1, 2. Kátaña san agundaarubaña dan le harihiniña gürigia abadiseira?

BARÜHADÜN san saragu irumu eseriwida lun Heowá? Anhein ítara liña lubéi, chóuruti ñǘdünhadün lan aganba saragu yanu lánina badisei. Gama lumoun, meberesenga átirihali lan wéiyaasu haganbuni, gúndaaguagüdameme lágiru hanigi, harihiniña ha lunbaña habadiseirun rara lun hagufeserun hagibugiñe súngubei luagu aranseeña lan lun habadiseirun. Dan le lasuseredun katei le, aba hapouhani sun gürigia háhabu lau aban óunwenbu ugundani, gayarati giñe labuinchun hagu lau águiraü, ladüga ugundani le hasandirubei lau harihini luéigiñe haaña lan lóubadina Heowá ábaya sétanu gürigia. Ma lueirin wagundan lidan burí ókaasion le!

² Libe-agei dan, ariha wamuti katei le fiúrügü wéiyaasu lidan irumu, ánhañati ánheligu ariha hamuti gabügürügua. Gayarati san wasaminarun luagu lueirin “ugundani sielu”, dan le harihini hebelurun saragu milu iseri gürigia úaraguatiña lídangiñetiña sun ubóu lidoun lóundarun Heowá sagü dimaasu? (Lúkasi 15:7, 10.) Chóuruti, weiri lan hagundan ánheligu ladüga aganwoundeina liña lan fánreinti le ubouagubei lídangiñe lóundarun Heowá (Ahéu 2:7).

3. Ka san uagu éibugañahadügü liña lubéi Mafia “keisi liñún gáñiti” ani ka labusenrubei libihin?

³ Gama lumoun, másutiña ánheligu agundaara lau  híchuguni saragu gürigia hanagan luagun ubóu wíyeti le, ani badisei hagía. Wéiriti ligañi Satanási hama lumáfianu. Darí lun lariñagun Satanási luagu meseriwidunbaña lan gürigia lun Heowá lau ínsiñeni inarüniti, ani siñabei lan hakipurun úaraguni lun dan le hásügürün lénrengunga (aliiha huméi Hobu 2:4, 5). Ligíati, sagü desidírü lan aban gürigia lederegeruni libagari lun Heowá, larufuduñein yee lan Satanási. Ítara liña kamá hamuga lichugúña saragu milu agufudein luagu sagü dimaasu, ligíati éibugañahadügü liña lubéi “keisi liñún gáñiti áluaha kaba lan lagünrinchagua” (1 Féduru 5:8). Busenti “liñún” le, lagadeiruni o ladüraaguni wamadagua luma Heowá sunsuinagubei (Sálumu 7:1, 2; 2 Timotéu 3:12).

4, 5. a) Ka biama katei súdiniti mígirun lubéi Heowá lun ladügüni Satanási? b) Ka ichouruni tíchugubei Bíbülia houn kristiánugu?

⁴ Íbini wagagibudaguña lan luma “liñún” gáñiti le, mébunati  wanufudedun luéi. Lugundun anihein bián katei súdiniti le mígirun lumuti Heowá lun ladügüni. Furumiñe, maweiyasunbei Satanási agumucha hau sun lumutuniña Bungiu. Ani chóuruti subudi lani Satanási katei le, ladüga ariñagati lani Heowá profesía luagu herederuba lan “saragu gürigia” kristiánugu inarünitiña wínwanñu lárigiñe “óunwenbu asufuriruni”, ani súnwandan lagunfuliruni Heowá sun le lariñagubei (Arufudúni 7:9, 14).

⁵ Libiaman, siñabei lagünrinchagun Satanási ni aban gürigia le erederuti yarafa lun Heowá. Subudi wamuti katei le ladüga ariñagati meha profeta úaraguati Asaríasi lun urúei Asá: “Húmañein Wabungiute [Heowá] anhein lúmañadün lubéi” (2 Krónikasi 15:2; aliiha huméi 1 Korintuna 10:13). Anihein saragu hénpulu tidan Bíbülia hawagu gürigia ha meha lásiñarubaña Satanási agünrinchagua ladüga herederun yarafa lun Bungiu (Ebüréu 11:4-40). Ánhawa giñe eredera yarafa lun Bungiu kei hagía webedaaguba lun luma Mafia ani wagañeirubei giñe. Ítara liña tachoururuni Bíbülia woun: “Gagibugua humá luma Mafia, ábame lanurahan huéi” (Santiagu 4:7).

6. Ida liña lóuchun Satanási ladügün lun lábürühan kada kristiánu?

⁶ Maweiyasunbei Mafia agañeirei wuribu kóntüra lumutuniña Bungiu. Gama lumoun, gayarati ladügün lun lábürühan kada aban wádangiñe ánhawa magaradahan. Ida? Lau ledebilidagüdüni wamadagua luma Heowá lun lagünrinchaguniwa. Ligía layusurunbei tanarime burí sádara kóntüra kada aban wádangiñe, ani yusuti sádara lau sumadi. Akutiha wamá ǘrüwa tídangiñe lisadaran.

7. Ka uagu lagayuaha Satanási hawagu lumutuniña Heowá lau furundei?

⁷ Lanarime éibaahouni. Ariñagati apostolu Huan “lábugiñeñanu lan lubafu Mafia sun ha lánigubaña ubóu.” (1 Huan 5:19.) Anihein aban eweridihani houn kristiánugu inarünitiña  lidan dimurei burí le. Kei féridiguagüda laaña lubéi Satanási lílana ubóu —gürigia ha dísebaña luéi Bungiu—, eibu dan furundetimahali lageindagun kóntüra lumutuniña Heowá ha anurahaañabaña luéi darí guentó (Mikeasi 4:1; Huan 15:19; Arufudúni 12:12, 17). Wéiriti ligañi ladüga subudi lani murusunrügaali lan lidaani. Uguñe weyu, wagagibudaguña luma lagumuhóun lagayuahan, ligíati wéiritimahali lubéi láfaagun lun lagünrinchaguni wamadagua luma Bungiu.

8. Ka mini lubéi lariñagun Pábulu ‘wageidaguña’ lan hama sífirigu gabafutiña?

⁸ Lageindagun kada gürigia. Abürühati apostolu Pábulu houn kristiánugu: “Hama burí sífirigu gabafutiña ha lánina wuribani yágüta iñu wageindagua” (Éfesuna 6:12). Ka san saminaü labusenrubei Pábulu lafuranguagüdün lau dimurei ‘ageindagua’? Dimurei güriegu le layusurubei, ladimurehaña luagu aban ageindaguni ñein lubéi hárügüdagua bián gürigia. Ítara liña lafunranguagüdüni Pábulu luagu wageindaguña lan kada aban wádangiñe hama máfianu. Meberesenga anhein wawinwanduña lubéi lidan aban ageiraü le ñein lumuti afiñe hamá gürigia o mafiñe hamá hawagu sífirigu wuribatiña, moun lumuti wabulieiduni dan lan le wederegerunbalin wabagari lun Heowá ítara liña kamá hamuga wagumeseruña aban ageindaguni. Ligíati, lúmagiñe wabadiseirun wageindaguña. Ligía maweiridun tubéi wanigi lau lariñagun Pábulu ǘrüwa wéiyaasu houn kristiánugu Éfesuna lun derebugu hamá (Éfesuna 6:11, 13, 14).

9. a) Ka uagu layusurunbei Satanási hama lumafianu ámuñegueinarügü manera lun leyeeduniwa? b) Ka uagu loucha Mafia lagadeiruni ligaburi wasaminan, ani ida luba wararamun lun? (Ariha huméi kuaduru “ Duari wamá tuéi lisadaran Satanási!”.) c) Kaba sádara wakutiha?

⁹ Sádara lau sumadi. Ariñagati Pábulu houn kristiánugu lun mígirun hamá lun ‘leyeedaguniña’ Satanási (Éfesuna 6:11). Dimurei güriegu le layusurubei Pábulu le ásügürawagüdübei kei “leyeedagunün” mini lan yusu lan Satanási hama lumafianu saragu manera lun heyeeduniwa. Ani subudi hamuti ka lan uagu hadügei. Ladüga arihaaña luagu awanda hamani  fiú kristiánugu aban luwuyeri óuchawaguni gama lumoun ábürühatiña lidoun amu. Ligía letenirunbei Satanási hama lumafianu aríaguei kada aban wádangiñe lun harihini ka lan idan débili wamá. Lárigiñe, aba hayusuruni débili ligía lun hagadeiruni wamadagua luma Bungiu. Seremei subudi wamani ka lan burí sádara hayusuruboun, lugundun ariñaga tumuti Bíbülia woun (2 Korintuna 2:11). Tidan líburu to, akutihadiwa fiú tídangiñe lisadaran, kéiburi ínsiñeni lun umegeguni, hagübüri umadagu luma magíaguni. Guentó, adimureha wamá tuagu amu: abiñarahani luma katei líbeina lira.

10. a) Ka burí échuni aubei hádaragua gürigia houngua hamoun máfianu? b) Ida liña larihini Heowá aríaagüdüni, abiñarahani, o katei líbeina lira, ani ida liña harihin lun?

¹⁰ Anihein aríaagüdüni, abiñarahani, ladimurehóuniwa hama hilaaña o katei líbeina lira lidan katei hani máfianu. Le adügüti katei kéiburi le, léiguaduña labun habafu máfianu. Ani subudi wamuti “iyereeguti” lan katei burí le lun Heowá (2 Lúrudu 18:10-12, TNM; Arufudúni 21:8). Keiti ariñaga lubéi Heowá houn kristiánugu lun: “Iyereegulá wuribani hun”, maweiyasunbadiwa agarabaagua lun lau wádaragun woungua hamoun máfianu (Rómana 12:9). Mínsiñegubeiti woun ni lun wasaminaruni.

11. Kaba hamuga óunwenbu agañeiruni libiha Satanási anhein ibiha lun wádaragun woungua lidoun katei hani máfianu? Afuranguagüda huméi lau aban hénpulu.

¹¹ Aban óunwenbu agarabaaguni kóntüra Heowá wádaragun woungua lidoun katei hani máfianu. Ligía ladügünbalin Mafia sun liyaraati lun gádan lániwa figóu le. Sagü libihin Satanási lun léiguadun aban kristiánu lidoun katei burí le, libihiña aban óunwenbu agañeiruni. Ka uagu? Samina wamá luagu aban súdara: Anhein hamuga adüga gasu lau lagani ábati lagarabaagun houn lupaanágu, weiribei hamuga lagundaarun iseri labuti, háfuga larufuduñein lan hamuga lun  gumadan le meha lábuti súdara le, kei aban agañeiruni lun lünabudagüdüni. Ítarameme, anhein desidírü aban kristiánu ládaragun lungua lidoun abiñarahani, aríaagüdüni o katei líbeina lira, lagarabaaguña lun Heowá ani léiguaduña labun lubafu Satanási. Ma hamuga lugundan Mafia ladüga gayara lan larufuduni kristiánu ligía kei aban agañeiruni lidan wuribu! Busentiwa hamuga san wíchuguni ugundani le lun? Uá! Mama gürigia ha agarabagubaña lun Heowá wagía.

12. Ka sádara layusurubei Satanási lun libihin lun wasansiruni wasaminan luagu katei hani máfianu?

¹² Anhein iyereegu lubéi katei hani máfianu woun, mádaragunbadiwa woungua lidoun. Subudi lumuti Satanási katei le, ligía lóuchunbei lun wasansiruni le wasaminarubei. Ida? Lau layuridaguagüdüniwa lun wagúarun “lun le buídubei wuribati, [...] lun le wuribabei buiti” (Isaíasi 5:20). Libe-agei dan yusuti aban sádara to rúharu buiti resultóu lun: belugüdati álügüdahani lidoun wasaminan lun machourun wamá luagu inarüni.

13. Ru humá fiú hénpulu luagu ligaburi ladügün Satanási lun machoururuniwa lan luagu inarüni.

¹³ Ariha wamá fiú hénpulu lánina layusurunu Satanási sádara to. Lidan meha paraísu aba lálügüdünu Ewa: “Lariñahare lubeiti Bungiu hun lun meigin humá tídangiñe tin ni aban tídangiñe tídibu wewe ya fuluri-ágeirugu?” Saragu dan lárigiñe, aban lebelurun lidan hadamuridagun ánheligu sielu aba lariñagun luagu Hobu: “Mama ítaraguarügü leseriwidunbei Hobu lau úarani [lun Bungiu]”. Ani dan le lagumeserunbalin Kristu lani ministeriu ya ubouagu, aba lariñagun Satanási lun: “Anhein liráü bubéi Bungiu, saliguagüdabéi dübü le feinme”. Lau lariñaguni dimurei le ladügüña bula lau le lariñagubei Heowá kéiburi sisi dimaasu lubaragiñe: “Anihán niráü le hínsiñebei nun, le aubei óunwenbu lan nugundan” (Agumesehani 3:1; Hobu 1:9; Matéu 3:17; 4:3).

14. a) Ida liña libihin Mafia lun wálügüdagun woungua anhein inarüni lubéi wuriba lan abiñarahani o katei líbeina lira? b) Kaba san katei wakutiha?

 ¹⁴ Uguñe weyu, yusu lumutu tugiaméme sádara, kéiburi dan ladügün lun wálügüdagun woungua, anhein inarüni lubéi wuriba lan abiñarahani, o katei líbeina lira. Ma lírun ibihaali lan lun héiguadun fiú kristiánugu tidoun sádara to. Ítara liña kamá hamuga hálügüdaguña houngua anhein le lubéi lúgubu wuriba lan (2 Korintuna 11:3). Kaba san wariñaga houn lun wíderaguniña aransehei ligaburi hasaminan? Ani kaba íderaguawa luéi wéiguadun tidoun sádara to? Lun wóunabuni álügüdahani le, akutiha wamá bián katei le ídounbei ládaha Satanási katei burí le hani máfianu: isebáhari luma agaranihani.

15. a) Ida liña larihíniwa abiñarahani o katei líbeina lira, lidan burí ageiraü le Yuropabei luma le Merigabei? b) Ka efekütu lánibei ligaburi hasaminarun ubouaguna luagu abiñarahani hawagu fiú kristiánugu?

¹⁵ Eibu lásügürün dan maribantimahali harihini gürigia abiñarahani o katei líbeina lira, lídantima ageiraü le Yuropabei luma le Merigabei. Gíbetimahali pelikula, líburu, programa luma bideu lánina huraraü le ídanbei larufudúa échuni hani máfianu kei katei le buiti lun isebáharime, le madügünti dañu ani buiti larihín. Komuntimaatu líburu burí luma pelikula to adimurehaboun luagu abiñarahani o katei líbeina lira. Chóuruti ibihaaña lan máfianu lun hasaminarun gürigia manarimedigia lan peliguru lidan katei hani mafianu Adügaaña san lun hasaminarun fiú kristiánugu ítara? Anha. Ida? Aban hénpulu komunti: Lárigiñe larihin aban kristiánu aban pelikula le gaganati abiñarahani aba lariñagun: “Anha, ariha numutu pelikula, gama lumoun mama nádaraguña nungua lidoun katei hani máfianu lau lira”. Ka san uagu peliguru lubéi saminaü le?

16. Ka uagu peliguru lubéi wanúadahan isebáhari le gaganati katei le hani máfianu?

 ¹⁶ Inarüni lau lan warihini katei burí le hani máfianu mama lan wadügüñein; gama lumoun, mama luéigiñe ariaguarügü wamani, lun úabei lan peliguru lan. Ka uagu? Samina humá, ariñagatu Bíbülia siñati lan laliihani Satanási ni máfianu wasaminan. * Ligíati, kei busén habéi máfianu hasubudiruni ka lan wasaminarubei luma furumiñeguarügü débili lidan wamadagua luma Bungiu, ligía haríagunbalin sun le wadügübei, íbini katei le wadügübei lidan isebáhari. Dan le larufuduni aban kristiánu hínsiñe tan pelikula o líburu to ayanuhatu hawagu gürigia ha gawagutiña máfianu, abiñarahani, luma abuyeihani, o katei líbeina lira, larufuduñein lidebilin houn máfianu! Ani hárügüdüña hamugati máfianu chansi luagu lidebilin kristiánu ligía, lau héredagüdüni hageindagun luma darí lun hagañeiruni. Añahein somu kristiánu aba línsiñedun isebáhari le gaganati katei hani máfianu houn darí lun hagumeserun ádaragua houngua lidoun (aliiha huméi Galasiana 6:7).

17. Ka sádara layusuruboun Satanási hawagu ha sándibaña?

¹⁷ Mámarügü lidan wayumahan isebáhari lanüga Satanási chansi wawagu, hóuchati giñe lanügün chansi lidan katei lánina átuadi. Ida? Gayarati wuriba lan lasandiragun aban kristiánu lungua lau larihini móuchaadagun lan íbini áfaaguali lan saragu lun lareidagun (Márükosu 5:25, 26). Gayarati hanügün máfianu chansi luagu kristiánu ligía ladüga katei le. Ligíati, gayaraati hábürügüdüni máfianu sánditi le wéiribei idiheri lidoun óuchawaguni lun maganbadi lan lun le tariñagubei Bíbülia lun lánharun lun árani o agaranihani le ídanti layusurúa habafu máfianu (Isaíasi 1:13). Anhein éiguada  tidoun sádara to, lagadeiruñein hamuga lumadagua luma Bungiu. Ida?

18. Ka burí agaranihani unbei hamahara kristiánugu, ani ka uagu?

¹⁸ Ruti meha Heowá eweridihani houn binadu ísüraelina ha meha ayusurutiña lubafu aríaagüdüni, ariñagati houn: “Dan le hiñuruni húhabu lun hafurieidun, digí numuti narihin huéi; ani íbini hafurieidun saragu maganbun numutün” (Isaíasi 1:15). Chóuruti mabusenrúntiwa lan wadügün ni kata le adügübei lun lamaharun Heowá laganbuni wayumuragun ni lun lagidaruni lídehan wawéi, dan létima sándiñadiwa lan (Sálumu 41:3). Ligíati, dan le subudi lani aban kristiánu luagu gagana lan agaranihani ligía, hárani garíaahatiña, máhati lun (Matéu 6:13). * Ítarati meferidirun wabéi lufulesein Heowá (ariha huméi kuaduru “ Hámagiñeti funa san máfianu?”).

19. a) Ka lisadaran Satanási to ídanboun héiguada saragu gürigia? b) Ka luwuyeri abahüdaguni moun lubéi wabahüdaguni wagía kristiánu ha inarünitiña?

¹⁹ Lidan burí ageiraü le Yuropabei luma le Merigabei mebereseguntiña gürigia lau peliguru lan lubafu Satanási, gama lumoun mítaranti lidan le líbiri ageiraü. Saragu  gürigia héiguaaña tidan lisadaran Satanási lau hafiñerun gabafutima lan. Ligíati, wínwantiña, hóutiña, nadagimeintiña ani arumugatiña gürigia hagía lau anufudei hawéi máfianu. Laganagua lira, hínsiñeti houn haganbahan luma habahüdahan abahüdaguni luagu habafu máfianu. Lunti san híchugun lubúeingu Bungiu inarüniti arigei lun abahüdaguni burí le o wabahüdaguni lan? Uá, ladüga bián resun súdiniti.

20. Ida liña hamuga waburuchaguagüdüni liyeeni Satanási ibidiñounga woun?

²⁰ Furumiñeti resun, wíderaguñein Satanási ánhawa abahüdagua luagu le hadügübei máfianu. Ida? Ariñagatu Lererun Bungiu gabafuti lan Satanási, ariñagatu giñe ladügüba lan “seini luma milaguru yeeti” ani ‘layusuruba lan sun luwuyeri iyeeni’ (2 Tesalónikana 2:9, 10). Ligíatima marasualuguti le tímatimaati, ani subudi lumuti lahandilihani hasaminan  gürigia ha hínsiñehabubaña lun abiñarahani. Ítarati, ibihati lun hafiñerun luagu arihaña lan o aganbaña lan katei le masuseredunti. Ñéingiñeti aba habahüdaguni kamá hamuga aban katei le susereti, ani ru hagía lanwoun. Anhein hamuga labahüdaha kristiánu abahüdaguni burí le, líderaguñein hamuga Satanási le ‘lúguchi iyeeni’. Waburuchaguagüdüñein hamuga liyeeni Satanási! (Huan 8:44; 2 Timotéu 2:16.)

21. Ka burí katei lunbei wadimurehan luagu?

²¹ Íbini anhein inarüni lubéi le lariñagubei aban kristiánu luagu añawuriha hamá meha máfianu lun, anihein aban libiaman resun lun mabahüdahan lani saragu wéiyaasu houn íbirigu. Busentiwa wetenirun lun Hesusu, mama lun Satanási. Mosu wíchuguni warihin “luagun Hesusu, le ídangiñebei liabin wafiñen, le giñe abuiduragüdübalin wafiñen” (Ebüréu 12:2). Dan le ubouagu lubéi meha, meteniti abahüdaha saragu hawagu sífirigu wuribatiña houn lani disipulugu, ani háfuga gíbeti meha ariñahani luma luagu katei burí le gayara lubéi o lásiñarubei Mafia adüga. Lubaragiñe lira aba letenirun lun uganu luáguti Larúeihan Bungiu. Áyeiha waméi Hesusu hama lánigu apostolu lau wadimurehan luagu katei burí le íchuguti iderebugu kéiburi “luagu luéirigun Bungiu” (Adügaü 2:11; Lúkasi 8:1; Rómana 1:11, 12).

22. Ida luba wídehan lun ñein lan “ugundani sielu”?

²² Kei aubei warihei, hóuchati Satanási lagünrinchaguni wamadagua luma Heowá lau layusurun ámuñegueinarügü sádara, kéiburi abiñarahani. Gama lumoun, anhein iyereegu katei burí le wuribabei woun, ani hínsiñe ligíame le buídubei woun, míchugunbadiwa chansi lun Mafia lun ledebilidagüdüniwa lidan desidírühadiwa lan maha wamá lun sun luwuyeri abiñarahani (aliiha huméi Éfesuna 4:27). Wéiribei “ugundani sielu” ánhawa asigira “deregüdagu [...] luéi leyeedagun[iwa] Mafia” darime lagumuchún lau! (Lúkasi 15:7; Éfesuna 6:11.)