1, 2. Ньхöмандьн кʹерʹа шабуне тинә?

ҺӘРГЕ тö зудава Йаһоwарʹа хьзмәт дьки, ньһа тә гәләк щар сәр щьватед мәзьн готаред бона ньхöмандьне бьһистийә. Чахе йед кö ль сәр щерга пешьн рʹуньштьнә, рʹадьбьнә пʹийа, wәки щаба хwә бьдьн ль сәр пьрсед бона ньхöмандьне, шабунәкә мәзьн дькʹәвә дьле тә. Wе дәме тʹәмам чапька ледьхьн у гьрмә-гьрм оде дькʹәвә. Чахе дьвини кö диса кʹомәк жь мәрьвед qимәт, сафи кьрьнә wәки алийе Хwәде бьн, дьбәк чʹәʹвед тә жи тʹьжә һесьр дьбьн. Wан дәма әм шабунәкә мәзьн дьстиньн!

² Әм сале чәнд щара ньхöмандьне дьвиньн, ле мьлйакʹәт һәр тʹьм дьвиньн. Бьдә бәр чʹәʹве хwә ль әʹзмана шабунәкә ча нә, чахе әwана дьвиньн кö һәр һʹәфти бь һʹәзара мәрьв ль сәр тʹәмамийа дьнйайе дьбьн йәк тʹәви тʹәшкиләта Хwәде! (Луqа 15:7,10). Бешьк, мьлйакʹәт пʹьрʹ ша дьбьн бона wе һәвзедәбуне! (Һагай 2:7).

3. Чьма Шәйтʹан «ча шер мьрʹә-мьрʹа wи йә, дьгәрʹә», у әw чь дьхwазә бькә?

³ Һәнә кәсед öса жи йед кö qайим һерс дькʹәвьн, чахе дьвиньн кö мәрьв тенә ньхöмандьне. Әw һәнә Шәйтʹан у щьн. Әwана тәйах накьн, чахе дьвиньн кö бь һʹәзара мәрьв пьшта хwә дьдьнә ве дьнйа хьраббуйи. Чьмки  Шәйтʹан әʹлам кьр, кö тʹö кәс Йаһоwарʹа жь һʹьзкьрьне хьзмәт накә у тʹö кәс щерʹьбандьнед гьранда wе wирʹа амьн нәминә. (Бьхунә Ибо 2:4, 5.) Чахе кәсәк хwә тʹәсмили Йаһоwа дькә, әw избат дькә кö Шәйтʹан дәрәwин ә. Әв йәк бона Шәйтʹан мина силе йә, әва те һʹәсабе кö һәр һʹәфти Шәйтʹан бь һʹәзара сила дьстинә. Әʹщебмайи нинә кö Шәйтʹан «мина шер мьрʹә-мьрʹа wи йә, дьгәрʹә кʹа кʹе һʹуфи хwә кә!» (1 Пәтрус 5:8). Әw «шер» дьхwазә һәләqәтийа мә тʹәви Йаһоwа бьqәтинә йан жи хьраб кә (Зәбур 7:1, 2; 2 Тимотʹейо 3:12).

4, 5. (а) Ча те кʹьфше wәки Йаһоwа бь тʹәмами азайи нәдайә Шәйтʹан? (б) Мәсиһийед рʹаст чьда баwәр ьн?

⁴ Рʹаст ә дьжмьне мә зәʹф сәрʹт ә, ле әм гәрәке жь  wи нәтьрʹсьн. Чьма? Чьмки Йаһоwа бь тʹәмами азайи нәдайә wи. Әве йәке әм жь кʹö заньн? Йа пешьн, Йаһоwа пешда гот, кö «әʹлаләтәкә . . . мәзьн» демәк Мәсиһийед рʹаст wе жь «тәнгасийа мәзьн» дәрбаз бьн (Әʹйанти 7:9, 14). Әм заньн кö пʹехәмбәртийед Хwәде тʹьме тенә сери. Шәйтʹан хwәха жи занә, кö нькарә щьмәʹта Хwәде педа бьхальфинә.

⁵ Әw йәк кö Йаһоwа бь тʹәмами азайи нәдайә Шәйтʹан, öса жи те кʹьфше жь готьна хьзмәткʹарәки Хwәдейи бәре Азарийа. Әwи Асаф пʹадшарʹа гот: «Һәр кö һун бь Хöданрʹа бьн, әw жи бь wәрʹа бә». (2 Дирок 15:2; бьхунә 1 Корьнтʹи 10:13.) Гәләк мәсәлед бәре дьдьнә кʹьфше кö Шәйтʹан тʹö щар нькарьбуйә һʹуфи хwә кә wан хьзмәткʹаред Хwәде, йед кö һәләqәтийа qәwи тʹәви Йаһоwа хwәйи кьрьнә (Ибрани 11:4-40). Рʹожа иройин әw Мәсиһи, һәләqәтийа кʹижани кö тʹәви Йаһоwа qәwи йә, дькарә мьqабьли Шәйтʹан дәре у wи алт кә. Хәбәра Хwәде мә дьдә баwәркьрьне: «Мьqабьли Мирещьн бьсәкьньн у әwе жь wә бьрʹәвә» (Аqуб 4:7).

6. Шәйтʹан ча шәрʹ дькә тʹәви мә һәр кәси?

⁶ Шәйтʹан Мире-щьна нькарә шәрʹе рʹöһʹанида сәркʹәвә, ле мә һәр кәси башqә-башqә дькарә алт кә, һәрге әм һʹьшйарбуна хwә хwәйи нәкьн. Шәйтʹан занә кö һәрге әw бькарьбә һәләqәтийа мә тʹәви Йаһоwа хьраб кә, wе һеса мә алт кә. Ле ча әw дьхwазә һәләqәтийа мә тʹәви Йаһоwа хьраб кә? Бь аликʹарийа пәйкʹәтьна зöлми, у бь шәрʹе пешбәри мә һәр кәси, у öса жи бь фелбазийе у мьхәнәтийе. Wәрә әм әwан метʹодед Шәйтʹан шьровәкьн.

7. Чьма Шәйтʹан бь зöлми пәй хьзмәткʹаред Йаһоwа дькʹәвә?

⁷ Пәйкʹәтьна зöлми. Йуһʹәннайе шанди ньвисийә:  «Тʹәмамийа дьнйайе бьн һʹöкöме Йе Хьрабда йә» (1 Йуһʹәнна 5:19). Әw гьли һʹәму Мәсиһийед рʹаст һин дькә, wәки әwана фәсал бьн у һаш жь хwә һәбьн. Чьмки Шәйтʹан зәфти хwә кьрийә тʹәмамийа дьнйа хьраб, ньһа жи әwи һʹьш аqьле хwә дайә сәр хьзмәткʹаред Йаһоwа, кʹижан кö накʹәвьнә бьн һʹöкöме wи, у әw бь һерс пәй wан дькʹәвә (Миха 4:1; Йуһʹәнна 15:19; Әʹйанти 12:12, 17). Шәйтʹан пʹьрʹ һерс ә, чьмки занә кö wәʹде wи һьндьк майә, у әw пәйкʹәтьна хwә һе qәwи дькә. Рʹожа иройин Шәйтʹан һе зедә qәwате хәрщ дькә, wәки һәләqәтийа мә тʹәви Йаһоwа хьраб кә.

8. Паwлос бь хәбәра «шәрʹ» чь дьхwәст бьгота?

⁸ Шәрʹе пешбәри мә һәр кәси башqә-башqә. Паwлосе шанди тʹәми да, кö хушк у бьра һаш жь хwә һәбьн: «Шәрʹе мә . . . мьqабьли ордийед рʹöһʹанийә хьрабә ль дийаре әʹзмана нә» (Әфәси 6:12). Хәбәра Йунани кʹижан кö һатийә wәлгәрʹандьне ча «шәрʹ», те һʹәсабе шәрʹе бь дәста йан жи шәрʹе ортʹа дö мәрьва. Паwлос дьхwәст кʹьфш кьра кö әм һәр кәс тʹәви кәсед рʹöһʹанийә хьраб дь шәрʹда ньн. Фьрqи тʹöнә wәлате мәда бәлабуйи йә әв баwәрбун кö кәсед рʹöһʹанийә хьраб һәнә йане на, әм гәрәке тʹьме бира хwәда хwәйи кьн кö чахе мә хwә тʹәсмили Йаһоwа кьр, ча бежи әм дәркʹәтьнә шерʹ тʹәви рʹöһʹед хьраб. Һәр Мәсиһик һәма wе дәмеда чахе хwә тʹәсмили Йаһоwа дькә, әʹсәйи дькʹәвә нава wи шәрʹи. Ләма жи әʹщебмайи нинә кö Паwлос Мәсиһийед жь Әфәсирʹа се щара гот, wәки «qәwин бьсәкьньн» (Әфәси 6:11, 13, 14).

9. (а) Чьма Шәйтʹан у щьн тʹәлькед щурʹә-щурʹә дьдьнә хәбате? (б) Чьма Шәйтʹан дьхәбьтә кö мә шаш кә, ле әм ча дькарьн мьqабьли wи бьн? (Бьньһерʹә чаргошә « Фәсал Бә жь Мьхәнәтийа Шәйтʹан!») (в) Дәрһәqа кʹижан тʹәльке әме ньһа хәбәр дьн?

⁹ Фелбази у мьхәнәти. Паwлос Мәсиһи һелан кьрьн кö мьqабьли «һʹöнöред» Шәйтʹан бьн (Әфәси 6:11). Дина хwә бьдә, Паwлос хәбәра «һʹöнöр» бь һʹәсабе гәләкани  да хәбате. Жь вьр те кʹьфше кö рʹöһʹед хьраб гәләк щурʹә тʹәлька дьдьнә хәбате у нә бадиһәwа. Һәбунә Мәсиһи кö щерʹьбандьнәкеда qәwи сәкьнинә, ле йәкә дьнда амьн нәманә. Ләма жи Шәйтʹан Мире-щьна у щьн пәй мә һәр кәси дьньһерʹьн сәва бьвиньн әм чьда сьст ьн у әwе сьстбуна мә дьдьнә хәбате, wәки нета хwә биньнә сери. Ле баш ә, wәки әм жь Кʹьтеба Пироз һаш пе һәнә кö Шәйтʹан чь тʹәлька дьдә хәбате (2 Корьнтʹи 2:11). Ве кʹьтебеда мә ида хәбәр дайә дәрһәqа чәнд тʹәлькед Шәйтʹан, мәсәлә, һәбуна ве дьнйайе, һәвалтийа хьраб у бенамуси. Ле ньһа wәрә әм хәбәр дьн диса дәрһәqа тʹәлькәкә Шәйтʹан, сербази (спиритизм).

10. (а) Чь те һʹәсабе сербази? (б) Йаһоwа ча дьньһерʹә сәр сербазийе, у тö ча дьньһерʹи сәр wе йәке?

¹⁰ Мәрьвед кö сербазийева мьжул дьбә әw рʹастә-рʹаст тʹәви щьна дькʹәвә һәләqәтийе. Гәләк щурʹед сербазийе һәнә, мәсәлә кʹочʹәкти, фәʹльквәкьрьн, хәбәрдана тʹәви мьрийа у тьштед майин. Әм рʹьнд заньн, wәки әв һʹәму тьшт бәр чʹәʹве Хwәде рʹәш ьн (Qануна Дöщари 18:10-12; Әʹйанти 21:8). Һәрге тьштед һʹәрам бәр чʹәʹве мә жи рʹәш бьн, wе qәт һʹьше мәрʹа жи дәрбаз нәбә кö әм тʹәви щьна бькʹәвьнә һәләqәтийе (Рʹомайи 12:9). Нә ахьр жь бо һәләqәтийа тʹәви щьна, әме бьбьнә нәмаме мьрдар һьндава Хwәде.

11. Шәйтʹан чьма wе гәләк ша бә, һәрге wирʹа бе стандьне кәсәки жь мә бавежә тʹәлька сербазийе? Бь мәсәле шьровәкә.

¹¹ Шәйтʹан занә кö һәрге Мәсиһи сербазийева мьжул бә, әwе бьбә нәмамәки мьрдар бәр чʹәʹве Йаһоwа. Ләма жи Шәйтʹан чьqас дькарә, дьхәбьтә wәки әм әве йәке бькьн. Чахе Шәйтʹанрʹа те стандьне кö кәсәки бьдә шашкьрьне wәки сербазийева мьжул бә, әw гәләк ша дьбә. Гәло чьма? Wәрә әм мәсәләкә öса биньн: һәрге әскәрәк ордийа хwә бьһелә у дәрбази ордийа дьжмьна  бә, сәрәскәре ордийа дьжмьна wе гәләк ша бә. Дьбәк жи әв сәрәскәре ордийа дьжмьна wе һʹәму щийа әʹлам кә дәрһәqа кьре wи әскәре нәмам, сәва кö сәрәскәре ордийа дьн беqәдьр кә. Бь wи щурʹәйи һәрге Мәсиһи сербазийева мьжул дьбә, әw Йаһоwа дьһелә у хwәха хwә дьдә дәсте Шәйтʹан Мире-щьна. Һьнге мәщала Шәйтʹан wе һәбә кö бәр һʹәмуйа Йаһоwа беqәдьр кә. Бьдә бәр чʹәʹве хwә Шәйтʹан чьqас wе ша бә. Гәло кәсәк жь мә wе бьхwазә öса Шәйтʹан ша кә? Һьлбәт, на. Әм тʹö щар нахwазьн бьбьнә нәмаме Йаһоwа.

12. Шәйтʹан кʹижан метода дьдә хәбате, сәва кö сәр фькьред мә бона сербазийе, һʹöкöм кә?

¹² Шәйтʹан тʹö щар нькарә мә бькә нава сербазийе, чьмки әв йәк бәр чʹәʹве мә рʹәш ә. Ләма әw фәʹм дькә кö лазьм ә ньһерʹандьна мә бьгöһезә. Әw һʹәму метода дьдә хәбате сәва кö Мәсиһийа шаш кә, wәки әwана бьбьнә мина wан мәрийа «йен кö жь хәрабрʹа дьбежьн qәнщ, жь qәнщрʹа дьбежьн хәраб» (Ишайа 5:20). Сәва кö бьгьһижә wе нете, әw методәкә щерʹьбанди дьдә хәбате: пьрса пешда тинә wәки, шьке бьчинә.

13. Шәйтʹан ча пьрса пешда тинә, кö шьке бьчинә?

¹³ Ньһа әм бьньһерʹьн һәла Шәйтʹан әw метʹод бәре ча дьда хәбате. Дь бахче Адәнеда әwи жь Һеwайе пьрси: «Рʹасти Хwәде готийә wәки жь һʹәму даред бахчә гәрәке нәхwьн?» Wәʹде Ибода, чахе ль әʹзмана мьлйакʹәт тʹәвайи тʹоп бун, Шәйтʹан пьрс пешда ани: «Ма Әйуб ль щиһе вала жь Хwәде дьтьрсә?» Ле wәʹде дәстпебуна хьзмәта Исайә ль сәр әʹрде Шәйтʹан Иса щерʹьбанд: «Һәгәр тö Кöрʹе Хwәде йи, дә бежә ван кәвьра кö бьбьнә нан». Бьдә һʹәсабе хwә, кö Шәйтʹан изьн да хwә, кö бькʹәнә сәр wан гьлийа кʹижан кö wәкә шәш һʹәфти пешда Йаһоwа хwәха гот: «Әв ә Кöрʹе мьни дәлал, кö әз жь wи рʹази мә» (Дәстпебун 3:1, ПКʹМ; Ибо 1:9; Мәтта 3:17; 4:3).

14. (а) Шәйтʹан ча шьке дьчьнә һьндава сербазийе? (б) Ньһа әме дәрһәqа чь хәбәр дьн?

 ¹⁴ Рʹожа иройин Шәйтʹан диса әве методе дьдә хәбате. Йазьх, wирʹа һатә стандьне кö һʹьше һьнә Мәсиһийада шьке бьчинә. Әwана дöдьли бун wе йәкеда, кö һьнә щурʹә сербази бь рʹасти зийане тиньн. Әм дькарьн бежьн кö һʹьше wанда фькьре öса дәрбаз дьбә: «Гәло бь рʹасти сербази зийане тинә?» (2 Корьнтʹи 11:3). Ле ча әм дькарьн али ван Мәсиһийа бькьн wәки әwана ньһерʹандьна хwә бьгöһезьн? У чь әм дькарьн бькьн wәки әм нәкʹәвьнә wе тʹәлька Шәйтʹан? Сәва кö щаба ван пьрса бьдьн, wәрә әм хәбәр дьн дәрһәqа дö дәрәще әʹмьр, кʹидәреда кö һәнә һьнә щурʹед сербазийе йед кö Шәйтʹан бь мьхәнәтийе дайә хәбате. Әв һәнә wәʹдәдәрбазкьрьн у хәмкьрьн бона сьһʹәт-qәwате.

15. (а) Дь wәлатед рʹоавайеда мәрьв сәр сербазийе ча дьньһерʹьн? (б) Ча аqьлсьвьктийа ве дьнйайе дәрһәqа сербазийе, сәр һьнә Мәсиһийа һʹöкöм буйә?

¹⁵ Дь wәлатед рʹоавайеда мәрьв чьqас дьчә сьвьк дьньһерʹьн ль сәр кʹочʹәктийе, фәʹльквәкьрьне, у щурʹед сербазийейә майин. Дь синәмада, кʹьтебада, бәрнамед телевизийонада у листькед компöтәреда wан тьшта нишан дькьн ча тьштед безийан у бона һʹәwасе. Жь wан һьнә синәм у кʹьтеб öса зәʹф һʹöкöм бунә сәр һьнә мәрьва, кö wана кʹомед сербазийе вәкьрьнә. Бь рʹасти щьнарʹа һатә стандьне мәрьва бьдьнә баwәркьрьне wәки сербази зийан нинә. Гәло ньһерʹандьна öса дәрһәqа сербазийе, ль сәр Мәсиһийа һʹöкöм буйә йан на? Сәр ньһерʹандьна һьнәка һʹöкöм буйә. Чь щурʹәйи? Мәсәлә, Мәсиһик паши ньһерʹандьна синәмәкә öса нета кʹижани кö сәр һʹиме сербазийе бу, гот: «Мьн сербази нәкьрийә, мьн тʹәне ве синәме ньһерʹи». Фькьред öса чьма зийан ьн?

16. Чьма зийан ә wәʹдәдәрбазкьрьна öса, йе кö сербазийева гьредайи йә?

 ¹⁶ Рʹаст ә фьрqи һәйә ортʹа сербазидитьне у певамьжулбунеда, ле әв найе һʹәсабе кö сербазийе бьньһерʹьн, зийане найинә. Чьма? Бьфькьрә дәрһәqа ве йәке: Жь Хәбәра Хwәде те кʹьфше, wәки нә Шәйтʹан, нә жи щьнед wи нькарьн фькьред мә бьхуньн. * Ләма жи, ча ида һатә готьне, рʹöһʹед хьраб, сәва кö бьзаньбьн әм дәрһәqа чь дьфькьрьн у сьстбуна мә чьда нә, әwана пәй мә дьньһерʹьн, һәла әм чь шьхöла дькьн у кʹижан wәʹдәдәрбазкьрьна дьжберьн. Чахе жь рʹабун-рʹуньштандьна мәсиһи те кʹьфше, кö wи хwәш те синәм йан жи кʹьтебед öса кʹижанада сербазийе дьдьнә кʹьфше, әва йәка щьнарʹа дьбә нишан. Демәк, әw Мәсиһи щьнарʹа нишан дькә кö сьстбуна wи чьда нә, у щьн жи әве сьстбуне дьдьнә хәбате, wәки ча бежи wи әʹрде хьн. Öса qәwьмийә, wәки әw Мәсиһийед кö сербазийе ньһерʹинә, ахьрийеда пева мьжул бунә жи. (Бьхунә Галати 6:7.)

17. Шәйтʹан ча дькарә бьдә хәбате дәрәща wи, кʹи кö нәхwәш ә?

¹⁷ Шәйтʹан Мире-щьна сәва нетед хwә бинә сери, дьдә хәбате нә тʹәне хwәстьна мәйә wәʹдәдәрбазкьрьне, ле öса жи һʹәwщәтийа мә бона хәмкьрьна сьһʹәт-qәwате. Чь щурʹәйи? Мәсиһи кʹижан кö гьран нәхwәш дькʹәвә, у һәрге щурʹә-щурʹә qәнщкьрьна дьщерʹьбинә у qәнщ набә, дькарә баwәрийа хwә öнда кә (Марqос 5:25, 26). Шәйтʹан у щьнед wи дькарьн әве йәке бьдьн хәбате. Нета wан әв ә кö бькьнә сәр Мәсиһийе бебаwәр, wәки әw гöһ нәдә әве тʹәмийа Йаһоwа у бьщерʹьбинә кö хwә бь qәwата щьна у сербазийе qәнщ кә, кʹижан кö гәлә зийан ьн (Ишайа 1:13). Һәрге нәхwәш әве гаве  бькә, wе һәләqәтийа хwә тʹәви Йаһоwа хьраб кә. Wәрә әм пебьһʹәсьн чь щурʹәйи?

18. Мәсиһи гәрәке хwә жь кʹижан метʹодед qәнщкьрьне дур бьгьрә, у чьма?

¹⁸ Йаһоwа wан Исраелийарʹа кʹижан кö qәwата щьна йан жи сербази qәбул дькьрьн, гот: «У дәма һун дәстед хwә вәкьн, әзе чавед хwә жь wә вәшерьм; дәма һун заһф дöайан бькьн жи әзе гöһдари нәкьм» (Ишайа 1:15). Һьлбәт, әм дьхwазьн дур бьн жь wан һʹәму тьшта чь кö wе нәһельн кö Хwәде дöайе мә бьбьһе, у мә жь кʹомәкдарийа Йаһоwа бьqәтиньн, илаһи чахе әм нәхwәш ьн (Зәбур 41:3). Ләма жи, мәсиһийе рʹаст wе хwә дур бьгьрә жь wан протседуре диагноси йан жи метʹодед qәнщкьрьне, йед кö сербазийева гьредайи нә (Мәтта 6:13). * У һьнге әв дькарә баwәр бә, кö Йаһоwа wе али wи бькә (Бьньһерʹә чаргошә « Бь Рʹасти Әw Сербази Йә?»).

19. (а) Шәйтʹан дьхwазә кö мәрьв чь баwәр бькьн? (б) Мәсиһийед рʹаст гәрәке хwә жь кʹижан гьликьрьна дур бьгьрьн?

¹⁹ Дь wәлатед Рʹоавайеда мәрьв баwәр накьн кö һʹöкöме Шәйтʹан зийандар ә. Ле wәлатед майинда  мәрьв qайим жь Шәйтʹан дьтьрсьн. Чьмки Шәйтʹан әwана данә баwәркьрьне, wәки йан чь һʹöкöме wи пʹьрʹ зәʹф ә. Жь жийина wан мәрийа те кʹьфше, кö әwана жь рʹöһʹед хьраб дьтьрсьн. Мәсәлә жь хәбате, нанхwарьне у рʹазане. Дь wан wәлатада гәләк бәлабуйи йә гьликьрьн дәрһәqа щьна. Дәрһәqа wан öса гьли дькьн кö мәрьв бь һʹәwас гöһ дьдьне. Ле щайиз ә, кö әм жи бькʹәвьнә нава хәбәрдана öса? На, хьзмәткʹаред Хwәдейе рʹаст хwә жь ве йәке дур дьгьрьн, бона дö мәʹнийа.

20. Мәсиһи ча дькарә бе һʹәмде хwә хwәстьна Шәйтʹан бинә сери у wи бь пәсьна әʹйан кә?

²⁰ Йа әʹwльн, гьликьрьн дәрһәqа кьред щьна, әw кʹара Шәйтʹан ә. Дь Кʹьтеба Пирозда те кʹьфшкьрьне, wәки Шәйтʹан дькарә тьштед зор бькә. Ле Кʹьтеба Пироз öса жи дьдә кʹьфше, wәки Шәйтʹан «нишан у кʹәрәмәтед дәрәw» дькә (2 Тʹесалоники 2:9, 10). Чьмки Шәйтʹан дәрәwкьрьнеда һоста йә, ләма жи әw дькарә öса һʹöкöм  бә сәр һʹьше wан мәрьва кʹижанарʹа кö сербази һʹәwас ә, кö әwана дәрәwа баwәр бькьн. Мәрьвед öса, дькарьн бь дьле хwәйи сах баwәр бькьн, кö бь рʹасти тьштәк дитьнә йан жи бьһистьнә, у әве йәке гьли кьн. Паше, әwан гьлийа дәве һәв дьрʹәвиньн у һеди-һеди тʹәви wәʹдә гьли сәр wан гьлийада зедә дьбьн. Һәрге мәсиһи wан гьлийа бәла кә, бь рʹасти wе хwәстьна Шәйтʹан «баве дәрәwа» бинә сери, у бь wе йәке Шәйтʹан wе бе рʹумәткьрьне (Йуһʹәнна 8:44; 2 Тимотʹейо 2:16).

21. Хәбәрдана мә гәрәке дәрһәqа чь бә?

²¹ Йа дöда, һәрге Мәсиһи пешда рʹöһʹед хьрабва тʹәвгьредайи бу, нәщайиз ә wәки әw тʹьме дәрһәqа ве йәке гьли кә. Чьма? Кʹьтеба Пироз мә һелан дькә, wәки әм «дина хwә бьдьнә Иса, wи Пешикʹеши у Кʹамьлкьре баwәрийа мә» (Ибрани 12:2). Әм гәрәке һʹьш у аqьле хwә бьдьнә сәр Иса, нә кö сәр Шәйтʹан. Бьдә һʹәсабе хwә Иса дәрһәqа Шәйтʹан гәләк заньбу кö әw чь дькарә бькә у чь дәсте wива найе. Ле чахе әw ль сәр әʹрде бу, әwи шагьртед хwәрʹа дәрһәqа рʹöһʹед хьраб гьли нәдькьр. Дәwсе Иса һʹьш аqьле хwә дабу сәр мьзгинийа бона Пʹадшатийе. Бь ви щурʹәйи, әм жи гәрәке чʹәʹв бьдьнә Иса у шандийа у хәбәрдана мә тʹәне дәрһәqа «кьред Хwәдейә мәзьн» бә (Кʹаред Шандийа 2:11; Луqа 8:1; Рʹомайи 1:11, 12).

22. Әм ча дькарьн öса бькьн кö сәр әʹзмана шабун һәбә?

²² Бь рʹасти Шәйтʹан дьхәбьтә кö бь щурʹә-щурʹә мьхәнәти, тʹәлька у бь сербазийе һәләqәтийа мә тʹәви Йаһоwа хьраб кә. Һәрге әм хьрабийе нәфрʹәт кьн у бь дьл qәнщийе бькьн, Шәйтʹан wе нькарьбә мә бькә тʹәлька сербазийе. (Бьхунә Әфәси 4:27.) Бьдә һʹәсабе хwә, ль сәр әʹзмана wе шабунәкә ча бә, чахе әм бәрдәwам кьн «мьqабьли һʹöнöред Шәйтʹан Мирещьн бьсәкьньн» һʹәта кö әw бе кʹöтакьрьне (Луqа 15:7; Әфәси 6:11).