ជំពូកទី១៦
ចូរតស៊ូនឹងមេកំណាចនិងកលល្បិចទាំងប៉ុន្មានរបស់វា
«ចូរតស៊ូនឹងមេកំណាច រួចវានឹងរត់ចេញ»។—យ៉ាកុប ៤:៧
១, ២. តើពិធីជ្រមុជទឹកធ្វើឲ្យអ្នកណាខ្លះមានអំណរ?
បើអ្នកបានបម្រើព្រះយេហូវ៉ាអស់ជាច្រើនឆ្នាំហើយ អ្នកទំនងជាធ្លាប់ស្តាប់ច្រើនដងនូវសុន្ទរកថាសម្រាប់ពិធីជ្រមុជទឹកនៅសន្និបាតនិងមហាសន្និបាតរបស់សាក្សីព្រះយេហូវ៉ា។ ប៉ុន្ដែ ទោះជាអ្នកធ្លាប់ស្តាប់ច្រើនដងក៏ដោយ អ្នកប្រហែលជានៅតែរំជួលចិត្ដរាល់ដងដែលអ្នកឃើញមនុស្សដែលអង្គុយនៅជួរខាងមុខក្រោកឈរឡើង ហើយត្រៀមខ្លួនទទួលការជ្រមុជទឹក។ រំពេចនោះ អស់អ្នកដែលមានវត្ដមាននៅសន្និបាតរំភើបចិត្ដខ្លាំង ហើយទះដៃអបអរសាទរ។ អ្នកប្រហែលជាមានទឹកភ្នែករលីងរលោងដោយឃើញបុគ្គលមួយក្រុមទៀតចូលគាំទ្រខាងព្រះយេហូវ៉ា។ នៅគ្រាបែបនេះធ្វើឲ្យ យើងមានអំណរខ្លាំងណាស់!
២ នៅតំបន់របស់អ្នក អ្នកប្រហែលជាឃើញពិធីជ្រមុជទឹកពីរបីដងក្នុងមួយឆ្នាំ។ ប៉ុន្ដែបណ្ដាទេវតានៅស្ថានសួគ៌មានឱកាសមើលពិធីជ្រមុជទឹកច្រើនជាងយើងឆ្ងាយណាស់។ ប្រាកដជា‹នៅស្ថានសួគ៌មានអំណរ›ខ្លាំងណាស់ ពេលដែលបណ្ដាទេវតាឃើញមនុស្សរាប់ពាន់នាក់រៀងរាល់សប្ដាហ៍ទូទាំងពិភពលោកក្លាយទៅជាសមាជិកនៃអង្គការរបស់ព្រះយេហូវ៉ា។ (លូកា ១៥:៧,១០) ទេវតាច្បាស់ជារំភើបចិត្ដណាស់ពេលដែលឃើញការរីកចម្រើននេះ!—ហាកាយ ២:៧
មេកំណាច«ដើរក្រវែលដូចតោដែលកំពុងគ្រហឹម»
៣. ហេតុអ្វីសាថាន«ដើរក្រវែលដូចតោដែលកំពុងគ្រហឹម»? ហើយតើវាចង់ធ្វើអ្វី?
៣ ក៏ប៉ុន្ដែ អ្វីដែលផ្ទុយស្រឡះពីនោះគឺ មានបុគ្គលវិញ្ញាណឯទៀតដែលក្ដៅចិត្ដខ្លាំងណាស់ពេលដែលឃើញពិធីជ្រមុជទឹក។ ពេលដែលសាថាននិងពួកវិញ្ញាណកំណាចឃើញមនុស្សរាប់ពាន់នាក់បដិសេធចោលពិភពលោកខូចអាក្រក់នេះ ពួកវាខឹងយ៉ាងខ្លាំង។ យ៉ាងណាមិញ សាថានបានអួតថាគ្មានមនុស្សណាម្នាក់បម្រើព្រះយេហូវ៉ាដោយសារមានសេចក្ដីស្រឡាញ់ស្មោះនោះទេ ហើយវាក៏បានអួតដែរថាគ្មានអ្នកណានឹងនៅស្មោះត្រង់ចំពោះព្រះទេ បើពួកគេជួបនឹងទុក្ខលំបាកដ៏ខ្លាំង។ (សូមអាន យ៉ូប ២:៤, ៥) រាល់ដងដែលមនុស្សម្នាក់សម្រេចចិត្ដប្រគល់ខ្លួនជូនព្រះយេហូវ៉ា នោះសឲ្យឃើញថាសាថាននិយាយខុសហើយ។ ដូច្នេះ រៀងរាល់សប្ដាហ៍វាបាក់មុខរាប់ពាន់ដង។ ហេតុនេះគឺមិនមែនជាការចម្លែកឡើយ ដែលវា«ដើរក្រវែលដូចតោដែលកំពុងគ្រហឹមរកលេបត្របាក់អ្នកណាម្នាក់»។ (ពេត្រុសទី១ ៥:៨) «តោ»នេះចង់តែលេបត្របាក់យើងក្នុងន័យថាវាចង់បណ្ដាលឲ្យយើងបង្ខូចឬបំផ្លាញចំណងមិត្ដភាពរបស់យើងជាមួយនឹងព្រះ។—ទំនុកតម្កើង ៧:១, ២; ធីម៉ូថេទី២ ៣:១២
រាល់ដងដែលមនុស្សម្នាក់ប្រគល់ខ្លួនជូនព្រះ ហើយទទួលការជ្រមុជទឹក នោះបង្ហាញថាសាថាននិយាយខុស
៤, ៥. (ក) តើព្រះយេហូវ៉ាបានដាក់កម្រិតទៅលើអំណាចរបស់សាថានតាមវិធីសំខាន់ពីរយ៉ាងអ្វី? (ខ) តើគ្រិស្ដសាសនិកពិតទទួលការធានាអ្វី?
៤ ទោះជាសត្រូវរបស់យើងកាចសាហាវក៏ដោយ គ្មានហេតុឲ្យយើងភ័យខ្លាចហួសហេតុពេកទេ។ ហេតុអ្វី? គឺដោយសារព្រះយេហូវ៉ាដាក់កម្រិតទៅលើអំណាចរបស់«តោដែលកំពុងគ្រហឹម»នេះ តាមវិធីពីរយ៉ាងដ៏សំខាន់។ តើមានអ្វីខ្លះ? ទី១ ព្រះយេហូវ៉ាបានទាយថា គ្រិស្ដសាសនិកពិត«មួយក្រុមធំ»នឹងរួចជីវិតនៅ«គ្រាទុក្ខវេទនាដ៏ខ្លាំង»ដែលជិតមកដល់នោះ។ (ការបើកបង្ហាញ ៧:៩, ១៤) ទំនាយរបស់ព្រះមិនដែលខុសទេ។ ដូច្នេះ សាថានច្បាស់ជាដឹងថាវានឹងមិនអាចលេបត្របាក់រាស្ដ្រទាំងអស់របស់ព្រះបានឡើយ។
៥ យើងអាចស្វែងយល់វិធីទី២ដោយគិតអំពីសេចក្ដីពិតជាមូលដ្ឋានមួយដែលបុរសស្មោះត្រង់ម្នាក់របស់ព្រះនៅសម័យបុរាណបានប្រាប់។ អ័សារាដែលជាអ្នកប្រកាសទំនាយ បានប្រាប់ស្ដេចអេសាថា៖ «កំពុងដែលអ្នករាល់គ្នានៅជាមួយនឹងព្រះយេហូវ៉ា នោះទ្រង់ក៏គង់ជាមួយនឹងអ្នករាល់គ្នាដែរ»។ (របាក្សត្រទី២ ១៥:២; សូមអាន កូរិនថូសទី១ ១០:១៣) មានកំណត់ហេតុច្រើនណាស់អំពីព្រឹត្ដិការណ៍នៅអតីតកាលដែលបញ្ជាក់ថាសាថានតែងតែបរាជ័យពេលវាខំលេបត្របាក់រាស្ដ្រណាម្នាក់របស់ព្រះយេហូវ៉ាដែលនៅជិតស្និទ្ធជាមួយនឹងលោក។ (ហេប្រឺ ១១:៤-៤០) សព្វថ្ងៃនេះ គ្រិស្ដសាសនិកដែលនៅជិតស្និទ្ធជាមួយនឹងព្រះអាចតស៊ូនឹងមេកំណាច ហើយឈ្នះវាទៀតផង។ តាមពិត បណ្ដាំរបស់ព្រះធានាថា៖ «ចូរតស៊ូនឹងមេកំណាច រួចវានឹងរត់ចេញពីអ្នករាល់គ្នា»។—យ៉ាកុប ៤:៧
‹យើងមានការប្រយុទ្ធនឹងពួកវិញ្ញាណទុច្ចរិតនៅស្ថានសួគ៌›
៦. តើសាថានប្រយុទ្ធប្រឆាំងគ្រិស្ដសាសនិកម្នាក់ៗយ៉ាងដូចម្ដេច?
៦ ក្នុងន័យធៀប យើងកំពុងចូលរួមក្នុងចម្បាំងមួយប្រឆាំងសាថាន។ វាពុំអាចឈ្នះចម្បាំងនេះបានឡើយ តែវាអាចលេបត្របាក់យើងម្នាក់ៗបាន បើយើងមិនប្រុងប្រយ័ត្នជានិច្ច។ សាថានដឹងថាវាអាចលេបត្របាក់យើងបានបើវាអាចធ្វើឲ្យចំណងមិត្ដភាពរបស់យើងជាមួយនឹងព្រះយេហូវ៉ាទៅជាខ្សោយ។ តើសាថានខំធ្វើដូច្នេះតាមវិធីណា? វាវាយប្រហារមកលើយើងដោយប្រើយុទ្ធសាស្ដ្របី ពោលគឺ: វាយប្រហារយើងយ៉ាងខ្លាំង វាយប្រហារមកលើរូបយើងផ្ទាល់ ហើយវាយប្រហារដោយប្រើកលល្បិចផ្សេងៗ។ ឥឡូវយើងនឹងពិចារណាយុទ្ធសាស្ដ្រសំខាន់ៗរបស់សាថាន។
៧. ហេតុអ្វីសាថានកំពុងវាយប្រហាររាស្ដ្ររបស់ព្រះយេហូវ៉ាយ៉ាងសាហាវ?
៧ ការវាយប្រហារយ៉ាងខ្លាំង។ សាវ័កយ៉ូហានប្រាប់ថា៖ «ពិភពលោកទាំងមូលនៅក្រោមអំណាចរបស់មេកំណាច»។ (យ៉ូហានទី១ ៥:១៩) ពាក្យនោះព្រមានគ្រិស្ដសាសនិកពិតទាំងឡាយ។ ដោយសារសាថានបានលេបត្របាក់ពិភពលោកទុច្ចរិតទាំងមូលនេះហើយ វាអាចផ្ដោតអារម្មណ៍ទៅលើការវាយប្រហារកាន់តែខ្លាំងឡើងទៅលើអ្នកដែលបានគេចផុតពីក្រញាំរបស់វា ពោលគឺ រាស្ដ្ររបស់ព្រះយេហូវ៉ា។ (មីកា ៤:១; យ៉ូហាន ១៥:១៩; ការបើកបង្ហាញ ១២:១២, ១៧) វាក្ដៅចិត្ដខ្លាំងណាស់ដោយសារវាដឹងថាពេលវេលារបស់វានៅសល់តែបន្ដិចទេ។ ដូច្នេះវាកំពុងខំប្រឹងលើសជាងធម្មតា។ សព្វថ្ងៃនេះ យើងកំពុងរស់នៅគ្រាដែលវាខំប្រឹងយ៉ាងសាហាវព្រៃផ្សៃជាចុងក្រោយ ដើម្បីបំផ្លាញចំណងមិត្ដភាពរបស់យើងជាមួយនឹងព្រះ។
៨. ពេលដែលប៉ូលនិយាយថាយើងមាន«ការប្រយុទ្ធ»ជាមួយនឹងពួកវិញ្ញាណអាក្រក់ តើនោះមានន័យដូចម្ដេច?
៨ ការវាយប្រហារមកលើរូបយើងផ្ទាល់។ សាវ័កប៉ូលបានព្រមានគ្រិស្ដសាសនិករួមជំនឿថា៖ «យើងមានការប្រយុទ្ធ . . . [នឹង]ពួកវិញ្ញាណទុច្ចរិតនៅស្ថានសួគ៌»។ (អេភេសូរ ៦:១២) ហេតុអ្វីប៉ូលប្រើពាក្យ«ប្រយុទ្ធ»? ពីព្រោះពាក្យ«ប្រយុទ្ធ»សំដៅទៅលើការប្រឈមមុខគ្នាតយុទ្ធ។ ដូច្នេះ ដោយប្រើពាក្យនេះ ប៉ូលសង្កត់ធ្ងន់ថាយើងម្នាក់ៗត្រូវតយុទ្ធនឹងពួកវិញ្ញាណអាក្រក់ដោយផ្ទាល់។ ទោះជាយើងរស់នៅប្រទេសដែលមនុស្សទូទៅជឿឬមិនជឿវិញ្ញាណអាក្រក់ក៏ដោយ យើងមិនត្រូវភ្លេចថា ពេលដែលយើងបានប្រគល់ខ្លួនជូនព្រះយេហូវ៉ា គឺប្រៀបដូចជាយើងចូលសង្វៀនបោកចំបាប់ហើយ។ ចាប់តាំងពីគ្រិស្ដសាសនិកម្នាក់ប្រគល់ខ្លួនជូនព្រះ នោះគាត់ត្រូវប្រយុទ្ធជាប់រហូត។ ហេតុនេះហើយបានជាប៉ូលយល់ឃើញថា គាត់ត្រូវដាស់តឿនគ្រិស្ដសាសនិកនៅក្រុងអេភេសូរបីដងឲ្យ«កាន់ជំហរមាំមួន»។—អេភេសូរ ៦:១១, ១៣, ១៤
៩. (ក) ហេតុអ្វីសាថាននិងពួកវិញ្ញាណកំណាចប្រើ«កលល្បិច»ផ្សេងៗ? (ខ) ហេតុអ្វីសាថានខំបង្ខូចគំនិតរបស់យើង? ហើយតើយើងអាចការពារខ្លួនកុំឲ្យចាញ់ឥទ្ធិពលរបស់វាយ៉ាងដូចម្ដេច? (សូមមើលប្រអប់ដែលមានចំណងជើងថា « ចូរប្រុងប្រយ័ត្ននឹងការបោកបញ្ឆោតរបស់សាថាន!») (គ) តើយើងនឹងពិចារណាអំពីកលល្បិចមួយណាឥឡូវនេះ?
៩ កលល្បិចផ្សេងៗ។ ប៉ូលដាស់តឿនគ្រិស្ដសាសនិកឲ្យកាន់ជំហរមាំមួននៅចំពោះ«កលល្បិចទាំងប៉ុន្មាន»របស់សាថាន។ (អេភេសូរ ៦:១១) សូមកត់សម្គាល់ប៉ូលប្រើពាក្យថា«ទាំងប៉ុន្មាន»។ ពួកវិញ្ញាណអាក្រក់មិនប្រើកលល្បិចតែមួយទេ គឺពួកវាប្រើកលល្បិចផ្សេងៗ។ ពួកវាធ្វើដូច្នេះដោយមានមូលហេតុ។ តើមានមូលហេតុអ្វី? គឺដោយសារបងប្អូនខ្លះបានកាន់ជំហរមាំមួននៅចំពោះមុខឧបាយកលម្យ៉ាង តែបានចាញ់ឧបាយកលផ្សេងទៀតក្រោយមក។ ដូច្នេះ សាថាននិងពួកវិញ្ញាណកំណាចសង្កេតមើលការប្រព្រឹត្ដរបស់យើងយ៉ាងដិតដល់ ដើម្បីស្វែងយល់អំពីចំណុចខ្សោយបំផុតរបស់យើង។ លុះឃើញចំណុចខ្សោយហើយ ពួកវាវាយប្រហារចំចំណុចនោះតែម្ដង។ ប៉ុន្ដែយើងអាចកត់សម្គាល់កលល្បិចជាច្រើនរបស់សាថានបាន ដោយសារគម្ពីរជួយបកអាក្រាតកលល្បិចទាំងនោះ។ (កូរិនថូសទី២ ២:១១) នៅជំពូកមុនៗយើងបានពិចារណាអំពីកលល្បិចខ្លះដូចជា ការទាក់ទាញខាងសម្ភារៈ ការសេពគប់អាក្រក់ និងអំពើប្រាសចាកសីលធម៌ខាងផ្លូវភេទ។ ឥឡូវយើងនឹងពិចារណាអំពីកលល្បិចមួយទៀតរបស់សាថាន គឺការទាក់ទងពួកវិញ្ញាណអាក្រក់។
ការទាក់ទងនឹងពួកវិញ្ញាណអាក្រក់ជាការក្បត់
១០. (ក) តើការទាក់ទងនឹងពួកវិញ្ញាណអាក្រក់រួមបញ្ចូលអ្វីខ្លះ? (ខ) តើព្រះយេហូវ៉ាមានទស្សនៈយ៉ាងណាចំពោះការទាក់ទងនឹងពួកវិញ្ញាណអាក្រក់? តើអ្នកមានទស្សនៈយ៉ាងណា?
១០ វិធីខ្លះដែលមនុស្សទាក់ទងនឹងពួកវិញ្ញាណអាក្រក់គឺដោយទាយគន់គូរ ប្រើវេទមន្ដ ដាក់អំពើ ពាក់ខ្សែគាថាឬយ័ន្ដ ស្វែងរកប្រផ្នូលតាមរយៈការយល់សប្ដិ ប្រើតារាសាស្ដ្រ និងខំទាក់ទងនឹងមនុស្សស្លាប់ជាដើម។ យើងដឹងច្បាស់ហើយថា ព្រះយេហូវ៉ាចាត់ទុកការទាក់ទងនឹងពួកវិញ្ញាណអាក្រក់«ជាទីស្អប់ខ្ពើម»។ (ចោទិយកថា ១៨:១០-១២; ការបើកបង្ហាញ ២១:៨) ដោយសារយើងក៏ត្រូវ«ស្អប់ខ្ពើមអ្វីៗដែលទុច្ចរិត»ដែរ នោះយើងមិនត្រូវសេពគប់ជាមួយនឹងពួកវិញ្ញាណអាក្រក់ឡើយ។ (រ៉ូម ១២:៩) បើយើងធ្វើដូច្នេះ នោះជាការក្បត់ព្រះយេហូវ៉ា ដែលជាបិតារបស់យើងនៅស្ថានសួគ៌តាមរបៀបគួរឲ្យខ្ពើមឆ្អើម!
១១. បើសាថានអាចទាក់ទាញយើងឲ្យធ្វើអ្វីដែលជាការទាក់ទងនឹងពួកវិញ្ញាណអាក្រក់ ហេតុអ្វីនោះជាជ័យជម្នះអស្ចារ្យសម្រាប់វា? សូមឲ្យឧទាហរណ៍។
១១ ក៏ប៉ុន្ដែ ដោយសារការទាក់ទងនឹងពួកវិញ្ញាណអាក្រក់ជាការក្បត់ព្រះយេហូវ៉ាយ៉ាងគួរស្អប់ខ្ពើម នោះជាហេតុដែលសាថានបានតាំងចិត្ដទាក់ទាញយើងខ្លះឲ្យចូលរួមធ្វើអំពើនេះ។ កាលណាសាថានអាចល្បួងគ្រិស្ដសាសនិកណាម្នាក់ឲ្យចាប់ផ្ដើមទាក់ទងនឹងពួកវិញ្ញាណកំណាចបាន នោះរាប់ជាជ័យជម្នះយ៉ាងអស្ចារ្យមួយ។ ហេតុអ្វី? សូមគិតអំពីឧទាហរណ៍ដូចតទៅនេះ: បើមេបញ្ជាការខាងទ័ពសត្រូវអាចល្បួងលួងលោមកូនទាហាននៃទ័ពម្ខាងទៀតឲ្យក្បត់ ហើយរត់ចោលកងទ័ពរបស់ខ្លួន រួចចូលខាងទ័ពរបស់គាត់វិញ មេបញ្ជាការនោះនឹងអរខ្លាំងណាស់។ គាត់ក៏ប្រហែលជាដង្ហែអ្នកក្បត់នោះនៅមុខមេបញ្ជាការនៃទ័ពម្ខាងទៀតដូចជាជ័យភណ្ឌ ដើម្បីបង្អាប់មើលងាយអតីតមេបញ្ជាការរបស់អ្នកក្បត់នោះ។ ស្រដៀងគ្នាដែរ បើគ្រិស្ដសាសនិកម្នាក់ចាប់ផ្ដើមធ្វើអ្វីដែលជាការទាក់ទងនឹងពួកវិញ្ញាណអាក្រក់ នោះគាត់កំពុងក្បត់ហើយរត់ចោលព្រះយេហូវ៉ា រួចដាក់ខ្លួនក្រោមបង្គាប់របស់សាថានផ្ទាល់។ សូមគិតថាសាថានអរយ៉ាងណាពេលវាដង្ហែអ្នកក្បត់នោះដូចជាជ័យភណ្ឌ! តើយើងចង់ជួយមេកំណាចឲ្យទទួលបានជ័យជម្នះដូច្នេះឬទេ? ច្បាស់ជាមិនចង់ទេ! យើងមិនមែនជាអ្នកក្បត់ឡើយ។
ការប្រើសំណួរដើម្បីបង្កើតឲ្យមានការសង្ស័យ
១២. តើសាថានប្រើវិធីណាដើម្បីធ្វើឲ្យយើងផ្លាស់ប្ដូរទស្សនៈចំពោះការទាក់ទងនឹងពួកវិញ្ញាណអាក្រក់?
១២ ដរាបណាដែលយើងស្អប់ខ្ពើមនូវការទាក់ទងនឹងពួកវិញ្ញាណអាក្រក់ ដរាបនោះសាថានមិនអាចឈ្នះយើងដោយប្រើកលល្បិចមួយនោះបានឡើយ។ ដូច្នេះ វាទទួលស្គាល់ថាវាត្រូវធ្វើឲ្យយើងផ្លាស់ប្ដូរគំនិត។ តើតាមរបៀបណា? វារកវិធីបំភាន់គ្រិស្ដសាសនិករហូតដល់ពួកគេខ្លះចាប់ផ្ដើមចាត់ទុក«សេចក្ដីអាក្រក់ថាជាល្អ ហើយសេចក្ដីល្អថាជាអាក្រក់»។ (អេសាយ ៥:២០) ច្រើនដង ដើម្បីសម្រេចគោលដៅនេះ សាថានផ្អែកលើវិធីមួយដែលវាធ្លាប់ប្រើដោយជោគជ័យតាំងពីយូរយារមកហើយ គឺវាប្រើសំណួរដើម្បីបង្កើតឲ្យមានការសង្ស័យ។
១៣. តើសាថានធ្លាប់ប្រើសំណួរយ៉ាងដូចម្ដេចដើម្បីបង្កើតឲ្យមានការសង្ស័យ?
១៣ សូមកត់សម្គាល់នូវរបៀបផ្សេងៗដែលសាថានធ្លាប់ប្រើសំណួរនៅអតីតកាល។ នៅសួនអេដែនវាសួរអេវ៉ាថា៖ «តើព្រះមានបន្ទូលហាមមិនឲ្យអ្នកបរិភោគផ្លែឈើណានៅក្នុងសួនច្បារមែនឬ?»។ នៅសម័យយ៉ូប ក្នុងអំឡុងពេលមានប្រជុំនៅស្ថានសួគ៌ សាថានបានលើកសំណួរថា៖ «ដែលយ៉ូបកោតខ្លាចដល់ព្រះអង្គ តើឥតមានប្រយោជន៍ទេឬ?»។ ម្យ៉ាងទៀត ពេលដែលលោកយេស៊ូទើបតែចាប់ផ្ដើមកិច្ចបម្រើនៅផែនដី សាថានបានសួរគ្រិស្ដថា៖ «បើអ្នកជាកូនរបស់ព្រះមែន ចូរបង្គាប់ឲ្យដុំថ្មទាំងនេះក្លាយជានំប៉័ងទៅ»។ សូមគិតទៅមើល ក្នុងករណីលោកយេស៊ូ សាថានហ៊ានចំអកឲ្យព្រះយេហូវ៉ា ដោយប្រើពាក្យដដែលដែលព្រះយេហូវ៉ាបានមានប្រសាសន៍៦អាទិត្យមុននោះ ពេលថា៖ «នេះជាបុត្រដែលជាទីស្រឡាញ់របស់ខ្ញុំ ជាទីពេញចិត្ដខ្ញុំណាស់»។—លោកុប្បត្ដិ ៣:១, យើងកែជាអក្សរទ្រេត; យ៉ូប ១:៩, យើងកែជាអក្សរទ្រេត; ម៉ាថាយ ៣:១៧; ៤:៣
១៤. (ក) តើសាថានប្រើឧបាយកលយ៉ាងដូចម្ដេចដើម្បីបង្កើតឲ្យមានការសង្ស័យថា ការទាក់ទងនឹងពួកវិញ្ញាណកំណាចមិនសូវអាក្រក់ប៉ុន្មានទេ? (ខ) តើយើងនឹងពិចារណាអំពីរឿងអ្វីឥឡូវនេះ?
១៤ សព្វថ្ងៃនេះមេកំណាចប្រើវិធីស្រដៀងគ្នាដែរ ក្នុងការព្យាយាមបង្កើតឲ្យមានការសង្ស័យថា ការទាក់ទងនឹងពួកវិញ្ញាណកំណាចមិនសូវអាក្រក់ប៉ុន្មានទេ។ គួរឲ្យស្តាយ វាបានធ្វើឲ្យអ្នកជឿមួយចំនួនមានការសង្ស័យមែន។ ពួកគេបានចាប់ផ្ដើមឆ្ងល់ថា ‹តើការប្រព្រឹត្ដខ្លះដែលទាក់ទងនឹងពួកវិញ្ញាណអាក្រក់ពិតជាអាក្រក់មែនឬ?›។ (កូរិនថូសទី២ ១១:៣) តើតាមរបៀបណាដែលយើងអាចជួយបងប្អូនដែលមានការសង្ស័យបែបនេះឲ្យកែប្រែគំនិតរបស់ពួកគេ? ហើយតើយើងអាចធ្វើដូចម្ដេចដើម្បីកុំឲ្យឧបាយកលរបស់សាថានមានឥទ្ធិពលមកលើយើង? ដើម្បីឆ្លើយសំណួរទាំងនេះ យើងនឹងពិចារណាអ្វីពីរយ៉ាងដែលសាថានបានបំពុលយ៉ាងប៉ិនប្រសប់ដើម្បីធ្វើឲ្យមានលក្ខណៈដែលទាក់ទងនឹងពួកវិញ្ញាណអាក្រក់។ អ្វីពីរយ៉ាងនោះគឺការកម្សាន្ដនិងការថែទាំសុខភាព។
វាប្រើសេចក្ដីប៉ងប្រាថ្នានិងសេចក្ដីត្រូវការរបស់យើងជាអន្ទាក់
១៥. (ក) តើមនុស្សជាច្រើននៅបស្ចិមប្រទេស មានទស្សនៈយ៉ាងណាចំពោះអ្វីដែលទាក់ទងនឹងពួកវិញ្ញាណអាក្រក់? (ខ) តើគ្រិស្ដសាសនិកខ្លះបានទទួលឥទ្ធិពលយ៉ាងណាពីទស្សនៈរបស់ពិភពលោកនេះស្ដីអំពីការទាក់ទងនឹងពួកវិញ្ញាណអាក្រក់?
១៥ ជាពិសេសនៅបស្ចិមប្រទេស មនុស្សកាន់តែចាត់ទុកថាការទាក់ទងនឹងពួកវិញ្ញាណអាក្រក់ ការធ្វើមន្ដអាគម និងការប្រព្រឹត្ដឯទៀតបែបនេះគឺជារឿងស្រាល។ ភាពយន្ដ សៀវភៅ កម្មវិធីទូរទស្សន៍ និងហ្គេមកុំព្យូទ័រកាន់តែច្រើនបង្ហាញអំពីការប្រព្រឹត្ដដែលទាក់ទងនឹងពួកវិញ្ញាណកំណាចឲ្យគិតថានោះជាអ្វីដែលធ្វើឲ្យសប្បាយ ជាអ្វីដែលឆ្លៀវឆ្លាត និងគ្មានគ្រោះថ្នាក់ទេ។ ភាពយន្ដនិងសៀវភៅខ្លះដែលទាក់ទងនឹងពួកវិញ្ញាណកំណាច បានទៅជាល្បីរន្ទឺ រហូតដល់អ្នកនិយមបានរៀបចំក្រុមគាំទ្រទៀតផង។ យើងឃើញច្បាស់ថា ពួកវិញ្ញាណកំណាចបានទទួលជោគជ័យក្នុងការធ្វើឲ្យមនុស្សគិតថាការទាក់ទងនឹងពួកវាជារឿងស្រាល។ តើគំនិតដែលចាត់ទុកការទាក់ទងនឹងពួកវិញ្ញាណអាក្រក់ថាជារឿងស្រាលបានមានឥទ្ធិពលទៅលើគ្រិស្ដសាសនិកខ្លះឬទេ? បងប្អូនខ្លះបានទទួលឥទ្ធិពលមែន។ តើតាមវិធីណា? ជាឧទាហរណ៍ គ្រិស្ដសាសនិកម្នាក់បានមើលភាពយន្ដដែលមានមូលដ្ឋានលើការទាក់ទងនឹងពួកវិញ្ញាណអាក្រក់ រួចនិយាយថា«ខ្ញុំបានមើលកុននោះមែន ប៉ុន្ដែខ្ញុំមិនបានប្រព្រឹត្ដអំពើដែលទាក់ទងនឹងពួកវិញ្ញាណអាក្រក់ទេ»។ ហេតុអ្វីការគិតបែបនេះនាំឲ្យមានគ្រោះថ្នាក់?
១៦. ហេតុអ្វីការជ្រើសរើសការកម្សាន្ដដែលផ្ដោតទៅលើការទាក់ទងនឹងពួកវិញ្ញាណកំណាចនាំឲ្យមានគ្រោះថ្នាក់?
១៦ ពិតមែនតែការមើលអ្វីដែលទាក់ទងនឹងពួកវិញ្ញាណអាក្រក់ និងការប្រព្រឹត្ដអំពើនោះគឺខុសគ្នា ប៉ុន្ដែនោះមិនមានន័យថាការមើលភាពយន្ដបែបនោះគ្មានគ្រោះថ្នាក់ទេ។ ហេតុអ្វី? សូមគិតអំពីចំណុចដូចតទៅ: បណ្ដាំរបស់ព្រះឲ្យដឹងថាសាថាននិងពួកវិញ្ញាណកំណាចមិនអាចមើលធ្លុះចិត្ដគំនិតរបស់យើងបានទេ។ * ដូច្នេះ ដូចយើងបានបញ្ជាក់ហើយ ដើម្បីដឹងថាយើងកំពុងគិតអ្វី ឬដើម្បីដឹងអំពីចំណុចខ្សោយរបស់យើង ពួកវិញ្ញាណអាក្រក់ត្រូវមើលការប្រព្រឹត្ដរបស់យើងយ៉ាងដិតដល់ រួមទាំងការកម្សាន្ដដែលយើងជ្រើសរើស។ ពេលដែលការប្រព្រឹត្ដរបស់គ្រិស្ដសាសនិកបង្ហាញថាគាត់ចូលចិត្ដភាពយន្ដឬសៀវភៅដែលមានគ្រូខាបព្រលឹងមនុស្សស្លាប់ ការដាក់អំពើ ខ្មោចចូលមនុស្ស ឬរឿងឯទៀតដែលទាក់ទងនឹងពួកវិញ្ញាណកំណាច បង្ហាញថាគ្រិស្ដសាសនិកនោះកំពុងផ្ដល់ព័ត៌មានឲ្យពួកវិញ្ញាណកំណាច។ តាមពិត គាត់កំពុងបញ្ជាក់ប្រាប់ពួកវាអំពីចំណុចខ្សោយរបស់គាត់តែម្ដង! ជាលទ្ធផល ពួកវាអាចបង្កើនការប្រយុទ្ធរបស់ពួកវាជាមួយនឹងគ្រិស្ដសាសនិកម្នាក់នោះ ដើម្បីវាយប្រហារចំចំណុចខ្សោយដែលគាត់បានបង្ហាញពួកវា រហូតដល់ពួកវាបានបោកចំបាប់ឈ្នះគាត់។ ការពិត បងប្អូនខ្លះដែលចាប់ផ្ដើមមានចំណាប់អារម្មណ៍ចំពោះអ្វីដែលទាក់ទងនឹងពួកវិញ្ញាណអាក្រក់ ដោយសារពួកគេបានអានសៀវភៅឬមើលភាពយន្ដអំពីរឿងនោះ នៅទីបំផុតបានចាប់ផ្ដើមប្រព្រឹត្ដអំពើនោះតែម្ដង។—សូមអាន កាឡាទី ៦:៧
ចូរទទួលប្រយោជន៍ពីការគាំទ្ររបស់ព្រះយេហូវ៉ាពេលអ្នកឈឺ
១៧. តើសាថានអាចប្រើកលល្បិចអ្វីដើម្បីឆ្លៀតយកប្រយោជន៍ពីអារម្មណ៍ទាល់ច្រករបស់អ្នកដែលឈឺ?
១៧ សាថានមិនគ្រាន់តែខំយកសេចក្ដីប៉ងប្រាថ្នារបស់យើងចំពោះការកម្សាន្ដមកប្រើជាអន្ទាក់ប៉ុណ្ណោះទេ តែវាក៏ខំឆ្លៀតយកប្រយោជន៍ពីសេចក្ដីត្រូវការរបស់យើងចំពោះការថែទាំសុខភាពដែរ។ តើតាមរបៀបណា? ប្រហែលជាគ្រិស្ដសាសនិកម្នាក់ឈឺ ហើយខំរកវិធីព្យាបាលនៅគ្រប់កន្លែង។ តែដោយសារសុខភាពរបស់គាត់នៅតែអន់ថយ នោះអាចធ្វើឲ្យគាត់ធ្លាក់ទឹកចិត្ដ។ (ម៉ាកុស ៥:២៥, ២៦) នោះអាចបើកឱកាសឲ្យសាថាននិងពួកវិញ្ញាណកំណាចឆ្លៀតយកប្រយោជន៍ពីអារម្មណ៍ទាល់ច្រកនោះ។ ពួកវិញ្ញាណកំណាចប្រហែលជាល្បួងអ្នកឈឺដែលទាល់ច្រកឲ្យបែរជាពឹងវិធីព្យាបាលដែលរួមបញ្ចូល«វេទមន្ដ»ឬការទាក់ទងនឹងពួកវិញ្ញាណអាក្រក់។ (អេសាយ ១:១៣, ព.ថ.) បើពួកវិញ្ញាណកំណាចទទួលបានជោគជ័យដោយប្រើកលល្បិចនេះ នោះអាចធ្វើឲ្យចំណងមិត្ដភាពរវាងអ្នកឈឺនិងព្រះយេហូវ៉ាទៅជាខ្សោយ។ តើតាមរបៀបណា?
១៨. តើគ្រិស្ដសាសនិកមិនព្រមទទួលវិធីព្យាបាលបែបណា? ហើយហេតុអ្វី?
១៨ ព្រះយេហូវ៉ាបានព្រមានជនជាតិអ៊ីស្រាអែលដែលបានពឹង«វេទមន្ដ»ថា៖ «កាលណាឯងរាល់គ្នាប្រទូលដៃឡើង នោះអញនឹងបែរភ្នែកពីឯងចេញ អើ បើកាលណាឯងអធិស្ឋានជាច្រើន នោះអញនឹងមិនស្តាប់ឡើយ»។ (អេសាយ ១:១៥) យើងតែងតែចង់ជៀសចេញពីអ្វីក៏ដោយដែលអាចរារាំងសេចក្ដីអធិដ្ឋានរបស់យើង និងដែលកាត់បន្ថយនូវការគាំទ្រដែលយើងទទួលពីព្រះយេហូវ៉ា ជាពិសេសនៅពេលដែលយើងឈឺ។ (ទំនុកតម្កើង ៤១:៣) ដូច្នេះ បើមានសញ្ញាសម្គាល់ដែលបញ្ជាក់ថាវិធីព្យាបាលមួយមានលក្ខណៈដែលទាក់ទងនឹងពួកវិញ្ញាណអាក្រក់ នោះគ្រិស្ដសាសនិកពិតមិនព្រមទទួលទេ។ * (ម៉ាថាយ ៦:១៣) ដោយធ្វើដូច្នេះ គាត់អាចប្រាកដថាព្រះយេហូវ៉ានឹងគាំទ្រគាត់ (សូមមើលប្រអប់ដែលមានចំណងជើងថា « តើនោះពិតជាការទាក់ទងនឹងពួកវិញ្ញាណអាក្រក់ឬទេ?»)។
ពេលមានគេនិយាយរឿងជាច្រើនអំពីពួកវិញ្ញាណកំណាច
១៩. (ក) តើមេកំណាចបានបញ្ឆោតមនុស្សជាច្រើនឲ្យជឿអ្វីអំពីអំណាចរបស់វា? (ខ) តើគ្រិស្ដសាសនិកពិត ត្រូវជៀសវាងពីការនិយាយរឿងបែបណា?
១៩ មនុស្សជាច្រើននៅបស្ចិមប្រទេសចាត់ទុកគ្រោះថ្នាក់ដែលមកពីអំណាចរបស់សាថានថាជារឿងលេងសើច តែនៅប្រទេសផ្សេងទៀតមនុស្សមានគំនិតផ្ទុយពីនោះ។ នៅប្រទេសទាំងនោះ មេកំណាចបានបញ្ឆោតមនុស្សជាច្រើនឲ្យគិតថាវាមានឫទ្ធានុភាពខ្លាំងជាងការពិត។ មនុស្សខ្លះខ្លាចវិញ្ញាណកំណាចខ្លាំងណាស់គ្រប់ពេលវេលា។ មានគេនិយាយរឿងជាច្រើនអំពីការអស្ចារ្យដែលពួកវិញ្ញាណកំណាចធ្លាប់ធ្វើ។ មនុស្សច្រើនតែនិទានរឿងបែបនេះដោយរំភើបចិត្ដ ហើយអ្នកស្តាប់ចាប់អារម្មណ៍យ៉ាងខ្លាំងទៅលើរឿងបែបនោះ។ តើយើងគួរចូលរួមផ្សាយរឿងបែបនោះដែរឬទេ? មិនគួរទេ អ្នកបម្រើរបស់ព្រះពិត មិនធ្វើដូច្នេះដោយមូលហេតុសំខាន់ពីរយ៉ាង។
២០. ដោយមិនដឹងខ្លួនតើគ្រិស្ដសាសនិកម្នាក់អាចជួយឃោសនាឲ្យសាថានយ៉ាងដូចម្ដេច?
២០ ទី១ ពេលដែលយើងនិយាយប្រាប់តៗគ្នាអំពីអ្វីដែលពួកវិញ្ញាណកំណាចបានធ្វើ យើងជួយគាំទ្រសាថាន។ តើតាមរបៀបណា? បណ្ដាំរបស់ព្រះបញ្ជាក់ថាសាថានមានសមត្ថភាពធ្វើការអស្ចារ្យមែន ប៉ុន្ដែគម្ពីរក៏ព្រមានដែរថា វាប្រើ«សញ្ញាសម្គាល់ក្លែងក្លាយ»និងការ«បោកបញ្ឆោត»។ (ថែស្សាឡូនិចទី២ ២:៩, ១០) ដោយសារសាថានជាអ្នកពូកែបញ្ឆោតជាងគេបំផុត វាចេះបំភាន់គំនិតរបស់មនុស្សដែលមានភាពទោរទន់ទៅរកការទាក់ទងនឹងពួកវិញ្ញាណអាក្រក់ ឲ្យពួកគេជឿអ្វីដែលមិនមែនជាការពិត។ ពួកគេប្រហែលជាជឿជាក់ថាអ្វីដែលពួកគេបានឃើញនិងឮជាការពិត ហើយប្រហែលជារៀបរាប់ប្រាប់អ្នកឯទៀតអំពីរឿងនោះផងដែរ។ ពីមាត់មួយទៅមាត់មួយរឿងនោះមានលក្ខណៈបញ្ចេញបញ្ចូលខ្លះ។ បើគ្រិស្ដសាសនិកម្នាក់ផ្សាយរឿងបែបនេះ គាត់កំពុងធ្វើតាមបំណងប្រាថ្នារបស់មេកំណាចដែលជា«ឪពុកនៃការភូតភរ»។ គាត់កំពុងជួយឃោសនាឲ្យសាថាន។—យ៉ូហាន ៨:៤៤; ធីម៉ូថេទី២ ២:១៦
២១. តើយើងចង់សន្ទនាអំពីអ្វី?
២១ ទី២ សូម្បីតែគ្រិស្ដសាសនិកម្នាក់ធ្លាប់ជួបប្រទះនឹងពួកវិញ្ញាណអាក្រក់នៅអតីតកាលក៏ដោយ ក៏គាត់មិនត្រូវតំណាលរឿងនោះប្រាប់បងប្អូនរួមជំនឿជាការកម្សាន្ដនោះដែរ។ ហេតុអ្វី? យើងបានត្រូវដាស់តឿនឲ្យ«សម្លឹងមើលទៅលោកយេស៊ូ ជាមេដឹកនាំដែលធ្វើឲ្យយើងមានជំនឿហើយធ្វើឲ្យជំនឿរបស់យើងបានពេញលក្ខណៈ»។ (ហេប្រឺ ១២:២) យើងត្រូវផ្ដោតអារម្មណ៍ទៅលើគ្រិស្ដ មិនមែនសាថានទេ។ គួរឲ្យកត់សម្គាល់ថា កាលដែលលោកយេស៊ូនៅផែនដី លោកមិនបានកម្សាន្ដចិត្ដពួកអ្នកកាន់តាមលោកដោយរៀបរាប់អំពីពួកវិញ្ញាណអាក្រក់ទេ ទោះជាលោកអាចប្រាប់រឿងច្រើនអំពីអ្វីដែលសាថានអាចធ្វើឬមិនអាចធ្វើក្ដី។ ផ្ទុយទៅវិញលោកយេស៊ូបានផ្ចង់អារម្មណ៍ទៅលើដំណឹងអំពីរាជាណាចក្រព្រះ។ ដូច្នេះ តាមគំរូរបស់លោកយេស៊ូនិងពួកសាវ័ក យើងចង់សន្ទនាអំពី«ការដ៏រុងរឿងរបស់ព្រះ»។—សកម្មភាព ២:១១; លូកា ៨:១; រ៉ូម ១:១១, ១២
២២. តើយើងអាចជួយឲ្យមាន‹អំណរនៅស្ថានសួគ៌›ដោយធ្វើអ្វី?
២២ ពិតមែនតែសាថានខំប្រើកលល្បិចផ្សេងៗ ដែលក្នុងនោះមានការទាក់ទងនឹងពួកវិញ្ញាណអាក្រក់ ដើម្បីបំផ្លាញចំណងមិត្ដភាពរបស់យើងជាមួយនឹងព្រះយេហូវ៉ា ប៉ុន្ដែបើយើងស្អប់អ្វីដែលទុច្ចរិត ហើយកាន់ខ្ជាប់តាមអ្វីដែលល្អ នោះយើងនឹងមិនបើកឱកាសឲ្យមេកំណាចធ្វើឲ្យយើងលែងបដិសេធការទាក់ទងនឹងពួកវិញ្ញាណអាក្រក់ ទោះជាតាមវិធីណាក៏ដោយ។ (សូមអាន អេភេសូរ ៤:២៧) សូមគិតថា«នៅស្ថានសួគ៌នឹងមានអំណរ»ដ៏ខ្លាំងយ៉ាងណា បើយើងបន្ដ«កាន់ជំហរមាំមួននៅចំពោះមុខកលល្បិចទាំងប៉ុន្មានរបស់មេកំណាច» រហូតដល់វាលែងមានទៀត!—លូកា ១៥:៧; អេភេសូរ ៦:១១
^ វគ្គ 16 ងារផ្សេងៗរបស់សាថានដូចជា អ្នកប្រឆាំង អ្នកបង្កាច់បង្ខូច អ្នកបោកបញ្ឆោត អ្នកល្បួង អ្នកភូតភរជាដើម មិនបង្កប់អត្ថន័យថាវាចេះមើលធ្លុះចិត្ដគំនិតរបស់យើងទេ។ ក៏ប៉ុន្ដែ ចំណែកព្រះយេហូវ៉ាវិញ លោកបានត្រូវរៀបរាប់ជាអ្នកដែល«លមើលចិត្ដ» ហើយលោកយេស៊ូជាអ្នក«ស្ទង់មើលចិត្ដនិងថ្លើម»។—សុភាសិត ១៧:៣; ការបើកបង្ហាញ ២:២៣
^ វគ្គ 18 ដើម្បីទទួលព័ត៌មានថែមទៀត សូមមើលអត្ថបទដែលមានចំណងជើងថា«ចូរមានទស្សនៈដូចគម្ពីរស្ដីអំពីការថែទាំសុខភាព» ក្នុងទស្សនាវដ្ដីប៉មយាម ថ្ងៃទី១ ខែវិច្ឆិកា ឆ្នាំ២០០៨ ទំព័រ២៥-២៧ វគ្គ១០-១៦។
