1, 2. Ana ŵani ŵakusasangalala pakwawona ŵandu ali mkubatiswa?

NAGA aŵele mkutumicila Yehofa kwa yaka yejinji, komboleka kuti apikanile ngani sya ubatiso syejinji pa misongano jetu jekulungwakulungwa. Nambope, atamose kuti aŵele mkusimanikwa pamisonganoji, yikusalimbikasa mnope pandaŵi jilijose jakwawona ŵandu ŵakusaka kubatiswa ali kusogolo kwa ŵandu wosope ali mkulipeleka. Ŵandu ŵakubatiswawo pacuwice m’mesi, ŵandu wosope akusasangalala mnope, soni kukwatila m’miyala. Pakuliwona likuga lya ŵandu ŵane ali mkusagula kumtumicila Yehofa, mpaka akombolece kukoposya misosi ligongo lyakusangalala. Kusala yisyene, tukusasangalala kwabasi!

² M’weji tukusawona ŵandu ali mkubatiswa kumalo gatukusatendela msongano kwa ndaŵi japanandi pa caka, nambo malayika gakwete upile wakwawona ŵandu ŵajinji ali mkubatiswa. Agambe ganisya mwakukusaŵela ‘kusangalala kwinani’ ŵandu ŵajinji pacilambo cosope ali mkwinjila mu likuga lya Yehofa cijuma cilicose! (Luka 15:7, 10) Mwangakayicila, malayika gakusasangalala mnope pakuliwona likuga lya Yehofa lili mkukula!​—Hagai 2:7.

3. Ligongo cici Satana akwendajenda aku nakuku ‘mpela lisimba lyakutongola,’ soni ana jwalakwe ali jwakusacilila kutenda cici?

³ Mwakulekangana ni yeleyi, pana yakupanganyikwa yine yausimu yayikusatumbila pakwawona ŵandu ŵane ali mkubatiswa. Satana ni misimu jakusakala yikusiyasakalisya kwawona ŵandu ŵajinji ali mkucikana cilambo cakusakalaci. Satana  ŵaŵecetesoni mwakulikwesya kuti pangali mundu jwampaka atumicileje Yehofa ligongo lyakumnonyela yisyesyene, soni kuti pangali mundu jwampaka aŵe jwakulupicika kwa jwalakwejo naga akusimana ni yipwetesi. (Aŵalanje Yobu 2:4, 5.) Pandaŵi jilijose jalipelece mundu kwa Yehofa, Satana akusawonecela kuŵa jwaunami. Yikusaŵa mpela kuti Satana akugombedwa makofi gejinji cijuma cilicose pa caka. Ni ligongo lyakwe yili yangasimonjesya kuti jwalakwe ‘akwendajenda aku nakuku mpela lisimba lyakutongola, kupita mcisosa jwakuti amlye.’ (1 Petulo 5:8) ‘Lisimbali’ lili lyakusacilila kutulya mwausimu, kutujonanjila unasi wetu ni Mlungu atamose kuwumasya kwene.​—Salimo 7:1, 2; 2 Timoteo 3:12.

4, 5. (a) Ana Yehofa nganamkunda Satana kola macili gosope m’matala gaŵili gapi? (b) Ana Maloŵe ga Mlungu gakusigasimicisya cici Aklistu ŵasyesyene?

⁴ Atamose kuti tukwete mmagongo jwakogoya, ngatukusosekwa  kola ndetemu. Ligongo cici? Ligongo lyakuti Yehofa nganakunda kuti ‘lisimba lyakutongolali’ likole macili gosope. Yehofa atesile yeleyi m’matala gaŵili gakusosekwa mnope. Litala lyandanda lili lyakuti Yehofa ŵasasile mkanipaŵe kuti “likuga lya ŵandu ŵangaŵalanjika” lya Aklistu ŵasyesyene licikulupuka pa ‘cilagasyo cekulungwa’ cacikwisa. (Ciunukuko 7:9, 14) Mlungu akusakwanilisya yakulocesya yakwe. M’yoyo, atamose Satana msyenejo akusamanyilila kuti ngaŵa mkupakombola kwasepusya ŵandu wosope kwa Mlungu.

⁵ Litala lyaŵili lyanganakundila Yehofa kuti Satana akole macili gosope mpaka tulimanyilile pa yaŵaŵecete kalakala mundu jwine jwakulupicika jwa Mlungu. Jwakulocesya Asaliya ŵamsalile Mwenye Asa kuti: “Yehofa caciŵa namwe naga m’mwejo mkwendelecela kuŵa najo.” (2 Mbiri 15:2; aŵalanje 1 Akolinto 10:13.) Yisyasyo yejinji yayalembegwe m’Baibulo yikusalosya kuti Satana aŵele mkulepela kwasepusya ŵakutumicila ŵa Mlungu ŵaŵaliji paunasi ni Mlungu. (Ahebeli 11:4-40) Lelo jino, Mklistu jwakusaŵa paunasi wakulimba ni Mlungu cacikombola kumkana Satana, atamose kumgomeka kwene. Maloŵe ga Mlungu gakusatusimicisya kuti: “Mumkaneje Satana nipo tacimtila.”​—Yakobo 4:7.

6. Ana Satana akusalimbana mwatuli ni Mklistu jwalijose pajika?

⁶ Satana ngaŵa mkupunda ngondo jakuwanicisyaji, nambo naga ngatukusamala, jwalakwe mpaka am’wulaje jwalijose pajikapajika. Satana akusamanyilila kuti mpaka atulye naga akonanga unasi wetu ni Yehofa. Ana Satana akusakombola catuli kutenda yeleyi? Jwalakwe akusalimbana ni m’weji mwamacili, pajikajika, soni mwakalamuka. Kwende tulole mwakusatendela yeleyi.

7. Ana ligongo cici Satana akulimbana mnope ni ŵandu ŵa Yehofa?

⁷ Akusalimbana ni m’weji mwamacili. Ndumetume Yohane ŵatite: ‘Cilambo cosope capasi cili m’miyala mwa jwakusakalajo.’ (1 Yohane 5:19) Maloŵe gelega gali gakwakalamusya Aklistu ŵasyesyene. Pakuŵa Satana apakombwele kala kuciŵika cilambo cosope ca ŵandu ŵakusakalaci m’miyala mwakwe,  sambano jwalakwe nganisyo syakwe syosope sili pa kulimbana ni ŵandu ŵanganaŵa kumbali jakwe, ŵali ŵandu ŵa Yehofa. (Mika 4:1; Yohane 15:19; Ciunukuko 12:12, 17) Jwalakwe ali jwaukali mnope ligongo akumanyilila kuti jigambile kumsigalila ndaŵi japanandipe. M’yoyo jwalakwe akulimbana nawe mwamacili mnope. Lelo jino, jwalakwe akusatutendela ngalwe mnope pakusaka konanga unasi wetu ni Mlungu.

8. Ana ndumetume Paulo ŵagopolelaga cici paŵasalaga kuti “tukulimbana” ni misimu jakusakala?

⁸ Akusalimbana ni jwalijose pajikape. Ndumetume Paulo jwakalamwisye Aklistu acimjakwe kuti, “Tukulimbana ni . . . misimu jakusakala ja mwinani.” (Aefeso 6:12) Ligongo cici Paulo ŵakamulicisye masengo maloŵe gakuti ‘kulimbana’? Ligongo lyakuti maloŵega gakusalosya kuti mundu akulimbana ni mjakwe pameso ni pameso. M’yoyo, Paulo paŵasalaga maloŵega ŵagombelecesyaga kuti mundu jwalijose akulimbana ni misimu jakusakala. Cinga tukutama m’cilambo cakuti ŵandu ŵajinji akusakulupilila mnope yamisimu, kapena iyayi, nambo tukaliŵalilaga kuti patwalipelece kwa Yehofa twaliji mpela tujinjile mpikisano wakulimbana ni misimu jakusakala. M’yoyo, mpaka tujile kuti kutandila pabatiswe kwawulaga m’bujo, Mklistu jwalijose akusaŵa pangondo. Ni ligongo lyakwe yili yangasimonjesya kuti Paulo ŵalimbikasisye mwakuwilisyawilisya Aklistu ŵa ku Efeso kuti aŵe ŵakulimba.​—Aefeso 6:11, 13, 14.

9. (a) Ligongo cici Satana, soni misimu jakusakala akusakamulicisyaga masengo matala ga ‘ukalamusi’ gakulekanganalekangana? (b) Ligongo cici Satana akusalingalinga kuti asokonasye nganisyo syetu, soni ana mpaka tuŵambale catuli yakulingalinga yakweyo? (Alole libokosi pa  mapeji 192 mpaka 193.) (c) Ana sambano citulijiganye ukalamusi wapi?

⁹ Akusatutega mwaukalamusi. Paulo akwalimbikasya Aklistu kuti alimbanganeje pakulimbana ni ‘ukalamusi wa Satana.’ (Aefeso 6:11) Maloŵe ga Pauloga gakulosya kuti misimu jakusakala jikwete matala gakulekanganalekangana gajikusakamulicisya masengo mwaukalamusi pakusaka kwatega ŵandu. Ŵakulupilila ŵane ŵaŵakombwele kumalana ni cakulingwa cine alepele kulimbana ni cakulinga ca mtundu wine. Pa ligongo lyeleli, Satana ni misimu jakusakala akusalolecesya ndamo sya mundu jwalijose pakusaka kuti amanyilile kulepetala kwakwe. Pamanyilile,  jemanjaji akusakamulicisya masengo yakulepetala yetuyo pakusaka kuti atujonanje mwausimu. Nambo tukwete upile wakumanyilila matala gakusagakamulicisya masengo Satana pakusaka kulimbana ni m’weji ligongo Baibulo jikusalosya matala gelega. (2 Akolinto 2:11) Kundanda kwa bukuji twalijiganyisye yitega yine yakusakamulicisya masengo Satana yayili kunonyela mnope yindu yakucilu, kusyoŵekana ni ŵandu ŵakusakala, soni yamsese. Kwende sambano tulijiganye ukalamusi wine wa Satana wawuli kutenda yamisimu.

10. (a) Ana kutenda yamisimu kuli kutenda cici? (b) Ana Yehofa akusakuwona catuli kutenda yamisimu, soni ana wawojo akusakuwona mwatuli?

¹⁰ Mundu pakutenda yamisimu akusaŵa kuti akukamulana ni misimu jakusakala. Kwawula ku cisango, usaŵi, kwaloga ŵane, soni kuwucisya kwa ŵandu ŵawe yosopeyi yili kutenda yamisimu. Tukusamanyilila kuti Yehofa akusakuwona kutenda yamisimu kuŵa “cindu cakunyalaya.” (Deuteronomo 18:10-12; Ciunukuko 21:8) Pakuŵa m’wejisoni tukusosekwa ‘kuyiŵenga yakusakala,’ ngatukusosekwa kutenda yindu yakamulana ni misimu jakusakala. (Aloma 12:9) Kukamulana ni misimu jakusakala mpaka kulosye kuti tuli ŵangakulupicika kwa Atati wetu ŵakwinani, Yehofa.

11. Ligongo cici Satana mpaka aŵe mpela apatile mbote naga atutendekasisye kuti tutande kutenda yamisimu? Asale cisyasyo.

¹¹ Ligongo lyakuti kutenda yamisimu kuli ungakulupicika kwa Yehofa, Satana akusasaka kuti ŵane mwa m’weji tutendeje yeleyi. Ndaŵi jilijose japakombwele kumtendekasya Mklistu kuti atande kutenda yamisimu, Satana akusaŵa apatile mbote. Ligongo cici? Aganicisye ya cisyasyo aci: Naga likuga lyakwimucila limtendekasisye msilikali kwimucila, soni kutenda yindu yangakulupicika ku likuga lyakwe ni kwinjila mu likuga lya ŵakwimucilawo, jwakulongololela likuga lyakwimucilalyo mpaka aŵe jwakusangalala mnope. Jwalakwe mpaka akomboleceje kwenda ni msilikalijo ni kumlosyaga kwa jwakulongolela jwa likuga lyakwe lyandanda kuti yimpweteceje. Mwakulandana ni yeleyi, naga Mklistu akutanda kutenda yamisimu, akusaŵa kuti akumleka Yehofa mwamele ni kumkuyaga Satana. Agambe  ganicisya, Satana mpaka asangalale mnope pakumlosya Mklistu jwakwimucilajo mpela mbote! Ana pana mundu jwampaka asace kumpa Satana upile welewo? Pangali jwampaka asace! M’weji ngaŵa ŵakwimucila.

12. Ana Satana akusakamulicisya masengo litala lyapi kuti asokonasye kaganisye ketu pa ngani jakutenda yamisimu?

¹² Naga tukuŵengana ni kutenda yamisimu, Satana ngaŵa mkutugomeka pakamulicisya masengo ukalamusi welewu. Pa ligongo lyeleli Satana akusamanyilila kuti akusosekwa kusokonasya kaganisye ketu. Mwatuli? Jwalakwe akusapata matala gakuti ŵasokonasye nago Aklistu kuti ayikane pakuganisya kuti “yambone yili yakusakala, soni kuti yakusakala yili yambone.” (Yesaya 5:20) Kuti apakombole kutenda yeleyi, Satana akusakamulicisya masengo litala lyaŵele ali mkulikamulicisya masengo kutandila kalakala, lya kuwusya yiwusyo yakutendekasya kayicila.

13. Ana Satana aŵele ali mkukamulicisya masengo catuli yiwusyo yakwatendekasya ŵandu kuti akayicileje?

¹³ Kwende tulole muŵalikamulicisye masengo Satana litalali kalakalako. Mumgunda wa Edeni jwalakwe ŵam’wusisye Hawa kuti: ‘Ana yisyene kuti Mlungu ŵatite mkasimlya cisogosi ca yitela yiliyose mu mgunda muno?’ Mundaŵi ja Yobu, pawatendekwaga msongano wa malayika kwinani, Satana ŵawusisyesoni kuti: “Ana Yobu akusajogopa Mlungu lulele?” Soni pandaŵi jiŵatandaga Yesu undumetume ŵakwe pacilambo capasi, Satana ŵamlinjile Yesu pakumsalila kuti: “Naga mli mwanace jwa Mlungu, mgalamule magangaga kuti gaŵe mkate.” Agambe ganicisya, yijuma msanu ni cimo Satana mkanaŵe kumlinga Yesu, Yehofa ŵaŵecete kuti, ‘Aju ni mwanangu jwapamtima. Ngusasangalala najo mnope.’ Nambo yaŵaŵecete Satana pakumlinga Yesu yaliji kusisya mwacipongwe yaŵasasile Mlunguyi.​—Genesis 3:1; Yobu 1:9; Matayo 3:17; 4:3.

14. (a) Ana Satana akusakamulicisya masengo catuli litala lyakwatendekasya ŵandu kutanda kukayicila pakwamba ya kutenda yamisimu? (b) Ana sambano citulijiganye yindu yapi?

¹⁴ Moŵa agano, Satana akusakamulicisyasoni masengo litala  lyeleli kuti atutendekasyeje kukayicila pakwamba ya kogoya kwa kutenda yamisimu. Yakutesya canasa ni yakuti, jwalakwe akombwele kwatendekasya ŵakulupilila ŵane kutanda kukayicila. Jemanjaji atandite kukayicila naga kutenda yindu yine yamisimu kuli kwakusakala. (2 Akolinto 11:3) Ana mpaka twakamucisye catuli ŵandu ŵeleŵa kucenga kaganisye kawo? Ana mpaka tulolecesye catuli kuti ukalamusi wa Satana ukatukwaya? Kuti tujanje, kwende tulole yindu yiŵili yele Satana ajinjisyemo yindu yamisimu mwakalamuka. Yinduyi yili yakusangalasya, soni yikamucisyo yamtela.

15. (a) Ana ŵandu ŵajinji ŵa ku yilambo ya asungu akusakuwona wuli kutenda yamisimu? (b) Ana kaganisye ka Aklistu ŵane kasokonecele catuli pangani jakutenda yamisimu?

¹⁵ M’yilambo ya asungu, kutenda yamasenga, yausaŵi, soni yine yakwayana ni yamisimu ngakusakuwona mpela kwakusakala. M’mafilimu, m’mabuku, mapologalamu ga pa TV, soni mang’asi ga pakompyuta ndaŵi syejinji akusalosya kuti yindu yamisimu yili yakusangalasya, yakulosya kalamuka, soni yangawulasya. Mafilimu, soni mabuku gane gagakwete yindu yamasenga gali gakuwanda mnope. Yeleyi yikulosya kuti misimu jakusakala jikombwele kwatendekasya ŵandu kuti ayiwoneje yamasenga kuŵa yangajogoya. Ana Aklistu akusayiwona yamisimu kuŵa yangajogoya mpela mwakusayiwonela ŵandu ŵane? Aklistu ŵane atandite kuyiwona yamisimu mpela mwakusayiwone ŵandu ŵane wosope. Mwatuli? Cisyasyo cambone panganiji cili ca Mklistu jwine juŵalolelele filimu jine jijalosyaga yamasenga. Jwalakwe ŵatite, “Nalolelele filimu jakulosya yamisimu, nambo nganindenda yamisimuyo.” Ana ligongo cici kaganisye keleka kali kakogoya?

16. Ligongo cici kusagula yakusangalasya yayikusalosya yamasenga kuli kwakogoya?

¹⁶ Atamose kuti pana kulekangana pasikati pa kutenda yamisimu ni kwamba kuyilolela, yeleyi ngayikugopolela kuti kulolela yamasenga ngaŵa kwakogoya. Ligongo cici? Aganicisye ayi: Maloŵe ga Mlungu gakusalosya kuti Satana atamose misimu  jakusakala ŵangamanyilila yatukusaganisya. * M’yoyo, mpela mwatuyiwonele kundandaku, kuti amanyilile yatukuganisya, soni patulopotwece mwausimu, misimu jakusakala ni Satana akusalolecesya mnope yatukusatenda yayikupwatikapo yakusangalasya yatukusasagula. Naga yitendo ya Mklistu yikusalosya kuti akusasangalala ni mafilimu kapena mabuku gagakusalosya ŵandu ŵakuŵeceta ni misimu, yamasenga, ŵandu ŵakamulwe ni misimu jakusakala kapena ngani sine syakusala yamisimu jakusakala, akusaŵa kuti akulumbikana ni misimu jakusakala. Pelepa akusaŵa kuti akujimanyisya misimu jakusakalaji yakulopotoka yakwe! M’yoyo, misimu jakusakala jikusalimbana ni Mklistujo mwamacili mnope pakamulicisya masengo kulopotoka kwakwe kwakulosisye mpaka kum’gomeka. Ŵandu ŵane ŵaŵanonyelaga yakusangalasya yakulosya yamasenga, mkupita kwa ndaŵi ŵatandite kutenda yamisimu.​—Aŵalanje Agalatia 6:7.

17. Ana Satana akusakamulicisya masengo ukalamusi watuli pakusaka kulimbana ni ŵandu ŵakulaga ni ulwele?

¹⁷ Satana ngakusagambape kupatila upile pa yakusangalasya yatukusasagula, nambo akusapatilasoni upile pacikamucisyo ca mtela catukusosecela. Mwatuli? Mklistu jwakulwala jwaŵele mkulingalinga kuti apate cikamucisyo ca mtela mpaka atenguce naga ngakupola ku ulwele wakwe. (Maliko 5:25, 26) Satana ni misimu jakusakala mpaka akamulicisye masengo upilewu pakusaka kutujonanga mwausimu. Misimu jakusakala mpaka jimtendekasye kuti asagule cikamucisyo ca mtela cakwayana ni “macili ga masenga,” yayili yakuwulasya mnope. (Yesaya 1:13) Naga ukalamusi wa Satana welewu ukukomboleka, unasi ŵa mundujo ni Mlungu ukusasokonecela. Mwatuli?

18. Ana yikamucisyo ya mtela yapi yele Mklistu akusosekwa kuyikana, soni ligongo cici?

¹⁸ Yehofa ŵakalamwisye Ayisalayeli ŵaŵatandite kukamulicisya  masengo “macili ga masenga.” Jwalakwe ŵatite: “Patambasukulile makono gawo mwinani, Une ngusasiŵila meso gangu. Atamose apelece mapopelo gejinji, Une jwangagapikanila.” (Yesaya 1:15) Ndaŵi syosope m’weji tukusaŵambala kutenda cilicose campaka citendekasye kuti mapopelo getu gakajanjigwa, soni yampaka yitendekasye kuti Yehofa alece kutukamucisya, mnopemnope patukulwala. (Salimo 41:3) M’yoyo, naga yikumanyika kuti cikamucisyo cine cakwe ca mtela cikwete yindu yakwayana ni yamisimu, Mklistu jusyesyene akusosekwa kana cikamucisyo celeco. * (Matayo 6:13) Naga Mklistu akukana cikamucisyoci, mpaka aŵe jwakusimicisya kuti Yehofa camkamucisye.​—Alole libokosi lyakuti “ Ana Yeleyi Yili Yamisimu Kusyesyene?” pa peji 194.

19. (a) Ana Satana jwaloŵesye ŵandu ŵajinji kuti akulupilileje yatuli pakwamba ya macili gakwe? (b) Ana Aklistu ŵasyesyene akusosekwa kuŵambala ngani syatuli?

¹⁹ Ŵandu ŵajinji m’yilambo ya asungu ŵangali woga ni macili ga Satana, nambo ŵandu ŵa m’yilambo yine akusajogopaga. M’yilambo yeleyi Satana jwaloŵesye ŵandu kuti akulupilileje kuti jwalakwejo akwete macili gejinji mnope. Ŵandu ŵane m’yilambo yeleyi pakutenda yindu ya lisiku ni lisiku cinga pakutama, kulya, kukamula masengo, soni pagona akusajogopaga mnope  misimu jakusakala. Ngani syakwamba ya yitendo yamacili ya misimu jakusakala sili syakuwanda. Nganisi akusasisala mwakunonyelesya kuti ŵandu syasangalasyeje. Ana m’weji tukusosekwa tuwandisyeje nawo ngani mpela syelesi? Iyayi. Ŵandu ŵakusatumicila Mlungu jusyesyene akusaŵambala kutenda yeleyi pa magongo gaŵili gakusosekwa mnope.

20. Ana mundu mpaka awandisye mwatuli nganisyo sya Satana mwangamanyilila?

²⁰ Candanda, kuŵeceta ngani syakwamba yajikusatenda misimu jakusakala, mpaka kuŵe kumkamucisya Satana kuwandisya mabosa gakuti akwete macili mnope. Mwatuli? Maloŵe ga Mlungu gakusasimicisya kuti Satana akusakombola kutenda yindu yamacili, nambo gakusatukalamusyasoni kuti jwalakwe akusakamulicisya masengo “yimanyisyo . . . yawunami,” soni ‘akusalambusya.’ (2 Atesalonika 2:9, 10) Pakuŵa Satana ali jwakulambusya jwamkulungwa, jwalakwe akusamanyilila litala lyakumtendekasya mundu jwatandite kunonyela yamisimu kuti akulupilileje yindu yanganiyiŵa yisyene. Ŵandu ŵeleŵa mpaka  akulupilileje ni mtima wosope kuti ayiweni, soni apikene yindu yine, mwati mpaka asaleje kuti yeleyi yatendekwe kwene. Mkupita kwandaŵi, ligongo lyakuŵecetaŵeceta nganisi ŵandu mpaka ajonjecesyeje yine ni yine. Naga Mklistu akuwandisya ngani syelesi mpaka aŵe kuti akutenda lisosa lya Satana jwali “atati ŵaunami wosope.” Jwalakwe akusaŵa kuti akuwandisya nganisyo sya Satana.​—Yohane 8:44; 2 Timoteo 2:16.

21. Ana pakumsyasya Yesu, soni ŵandumetume tukusosekwa tuŵeceteje yindu yatuli?

²¹ Caŵili, atamose yiŵe yisyene kuti mundu jwine ŵayiwonaga kapena kupikana yindu yakwayana ni misimu jakusakala mkanaŵe Mklistu, jwalakwe akusosekwa kuŵambala kwasalila ngani syelesi ŵakulupilila acimjakwe. Ligongo cici? Maloŵe ga Mlungu gakusatulimbikasya kuti: “Kwende meso getu gaŵe pa Yesu, jwele jwali jwakutandisya cikulupi cetu, nipo soni jwakulongolela ni kuciyicisya cikulupi cetu pambesi.” (Ahebeli 12:2) Yisyene, tukusosekwa kusalaga yakwamba Yesu ngaŵaga yakwamba Satana. Cakulimbikasya mnope cili cakuti, Yesu paŵaliji pacilambo capasi nganiŵasalilaga ŵakulijiganya ŵakwe ngani syakwamba ya misimu jakusakala, atamose kuti jwalakwe akakombwele kusala yejinji pakwamba ya yindu yele Satana mpaka ayikombole, soni yanganaŵa ayikombwele.Mmalo mwakwe, Yesu ŵasalilaga yakwamba utenga wa Ucimwene. M’yoyo, pakumsyasya Yesu, soni ŵandumetume, tukusosekwa tuŵeceteje yakwamba “masengo gamakulungwa gatesile Mlungu.”​—Masengo 2:11; Luka 8:1; Aloma 1:11, 12.

22. Ana mpaka tujendelecele catuli kukamucisya kuti kuŵeje ‘kusangalala kwinani’?

²² Satana akusakamulicisya masengo matala gakulekanganalekangana ga ukalamusi, kupwatikapo kutenda yamisimu, pakusaka konanga unasi wetu ni Yehofa. Nambope, mwakuyiŵenga yayili yakusakala ni kuŵika mtima wetu pa kutenda yambone, tukusaŵa kuti ngatukumpa Satana lipesa lyakusokonasya yatwasimicisye yakuti tuciŵambala kutenda yamisimu yamtundu wuliwose. (Aŵalanje Aefeso 4:27.) Agambe ganisya mwampaka kuŵele ‘kusangalala kwinani’ naga tukwendelecela ‘kulimbana ni ukalamusi wa Satana’ mpaka pacacimjonanga!​—Luka 15:7; Aefeso 6:11.