1, 2. Suc arlacna engan ke pacl in bacptais uh?

KOM fin kuhlwacnsuhpuh Jeova ke yac pucspucs, sahp arlac puhs tari mwe sramsram ke bacptais ma kom lohng ke toeni luhlahp lasr uh. Tuhsruhktuh, finne puhs pacl ma kom wi nuh ke kain in toeni inge, sahp kom srackna puhla muh  ma inge mokle insiom ke pacl nuhkewa ma kom wi liye ke mwet suc muhta emeet inge eltahl tuyak in ahkolah nuh ke bacptais. Ke eltahl otyak liki kof uh, mwet nuhkewa in walihl uh pahspahs ke engan ac ahkkahlwemye insewowo yohk laltahl. Sahp, luhluhyak motom ke kom liye un mwet na sacohk se inge ke eltahl sulaclah in wi ke lacyen luhn Jeova. Arlacna yohk engan lasr ke kain in pacl inge!

² Sahp, kuht tiac liye bacptais inge in orek pacl nuhkewa ke acn sesr uh, tuhsruhktuh lipufacn luhn God uh liye ma inge pacl nuhkewa. Yac kom kuh in petsacelah luhpan “engan luhlahp inkuhsrao” ke eltahl liye ke tausin sin mwet fin facluh nohfohn eltahl sulaclah in weacng u luhn Jeova uh ke kais sie wik? (Luke 15:7, 10) Wacngihn ahlohloh kac lah lipufacn nuhkewa arlacna engan in liye kapkapack inge!​—Haggai 2:7.

3. Efuh kuh Satan el forfor “oacna soko lion ngutngut,” ac meac el luhngse in oruh?

³ Tuhsruhktuh, oasr lipufacn kuluk ma arlacna kasrkuhsrak in liye ke mwet inge eis bacptais uh. Satan ac demon kuh lipufacn kuluk lal uh arlacna kasrkuhsrak in liye ke tausin sin mwet inge eltahl forlah liki facl kuluk se inge. Mweyen, Satan el fahk muh wacngihn mwet suc kuhlwacnsuhpuh Jeova ke srihpen luhngse pwacye laltahl ac wacngihn mwet ac sruokyacna oaru laltahl ke pacl in mwe srihfe. (Riti Job 2:4, 5.) Pacl nuhkewa ma sie mwet el wuhlelah moul lal uh nuh sin Jeova, ahkpwacyeyuck nuhnak suhtuh lal Satan uh. Pwacnacng, ma inge oacna in muh puohpoh muhtahl Satan pacl tausin ke kais sie wik. Pa inge srihpac se pwacnacng “el forfor oacna soko lion ngutngut, sukok mwet elan kanglah”! (Sie Peter 5:8) Lion soko inge el arlacna kampare elan ukumkuhtlac kuh kuhnahoslah fototo lasr nuh sin God uh.—Psalm 7:1, 2; Luo Timothy 3:12.

4, 5. (a) Jeova el tiac lwelah Satan elan ahkkulukye kuht ke inkacnek yohk srihpac luo fuhkah? (b) Meac mwet Christian pwacye uh kuh in luhlahlfongi kac?

 ⁴ Finne oasr mwet lokoalok na suhlallacl se lasr, kuht tiac enenuh in arlacna sahngweng. Efuh? Mweyen oasr inkacnek luo ma Jeova el oruh in tiac lwelah lion ngutngut soko inge in ahkkulukye kuht. Meac ma inge? Ma se meet, Jeova el palye lah “u na luhlahp se” ke mwet Christian pwacye ac fah moullac liki lwen in ongaiyac luhlahp uh. (Fwackyuk 7:9, 14) Kahs pahluh luhn God uh ahkpwacyeyuck pacl nuhkewa. Pwacnacng, Satan el etuh lah el ac tiac kuh in srihfaclah mwet nuhkewa luhn God.

⁵ Ma se ahkluo ma Satan el tiac kuh in oruh uh arlac kahlwem ke kahs pwacye luhn sie mwet kuhlwacnsap oaru luhn God in pacl meet ah. Mwet pahluh Azariah el fahk nuh sel Tohkohsrah Asa: “LEUM GOD El wi kowos ke lusen pacl kowos weluhl.” (Luo Chronicle 15:2; riti Sie Corinth 10:13.) Mwe srihkasrak pucspucs ma sihmlac in pacl meet ah, ahkkahlwemye lah Satan el tiac kuh in kuhtanglah kuhtwena mwet kuhlwacnsap luhn God suc sruokyacna oaru la. (Hebrew 11:4-40) Ke pacl inge, mwet Christian suc fototo nuh sin God uh kuh in lain mwe ahkkuluk luhn Devil uh ac kuhtanglah. Kahs luhn God uh ahkkweye kuht: “Kowos in lain Devil, ac El ac fah kahingkihn kowos.”—James 4:7.

6. Satan el lain kais sie mwet Christian ke inkacnek fuhkah?

⁶ Satan el tiac kuh in kuhtanglah ke mweun se inge, tuhsruhktuh el kuh in kihfaslah kais sie sesr kuht fin tiac taran. Satan el etuh lah el kuh in kuhtangkuhtlac fin fototo lasr nuh sin Jeova uh muhnahs. Satan el oruh fuhkah ma inge? El lain kais sie sesr ac el oruh ma inge ke inkacnek upac ac kuhtasrihk. Lwelah kuht in nuhnkuh ke inkacnek lal Satan inge.

7. Efuh kuh Satan el sang kuhiyacl kewa in lain mwet luhn Jeova uh?

⁷ Mwe lain upac. Mwet sap John el fahk: “Facluh nohfohn  finne oan ye kuh luhn el suc kuluklacna.” (Sie John 5:19) Ke ma suhmuhslah se inge, oasr kahs in sensen se kac nuh sin mwet Christian pwacye nuhkewa. Ke srihpen Satan el kuhtanglah tari facl kuluk se inge ma nwacnwaclah ke mwet lal, ingena el kuh in sang kuhiyacl kewa ac oruh in upac liki na meet ah mwe ahkkuluk lal nuh sin mwet luhn Jeova uh. (Micah 4:1; John 15:19; Fwackyuk 12:12, 17) El arlacna kasrkuhsrak mweyen el etuh lah fototo pacl luhlah lal uh. Pwacnacng, el oruh in upaclah liki na meet ah mwe ahkkuluk lal uh. Ke pacl inge kuht puhla kwacfeacng lal in kuhnahoslah fototo lasr nuh sin Jeova uh.

8. Meac kalmen kahs lal mwet sap Paul inge ke el fahk muh kuht “mweuni” nguhn fohkfohk uh?

⁸ Kuht mweuni nguhn fohkfohk. Mwet sap Paul el sensenkihn mwet Christian uh: “Kuht mweuni . . . nguhn fohkfohk yen engyeng uh.” (Ephesus 6:12) Kahs Greek se ma luhngasyucklac oacna “mweuni” el kalmackihnyuck na pwacye nuh ke “apihrack” ac ma inge ahkkahlwemye sie amaci ma mwet kac an apuhsrali. Pwacnacng, ke Paul el orekmakihn kahs inge el srihke in oraclah in kahlwem lah kais sie sesr enenuh in sifacna lain nguhn fohkfohk uh. Kuht fin muhta kuh finne kuht tiac muhta ke sie muhtuhnfacl ma luhlahlfongi ke nguhn fohkfohk, yohk srihpac kuht in tiacna muhlkuhnlah lah ke pacl se kuht wuhlelah moul lasr uh nuh sin Jeova, ma inge ac oacpacna kuht in sroacng nuh ke sie acn in apihrack. Muhtwacwacack ke pacl se ma kuht wuhlelah moul lasr uh, kais sie sesr oasr tari ke sie mweun. Pa inge srihpac se pwacnacng Paul el liye yohk srihpaciyac in ahkkweye mwet Christian fin acn Ephesus inge eltahl in “tu na kuh” ac “ahkolah” in lain nguhn fohkfohk inge!​—Ephesus 6:11, 13, 14.

9. (a) Efuh kuh Satan ac demon lal uh orekmakihn kain in inkacnek pucspucs ke “orekma in kuhtasrihk” laltahl uh? (b) Efuh kuh Satan el srihke in ahkkulukyelah nuhnak lasr uh, ac kuht ac lain fuhkah kwacfeacng lal uh? (Liye pohk se inge “ Taran Ke Orekma Kuhtasrihk lal Satan!”) (c) Orekma kuhtasrihk fuhkah kuht ac fah sramsramkihn ingena uh?

⁹ Orekma kuhtasrihk lal uh. Paul el kwacfe mwet Christian  uh in tu na kuh ac lain “orekma kuhtasrihk” luhn Devil. (Ephesus 6:11) Lohacng nuh kac lah Paul el orekmakihn kahs se inge “kuhtasrihk” ac ma inge oasr kalmac pucspucs kac. Kalmac pa Devil ac demon lal uh orekmakihn kain in inkacnek pucspucs in kiacpwelah mwet uh. Kuhtuh mwet lili uh tu na kuh ac tiac sruhflah ke sie mwe srihfe tuhsruhktuh eltahl sruhflah ke sie pacna kain. Pwacnacng, Devil ac demon lal uh tuni ahkwoyac ohiyen kais sie sesr in konwacack lah meac mwe muhnahs lasr uh. Na tukun eltahl konwacack, eltahl ahkkulukye fototo lasr nuh sin God uh. Kuht arlacna srui lah kuht kuh in akihlen inkacnek pucspucs luhn Devil, mweyen ma inge ahkkahlwemyeyuck ke Bible uh. (Luo Corinth 2:11) Ke muhtwacwacyen puk se inge, kuht sramsramkihn kuhtuh inkacnek kuhtasrihk ma el orekmakihn ke mwe kahsruhp, asruoki kuluk ac orekma in kosro. Ingena, kuht kuh in tuni orekma kuhtasrihk lal Satan ke inkacnek luhn inutnut.

10. (a) Meac se inge orekma luhn inutnut? (b) Meac nuhnak luhn Jeova ke orekma luhn inutnut uh, ac meac nuhnak lasr kac?

¹⁰ Ke mwet uh oruh orekma luhn inutnut, ma inge ac oacpacna eltahl in asruoki yurin nguhn fohkfohk. Orek pahluh ac mwenmwen, orek fweni ac sramsram nuh sin mwet misac uh, ma inge nuhkewa kuhtuh sin orekma luhn inutnut. In oacna ke ma kuht etuh tari uh, Jeova el “sruhnga” orekma luhn inutnut uh. (Deuteronomy 18:10-12; Fwackyuk 21:8) Ke srihpen kuht enenuh pac in “kwase ma kuluk,” kuht ac tiac pac suk in asruoki yurin nguhn fohkfohk. (Rome 12:9) Sie orekma na kuhtasrihk nuh sin Jeova pa inge!

11. Ke pacl se Satan el kuh in eiskuhtyang in oruh orekma luhn inutnut uh, efuh kuh ma inge oacpacna elan kuhtanglah? Sang sie mwe puhpuhlyuck an.

¹¹ Tuhsruhktuh, Satan el etuh lah el fin kuh in eiskuhtyang in oruh kain in orekma inge, ma inge ac mwe sruhngacyuck  na yohk nuh sin Jeova. Pwacnacng, pa inge ma el kwacfeacng in oruh uh. Pacl nuhkewa ma Satan el kihfaslah sie mwet Christian elan oruh orekma luhn inutnut uh, ac oacpacna elan kuhtanglah. Efuh? Nuhnkuh ke mwe puhpuhlyuck se inge: Fin pa sie solse el kuh in kiacpweyucklac in kuhtasrihk nuh sin u lal uh ac som nuh ke lacyen se sahyac ah, mwet kol ke solse luhn u se sahyac inge el ac arlacna engan kac. Sahp, el ac kuh pac in kohnkihn mwet se ma kuhtasrihk inge oacna in muh opi se, tuh ma inge in ahkkasrkuhsrakye mwet kol ke solse luhn u se sahyac ah. In oacpacna, sie mwet Christian el fin muhtwacwacack in oruh orekma luhn inutnut, ma inge oacpacna elan som liki Jeova ac eisaclacng nuh ye kolyuck lal Satan uh. Srihke nuhnkuh ke luhpan engan lal Satan ke pacl se ma el ac kuh in fihlacngkihn mwet kuhtasrihk se inge oacna sie opi ma el kuhtanglah kac! Yac oasr kuhtwena sesr ma luhngse in oruh Devil elan kuhtanglah? Moh, kuht tiac luhngse! Wacngihn sie pacl kuht ac welah lacyen luhn mwet lokoalok se lasr inge.

12. Inkacnek fuhkah Satan el orekmakihn in ekuhllah nuhnak lasr nuh ke orekma luhn inutnut uh?

¹² Kuht fin kwase orekma luhn inutnut, Satan el ac tiac kuh in orekmakihn ma inge in kuhtangkuhtlac. Pwacnacng, el etuh lah el enenuh in ekuhllah nuhnak lasr uh. Fuhkah? El suk inkacnek ma el ac kuh in ahkfohsye nuhnak luhn mwet Christian uh eltahl in “pahngon muh kuluk uh wo, ac pahngon muh wo uh kuluk.” (Isaiah 5:20) In oruh ma inge, Satan el kwacna orekmakihn sie inkacnek lal in srihfe mwet uh pacl nuhkewa ke el orekmakihn kihsen siyuck in oruh mwet uh in ahlohloh.

13. Satan el orekmakihn fuhkah inkacnek lal ke kihsen siyuck in oruh mwet uh in ahlohloh?

¹³ Srihke lohacng nuh ke orekmakihnyen inkacnek se  inge sel Satan in pacl meet ah. Ke imac Eden, el siyuck sel Eve: “Kuh pwacyena God El fahk muh kom in tiacna kang kuhtwena fukun sahk in imac se inge?” Ke lwen lal Job ah, Satan el siyuck kihsen siyuck se inge ke sie toeni luhn lipufacn nuhkewa inkuhsrao: “Yac Job el alu nuh sum ke wacngihn?” Ac ke muhtwacwacyen orekma in luti lal Jesus fin facluh, Satan el lainuhl Christ ac fahk: “Kom fin Wen nuhtin God, kom sap eot inge in eklac bread.” Srihke nuhnkuh ke ma sikyak nuh sel Jesus inge, Satan el ahkkulukye kahs luhn Jeova ma el fahk ke wik ohnkohsr meet ah: “El inge Wen kuloh nuhtihk, suc nga insewowo kacl”!​—Genesis 3:1; Job 1:9; Matthew 3:17; 4:3.

14. (a) Satan el orekmakihn fuhkah inkacnek kuhtasrihk lal uh in oruh mwet uh in ahlohloh ke orekma luhn inutnut uh? (b) Meac kuht ac fah sramsramkihn ingena uh?

¹⁴ Ke pacl inge, Devil el orekmakihn inkacnek se pacna inge in oruh mwet uh in ahlohloh ke luhpan kulukiyacn orekma luhn inutnut uh. Mwe ahsor se lah oasr kuhtuh sin mwet lili suc el kuhtanglah in oruh eltahl in ahlohloh. Eltahl muhtwacwacack in kihsen siyuckkihn fin inkacnek luhn inutnut inge kuluk na pwacye. (Luo Corinth 11:3) Kuht ac kahsruh fuhkah kain in mwet inge in ekuhllah nuhnak laltahl uh? Kuht ac taran fuhkah tuh inkacnek kuhtasrihk se lal Satan inge in tiac ahkkulukye kuht? In topuk kihsen siyuck inge, lwelah kuht in nuhnkuh ke ip luo ke moul lasr ma Satan el ahkkulukye ke orekma luhn inutnut. Ma luo inge pa mwe ahkengan ac karihngihnyen mahnosr.

15. (a) Meac nuhnak luhn mwet pucspucs ke muhtuhnfacl luhlahp oacna Europe ac North America ke orekma luhn inutnut? (b) Ke inkacnek fuhkah nuhnak luhn kuhtuh mwet Christian uh ahkkulukyeyuck ke orekma luhn inutnut?

¹⁵ Ke muhtuhnfacl luhlahp oacna Europe ac North America,  mwenmwen, inpucl ac kuhtuh pac kain in orekma luhn inutnut sahyac uh tiac arlacna sensenkihnyuck. Movie, puk, tv, ac game ke computer uh upaclah ke orekma luhn inutnut ma oreklac oacna mwe pwacr ac tiac mwe sensen ac motkoeyuck muh mwet suc oruh ma inge uh suhmaht. Kuhtuh movie ac puk ma ahkkahlwemye yohk ke orekma luhn inutnut uh arlacna pwengpweng. Ma na kahlwem se lah demon uh kuhtanglah in ahkfohsye nuhnak luhn mwet pucspucs ke mwe sensen ke orekma luhn inutnut uh. Yac mwet Christian uh tiac ahkkulukyeyuck in nuhnkuh pac muh tiac arlacna kuluk orekma luhn inutnut uh? Nuhnak luhn kuhtuh seltahl kiacpweyucklac. Ke inkacnek fuhkah? Pa inge sie mwe puhpuhlyuck ma kwacna sikyak uh, tukun sie mwet Christian el liye movie se ke orekma luhn inutnut, el fahk, “Nga liye na movie sac, nga tiac oruh orekma luhn inutnut.” Efuh kuh kain in nuhnak se inge arlacna sensen?

16. Efuh kuh mwe sensen se in sulaclah kain in mwe ahkengan ma oasr orekma luhn inutnut kac?

¹⁶ Finne oasr ma tiac oacna sie in oruh orekma luhn inutnut ac in liye muhkwena, tiac kalmac pa wacngihn mwe sensen ma tuhkuh ke kuht liye ma inge uh. Efuh? Srihke nuhnkuh ke ma inge: Kahs luhn God uh ahkkahlwemye lah Satan ac demon lal uh tiac kuh in riti nuhnak lasr uh. * Pwacnacng in oacna ke ahkuhtweyucki tari ac, lipufacn kuluk inge tuni ahkwoyac orekma lasr uh tuh eltahl in konwacack nuhnak kuh mwe muhnahs lasr uh, wekuhnacng mwe ahkengan ma kuht pwacr kac. Ke pacl se ma sie mwet Christian el ahkkahlwemye lah el engan ke movie kuh puk ma oasr mwet inutnut kuh orekma luhn inutnut kac, el ahkkahlwemye mwe  muhnahs se lal inge nuh sin demon uh. Ke ma inge, demon uh ac kuh in oruh in upaclah mwe lain laltahl nuh sin mwet Christian se inge tuh in ahkkulukye mwe muhnahs se ma el ahkkahlwemye inge. Eltahl ac ahkkulukyacl ne ke eltahl kuhtanguhllah. Kuhtuh sin mwet suc engan ke orekma luhn inutnut uh, ke muhtwacwacackiyac ah eltahl engankihn muhkwena mwe ahkengan pwengpweng ma kwacna ahkkahlwemyeyuck uh. Na tok, eltahl wi oruh orekma luhn inutnut inge.​—Riti Galatia 6:7.

17. Inkacnek kuhtasrihk fuhkah Satan el orekmakihn in ahkkulukye mwet suc mas?

¹⁷ Satan el srihke in ahkkulukye kena lasr nuh ke mwe ahkengan ac oacyacpac enenuh lasr in karihngihn mahnosr. Fuhkah? Sie mwet Christian el kuh in toasrlah ke el suk kahsruh luhn doctor ac el fihlfihl in fahsri lohm ono uh, tuhsruhktuh el tiac kuh in konwacack ono nuh ke mas lal uh. (Mark 5:25, 26) Ma inge ac kuh in ikacslah sie pacl wo nuh sel Satan ac demon lal uh in ahkkulukyacl. Eltahl etuh lah Kahs luhn God uh sensenkihn nuh seltahl ma inge: “Kowos fah tiac inutnut kuh susfa.” (Leviticus 19:26, BMK) Demon uh kuh in srihfe sie mwet mas elan kuhnahoslah masap se inge ac forlah nuh sin mwet in orek ono ke inutnut kuh in eis inkacnek in ono ma orekmakihn inutnut. Orekma kuhtasrihk luhn demon inge fin kuhtanglah mwet mas se inge, na fototo lal nuh sin God uh ac muhnahslah. Ke inkacnek fuhkah?

18. Kain in ono ac inkacnek in ono fuhkah sie mwet Christian el ac tiac eis uh, ac efuh?

¹⁸ Jeova el sensenkihn mwet suc kuhnahoslah masap lal uh: “Kom fin tiac ahkos ma sap uh, God el ac fah arlacna sruhnga in lohng puhruhe lom.” (Soakas 28:9) Pwacye, kuht ke fahsr liki ma nuhkewa ma ac kuh in ahkkulukye puhruhe lasr uh ac ahksrihkyelah mwe kahsruh luhn Jeova nuh sesr, yohkna ke pacl ma kuht mas uh. (Psalm 41:3) Pwacnacng,  fin oasr akihlenyac muh ac kuh in oasr orekma luhn inutnut ke sie inkacnek in ono, sie mwet Christian pwacye el enenuh in tiacna orekmakihn. * (Matthew 6:13) El fin tiac orekmakihn ma inge, el ac kuh in etuh na pwacye lah el ac fah eis kahsruh luhn Jeova.​—Liye pohk se inge “ Yac Inutnut Pacna Pa Inge?”

19. (a) Meac Devil el kiacpwelah mwet pucspucs in luhlahlfongi kac ke kuh lal uh? (b) Kain in sramsram fuhkah mwet Christian pwacye uh enenuh in fahsr liki?

¹⁹ Mwet pucspucs ke muhtuhnfacl luhlahp oacna Europe ac North America eltahl oraclah oacna in muh tiac ma upac se pa mwe sensen ke kuh lal Satan. Tuhsruhktuh, ma inge siena ke kuhtuh acn sahyac fin facluh. Ke kuhtuh acn uh, Devil el kiacpwelah mwet pucspucs in luhlahlfongi lah yohk kuh lal liki ma na pwacye ma oasr yohrohl uh. Kuhtuh mwet uh sahngweng ke nguhn fohkfohk uh pacl nuhkewa, finne ke pacl ma eltahl muhtana, mongo, orekma kuh mutul. Arlac puhs mwe sramsram ma oreklac ke kuh luhn demon uh. Kain in sramsram inge kwacna orek in sang ahkpwacrye mwet uh, eltahl in muh fwefwelac kac. Yac kuht enenuh in wi sruhmuhn kain in sramsram inge? Moh, mwet kuhlwacnsap  luhn God pwacye uh eltahl tiac wi oruh ma inge ke srihpac na yohk luo.

20. Ke inkacnek fuhkah ma sahp sie mwet el tiac oruh in oacyac tuhsruhktuh el fahkwack mwe sramsram kikiacp lal Satan uh?

²⁰ Srihpac se meet an, ke sie mwet el wi sruhmuhn ke mwe ahkkuluk luhn demon inge, el sang kahsruh nuh ke ma luhngse lal Satan uh. Ke inkacnek fuhkah? Kahs luhn God uh ahkpwacyeye lah oasr kuh lal Satan in orek mwenmwen, tuhsruhktuh el oacyacpac sensenkihn kuht muh el orekmakihn “mwenmwen kikiacp” ac “kuhtasrihk.” (Luo Thessalonica 2:9, 10) Ke srihpen Satan pa mwet kuhtasrihk se ma fuhlwact emeet uh, el etuh lah el ac kiacpwelah fuhkah nuhnak luhn mwet suc luhngse orekma luhn inutnut ac in kihfaslah nuhnak laltahl uh in luhlahlfongi ke ma tiac pwacye. Kain in mwet inge ac kuh in luhlahlfongi muh oasr ma eltahl  liye kuh lohng na eltahl sruhmuhn ma inge oacna in ma na pwacye. Tok, sramsram laltahl uh lahesyucklac tukun eltahl nuh sruhmuhn na. Sie mwet Christian el fin wi sruhmuhn kain in sramsram inge ac oacpacna elan oruh ma luhngse luhn Devil, suc “pahpah tuhmuhn ma kikiacp.” Mwet inge wi in fahkwack ke mwe sramsram kikiacp lal Satan uh.​—John 8:44, BMK; Luo Timothy 2:16.

21. Ma yohk fuhkah se kuht luhngse in sruhmuhn ke sramsram lasr uh?

²¹ Ahkluo, mwet Christian se fin ohsun nuh sin sie nguhn fohkfohk in pacl meet ah, el ac tiac srihke in ahkpwacrye mwet lili wiyacl uh ke el sikaleni in sruhmuhn ma sikyak inge. Efuh? Kwacfeyuck kuht “in suilyac na Jesus, suc kol kuht ac ahksuwohsye luhlahlfongi lasr uh.” (Hebrew 12:2) Ahok, kuht enenuh in lohacng nuh sin Christ, tiac nuh sel Satan. Wo kuht in akihlen lah ke pacl se ma Jesus el muhta fin facluh ah, el tiac ahkpwacrye mwet tuhma lutlut lal uh ke mwe sramsram kacl Satan ac lipufacn kuluk lal uh finne puhs ma el etuh ac kuh in fahk kacltahl. Tuhsruhktuh, Jesus el lohacng na nuh ke pweng ke Tohkohsrahi uh. Pwacnacng, in etahel Jesus ac mwet sap lal uh, kuht luhngse oruh sramsram lasr uh in ma ke “orekma yohk suc God El oruh.”​—Orekma 2:11; Luke 8:1; Rome 1:11, 12.

22. Meac kuht enenuh in tahfwelah na oruh in oasr “engan luhlahp inkuhsrao”?

²² Pwacye, Satan el orekmakihn kain in orekma kuhtasrihk nuhkewa, wekuhnacng orekma luhn inutnut elan kuhnahoslah fototo lasr nuh sin Jeova uh. Tuhsruhktuh, ke kuht kwase ma kuluk ac sruokyac ma wo, kuht tiac lwelah in oasr inkacnek luhn Devil in ahkmuhnahsye kwacfeacng lasr in fahsr liki kain in orekma luhn inutnut nuhkewa. (Riti Ephesus 4:27.) Srihke petsacelah luhpan “engan luhlahp inkuhsrao” ke kuht tahfwelah na in “tu lain kuhtasrihk luhn Devil” ne ke pacl se el wacngihnlac uh!​—Luke 15:7; Ephesus 6:11.