1, 2. O ai e olioli i taimi o papatisoga?

AFAI UA leva ona e auauna iā Ieova, e lē taumatea la ua tele lauga o le papatisoga ua e faafofoga i ai i a tatou fonotaga ma tauaofiaga. E ui i lea, po o le ā lava le tele o taimi ua e faalogo ai i na lauga, ae e faagaeetia lava oe i taimi uma e te vaaia ai ē o loo nonofo i le pito i luma o le maota, o loo tutulaʻi i luga e sauniuni mo le papatisoga. O le taimi lenā ua magamagagū ai ma le fiafia le aofia, ma ua patipati foʻi. Atonu e maligi ou loimata a o e vaavaai atu i nei tagata e tāua tele ua ʻau i le itu a Ieova. E tau i le lagi lo tatou olioli i taimi faapena!

² E lē tele ni taimi o le tausaga ua tatou molimauina ai ni papatisoga i o tatou vaipanoa, ae ua maua e agelu le faaeaga o le molimauina o le tele o papatisoga. Seʻi manatu i le tele o le “olioli [i] le lagi” a o latou vaavaai mai i le faitau afe o tagata i le lalolagi aoao, ua faaopoopo mai i le faalapotopotoga vaaia a Ieova i vaiaso taʻitasi! (Luka 15:7, 10) E lē taumatea e matuā faagaeetia agelu a o molimauina lenā faaopoopoga!​—Hakai 2:7.

3. Aiseā ua “fealuaʻi” ai Satani “e pei o se leona o loo tagi leotele,” ma o le ā lona sini?

³ E matuā tuufaafeagai lenā olioli ma le lilivau o nisi o foafoaga agaga, o ē o loo vaavaai mai i taimi o papatisoga.  Ua matuā lotoa Satani ma temoni i le vaavaai mai i le faitau afe o tagata o ē ua fulitua i lenei lalolagi faapiʻopiʻo. Na mitamita Satani ma faapea mai e lē auauna tagata iā Ieova ona o le alofa moni iā te ia, ma e leai se tasi e faamaoni pe a oo i ai tofotofoga ogaoga. (Faitau le Iopu 2:4, 5.) O so o se taimi la e tuuina atu ai le ola o se tasi iā Ieova, e faamaonia ai le sesē o Satani. E peiseaʻī o loo matuā faatigā iā Satani i vaiaso uma o le tausaga. E lētioa a “fealuaʻi” o ia “e pei o se leona o loo tagi leotele, e saʻili se tasi e na te ʻaina”! (1 Peteru 5:8) O loo vilivilitaʻi lenei “leona” ina ia ʻaina i tatou i le itu faaleagaga, ma iʻu ai ina faaleagaina pe motusia la tatou faiā ma le Atua.​—Salamo 7:1, 2; 2 Timoteo 3:12.

4, 5. (a) O ā ni auala tāua e lua ua faatapulaa ai e Ieova taaʻiga a Satani? (e) O le ā le mea e tatau ona mautinoa ai le Kerisiano moni?

 ⁴ E ui lava o loo tatou feagai ma se fili taufeʻai, ae e lē tatau ona tatou soona matataʻu. Aiseā? Auā e lua ni auala ua faatapulaa ai e Ieova le malosi o lenā ʻleona tagi.’ O ā na auala e lua? Muamua lava, na valoia mai e Ieova e faasaoina “se motu o tagata e toʻatele” o Kerisiano faamaoni mai le “puapuaga tele” o loo faaloloʻi mai. (Faaaliga 7:9, 14) E lē iʻuvale valoaga a le Atua. O lea la, e lē taumatea ua iloa lava e Satani e lē mafai ona ia maileia tagata uma o le Atua.

⁵ E iloa le mea lona lua ua faatapulaa e Ieova, mai i le mea moni na taʻua e se tasi o auauna faamaoni a le Atua i aso anamua. Na faapea atu le perofeta o Asaraia i le tupu o Asa: “E ʻau Ieova ma outou pe afai tou te ʻau ma ia.” (2 Nofoaiga a Tupu 15:2; faitau le 1 Korinito 10:13.) E pei ona faaalia i le tele o faaaʻoaʻoga tusitusia, e leʻi mafai lava e Satani ona ʻaina ni auauna a le Atua o ē na mafuta vavalalata i le Atua i aso anamua. (Eperu 11:4-40) E mafai foʻi e se Kerisiano i aso nei ona tetee atu ma manumalo i le Tiapolo, pe afai e mafuta vavalalata o ia i le Atua. Ua faamautinoa mai e le Afioga a le Atua: “Ia tetee atu i le Tiapolo, ona sola ese ai lea o ia mai iā te outou.”​—Iakopo 4:7.

6. E faapefea ona tau Satani e faasaga i Kerisiano taʻitoʻatasi?

⁶ E lē mafai ona manumalo Satani i le taua, ae e mafai ona ia manumalo iā i tatou taʻitoʻatasi pe a tatou lē mataala. Ua iloa e Satani e mafai ona ia ʻaina i tatou, pe a ia faavaivaia la tatou faiā ma Ieova. E faapefea ona faia e Satani lenā mea? E ala i le osofaʻia o i tatou i osofaʻiga ogaoga, o osofaʻiga i tagata taʻitoʻatasi, ma osofaʻiga taufaaʻoleʻole. Seʻi o tatou iloiloina na osofaʻiga autū a Satani.

7. Aiseā ua ogaoga ai osofaʻiga a Satani i tagata o Ieova?

⁷ Osofaʻiga ogaoga. Na taʻua e le aposetolo o Ioane: “O le lalolagi atoa o loo nofo toʻilalo i le pule a lē o loo leaga.”  (1 Ioane 5:19) O loo iai i lenā mau se lapataʻiga mo Kerisiano moni uma. Talu ai ua maua e Satani le lalolagi atoa o tagata amioleaga, ua mafai ona liliu mai o ia e faamalosia ana osofaʻiga i tagata o Ieova, o ē e leʻi maua e ia. (Mika 4:1; Ioane 15:19; Faaaliga 12:12, 17) Ua matuā lotoa o ia auā ua iloa ua puupuu lona taimi. O lea la, ua faateteleina ana osofaʻiga. Ua tatou fetaiaʻi i aso nei ma lana osofaʻiga sauā mulimuli, ina ia motusia ai la tatou faiā ma le Atua.

8. O le ā le uiga o upu a le aposetolo o Paulo o loo tatou “tau” ma agaga leaga?

⁸ Tauiviga a le tagata lava ia. Na lapataʻia e le aposetolo o Paulo ona uso Kerisiano: ʻTatou te tau ma agaga leaga uma i mea o i le lagi.’ (Efeso 6:12) O le upu Eleni ua faaliliuina i le “tau” o lona uiga o se “tauiviga,” ma e faaalia ai o se tauiviga i le va o nisi e toʻalua. O le faaaogāina e Paulo o lenā upu, ua faamatilatila ai o loo taʻitoʻatasi i tatou ma tauivi ma agaga leaga. Pe e tatou te nonofo i se atunuu e taatele ai le talitonuga i agaga leaga pe leai, ae aua neʻi galo iā i tatou, na tatou ulu atu i le taua faaleagaga ina ua tuuina atu o tatou ola iā Ieova. Na amata mai i lenā taimi ona lē mafai ona sosola ese Kerisiano taʻitoʻatasi mai i lenā taua. E lētioa lava la ona apoapoaʻi faatolu Paulo i Kerisiano i Efeso, ina ia “tutū mausalī”!​—Efeso 6:11, 13, 14.

9. (a) Aiseā ua faaaogā ai e Satani ma temoni ni “togafiti” eseese taufaaʻoleʻole? (e) Aiseā e taumafai ai Satani e faasesē o tatou mafaufauga, ma e faapefea ona tatou tetee atu i ana taumafaiga? (Tagaʻi i le pusa “ Ia Mataala i Togafiti a Satani!”) (i) O le ā le isi togafiti taufaaʻoleʻole o le a tatou iloiloina?

⁹ Togafiti taufaaʻoleʻole. Na apoapoaʻi atu Paulo i Kerisiano ina ia tutū mausalī e tetee atu i “togafiti” taufaaʻoleʻole a Satani. (Efeso 6:11) Ia mātau mai, e tele togafiti eseese e pei ona taʻua e Paulo. Ua faaaogā e agaga leaga le tele o togafiti taufaaʻoleʻole, ae e lē na o se tasi se togafiti, ma e iai māfuaaga ua ala ai ona tele a latou togafiti. Na tutū mausalī  nisi tagata talitonu i se tofotofoga, ae a o faagasolo le taimi, na iʻu ina lolo atu i latou i se tofotofoga ese. O lea la, e mataʻituina e le Tiapolo ma temoni o tatou uiga taʻitoʻatasi, ina ia mātau ni o tatou vaivaiga. Ona latou faaaogā lea o o tatou vaivaiga faaleagaga. Ae o le mea e faafetai ai, ua mafai ona tatou iloa le tele o metotia a le Tiapolo, auā o lea ua faailoa mai e le Tusi Paia. (2 Korinito 2:11) Ua uma ona tatou iloiloina i lenei tusi nisi o na togafiti e pei o le mailei o le matapeʻapeʻa, o aumea leaga, ma amioga lē mamā. Ae seʻi o tatou tilofaʻia se isi togafiti taufaaʻoleʻole a Satani, o faiga faataulāitu.

10. (a) O le ā le uiga o faiga faataulāitu? (e) O le ā le silafaga a Ieova i faiga faataulāitu, ma o le ā sou manatu i faiga faataulāitu?

¹⁰ E fesootaʻi tuusaʻo se tasi ma agaga leaga pe a auai o ia i faiga faataulāitu po o faiga faatemoni. O nisi nei o vala o faiga faataulāitu: o valovaloga faataulāitu, o faiga faaagaga, o le faalauatau, ma le fesili atu i ē ua oti. Ua tatou iloa lelei e “inosia” e Ieova faiga faataulāitu. (Teuteronome 18:10-12; Faaaliga 21:8) Talu ai e tatau ona tatou “ʻinoʻino i le leaga,” e mamao la ma o tatou mafaufau le faifaimea faatasi ma agaga leaga. (Roma 12:9) Ioe, o se gaoioiga inosia e lē faamaoni ai iā Ieova lo tatou Tamā o i le lagi!

11. Aiseā e manumalo ai Satani pe a ia faaliliuina i tatou i faiga faataulāitu? Ia faataʻitaʻi.

¹¹ O le fia tofotofo i faiga faataulāitu, o le matuā lē faamaoni lenā iā Ieova ma ua vilivilitaʻi Satani ina ia faaaafia i tatou i faiga faataulāitu. E manumalo Satani i so o se taimi e na te uunaʻia ai se Kerisiano e liliu atu i faiga faatemoni. Aiseā? Seʻi manatu i lenei faatusatusaga: E fiafia se taʻitaʻiʻau o le itu o le fili pe a tauanauina se fitafita o le isi itu ina ia tuulafoaʻi lana ʻautau, ae ʻau atu i le itu taua a le fili. Atonu e mitamita le taʻitaʻiʻau ma faaalialia solo  lenei fitafita e peiseaʻī o se faailoga o lona manumalo, ina ia taufaifai ai i le taʻitaʻiʻau muamua o le fitafita. E faapena foʻi se Kerisiano ua liliu atu i faiga faataulāitu, ua ia tuulafoaʻia ma le loto i ai Ieova, ma ua ia faatagaina Satani e taʻitaʻia o ia. Pagā le olioli o Satani e faaalialia solo lenei tagata lē faamaoni e fai ma faailoga o lona manumalo! Pe e tatou te mananaʻo ea ina ia manumalo le Tiapolo? E mautinoa lava, e leai! E lē o i tatou o ni tagata lē faamaoni.

12. O le ā se metotia e faaaogā e Satani ina ia suia ai lo tatou manatu i faiga faataulāitu?

¹² E lē manumalo Satani iā i tatou i le faaaogāina o faiga faataulāitu, pe afai e tatou te ʻinoʻino i na mea. O lea la, ua iloa e Satani e tatau ona ia suia o tatou mafaufauga. E faapefea? E taumafai o ia e faafenuminumiaʻi Kerisiano, ona manatu lea o isi “e lelei le leaga, ma e leaga le lelei.” (Isaia 5:20) E faia faapea e Satani e ala i lona faaaogāina o se metotia aogā ua leva ona iai​—o le lāgā o fesili e faatupu ai masalosaloga.

13. Na faapefea ona faaaogā e Satani le metotia o fesili e faatupu ai masalosaloga?

¹³ Seʻi mātau mai le auala na faaaogā ai e Satani lenā metotia i aso anamua. Na fesili atu o ia iā Eva i le faatoʻaga i Etena: “E moni ea na fetalai mai le Atua, e aua neʻi lua aai mai i fua o laau uma o le faatoʻaga?” Na lāgā foʻi e Satani se fesili i aso o Iopu, a o faia se fono a agelu i le lagi: “Po ua mataʻu fua ea Iopu i le Atua?” Na luʻia foʻi e Satani Keriso i le amataga o lana faiva i le lalolagi, ina ua faapea atu: “Afai o oe o se atalii o le Atua, inā fetalai atu ia i nei maa ia liu falaoa.” Seʻi manatu i le lē migao o Satani, ina ua tauemu i le fetalaiga a Ieova iā Iesu i le pe tusa ma le ono vaiaso na muamua atu, e faapea: “O loʻu Atalii pele lenā, o lē ua malie i ai loʻu loto.”​—Kenese 3:1; Iopu 1:9; Mataio 3:17; 4:3.

14. (a) E faapefea ona faaaogā e Satani lana faufauga leaga o le faatupuina o masalosaloga i faiga faataulāitu? (e) O ā mea o le a tatou iloiloina?

 ¹⁴ Ua faaaogā foʻi e Satani se faufauga leaga faapena i aso nei, ina ia taumafai ai e faatupu ni masalosaloga e uiga i faiga faataulāitu. O le mea e faanoanoa ai, ua taulau manuia Satani i le faatupuina o masalosaloga i mafaufau o nisi o uso talitonu. Ua latou fesiligia pe moni e leaga nisi o faiga faataulāitu. (2 Korinito 11:3) E faapefea ona tatou fesoasoani ina ia sui o latou mafaufau? E faapefea ona tatou faamautinoa e lē taaʻina i tatou i faufauga leaga a Satani? Ina ia maua le tali, seʻi o tatou iloiloina ni vala se lua o le olaga, ua faafilogia ma le poto e Satani i faiga faataulāitu. O faafiafiaga ma le tausiga o le soifua mālōlōina.

15. (a) O ā ni manatu o le toʻatele o tagata i atunuu papalagi e uiga i faiga faataulāitu? (e) Ua faapefea ona aafia nisi o Kerisiano i le vaaiga a le lalolagi i faiga faataulāitu?

¹⁵ Ua tele ina manatu māmā tagata aemaise lava i atunuu papalagi i faiga faaagaga ma faiga faataulāitu. Ua faamatilatila faiga faatemoni i ata tifaga, o tusi, o le TV, ma taaloga i le komepiuta, ma e manatu i ai o se mea fiafia ma o se mea lelei e lē afāina ai se tasi. Ua matuā alumia nisi o na ata ma tusi e autū atu i faiga faataulāitu, ma e toʻatele tagata ua atua i na mea. E manino mai la, ua taulau manuia taumafaiga a temoni ina ia manatu māmā tagata i āuga leaga o mea faataulāitu. Faamata ua aafia ni Kerisiano i le manatu māmā i faiga faaagaga? Ua aafia ai mafaufauga o isi. I le ā le itu? O se faaaʻoaʻoga, ina ua uma ona matamata se Kerisiano i se ata e autū atu i mea faataulāitu, ona fai mai lea o ia, “Na ou matamata i le ata, ae ou te leʻi faia ni faiga faataulāitu.” Aiseā e mataʻutia ai mafaufauga faapena?

16. Aiseā o se mea e lamatia ai le filifilia o faafiafiaga e autū atu i faiga faataulāitu?

 ¹⁶ E ui lava e iai le eseesega o le faia o faiga faataulāitu ma le matamata i ai, ae e lē faapea e leai ni lamatiaga o le matamata i faiga faataulāitu. Aiseā? Seʻi manatu i lenei mea: Ua faailoa mai e le Tusi Paia, e lē mafai e Satani ma ana temoni ona iloa mea o loo tatou mafaufau i ai. * Ae e pei ona taʻua muamua, e mataʻituina e agaga leaga a tatou gaoioiga e aofia ai ma faafiafiaga e tatou te filifilia, ina ia mafai ona latou mātauina mea o loo tatou mafaufau i ai, atoa foʻi ma o tatou vaivaiga faaleagaga. Afai o gaoioiga a se Kerisiano e faaalia ai lona fiafia i ata ma tusi e autū atu i taulāitu, o faiga faalauatau, o le ulutinoina e temoni, po o nisi mataupu faatemoni faapena, o lona uiga la o loo ia avatuina se feʻau i temoni. Ioe, ua ia faailoa atu iā i latou lona vaivaiga! O le iʻuga, e mafai ona faateteleina osofaʻiga a temoni i lenā Kerisiano e ala i le faaaogā o lona vaivaiga, seʻia oo lava ina faatoʻilaloina o ia. O le mea moni, na amata ona fiafia nisi i faiga faaagaga ona o le matamata i ata e autū i faiga faataulāitu, ma iʻu ai ina latou auai i faiga faataulāitu.​—Faitau le Kalatia 6:7.

17. O le ā le togafiti taufaaʻoleʻole ua faaaogā e Satani i ē ua mamaʻi?

¹⁷ E lē na o o tatou manaʻoga i faafiafiaga e faaaogā e Satani, ae o le tausiga foʻi o o tatou ola mālōlōina. E faapefea? Atonu ua lotovaivai se Kerisiano ona ua fiu e saʻili se togafitiga o lona maʻi tugā. (Mareko 5:25, 26) Ua maua e Satani ma ana temoni se avanoa lelei e faaaogā ai o ia. Atonu e faaosoosoina e temoni se tagata maʻi ua lē mautonu lona mafaufau, ina ia filifilia togafitiga po o taotoga e aafia i “faiga faataulāitu” po o faiga faaagaga. (Isaia 1:13)  Afai e taulau manuia lenā togafiti taufaaʻoleʻole a temoni, e mafai ona faavaivaia ai le faiā a le tagata maʻi ma le Atua. E faapefea?

18. O ā ni faiga e saʻili ai se maʻi e teena e se Kerisiano, ma aiseā?

¹⁸ Na lapataʻi atu Ieova i tagata Isaraelu o ē na aafia i “faiga faataulāitu”: “Pe a faaloaloa mai o outou lima, e ʻalo ese oʻu mata mai iā te outou. E tusa lava pe tele ni a outou tatalo e fai, ou te lē faalogo atu lava i ai.” (Isaia 1:15) O le mea moni, e tatou te lē fia faia se mea e ono faalavelavea ai a tatou tatalo, ma faaitiitia ai le lagolagosua a Ieova iā i tatou, aemaise lava i taimi e tatou te mamaʻi ai. (Salamo 41:3) Afai e iloa e se Kerisiano moni e tau aafia i mea faataulāitu se auala e saʻili ai se maʻi, po o ni fofō ma ni vai, e tatau ona ia teena. * (Mataio 6:13) O lona faia faapea, e mautinoa ai o le a faaauau ona lagolagoina o ia e Ieova.​—Tagaʻi i le pusa “ Po o se Faiga Faataulāitu Ea?”

19. (a) O le ā le talitonuga ua faasesēina ai e le Tiapolo le toʻatele o tagata e uiga i lona mana? (e) O ā tala e tatau ona ʻalofia e Kerisiano moni?

¹⁹ E manatu māmā le toʻatele o tagata i atunuu papalagi i le mataʻutia o le mana o Satani, ae e lē faapena manatu o  tagata i isi atunuu o le lalolagi. Ua faasesē e Satani le toʻatele o tagata i na atunuu ina ia talitonu e matuā tele lona mana, ae o le mea moni e leai. O loo matataʻu nisi tagata i agaga leaga i taimi uma lava e aai ai, pe galulue pe momoe foʻi. Ua matuā taatele tala e uiga i mea mamana ua faia e temoni. O se mea fiafia le faamatala atu o na tala, ma e ofo ai tagata. Ae pe e tatau ona tatou toe faamatala atu ni tala faapena? E leai, ma e lua ni māfuaaga tāua e lē tatau ai ona toe faamatala atu e auauna a le Atua moni ni tala faapena.

20. E faapefea ona faasalalauina ma le lē iloa e se tasi aʻoaʻoga pepelo a Satani?

²⁰ Muamua lava, e faaauilumaina e se tasi manaʻoga o Satani, pe afai e faasalalauina atu e lenā tagata ni tala i mea na faia e temoni. Aiseā? Ua taʻua e le Tusi Paia e mafai e Satani ona faia galuega mamana, ae ua lapataʻi mai e faaaogā e Satani “faailoga pepelo” ma “mea taufaasesē.” (2 Tesalonia 2:9, 10) Talu ai o Satani o le taufaasesē silisili, e iloa e ia le auala e taaʻina ai mafaufau o ē e fiafia i mea faataulāitu,  ma faatalitonu i latou i mea e lē moni. Atonu e latou te talitonu na latou vāai ma faalogo i ni mea, ma faamatala atu i isi e faapea o ni mea moni na tutupu. Ae e uma ane, ua soona faatelēina le tala o mea na tutupu ona o le faamatala soo. Afai e faasalalau atu e Kerisiano ni tala faapena, o lona uiga ua ia faataunuuina mea e loto i ai Satani, “le tamā o le pepelo.” Ua ia faasalalauina atu aʻoaʻoga pepelo a Satani.​—Ioane 8:44; 2 Timoteo 2:16.

21. O le ā le mea e tatou te mananaʻo e taulaʻi i ai a tatou talanoaga?

²¹ Lona lua, e tusa foʻi pe na aafia se Kerisiano i agaga leaga i le taimi ua mavae, ae e lē tatau ona ia soona faamatala atu na mea i uso talitonu e faaofo ai i latou. Aiseā? Auā o le apoapoaʻiga lenei mo i tatou: “[Ia] tatou vaavaai totoʻa atu iā Iesu o le Sui Sili, ma o Lē e faaatoatoaina lo tatou faatuatua.” (Eperu 12:2) E ao ona tatou taulaʻi atu iā Keriso ae lē o Satani. O le mea e mataʻina ai, a o soifua i le lalolagi, e leʻi faamatala atu lava e Iesu i ona soo ni tala e uiga i agaga leaga e faaofo ai ona soo, e ui na semanū e tele ni mea na mafai ona ia talanoa ai e uiga i tomai o Satani. Nai lo o lea, na taulaʻi atu Iesu i le feʻau o le Malo. O lea la, o lo tatou faaaʻoaʻo iā Iesu ma le ʻauaposetolo, e tatou te mananaʻo ai e taulaʻi a tatou talanoaga i “mea matagofie a le Atua.”​—Galuega 2:11; Luka 8:1; Roma 1:11, 12.

22. E faapefea ona fai so tatou sao ina ia faaauau ai ona “olioli . . . le lagi”?

²² E moni, ua faaaogā e Satani ni togafiti eseese taufaaʻoleʻole e aofia ai faiga faataulāitu, ina ia taumafai e motusia ai la tatou faiā ma Ieova. Peitaʻi, o lo tatou ʻinoʻino i le leaga ae pipii i le lelei, ua tatou lē tuua ai se avanoa i le Tiapolo e faavaivaia lo tatou faanaunauga e tetee atu i tafa eseese uma o faiga faataulāitu. (Faitau le Efeso 4:27.) Maʻeu le tele o le “olioli [i] le lagi” pe afai e faaauau ona tatou “tutū mausalī e tetee atu i togafiti a le Tiapolo” seʻia oo i le taimi e lē toe iai ai o ia!​—Luka 15:7; Efeso 6:11.