1, 2. E dau vakavumarau vei cei na papitaiso?

KE O sa qaravi Jiova voli mai ena dua na gauna balavu, kena irairai ni o sa na rogoca e levu na vunau ni papitaiso ena noda soqo ni tikina, tabacakacaka se soqo siga dua. Ia se mani vakacava na levu ni soqo o sa tiko kina, kena irairai ni o se luluvu ga ena gauna era tucake kina na papitaiso. E dau tuburi ira na vakarorogo na marau levu qai vu mai lomadra nodra vakasausau. De dua ena tonawanawa sara ga na matamu ni o raici ira na ka talei era sa vakatulewataka mera to ena yasa i Jiova. Eda dau marau dina ena gauna va qori!

² Eda rairai donuya eso na gauna ni papitaiso ena loma ni dua na yabaki, ia e levu sara era raica na agilosi. Sa na wacava na “marau mai lomalagi” nira mai veitomani ena isoqosoqo rairai i Jiova e rauta ni lima na udolu e veimacawa. (Luke 15:7, 10) Sega ni vakabekataki nira marautaka na agilosi na tubu sa yaco tiko!—Akeai 2:7.

3. Cava e veilakoyaki tiko kina o Setani “me vaka na laione e tagi,” cava e via cakava?

³ Ena yasana adua, eso tale na ka bula vakayalo era sega ni marautaka na gauna ni papitaiso. E vakacudrui Setani kei ira nona timoni na nodra cata na vuravura ca qo na le udolu vakacaca era papitaiso. A tukuna ena dokadoka o Setani ni sega ni vu ni noda sokaloutaki Jiova na noda lomani koya dina, eda na tawayalodina tale ga ke da vakatovolei. (Wilika Jope 2:4, 5.) Na veibeitaki qori e vakalasui ena gauna kece e vakatulewataka kina e dua me yalataki koya vei Jiova. E vaka ga ni lauroba vaka vica vata na udolu e veimacawa o Setani. Sa rauta me “veilakoyaki voli . . . me vaka na laione e tagi, e vakasaqara tiko e dua me tiloma.” (1 Pita 5:8) E vinakata na “laione” me tilomi keda vakayalo, me vakacacana se tagutuva noda veiwekani kei Jiova.—Same 7:1, 2; 2 Timoci 3:12.

4, 5. (a) Cava na rua na sala e yalana kina o Jiova na kaukaua i Setani? (b) Cava me vakadeitaka na lotu vaKarisito dina?

 ⁴ E vakadomobula na keda meca, ia e sega ni dodonu meda rerevaki koya. Na vuna? O Jiova sa yalana na kaukaua ni “laione e tagi” ena rua na sala. Sala cava ya? Kena imatai, a parofisaitaka o Jiova ni na bula sivia na “veivakararawataki levu” e dua “na isoqosoqo levu” era lewena na lotu vaKarisito dina. (Vakatakila 7:9, 14) E dau dina kece na parofisai ni Kalou. Sa na kila tiko o Setani ni na sega ni rawai ira kece na tamata ni Kalou.

⁵ Na ikarua ni sala e yalana kina o Jiova na kaukaua i Setani e vakavotui ena vosa a cavuta e dua na tamata yalodina ni Kalou. A tukuna vei Tui Esa na parofita o Asaraia: “Ena tokoni kemuni o Jiova ke oni tiko vata ga kei koya.” (2 Veigauna 15:2; wilika 1 Korinica 10:13.) E volatukutukutaki e levu na ivakadinadina mai na veigauna sa oti ni guce o Setani me basuraki ira na volekati Jiova tiko ga. (Iperiu 11:4-40) Nikua tale ga, na lotu vaKarisito e vakavolekati koya tiko ga vua na Kalou ena vorata na Tevoro qai vakamalumalumutaka. Qori e vakadeitaka sara ga vei keda na iVolatabu ni tukuna: “Vorata na Tevoro, ena qai dro tani vei kemuni.”—Jemesa 4:7.

6. E valuti ira yadua vakacava na lotu vaKarisito o Setani?

⁶ O Setani ena sega ni qaqa ena ivalu, ia ena rawa ni vakaleqai keda yadua ke da sega ni qaqarauni. E kila ni na rawa ni basuraki keda ke vakaluluqataka noda veiwekani kei Jiova. E vakayacora vakacava qori? E taketetaki keda yadua ena nona vakacacani keda vakaca qai cakava vaqaseqase. Meda veivosakitaka mada na ivadi mana i Setani.

7. Cava e vakacacani ira tiko kina vakaukaua na tamata ni Kalou o Setani?

⁷ Veivakacacani kaukaua. A kaya na yapositolo o Joni: “E lewa tiko na vunica na vuravura taucoko.” (1 Joni 5:19) Qori na ivakasala vei ira kece na lotu vaKarisito dina. Sa rawai ira tu na tamata ca o Setani, qo sa taketetaki ira tiko na tamata ni Kalou ena nona vakayagataka na veivakacacani kaukaua. (Maika 4:1; Joni 15:19; Vakatakila 12:12, 17) Sa qai soli isele ga ni kila sa lekaleka nona gauna. Eda sa donuya tu qo na iotioti ni veivakalolomataki i Setani kei na nona ravuravu me vakarusa noda veiwekani kei Jiova.

8. Cava e vakaibalebaletaka o Paula ni tukuna nida na “veivala” kei ira na yalo ca?

⁸ Eda na vala kece. E vakasalataki ira nona itokani lotu vaKarisito na yapositolo o Paula: “Eda veivala [“veimulomulo,” ivakamacala e ra] . . . kei ira na yalo ca tawarairai ena veiyasana vakalomalagi.” (Efeso 6:12) Cava e vakayagataka kina o Paula na vosa “veivala”? Baleta ni dusia nida sega ni vala tiko mai vakayawa. A vakayagataka gona na vosa ya o Paula me vakabibitaka nida na veivala yadudua sara tiko ga kei ira na meca vakayalo. Na vala qori e tekivu nida sa yalataki keda vei Jiova, veitalia ga ke o tiko ena vanua e takalevu kina na vakabauti ni tevoro se sega. Na lotu vaKarisito yadua e yalayala ena vakaitavi ena vala qori. E veiganiti kina nona uqeti ira vakavica mai Efeso o Paula mera “tudei”!—Efeso 6:11, 13, 14.

9. (a) Cava e vakayagataka kina e levu na “ivadi qaseqase” o Setani kei ira na timoni? (b) Cava e via vakadukadukalitaka kina noda vakasama o Setani, eda na vorata vakacava nona sasaga? (Raica na kato “ Qarauna na iLawaki i Setani!”) (c) Na ivadi cava i Setani eda na veivosakitaka tarava?

⁹ iVadi qaseqase. E uqeti ira na lotu vaKarisito o Paula mera vorata “na ivadi qaseqase” i Setani. (Efeso 6:11) Sega ni dua ga na ivadi. Era vakayagataka na yalo ca e levu na ivadi qaseqase qai tiko na vuna era cakava kina qori. So na lotu vaKarisito era tudei ena dua na veivakatovolei ia ra qai coriti ena  dua tale. O Setani kei ira nona timoni era dau vakaraica vinaka na ka eda cakava mera kila kina noda malumalumu. Sa ra qai cakacaka ena ka e rawa ni vakaleqai keda vakayalo. Ia eda marau ni vakatakilai vei keda ena iVolatabu na ilawaki ni Tevoro. (2 Korinica 2:11) Ena itekitekivu ni ivola qo, eda vulica kina eso nona ivadi me vaka na domodomoiyau, ilala ca, kei na veiyacovi tawadodonu. Meda veivosakitaka mada e dua tale nona ivadi, na vakatevoro.

10. (a) Cava na vakatevoro? (b) Cava na rai i Jiova me baleta na vakatevoro, cava nomu rai?

¹⁰ Ni dua e vakatevoro, sa veivosaki sara tiko ga kei ira na timoni. E okati ena vakatevoro na daurairai, cakaisausau, daucurumi, kei na nodra tarogi na mate. Eda kila ni o Jiova e okata na vakatevoro me ka “vakasevaki.” (Vakarua 18:10-12; Vakatakila 21:8) Meda “cata sara na ka ca,” e bibi meda kua ni veitokani kei ira na yalo ca. (Roma 12:9) Qori ena beci kina na Tamada vakalomalagi o Jiova!

11. Cava ena marau kina o Setani ni rawai keda ena vakatevoro? Vakatauvatana.

¹¹ E saga vakaukaua o Setani me coriti keda ena vakatevoro ni kila ni cata o Jiova. Na gauna kece e rawai kina na lotu vaKarisito ena vakatevoro, sa qaqa o Setani. Na vuna? Vakasamataka mada na ivakatautauvata qo: Ke dua na sotia e liumuritaka na mataivalu e lewena qai lai to vei ira na meca, ena marau na iliuliu ni nodra mataivalu na meca. Ena rawa sara ga ni vakaraitaki koya na sotia liumuri ya e matanalevu me vaka e dua na icovi ni qaqa, me vakacudrui kina na iliuliu ni mataivalu adua. Rawa tale ga ni tukuni ni nakita me vakanadakui Jiova qai vakarurugi ena veiliutaki i Setani na lotu vaKarisito e rawai ena vakatevoro. Ena marau o Setani me vakaraitaka e matanalevu ni sa vakanadakui Jiova e dua! Eda na vinakata beka me qaqa na Tevoro? Sega, eda sega ni dau veiliumuritaki.

12. Na ivadi cava e dau vakayagataka o Setani me veisautaka kina noda rai me baleta na vakatevoro?

¹² Ke da cata na vakatevoro, ena sega ni vakayagataka o Setani me temaki keda kina. Ia ena saga me veisautaka noda rai. Sala cava? Ena vakasesei keda me rawa nida kaya “ni vinaka na ca, e ca na vinaka.” (Aisea 5:20) E dau vakayagataka gona o Setani na taro e vakavurea na vakatitiqa—qori e dua na nona ivadi mana.

13. A vakayagataka vakacava o Setani na taro me vakavurea kina na vakatitiqa?

¹³ Sa vakayagataka oti o Setani na taro e vakavurea na vakatitiqa. A tarogi Ivi mai Iteni: “E kaya sara ga na Kalou mo drau kua ni kana mai na vunikau kece e tu ena were?” Ena gauna i Jope, a taroga ena dua nodra soqo vata na agilosi mai lomalagi: “Vakacava e sega ni yaga nona rerevaka na Kalou o Jope?” Ni se qai tekivu tale ga na cakacaka vakaitalatala i Jisu e vuravura, a vakatovolei koya o Setani ena nona kaya: “Ke o luve ni Kalou, mo kaya ina vatu era tu qo mera vuki mera ibuli madrai.” E vakalialia tiko e keri o Setani na nona tukuna o Jiova vei Jisu: “Qo na Luvequ lomani, au vakadonuya”!—Vakatekivu 3:1; Jope 1:9; Maciu 3:17; 4:3.

14. (a) E vakavurea vakacava o Setani na vakatitiqa me baleta na vakatevoro? (b) Cava eda na veivosakitaka tarava?

¹⁴ E vakayagataka tale ga nikua na Tevoro na iwalewale qori, ena nona dau saga me vakavurea na vakatitiqa me baleta na vakatevoro. Ka ni rarawa nira sa coriti kina eso na tamata i Jiova. Era lomatarotarotaka se ca dina na ivalavala eso ni vakatevoro. (2 Korinica 11:3) Mera vukei vakacava o ira qo mera veisautaka nodra rai? Cava meda cakava meda kua ni coriti ena ivadi qaseqase i Setani? Ena saumi na taro qori ena noda veivosakitaka e rua na sala e veivakadukadukalitaki kina o Setani ena ka vakatevoro. Qori na ka ni veivakamarautaki kei na nodra golevi eso era dau vakatura na iwali ni tauvimate.

15. (a) Cava nodra rai e levu ena vanua vakavalagi me baleta na vakatevoro? (b) Era coriti vakacava eso na lotu vaKarisito ena rai ni vuravura me baleta na vakatevoro?

¹⁵ E dau raici vakamamada ena vanua vakavalagi na vakacuru, vakadraunikau kei na so tale na ivalavala ni vakatevoro. Na ivalavala vakatevoro e vakaraitaki ena iyaloyalo, porokaramu ni tivi, qito ena kompiuta se talanoataki ena ivola, e dau tukuni ni lasa, sega ni veivakaleqai ra qai vuku o ira na dauvakatevoro. Eso na iyaloyalo se ivola me baleta na vakatevoro e galeleti sara vakalevu, ra lai tauyavutaka kina na nodra isoqosoqo o ira na dau taleitaka. Qori sara ga na ka era vinakata na timoni, me nanumi ni sega ni vakavuleqa na vakatevoro. Era rawai tale beka ga kina na lotu vaKarisito? Io, sa vakadukadukalitaki nodra vakasama eso. Sala cava? Dua na kena ivakaraitaki, e kaya e dua na lotu vaKarisito a sarava na iyaloyalo ni vakatevoro, “Au sarava wale ga na iyaloyalo, au sega ni vakaitavi kina.” Cava e rivarivabitaki kina na rai qori?

16. Cava e leqataki kina na ka ni veivakamarautaki e vakaraitaki kina na vakatevoro?

¹⁶ Erau duidui na saravi ni vakatevoro kei na kena vakayacori, ia sega ni kena ibalebale ni sega ni veivakaleqai na kena saravi. Na vuna? Vakasamataka mada qo: E tukuna na iVolatabu ni o Setani kei ira na timoni era sega ni kila na ka eda vakasamataka. * Ia me vaka sa tukuni oti mai, era dau vakaraica vinaka na ka eda cakava mera kila kina na ka eda vakasamataka kei na noda malumalumu—okati kina na ka ni veivakamarautaki eda digia. Na lotu vaKarisito e vakaraitaka ena nona ivalavala ni taleitaka na iyaloyalo se ivola ni vakacuru, cakaiba, curumi tevoro se ka vakatevoro tale eso, sa vakauitukutuku tiko vei ira na timoni. Sa vakaraitaka sara tiko ga vei ira nona malumalumu! Era na qai sagai koya toka na timoni me yacova sara nira sa rawai koya. So era tekivu taleitaka ga na vakatevoro mai na nodra digitaka na ka ni veivakamarautaki e vakaraitaki kina, oti sa ra lai cakava sara.—Wilika Kalatia 6:7.

17. Na ivadi qaseqase cava ena vakayagataka o Setani vei ira na lotu vaKarisito era tauvimate?

¹⁷ Me ikuri ni nona via vakadukadukalitaki keda o Setani ena ka ni veivakamarautaki, e dau veirawai tale ga ena nodra golevi eso era dau vakatura na iwali ni tauvimate. Sala cava? E rawa ni yalolailai na lotu vaKarisito e torosobu tiko ga nona bula ni sega na iwali ni kena mate. (Marika 5:25, 26) Qori sara ga na gauna vinaka ena sagai koya kina o Setani kei ira na timoni. Era na temaki koya na timoni me vaqara bula ena veiqaravi e vakayagataki kina na “vakatevoro.” (Aisea 1:13) Ke mana nodra ivadi qaseqase qori na timoni, sa na luluqa nona veiwekani kei Jiova na lotu vaKarisito e tauvimate. Ena sala cava?

18. Na sasaga ni veivakabulai vakacava me cata na lotu vaKarisito, cava na vuna?

¹⁸ Qo na ivakasala i Jiova vei ira na Isireli era vakararavi ena “vakatevoro”: “Ni oni dedeka na qeteqete ni ligamuni, au vunia na mataqu vei kemuni. Oni masu vakalevu, ia au sega ni rogoca.” (Aisea 1:15) Eda na sega ni vinakata meda cakava e dua na ka ena sega ni rogoci kina noda masu qai tagutuva nona tokoni keda o Jiova—vakauasivi ena gauna eda tauvimate kina. (Same 41:3) Meda cata gona na lotu vaKarisito dina na sasaga ni veivakabulai eda kila ni okati kina na vakatevoro. * (Maciu 6:13) Ke da cakava qori, ena tokoni keda tiko ga o Jiova.—Raica na kato “ E Vakatevoro Dina?”

19. (a) E veivakacalai vakacava na Tevoro vei ira e levu me baleta na kaukaua e tu vua? (b) Na italanoa cava mera cata na lotu vaKarisito dina?

¹⁹ E raici vakamamada ena so na vanua vakavalagi na veivakaleqai ni kaukaua i Setani, ia e raici vakabibi ena so tale na vanua. Na Tevoro sa vakacalai ira e levu ena vanua va qori mera vakabauta ni tu vua na kaukaua e sega ni tu dina vua. Era bula rerere e veisiga eso nira leqataka na ka era rawa ni cakava na yalo ca. Na levu ni italanoa me baleta na kaukaua ni timoni e toro cake tiko ga. E dau talanoataki ena marau mera taleitaka kina eso tale. Vakacava, meda talanoataka tale ga na lotu vaKarisito? Sega, e rua na vuna bibi eda na sega ni cakava kina qori na tamata ni Kalou.

20. Ke sega mada ga ni nakita, e rawa ni vakatetea vakacava e dua na itukutuku i Setani?

²⁰ Kena imatai, o koya e talanoataka nodra rawaka na timoni sa tokona tiko na sasaga i Setani. Ena sala cava? E tukuni ena Vosa ni Kalou ni tu vei Setani na kaukaua me cakamana kina, ia e veivakasalataki tale ga ni dau vakayagataka “na ivakatakilakila lasu” qai ‘veivakacalai.’ (2 Cesalonaika 2:9, 10) Ni kenadau ena veivakacalai, e kila o Setani na sala me coriti ira kina era malele tiko ina vakatevoro, mera vakabauta tale ga na ka lasu. Era na rairai vakabauta nira raica se rogoca eso na ka, ra qai talanoataka ni yaco dina. Ia ni talanoataki wasoma, era vakatubutaka nodra italanoa. Na lotu vaKarisito e vakayacora qori sa cakava tiko na ka e vinakata na Tevoro ni “tama ni lasu.” Sa vakatetea sara tiko ga na itukutuku i Setani.—Joni 8:44; 2 Timoci 2:16.

21. Cava me usutu ni noda veitalanoa?

²¹ Kena ikarua, na lotu vaKarisito a dau vakatevoro tu e liu me kua ni talanoataka vei ira na tacina vakayalo. Na vuna? Eda vakasalataki: “Vakaraici koya matua na noda iLiuliu Levu, o koya e Vakataucokotaka noda vakabauta, o Jisu.” (Iperiu 12:2) Io, meda vuli vei Jisu sega ni o Setani. E bibi meda kila ni gauna a bula voli kina e vuravura o Jisu a rairai tukuna vei iratou nona imuri na ka e rawa ni cakava o Setani, ia e sega ga ni dau talanoataki ira na timoni. A vakabibitaka ga na itukutuku me baleta na Matanitu ni Kalou. Meda vakatotomuria gona na ivakaraitaki i Jisu kei iratou nona imuri, me usutu ga ni noda veitalanoa “na veika vakatubuqoroqoro ni Kalou.”—Cakacaka 2:11; Luke 8:1; Roma 1:11, 12.

22. Cava meda cakava mera ‘marau tiko ga kina mai lomalagi’?

²² Io, e dau vakayagataka o Setani e levu nona ivadi qaseqase okati kina na vakatevoro ena nona saga me vakaleqa noda veiwekani kei Jiova. Ke da cata na ka ca da qai kabita na ka vinaka, ena guce na sasaga i Setani me coriti keda ena vakatevoro ena kena veimataqali kece ga. (Wilika Efeso 4:27.) Sa na wacava na levu ni “marau mai lomalagi” ke da “vorata . . . na ivadi qaseqase ni Tevoro” me yacova sara nona vakarusai!—Luke 15:7; Efeso 6:11.