1, 2. ¿Jaralii na talatakana nawoutisaajapa na jekennuukana?

¿KAKALIAICHI pia aʼyataain nümüin Je’waa? Müle shia, paapüirü wainmatua tü pütchi namüinjatkat na awoutisaajüinjanakana. Jaʼitairü jeʼratuain paapüin shia, talatüsü paaʼin piʼrapa nashaʼwalaain süpüla neeʼiyatüin naapüin naaʼin nümüin Maleiwa. Soʼu kaʼikat tia, naʼwatüin najapü na wawalayuukana jee eeshii naʼyalajüle süka talatüin naya. ¡Talatüshii maʼin waya süka weʼrüin wayuu aneekaka nümaain naya Je’waa!

² Nnojotsü wainmatuain weʼrüin süpüla juyaka tü awoutisaajaakat. Akatsaʼa, na aapieekana neʼrüin shia wainmatua woulia. ‹Talatüshii maʼin naya iipünaa› wanaa sümaa neʼrüin wainmain maʼin na awoutisaajünakana sainküin mma (Lucas 15:7, 10). Talatüshii maʼin naya süka nawainmalaain na nuʼunirakana Je’waa süka tü nütchinkat (Ageo 2:7).

3. ¿Jamüshi maka Satanás naaʼin ‹wanee kaʼlaira olonojooshi›? ¿Kasa nuunteeka?

³ Akatsaʼa nnojoishii talatüin napüshuaʼa na meʼrujusaliikana sutuma nawoutisaajüin na wayuukana otta nayouktüin tü naainjakat na manoujüinsaliikana. Sutuma tia, jashichishii maʼin na yolujaakana. Tia, nnojotsü ponuin waaʼin, süka mojuin nünüiki Satanás wachiki, aʼyataashii waya nümüin Je’waa sümaa maalin nia wapüla naashin otta  isasü wachiki woonooin nümüin sülatüle wamüin kasa mojusü (Job 2:4, 5). Sünainjee tia, naapapa naaʼin wanee wayuu nümüin Je’waa, niiʼiyatüin alaain Satanás otta müshi niʼyaatakai nuwalapaʼa. Jashichishi maʼin nia süka sülatüin tia nümüin semaanawai, makalaka müin nia maʼaka naaʼin ‹wanee kaʼlaira olonojooshi, nümalajeʼereein wanoula› (1 Pedro 5:8). Süpüla nuuntüin tia, wainma tü naainjakat süpüla nümojujüin wakuwaʼipa nümaa Je’waa otta nükatalüin waya nuulia (Salmo 7:1, 2; 2 Timoteo 3:12).

4, 5. (1) ¿Jarat tü piamasü kasa nnojotkat naainjüin Satanás nutuma Je’waa? (2) ¿Jamüsü sünüiki tü Wiwüliakat namüin na anoujüshiikana?

⁴ Jaʼitaichi jashichin maʼin ‹chi kaʼlaira olonojooshikai› nnojoishii mmoluinjanain waya neema. ¿Jamüsü? Süka nnojoluin eein süpüla naainjüin piamasü kasa nutuma Je’waa. Tü palajatkat shia, nnojoleena najaʼttirüin na aʼyataashiikana  nümüin Je’waa. Tia, nütüjaa aaʼu Satanás, süka nüküjüin paala Je’waa katüinjatüin soʼu «wane wayuuirua watta maʼi saalii» süchikijee ‹tü müliaa müleʼoshaatakat›. Tü nümakat Je’waa ekeraajüsü waneepia (Alateetkat Mapeena 7:9, 14).

⁵ Tü wanee shia, nnojoleena jamajüin nutuma Satanás na nümaakana Je’waa. Watüjaa aaʼu tia sünainjee nünüiki Azarías nümüin Asá, chi aluwataaikai: «Eeshi Je’waa jümaa ayatüle jia nümaa» (2 Crónicas 15:2, TNM; 1 Corinto 10:13). Saashin tü Wiwüliakat wainma na nnojoliikana aainjüin tü nüchekakat Satanás (Hebreokana 11:4-40, TNM). Nümaale waya Maleiwa maʼaka naaʼin naainnua, eejiraajeena waya nümaa Satanás otta wakanajeechi nia. Tia, shia tü sümakat tü Wiwüliakat: ‹Jüʼleejüle chi Yolujaakai, oʼunamaateechi juulia› (Santiago 4:7).

6. ¿Kasa naainjaka Satanás süpüla nükanajüin waya?

⁶ Maʼaka wekirajaain nnojoleena nükanajüin chi yolujaakai na anoujüshiikana. Akatsaʼa, nükanajeena na nnojoliikana eejüin aaʼin. ¿Kasa naainjaka süpüla tia? Nümojujüin nakuwaʼipa nümaa Je’waa süpüla nükanajüin naya. Süpüla tia, nüpüleeruasü waaʼin. Eejiraashi wamaa waneʼewai wakua otta aainjüshi kasa süpüla nimeejüin waya. Wekirajaa sünain tia apünüinsü kasa naainjakat.

7. ¿Jamüshi nütkaaka Satanás sümaa üttüin naaʼin nanain na aʼyataakana nümüin Je’waa?

⁷ Nüpüleeruasü waaʼin. Naashin Juan «tü wayuu manoujainsatkalüirua [...] nia aluwataaka saaʼu chi Yolujaakai» (1 Juan 5:19). Achiaanüshii na anoujüshii shiimainshiikana sükajee tü pütchikat. Süka nükanajüinnapain Satanás na manoujüinsaliikana, naya kachiiruaka naaʼin na aʼyataashiikana nümüin Je’waa, nütkaa amaachii sümaa üttüin naaʼin nanain otta isawaishii naya waneepia nüchiki (Miqueas 4:1; Juan 15:19; Alateetkat Mapeena 12:12, 17). Jashichishi maʼin  nia otta kooʼomüinsü maʼin tü naainjakat süka süpütaain palit kaʼi nüpüla. Maaʼulu eejiraashii waya sümaa tü chiiruaajatkat kasa naainjaka Satanás süpüla nümojujüin wakuwaʼipa nümaa Je’waa; choʼujaasü maʼin maaʼulu ‹wayaawatüin saaʼu tü kaʼikat süpüla watüjaain saaʼu tü waainjüinjatkat› (1 Crónicas 12:32, TNM).

8. ¿Kasa sünainpünaaka tü pütchikat ‹atkawaa›?

⁸ Eejiraashi wamaa waneʼewai wakua. Müshi Pablo namüin na anoujüshiikana: ‹Atkaashii waya sümaa tü yolujaakalüirua› (Éfeso 6:12). ¿Jamaluʼulu tü pütchikat ‹atkawaa›? Tü pütchikat griego ‹atkawaa› shia wanee aapirawaa, nnojotsü kaʼyataawain. Sükajee tia, niiʼiyatüin Pablo watkaain waneʼewai wakua namaa na yolujaakana. Jaʼitaina kepiain waya suluʼu wanee mma eere sünoujünüin jee nnojorüle sünoujünüin anain tü yolujaakalüirua. Nnojo motuin waaʼin woʼttüin sünain atkawaa namaa na yolujaakana soʼujee waapüin waaʼin nümüin Je’waa. Müshiijeseʼe eejiraain waya namaa soʼujeʼereʼeya wawoutisaajüin. Shiajaʼa nümaka Pablo apünüintua namüin na anoujüshiikana Éfeso nachecherüinjatüin naaʼin (Éfeso 6:11, 13, 14, TNM).

9. (1) ¿Jamüsü wainmaka ‹tü kasa mojusü› naainjakat Satanás namaa na yolujaakana? (2) ¿Jamüsü nümojujeʼereeka waaʼin chi Yolujaakai? ¿Kasa waainjüinjatka süpüla eejiraain waya nümaa? (Paashajeʼera tü pütchikat « ¡Jalia waya suulia tü nimeejakat aka satanás!».) (3) ¿Kasa wekirajaainjatka anain?

⁹ Aainjüshi kasa süpüla nimeejüin waya. Naashin Pablo, achecherüinjana naaʼin na anoujüshiikana suulia ‹tü kasa mojusü nüchekakat› Satanás (Éfeso 6:11). Nnojotsü waneesüin neʼe tü kasa mojusü naainjakat Satanás otta na yolujaakana süpüla nemeejüin waya, wainma tü kasa mojusü naainjakat. Eesü tü naainjakat anainjee shia. Eeshii anoujüshii eejiraaka sümaa wanee kasa mojusü, mapa, nnojoishii eejiraain sümaa wanee kasa naata suulia tia. Sutuma tia, jülüjüsü maʼin naaʼin tü waainjakat. Natüjawee aaʼu tü nnojotkat anain sünain wanoula süpüla najayajüin waya. Akatsaʼa saapirüin waya tü Wiwüliakat suulia tü nimeejeekat aka  waya Satanás (2 Corinto 2:11, TNM). Ekirajaainnapa waya suluʼu karalouktakat tüü süchiki nimeejüin waya Satanás sükajee tü keeʼirewaakat aaʼin washirüü, amaʼüjirawaa akuwaʼipaa otta na nnojoliikana anain süpüla waʼaleewain. Wekirajaa süchiki tü naaʼinrakat na outshiikana.

10. (1) ¿Kasa sünainpünaaka tü naaʼinrakat na outshiikana? (2) ¿Jamüsü naaʼin Je’waa sünain tü naaʼinrakat na outshiikana? ¿Jamüsü paaʼin sünain?

¹⁰ Tü naaʼinrakat na outshiikana sünainpünaasü tü ooʼulakaakat, amaʼüjaa wayuu, asakiraa na ouktüshiikana, kamaʼanaa lania otta waneeirua kasa pülasü. Na aainjakana tia, sünainpünaashii tü naaʼinrakat na outshiikana, süka nanainpünaain naya na yolujaakana. Maʼaka watüjaain saaʼu «üttüsü naaʼin» Je’waa sünain süpüshuaʼa tia (Deuteronomio 18:10-12, TNM; Alateetkat Mapeena 21:8). Süka nüchuntüin Maleiwa ‹wayouktüin tü kasa mojusükat›, nnojoleechi wooʼulaain nia napüleerua na yolujaakana (Roma 12:9). Walerajüin tia jülüjaiwaʼaya waaʼin shia.

11. ¿Jamüshi nükanajaka Satanás sünainpünaale waya tü naaʼinrakat na outshiikana? Piʼitaa wanee shiyaawase.

¹¹ Mojusü maʼin sünainpünawaa tü naaʼinrakat na outshiikana süka nuuʼulaanüin Je’waa sutuma. Makalaka nüchajaain sukuwaʼipa chi Yolujaakai süpüla waainjüin tia. Akanajawaishi nia naainjüle wanee anoujüshi tü naaʼinrakat na outshiikana. ¿Kasa nükanajaka aluʼu? Süpüla watüjaain saaʼu, weʼitaa wanee shiyaawase. Jülüja waaʼin wanee surulaat oonooka namüin na nüʼünüükana sünain oʼunaa namaa, talateechi maʼin chi nikiipüʼü nülataakai anainmüin. Chi jekechikai nikiipüʼü, niiʼiyatüin chia surulaatkai maʼaka saaʼin wanee nükanain süpüla japülin nutuma chi nikiipüʼükai paala. Müsia tü alatakat naainjüle wanee anoujüshi tü naaʼinrakat na outshiikana. Sümaa nütüjaain saaʼu eeshi süpüla nuuʼulaain Je’waa otta nücheküin niain aluwataain  Satanás naaʼu. ¡Talateechikajasaʼa maʼin chi Yolujaakai süka niiʼiyatüin nükanain sünain atkawaa! Nnojotsü wacheküin talateein nia watuma süka nnojoluinjachin wooʼulaain Je’waa.

12. ¿Kasa naainjaka Satanás süpüla nuʼwanajaain tü jülüjakat waaʼin süchiki tü naaʼinrakat na outshiikana?

¹² Nnojoleena waya sünainpünaain tü naaʼinrakat na outshiikana walerajüle shia. Tia, nütüjaa aaʼu Satanás makalaka nuʼwanajaweein tü jülüjakat waaʼin. ¿Kasa naainjaka süpüla tia? Nnojotsü wayaawatüin aaʼu wanee kasa nutuma süpüla wanoujüin ‹anain tü kasa mojusükat otta mojuin tü kasa anasükat› (Isaías 5:20, TNM). Kojuyatuairü naainjüin tia sükajee nüsakirayaain shiimainre wanee kasa süpüla wotchejaain sümaa.

13. Püküja tü naainjakat Satanás süpüla nutchejeʼerüin na wayuukana.

¹³ Wekirajaa sünain tü naainjakat Satanás sümaiwa süpüla nutchejeʼerüin na wayuukana. Nüsakirüin Satanás Eva chaaʼaya Edén: «¿Shiimüinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat?». Mapa antüshi nia naʼakamüin na aapiee outkajaakana sirumatuʼu otta nümaka nüchiki Job: «¿Kojutüshi neʼe pia nutuma Job?». Kakalia süchikijee tia, nuʼttapa Cristo sünain aʼyatawaa nümüin Maleiwa Mmapaʼa, müshi Satanás nümüin: ‹Müleka Nüchonle pia Maleiwa, puluwataa türa ipakat panjaain›. Sükajee tia, nimeeʼerainpalasü tü nümakat Je’waa aipirua semaana süpülapünaa tia: «Anii chi Tachonkai aishikai tapüla. Talatüshi maʼi taya nümaa» (Génesis 3:1; Job 1:9, TNM; Mateo 3:17; 4:3).

14. (1) ¿Kasa naainjaka chi yolujaakai süpüla notchejaain na wayuukana sümaa tü naaʼinrakat na outshiikana? (2) ¿Kasa wekirajaainjatka anain?

¹⁴ Ayatüshii otchejaain na wayuukana maaʼulu nutuma chi yolujaakai maʼaka sümaiwa. Naainjüin shia sükajee tü  naaʼinrakat na outshiikana. Eeshii anoujüshii asakitka naaʼin shiimainre mojuin maʼin süpüshuaʼa tia. Müshii namakai aaʼin: «¿Shiimüinsaʼaya...?» (2 Corinto 11:3). ¿Kasa waainjüinjatka süpüla wakaaliinjüin naya süpüla nanoukteʼerüin tü jülüjakat naaʼin? ¿Kasa akaaliinjeenaka waya süpüla waaʼinmajüin wakuwaʼipa suulia? Süpüla wasouktüin shiʼipajee tia, wekirajaa sünain waneeirua kasa eere niʼitaain Satanás tü naaʼinrakat na outshiikana: tü washaittakat, tü wanajakat, tü waapajakat otta tü waainjakat süpüla anainjanain waya suulia ayuulii.

15. (1) ¿Jamüsü namüin na kepiakana Europa otta América tü naaʼinrakat na outshiikana? (2) ¿Jamüsü sukuwaʼipa süpüla anain namüin na anoujüshiikana tia?

¹⁵ Nnojotsü mojuin namüin na wayuukana tü naaʼinrakat na outshiikana, tü ooʼulakaakat otta waneeirua kasa pülaka namüin. Naainjüin maʼin tia na kepiakana Europa otta América. Eeʼiyatünüsü shia sümaa anain maʼin suluʼu peliikula, karaloukta otta suluʼupünaa tü ashaittaa suluʼukat telewisoot. Eesü karaloukta otta peliikula eʼraajünaka maʼin aashajaaka süchiki otta eeshii na anakana amüin shia. Nountüin na yolujaakana anain sümüin wayuu tü naaʼinrakat na outshiikana. ¿Eeshii anoujüshii anaka amüin shia? Aa. ¿Jamüsü sukuwaʼipa süpüla sülatüin tia namüin? Weʼitaa wanee shiyaawase, müsü nünüiki wanee anoujüshi anajaka wanee peliikula sümaajatü tü naaʼinrakat na outshiikana: «Shiimain tanajüin tü peliikulakat, akatsaʼa tia, nnojotsü shiiʼiyatüin taainjüin tü naaʼinrakat na outshiikana». ¿Jamüsü mojuka maʼin jülüjüle waaʼin tia?

16. ¿Jamüsü mojuka maʼin aneekaa ashaittaa, aapajaa otta anajaa wanee kasa sünainpünaaka tü naaʼinrakat na outshiikana?

¹⁶ Shiimain naatain anajaa tü naaʼinrakat na outshiikana suulia aaʼinraa shia; akatsaʼa tia nnojotsü shiiʼiyatüin anain  shia. ¿Jamüsü? Palajana jülüja waaʼin wanee kasa süküjaka tü Wiwüliakat: Isasü nüchiki Satanás otta na yolujaakana natüjaain saaʼu tü suluʼukat waaʼin. * Akatsaʼa süka natüjaweein saaʼu tia otta tü mojukat sünain wanoula jülüjüsü naaʼin süpüshuaʼa tü waaʼinrakat, tü washaittakat, tü wanajakat otta tü waapajakat, maʼaka wekirajaain paala. Sutuma tia, anale nümüin wanee anoujüshi anajaa peliikula otta karaloukta sümaajatka tü naaʼinrakat na outshiikana, na ooʼulaküliikana, na kaleʼeruʼukana yolujaa otta waneeirua kasa, niiʼiyatüin namüin na yolujaakana tü mojukat sünain nünoula. Sükajee tia, eeshii süpüla nashutüin maʼin naaʼu otta ‹naapiraain› nümaa süpüla nakanajüin nia. Eeshii eeka naainjüin tü naaʼinrakat na outshiikana süka anajüin namüin nashaittüin, nanajüin otta naapajüin shia (Galacia 6:7, TNM).

17. ¿Jamüshi süpüla najayajüin Satanás wanee wayuu ayuuishi sükajee mojuin naaʼin?

¹⁷ Nimeejüin waya Satanás sükajee tü washaittakat, tü wanajakat, tü waapajakat otta tü waainjakat süpüla anainjanain waya suulia ayuulii. Maʼaka naaʼin wanee anoujüshi mojuka aaʼin sutuma ayuulin nia mayaapejeʼe wainmain kasa naainjaka süpüla anain nia (Marcos 5:25, 26). ¿Jamüshi süpüla najayajüin nia Satanás otta na yolujaakana süka mojuin naaʼin? Natüjaa aaʼu süchiyaain waya tü Wiwüliakat suulia wachajaain ‹nakaaliinjüin waya na aainjakana kasa mojusü› (Isaías 31:2, TNM). Sutuma nüshapataain aaʼin chi ayuuishikai ooʼulakünüsü naaʼin natuma na yolujaakana süpüla nnojoluin naainjüin tü sümakat tü Wiwüliakat otta nücheküin wanee kasa sünainpünaaka «tü naaʼinrakat na outshiikana» süpüla anain nia. Amojujaajeerü nukuwaʼipa  chi anoujüshikai noonoole sümaa tü emeejünakat aka nia. ¿Jamüsü süpüla sülatüin tia?

18. ¿Jarat tü wunuʼu wayouktakat süpüla weiyajiraain aka? ¿Jamüsü wayouktaka shia?

¹⁸ Müshi Je’waa namüin na israeliita sünainpünaakana «tü naaʼinrakat na outshiikana»: «Jiyalerapa tü jajapükat, nnojoleerü teirakaain amüin. Jaʼitaina achuntüin maʼin jia tamüin, nnojoleerü taapüin jünüiki» (Isaías 1:13, 15, TNM). Shiimain nnojoluin waainjeein tü naainjakat na israeliitakana. Nnojotsü waainjeein kasa nnojotka naapajüin anainjee Je’waa tü wachuntakat nümüin otta nükatalaain woulia, shialeeka ayuuire waya (Salmo 41:3). ¿Kaseerü waainjaka sünainpünaale tü naaʼinrakat na outshiikana wanee wunuʼu weiyajaaka aka? Wayouktamaatüinjatü shia (Mateo 6:13). * Müle shia, nnojoleerü waainjüin wanee kasa akatalaka waya nuulia Je’waa (paashajeʼera tü pütchikat « ¿Shiache tü naaʼinrakat na outshiikana?»).

19. (1) ¿Kasa nünoujiraka anain wayuu chi Yolujaakai? (2) ¿Kasa nnojoluinjatka waashajaain achiki?

¹⁹ Naashin na kepiakana Europa otta América nnojoishi  mojulaain maʼin Satanás, akatsaʼa suluʼu waneeirua mma, naata tü jülüjakat saaʼin wayuu. Wainma wayuu nimeejaka chi Yolujaakai, nünoujirüin sünain pülashin maʼin nia sümaa alawaain tia. Eeshii eeka eküin, aʼyataain otta atunküin sümaa mmoluin naya neema na yolujaakana. Akatsaʼa, anasü namüin naapajüin otta naashajaain süchiki wanee kasa pülasü naainjaka na yolujaakana. Eesü piamasü kasa nnojotka waapajüin otta waashajaain anainjee nachiki na yolujaakana.

20. ¿Jamüsü süpüla weʼraajirüin nüchiki Satanás sümüin wayuu sümaa nnojoluin watüjaain saaʼu?

²⁰ Tü palajatkat kasa nnojotka waashajaain atuma nachiki na yolujaakana shia süka wakaaliinjeechin Satanás sünain tü naainjakat. ¿Jamüsü süpüla sülatüin tia? Süküjüin tü Wiwüliakat eein süpüla naainjüin kasa pülasü otta müsia ‹naaʼinrüin kasa eekai müin aka saaʼin tü nütüjakat apüleerua Maleiwa nümüiwaʼa› otta ‹aküjüshi nia alawaa› (2 Tesalónica  2:9, 10). Atüjüshi maʼin nia süpülee aküjaa alawaa otta amojujaa naaʼin na anakana amüin tü naaʼinrakat na outshiikana. Sutuma tia, nanouja anainrü na wayuukana tü neʼrakat otta tü naapakat achiki sümaa nnojoluin shiimain shia. Eesü süküjünüle achiki maʼaka saaʼin wanee kasa eeka shiimain otta süka süküjünüin yalejee kooʼomüinsü atumawaa. ¿Kasa naainjaka wanee anoujüshi nüküjüle tia aküjalaakat? Nükaaliinjüin chi ‹kanainjeejachikai tü alawaakat›. Niʼraajirüin nüchiki sümüin wayuu (Juan 8:44; 2 Timoteo 2:16).

21. ¿Kasa waashajaainjatka achiki?

²¹ Jaʼitakajeʼe shiimain tü naaʼinrakat wamüin na yolujaakana, eesü tü wanee kasa nnojotkat waküjüin anainjee shia wainmatua namüin na wawalayuukana. Jülüjeeshi waaʼin Cristo nnojoishi niainjachin Satanás. ‹Jülüjüinjachi waaʼin Jesús waneepia› (Hebreokana 12:2). Wanaa sümaa yaajachin nia Mmapaʼa nnojoishi aküjüin wainma kasa nachiki na yolujaakana namüin na nikirajüinkana, mayaapejeʼe wainmain tü nütüjaakat aaʼu süchiki tü nüinkakat otta tü isakat nüchiki chi Yolujaakai. Tü naainjakat shia nüküjüin süchiki Nuluwataaya Maleiwa. Anasü washatüle nukuwaʼipa Jesús otta na aluwataaushiikana sünain aashajawaa süchiki kasa anasü maʼaka saaʼin «tü kasa anashantasü naaʼinrakat Maleiwakai» (Aluwataaushikana 2:11; Lucas 8:1; Roma 1:11, 12).

22. ¿Kasa waainjüinjatka süpüla eein talataa «chaa iipünaa»?

²² Maʼaka wekirajaaitpain, nüchajaain Satanás sukuwaʼipa süpüla nümojujeʼerüin wakuwaʼipa nümaa Je’waa otta süpüla tia wainma tü nimeejeekat aka waya maʼaka saaʼin tü naaʼinrakat na outshiikana. Akatsaʼa ayatüle walerajüin tü kasa mojusükat otta wacheküle waneepia tü kasa anasükat, nnojoleerü waainjüin nutuma Satanás tü naaʼinrakat na outshiikana otta süpüshuaʼa tü sünainpünaakat (Éfeso 4:27, TNM). Eejeerü talataa aaʼin «chaa iipünaa» ayatüle ‹wayouktüin tü mojusükot nüchekakat wapüleerua Satanás›, najaʼttinnaleepa nutuma Je’waa (Éfeso 6:11).