектердеҥ кыйарга кӱӱнзейдис (Сарын 41:3). Оныҥ учун диагностика ӧткӱрип турган кандый бир процедура эмезе эмденетен эп-арга спиритизмле колбулу болзо, чындык христиан оны тузаланбас учурлу (Матфей 6:13) *. Мындый айалгада Иегова ого алаҥзу јогынаҥ болужар. (« Бу чын спиритизм бе?» деген рамканы кӧрӱгер.)

19. а) Дьявол бойыныҥ кӱчи керегинде улусты неге бӱдӱндирип салган? б) Чындык христиандар кандый куучындарды таркатпас учурлу?

¹⁹ Кӱнбадыш ороондордыҥ улузы Сатананыҥ каршузын керекке албай турган болордо, је ӧскӧ ороондор бу  јанынаҥ чек ӧскӧ кӧрӱмдӱ. Бу ороондордо Дьявол кӧп улусты аскыртып, оноҥ кӱчтӱ неме јок деп бӱдӱндирип салган. Је чынынча болзо, андый эмес. Кезик улус уйуктап та, ажанып та, иштенип те јатса калју тындардаҥ коркып јӱрет. Кӧрмӧстӧрдиҥ улу керектери керегинде куучындар элбеде таркап калган. Андый куучындарды коркышту јилбилӱ эдип куучындагылайт, а улус олорды јакшызынып угат. Бис андый куучындарды таркадарыс па? Јок, Кудайдыҥ чындык ишчилери эки јаан шылтактаҥ улам андый немени куучындабайдылар.

20. Кем-кем билбес аразынаҥ Сатананыҥ ӱредӱзин канайып таркадар болор?

²⁰ Баштапкы шылтак — кӧрмӧстӧр керегинде куучындап турган кижи Сатананыҥ кӱӱнин бӱдӱрип јат. Канайып? Агару Бичикте Сатана улу керектер эдер аргалу деп бичилет, је бого ло коштой ондо ол «тӧгӱн... билдилерле» тузаланат деп айдылганын ундыбас керек  (2 Фессалоникадагыларга 2:9, 10). Сатана — сӱмелӱ тӧгӱнчи болордо, спиритизмге тартылып турган улустыҥ санаа-укаазына канайып салтарын јетиретенин ле тӧгӱнге бӱдӱп баштазын деп нени эдетенин јакшы билер. Андый улус кӧргӧн-укканын чын неме деп бӱдӱп, улуска куучындап јадылар. Мынаҥ улам калју тындар керегинде куучындар там ла кӧпчип барат. Христиан кижи андый немелерди куучындап турза, Сатананыҥ, «тӧгӱнниҥ адазыныҥ», ӱредӱзин таркадып турган болот (Иоанн 8:44; 2 Тимофейге 2:16).

21. Бистиҥ куучыныс не керегинде болор учурлу?

²¹ Экинчи шылтак — христиан кижи алдында чыннаҥ ла калју тындарла колбу туткан болзо, ол андый учуралдарын ака-эјелерге такып-такып куучындабай јат. Нениҥ учун? Агару Бичик бисти Иисустаҥ тем алзын деп кӱӱнзедет. «Ол ажыра Кудайга бӱдӱп баштайдыс, бӱдӱп јӱргенис толо кемине једет» (Еврейлерге 12:2). Бистиҥ куучыныс Сатана керегинде эмес, Христос керегинде болор керек. Темдектезе, Иисус јерде болордо, Сатананыҥ керектери керегинде кӧп куучындап берер аргалу да болгон болзо, Бойыныҥ ӱренчиктерине калју тындар керегинде куучындабаган. Карын, Каандык керегинде јарды куучындаган. Айдарда, бис Иисустаҥ ла элчилердеҥ тем алып, «Кудайдыҥ улу керектери» керегинде куучындаарга кӱӱнзейдис (Апостолдордыҥ ижи 2:11; Лука 8:1; Римдегилерге 1:11, 12).

22. Теҥериде сӱӱнчи болзын деп, бис оноҥ ло ары нени эдерибис?

²² Сатана Иеговала бистиҥ колбуларысты бузарга болуп, сӱмелӱ кандый ла эп-аргаларла, ол тоодо спиритизмле тузаланат. Бис јаманды кӧрӧр кӱӱнис јок болуп, чындыктаҥ тудунзаас, спиритизмниҥ кандый ла бӱдӱмдеринеҥ кыйарга бек шӱӱп алганыска Сатана каршу јетирзин деп арга бербей јадыс. (Ефестегилерге 4:27 кычыр.) Сатана јоголбогончо, оноҥ ло ары оныҥ «куурмакту керектерине удура» турзабыс, теҥериде улу сӱӱнчи болот деп сананып ийзеҥ! (Лука 15:7; Ефестегилерге 6:11).