1, 2. ¿Bautizakoqkunata rikar pikunataq kushikuyan?

¿ATSKA watapanaku Jehoväta servïkanki? Tsëqa itsa atska kutina bautizakoqkunapaq discursota wiyarqonki. Ëka kuti ëwashqa kaptikipis imanö kushikïpaqmi bautizakoqkunata tapuyaptin sinchipa Jehoväta serviyänampaq awmi niyanqan wiyë. Y tsë höraqa llapampis kushikurmi paqchiriyan y wakinnäqa kushikïpita waqariyanran. Hinamampis ¡alläpa kushikïpaqmi Jehoväpa markanman mushoqkuna yëkarayämonqanta rikëqa!

² Këtaqa watachö manam atska kutitsu rikantsik. Pero angelkunaqa más atska kutim rikäyan kë bautizakuyanqan hunaqta. Awmi ciëlochöqa alläpam kushikuyan cada semana atska waranqa hinantin Patsachö Diosta serviyänampaq bautizakuyaptin (Lucas 15:7, 10). Kë Patsachö Diospa markan miranqan rikëqa alläpam pëkunata kushitsin (Ageo 2:7).

3. ¿Imanirtaq Satanás purikïkan ‘mallaqashqa leonnö’, y imatataq rurëta munan?

³ Pero Diabluwan demonionkunaqa kë mana alli mundopita yarqurir bautizakuyaptenqa manam kushikuyantsu. Pëkunaqa alläpam piñakuyan. Y kikin Satanasmi kënö nishqa karqan, manam rasumpa kuyartsu Diosta serviyan, y imëka mana allikunapa pasarqa Diosninkunata  haqiriyanmi (leyi Job 2:4, 5). Tsëmi Jehoväpa markanman yëkoqkunaqa, Satanás ulikoq o llullakoq kanqanta rikätsikuyan, tsëqa qaqllanchö laqyëkoq cuentam. Cada semana atska waranqa imëka qaqllanchö laqyëkoq cuenta bautizakuyaptinmi, Satanás pasëpa piñëkun, tsëmi Biblia nimantsik: “Imeca mallaqashqa leonnomi qaparir qayarir, purican qamcunapa marcaquiniquicunata ushacäratsinampaq” nishpa (1 Pedru 5:8). Tsëpaqqa Diosnintsikwan alli kënintsiktam imëkanöpapis ushakätsita munan (Salmo 7:1, 2; 2 Timoteu 3:12).

4, 5. a) ¿Ima ishkë tsapäkïkunatataq Jehová churashqa Satanás mana ishkitsimänapaq? b) ¿Imatataq Teyta Diosnintsik änishqa pëman confiakoqkunataqa?

⁴ Satanás ‘mallaqashqa leonno’ mantsanëpaq kaptimpis, manam mantsashwantsu. ¿Imanir? Jehovämi ishkë  tsapäkïta churashqa. ¿Mëqantaq punta kaq tsapäkï? Punta kaqqa, kikin Teyta Diosmi haqenqatsu, markanta ushakätsinanta. Y këtaqa kikin Satanaspis alleqmi musyan, Jehovämi willakorqan, “mana yupetapis puedepaq” atska pëman creikoq nunakuna, “imeca nacaquicunatapis” pasayänampaq kaqta, y pë nenqanqa imëpis rurakanmi (Apocalipsis 7:9, 14).

⁵ Ishkë kaq tsapäkiqa, Teyta Diosman confiakoqtaqa manam Satanás mana alliman ishkitsenqatsu. Kë rasumpa kanqantam profeta Azarías nerqan rey Asá nishqan nunata: “Jehoväqa qamkunawanmi këkan, qamkuna pëwan këkäyaptikiqa” (2 Crónicas 15:2; leyi 1 Corintios 10:13). Diosman confiakurnin Satanaspa toqllanman mana ishkiyanqampitam atska willakïkunata Bibliachö tarintsik (Hebreus 11:4-40). Pëkunanö Diosman shonquntsikpita patsë confiakushqaqa, manam toqllanman ishkishuntsu, sinöqa vencishunmi. Tsëtam Biblia willamantsik: “Diabluta chiquirnin, munanqantaqa ama rurayëtsu. Tsënö chiquiyaptiquim diablu eucunqa” (Santiagu 4:7).

6. ¿Imanötaq Satanás huk cristiänota ishkitsita tïran?

⁶ Rikanqantsiknöpis Diabluqa manam Diospa markanta imëpis vencinqatsu. Pero alcabo mana këkashqaqa venciramashwanmi. ¿Imanötaq ruranman? Jehová Dioswan alli kënintsiktam ushakätsita tïran. Tsëpaqqa imëka desgraciakunatam apamun, y mana reqenqantsik toqllakunatam churamun. Rikärishun Satanaspa kima toqllankunata.

7. ¿Imanirtaq kananqa imëpitapis más Diospa markanta Satanasqa ushakätsita tïran?

⁷ Imë hörapis ushakätsimënintsiktam munan. Apóstol Juanmi kënö nerqan: “Que munducho Diospa mana kaqkunaqa  diablupa muneninchomi caquicayan” (1 Juan 5:19). Kë willakïqa alcäbolla kanapaqmi willamantsik. Satanasqa kë mundota makinchöna katsirnam, Diospa markantana pasëpa ushakätsita tïran, imëpis mana ushakätsishqa karnin (Miqueas 4:1; Juan 15:19; Apocalipsis 12:12, 17). Ichikllana tiempo ushakänampaq pishenqanta musyarmi, masraq piñëkun. Kananqa imëpitapis masran Jehová sirveqkunata pasëpa ushakätsita munan, tsëpaqmi noqantsikpis wanantsik “kë tiempokunata alleq tantiëta imata ruranapaqpis” (1 Crónicas 12:32).

8. ¿Mana alli espïritukunawanmi “pelyecantsic” nerqa ima nitataq Pablu munarqan?

⁸ Nunapura peleaqnö. Pablum kënö qellqarqan: “Noqantsicqa manam nuna puratsu pelyecantsic, sinoqa mana ricanqantsic puedeq supëcunawanmi” (Efesios 6:12). “Pelyecantsic” nerqa, ¿ima nitataq munarqan? Këqa rikätsimantsik ishkaq nuna tsarinakurkur peleëkaq cuenta kanqantam. Tsëmi Pabluqa nimantsik cada cristiano, demoniokunawan peleëkanqantsikta. Këqa huk markachö mana alli espïritukunaman creiyaptin o mana creiyaptimpis igual-llam. Tsëmi qonqanantsiktsu, bautizakonqantsik hunaqpita peleanapaq tsarinakoq cuenta qallëkonqantsikta. Awmi, tsë hörapita patsëmi mana haqirishpa kananyaq peleakïkantsik. Tsëmi apóstol Pabluqa Efeso cristiänokunata kima kuti willaparqan alli sinchi tsarakuyänampaq (Efesios 6:11, 13, 14).

9. a) ¿Imanirtaq Satanaswan demonionkunaqa tukïnöpa engañakuyan? b) ¿Imanirtaq Diabluqa pensënintsikta pantatsin, y imanötaq tsëpita alleq tsarakushwan? (Rikäri “ Mäkoq mäkoqlla kashun Satanaspa toqllankunapita” nishqan recuadrota.) c) ¿Satanaspa ima toqllampitataq yachakushun?

⁹ Yachëllapa Diablu toqllata churanqan. Pabluqa cristiänokunata willapan Diablupa “engañunman” mana ishkiyänampaqmi (Efesios 6:11). Engäñonqa manam hukllëllatsu, sinöqa atskam. Tukïläya toqllakunatam Diabluwan demonionkunaqa churayämun, mëqanllamampis  ishkinantsikrëkur. Këtaqa rurayan nunakunata alleq reqiparmi. Wakin cristiänokunatam rikäyashqa huk pruëbakunata vencirirpis, huk toqllamanqa iskiriyanqanta. Tsëmi pëkunaqa nöpantsikpita alleq rikapëkämantsik. Imachömi Jehoväta servirnin pishipëkantsik, tsëtam musyëta munayan. Tsënö kaptimpis noqantsikqa listom këkantsik Satanaspa toqllanman mana ishkinapaq, ¿imanir? Biblia alli willapämashqa. (2 Corintios 2:11). Kë librochömi rikarqontsik, imëkayoq këta munë, mana alli amïgokuna, warmiwampis ollquwampis rakchakunata rurar purikïqa, Satanaspa toqllan kanqanta. Kananqa parlarishun espiritismopaq.

10. a) ¿Ima rurëkunataq espiritismoqa? b) ¿Imataq nin Jehová espiritismopaq, y qamqa imataq ninki?

¹⁰ Espiritismo rurëchöqa këkan adivinación, brujería, mana alli espïritukunawan trabajar hukta mana allita rurë, wanushqakunawan parlë, y imëka magia rurëkunapis. Tsëkunata ruraqqa demoniokunapa makinmanmi ishkirin, y pëkunawan parlëman. Y noqantsikqa alleqmi musyantsik “kë llapan ruraqkunataqa” Jehová alläpa chikenqanta (Deuteronomio 18:10-12; Apocalipsis 21:8). Kamakoq Diosnintsikqa tsë “mana alli rureniquicunata melanar dejariyë” nishpam nimantsik cristiänokunataqa, tsëmi noqantsikqa, Jehová Diospa contran churakashwantsu demoniokunata yanapar lädonman churakarqa (Romanos 12:9). Këkunaman yarpëqa pasëpa melanëpaqmi.

11. ¿Espiritismoman ishkiratsimarnintsikqa imanötaq Satanás kushikïkunman?

¹¹ Espiritismo rurëqa Jehoväwan conträtota ruranqantsikta pasëpa mana respetëmi. Tsëta musyarmi Diabluqa tsëman pasëpa ishkitsimënintsikta munan. Huk cristiänota  ishkiratserqa pasëpa gälakurmi kushishqa purïkun. ¿Imanirtaq tsëta nintsik? Huk soldädoman yarpärishun. Tropanta haqirir, chikenqan kaq tröpaman ëwariptenqa imaraq kushikïkunman chikeqnin kaq tröpapa mandaqnin. Y imaraq huknin kaq tröpapa mandaqninta allqutsëkunman, tsë pasaq soldädota imëka gananqan trofeotanö rikapätsirnin. Tsënömi, huk cristiänopis espiritismota rurarqa, Satanaspa lädonman y mandädonman churakärinman y Diospa contran tikrarinman. ¡Imaraq Diablu kushikïkunman, tsë cristiänota guërrachö gananqan trofeotanö katsirnin! ¿Tsënö kushikunantaku munantsik? Manam kuyakoq Diosnintsikpa contran tikrarir, Diabluta kushitsita munantsiktsu.

12. ¿Imata rurartaq Satanasqa pantatsimënintsikta munan espiritismoman ishkinapaq?

¹² Espiritismota chikerqa manam tsë rurëkunaman ishkishuntsu. Satanasqa tsëtam musyan, tsëmi pantatsimënintsikta munan. ¿Imanötaq tsëtaqa ruran? “Alli kaqta mana allitanö y mana alli kaqtana allitanö” rikänapaq pantatsimarnintsikmi (Isaías 5:20). Puntata ruranqa alli kashqa kaptinmi tsënölla kanampis pantatsikun.

13. Willakaramï Satanás imanö pantatsikonqantapis.

¹³ Tsënö pantatsikur ruranqankunata kanan rikärishun. Edén huertachömi Ëvata Satanás kënö nerqan: “¿Rasumpëpaku Diosqa, kë huertachö ni mëqan montipa frütanta ama mikuyëtsu niyäshorqonki?”. Tsëpita tiempo pasariptinnam, ciëlochö angelkuna reunionchö këkäyaptin Jehoväta kënö nerqan Jobpaq: “¿Rasumpëpaku shonqumpita patsë Jobqa Diosta kuyan?”. Kë patsachö këkaptinnam Jesusta despreciarnin kënö nerqan: “Diospa tsurin rasonpa carqa, mä, que rumicunata mandariquï tantaman ticrarinanpaq” nishpa. Këtaqa Jesuspita burlakurmi nerqan, Jehová kënö nishqa kaptin: “Quemi noqapa  cuyë Tsurï. ¡Perecurmi noqa allapa cushicü!” (Génesis 3:1; Job 1:9; Mateo 3:17; 4:3).

14. a) ¿Imanötaq Diablu pantatsikushqa espiritismoqa allim nishpa? b) ¿Imatataq qateqnin pärrafokunachö yachakushun?

¹⁴ Kanampis tsënöllam Satanasqa pantatsikïkan. Espiritismoqa allim nishpa nunakuna creiyänampaqmi nunakunata engañëkan. Y llakikïpaqqa wakin cristiänokunaqa allitanömi rikar qallëkuyashqa. (2 Corintios 11:3). Tsënö mana alli pensayaptin, ¿imanöraq noqantsikqa yanapashwan? ¿Imaraq tsapämäshun espiritismoman mana ishkinapaq? Kë tapukïpa respuestanta musyarinapaqqa, Satanaspa ishkë toqllanta rikärishun, tiempota pasayänampaq imatapis rikäyanqanchö, y qeshyapäkur hampikuyanqankunachö.

15. a) ¿Wakin nacionkunachöqa imanötaq espiritismota rikäyan? b) ¿Imanötaq tsë mana alli rurëman wakin cristiänokunaqa ishkiyashqa?

¹⁵ Cada hunaqmi wakin nacionkunachöqa allitanö rikäyan espiritismota, brujerïakunata, imëka rurëninkunatapis. Y imëka pelïculakunachö, librokunachö, televisionchö, radiokunachö, videojuego pukllakunachömi, mana alli espïritukunapa rurëninta kushikïpaqtanö y mana imanäkoqtanö rikätsikuyan. Kanmi reqishqa librokuna y pelïculakuna, y tsëta leeqkuna y rikaqkunaqa alläpa atskaqmi kayan. Tsënöpam demoniokunaqa casi llapan nunata pantatsishqa espiritismoqa allillam nishpa. ¿Cristiänokunataqa kë mana alli rurëwan Satanás pantatsishqaku? Awmi. ¿Imanö? Kë huk pasanqanman yarpärishun, huk cristiänom rikänaq huk pelïculata espiritismopaq kaqta, tsëmi kënö nerqan: “Awmi rikarqömi, pero manam tsëqa espiritismo rurëtsu” nishpa. ¿Imanirtaq kënö pensëqa alläpa mana alli?

16. ¿Imanirtaq witikushwan tukïläya espiritismopita?

 ¹⁶ Awmi espiritismo rikëqa manam ruranannötsu, tsënö kaptimpis rikëkaq kaqqa mana allimannam ishkikan. ¿Imanir? Këman yarpärishun, Satanaswan demonionkunaqa manam pensëkanqantsikta musyayantsu. * Pero pensanqantsikta, imakunatapis kushikunapaq ruranqantsikta, y imamampis fäcil-lla ishkinapaq kaqta musyëta munarqa, alleqmi rikapämantsik qepa pärrafokunachö rikanqantsiknö. Tsëmi pipis espiritismopita shamoq pelïculakunata, librokunata y radiochö brüjukuna parlaqta wiyarqa, Satanasta rikäratsishqana tsëkuna gustanqanta. Tsëwanmi Satanás rikärishqa imaman ras ishkirinanta. Tsënöpanam pëkunaqa más sinchipa ishkitsita tirar qallakïkuyan venciyanqanyaq. Awmi, wakin cristiänokunata espiritismopita shamoq cösaskunam gustarishqa, y hasta brujerïata rurarmi qallëkuyashqa (leyi Gálatas 6:7).

17. ¿Huk cristiano qeshyapäkur llakïkikaqta imanötaq Satanás ishkiratsinman?

¹⁷ Satanasqa manam kushikunapaq rikanqantsik y wiyanqantsikllawantsu ishkitsimantsik, sinöqa qeshyapäkur hampikonqantsikkunawampis ishkitsimashwanmi. Këman yarpärishun, huk cristiano ima hampipis mana kachakätsiptin itsa alläpa yarpakachar llakikunman (Marcos 5:25, 26). Tsënö llakikïkaptin, ¿imanötaq Satanaswan demonionkuna ishkiratsinman? Y tsë cristiano mana kachakarnin yarpakachanman ima rurëtapis mana puëdernin, tsëqa itsa Satanás creyiratsinman  brüjukunaman ëwarnenqa kachakärinkim nishpa (Isaías 1:13). Tsë toqllaman ishkirnenqa Jehová Dioswan alli kënintapis ushakäratsenqam. ¿Imanötaq tsë kanman?

18. ¿Imanö hampikoqkunamantaq cristiänokunaqa ëwashwantsu y imanir?

¹⁸ Unë israelïtakuna brujería rurëkunaman ishkeqkunatam Jehová kënö nerqan: “Makikikunata makyarëkäyämuptikipis qamkunapitaqa nawïkunatapis pakakurkumi. Mëtsika mañakayämuptikipis, manam wiyätsu” (Isaías 1:15). Noqantsikqa manam israelïtakunanö këta munantsiktsu. Tsëpa rantenqa mañakïnintsikta wiyamänantsiktam munantsik y qeshyëkarnäqa masran yanapakïninta wanantsik (Salmo 41:3). Hampimaqnintsik y hampikunapis espiritismopita shamuptenqa, ¿imatataq rurashwan? Tsëkunata musyarerqa paqwëmi haqirinantsik (Mateo 6:13). * Tsëta rurarmi Jehoväwan alli kënintsikta oqrashuntsu (rikäri “ ¿Brüjukunapitatsuraq shamun?” nishqan recuadrota).

19. a) ¿Imamantaq ishkiyashqa wakin nunakunaqa? b) ¿Ima cuentukunatataq cristiänokunaqa wiyashwantsu?

¹⁹ Wakin markakunachöqa Satanasman manam creiyantsu ni mantsayantsu, pero wakin markakunachöqa pasëpam mantsëkuyan. Tsëmi kawayan, mikuyan, punuyan, trabajayampis demoniokunata mantsëkarlla. Tsënö mantsëkarpis demoniokuna rurayanqampita parlëtaqa alläpam gustëkuyan. Y ¿demoniokunapita willakuyaptin cristiänokunaqa wiyashwantsuraq? Manam, ¿imanirtaq tsëtaqa nintsik? Rikärishun.

20. ¿Imata rurartaq Satanasta yanapëkashwan?

²⁰ Satanaspa rurëninkunapita cuentokunata willakurnenqa pëtam yanapëkantsik. Bibliaqa poderoso kanqantam willamantsik, tsënö karpis “espantaquipaq señalcunata  y milagrucunata” rurarmi nunakunata engañan nimantsikmi (2 Tesalonicenses 2:9, 10). Pëqa tukïnöpa engañakïtam yachëkun y espiritismoman pensëkaqkunatanäqa rasllam ishkiratsin. Tsënöpam raslla creiratsin mana kaq cuentokunata. Y rasumpatanöna willakur qallëkuyan, y hukman hukman tsë cuento chaptenqa masna mirarin. ¿Allitsuraq huk cristiänoqa tsënö cuentokuna willakïchö yanapakushwan? Manam allitsu, tsë rurëqa Diablupa engäñonkuna yanapëmi (Juan 8:44; 2 Timoteu 2:16).

21. ¿Imakunapitaraq imëpis parlakïnintsikqa kanman?

²¹ Satanaspaq cuentokuna willakuyanqan rasumpa kashqa kaptimpis, manam cristiano mayintsikta imë hörapis willakïkashwantsu. Noqantsikqa Cristu ruranqankunapitam willakunantsik y manam Satanás ruranqankunatatsu. Bibliapis nimantsikmi: “Teyta Jesucristu imano canqantapis cäyicushun. Pemi yanapëcamashun alli marcaquiyoq canantsicpaqqa” (Hebreus 12:2). Jesusqa alleqmi musyaq Satanaswan demonionkuna imata rurëta puëdeyanqampitapis, pero manam tsëkunata willakurtsu purerqan. Tsëpa rantenqa Diospa Reinompitam willakorqan. Tsëmi noqantsikpis Jesus y apostolninkuna rurayanqanta qatinantsik “Diospa espantepaq rurenincunata” willakurnin (Hechos 2:11; Lucas 8:1; Romanos 1:11, 12).

22. ¿Imata rurashqataq ciëlochö kaqkuna kushikuyanqa?

²² Yachakonqantsiknöpis Satanasqa Jehoväwan alli kënintsiktam ushakätsita munan, tsëmi tukïläya toqllakunata churan ishkinantsikpaq. Pero Satanaspa mana alli rurëninkunata pasëpa chikirnenqa, manam haqishuntsu espiritismoman ni wakin toqllankunaman ishkitsimänata (leyi Efesios 4:27). ¡Imaraq Teyta Diosnintsik, Tsurin Jesucristu y angelkuna kushikuyanqa “diablupa engañunman” mana ishkishqa! (Efesios 6:11.)