1, 2. Kinsay malipay panahon sa mga pagbawtismo?

KON ikaw nag-alagad na kang Jehova ug daghang katuigan, lagmit nakadungog ka nag daghang pakigpulong sa bawtismo panahon sa atong mga asembliya ug kombensiyon. Apan bisag daghan ka nag natambongan, lagmit matandog ka gihapon inigkakita nimo nga manindog ang mga kandidato sa bawtismo diha sa atubangan. Nianang gutloa, mohugong ang hinagawhaw sa nahinam nga tumatambong, nga sundan sa kusog nga pagpamakpak. Manglugmaw tingali ang luha sa imong mga mata nga magtan-aw sa laing pundok sa bililhong mga tawo nga midapig kang Jehova. Pagkamakalilipay kanang mga panahona!

² Samtang pipila ra tingali ka pagbawtismo ang atong makita sa usa ka tuig sa atong dapit, ang mga manulonda makakitag daghan kaayo. Mahanduraw mo ba kon unsa ka dako ang “kalipay sa langit” inigkakita nila sa libolibong tawo sa tibuok kalibotan nga mahidugang matag semana sa makitang bahin sa organisasyon ni Jehova? (Lucas 15:7, 10) Walay duhaduha nga ang mga manulonda malipay gayod nga makakita niini nga pag-uswag!​—Haggeo 2:7.

3. Nganong si Satanas nagasuroysuroy “sama sa usa ka leyon nga nagangulob,” ug unsay gusto niyang buhaton?

³ Sa kasukwahi, adunay espiritung mga linalang nga magpangusmo sa kasuko inigkakita sa maong mga pagbawtismo.  Maglagot gayod si Satanas ug ang mga demonyo sa pagkakita sa libolibo nga motalikod niining dunot nga kalibotan. Kana gayod ang ilang bation kay nanghambog man si Satanas nga walay tawong moalagad kang Jehova tungod sa tiunay nga gugma ug walay magpabiling matinumanon ilalom sa grabeng pagsulay. (Job 2:4, 5) Matag higayon nga may tawong magpahinungod kang Jehova, si Satanas mapamatud-ang bakakon. Samag gisagpa si Satanas ug libolibo ka beses kada semana sa tibuok tuig. Bantog ra nga siya “nagasuroysuroy sama sa usa ka leyon nga nagangulob, nga nagapangitag matukob”! (1 Pedro 5:8) Gusto kitang tukbon niini nga “leyon” aron madaot o mabungkag ang atong relasyon sa Diyos.​—Salmo 7:1, 2; 2 Timoteo 3:12.

4, 5. (a) Unsa ang duha ka hinungdanong paagi nga gilimitehan ni Jehova ang impluwensiya ni Satanas? (b) Sa unsa makasalig ang matuod nga Kristohanon?

⁴ Bisan pag mabangis ang atong kaaway, dili ta angayng mahadlok.  Ngano? Kay gilimitehan ni Jehova ang impluwensiya nianang “nagangulob nga leyon” sa duha ka hinungdanong paagi. Unsa man kana? Una, gitagna ni Jehova nga ang “usa ka dakong panon” sa matuod nga mga Kristohanon makalabang-buhi sa umaabot nga “dakong kasakitan.” (Pinadayag 7:9, 14) Seguradong matuman ang mga tagna sa Diyos. Busa, bisan si Satanas nahibalo nga dili gayod siya makalimbong sa tanang alagad sa Diyos.

⁵ Ang ikaduhang paagi sa paglimite sa impluwensiya ni Satanas gipadayag sa sukaranang kamatuoran nga gisulti sa usa ka matinumanong alagad sa Diyos sa kakaraanan. Ang manalagnang si Azarias miingon kang Haring Asa: “Si Jehova magauban kaninyo basta kamo magauban kaniya.” (2 Cronicas 15:2; 1 Corinto 10:13) Gipakita sa daghang panig-ingnan nga nahisulat sa Bibliya nga wala gayod matukob ni Satanas ang mga alagad sa Diyos nga nagpabiling suod Kaniya. (Hebreohanon 11:4-40) Karong panahona, ang usa ka Kristohanon nga magpabiling suod sa Diyos makasukol ug makabuntog pa gani sa Yawa. Gani, gipasaligan kita sa Pulong sa Diyos: “Sukli ang Yawa, ug siya mokalagiw gikan kaninyo.”​—Santiago 4:7.

6. Sa unsang paagi makig-away si Satanas sa tagsatagsa ka Kristohanon?

⁶ Dili makadaog si Satanas niining simbolikong gubat, apan iya kitang mabiktima kon dili kita magbantay. Nahibalo siya nga iya kitang matukob kon mapahuyang niya ang atong relasyon kang Jehova. Sa unsang paagi naningkamot si Satanas sa paghimo niini? Pinaagi sa mapintas, personal, ug malinglahong pag-atake kanato. Atong hisgotan kining pangunang mga taktika ni Satanas.

7. Nganong mapintasong giatake ni Satanas ang katawhan ni Jehova?

⁷ Mapintas nga mga pag-atake. Si apostol Juan miingon: “Ang tibuok kalibotan nailalom sa gahom sa usa nga daotan.” (1 Juan 5:19) Kanang mga pulonga adunay pasidaan sa tanang matuod nga mga Kristohanon. Kay natukob na ni  Satanas ang tibuok kalibotan sa dili-diyosnong katawhan, ang iyang pag-atake ikapunting na karon sa mga nakaikyas pa kaniya, ang katawhan ni Jehova, ug himoon pa niya kining mas mapintas. (Miqueas 4:1; Juan 15:19; Pinadayag 12:12, 17) Dako kaayo ang iyang kasuko kay nahibalo nga hamubo na lang ang iyang panahon. Busa nangusog na siya. Nag-atubang na kita karon sa iyang pangataposang mabangis nga pag-atake ug pagpanglaglag. Busa, labaw kay sukad masukad, kinahanglan natong ‘mailhan ang mga panahon aron mahibaloan kon unsay angay [natong] buhaton.’​—1 Cronicas 12:32.

8. Unsay gipasabot ni apostol Pablo dihang siya miingon nga kita adunay “pakigdumog” batok sa daotang mga espiritu?

⁸ Personal nga pakigdumog. Si apostol Pablo nagpasidaan sa mga isigka-Kristohanon: “Kita adunay pakigdumog . . . batok sa daotang mga puwersa nga espirituhanon sa langitnong mga dapit.” (Efeso 6:12) Nganong gigamit ni Pablo ang pulong “pakigdumog”? Kay kini maoy manomano ug harongay nga pakig-away. Busa, pinaagi sa paggamit nianang pulonga, gipasiugda ni Pablo nga kita adunay personal nga pakig-away sa daotang mga espiritu. Kaylap man o dili ang pagtuo sa daotang mga espiritu diha sa nasod nga atong gipuy-an, dili gayod nato kalimtan nga sukad sa atong pagpahinungod kang Jehova, kita nalangkit na gayod sa espirituwal nga pakigdumog. Bantog rang gisublisubli pag-awhag ni Pablo ang mga Kristohanon sa Efeso nga ‘mobarog nga malig-on’!​—Efeso 6:11, 13, 14.

9. (a) Nganong mogamit man si Satanas ug ang mga demonyo ug lainlaing ‘malipatlipatong mga kaugdahan’? (b) Nganong naningkamot man si Satanas sa pagdaot sa atong hunahuna, ug sa unsang paagi makasukol kita sa iyang mga paningkamot? (Tan-awa ang kahon nga “ Pagbantay sa Panglingla ni Satanas!”) (c) Unsang malipatlipatong kaugdahan ang atong hisgotan karon?

⁹ Malinglahong mga taktika. Gitambagan ni Pablo ang mga Kristohanon sa pagbarog nga malig-on batok sa ‘malipatlipatong mga kaugdahan’ ni Satanas. (Efeso 6:11) Matikding gigamit ni Pablo ang pulong “mga.” Dili ra usa kondili daghang malinglahong paagi ang gigamit sa daotang mga espiritu, ug kana may katarongan. Sa lakat sa panahon, ang pipila ka magtutuo nga nakabarog sa usa ka matang sa pagsulay wala makabarog  sa laing matang. Busa, panid-an pag-ayo sa Yawa ug sa mga demonyo ang panggawi sa matag usa kanato aron makita ang atong espirituwal nga kahuyangan. Unya kana ang kanunay niyang puntiryahon. Apan maayo kay makaila kita sa daghang taktika sa Yawa kay gibutyag man kana sa Bibliya. (2 Corinto 2:11) Sa sinugdang bahin niining libroha, atong gihisgotan ang maong mga taktika sama sa panghaylo sa materyalismo, makadaot nga panagkauban, ug seksuwal nga imoralidad. Atong susihon karon ang usa sa malipatlipatong mga kaugdahan ni Satanas​—ang espiritismo.

10. (a) Unsay espiritismo? (b) Unsay panghunahuna ni Jehova sa espiritismo, ug unsay imong panghunahuna niini?

¹⁰ Pinaagi sa pagpakiglangkit sa espiritismo, o demonismo, ang usa direktang nakiglabot sa daotang mga espiritu. Ang pipila ka matang sa espiritismo mao ang pagpanagna, pagpamarang, panglamat, ug pagpakisusi sa mga patay. Nahibalo kita nga ang espiritismo maoy “dulumtanan” kang Jehova. (Deuteronomio 18:10-12; Pinadayag 21:8) Sanglit kita usab kinahanglang ‘masilag sa daotan,’ dili gayod kita makiglabot sa daotang mga espiritu. (Roma 12:9) Kana maoy pagtraydor sa atong langitnong Amahan nga si Jehova!

11. Nganong makapuntos si Satanas kon iya kitang malit-agan nga makiglangkit sa espiritismo? Iilustrar.

¹¹ Tungod kay ang pagpakiglangkit sa espiritismo maoy dakong pagtraydor kang Jehova, paningkamotan ni Satanas nga ang pipila kanato malangkit niana. Matag higayon nga ang usa ka Kristohanon iyang malit-agan nga makiglangkit sa demonismo, si Satanas makapuntos. Ngano? Hunahunaa kini nga pagtandi: Kon ang usa ka sundalo madani sa pagbiya ug pagtraydor sa iyang tropa ug moanib sa kontra, malipay ang komander sa kaaway nga kasundalohan. Mahimong iya pang ipasundayag ang maong traydor nga samag tropeyo aron mainsulto ang kanhi niyang komander. Sa susama, kon makiglangkit ang usa ka Kristohanon sa espiritismo, tinuyo ug kinabubut-on niyang  biyaan si Jehova ug magpasakop kang Satanas. Pagkamalipayon ni Satanas nga magpasundayag sa maong traydor nga samag tropeyo sa gubat! Buot ba natong ihatag sa Yawa ang maong kadaogan? Dili gayod! Kita dili mga traydor.

12. Unsay gamiton ni Satanas nga paagi aron mausab ang atong hunahuna bahin sa espiritismo?

¹² Basta masilag kita sa espiritismo, dili molampos si Satanas sa iyang paggamit niana batok kanato. Busa, siya nakaamgo nga kinahanglang usbon niya ang atong hunahuna. Sa unsang paagi? Mangita siyag mga paagi aron libogon ang mga Kristohanon sa punto nga ang pipila maghunahuna nga “ang maayo maoy daotan ug ang daotan maoy maayo.” (Isaias 5:20) Sa pagbuhat niana, sagad gamiton ni Satanas ang usa sa sinulayang mga paagi​—mogamit siyag mga pangutana nga magpatunghag pagduhaduha.

13. Sa unsang paagi gigamit ni Satanas ang mga pangutana aron magpatunghag pagduhaduha?

¹³ Matikdi kon giunsa paggamit kana ni Satanas sa nangagi. Sa Eden siya nangutana kang Eva: “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?” Sa panahon ni Job, dihang nagtigom ang mga manulonda sa langit, si Satanas nangutana: “Mahadlok ba sa Diyos si Job sa wala lamay kapuslanan?” Ug sa sinugdan sa ministeryo ni Jesus sa yuta, siya gihagit ni Satanas: “Kon ikaw anak sa Diyos, sugoa kining mga bato nga mahimong mga tinapay.” Tiaw mo kana​—sa kahimtang ni Jesus, nakapangahas si Satanas sa pagbugalbugal kang Jehova ginamit ang mga pulong nga gisulti mismo sa Diyos mga unom ka semana nga miagi: “Kini mao ang akong Anak, ang hinigugma, nga akong giuyonan”!​—Genesis 3:1; Job 1:9; Mateo 3:17; 4:3.

14. (a) Sa unsang paagi ang paggamit ni Satanas ug mga pangutana nagpatunghag pagduhaduha bahin sa espiritismo? (b) Unsay atong hisgotan karon?

¹⁴ Ang susamang paagi gigamit usab karon sa Yawa aron  magpatunghag pagduhaduha bahin sa pagkadaotan sa espiritismo. Ikasubo nga siya nagmalamposon sa pagpatunghag pagduhaduha diha sa kaisipan sa pipila ka magtutuo. Nagduda sila kon daotan ba gayod ang pipila ka matang sa espiritismo. Sila samag naghunahuna, ‘Tinuod ba?’ (2 Corinto 11:3) Unsaon nato pagtabang kanila aron mausab ang ilang panghunahuna? Unsaon nato pagpaneguro nga dili kita malingla ni Satanas? Aron matubag kana, hisgotan nato ang duha ka natad sa kinabuhi nga malinglahong gisagolan ni Satanas ug espiritismo. Kini ang kalingawan ug ang tinguha nga makabatog maayong panglawas.

15. (a) Unsay panghunahuna sa daghan diha sa mga nasod sa Kasadpan bahin sa espiritismo? (b) Sa unsang paagi naapektohan ang pipila ka Kristohanon sa panghunahuna sa kalibotan bahin sa espiritismo?

¹⁵ Ilabina sa mga nasod sa Kasadpan, ang okultismo, pagpamarang, ug ubang matang sa espiritismo giisip nga ordinaryo na lang. Ang demonyohanong mga buhat gipasundayag diha sa mga pelikula, libro, salida sa TV, ug mga dula sa kompiyuter ingon nga makalingaw, pagkaabtik sa pangutok, ug di-makadaot. Gikabuangan pag-ayo ang pipila ka pelikula ug mga libro bahin sa espiritismo nga ang mga mahiligon niana nagtukod ug mga klab. Dayag nga nagmalamposon ang mga demonyo sa pagpatuo nga ang espiritismo dili peligroso. Naapektohan ba ang mga Kristohanon niining maong kaisipan? Naapektohan ang pipila. Sa unsang paagi? Pananglitan, human makatan-awg pelikula bahin sa espiritismo ang usa ka Kristohanon, siya miingon, “Gitan-aw ra nako ang pelikula, apan wala ko makiglangkit sa espiritismo.” Nganong peligroso ang maong pangatarongan?

16. Nganong peligroso ang pagpilig kalingawan kabahin sa espiritismo?

¹⁶ Bisan pag may kalainan ang aktuwal nga pagpakiglangkit sa espiritismo ug ang pagtan-aw niana, wala gayod kana magpasabot nga ang pagtan-aw niana dili peligroso. Ngano? Tagda kini: Ang Pulong sa Diyos nagpaila nga si Satanas ug ang iyang  mga demonyo dili makabasa sa atong mga hunahuna. * Busa, ingon sa nahisgotan na, aron masayran kon unsay atong gihunahuna ug aron mamatikdan ang atong espirituwal nga kahuyangan, panid-an pag-ayo sa daotang mga espiritu ang atong mga lihok​—apil ang gipili natong kalingawan. Sa dihang ang usa ka Kristohanon mahilig sa mga pelikula o mga libro bahin sa mga espiritista, panglamat, mga lihok sa mga gidemonyohan, o susamang mga ulohan, siya nagpadalag mensahe sa mga demonyo. Maorag nagpahibalo na hinuon siya kanila kon unsay iyang kahuyangan! Ingong sanong, pangusgan sa mga demonyo ang pagpakigdumog batok sa maong Kristohanon aron pahimudsan ang iyang kahuyangan hangtod mapildi siya. Gani, ang pipila kansang interes sa espiritismo unang nahaling pinaagig kalingawan nga nagpasundayag niana, sa kadugayan sila nakiglangkit na gayod sa espiritismo.​—Galacia 6:7.

17. Unsang panglingla ang gamiton tingali ni Satanas aron pahimudsan ang mga masakiton?

¹⁷ Naningkamot si Satanas nga pahimudsan dili lang ang atong tinguha sa kalingawan kondili ang pagbaton usab ug maayong panglawas. Sa unsang paagi? Tingali maguol ang usa ka Kristohanon tungod sa nagkagrabeng sakit bisan pa sa mga paningkamot nga matambalan kana. (Marcos 5:25, 26) Makahatag kanag kahigayonan kang Satanas ug sa mga demonyo aron pahimudsan siya. Nahibalo sila nga ang Pulong sa Diyos nagpasidaan nga dili ‘magpatabang niadtong nagbuhat kon unsay makadaot.’ (Isaias 31:2) Aron molapas niana ang Kristohanon, tentalon tingali sa mga demonyo ang desperadong masakiton nga magpatambal sa mga espiritista nga maoy buhat nga makadaot gayod. Kon molampos ang maong panglingla sa mga demonyo, ang relasyon sa masakiton uban sa Diyos mahimong huyang. Sa unsang paagi?

18. Unsang matang sa pagsusi ug pagtambal ang isalikway sa usa ka Kristohanon, ug ngano?

 ¹⁸ Nagpasidaan si Jehova sa mga Israelinhon nga midangop sa mga espiritista: “Sa dihang inyong bayawon ang inyong mga kamot, akong tagoan ang akong mga mata gikan kaninyo. Bisan pa kon kamo maghimog daghang mga pag-ampo, ako dili mamati.” (Isaias 1:13, 15) Siyempre, buot gayod natong likayan ang bisan unsa nga makababag sa atong mga pag-ampo ug sa pagpaluyo ni Jehova, ilabina kon kita may sakit. (Salmo 41:3) Busa kon may mga timailhan nga ang usa ka paagi sa pagsusi o pagtambal may sagol nga espiritismo, angay gayong isalikway kana sa matuod nga Kristohanon. * (Mateo 6:13) Sa ingon niana, seguradong padayon siyang paluyohan ni Jehova.​—Tan-awa ang kahon nga “ Espiritismo ba Gayod Kini?”

19. (a) Kay nalimbongan sa Yawa ang daghang tawo, unsay ilang pagtuo bahin sa iyang gahom? (b) Unsang mga estorya ang dili angayng ipakaylap sa matuod nga mga Kristohanon?

¹⁹ Samtang daghang katawhan sa kanasoran sa Kasadpan nagtuo nga si Satanas dili kaayo makahimog kadaot, sukwahi ang gituohan sa ubang bahin sa kalibotan. Nianang mga dapita,  daghan ang nalimbongan sa Yawa ug sila nagtuo nga siya gamhanan kaayo. Nagkinabuhi sila adlaw-adlaw nga may kahadlok sa daotang mga espiritu. Nahadiindiin ang mga estorya bahin sa mga kalaki sa mga demonyo. Kasagarang madasigon ang pag-asoy mao nga malingaw ang mga tawo. Angay bang ipakaylap usab nato kana? Dili, dili kana ipakaylap sa mga alagad sa matuod nga Diyos tungod sa duha ka bug-at nga mga rason.

20. Sa unsang paagi ang usa dili tinuyong makasabwag sa propaganda ni Satanas?

²⁰ Una, kon ang usa magpakaylap ug mga estorya bahin sa mga kalaki sa mga demonyo, siya nagtabang gayod sa mga paningkamot ni Satanas. Sa unsang paagi? Ang Pulong sa Diyos nagpamatuod nga si Satanas makahimog gamhanang mga buhat, apan kini nagpasidaan usab nga mogamit siyag “bakak nga mga ilhanan” ug “panglimbong.” (2 Tesalonica 2:9, 10) Sanglit si Satanas mao ang pangunang limbongan, nahibalo  siya kon unsaon pag-impluwensiya ang kaisipan sa mga tawong hilig sa espiritismo aron patuohon sila sa mga bakak. Sila sinsero tingaling nagtuo nga may nakita ug nadungog ug ila tingali kanang iasoy ingong tinuod nga mga kasinatian. Sa kadugayan ang ilang mga estorya mapasobrahan tungod sa balikbalik nga pag-asoy niana. Kon ipakaylap sa usa ka Kristohanon ang maong mga estorya, iyang masabwag ang propaganda ni Satanas ug siya nagbuhat gayod sa kabubut-on sa Yawa​—“ang amahan sa bakak.”​—Juan 8:44; 2 Timoteo 2:16.

21. Unsay angay nga dugokan sa atong mga pakig-estorya?

²¹ Ikaduha, bisan pag ang usa ka Kristohanon may tinuod nga mga kasinatian uban sa daotang mga espiritu sa nangagi, dili niya kana balikbalikon ug asoy aron paglingaw sa mga isigkamagtutuo. Ngano? Kita giawhag: “Atong tutokan ang Pangulong Ahente ug Maghihingpit sa atong pagtuo, si Jesus.” (Hebreohanon 12:2) Oo, ang atong pagtagad angayng ipunting kang Kristo, dili kang Satanas. Timan-i nga samtang dinhi sa yuta, wala lingawa ni Jesus ang iyang mga tinun-an ug mga estorya bahin sa daotang mga espiritu, bisag daghan unta siyag ikasulti bahin sa mga abilidad ni Satanas. Hinunoa, ang mensahe sa Gingharian maoy gipasiugda ni Jesus. Busa, aron makasundog kaniya ug sa mga apostoles, angay nga ang dugokan sa atong mga pakig-estorya mao ang “halangdong mga butang sa Diyos.”​—Buhat 2:11; Lucas 8:1; Roma 1:11, 12.

22. Unsay atong mahimo aron aduna unyay “kalipay sa langit”?

²² Tinuod, mogamit si Satanas ug lainlaing panglingla, lakip ang espiritismo, aron daoton ang atong relasyon kang Jehova. Apan, kon atong dumtan ang daotan ug hawiran ang maayo, dili nato matagaag higayon ang Yawa sa pagpahuyang sa atong determinasyon nga isalikway ang tanang matang sa espiritismo. (Efeso 4:27) Pagkadako gayod unya ang “kalipay sa langit” kon mopadayon kita sa ‘pagbarog nga malig-on batok sa malipatlipatong mga kaugdahan sa Yawa’ hangtod siya mahanaw na!​—Efeso 6:11.