1, 2. Velie va sanjuka enene vapuluvi epapatiso?

NDA o kasi oku vumba Yehova vokuenda kuanyamo alua, wa yeva ale olohundo vialua viepapatiso kolohongele vimbo kuenda viofeka. Ocili okuti olonjanja viosi eci ove enda kolohongele viaco, wa siata oku yeva esanju poku mola omanu va tumãla kovaso eci va votoka oku ka papatisiwa. Vepuluvi liaco, owiñi wosi u sanjuka kuenda u vetiyiwa oku eca olopandu. Citava okuti wa siata oku lila omo liesanju, poku tala ava va litumbika ku Yehova. Vepuluvi liaco tu yeva esanju lialua!

² Etu tua siata ño oku mola etendelo litito liomanu va papatisiwa vokuenda kunyamo, pole, ovangelo va siata oku mola omanu valua okuti etu ci sule. O tẽla hẽ oku sokolola ndomo ovangelo “kilu va yolela,” eci va mola olohuluwa viomanu va iñila vocisoko ca Yehova osemana losemana? (Luka 15:7, 10) Ovangelo va sanjuka calua eci va mola evokiyo liaco!​—Hagai 2:7.

3. Momo lie Satana a “ñuala ñuala ndohosi,” kuenda nye a yongola oku tu linga?

³ Kuli ovangelo vamue okuti ka va sanjuka eci omanu va papatisiwa. Eci omanu va siapo ovituwa vĩvi violuali  lulo, Satana kuenda olondele viaye ka va sanjuka. Handi vali, Satana wa siata oku popia hati, lomue o vumba Yehova locisola, kuenda eci umue a setekiwa ka tẽla oku amamako lekolelo. (Tanga Yovi 2:4, 5.) Olonjanja viosi eci omunu umue a li tumbika ku Yehova, ci lekisa okuti Satana ohembi. Kuenje ci kala ndu okuti va kasi oku veta olomandu kocipala caye olosemana viosi. Satana “o ñuala ñuala ndohosi yi koma oku sandiliya u a lia”! (1 Petulu 5:8) “Ohosi” yaco, yi yongola oku tu nyõla konepa yespiritu kuenda oku tateka ukamba wetu la Suku.​—Osamo 7:1, 2; 2 Timoteo 3:12.

4, 5. (a) Olonjila vipi vivali Yehova a siata oku kuama poku tu teyuila kolonjanjo via Satana? (b) Akristão vocili va pondola oku kuata ekolelo lie?

 ⁴ Ndaño unyãli waco wa tema calua, ka tu sukila oku u kuatela usumba. Momo lie? Momo Yehova wa siata oku tu teyuila ‘kohosi yi koma’ kolonepa vivali. Wa siata oku ci linga ndati? Catete, Yehova wa popele ale okuti “owiñi wakahandangala” Wakristão u ka puluka “kohali ya piãla” yi laika oku iya. (Esituluilo 7:9, 14) Ovitumasuku viosi via siata oku tẽlisiwa. Omo liaco, Satana wa kũlĩha okuti ka ka tẽla oku yapuisa afendeli vosi va Suku.

⁵ Cavali, olondaka via vanguiwa lulume umue ukuekolelo kosimbu, vi lekisavo ndomo Suku a tu teyuila. Uprofeto Asariya wa sapuila Soma Asa hati: “Yehova o kala lene osimbu ene vu kalavo laye.” (2 Asapulo 15:2; tanga 1 Va Korindo 10:13.) Ovolandu alua o kosimbu a lekisa okuti Satana ka tẽla oku yapuisa omanu va amamako oku pamisa ukamba wavo la Suku. (Va Heveru 11:4-40) Koloneke vilo, Akristão vana va pamisa ukamba wavo la Suku va tẽla oku tamalala Leliapu. Ondaka ya Suku yi tu vetiya ndoco: “Tamalali leliapu kuenje liu tili.”​—Tiago 4:7.

6. Satana wa siata oku yaka ndati Lakristão?

⁶ Satana ka ka yula uyaki a kuete letu, pole o pondola oku tu yapuisa nda ka tua lavuluile. Eye wa kũlĩha okuti nda ka tua pamasile ukamba wetu la Yehova, o pondola oku tu yula. O ci linga hẽ ndati? Eye o tu lambalala kuenda o tu yapuisa latutu aye. Tu konomuisi atutu amue a Satana.

7. Momo lie Satana a siatela oku nyika afendeli va Yehova?

 ⁷ Alambalalo a piãla. Upostolo Yoano wa lekisa okuti: “[Oluali] luosi lu kasi povaka eliapu.” (1 Yoano 5:19) Volondaka evi mu sangiwa elungulo limue li kuete esilivilo Kakristão vocili. Omo okuti oluali luosi lu kasi povaka a Satana, eye wa nõlapo oku lambalala omanu vana va kuete ukamba la Yehova. (Mika 4:1; Yoano 15:19; Esituluilo 12:12, 17) Eye o kasi lonyeño yalua omo wa kũlĩha okuti kuo kambela otembo yitito, kuenje wa siata oku piãlisa alambalalo aco. Koloneke vilo tua siata oku liyaka lungangala wa piãla.

8. Olondaka viupostolo Paulu viokuti tu kasi loku “yaka” laspiritu ãvi vi lomboloka nye?

⁸ Uyaki womunu lomunu. Upostolo Paulu wa lungula Akristão hati: “Tu kasi loku yaka ... lolombiali violuali viowelema ulo.” (Va Efeso 6:12) Momo lie Paulu a tukuila ondaka oku “yaka”? Eye wa sokisa uyaki waco ndomanu vavali va kasi oku litĩla. Paulu wa lekisa okuti omunu lomunu o kasi oku liyaka laspiritu ãvi. Ci kale okuti tu kasi vofeka yimue omanu va tava kumbanda ale sio, tu ivaluki okuti eci tu litumbika ku Yehova, tu fetika oku yaka laspiritu ãvi. Ukristão iñila vuyaki waco tunde keteke lielitumbiko liaye. Eli olio esunga lieci Paulu a sapuilila olonjanja vitatu Akristão vo ko Efeso hati “talami ño ngo!”​—Va Efeso 6:11, 13, 14.

9. (a) Momo lie Satana lolondele viaye va kuetele ‘atutu’ alua? (b) Momo lie Satana a siatela oku nyõla olondunge vietu, kuenda tu pondola oku tamãlala ndati latutu aye? (Tala vokakasia  kemẽla 192-193.) (c) Atutu api tu ka konomuisa cilo?

⁹ Atutu. Paulu wa vetiya Akristão oku tamalala “latutu” a Satana. (Va Efeso 6:11) Limbuka okuti Paulu poku tukula ondaka yaco ka yi tiamisilile lika komunu umuamue. Aspiritu ãvi a kuete olonjila vialua vioku  yapuisa omanu. Eli olio esunga lieci vamanji vamue va pandikisile koloseteko kosimbu, veya oku kupukila voloseteko vikuavo. Eliapu kumue lolondele viaye, va siata oku lavulula ahonguo etu. Kuenje va kakatela kehonguo liaco tu kuete konepa yespiritu. Tu eca olopandu ku Suku momo tu tẽla oku limbuka atutu Eliapu ndomo a situluiwa Vembimbiliya. (2 Va Korindo 2:11) Vovipama via pita tua konomuisa ale okuti Satana wa siata oku yapuisa omanu locipululu colombongo, akamba vãvi, kuenda evĩho liukahonga. Kaliye tu konomuisi onũlo yikuavo Satana a siata oku yapuisa layo omanu​—okuti umbanda.

10. (a) Umbanda u lomboloka nye? (b) Yehova o tenda ndati umbanda, kuenda ove o u tendavo ndati?

¹⁰ Eci omunu a tambula umbanda, o linga ukamba laspiritu ãvi. Oku tãha, oku lova, oku linga alumbu, loku vangula lolondele, ovituwa vimue viatiamẽla kumbanda. Ndomo tua ci kũlĩha ciwa, Yehova o tenda umbanda ‘ndumbondo.’ (Esinumuĩlo 18:10-12; Esituluilo 21:8) Tu sukila oku yuvula oku kuata ukamba laspiritu ãvi momo tua vetiyiwa oku ‘nyehula eci cĩvi.’ (Va Roma 12:9) Oku tambula umbanda, ci lomboloka oku lingila usuanji Yehova, Isietu wokilu!

11. Momo lie Satana a sanjukila nda wa tu yonjela koku linga umbanda? Tukula ocindekaise cimue.

¹¹ Omo okuti umbanda u lomboloka oku lingila Yehova usuanji, Satana o yongola okuti tu kupukila vonjanjo yaco. Eci Satana a yonja Ukristão umue oku kupukila vumbanda, eye o yolela. Momo lie? Sokolola ocindekaise eci: Nda esualali limue li siapo olohoka a tiamẽla kuenje li lieca kovanyali vaye, kesongo kolohoka  viovanyali vaco, o sanjuka calua. Kuenje, o kapa esualali liaco kovaso yolohoka viaye oco li lingile usuanji kesongo kolohoka vina a tunda. Cimuamue haico catiamẽla kumbanda. Nda Ukristão o siapo oku vumba Yehova kuenje o litenga vumbanda, eye o kasi oku lieca povaka a Satana. Sokolola esanju Satana a yeva eci manji umue a siapo ocisoko ca Yehova! Anga hẽ tu yongola oku sanjuisa Eliapu? Sio! Etu katulomakuliko.

12. Onjila yipi Satana a siata oku kuama oco tu kuate onepa kumbanda?

¹² Nda tua yuvula umbanda, Satana ka ka tu yula. Eye wa kũlĩha okuti o pondola oku pongolola ovisimĩlo vietu. O ci linga hẽ ndati? Eye o seteka oku kapa Akristão vatatahãi oco va sime okuti ‘eci cĩvi oco ciwa, kuenda eci ciwa, cĩvi.’ (Isaya 5:20) Oco Satana a tẽlise ocimãho caye, o pitulula onũlo yaye ya tete​—okuti oku linga apulilo a kapa omanu vatatahãi.

13. Satana wa siata oku kuama ndati ocituwa coku kapa omanu vatatahãi?

¹³ Kũlĩhĩsa ndomo Satana a kuama onjila yaco kosimbu. Vocumbo Cedene eye wa pulisa Heva hati: “Ocili Suku wa popia hati, Ko ka li koviti viosi viovocumbo, ale?” Koloneke via Yovi, eci ovangelo va liongoluile kilu, Satana wa pula hati: “Yovi hẽ, wa ku sumbila ño ocali, ove u Suku?” Eci Yesu a fetika upange woku kunda palo posi, Satana wa popia la Kristu hati: “Nda vumõla a Suku popia lovawe a huti, lingi olombolo.” Ivaluka okuti Satana wa seteka Yesu noke liolosemana epandu, eci Yehova a popia hati: “U, eye Omõlange wa  soliwa, ndo sanjukila!”​—Efetikilo 3:1; Yovi 1:9; Mateo 3:17; 4:3.

14. (a) Satana wa siata oku vetiya ndati omanu oku kuata atatahãi atiamẽla kumbanda? (b)Nye tu ka konomuisa cilo?

¹⁴ Koloneke vilo, Eliapu lia siata oku kuama atutu aco oco li kape vutima wetu atatahãi atiamẽla kumbanda. Tu sumua calua poku mola ndomo vamanji vamue va siata oku kupukila vonjanjo yaco. Ovo va fetika oku pula nda ovina vimue viatiamẽla kumbanda via sunguluka ale sio. (2 Va Korindo 11:3) Tu kuatisa ndati omanu va kuete ovisimĩlo viaco? Tu limbuka ndati nda tu kasi oku yapuisiwa latutu a Satana? Oco tu sange etambululo liaco, tete tu konomuisi olonepa vivali Satana a siata oku yapuisa lavio omanu oco va kupukile vumbanda. Olonepa viaco, olomapalo kuenda oku sanda uhayele.

15. (a) Omanu vamue kolofeka vio Kutakelo va tenda ndati umbanda? (b) Akristão vamue va siata oku vetiyiwa ndati lomanu vakualuali catiamẽla kumbanda?

¹⁵ Kolofeka vio Kutakelo, oku tahã, oku lova, kuenda ovina vikuavo viatiamẽla kumbanda, vi tendiwa ndelinga lia sunguluka. Olofilme, alivulu, ovipama Viotelevisãu, kuenda olomapalo vio kombutador, vi lekisa ovilinga viumbanda ndolomapalo viwa. Olofilme kuenda alivulu a lekisa ovina viumbanda via siata oku taviwa calua lomanu okuti va linga ovimunga vi sandeka ovina viaco. Ocili okuti, olondele via siata oku lekisa umbanda ndocina cimue ka ci koki ohele. Anga hẽ Akristão vamue va siatavo oku yapuisiwa lovisimĩlo viaco? Vamue va siata oku yapuisiwa. Va siata hẽ oku  yapuisa ndati? Vamue, noke yoku tala ofilme yimue mua kongela ovina viumbanda, va sapuila vakuavo hati, “Ame nda tala ofilme yimue ya lekisa ovina viumbanda pole, sia kupukilile vumbanda.” Momo lie Ovisimĩlo viaco vi kokela ohele?

16. Ohele yipi yi iyilila koku tala ovina viatiamẽla kumbanda?

¹⁶ Ndaño oku tala ovina viatiamẽla kumbanda ka ca lisokele loku tambula umbanda, eci ka ci lomboloka okuti oku tala ovina viaco ka vi kapi omunu kohele. Momo lie? Ondaka ya Suku yi lekisa okuti Satana lolondele viaye ka va kuete uloño woku kũlĩhĩsa ovisimĩlo vietu. * Pole, ndomo tua ci popia ale, olondele vi limbuka oku hongua kuetu poku konomuisa ovilinga vietu, kuenda olomapalo tu sole. Kuenje nda Ukristão o sole oku tala olofilme lalivulu ana a lekisa ovina viatiamẽla kumbanda, o kasi oku laleka olondele, momo o lekisa kokuavio ehonguo liaye! Kuenje, olondele vi kakatela kehonguo liaco toke eci Ukristão a kupukila vumbanda. Vamue va kupukila vumbanda omo lioku tala ovina viatiamẽla kolondele.​—Tanga Va Galatia 6:7.

17. Satana wa siata oku yapuisa omanu va hongua la nye?

¹⁷ Satana ka tu yapuisa lika lolomapalo tua siata oku tala, o tu yapuisavo poku sanda uhayele. O ci linga hẽ ndati? Ukristão o sumua calua eci ka tẽla oku sakula uvei waye. (Marko 5:25, 26) Kuenje, Satana kumue lolondele viaye, va seteka oku u yonja. Olondele vi vetiya oku sakuiwa lovihemba vina mua kongela “oku tahã” ale umbanda. (Isaya 1:13) Nda olondele  vi yapuisa omunu waco, vi ka nyola ukamba waye la Suku. Vi ci linga hẽ ndati?

18. Ovina vipi Ukristão a sukila oku yuvula, kuenda momo lie?

¹⁸ Yehova wa lungula va Isareli vana va enda oku linga ‘alumbu esanda’ hati: “Eci vu tulika ovoko ene ndu sitikili ovaso ange, leci vu likutilila olohutililo via lua siu yevi.” (Isaya 1:15) Tu sukila oku yuvula ovina vi tu tateka oku tambula ekuatiso lia Yehova volohutililo vietu​—capiãla enene kepuluvi tu kasi oku vela. (Osamo 41:3) Ukristão wocili o sukila oku yuvula oku sakuiwa lovihemba mua kongela umbanda ale oku tahã. * (Mateo 6:13) Nda wa ci linga, eye oka kuata ekuatiso lia Yehova.​—Tala vokakasia “ Anga hẽ Velinga Eli Mua Kongela Umbanda?” kemẽla 194.

19. (a) Eliapu lia siata oku kemba ndati omanu catiamẽla kunene waye? (b) Asapulo api Akristão vocili va sukila oku yuvula?

¹⁹ Ndaño omanu valua vo Kutakelo va sima okuti Satana ka koki ohele, kolofeka vikuavo hacoko va sima.  Kolofeka vimue, omanu va siata oku kembiwa okuti Eliapu li kuete unene walua. Omanu vamue va lia, va talavaya kuenda va pekela lusumba wolondele. Asapulo atiamẽla kunene wolondele a siata calua. Omanu valua va sole asapulo aco. Ca sunguluka hẽ oku sandeka asapulo aco? Sio, afendeli vocili va Suku va yuvula oku ci linga omo liovina vivali tu ka konomuisa.

20. Omunu o pondola ndati oku sandeka asapulo a Satana?

²⁰ Catete, oku sandeka asapulo atiamẽla kolondele, ci lomboloka oku tiamẽla konele ya Satana. Momo lie? Momo Ondaka ya Suku yi lekisa okuti Satana o kuete unene woku linga ‘ovikomo viesanda’ kuenda ‘elimbi.’ (2 Va Tesalonike 2:9, 10) Omo okuti Satana wa velapo koku kemba, o pondola oku vetiya omanu oku  tava kumbanda kuenda kovina viuhembi. Omanu vamue, va popia okuti ovina va yeva kuenda va mola, viocili. Kuenda va luluviya ovolandu aco. Ukristão o sandeka ovolandu aco, o linga ocipango Celiapu​—“isia yuhembi.” Eye o sandula uhembi wa Satana.​—Yoano 8:44; 2 Timoteo 2:16.

21. Kovina vipi tu sukila oku tiamisila olombangulo vietu?

²¹ Cavali, nda kosimbu Ukristão umue wa liyakele lolondele, o sukila oku yuvula oku sapuilako vamanji ulandu waco. Momo lie? Vosi yetu tua lunguiwa hati: “Tu tulukili ku Yesu, u wa linga Usovoli wekolelo lietu, haeye wa mala oku li suisapo.” (Va Heveru 12:2) Omo liaco, tu sukila oku tiamisila olombangulo vietu ku Kristu, ku Satana hakoko. Eci Yesu a kala palo posi, ka vangowaile calua lolondonge viaye asapulo atiamẽla kolondele ndaño wa lekisa atutu a Satana. Pole, Yesu wa tiamisila olombangulo viaye kesapulo Liusoma. Oco tu kuame ongangu ya Yesu kumue lovapostolo vaye, tu sukila oku tiamisila ovina tu popia kovilinga “vinene via Suku.”​—Ovilinga 2:11; Luka 8:1; Va Roma 1:11,12.

22. Nye tu pondola oku linga oco ‘kilu ku kale esanju’ lialua?

²² Ocili okuti Satana o sandiliya olonjila vialua vioku tu yapuisa oku kongelamo umbanda, oco a nyõle ukamba wetu la Yehova. Nda tua yuvula eci cĩvi poku kakatela kueci ciwa, ka tu ka ecelela Satana oku tu honguisa kuenda tu ka amamako oku yuvula ovina viosi viatiamẽla kumbanda. (Tanga Va Efeso 4:27.) Sokolola ndomo “kilu va yolela” eci tu amamako oku “tamalala latutu Eliapu” toke eci a ka kunduiwa!​—Luka 15:7; Va Efeso 6:11.