1, 2. Te rua techang a kmal dmeu a rengrir el omes a techolb?

A LSEKUM ke mla mesiou er a Jehovah el betok el rak e ke locha mla remenges a betok el cheldecheduch el kirel a techolb el ngar er aike el meklou el ongdibel er kid. Me nguaisei, engdi ke locha dirrek el kmal mo dmeu a rengum er a bek el taem el momes er tirke el ngar er aike el kingall er a medal el mo dechor e onger a ker el kirel a techolb. Me ngar seikid el taem e ngmo klou brotech me a deurreng er a rechad. Nglocha mo merael a iuechel a medam sel momes er tirka el chad el mla tuib a rengrir el mo mesiou er a Jehovah. Me tiang a mera el taem er a klou el deurreng!

² Me alta e kede mla omes a techolb el mo er ngii er a bek el rak er a chelsel a beluad, engdi a rechanghel a oba ileakl el techall el omes a lmuut el betok el techolb. Ngsebechem el kora mtebengii a ‘klou el deurreng er a eanged’ sel lomes er a rebetok el telael el me soiseb er a cheldebechelel a Jehovah er a bek el sandei? (Lukas 15:7, 10) A rechanghel a ulterekokl el kmal dmeu a rengrir el omes er tia el ildois el di meleketek!—Hagai 2:7.

3. Ngera uchul me a Satan a “ua ongumk el laion”? E ngsoal el mekerang?

³ Me nguaisei, engdi a Satan me a remekngit el anghel  a omes aike el techolb e kmal kesib a rengrir. Ngkmal chetirir el meseterir a rebetok el telael el choitii tia el mekngit el beluulechad. A Satan a dirrek el ulechotii a kldidairreng er a ledu el kmo ngdiak el bltikerreng a uchul me a rechad a mesiou er a Jehovah, e dirrek el dilu el kmo te mo choitii er sel taem el lemeasem a klaumerang er tir. (Monguiu er a Job 2:4, 5.) Me a bek el taem el chad a tibir a rengul el mo er a Jehovah e ngoterekeklii el kmo a Satan a bulak. Me ngua dedu el kmo ngbetok el telael el taem el lobar a medal a Satan er a chelsel a bek el sandei. Seikid a uchul me ngdi “omibais el mol mei el ua ongumk el laion el osiik er a bo lomerkakl er ngii.” (1 Petrus 5:8) Ngkmal osiik a techall e mengitechut  me a lechub e ngmelemall er a deleuill er kid me a Dios.—Psalm 7:1, 2; 2 Timothy 3:12.

4, 5. (a) Ngera eru el rolel e a Jehovah a diak lebecherei a Satan me lolemall er kid? (b) A remera el Kristiano ngulterekokl a rengrir er a ngerang?

⁴ Me alta e kede chelebangel a meringel el odelecheklel a Satan engdi ngdiak el kired el mo medakt. E ngerang? E le ngokiu a eru el rolel e a Jehovah a diak lebsa techellel a Satan me lolemall er kid. Me aikang ngera el tekoi? A kot e a Jehovah a ulemlaoch el kmo a “kloul seked” er a remera el Kristiano a mo suobel er a merael el mei el “kloul ringel.” (Ocholt 7:9, 14, BT) Me a ulochel a Dios a di mo tmaut. Seikid a uchul me a Satan a kirel el mo medengei el kmo ngdiak el sebechel el okngemedeterir a rokui el chedal a Dios.

⁵ A ongeru el rolel a obeketakl el okiu a tekingel a ta el blak a rengul el chad er a irechar. A profet el Asaria a dilu er a King el Asa el kmo: “A RUBAK a obengkemiu a cho mobengkel.” (2 Kronika 15:2; monguiu er a 1 Korinth 10:13.) Ngkmal betok a ungil el kerebai er a rechad er a irechar el ochotii el kmo a Satan a dimlak el sebechel el mo mesisiich er tirke el mle blak a rengrir el mesiungel a Dios. (Hebru 11:4-40) Me chelecha el taem e a Rekristiano el melemolem el kmeed er a Dios a mo sebechir el omtok er a Diabelong e mo mesisiich er ngii. E le Tekingel a tibir el kmo: “Momtok er a Diabelong, me bo lechiis er kemiu.”—Jakobus 4:7.

6. Ngmekerang a Satan a loldechelakl er a derta el Kristiano?

⁶ A Satan a diak el sebechel el mo mesisiich er a  rokui el chedal a Dios engdi ngsebechel el melemall er a derta er kid a lsekum ngmo diak dekerekikl. Tiaikid a uchul me ngmelasem el mengitechut er a deleuill er kid me a Jehovah. Me ngmekera loruul er tiang? Ngokiu sel lemeringel el oldechelakl er a rechedal a Dios, me a derta er kid, e dirrek el mengeblad er kid. Mada me bo dosaod aika el mekngit el omerellel.

7. Ngera uchul me a Satan a meringel el oldechelakl er a rechedal a Jehovah?

⁷ A meringel el odelecheklel. A apostol el Johanes a kmo: “A beluulchad el rokir a ngar eungel Ngikel Mekngit.” (1 Johanes 5:19) Me tiang a omengelechel el kirir a remera el Kristiano. A Satan a mla mo mesisiich er tia el beluulechad el rokir, me chelechang e ngmeringel el oldechelakl er a rechedal a Jehovah, e le ngdi tir el tang a diak lekengei el mo chedal. (Mika 4:1; Johanes 15:19; Ocholt 12:12, 17) Ngkmal kesib a rengul e le ngmedengei el kmo ngdi kedeb ku temel, me ngmelasem er a tkurrebab el sebechel el omekcharm er a rechedal a Dios. Me chelecha el taem e kede chelebangel er a cheldechuderreng er ngii.

8. Ngera belkul a tekingel a Paulus el kmo kede ‘oumekemad el omtok’ er a remekngit el anghel?

⁸ Te oldechelakl er a derta er kid. A apostol el Paulus a milengelechel er a rekldemel el Kristiano el kmo: “Kid a diak doumekemad el omtok er a re di chad; kede bai omtok a ikel mekngit el chelid el ngar a melidiul.” (Efesus 6:12) A tekoi el “doumekemad” er tia el Bades a mlengai er a tekoi er a Grik el “kaibedechakl.” Me a Paulus a uluusbech er tia el tekoi el mesaod el kmo a derta er kid a oumekemad er a remekngit  el anghel. Me alta e kede kiei er a beluu el rechad er ngii a oumerang er a remekngit el anghel me a lechub e ngdiak, engdi ngkired el melatk el kmo sel detibir er a rengud el mo er a Jehovah e ngdi ua lomuchel a klakoad. Me ngar tiaikid el taem e a Kristiano a kirel el melemolem el oumekemad el diak lemeterob. Me ngsebeched el mesa sel uchul me a Paulus a mlo edei el taem el longelechel er a Rekristiano er a Efesus me lolemolem el mesisiich el “dechor.”—Efesus 6:11, 13, 14.

9. (a) Ngera me a Satan me a rechanghel er ngii a mengeblad er kid el ousbech a kakerous el rolel? (b) Ngera me a Satan a melasem el melemall a uldesued e kede mekerang e otngeklii? (Momes er a baks el dai er ngii a kmo “ Moltngakl a Chelebeldil a Satan!”) (c) Kede mo mesaod er a ngera el cheleblad el omeruul?

⁹ Te mengeblad er kid. A Paulus a milengelechel er a Rekristiano el mo dechor el omtok “a ikel mekngit el chelebeldil” a Satan. (Efesus 6:11) Me tiang a meketeklii el kmo a remekngit el anghel a mengeblad er a rechad el ousbech a kakerous el rolel. Te meruul el uaisei e le rebebil el mlo mesisiich er a ta er a cheleblad el omeruul a kuk mlo mechitechut er a chimong er a uriul. A Diabelong me a remekngit el anghel a kerekikl el omes a blekerdeled el osiik aike el chelitechetud, me bo el sebechir el ousbech el mengesuseu er kid. Engdi ngungil a rengud e le Biblia a ouchais er kid el kirel a chelebeldil a Diabelong. (2 Korinth 2:11) Ngar er aike el uleakuchei el suobel e kede milsaod el kirel a skel a kerruul me a mekngit el klausechelei me a deleboes el omeruul. Me chelechang e bo dosaod er a kuk ta er a chelebeldil a Satan el ngii a tekoi er a olai.

10. (a) Ngera olai? (b) Ngua ngera uldesuel a Jehovah el kirel a olai? E uangera uldesuem el kirel?

¹⁰ A chad el chelsechusem er a tekoi er a olai a kongei el teloi er a remekngit el anghel. A omengelil me a omelengesakl me a ouellak me a oltuubladek a bebil er a tekoi er a olai el ngar er ngii. Kid a ungil el medengei el kmo aika el omeruul a “olengasech er a rengul” a Jehovah. (Duteronomi 18:10-12; Ocholt 21:8) Me kid a dirrek el kired el ‘mo imikr a mekngit,’ a uchul me ngkmal mekngit a bo desechelirir a remekngit el anghel. (Rom 12:9) Tiang a kmal mekngit el tekoi e le ngdi rullid el mo ikrii a Jehovah el Demad el ngar er a eanged!

11. Ngera me ngsebechel a Satan el mo kats a lsekum e ngmengesuseu er kid el mo meruul a tekoi er a olai? Mosaod er a okesiu.

¹¹ A Satan a ungil medengei el kmo a chad el meruul a olai a mo ikrii a Jehovah, me ngkmal soal a bo doruul aika el tekoi. Me ngbek el taem el Satan a mengesuseu er a Kristiano el mo meruul aika el tekoi, e ngua bo lekats er a mekemad. E ngera uchul? Ka molatk er tia el okesiu: A lsekum a ta el soldau a mekesuseu el mo choititerir a rechedal e mo chedal a ta er a cheldebechel er a resoldau, e ngulterekokl ngike el merreder er sel cheldebechel el kmal mo ungil a rengul. Me nglocha mo oba ngika el soldau el mo olecholt er ngii er ngike el mle merrederel e mededenguul er ngii el kmo, ‘ka mosang ngkakid ngika el chedemiu el mla mo soal el chedak.’ Me ngdi osisiu, a Kristiano el mo meruul a tekoi er a olai a durengul el mo ikrii a Jehovah e kongei el mo chedal a Satan.  Ka di molatk er sel deuil a rengul a Satan el ousimang er medal a Jehovah. Me kid ngsoad el mecherei a Satan me ngmo kats? Ngkmal diak, e le kid a diak decheblad el chad.

12. Ngera el tekoi a lousbech er ngii a Satan el mengeuid a uldesued el kirel a tekoi er a olai?

¹² A Satan a kmal diak el sebechel el mengesuseu er kid el mo meruul a tekoi er a olai a lsekum kede mengeroid er kid er aika el tekoi. E tiang a lodengelii a uchul me ngsoal el mengeuid a uldesued. Me ngmekerang? Ngosiik a rolel e omekerrau a rengrir a Rekristiano a uchul me a rebebil a mo omes “a mekngit el kmo ng ungil e melekoi a ungil el kmo ng mekngit.” (Isaia 5:20) Ngmo sebechel el kutmeklii tiang el okiu sel loker a ker el omekerrau a rengud. E tia el omerellel a bla loruul er ngii el kemanget el taem.

13. Ngmekerang a Satan e ousbech a ker el omekerrau a rengud?

¹³ Ka di molatk a omerellel a Satan er a irechar. Ngar er a sers er a Eden e nguleker er a Eva el kmo: “Ng meral dilu Dios el kmo ng diak kom mongang a redechel a ngii di le kerrekar el ngar a chelsel a sers?” E sel taem er a Job e a rechanghel a mlo kldibel er a eanged e a Satan a uleker er a Dios el kmo: “A Job ng di mengull el meluluuch er kau el di diak a ngeral le nguu?” E ngar sel uchelel a omesiungel a Jesus er tia el chutem e a Satan a millasem er a Jesus er a ledu el kmo: “Cho mNgelekel a Dios, e mdu er a ikal bad me lobult el mo blauang.” Ka momdasu, a Satan a uleltuub a tekingel a Jehovah el ledilung el kirel a Jesus er a bekord  el elolem el sandei er a uchei el kmo: “Ngkaikid a betik er a renguk el Ngelekek, el ngii odeuir a renguk.”—Genesis 3:1; Job 1:9; Mateus 3:17; 4:3.

14. (a) Ngmekerang a Satan e mengeuid a uldesuir a rechad el kirel a tekoi er a olai? (b) Ngera kede mo mesaod er chelechang?

¹⁴ Chelecha el taem, e a Diabelong a ousbech er a osisiu el rolel e omekerrau a rengrir a rechad me te mo omdasu el kmo ngdiak a kngtil a tekoi er a olai. Me ngklengiterreng e le ngmla rulleterir a rebebil el Kristiano el mo oumerang er ngii. Me te ulemuchel el mo omdasu el kmo ngdiak el mekngit a bebil el bedengel a tekoi er a olai. (2 Korinth 11:3) Me kede mekerang e ngosuterir el mo meklemalt a uldesuir? Ngmekerang e mo ulterekokl a rengud me lak demekesuseu er a chelebeldil a Satan? Kede mo onger aika el ker el okiu sel dosaod a eru el tekoi el Satan a ousbech el melisiich a tekoi er a olai. E aikang a tekoi er a ongelaod me a rolel a ukeruul.

15. (a) Ngua ngera uldesuir a rebetok el chad er a Europe me a North America el kirel a tekoi er a olai? (b) Te mla mekerang a rebebil el Kristiano e mekesuseu el mo oba osengel a beluulechad?

¹⁵ A rebetok el chad er a Europe me a North America a mla mo omes aika el tekoi er a olai el ua lak a telemellel. A mubi me a babier me a prokuram er a TV me a computer game a remuul a tekoi er a olai el mo ua loltobedechur, e ungil, e diak a telemellel. A bebil er aika el mubi me a babier a kmal mla mo merael a chisel, me tirke el chad el kmal sorir a mla mekdubech a cheldebechel el melisiich ngii el tekoi. Me ngbleketakl el kmo a remekngit el anghel a mla mengeuid a uldesuir a rechad. Me tia el uldasu el kmo  ngdiak a telemellel a tekoi er a olai, ngmla chouid a uldesuir a rebebil el Kristiano? Nguaisei. El okiu a ngera el rolel? El ua tiang, a uriul er a lemereko el omes er a mubi el kirel a tekoi er a olai a ta el Kristiano e ngdilu el kmo, “Ak mlo omes er tia el mubi, engdi ngdimlak bo kuruul a tekoi er a olai.” Me ngera uchul me tia el uldasu a kmal kdekudel?

16. Ngera uchul me ngkdekudel el tekoi a dongelaod er kid el ousbech a tekoi er a olai?

¹⁶ Me alta e ngar er ngii a klekakerous er a doruul a tekoi er a olai me a domes, engdi ngdiak lebelkul a kmo a di domes aika el tekoi e ngdiak a telemellel. E ngera uchul? Ka di molatk er tiang: A Tekingel a Dios a ochotii el kmo a Satan me a rechanghel er ngii a diak el sebechir el mo medengei a ngar er a uldesued. * Me ngua dulsaod er a uchei, te sebechir el mo medengei a ngar er a uldesued e dmangch a chelitechetud el oeak sel lomes a omerelled me a tekoi er a ongelaod el soad el meruul. Me a lsekum a Kristiano a soal el omes a mubi me a lechub e ngmenguiu a babier el mesaod el kirir a rechad er a olai, me a ouellak, me a rechad el meltuchel er a mekngit el chelid, me aike el uai ngii el tekoi, e ngua losubed er a remekngit el anghel el kmo tiaikid a chelitechetuk! Me seikid e a remekngit el anghel a mo oldechelakl er ngii el ousbech er tia el chelitechetul el mo lmuut er a  taem el lemechitechetong. Tiang a mla duubech el tekoi, e le rebebil el ulemuchel el omes a mubi el melisiich a tekoi er a olai a mlo meruul ngii el tekoi er a uriul.—Monguiu er a Galatia 6:7.

17. Ngmekerang a Satan e melasem el melemall er a chad el kmal smecher?

¹⁷ A Satan a diak di lolasem el mengesuseu er kid el ousbech a tekoi er a ongelaod e ngdirrek el soal el melemall er kid el ousbech a tekoi er a ukeruul. El mekerang? A Kristiano el kmal smecher me ngmla melasem el osiik a betok el bedengel a ukeruul e di diak bo lungil a sebechel el mo mechitechut a rengul. (Markus 5:25, 26) Me a Satan me a rechanghel er ngii a sebechir el ousbech er tia el techall el mo melemall er ngii. E te ungil medengei el kmo a Tekingel a Dios a mengelechel el kmo: “Lak moruul a ngii di le blekeradel el olai.” (Levitikus 19:26) Me ngsebechir el mengesuseu er ngii el mo osiik a ukeruul el ousbech a olai. Me a lsekum te mo mesisiich e ngmo sebechir el tomellii a deleuill er ngika el chad el obengkel a Dios. El okiu a ngera el rolel?

18. Ngera el rolel a ukeruul a kirel a Kristiano el otngeklii? E ngera uchul?

¹⁸ A Jehovah a mengelechel er a rechad el melemall a llechul el kmo: “A lsekum a chad a diak lolengesenges a llach, e a Dios a mo chetil el orrenges a nglunguchel.” (Osisechakl 28:9) Me ngsoad el mengeroid er kid er a ngii di el tekoi el sebechel el mo uchul e ngdiak lemorenges a nglunguched e dirrek el mo diak denguu a ngelsuil a Jehovah, el ileakl aike el taem el desecher. (Psalm 41:3) Me a lsekum a rolel a ukeruul a ngar er ngii a di telkib el chesechesemel el  mo er a tekoi er a olai, e ngkmal kirel a Kristiano el otngeklii. * (Mateus 6:13) Seikid e ngulterekokl a rengul el medengei el kmo ngmelemolem el oba kengei er a Jehovah.—Momes er a baks el “ Tiang Ngtekoi er a Olai?”

19. (a) A Diabelong ngomulak er a rechad el kirel a ngerang? (b) Ngera el cheldecheduch a kirir a rechedal a Dios el mengeroid er tir er ngii?

¹⁹ Me alta e a rechad er a ngebard a diak loumerang er a klisichel a Satan, engdi ngar er a bebil el beluu e ngkuk ngodech a uldesuir a rechad. A Diabelong a mla chouid a uldesuir me te mo omdasu el kmo ngkmal imis el klou a klisichel. Me a rebebil el ngar er aika el beluu a kiei e omengur e oureor e mechiuaiu el di medakt er a remekngit el anghel. Me ngkmal mla mo obdois a cheldecheduch el kirir tirka el mekngit el anghel. Me a rebebil a kmal sorir el mesaod aika el tekoi, e a rebebil a kmal semeriar el orrenges. Me kid a rechedal a Dios, ngsebeched el ouchais aika el cheldecheduch el  mo er a rechad? Ngkmal diak, e le ngar er ngii a eru el uchul.

20. Ngmekerang a chad e mo meruul a soal a Satan el diak el durengul?

²⁰ A kot e a lsekum kede ouchais aika el cheldecheduch el kirir a remekngit el anghel e kede mo meruul a soal a Satan. El mekerang? A Tekingel a Dios a oterekeklii el kmo a Satan a kmal klou a klisichel, engdi ngdirrek el mengelechel er kid el kmo ngousbech a “diak le meral olangch” me a “bek el bedengel a cheleblad.” (2 Thesalonika 2:9, 10) A Satan a kot el meduch el mengeblad me ngmedengei el kmo ngmekerang a longesuseu a uldesuir a rechad el semeriar a tekoi er a olai, e dirrek el meduch el meruul er tir el mo oumerang a blulak el tekoi. Me a chouaitirka el chad a locha mo oumerang el kmo te mera el miles e rirenges aika el tekoi. Me a cherengel a taem el louchais aika el tekoi e te lmuut el dochelii. Me  a lsekum a Kristiano a ouchais aika el cheldecheduch e ngua loruul a soal a Diabelong el ngii a “demal a bek el blulak.”—Johanes 8:44; 2 Timothy 2:16.

21. Ngsoad el mo blechoel el mesaod a ngera el tekoi?

²¹ A ongerung, a lsekum a Kristiano a mle chelsechusem er a tekoi er a olai er a uchei e ngdiak el kirel el mesaod aike el tekoi el blo lechelebangel el ua longelaod er a rekldemel el Kristiano. E ngera uchul? Kede muklatk el kmo: “Di doturk osenged er a Jesus, el ngii a doumera er ngii.” (Hebru 12:2) Nguaisei, ngkired el oturk a osenged er a Kristus el diak el Satan. Me ngungil a dolatk er a omerellel a Jesus er a lengar er a chutem. Ngdimlak longelaod er a redisaiplo er ngii el mesaod er a remekngit el anghel, alta e ngmle klou a klemedengei er ngii er aike el sebechel a Satan el meruul me aike el diak el sebechel. Ngbai di mle mechesang el omerk er a klumech er a Renged. Me ngsoad el oukerebai er ngii me a rechapostol er ngii el di mo blechoel el ouchais el kirel aike el “mengasireng el tekoi el bla leruul a Dios.”—Rellir 2:11; Lukas 8:1; Rom 1:11, 12.

22. Ngmekerang e sebeched el mo dechelel a “klou el deurreng er a eanged”?

²² Ngmera el tekoi, a Satan a ousbech a betok el cheleblad el omeruul el uldimukl er a tekoi er a olai el melasem el melemall er a deleuill er kid me a Jehovah. Me nguaisei, engdi sel dongeroid er kid er a mekngit e dolasem el meruul a ungil, e ngmo diak a techellel a Satan el mengitechut er a blakerreng er kid. (Monguiu er a Efesus 4:27.) Ka di molatk er sel “klou el deurreng er a eanged” a lsekum kede melemolem “el dechor el mtok a ikel mekngit el chelebeldil a Diabelong” el mo lmuut er sel taem el Jesus a mo okngemedii.—Lukas 15:7; Efesus 6:11.