1, 2. Бирӕтӕ донаргъуыд кӕй райсынц, ууыл тынг чи фӕцин кӕны?

ЙЕГЪОВӔЙӔН рагӕй лӕггад кӕныс? Уӕд конгрессты иу ӕмӕ дыууӕ хатты нӕ фехъуыстаис донаргъуыды фӕдыл раныхас. Фӕлӕ, ӕвӕццӕгӕн, уӕддӕр дӕ зӕрдӕ суынгӕг вӕййы, донаргъуыд чи исдзӕн, уыдон сӕ бынӕттӕй куы сыстынц, уӕд. Адӕмӕн сӕ къухӕмдзӕгъд нал фенцайы. Чи зоны, дӕ цӕссыг дӕр ӕркӕлы, куы феныс, Йегъовӕйы фарс та ноджыдӕр чидӕртӕ кӕй ӕрлӕууыд, уый, ӕмӕ йӕ фембарыс, куыд зынаргъ ын сты. Уыцы рӕстӕг нӕ цинӕн кӕрон дӕр нал вӕййы!

² Донаргъуыд куыд исынц, уый кӕд мах афӕдзы дӕргъы цалдӕр хатты йеддӕмӕ нӕ фенӕм, уӕд зӕдтӕ та уый бирӕ арӕхдӕр фенынц. Дӕ цӕстытыл-ма ауайын кӕн, зӕдтӕ уӕлӕрвты куыд фӕцин кӕнынц, алы къуыри дӕр ӕнӕхъӕн зӕххы къорийыл Йегъовӕйы организацимӕ цалдӕр мин адӕймаджы кӕй ӕрбаиу вӕййы, ууыл (Лукайы 15:7, 10). Кӕй зӕгъын ӕй хъӕуы, Хуыцауы адӕм кӕй фылдӕр кӕнынц, уый сын стыр цины хос у! (Аггей 2:7).

3. Хӕйрӕг «богътӕгӕнаг домбайау» цӕмӕн разил-базил кӕны ӕмӕ йӕ цы фӕнды?

³ Донаргъуыды рӕстӕг тынг чи смӕсты вӕййы,  ахӕмтӕ дӕр ис. Хӕйрӕг ӕмӕ дӕлимонтӕ мӕстӕй фӕфыцынц, мингай адӕм ацы сӕфт дунейы хъуыддӕгтӕ кӕй ныууадзынц, уый тыххӕй. Ӕмӕ куыннӕ хъуамӕ мӕсты кӕной. Хӕйрӕг афтӕ загъта, ӕмӕ иу адӕймаг дӕр Йегъовӕйӕн, уарзгӕ йӕ кӕй кӕны, уый тыххӕй нӕ лӕггад кӕны ӕмӕ йыл стыр фӕлварӕны иу дӕр иузӕрдионӕй нӕ баззайдзӕн. (Бакӕс Иов 2:4, 5.) Исчи йӕхи Йегъовӕйӕн куы снывонд кӕны, уӕд алы хатт дӕр сбӕлвырд вӕййы, Хӕйрӕджы ныхӕстӕ мӕнг кӕй сты. Афтӕмӕй, зӕгъӕн ис, алы къуыри дӕр мин хатты Хӕйрӕгӕн йӕ уадулыл дзӕхст сӕмбӕлы.  Уӕдӕ «богътӕгӕнаг домбайау» дӕр уымӕн «разил-базил кӕны» ӕмӕ уымӕн «агуры, кӕй аныхъуыра, уый»! (1 Петры 5:8). Ацы «домбайы» тынг фӕнды, цӕмӕй нӕ «аныхъуыра», ома нын афтӕ бакӕна, цӕмӕй Хуыцауӕй адард уӕм кӕнӕ йӕ бынтондӕр ныууадзӕм (Псалом 7:1, 2; 2 Тимофеймӕ 3:12).

4, 5. а) Йегъовӕ Хӕйрӕгӕн, цыдӕриддӕр ӕй фӕнды, уый аразыны бар кӕй нӕ дӕтты, уый цавӕр дыууӕ хъуыддагӕй у бӕрӕг? б) Ӕцӕг чырыстӕттӕ фидарӕй цы зонынц?

⁴ Кӕд не знаг тугдзых сырдӕй уӕлдай нӕу, уӕддӕр хъуамӕ йӕ разы фыртӕссӕй ма ризӕм. Цӕуылнӕ? Уымӕн ӕмӕ Йегъовӕ уыцы «богътӕгӕнаг домбайӕн» уый бар нӕ дӕтты, цӕмӕй йӕ цыдӕриддӕр фӕнды, уый араза. Уый бӕрӕг у дыууӕ ахсджиаг хъуыддагӕй. Фыццаг: Йегъовӕ загъта, тагъд чи уыдзӕн, уыцы стыр бӕллӕхы «тынг бирӕ адӕм» кӕй фервӕздзӕн. Уыдон сты ӕцӕг чырыстӕттӕ (Раргомад 7:9, 14). Хуыцау цы фӕзӕгъы, уый та никуы фӕмӕнг вӕййы. Уымӕ гӕсгӕ Хӕйрӕг дӕр зоны, Хуыцауы адӕмы йын се ’ппӕты аныхъуырын кӕй никуы бантысдзӕн.

⁵ Дыккаг: Хӕйрӕгӕн йӕ бон алцы кӕй нӕу, уый бӕрӕг у, раджы заман пехуымпар Азари паддзах Асӕйӕн цы загъта, уымӕй: «Йегъовӕ уыдзӕн уемӕ, цалынмӕ сымах йемӕ уат, уӕдмӕ» (2 Азфыстыты 15:2; бакӕс 1 Коринфӕгтӕм 10:13). Бирӕ рагон хабӕрттӕй зыны, Хӕйрӕджы бон кӕй никуы баци, Йегъовӕмӕ ӕввахс чи уыд, уыцы лӕггадгӕнджытӕй искӕй аныхъуырын (Дзуттӕгтӕм 11:4–40). Абон дӕр Хуыцаумӕ ӕввахс чи у, уыцы чырыстӕттӕн сӕ бон суыдзӕн Хӕйрӕджы ныхмӕ фидар фӕлӕууын ӕмӕ ма йыл уӕлахиз дӕр кӕндзысты. Хуыцауы Ныхас нын фидарӕй зӕгъы: «Хӕйрӕгӕн... йӕ ныхмӕ слӕуут, ӕмӕ уӕ алидздзӕн» (Иаковы 4:7).

6. Хӕйрӕг алы чырыстонимӕ дӕр куыд тох кӕны?

⁶ Хӕйрӕг Хуыцауы адӕмыл ӕмткӕй райсгӕйӕ никуы фӕуӕлахиз уыдзӕн. Фӕлӕ чырыстӕттӕй алкӕй дӕр хицӕнтӕй куы райсӕм, уӕд та гӕнӕн ис, ӕмӕ ныл фӕтых уа, къӕрцхъус куы нӕ уӕм, уӕд. Хӕйрӕг зоны, Йегъовӕимӕ нын нӕ хӕлардзинад куы фехала, уӕд нӕ ӕнцонтӕй кӕй аныхъуырдзӕн. Уый тыххӕй цы фӕаразы? Нӕ ныхмӕ карзӕй фӕцӕуы, алкӕимӕ дӕр нӕ тох кӕны хицӕнӕй, стӕй архайы хинӕй. Уӕдӕ аныхас кӕнӕм, Хӕйрӕг ацы ӕртӕ мадзалӕй куыд пайда кӕны, ууыл.

7. Хӕйрӕг Йегъовӕйы адӕмы ныхмӕ карзӕй цӕмӕн цӕуы?

⁷ Нӕ ныхмӕ карзӕй цӕуы. Апостол Иоанн загъта: «Ӕгас дуне... ис Фыдбылызы къухы» (1 Иоанны 5:19). Ӕцӕг чырыстӕттӕн ацы ныхӕстӕ рох кӕнӕн нӕй. Хӕйрӕг ацы ӕнӕхуыцау дуне ӕнӕхъӕнӕй аныхъуырдта. Ӕмӕ ныр та йӕ ных сарӕзта, чи йын аирвӕзт, уыдонмӕ – Йегъовӕйы адӕммӕ (Михей 4:1; Иоанны 15:19; Раргомад 12:12, 17). Хӕйрӕг мӕстӕй тоны, уымӕн ӕмӕ йӕ зоны, рӕстӕг ын бирӕ кӕй нал баззад. Гъемӕ йӕ тох ноджы фӕкарздӕр кодта. Фӕстагмӕ ма йӕ пырх калы ӕмӕ нӕ цӕмӕй Хуыцауы знӕгтӕ скӕна, уый тыххӕй ницӕуыл ауӕрды.

8. Павелы ныхӕстӕ, «нӕ тох» у фыдгӕнӕг тыхты ныхмӕ, зӕгъгӕ, цы нысан кӕнынц?

⁸ Алкӕимӕ дӕр хицӕнӕй тох кӕны. Апостол Павел йе ’мчырыстӕтты фӕдзӕхста: «Нӕ тох туг ӕмӕ фыдӕй конд адӕймаджы ныхмӕ нӕу, фӕлӕ... уӕлӕрвты чи ис, уыцы фыдгӕнӕг тыхты ныхмӕ» (Ефесӕгтӕм 6:12). «Тох»-ӕй тӕлмац грекъаг дзырд комкоммӕ нысан кӕны «хъӕбысӕй хӕцын» ӕмӕ амоны лӕгӕй-лӕгмӕ тохмӕ. Ацы ныхасӕй Павел бамбарын кодта, алчидӕр нӕ фыдгӕнӕг тыхтимӕ лӕгӕй-лӕгмӕ  кӕй тох кӕны. Кӕм цӕрӕм, уым сыл адӕм ӕууӕндынц ӕви нӕ, уӕддӕр нӕ хъуамӕ рох ма уа, нӕхи Йегъовӕйӕн куы снывонд кодтам, уӕд семӕ «хъӕбысӕй хӕцынмӕ» кӕй рацыдыстӕм. Уыцы бонӕй фӕстӕмӕ алы чырыстон дӕр бацӕуы уыцы тохы. Уӕдӕ диссаг нӕу, Павел Ефесы чырыстӕтты ӕртӕ хатты кӕй бафӕдзӕхста, цӕмӕй фидар лӕууыдаиккой (Ефесӕгтӕм 6:11, 13, 14).

9. а) Хӕйрӕг ӕмӕ дӕлимонтӕ алыхуызон «хинмитӕй» цӕмӕн пайда кӕнынц? б) Хӕйрӕг нын нӕ зондахаст сзыгъуыммӕ кӕныныл цӕмӕн архайы ӕмӕ нӕ бон куыд у йӕ ныхмӕ фӕлӕууын? (Кӕс рамкӕ « Дӕхи хъахъхъӕн Хӕйрӕджы хинмитӕй!».) в) Ныртӕккӕ цӕуыл аныхас кӕндзыстӕм?

⁹ Архайы хинӕй. Павел чырыстӕтты разӕнгард кӕны, цӕмӕй Хӕйрӕджы «хинмиты» ныхмӕ фидар лӕууой (Ефесӕгтӕм 6:11). Дӕ хъус-ма ӕрдар, Павел иууон нымӕцӕй кӕй не спайда кодта, фӕлӕ бирӕон нымӕцӕй, ома «хинми» нӕ загъта, фӕлӕ «хинмитӕ». Фыдгӕнӕг тыхтӕ иу хинмийӕ нӕ, фӕлӕ алыхуызон хинмитӕй пайда кӕнынц, ӕмӕ уый хуымӕтӕджы нӕу. Афтӕ-иу уыди, ӕмӕ-иу кӕд Хуыцауы лӕггадгӕнӕг иу фӕлварӕны фидар фӕлӕууыд, уӕд-иу фӕстӕдӕр иннӕйы та фӕцудыдта. Уымӕ гӕсгӕ, Хӕйрӕг ӕмӕ дӕлимонтӕ лӕмбынӕг кӕсынц, алчидӕр нӕ йӕхи куыд дары, уымӕ, цӕмӕй нын нӕ лӕмӕгъдӕр бынӕттӕ базоной. Ӕмӕ нӕм, Хуыцауӕй кӕй тыххӕй адард уыдзыстӕм, ахӕм лӕмӕгъдзинад куы ссарынц, уӕд сӕ хъавд уырдӕм скӕнынц. Фӕлӕ Хӕйрӕджы хинмитӕй нӕ бон бирӕтӕ у базонын, уымӕн ӕмӕ нын сӕ Библи ӕргом кӕны (2 Коринфӕгтӕм 2:11). Ацы чиныджы раздӕр ныхас кодтам, Хӕйрӕг цӕмӕй пайда кӕны, уыдӕттӕй цӕуылдӕрты, зӕгъӕм, пайда кӕны хъӕздыгдзинадӕй, ӕвзӕр ӕмбӕлттӕй ӕмӕ ӕнӕгъдаудзинадӕй. Ныр та аныхас кӕнӕм, спиритизмӕй, кӕнӕ хинтӕ-кӕлӕнтӕй, куыд пайда кӕны, ууыл.

10. а) Хинтӕ-кӕлӕнтӕм цы хауы? б) Йегъовӕ хинтӕ-кӕлӕнтӕм цы цӕстӕй кӕсы? Ды та?

¹⁰ Хинтӕ-кӕлӕнтимӕ баст хъуыддӕгтӕ чи фӕкӕны, уыцы адӕймаг баст вӕййы фыдгӕнӕг тыхтимӕ. Ахӕм хъуыддӕгтӕм хауы: дӕсны фӕрсын, хинтӕ кӕнын, мӕрдтимӕ ныхас кӕнын, хъуырыл дӕсныйы чиныг дарын, фынтӕ халын, астрологи ӕмӕ ӕндӕр ахӕм хъуыддӕгтӕ. Куыд ӕй зонӕм, афтӕмӕй ахӕм хъуыддӕгтӕ Йегъовӕйӕн «ӕлгъаг» сты (Дыккаг закъон 18:10–12; Раргомад 21:8). Мах дӕр ӕвзӕрдзинадӕй не сӕфт кӕй хъуамӕ уынӕм, уымӕ гӕсгӕ нын ӕнӕуынгӕ фыдгӕнӕг тыхтимӕ иумӕйагӕй цы хъуамӕ уа? (Ромӕгтӕм 12:9). Афтӕмӕй Йегъовӕйыл, нӕ уӕларвон Фыдыл, гадзрахатӕй рацӕуиккам, ӕмӕ уымӕй ӕбуалгъдӕр мийӕн та скӕнӕн нӕй!

11. Хӕйрӕг нӕ хинтӕ-кӕлӕнтимӕ баст хъуыддӕгтыл куы бафтауид, уӕд ын уый стыр уӕлахиз цӕмӕн уаид? Ӕрхӕсс цӕвиттон.

¹¹ Хӕйрӕг дӕр ӕй зоны, хинтӕ-кӕлӕнтимӕ баст хъуыддӕгтӕ куы кӕниккам, уӕд Йегъовӕйыл гадзрахатӕй кӕй рацӕуиккам. Ӕмӕ растдӕр уый тыххӕй йӕ уд скъуыны, цӕмӕй нӕ искӕй уыцы хъуыддагыл бафтауа. Ӕмӕ йын чырыстӕттӕй искӕй спиритизмыл бафтауын куы бантысы, уӕд ын уый стыр уӕлахиз вӕййы. Цӕмӕн? Ахъуыды-ма кӕн ахӕм цӕвиттоныл. Знаджы ӕфсады хицау, кӕимӕ хӕцы, уыцы ӕфсадӕй искӕй йӕхирдӕм куы расаид ӕмӕ ӕфсӕддонтӕй исчи уӕйгӕнӕг куы разынид, уӕд уыцы хицауӕн уый ӕхсызгон нӕ уаид? Ӕвӕццӕгӕн, йӕхицӕй дӕр ӕппӕлид, мӕнӕ уын уе ’фсӕддоны мӕхирдӕм фӕкодтон, зӕгъгӕ, цӕмӕй йын йӕ раздӕры ӕфсады хицауы фегад кӕна. Афтӕ Йегъовӕйы Ӕвдисӕн дӕр хинтӕ-кӕлӕнтимӕ баст хъуыддӕгтыл куы бафтид, уӕд афтӕ  рауаид, ӕмӕ зонгӕ-зонын Йегъовӕйыл гадзрахатӕй рацыд ӕмӕ йӕхицӕн хицауӕй Хӕйрӕджы равзӕрста. Ӕмӕ-ма ахъуыды кӕн, Хӕйрӕг йӕхицӕй куыд ныббуц уаид ӕмӕ йӕхицӕй куыд ӕппӕлид, мӕнӕ дын де ’фсӕддоны мӕхирдӕм фӕкодтон, зӕгъгӕ. Цымӕ нӕ искӕй фӕндид, цӕмӕй Хӕйрӕгӕн ахӕм уӕлахиз йӕ къухы бафтын кӕна? Кӕцӕй! Мах уӕйгӕнджытӕ не стӕм ӕмӕ Йегъовӕйыл гадзрахатӕй нӕ рацӕудзыстӕм.

12. Хӕйрӕг цавӕр мадзалӕй пайда кӕны, цӕмӕй нӕм хинтӕ-кӕлӕнтимӕ баст хъуыддӕгтӕ ӕвзӕр ма кӕсой?

¹² Хинтӕ-кӕлӕнтимӕ баст хъуыддӕгтӕй не сӕфт куы уынӕм, уӕд Хӕйрӕгӕн нӕ бантысдзӕн, цӕмӕй нӕ уымӕй фӕрӕдийын кӕна. Уымӕ гӕсгӕ ӕмбары, нӕ зондахаст нын кӕй хъуамӕ фӕива. Куыд? Хӕйрӕг архайы чырыстӕтты зонд схӕццӕ кӕныныл, цӕмӕй дзы чидӕртӕ «хорз ӕвзӕр» хонын райдайой, «ӕвзӕр та – хорз» (Исай 5:20). Уый тыххӕй арӕх фӕпайда кӕны, рагӕй фӕстӕмӕ дӕр ын бирӕты фӕсайын кӕй фӕрцы ӕнтысы, иу ахӕм мадзалӕй – адӕймагмӕ фарстатӕ сӕвзӕрын кӕны, цӕмӕй йӕ дызӕрдыг хъуыдытыл бафтауа.

13. Хӕйрӕг Хуыцауы лӕггадгӕнджыты дызӕрдыг хъуыдытыл куыд ӕфтыдта?

¹³ Дӕ хъус-ма ӕрдар, Хӕйрӕг ацы мадзалӕй раджы заманты куыд пайда кодта, уымӕ. Едемы цӕхӕрадоны Евӕйы бафарста: «Хуыцау уын ӕцӕгдӕр загъта, цӕхӕрадоны алы бӕласӕй ма хӕрут, зӕгъгӕ?» Иовы заманты та зӕдтӕ уӕлӕрвты куы ӕрӕмбырд сты, уӕд Хӕйрӕг Хуыцауы бафарста: «Исты дзӕгъӕлы тӕрсы Иов Хуыцауӕй?» Чырысти зӕххыл лӕггад кӕнын куы райдыдта, уӕд ӕй Хӕйрӕг къахта:  «Кӕд Хуыцауы фырт дӕ, уӕд ацы дуртӕн зӕгъ, ӕмӕ дзултӕ фестой». Ахъуыды-ма кӕн: Хӕйрӕг бауӕндыд Йегъовӕйӕ ахынджылӕг кӕнын. Уымӕй иу-ӕхсӕз къуырийы раздӕр Йегъовӕ Йесойӕ афтӕ загъта: «Ай у мӕ уарзон Фырт, мӕ зӕрдӕйы фӕндиаг Фырт» (Райдиан 3:1; Иов 1:9; Матфейы 3:17; 4:3).

14. а) Хӕйрӕг спиритизмы тыххӕй чырыстӕтты цавӕр дызӕрдыг хъуыдытыл ӕфтауы? б) Цӕуыл аныхас кӕндзыстӕм?

¹⁴ Абон дӕр Хӕйрӕг архайы, цӕмӕй дызӕрдыг кӕнӕм, хинтӕ-кӕлӕнтимӕ баст хъуыддӕгтӕ ӕвзӕр кӕй сты, ууыл. Хъыгагӕн, чырыстӕттӕй кӕйдӕрты дызӕрдыг хъуыдытыл бафтыдта, ӕмӕ хъуыды кӕнын райдыдтой, спиритизммӕ цы хъуыддӕгтӕ хауы, уыдонӕй иуӕй-иутӕ афтӕ тӕссаг кӕй не сты (2 Коринфӕгтӕм 11:3). Ахӕм хотӕ ӕмӕ ’фсымӕртӕн нӕ бон куыд у баххуыс кӕнын, цӕмӕй сӕ зондахаст фӕивой? Хӕйрӕджы хинмитӕй нӕхи куыд бахъахъхъӕнӕм? Цӕмӕй ацы фарстатӕн дзуапп раттӕм, уый тыххӕй аныхас кӕнӕм, Хӕйрӕджы хиндзинады фӕрцы спиритизм цы дыууӕ хъуыддагыл фӕзынд, уыдоныл – ирхӕфсӕнтыл ӕмӕ дзӕбӕх кӕныны мадзӕлттыл.

15. а) Бирӕтӕ хинтӕ-кӕлӕнтимӕ баст хъуыддӕгтӕм цы цӕстӕй кӕсынц? б) Ацы дунейы спиритизммӕ цы цӕстӕй кӕсынц, уый иуӕй-иу чырыстӕттыл куыд бандӕвта?

¹⁵ Хинтӕ-кӕлӕнтимӕ ӕмӕ ӕнӕуынгӕ тыхтимӕ баст хъуыддӕгтӕм бирӕтӕ кӕсынц уӕлӕнгай цӕстӕй, уӕлдайдӕр та Европӕйы ӕмӕ Цӕгат Америкӕйы бӕстӕты цӕрӕг адӕм. Киноты, чингуыты, телепередачӕты ӕмӕ компьютерон хъӕзтыты хӕйрӕджытимӕ баст хъуыддӕгтӕ афтӕ февдисынц, цыма худӕг ӕмӕ цымыдисаг сты ӕмӕ цыма ницы зиан хӕссынц. Ахӕм кинотӕ ӕмӕ чингуытӕй иуӕй-иутӕ бирӕты  зӕрдӕмӕ тынг фӕцӕуынц. Бӕрӕг у, дӕлимонтӕн сӕ фӕнд сӕ къухы кӕй бафтыд – бирӕтӕ уыцы хъуыддӕгтӕ тӕссагыл нӕ нымайынц. Цымӕ ахӕм цӕстӕнгас чырыстӕттыл нӕ бандӕвта? Хъыгагӕн дзы кӕйдӕрты зондахаст фӕивта. Куыд? Зӕгъӕм, не ’фсымӕртӕй иу спиритизмимӕ баст киномӕ куы бакаст, уӕд загъта: «Кино йеддӕмӕ ма исты у? Хинтӕ-кӕлӕнтимӕ баст хъуыддӕгтӕ мыййаг куы нӕ арӕзтон». Ахӕм зондахаст тӕссаг цӕмӕй у?

16. Хинтӕ-кӕлӕнтимӕ баст ирхӕфсӕнтӕ тӕссаг цӕмӕй сты?

¹⁶ Хинтӕ-кӕлӕнтимӕ баст хъуыддӕгтӕ аразын ӕмӕ ахӕм цӕмӕдӕрты кӕсын кӕд иу нӕу, уӕддӕр афтӕ зӕгъӕн нӕй, ӕмӕ уый тӕссаг нӕу. Цӕуылнӕ? Хуыцауы Ныхасӕй бӕрӕг у, Хӕйрӕгӕн дӕр ӕмӕ дӕлимонтӕн дӕр сӕ бон кӕй нӕу нӕ хъуыдытӕ зонын *. Раздӕр куыд загътам, афтӕмӕй, фыдгӕнӕг тыхты хъӕуы лӕмбынӕг кӕсын, цы фӕаразӕм ӕмӕ цавӕр ирхӕфсӕнтӕ февзарӕм, уымӕ, цӕмӕй базоной, цӕуыл хъуыды кӕнӕм, уый ӕмӕ нӕм ссарой, Хуыцауӕй кӕй тыххӕй адард уыдзыстӕм, ахӕм лӕмӕгъдзинад. Зӕгъӕм, кӕд чырыстон уарзы, мӕрдтимӕ чи ныхас кӕны, уыдоны тыххӕй кӕнӕ кӕлӕнгӕнджыты ӕмӕ хӕйрӕджджынты тыххӕй чи у, ахӕм кинотӕ ӕмӕ чингуытӕ, уӕд ын дӕлимонтӕ йӕ лӕмӕгъ бынат базонынц – йӕхӕдӕг сын ӕй равдисы. Ӕмӕ уӕд уыцы адӕймагимӕ сӕ тох фӕкарздӕр кӕнынц ӕмӕ йын йӕ лӕмӕгъдзинадӕй фӕпайда кӕнынц, цӕмӕй йӕ «абырсой». Ӕмӕ кӕмӕндӕрты сӕ хабар ӕцӕгдӕр афтӕ рауад, ӕмӕ  хинтӕ-кӕлӕнтимӕ баст ирхӕфсӕнтӕм сцымыдис сты, ӕмӕ ӕппынфӕстаг сӕхӕдӕг дӕр ахӕм хъуыддӕгтыл бафтыдысты. (Бакӕс Галатӕгтӕм 6:7.)

17. Адӕймаг рынчын куы вӕййы, уӕд Хӕйрӕг уымӕй куыд спайда кӕны?

¹⁷ Хӕйрӕг ӕрмӕст ирхӕфсӕнтӕй нӕ пайда кӕны, фӕлӕ ма не ’нӕниздзинадыл кӕй тыхсӕм, уымӕй дӕр. Чырыстонӕн, чи зоны, йӕ ныфс асӕтта, дохтыртӕм бирӕ куы фӕцӕуа, фӕлӕ йын куы ницы схос кӕной ӕмӕ йе ’нӕниздзинад фыддӕрӕй-фыддӕр куы кӕна, уӕд (Марчы 5:25, 26). Хӕйрӕгӕн ӕмӕ дӕлимонтӕн сӕ бон у ахӕм уавӕрӕй спайда кӕнын. Дӕлимонтӕ архайынц, цӕмӕй рынчыны уыйонг ӕркӕной, ӕмӕ йӕ фыртыхстӕй йӕхицӕн схос кӕнынӕн «кӕлӕнтимӕ», кӕнӕ спиритизмимӕ, баст мадзӕлттыл дӕр сразы уа (Исай 1:13). Сӕ хинвӕнд куы фӕрӕстмӕ уа, уӕд уыцы адӕймаг Хуыцауӕй адард уыдзӕн. Цӕмӕн?

18. Чырыстон дзӕбӕх кӕныны мадзӕлттӕй кӕцытыл не сразы уыдзӕн ӕмӕ цӕуылнӕ?

¹⁸ «Кӕлӕнтимӕ» баст хъуыддӕгтӕ чи кодта, уыцы израилӕгтӕн Йегъовӕ загъта: «Уӕ къухтӕ мӕм куы фӕивазут, уӕд мӕ цӕстытӕ иннӕрдӕм азилын. Цасфӕнды мӕм ма куват – нӕ уӕм хъусын» (Исай 1:15). Мах нӕ фӕнды, цӕмӕй ахӕмӕй исты аразӕм, ӕмӕ нын Йегъовӕ нӕ куывдтытӕ мауал хъуса ӕмӕ нын мауал ӕххуыс кӕна, уӕлдайдӕр рынчын куы уӕм, уӕд (Псалом 41:3). Уымӕ гӕсгӕ, кӕд бӕрӕг у, низ сбӕрӕг кӕныны кӕнӕ дзӕбӕх кӕныны мадзал хинтӕ-кӕлӕнтимӕ баст кӕй у, уӕд ыл ӕцӕг чырыстон не сразы уыдзӕн * (Матфейы 6:13). Ӕмӕ йын уӕд Йегъовӕ  дарддӕр дӕр ӕнӕмӕнг ӕххуыс кӕндзӕн. (Кӕс рамкӕ « Ӕцӕгдӕр хинтӕ-кӕлӕнтимӕ баст у?».)

19. а) Хӕйрӕг бирӕты цӕуыл баууӕндын кодта? б) Ӕцӕг чырыстӕттӕ сӕхи цӕмӕй хъуамӕ хизой?

¹⁹ Кӕд Европӕйы ӕмӕ Цӕгат Америкӕйы бӕстӕты адӕм уӕлӕнгай цӕстӕй кӕсынц, Хӕйрӕгӕн йӕ бон адӕймагӕн зиан ӕрхӕссын кӕй у, уымӕ, уӕд иннӕ бӕстӕты та уавӕр ӕндӕр у. Уыцы бӕстӕты Хӕйрӕг бирӕты баууӕндын кодта, цыма йӕ бар бирӕ цӕуылдӕрты цӕуы, кӕд ӕцӕгӕй афтӕ нӕу, уӕддӕр. Иуӕй-иутӕ цӕргӕ дӕр, хӕргӕ дӕр, кусгӕ дӕр ӕмӕ фынӕй дӕр кӕнынц хӕйрӕджытӕй тӕрсгӕйӕ. Стӕй цынӕхуызон хабӕрттӕ фӕдзурынц, хӕйрӕджытӕ, дам, алы диссӕгтӕ аразынц. Ӕмӕ сӕм иннӕтӕ дӕр хъусынӕй нӕ фефсӕдынц. Цымӕ мах дӕр ахӕм хабӕрттӕ иннӕтӕн куы дзуриккам, уӕд уый раст уаид? Кӕй зӕгъын ӕй хъӕуы, нӕ. Ӕцӕг Хуыцауы лӕггадгӕнджытӕ сӕхи уымӕй хизынц дыууӕ ахсджиаг хъуыддаджы тыххӕй.

20. Уый гӕнӕн куыд ис, ӕмӕ адӕймаг, йӕхӕдӕг дӕр ӕй ма ӕмбара, афтӕмӕй, Хӕйрӕджы хъуыдытӕ парахат кӕна?

²⁰ Фыццаг: адӕймаг хӕйрӕджыты тыххӕй исты хабӕрттӕ куы дзура, уӕд Хӕйрӕгӕн йӕ къух араздзӕн. Ома куыд? Хуыцауы Ныхасы фыст ис, Хӕйрӕгӕн  йӕ бон хъомысджын хъуыддӕгтӕ аразын кӕй у. Фӕлӕ ма дзы фыст ис, «мӕнг нысӕнттӕ» кӕй ӕвдисы ӕмӕ «сайӕн митӕ» кӕй кӕны (2 Фессалоникӕгтӕм 2:9, 10). Хӕйрӕг сайынмӕ дӕсны кӕй у, уымӕ гӕсгӕ зоны, хинтӕ-кӕлӕнтимӕ баст хъуыддӕгтӕм ӕмхиц чи у, уыцы адӕймагӕн йӕ зондыл куыд бандава ӕмӕ йӕ мӕнг хабӕрттыл куыд баууӕндын кӕна, уый. Чи зоны, ахӕм адӕймаджы ӕцӕгдӕр уырны, цыдӕртӕ кӕй федта ӕмӕ кӕй фехъуыста, ӕмӕ сӕ иннӕтӕн дӕр афтӕ фӕдзуры, цыма ӕцӕг хабӕрттӕ сты. Ӕмӕ сӕ стӕй уыдон дӕр иннӕтӕн куы фӕдзурынц, уӕд ма сыл къӕхтӕ ӕмӕ къухтӕ бафтауынц. Чырыстон ахӕм хабӕрттӕ куы парахат кӕна, уӕд ӕххӕст кӕндзӕн Хӕйрӕджы, «мӕнгдзинады фыды», фӕндон ӕмӕ йын афтӕмӕй йӕ хъуыдытӕ парахат кӕндзӕн (Иоанны 8:44; 2 Тимофеймӕ 2:16).

21. Сӕйраджыдӕр цӕй тыххӕй хъуамӕ дзурӕм?

 ²¹ Дыккаг: кӕд чырыстон кӕддӕр йӕхиуыл ӕцӕгдӕр бавзӕрста, фыдгӕнӕг тыхтӕ куыд архайынц, уый, уӕддӕр уыцы хабӕрттӕ хотӕ ӕмӕ ӕфсымӕртӕн ӕппынӕдзух нӕ дзурдзӕн ӕмӕ сӕ уыдӕттӕй нӕ ирхӕфсдзӕн. Цӕуылнӕ? Библи нын фӕдзӕхсы, цӕмӕй лӕмбынӕг кӕсӕм, «уырнындзинады фӕндагыл нӕ чи кӕны, уыцы Сӕйраг Разамонӕгмӕ ӕмӕ нын нӕ уырнындзинад алцӕмӕй ӕххӕст Чи кӕны, уымӕ, ома Йесомӕ» (Дзуттӕгтӕм 12:2). Ӕцӕгдӕр, мах хъуамӕ не ’ргом Чырыстимӕ здахӕм, Хӕйрӕгмӕ нӕ, фӕлӕ. Йесо зӕххыл куы уыд, уӕд йӕ ахуыргӕнинӕгты хӕйрӕджыты хабӕрттӕй нӕ ирхӕфста, кӕд, Хӕйрӕджы бон цы у ӕмӕ цы нӕу, уый тыххӕй сын бирӕ цыдӕртӕ радзырдтаид, уӕддӕр. Йесо сӕйраджыдӕр дзырдта Хуыцауы Паддзахады тыххӕй. Уӕдӕ мах дӕр Йесойау ӕмӕ йӕ апостолтау сӕйраджыдӕр фӕнды «Хуыцауы стыр хъуыддӕгты тыххӕй» дзурын (Хъуыддӕгтӕ 2:11; Лукайы 8:1; Ромӕгтӕм 1:11, 12).

22. Нӕ бон цы у аразын, цӕмӕй уӕлӕрвты цин кӕной?

²² Куыд федтам, афтӕмӕй Хӕйрӕг пайда кӕны алыхуызон хинмитӕй, уыимӕ спиритизмӕй дӕр, кӕнӕ хинтӕ-кӕлӕнтӕй, цӕмӕй, Йегъовӕимӕ нын цы хӕлардзинад ис, уый фехала. Фӕлӕ ӕвзӕрдзинадӕй не сӕфт куы уынӕм ӕмӕ, хорз цы у, ууыл та фидар куы хӕцӕм, уӕд Хӕйрӕгӕн иу фадат дӕр нӕ ратдзыстӕм, цӕмӕй нӕ хинтӕ-кӕлӕнтимӕ баст хъуыддӕгтӕй искӕцыйыл бафтауа. (Бакӕс Ефесӕгтӕм 4:27.) Ахъуыды-ма кӕн, куыд «цин кӕндзысты уӕлӕрвты», цалынмӕ Хӕйрӕг сӕфт не ’рцӕуа, уӕдмӕ йӕ «хинмиты ныхмӕ фидар» куы фӕлӕууӕм, уӕд! (Лукайы 15:7; Ефесӕгтӕм 6:11).