1, 2. Ka papetạiso a‘ofan huạg ‘on sei?

KEPOI KA ‘äe agag se Jihova ‘e laloag ne ta av roat, kop ma ‘äe a‘fại vạhia se marag ne papetạios ma‘oi pạu ‘e ‘os kato‘ag ne kạugarueaga ma kato‘ag ne väeag hanua. Aier ma ne ‘äe ‘e kato‘ag ma‘oi pạu ka ‘ou huga rue‘ȧk ‘e avat ne iris ne la papetạiso fū e. Iris ne a‘fại tē, ‘oris huga hoi ‘e ‘ofa, ma iris kafkaf ‘e ririạf ne ‘oris huga. Kop ma ‘ou mafa tạntạn ‘e ‘ou keleag se iris lelea‘ a‘pumuạ‘ạki ne rē puer vạhia la kạu ma Jihova. ‘Is ‘oaf‘oaf aier ‘e av tape‘i!

² Kop ma ‘is pō ma kel se papetaios he his ‘e laloag ne ta fạut, ka ma‘oi se papetaios ne iris ‘agero kele. Ka tapen se ‘‘oaf‘ofa ‘e lạgi’ ‘e avat ne iris ne hạila‘oag ma äf liạm leum la hạitokogan kạutạunạ‘iạg ‘on Jihova ‘e rȧn te‘, ‘e te‘ ne gasav ‘i. (Luke 15:7, 10) Kat a‘raruạ‘ȧk ra ne ‘agero ‘oaf la kel se fup te‘!—Hakeai 2:7.

3. ‘E rēko tese tä Satan ta la‘ kạl‘ȧk “fak se läean ouou,” ma tes tä iạ la rē‘ia?

³ Ka ma ‘on tē mȧür fak‘at ne fek ‘e avat ne iris kele e se papetạiosoag ‘on iris ‘i. Satan ta ma ‘on timonio fek ‘e avat ne iris äf hisaghul ‘i fesiạ‘ȧk rȧn  te‘. Ka Satan ta ‘ea ‘e huạg pa ti‘u ne kal ‘es le‘et ra la hanis aier se Jihova ne la huạg aier se ia ‘e av ne ạsạsi. (Hat Jope 2:4, 5.) ‘E avat ne le‘et nā ‘on mạuri se Jihova, ta‘ag kel‘ạkia siok ‘on Satan ta. Iạ la fak ma ne Satan ta ‘ā kaf a‘äf hisaghul ‘e te‘ ne gasava. Ta ‘on‘on iạ “la‘ kạl‘ȧk fak ma se ta läeanat ne ouou, ka iạ aoao ne sei tä iạ la pō la ‘ānia”! (1 Pita 5:8) “Läean” te‘ pa ‘es la ‘ā fak‘atan ‘is, ne la mane‘ạkia ‘os hạikạinagaga ma ‘Ạitu.—Salamo 7:1, 2; 2 Timoti 3:12.

4, 5. (a) Ka ‘e sal pumuạ tes ruạ tä Jihova a‘af‘afan ne‘ne‘ ‘on Satan ta? (e) Ka tes ta le‘ rot fakKaristo airet la a‘fūmou‘ạkia la rē?

⁴ Aier ma ne ‘os fir ta ne‘ne‘, ‘is kat noj ra la fea.  ‘E rēko tese? Jihova a‘af‘af vạhia “läean ouou” te‘ ‘e sal pumuạ he ruạ. Ka tes ta sal rua? ‘On tā, Jihova parofesại‘ȧk ne “lelea‘ ma‘oi pạu” ‘e lelea‘ rot fakKaristo aire täla mȧür ‘e “a‘rū‘ạkiạg ti‘ ta.” (Kel‘ȧk Tē 7:9, 14) Fäeag parofesại ‘on ‘Ạitu la sok aier. Satan ta ‘inea ne iạ kal pō ra la hoa‘ sēsēan famör ‘atakoa ‘on ‘Ạitu.

⁵ ‘On rue ta no‘ȧk ‘e fäeag ne le‘ huạg aier se ‘Ạitu ‘ea. Parofiạt ta Asaraia ‘ea se Sạu ta Asa: “Jihova tē ag‘esea ma ‘ạus ‘e te‘ ne av ‘atakoa ne ‘ạus tē ag‘esea e ma iạ.” (2 Puk Asoat se Puk ‘on Sạu 15:2; hat 1 Korinita 10:13.) Ma ‘on aier‘ạkiạg ma‘oi af‘ȧk se la kel‘ạkia ne Satan ta kat pō ra la hoa‘ sēsēan iris ne ‘ut a‘el se ‘Ạitu. (Hiperiu 11:4-40) ‘E ‘on ‘i‘i tape‘ma, le‘ rot fakKaristo ne ‘ut a‘el ma kikia se ‘Ạitu täla pō la agạia ka la fakravā‘ȧk tape‘ma Tiapol ta. Fäeag ‘on ‘Ạitu a‘ne‘ne‘ȧk ‘os huga: “Agạia Tiapol ta, ma iạ täla joniena ‘e ‘ạusa.”—Jemesa 4:7.

6. Ka Satan ta agại tapen lelea‘ rot fakKaristo?

⁶ Satan ta kal marō ra, ka iạ la pō se ma la hoa‘ sēsēan ‘is le‘et se le‘et kepoi ka ‘is kat matạ‘ ra. Satan ta ‘inea ne iạ la pō ‘is kepoi ka iạ la a‘af‘afan ‘os hạikạinagag ma Jihova. Ka tes tä iạ la rē? Iạ la iof se ‘is le‘et se le‘et ‘e ‘on la mane‘ạkia ‘is ‘e sal rosrosit. ‘Is täla hạifäegag se fại ‘on Satan ta.

7. ‘E rēko tese tä Satan ta a‘rū‘ȧk a‘ne‘ne‘ famör ‘on Jihova?

⁷ A‘rū‘ạkiạg ne‘ne‘. ‘Apostol ta Jone ‘ea: “Rȧn te‘ ‘atakoa täe ‘e iạ ne raksa‘a.” (1 Jone 5:19) Ta‘ag  fäeag fas‘ạkit se lelea‘ rot fakKaristo aier ‘atakoa. Satan ta pō vạhia iris famör raksa‘a, ma ‘e ‘on ‘i‘i iạ iof ma kikia la agạia famör ‘on ‘Ạitu ‘e ‘on ‘es‘ao‘ȧk ne a‘rū‘ạkiạg ne‘ne‘i. (Maika 4:1; Jone 15:19; Kel‘ȧk Tē 12:12, 17) ‘On ava luạk ma iạ fek ti‘ pạu. Agại ‘on Satan ta täla pō se tē a‘at, ‘e rēko ‘is hạ‘umea se a‘ofiạg ne ‘on la a‘ru‘ȧk ne ‘is ma Iạ la nā ‘on vahia la mane‘ạkia ‘os hạikạinagag ma Jihova.

8. Ka tes tä ‘apostol ta Paula ‘ạliạg‘ạkia ‘e ‘on ‘eag ne ‘is “hạipeluạg” ma kạupel fak‘at raksa‘a?

⁸ ‘Is la hạipeluạg ‘atakoa. ‘Apostol ta Paula fas‘ȧk se ‘on kạuạg lelea‘ rot fakKaristo: “‘Is hạipeluạg ke ma . . . kạupel fak‘at ne ag raksa‘ ‘e ut faklạgi.” (Efeso 6:12) ‘E rēko tese tä Paula ‘es‘ao‘ȧk fäeag te‘ “hạipeluạg”? Iạ kel‘ạkia ‘os la huạl ma kikia ma iris ne ‘is hạipeluạg ma. ‘E ‘on ‘es‘ao‘ȧk ne fäeag te‘, Paula kel‘ȧk ne ‘is le‘et kop la hạipeluạg ma kikia ma tē fak‘at raksa‘a. ‘Is noh ‘e hanuet ne ma‘oi pilif se tē fak‘at raksa‘a ne ‘igkȧ‘, ‘is la se mao‘ạkia ne ‘is foa‘ vạhia se marä‘ ne huạl ta ‘e avat ne ‘is nā e ‘os mạuri se Jihova. Hạipeluạg te‘ kamat ‘e avat ne ‘is nā ‘os mạuri. Ta ‘on‘on Paula fas‘ȧk a‘fol se lelea‘ rot fakKaristo ‘e Efeso la iris la “fūmou”!—Efeso 6:11, 13, 14.

9. (a) ‘E rēko tese tä Satan ta ma timonio ‘es‘ao‘ạkia ‘ag rosi’? (e) ‘E rēko tese tä Satan ta ȧs‘ȧk la a‘pearpear‘ạkia ‘os a‘häe, ma ‘is la pō tapen la agạia? (‘Io se kes tä “ Matạ‘ ‘E Rösrös ‘on Satan Ta!”) (i) Ka ag rös tese tä ‘is la hạifäegag se ‘e te a‘ hete‘?

⁹ Ag rosrosi. Paula fas‘ȧk se lelea‘ rot fakKaristo la iris la fūmou ma agạia “ag rös” ‘on Satan ta. (Efeso 6:11) ‘Eake fại ‘eseat ma. Kạupel fak‘at raksa‘a kat ‘es‘ao‘ȧk ra fại ‘esea het, iạ ma ‘on hün leleit tä iris  a‘es‘ao‘ạkia kạinag fại ma‘oi. Iris lelea‘ rot fakKaristo ‘on rereag fūmou ‘e ta ạsạsit ka iris vil se ta ȧsȧs hoi‘ạkit. Tiapol ta ma ‘on timonio sạkior a‘lel pạu se tē ne ‘is rē la pō la iris la ‘inea‘ia utut ne ‘is ‘af‘afa e. Ma tä iris garue ‘e tēet ne la pō la mane‘ạkia ‘os mȧür fak‘ata. ‘Is ‘uạ‘uạ‘ȧk ne Puk Ha‘a kel‘ȧk se ‘isa ag rös ‘on Tiapol ta. (2 Korinita 2:11) ‘E kamatag ne puk hete‘, ‘is hạifäegag se fại he his la fak se pa ‘es ne koroa fakforo, kạumane‘ag raksa‘a, ma ag fak‘inos se ma‘ma‘a. ‘Is la sạkior se ta ag rös hoi‘ȧk ‘on Satan ta—garue fak‘atua.

10. (a) Ka tes tä garue fak‘atua? (e) Ka tes tä räe ‘on Jihova se garue fak‘atua, ma tes tä ‘ou räe?

¹⁰ ‘E avat ne le‘et la a‘sok garue fak‘atua, iạ hạifäegagan ma timonio. Tē ne laloag‘ȧk ‘e garue fak‘atua ta foar tē ‘oroi, rē ‘ại, hạifäegag ne la sại‘oa iris ne atia. Ma tape‘ma Jihova hat garue fak‘atua la tē “kelea‘efakiạn.” (Nā Hoi‘ạkiạg ne Foho 18:10-12; Kel‘ȧk Tē 21:8) ‘Is kop la “fesiạ‘ pạu se tē raksa‘a,” iạ tē pumuet la se tē ag‘esea ma ‘at raksa‘a. (Roma 12:9) Ta‘ag sal het ne ‘is la pō la fạ‘ se ‘os Ö‘fā faklạgi Jihova!

11. ‘E rēko tese tä Satan ta la marō ‘e avat ne ‘is la ‘üm ‘e ‘on fại he ta la a‘sokoa garue fak‘atua? A‘tatạu‘ạkia.

¹¹ Satan ta fe‘en ma kikia la ‘is la ‘üm ‘e fại te‘ ‘e rēko iạ ‘inea ne Jihova fesiạ‘ȧk garue fak‘atua. Satan ta marō ‘e avat ne ta le‘et vil se fại te‘. ‘On hün heta? Rē a‘häe se a‘tatạu‘ȧk te‘: Kepoi ka ta jạujiạ het rou ‘on kạuạg jạujie ta ma la‘ la kạu ma ‘oris firi, iạ ne puer se kạuạg jạujiạ ne ‘oris firi  la ‘oaf‘oaf pạu. Kop ma iạ täla kel‘ȧk ofrạua iạ la fak se ip het la a‘fekea huạg ‘on iạ ne puer se kạuạg jạujiet ne iạ rou se. Kepoi ka ta le‘ rot fakKaristo la für la a‘sokoa garue fak‘atua, ta‘ag iạ ‘amnȧk‘ȧk la rou Jihova ma hil la ‘e fȧn puer ‘on Satan ta. Satan ta la ‘oaf la kel‘ȧk ofrạu ‘on rouạg ne Jihova! Ka tei ka ‘is ‘oaf la nā marō ta se Satan ta? ‘Igkȧ‘! ‘Is ‘eake Jutasa.

12. Ka tes tä Satan ta ‘es‘ao‘ȧk la jenea ‘os a‘häe?

¹² Kepoi ka ‘is fesiạ‘ȧk garue fak‘atua, Satan ta kal ‘es‘ao‘ȧk ra la faksaran ‘isa. Ka iạ la ȧs‘ȧk la jenea ‘os a‘häe. ‘E sal tese? Iạ la ao sal la a‘sūsū famör rot fakKaristo la hele‘ la iris la ‘ea ne “raksa‘a iạ lelei, ka lelei la raksa‘.” (‘Ạisea 5:20) Satan ta a‘mou a‘es‘ao‘ȧk sạio‘ ne a‘hạ‘um ararua—ta‘ag ‘on ag rös het.

13. Ka Satan ta ‘es‘ao‘ȧk tapen sạio‘ la a‘hạ‘um ararua?

¹³ Satan ta ‘es‘ao‘ȧk sạio‘ ne a‘hạ‘um ararua ‘e ‘on mumua. Iạ sạio‘ se ‘Ive ‘e ‘Iteni: ‘Ka ‘Ạitu ‘ea aier se ‘ạuạr la se ‘ā ‘e ta ‘ại hū ‘e vek ta?’ ‘E av ‘on Jope, ‘e tạunȧ‘ ‘on ‘agero ‘e lạgi, Satan ta sạio‘: “Ka Jope la pō la agag ma kikia se ‘äeag kepoi ka iạ la se pō ta tēet?” Ma ‘e kamatag ne garue marag ‘on Jisu ‘e rȧn te‘, Satan ta agạia Jisu ‘e ‘on ‘eag: “Kepoi ka ‘äe le‘ ‘on ‘Ạitu, ma ‘äe la fas‘ȧk la hạf ‘i la hele‘ la faraoa.” Satan ta a‘jạurarāan fäeag ne Jihova ‘ea se Jisu: “Te‘is ‘otou Le‘et ne gou hanis sin, iạ ne gou a‘sok fakapạu”!—Kamataga 3:1; Jope 1:9; Mataio 3:17; 4:3.

14. (a) Ka tes ta Satan ta rē la famori la sạio‘ ne a‘hạ‘um ararua ‘e rēko garue fak‘atua? (e) Ka tes tä ‘is la sạkior ‘e ‘on ‘i‘i?

 ¹⁴ ‘E ‘on ‘i‘i, Tiapol ta ‘es‘ao‘ȧk rērē ‘esea ma la a‘hele‘ ararua ‘e rēko garue fak‘atua. Tē ne kokono ma‘oit ‘e famör ‘on Jihova ‘üm ‘e fại te‘. Iris kamat la sạio‘ tei ka rērē ‘atakoa ne garue fak‘atua raksa‘. (2 Korinita 11:3) Ka ‘is la pō tapen la hạiasoag se iris ‘i la jenea ‘oris a‘häe? Ka tes tä ‘is la rē la se ‘üm se ag rös ‘on Satan ta? La togia, ‘is la sạkior se sal he ruạ ne Satan ta a‘pearpear‘ȧk ‘e garue fak‘atua. Ta‘ag tēfak‘oaf‘ofa ma ‘on ao pot ne ‘af‘afa.

15. (a) Ka tes ta räe ‘on lelea‘ ma‘oi ‘e ut fifisi se ag fak ‘atua?(e) Ka lelea‘ rot fakKaristo ma‘oi vil tapen se garue fak‘atua?

¹⁵ ‘E hanuạ fifisi iris fakfürmariạ‘ȧk garue fak‘atua, rē ‘ại. Mạlu, puku, Tivi ta, ma manea‘ ‘e kompiuta kel‘ȧk ne garue fak‘atua iạ tē a‘ririạf huget ma kat mamạr ra, ma kel‘ȧk pot ‘on famör rē ‘atua. Mạl ‘on rereag ma puk ne kel‘ạkia garue fak‘atua rue‘ȧk iris ma‘oi la kamatan ta ‘oris kạutạunạ‘iạg het. Ta‘ag tēet ne iris timonio pa ‘ese, la ‘es ‘e a‘häet ne garue fak‘atua kat mamạr ra. Ka tei ka lelea‘ rot fakKaristo ‘um ‘e tē te‘? Hele‘ la a‘pearpear‘ạkia a‘häe ‘on lelea‘ ma‘oi. ‘E sal tese? Kel‘ạkiạg het, le‘ rot fakKaristo het ‘ea ‘e vạhiạg ne ‘on kel ne mạl ‘atua, “Gou kel ke ‘e mạl ta, ka gou kat ‘es väeag ra e.” ‘E rēko tese tä kạinag räe te‘ mamạr?

16. ‘E rēko tese tä iạ mamạr la hilia tēfak‘oaf‘oaf ne laloag‘ȧk garue fak‘atua?

¹⁶ Aier ma ne iạ ma ‘on tu het ‘e a‘sok ne garue  fak‘atua ma ‘on la kele ka ‘eake ‘on fuạga ne iạ kat mamạr ra. ‘E rēko tese? Sạkior se tē te‘: Fäeag ‘on ‘Ạitu ‘ea ne Satan ta ma ‘on timonio kal pō ra la ‘inea ‘os a‘häe. * La fak se tē ne ‘is hạifäegag mumuạ se, la ‘inea‘ia utut ne ‘is ‘af‘afa e, ‘at raksa‘a ‘io a‘lelei se ‘os gargarue— ta‘ag laloag‘ȧk tape‘ma ‘os hiliạg ne tēfak‘oaf‘ofa. ‘E avat ne le‘ rot fakKaristo kel‘ạkia ne iạ ‘oaf la kel ‘e mạl ma hat ‘e puk ne garue fak‘atua, iạ nā ta rogrog het se iris timonio. Iạ kel‘ạkia se irisa utut ne iạ ‘af‘afa e! Timonio täla agạia iạ la hele‘ se avat ne iris la pō e iạ. Iris ‘on rereag kamat ‘oaf se garue fak‘atua ‘e ‘oris hiliạg ne tēfak‘oaf‘oaf ne kel‘ạkia, vȧh ma kotä iris ‘es väega e.—Hat Kalatia 6:7.

17. Ka ag rös tese tä Satan ta la ‘es‘ao‘ȧk se iris ne ‘af‘afa?

¹⁷ Satan ta ‘ȧs‘ȧk la ‘es‘ao‘ạkia tē fak‘oaf‘ofa la a‘pearpear‘ạkia ‘is, ma tape‘ma se aoag ne pot se ‘os ‘af‘afa. ‘E sal tese? Le‘ rot fakKaristo kop ma la huạg ‘af‘af ‘e avat ne iạ kat pō pot ra se ‘on ‘af‘af ta. (Mareko 5:25, 26) Ta‘ag av leleit la Satan ta ma ‘on timonio la garue se ia. Timonio kop ma la faksaran iạ la ao pot ‘e garue ne laloag‘ȧk ta “ne‘ne‘ tūut,” ne garue fak‘atua. (‘Ạisea 1:13) Kepoi ka iạ la ‘üm ‘e ag rös ‘on timonio, ‘on hạikạinagag ma ‘Ạitu täla ‘af‘af‘ia. ‘E sal tese?

18. Ka kạinag garue tese tä lelea‘ rot fakKaristo kop la hȧ‘ạki e?

 ¹⁸ Te‘is fäeag fas‘ȧk ‘on Jihova se lelea‘ ‘Isirel ne tua‘nȧk se “ne‘ne‘ tū”: “Nōnō ka ‘ạus röj‘ạkim ‘omus si‘u, ma gou täla ‘oroi‘ạkia ‘otou mafa ‘e ‘ạusa; ma nōnō ka ‘ạus a‘ma‘oi‘ạkia ‘omus ro‘ạitu, ma gou kal a‘fại ra sin.” (‘Ạisea 1:15) ‘I, ‘is kat ‘oaf ra la ta tēet la a‘taöp‘ạkia ‘os ro‘ạitu ma la toak‘ạkia ‘os hạikạinagaga ma Jihova —a‘ti‘ se av ne ‘is la ‘af‘afa e. (Salamo 41:3) ‘Is lelea‘ rot fakKaristo la fesiạ‘ȧk kạinag sarao ne garue ne laloag‘ȧk garue fak‘atua. * (Mataio 6:13) ‘E ‘os a‘sokoag ne tē ‘i, Jihova täla hạiasoagan ‘is.—‘Io se kes ta “ Ka tei ka iạ Garue Fak‘atua?”

19. (a) Ka Tiapol ta siok tapen famori? (e) Ka kạinag rogrog tese tä lelea‘ rot fakKaristo kop la hȧ‘ȧk?

¹⁹ ‘E hanuạ fifis ‘on rereag ‘e rȧn te‘, iris kat a‘mah‘ȧk ra mamạr ne ne‘ne‘ ‘on Satan ta, ka ut ‘on rereag iris a‘mah‘ȧk. Tiapol ta siok vạhia ma‘oit ‘e hanuạ ‘i la iris la pilif ne iạ ‘es ‘e ne‘ne‘ ne  kat pupuạ ra ‘e ia. Iris noh feafea ‘e ‘oris a‘häe‘ạkia tē ne iris ‘at raksa‘a la pō la rē. Rogrog ‘on timonio pō se tē a‘at ‘on fuạmamạu. Rogrog ‘i fäeag‘ȧk ‘e ririfa la pō la famori la ‘oaf se. Ka tei ka ‘is lelea‘ rot fakKaristo nonoj la fäeag‘ạkia rogrog ‘i? ‘Igkȧ‘, ma ‘on hün pumuạ he ruạ.

20. Ka le‘et la pō tapen la forȧs‘ạkia rogrog ‘on Satan ta, aier ma ne iạ kat ‘amnȧk‘ȧk ra?

²⁰ ‘On tā, le‘et ne fäeag‘ạkia tē ne timonio pō vahia, kel‘ạkia ‘on hạitokogan Satan ta ‘e ‘on fe‘eni. ‘E sal tese? Fäeag ‘on ‘Ạitu ‘ea ne Satan ta ‘es ne‘ne‘ la rē garue man, ka kel‘ȧk tape‘ma ne iạ ‘es‘ao‘ȧk “tē a‘ferehit ka sioksiok” ma “tē siok ‘atakoa.” (2 Tesalonaika 2:9, 10) Satan ta majạu pạu se siko ma iạ ‘inea pạu la hoa‘ sēsēan iris ne a‘häe se garue fak‘atua  la iris la pilif se tē siko. Kop ma iris la pilif ne iris räe ne a‘fại se ta tēet, ma tä iris fäeag‘ạkia ne te‘is sok aier. ‘E avat ne la fäeag‘ȧk hạisokoag iris ‘ut‘ạkia ma se muạ ‘on siko. Le‘ rot fakKaristo ne la fäeag‘ȧk rogrog sioksiok, ta‘ag a‘sokoa pa ‘es ‘on Tiapol ta—“ö‘fā ‘on iris ne tapi‘a”. Iạ forȧs‘ạkia rogrog sioksiok ‘on Satan ta.—Jone 8:44; 2 Timoti 2:16.

21. Ka ‘is la hạifäegag‘ạkia tese?

²¹ ‘On rue, kepoi ka ta le‘ rot fakKaristo a‘sok garue fak‘atua ‘e ‘on mumua iạ la se fäeag‘ạkia se ‘on hensạsiạg fak‘ata. ‘E rēko tese? ‘Is fas‘ȧk la: “‘Io‘ioas ma kikia se Gagajat ne muạ‘ȧk ma ‘atakoa‘ȧk ‘os pilifi, ‘äna Jisu.” (Hiperiu 12:2) ‘I, ‘is iof‘ạkia ‘os a‘häe se Karisto ta, ‘eake se Satan ta. Iạ tē pumuet la ‘inea ‘e avat ne iạ ‘e rȧn te‘ kop ma iạ fäeag‘ạkia se ‘on lelea‘ rak tē, tē ne Satan ta la pō la rē, ka iạ kat fäeag‘ạkia ra se iris timonio. Jisu a‘pumuạ‘ạkia rog heg ne Pure‘aga. ‘Is la rakoa Jisu ma iris ‘apostolo, la ‘is la hạifäegag ma kikia se “garue titi‘ ‘on ‘Ạitu.”—Garue 2:11; Luke 8:1; Roma 1:11, 12.

22. Ka tes tä ‘is la rē la iris ‘e ‘lạgi la ‘oaf‘ofa’ e?

²² Aier, Satan ta ‘es‘ao‘ȧk fại ma‘oi laloag‘ȧk tape‘ma garue fak‘atua ‘e ‘on ȧs‘ȧk la mane‘ạkia ‘os hạikạinagaga ma Jihova. Ka ‘e ‘os la fesiạ‘ȧk tē ne raksa‘a ka la sasap la mou se tē lelei, ‘is kat rou ra ta ut vagvag het la Satan ta a‘af‘afan ‘os la fesiạ‘ȧk ne garue fak‘atua. (Hat Efeso 4:27.) Rē a‘häe se ‘‘oaf‘ofa ‘e lạgi’ ‘e avat ne ‘is la fe‘en ma kikia la “fūmou la agạia ag rös ‘on Satan ta” la hele‘ se av het ne iạ toak pạuena!—Luke 15:7; Efeso 6:11.