1, 2. Suma e prisiri te sma e teki dopu?

EFU yu e dini Yehovah furu yari kaba, dan a no de fu taki dati yu yere furu dopu-lezing na den kring konmakandra èn na den kongres fu wi. Ma awansi o furu leisi yu ben de na den konmakandra dati, toku ibri leisi a e naki yu ati te den wan di e sidon na fesisei e opo tanapu fu sori taki den wani teki dopu. Na a srefi momenti dati, ala den sma drape e naki anu fu di den e prisiri. Kande yu ai e furu nanga watra te yu e si taki moro sma e teki a sei fu Yehovah. Den okasi dati e meki wi prisiri srefisrefi!

² Na ini a kontren pe wi e tan, wi e kisi na okasi wan tu leisi na ini wan yari fu si fa sma e teki dopu. Ma den engel abi na okasi fu si dati moro furu leisi leki wi. Prakseri fa ’prisiri de na hemel’ te dusundusun sma na heri grontapu e kon na ini na organisâsi fu Yehovah ibri wiki (Lukas 15:7, 10). A no de fu taki dati den engel breiti srefisrefi fu si taki moro nanga moro sma e tron anbegiman fu Yehovah!​—Hagai 2:7.

3. Fu san ede Satan e waka lontu „leki wan lew di e bari”, èn san a wani du?

³ Ma tra engel de di e atibron srefisrefi te den e si taki sma e teki dopu. Satan nanga den ogri yeye e atibron te den e si taki dusundusun sma e drai baka gi na ogri grontapu disi. Wi sabi dati, fu di Satan ben taki dati nowan sma e dini Yehovah fu di a lobi en nanga en heri ati. A taki  tu dati nowan sma o tan gi yesi na Gado te a e kisi hebi tesi. (Leisi Yob 2:4, 5.) Ibri leisi te wan sma teki a bosroiti fu gi ensrefi abra na Yehovah, dan a e sori taki a sani di Satan ben taki, no tru. A de neleki ibri wiki den sma disi e meki Satan fesi fadon. Dati meki a no e fruwondru wi taki a e „waka lontu leki wan lew di e bari, fu di a e suku fu swari wan sma”! (1 Petrus 5:8) A „lew” disi de nomonomo fu pori a bribi fu wi, so taki wi no de Gado mati moro.​—Psalm 7:1, 2; 2 Timoteyus 3:12.

4, 5. (a) San na tu prenspari fasi fa Yehovah tapu pasi gi Satan fu du san a wani? (b) Fu sortu sani tru Kresten kan de seiker?

⁴ Aladi wi abi wan ogri-ati feanti, toku wi no abi fu bruya. Fu san ede? Fu di Yehovah tapu pasi gi na ogri-ati „lew” disi fu du ala san a wani. Yehovah du tu prenspari sani. A fosi sani, na taki a pramisi taki „wan bigi ipi” fu tru Kresten o pasa a „bigi banawtu” libilibi (Openbaring 7:9, 14). Den profeititori fu Gado e kon tru ala ten. Fu dati ede, srefi Satan sabi taki a no o man kori ala anbegiman fu Gado.

⁵ Wi kan kon sabi a di fu tu sani di Yehovah du, te wi e luku san wan fu den reti-ati futuboi fu Gado ben taki. A profeiti Asaria ben taigi Kownu Asa: „Yehovah o de nanga unu, solanga unu de nanga en.” (2 Kroniki 15:2; leisi 1 Korentesma 10:13.) Furu eksempre na ini Bijbel e sori taki na ini a ten di pasa, noiti Satan ben man kori  den futuboi fu Gado di ben tan krosibei na Gado (Hebrewsma 11:4-40). Na ini a ten disi, Kresten di e tan krosibei na Gado, o man kakafutu gi Didibri, èn den o man wini en tu. Fu taki en leti, Gado Wortu e gi wi a dyaranti disi: „Kakafutu gi Didibri, èn a o lon gowe fu unu.”​—Yakobus 4:7.

6. Fa Satan e feti nanga ibri Kresten?

⁶ Satan no man wini a feti, ma ibri Kresten musu luku bun taki Satan no e swaki a bribi fu en. Satan sabi taki te a meki a bribi fu wi kon swaki, dan a o moro makriki gi en fu swari wi. Fa Satan e du dati? A e feti fayafaya nanga ibriwan fu wi, èn a gebroiki den triki fu en. Meki wi go luku fa Satan e du dati.

7. Fu san ede Satan e feti fayafaya nanga a pipel fu Yehovah?

⁷ A e feti fayafaya nanga wi. Na apostel Yohanes ben taki: „Heri grontapu de na ini a makti fu na ogriwan” (1 Yohanes 5:19). Den wortu dati na wan warskow gi ala tru Kresten. Fu di Satan swari ala ogrisma kaba, meki a e poti ala en prakseri now na a pipel fu Yehovah di a no kisi ete, èn a e du dati fayafaya (Mika 4:1; Yohanes 15:19; Openbaring 12:12, 17). A abi bigi atibron fu di a sabi taki en ten syatu. Dati meki a e tyari moro hebi tesi kon na wi tapu. Na ini a ten disi, Satan e du ala sortu ogri-ati sani fu pori a bribi fu wi, fu di disi na den lasti okasi di a abi.

8. San na apostel Paulus ben wani sori wi di a taki dati wi e „feti” nanga den ogri yeye?

 ⁸ A e feti nanga ibriwan fu wi. Na apostel Paulus ben gi den Kresten brada nanga sisa fu en a warskow disi: ’Wi e feti nanga den ogri yeye na hemel’ (Efeisesma 6:12). San Paulus ben wani sori wi? A Griki wortu di vertaal nanga „feti” e sori taki ibriwan fu wi e feti fesi nanga fesi nanga den ogri yeye. Awansi wi e libi na ini wan kondre pe furu sma no e bribi na ini ogri yeye, toku noiti wi musu frigiti taki di wi gi wisrefi abra na Yehovah, dan wi bigin nanga wan feti. Dati meki dri leisi Paulus taigi den Kresten na ini Efeise taki den ben musu „tanapu kánkan”!​—Efeisesma 6:11, 13, 14.

9. (a) Fu san ede Satan nanga den ogri yeye e gebroiki difrenti sortu „triki”? (b) Fu san ede Satan e pruberi fu pori a denki fu wi, èn fa wi kan kakafutu gi en? (Luku a faki „ Luku bun nanga den triki fu Satan!”.) (c) Sortu triki fu Satan wi o luku now?

⁹ A e kon nanga triki. Paulus e gi Kresten a rai fu kakafutu gi „den triki” fu Satan (Efeisesma 6:11). Luku taki Paulus no e taki fu wán triki nomo. Ogri yeye e gebroiki difrenti sortu triki, èn den sabi fu san ede den e du dati. Na ini a ten di pasa, son anbegiman di ben man kakafutu gi wan tesi, fadon di den kisi wan tra tesi. Dati meki Didibri nanga den ogri yeye e luku heri bun fa wi e tyari wisrefi, fu man si sortu swakifasi wi abi. Baka dati, den e tesi wi so taki iniwan swakifasi di wi abi e meki wi naki futu. Ma koloku taki wi sabi sortu triki Satan e gebroiki, fu di Bijbel e  sori wi san na den triki dati (2 Korentesma 2:11). Na ini wan fu den kapitel, wi ben taki kaba fu wan tu triki fu Satan. A e gebroiki gudu, takru kompe, nanga hurudu fu kisi sma. Meki wi poti prakseri now na ete wan triki fu Satan. Dati na afkodrei.

10. (a) San na afkodrei? (b) Fa Yehovah e denki fu afkodrei, èn fa yu e denki fu afkodrei?

¹⁰ Wan sma di e du afkodrei e wroko makandra nanga ogri yeye. Wan tu fasi fa sma e du afkodrei, na te den e du lukuman-wroko, te den e wisi, èn te den e taki nanga dedesma. Wi sabi heri bun taki Yehovah e „tegu” gi afkodrei (Deuteronomium 18:10-12; Openbaring 21:8). Fu di wi musu ’tegu tu gi ogri’, meki wi no musu abi noti fu du nanga ogri yeye (Romesma 12:9). Efu wi ben o du dati, dan wi ben o drai baka gi Yehovah, wi hemel Tata!

11. Fu san ede Satan ben o breiti srefisrefi efu a ben kan kori wi fu du afkodrei? Gi wan agersitori.

¹¹ Ma fu di Satan sabi taki te wi e du afkodrei, dan wi e drai baka gi Yehovah, meki a de nomonomo fu kori sonwan fu wi, so taki wi e du afkodrei. Ibri leisi te Satan e kori wan Kresten fu du afkodrei, a e wini wan bigi feti. Fa so? Luku na agersitori disi: Efu wan srudati ben o drai baka gi a legre fu en èn a ben o go feti gi a legre fu a feanti,  dan a komandanti fu den feanti ben o breiti srefisrefi. Kande a ben o waka sori ala sma taki a srudati disi teki en sei, soso fu kan gi a komandanti fu a tra legre syen. Na so a de tu taki te wan Kresten e du afkodrei, dan a e drai baka gi Yehovah fu espresi, èn Satan e tron en basi. Prakseri fa Satan ben o prisiri fu waka sori ala sma taki a Kresten disi teki en sei! Yu ben o wani taki Didibri kisi yu na so wan fasi? Kwetikweti! Wi no wani drai baka gi Yehovah.

12. Sortu triki Satan e gebroiki fu kori wi fu du afkodrei?

¹² Solanga wi e tegu gi afkodrei, Satan no o man kori wi fu du a sani dati. Dati meki a sabi taki a musu kenki a fasi fa wi e denki. Fa a e du dati? A e pruberi fu bruya Kresten, so taki te fu kaba sonwan fu den e bigin denki taki „bun ogri èn ogri bun” (Yesaya 5:20). Fu dati ede Satan e gebroiki wan fu den triki fu en di e wroko bun. A e gebroiki aksi fu meki sma tweifri.

13. Sortu aksi Satan poti fu meki sma tweifri?

¹³ Luku fa Satan gebroiki a triki dati na ini a ten di pasa. Na ini Eden, a ben aksi Eva: „A de so trutru taki Gado taki dati un no musu nyan fu ala den bon na ini a dyari?” Na ini a ten fu Yob, di den engel ben kon makandra na hemel, Satan poti na aksi disi: „Na fu soso Yob e dini Gado?” Na a bigin fu Yesus en diniwroko na grontapu, Satan taigi Krestes: „Efu yu na wan manpikin fu  Gado, dan taigi den ston disi fu tron brede.” Fu taki en leti, di Satan taigi Yesus a sani dati, dan a ben prefuru fu spotu nanga den wortu di Yehovah srefi ben taki sowan siksi wiki na fesi: „Disi na mi Manpikin, a lobiwan di mi feni bun.”​—Genesis 3:1; Yob 1:9; Mateyus 3:17; 4:3.

14. (a) Fa Satan e pruberi fu meki sma tweifri? (b) San wi o go luku now?

¹⁴ Na ini a ten disi, Didibri e gebroiki a srefi triki fu meki sma tweifri efu afkodrei na wan ogri. A de wan sari sani taki a ben man meki wan tu Kresten tweifri. Den bigin tweifri efu ala fasi fa sma e du afkodrei ogri trutru (2 Korentesma 11:3). Fa wi kan yepi den sortu sma disi fu kon abi wan tra denki? Fa wi kan sorgu taki Satan no e kisi wi nanga den triki fu en? Fu man piki den aksi dati, meki wi go luku tu sani di Satan moksi nanga afkodrei. Dati na sani di sma e du fu abi prisiri, èn sosrefi yepi di sma e suku te den siki.

15. (a) Fa furu sma na ini den gudu kondre e denki fu afkodrei? (b) Fa son Kresten bigin si afkodrei leki grontapusma?

¹⁵ Spesrutu na ini den gudu kondre, furu sma no e si towfruwroko nanga tra sani di abi fu du nanga afkodrei, leki wan ogri. Na ini felem, buku, telefisi programa, èn na ini computer game furu sani de di abi fu du nanga ogri yeye. Sma e prisiri nanga den sani disi, den e feni den moi èn den denki taki den no ogri. Son felem nanga  buku di abi fu du nanga ogri yeye, kon pôpi kefalek. A de krin fu si taki den ogri yeye kori sma fu bribi taki afkodrei a no wan ogri. A denki disi abi krakti tapu Kresten? Iya, son Kresten kon abi a denki disi. Na sortu fasi? Luku na eksempre disi: Baka di wan Kresten ben luku wan felem di ben abi fu du nanga ogri yeye, dan a taki: „Mi luku a felem, ma mi no du afkodrei.” Fu san ede a no bun srefisrefi fu denki so?

16. Fu san ede wan Kresten musu luku bun nanga felem noso buku di abi fu du nanga afkodrei?

¹⁶ A tru taki te sma e luku sani di abi fu du nanga afkodrei, dan dati no de a srefi leki te sma e du afkodrei. Ma dati no wani taki dati a no wan ogri te sma e luku den sortu sani dati. Fu san ede? Luku a tori disi: Gado Wortu e taki dati Satan nanga den ogri yeye fu en no man sabi san wi e denki. * Sobun, neleki fa wi ben taki kaba, efu ogri yeye wani kon sabi fa wi e denki èn sortu swakifasi wi abi, dan den e luku bun san wi e du. Den e luku tu sortu sani wi e du fu abi prisiri. Te wan Kresten e sori taki a lobi felem nanga buku pe sma e du towfruwroko, e kisi winti, noso pe sma e du tra sani di abi fu du nanga afkodrei, dan den ogri yeye e si dati. Fu taki en leti, a Kresten dati e sori den ogri yeye san na en swakifasi!  Dan den ogri yeye e tyari moro hebi tesi kon na en, teleki den meki a fadon. Dati meki son sma di ben bigin luku felem, noso leisi buku di abi fu du nanga afkodrei, kon lobi a sani disi èn te fu kaba den bigin du afkodrei.​—Leisi Galasiasma 6:7.

17. Fa Satan kan kori wan sma di e siki?

¹⁷ Boiti taki Satan e luku san wi e du fu abi prisiri, a e luku tu sortu yepi wi e suku te wi siki, so taki a kan kisi wi. Fa a e du dati? Te wan Kresten e kon moro siki, aladi a du ala muiti fu feni yepi, dan a kan lasi-ati (Markus 5:25, 26). A sani disi na wan moi okasi gi Satan nanga den ogri yeye fu tesi a Kresten dati. Den ogri yeye kan meki taki wan Kresten di lasi-ati fu di a e siki, go suku yepi di abi fu du nanga „afkodrei” (Yesaya 1:13). Efu den ogri yeye kori a sma fu du a sani disi, dan a sani dati kan pori a matifasi di a sma abi nanga Gado. Na sortu fasi?

18. Sortu yepi wan Kresten no o teki, èn fu san ede?

¹⁸ Yehovah ben gi den Israelsma di ben go du „afkodrei” a warskow disi: „Te unu e opo un anu fu begi mi, dan mi no o luku unu. Awinsi unu e begi mi furu tron, toku mi no o arki” (Yesaya 1:15). A no de fu taki dati wi wani luku bun nanga iniwan sani di kan meki taki Yehovah no e arki den begi fu wi, èn taki a no e yepi wi moro. Wi wani du dati spesrutu te wi e siki (Psalm 41:3). Dati meki te wan tru Kresten e suku yepi, èn a si  taki a yepi dati kan abi fu du nanga afkodrei, dan a musu wai pasi gi a sani dati (Mateyus 6:13). * Te a du dati, dan a kan de seiker taki Yehovah o yepi en.​—Luku a faki „ A sani disi na afkodrei trutru?”.

19. (a) Fa Didibri kori furu sma te a abi fu du nanga a makti fu en? (b) Sortu tori tru Kresten no musu arki noso fruteri?

¹⁹ Aladi furu sma na ini den gudu kondre no e si leki Satan abi makti fu du den ogri, toku na ini tra kondre Satan kori furu sma fu bribi taki a abi moro makti leki san a abi trutru. Na ini ala sani san son sma e du, den e sori taki den e frede taki ogri yeye kan du ogri nanga den. Sma e fruteri furu tori di e sori taki ogri yeye abi furu makti. Nofo tron den tori disi span, èn den switi fu arki. Wi musu fruteri trawan den sortu tori disi? Nôno. Tu sani de di meki taki futuboi fu a tru Gado no e du dati.

20. Fa wan sma ben kan prati tori di abi fu du nanga Satan, sondro fu a sabi?

 ²⁰ A fosi sani, na taki te wan sma e fruteri tori di abi fu du nanga ogri yeye, dan a sma dati e horibaka gi den sani di Satan e du. Fa so? Gado Wortu e sori taki Satan man du makti sani, ma Gado Wortu e warskow tu taki Satan e du „bigi sani” fu „bedrigi” sma (2 Tesalonikasma 2:9, 10). Fu di Satan na a moro bigi bedrigiman, meki a sabi fa a musu abi krakti tapu a denki fu sma di lobi afkodrei, èn fa fu meki den bribi sani di no tru. Kande den sma disi e bribi trutru taki den si èn yere sani, èn kande den e fruteri den tori disi leki den pasa trutru. Te fu kaba den tori disi e kon moro span fu di ibri tron sma e poti moro sani na ini a tori. Efu wan Kresten ben o fruteri trawan den sortu tori  dati, dan a ben o du a wani fu Didibri, „a tata fu ala lei”. A ben o yepi prati tori di abi fu du nanga Satan.​—Yohanes 8:44; 2 Timoteyus 2:16.

21. Fu sortu sani wi wani taki moro furu nanga trawan?

²¹ A di fu tu sani, na taki awansi wan tru Kresten ben de na ini wan situwâsi pe a ben si noso taki nanga ogri yeye na ini a ten di pasa, toku a no ben o bun fu tan fruteri tra sma den tori dati. Fu san ede? Bijbel e gi wi a rai taki wi musu „poti ala wi prakseri na Yesus, a Moro Prenspari Fesiman fu wi bribi èn a sma di meki a bribi fu wi kon bun dorodoro” (Hebrewsma 12:2). Iya, wi musu poti ala wi prakseri na Krestes, na presi fu poti prakseri na Satan. A moi fu sabi taki di Yesus ben de na grontapu, dan a no fruteri den disipel fu en wan lo span tori fu ogri yeye, aladi a ben kan fruteri den finifini san Satan man du èn san a no man du. Na presi fu dati, Yesus poti prakseri na a Kownukondre boskopu. Fu dati ede, neleki Yesus nanga den apostel, wi wani fruteri trawan moro furu fu „den bigi sani di Gado du”.​—Tori fu den apostel 2:11; Lukas 8:1; Romesma 1:11, 12.

22. Fa wi kan tan sorgu taki ’prisiri de na hemel’?

²² A tru taki Satan e gebroiki triki, soleki afkodrei fu pori a matifasi di wi abi nanga Yehovah. Ma te wi e tegu gi san ogri èn e tan du san bun, dan Didibri no o man kori wi fu du afkodrei. (Leisi Efeisesma 4:27.) Prakseri o furu „prisiri o de na hemel” te wi e tan „tanapu kánkan te Didibri e kon nanga den triki fu en”!​—Lukas 15:7; Efeisesma 6:11.