CHAANDANO 16
Amumukazye Diabolosi Ameeneno Aakwe
“Amumukazye Saatani, uyoomucija.”—JAKOBO 4:7.
1, 2. Mbaani babotelwa chiindi chakubbabbatizigwa?
IKUTI walikukomba Jehova kwaminyaka myiingi wakamvwa nkani zyakubbabbatizigwa zyiingi loko kumiswaangano yesu mipati. Nikuba kuti wabaa chiindi chilamfu kulokumvwa nkani eezi, zilakubotezya kubona bayanda kubbabbatizigwa kabanyampuka kuti batondeezye kuti bayanda kubbabbatizigwa. Muchiindi nchicheecho baswiilizyi ngabawuma maboko kabatondeezya kubotelwa kwabo kuzwaansi amoyo. Ngawasekelela kaka kubona bantu aaba kabatondeezya kuti bayanda kukomba Jehova. Eelyo kaka, ngatwabotelwa loko muchiindi eecho!
2 Nikuba kuti tubona bantu kababbabbatizigwa kwaziindi ziche mumunyaka, bangelo balaachoolwe chakubona kubbabbatizigwa kwabantu chiindi choonse munyika zisiyene-siyene. Yeeya kuti “kujulu kunooli kubotelwa” biyeni chiindi bangelo nibabona zyuulu zyabantu munyika yoonse mbiizulwa kabaza kumbungano yaJehova mviki amviki! (Luka 15:7, 10) Taakwe mubuzyo kuti bangelo balabotelwa kubona bantu kabaza kumbungano yaJehova!—Hagai 2:7.
DIABOLOSI “ULEENDEENDA MBULI SYUUMBWA WABUTAMBO”
3. Nkamboonzi Saatani nayendeenda “mbuli syuumbwa wabutambo” alimwi uyanda kuchitaanzi?
3 Mukusiyana azeezyo, kuli zilenge zyamuuya zitabotelwi chiindi bantu nobabbabbatizigwa. Saatani amadimoni tababotelwi pe chiindi bantu nobasiya nyika eeyi iizwide bubi. Kuyungizya waawo, Saatani wakaamba chakulidunda kuti taakwe muntu uukonzya kukomba Jehova akaambo kaluyando akuti taakwe muntu ukonzya kukkala kasyomekede chiindi naliikusunkwa. (Bala Jobu 2:4, 5.) Chiindi umwi muntu nalipeda kuli Jehova, ngawatondeezya kuti Saatani mubeji. Kunooli kwabaanga Saatani ubula mpanjila mviki amviki. Nchicho chipa kuti ‘ayeendeende mbuli syuumbwa wabutambo, kuti ayandaule ngwati lume’! (1 Petro 5:8) “Syuumbwa” naa mulavu ooyu uyanda kutumena buumbulu kubukombi alimwi uyanda kuti tumane buzolwani mbotulaabo aLeza.—Intembauzyo 7:1, 2; 2 Timoteo 3:12.
Chiindi umwi muntu nalipeda kuli Jehova, ngawatondeezya kuti Saatani mubeji
4, 5. (a) Nziizili nzila zibili eezyo Jehova nzyamukasya kuchita Saatani? (b) MuKristu wachoonzyo weelede kubaa choonzyo chanyamaanzi?
4 Nikuba kuti tulwanaa sinkondoma uyoosya pesi tatweelede kuyoowa pe. Nkamboonzi? Nkaambo kuli nzila zibili eezyo Jehova nzyamukasya kuchita ooyo “syuumbwa wabutambo.” Nziizili nzila eezyo? Yakusaanguna njakuti Jehova wakaambilizya kuti “inkamu mpati” yamaKristu aachoonzyo iyoofutuka kuchiindi ‘chamapenzi mapati.’ (Ciyubunuzyo 7:9, 14) Businsimi bwaJehova taakwe nobukachilwa kuzuzikizigwa pe. Nkinkaako, Saatani ulizi kuti takonzyi kweena bantu baLeza boonse.
5 Nzila yabili izwa mukasimpe kakaambwaa sikale wakasyomekede kuli Leza. Musinsimi Azariya wakabuzya Mwaami Asa kuti: “Jehova uli anywe na muli awe.” (2 Makani 15:2; bala 1 BaKorinto 10:13.) Zikozyano zyiingi zyakalembwa zitondeezya kuti Saatani wakakachilwa kweena babelesi baLeza bakakkala kabalaa buzolwani bulikabotu aLeza. (BaHebrayo 11:4-40) Mazubaano, muKristu ulaa buzolwani bulikabotu aLeza ulakonzya kukazya akuzunda Diabolosi. Nkinkaako, Jwi lyaLeza litusungwaazya kuti: “Amumukazye Saatani, uyoomucija.”—Jakobo 4:7.
“TULALWANA AMYUUYA YABUBI”
6. Ino Saatani umulwana biyeni muKristu umwi awumwi?
6 Saatani takoozunda pe kunkondo pesi kuti teetwachenjela ulakonzya kutweena. Saatani ulizi kuti ulakonzya kutuleba ikuti wanyongania buzolwani bwesu aJehova. Ino Saatani uzichita biyeni eezi? Kwiinda mukutulwana chalunya, kulwana muntu umwi awumwi akutulwana chabuchenjezu. Atulange-lange nzila eezi nzyabelesya Saatani.
7. Nkaambonzi Saatani nabalwana chalunya bantu baLeza?
7 Kutulwana chalunya. Mwaapostolo Johane wakalemba kuti: “Nyika yoonse iikede muzibi.” (1 Johane 5:19) Majwi aaya ngakuchenjezya maKristu woonse aachoonzyo. Mbukunga Saatani wazwidilila mukweena bantu boonse batakombi Leza, lino uliikulwanaa bantu baJehova. (Mika 4:1; Johane 15:19; Ciyubunuzyo 12:12, 17) Unyemede loko nkaambo ulizi kuti chiindi chakwe chacheya. Nkinkaako, wachiindizya kaka kutulwana. Mazubaano, Saatani uliikuzumanana kutulwana chalunya kuti amane buzolwani bwesu aJehova.
8. Mwaapostolo Paulo wakali kwambaanzi naakati ‘tulwana’ amyuuya mibi?
8 Kulwana muntu umwi awumwi. Mwaapostolo Paulo wakachenjezya maKristunyina kuti: “Tulalwana amyuuya yabubi iili mumyeenya yakujulu.” (BaEfeso 6:12) Nkamboonzi Paulo naakabelesya bbala lyakuti ‘kulwana’? Nkaambo litondeezya kulwana kwabantu-susu. Nkinkaako, kwiinda mukubelesya bbala eeli, Paulo wakatondeezya kuti umwi awumwi wesu ulilwanina nkondo amyuuya mibi. Nikuba kuti tukkala munyika kusyomwa mizimu naa kutasyomwi mizimu, tatweelede kuluba kuti chiindi nitwakalipeda kuli Jehova, twakatalika kulwana nkondo eeyo yakukozyanisya. Kuzwa nalipeda, muKristu umwi awumwi takonzyi kwiichija nkondo eeyi. Nchicho chakapa kuti Paulo asungwaazye maKristu aakuEfeso kuti ‘bayime nji’!—BaEfeso 6:11, 13, 14.
9. (a) Nkamboonzi Saatani amadimoni nibabelesya ‘meeneno’ aasiyene-siyene? (b) Nkamboonzi Saatani nayezya kunyongania mizeezo yesu, alimwi kujana twaakazya biyeni meeneno aakwe? (Langa kabbokesi “ Chenjelela Buchenjezu bwaSaatani”) (c) Njiili nzila yabuchenjezu ibelesgwaa Saatani njitutalange-lange lino?
9 Kutulwana chabuchenjezu. Paulo usungwaazya maKristu kuti ayime nji ‘kumeeneno’ aaSaatani. (BaEfeso 6:11) Paulo wakatondeezya kuti Saatani ubelesya nzila zyiingi kuti ayene bantu. Myuuya mibi ibelesya nzila zyiingi zyabuchenjezu kuti itweene. Nikuba kuti bamwi basyomi bakazwidililia mukulwana amwi masunko pesi bakazundwa nibakaswaanana amwi masunko. Aboobo, Diabolosi amadimoni balangisisya bube bwesu kuti bazibe mpotuleezya. Mpawo, babelesya kuleezya kwesu kuti banyonganie buzolwani mbotulabo aJehova. Tulalumba kuti tulaazi meeneno aaSaatani nkaambo alilembedwe muBbayibbele. (2 BaKorinto 2:11) Kumatalikilo aabbuku eeli, twakaambuula atalaa kakole kakuyandisya buvubi, kakuyanzanaa bantu babi akakuchita bwaamu. Kwalino atulange-lange imwi nzila njabelesya Saatani, yakusyoma mizimu.
KUSYOMA MIZIMU NKUPAPILA LEZA
10. (a) Kusyoma mizimu niinzi? (b) Jehova ukubona biyeni kusyoma mizimu, alimwi iwebo ukubona biyeni?
10 Muntu unooli uliikuyanzanaa myuuya mibi ikuti kasyoma mizimu naa madimoni. Kusonda, kuchapa, mabibo, naa kubuzya makani kubafu, nziimwi nzila zyakusyoma mizimu. Mbuli mbotuzi kale, Jehova ubona kusyoma mizimu mbuli “cisesemyo.” (Deuteronomo 18:10-12; Ciyubunuzyo 21:8) Mbukunga andiswe tweelede ‘kusesemwa kububi,’ nkinkaako tatweelede kuyanzanaa myuuya mibi. (BaRoma 12:9) Kusyoma mizimu nkumupapila kupati Ndeende wesu wakujulu Jehova!
11. Nkamboonzi Saatani nchakonzya kubotelwa kuti wazwidilila kutweena kuti tusyome mizimu? Kozyanisya.
11 Akaambo kakuti kusyoma mizimu nkupapila Jehova, Saatani uyanda kuti bamwi besu bajatikizigwe mulinkuko. Chiindi Saatani nazwidilila kweena muKristu kuti asyome mizimu unooli wazunda. Nkamboonzi? Yeeya chikozyano chitobela: Ikuti umwi silumamba wazumina kweenwa kuti awuzye mpi yakwe alimwi aliswaanizye abasinkondonyina, mweendelezi wampi yabasinkondonyina ulabotelwa. Ulakonzya kwiimya sikupapa ooyu kunembo lyankamu yabantu kuti asampawule mweendelezi wabasilumamba mbaakali kulwanina. Mbumbubo, ikuti muKristu wasyoma mizimu, unooli ulikusampawula Jehova achaali alimwi unooli wazumina bweendelezi bwaSaatani. Yeeya mbwakonzya kubotelwa Saatani ikuti wazunda mukombi waLeza. Mpali na uyanda kubotezya Diabolosi munzila iili boobu? Tawope! Nkaambo tatuli bawuzyi pe.
KUBELESYA MIBUZYO KUTI TUTABAA CHOONZYO
12. Njiili nzila ibelesegwaa Saatani kuti achinche maboneno eesu atalaa kusyoma mizimu?
12 Ikuti katukaka kusyoma mizimu, Saatani takoyoozwidilila pe kutweena kabelesya kakole aaka. Nkinkaako, ulizi kuti weelede kuchincha miyeeyo yesu. Kujana wiichincha biyeni? Kwiinda mukuyanduula nzila zyakunyongania mizeezo yamaKristu kuti babonaanga “bubotu mbubi, bubi mbubotu.” (Isaya 5:20) Ikuti achite oobo, Saatani ubelesya nzila njaakali kubelesya kuzwa chiindi yakubuzya mibuzyo kuti tutabaa choonzyo.
13. Ino Saatani wakiibelesya biyeni nzila yakubuzya mibuzyo kuti muntu atabaa choonzyo?
13 Bona kuti Saatani wakiibelesya biyeni nzila eeyi chiindi. Mumuunda waEdeni, Saatani wakabuzya Eva kuti: “Sa ncobeni Leza wakaamba kuti, Tamweelede kulya misamu yoonse yamumuunda?” Muchiindi chaJobu, chiindi bangelo nibakalaa muswaangano kujulu, Saatani wakabuzya kuti: “Taakwe kaambo sena Jobu nkalemekela Leza?” Alimwi kumatalikilo aamulimu waJesu aanyika, Saatani wakasunka Jesu kwiinda mukumubuzya kuti: “Kuti koli mwana a-Leza, ambila mabwe aya, abe insima.” Yeeya chiindi Saatani naakali kusunka Jesu, wakali kusampula majwi aJehova ngakaambide mumviki zili musanu awumwi zyakali zyayinda aakuti: “Ngooyu mwanaangu uuyandika ngunkondelwa”!—Matalikilo 3:1; Jobu 1:9; Matayo 3:17; 4:3.
14. (a) Saatani wiibelesya biyeni nzila yakuti muntu atabaa choonzyo atalaa kusyoma mizimu? (b) Niinzi nzituyoolanga-langa lino?
14 Mazubaano, Diabolosi ubelesya nzila zili boobu kuti bantu batabaa choonzyo atalaa bubi bwakusyoma mizimu. Chilawusisya kuti wakazwidilila mukweena bamwi kuti batabaa choonzyo. Bantu aabo bakatalika kuzumbuuzya kuti imwi michito yakusyoma mizimu teemibi pe. (2 BaKorinto 11:3) Kujana twabagwasya biyeni bantu bali boobo kuti bachinche miyeeyo yabo? Kujana twatondeezya biyeni kuti Saatani takoyoozwidilila kutweena kabelesya tukole twakwe ootu? Kuti tusandule mibuzyo eeyi, atulange-lange twaambo tubili ntwabelesya Saatani kuti tusyome mizimu. Nzila eezi, nkulikondelezya abusilisi.
KUBELESYA NZITULOMBOZYA ANZITUYANDA
15. (a) Bantu biingi bakkala kunyika zyamakuwa bakubona biyeni kusyoma mizimu? (b) Amwi maKristu akeenwa biyeni amaboneno aanyika aakusyoma mizimu?
15 Buchapi, bulozi, azimwi nzila zyakusyoma mizimu zilatambulika kapati kunyika zyamakuwa. Mamuuvi (movies), mabbuku, mapulogilamu aaTV, mageemu aamukkompiyuta zitondeezya michito yakusyoma mizimu mbuli chintu chisesya, chili kabotu achitanyonganyi. Amwi mamuuvi amabbuku aatondeezya buchapi akazibinkana loko zyakuti bantu bazisyoma bapanga tubunga twakulikondelezya aanzizyo. Masimpe, madimoni akazwidilila mukuubansya bubi bwabuchapi. Kakole kakuubansya bubi bwabuchapi kalikubeena na maKristu? Miyeeyo yabamwi yakanyonganisigwa. Yakanyonganisigwa biyeni? Muchikozyano, umwi muKristu wakali kweebela chisobano chakalaatalaa buchapi wakati, “Ndakeebela chisobano pesi teendakajatikizigwa pe mukusyoma mizimu.” Nkamboonzi kuyeeya kuli boobu nikutali kabotu?
16. Nkamboonzi kusala kulikondelezyaa zintu zilaa talaa buchapi nikweetelezya?
16 Nikuba kuti kusyoma mizimu kulisiyene akweebela zisobano zitondeezya michito yakusyoma mizimu, eezi tazyaambi kuti kweebela michito yabuchapi kuli kabotu. Nkamboonzi? Yeeya eechi: Jwi lyaLeza litondeezya kuti Saatani amadimoni tabakonzyi kuziba nzituyeeya. * Mbuli mbutwabona kumatalikilo, myuuya mibi ilangisisya nzituchita, kuswaanizya zyakulikondelezya nzitusala kuti izibe nzituyeeya akuleezya kwesu muzintu zyabukombi. Ikuti muKristu watondeezya kuti ulabotelelwaa zisobano, naa mabbuku alaatalaa kusyoma mizimu, zyamasalamusi, michito yamadimoni, naa zimwi zili boobu, unooli ulikwaambuulaa madimoni. Chilaantanganana kuti unooli ulikwaatondeezya kuleezya kwakwe! Madimoni alazyaanga zisime kukulwanaa muKristu ooyo kweendelanaa kuleezya kwakwe kuti amuumputilaansi mane amuzunde. Masimpe, bamwi bantu bakali kulikondelezyaa zisobano zilaa talaa mizimu naa buchapi bakazoochegwaa kakole kakusyoma mizimu.—Bala BaGalatiya 6:7.
Jana lugwasyo luzwa kuli Jehova chiindi nulikuchiswa
17. Njiili nzila Saatani njabelesya kuti ayene bachiswa?
17 Chiindi Saatani natusunka, tabelesyi nzitusala muli zyakulikondelezya luzutu pesi ubelesya anzila zyabusilisi nzitusala. Uzichita biyeni eezyo? MuKristu ulakonzya kumana manguzu ikuti bulwazi bwakwe kabutasilikiki nikuba kuti wayanduula nzila zisiyene-siyene zyabusilisi. (Marko 5:25, 26) Eezi zilakonzya kupa Saatani amadimoni mweenya wakuti bayene muKristu ooyo. Madimoni alakonzya kusunka muntu ooyo uuchiswa kuti ayanduule busilisi buswaanizya “masalamusi” naa kusyoma mizimu. (Isaya 1:13) Ikuti nzila eeyi yamadimoni yazwidilila, ilakonzya kumana buzolwani bwamuntu ooyo aLeza. Ilakonzya kubumana biyeni?
18. Nziizili nzila zyabusilisi zyeelede kukakwaa muKristu, alimwi nkamboonzi?
18 Jehova wakachenjezya maIsrayeli akali atalika kubelesya “masalamusi” kuti: “Na mwatandabika maanza aanu, njoofwiinya meso aangu cakutamubona. Nekuba kuti mwakomba zikombyo zinji, nsikooyooswiilila.” (Isaya 1:15) Masimpe, chiindi choonse tuyanda kutantamuka kufumbwa chintu chikonzya kupa kuti Jehova ataswiilili nkombyo zyesu achikonzya kupa kuti Jehova atatugwasyi, kapati notuchisidwe. (Intembauzyo 41:3) Nkinkaako, ikuti zimwi nzila zyabusilisi kaziswaanizya michito yakusyoma mizimu, muKristu wachoonzyo weelede kuzikaka. * (Matayo 6:13) Ikuti wachita oobo, ulakonzya kubaa choonzyo chakuti Jehova unokugwasya.—Langa kabbokesi kati, “ Ooku Nkusyoma Mizimu Na?”
OOKO KULI TWAAMBO TWIINGI ATALAA MADIMONI
19. (a) Diabolosi ulikweena bantu kuti basyomeenzi kujatikizya manguzu aakwe? (b) Ntuutuli twaambo tuteelede kwaambuulwaa maKristu aachoonzyo?
19 Nikuba kuti bantu biingi bakkala munyika zyamakuwa balaawubaansya mapenzi ayetwaa manguzu aaSaatani, pesi kulizimwi nyika baayoowa loko. Munyika nzizeezyo, Saatani ulikweena bantu biingi kwiinda mukupa kuti basyome kuti ulaamanguzu miingi kwiinda ngalaawo. Bamwi bantu bayoowa myuuya mibi muzintu zyoonse nzibachita. Twaambo tulaatalaa manguzu aamadimoni twazula nyika yoonse. Twaambo tuli boobu, twasaalizigwaa bantu babotelelwaa ntuto, alimwi eezi zyapa kuti bantu biingi bayande kujatikizigwa mulintuto. Tweelede kutwaambuula na twaambo tuli boobo? Peepe, babelesi baLeza wakasimpe tabachiti oobo akaambo katwaambo tubili tupati.
20. Kujana umwi muntu watusaalisya biyeni twaambo twaSaatani twakubeja?
20 Chakusaanguna, ikuti muntu kalikwaambuula twaambo tulaatala michito yamadimoni, unooli ulikusumpula michito yaSaatani. Kujana wiisumpula biyeni michito yaSaatani? Jwi lyaLeza lyaamba kuti Saatani ulakonzya kuchita zigambyo pesi lituchenjezya kuti ubelesya “ziyoosyo zyakubeja alweeno.” (2 BaTesalonika 2:9, 10) Mbukunga Saatani ngusilweeno mupati, ulizi mbwakonzya kweena myoyo yabaabo basyoma mizimu, ambwakonzya kubapa kuti basyome zintu zitali zyachoonzyo. Bantu bali boobo balakonzya kusyoma nzibabona anzibamvwa alimwi balakonzya kubuzya bamwi kabati nzyamasimpe. Mukuya kwachiindi, twaambo twabo tulakonzya kumanisizya twalungwa munyo akaambo kakuti bakkala kabatwaambuula. Ikuti muKristu wajatikizigwa mukusaalisya twaambo ootu, unooli ulikujatikizigwa mukuchita kuyanda kwaDiabolosi, “Wisi wababeja.” Unooli uliikumwaya twaambo twaSaatani twakubeja.—Johane 8:44; 2 Timoteo 2:16.
21. Tuyanda kubikkila maanu mukwaambuula atalaanzi?
21 Chabili, nikuba kuti muKristu wakali kusyoma mizimu chiindi, teelede kwaambuula twaambo ootu kubakombinyina. Nkamboonzi? Nkaambo tusungwaazigwa kuti: “Katuduneme kuli-Jesu musolozi uulomya lusyomo lwesu.” (BaHebrayo 12:2) Masimpe, tweelede kulangilila kuli Kristu kutali kuli Saatani. Chilaantanganana kuti chiindi Jesu nakali aanyika, takaambila basikwiiya bakwe twaambo twamyuuya mibi nikuba kuti wakali kukonzya kwaambuula zyiingi atalaa zintu nzyakonzya kuchita Saatani anzyatakonzyi. Kunze lyaboobo, Jesu wakali kubikkila maanu kukukambawuka atalaa mulumbe waBwaami. Kuyungizya waawo, tuyanda kutobelezya Jesu abaapostolo bakwe kwiinda mukwaambuula atalaa “milimo mipati yaLeza.”—Incito 2:11; Luka 8:1; BaRoma 1:11, 12.
22. Kujana twazumanana biyeni kuchita kuti ‘kujulu kube kubotelwa’?
22 Chachoonzyo, Saatani ubelesya meeneno miingi kuswaanizya kusyoma mizimu kuti akonzye kumana buzolwani mbotulaabo aJehova. Nikuba boobo, kwiinda mukusula zintu zibi akukakatila kuzintu zibotu, ngatatuli kupa Saatani mweenya wakutweena kukusyoma mizimu. (Bala BaEfeso 4:27.) Yeeya kuti “kujulu kunooli kubotelwa” biyeni ikuti twazumanana “kwiima mumeneeno aa-Diabolosi” mane akakunyonyoonwe!—Luka 15:7; BaEfeso 6:11.
^ par 16 Mazina apandulula bube bwaSaatani aakuti Sikukazya, Sikubejelezya, Silweeno, Sikusunka aSikubeja, taambi kuti ulakonzya kuziba zili mumyoyo yesu anzituyeeya. Kusiyanaa Saatani, Jehova, “ulasunka [ulalingula] myoyo yesu” alimwi Jesu nguwe “uulingula mucamba amumoyo.”—Tusimpi 17:3; Ciyubunuzyo 2:23.
^ par 18 Ikuti ujane amwi makani langa chibalo chitii, “A Health Test for You?” muNgaziyakulinda yachikuwa yamu December 15, 1994, aapeji 19-22, achibalo chitii, “The Bible’s Viewpoint: Your Choice of Medical Treatment—Does It Matter?” muSinsimuka! yachikuwa yamu January 8, 2001.
