Nɔ́ nɛ dɔɔ nɔ wawɛɛ ji kaa a maa fie wa weku no loo wa huɛ ko kɛ je asafo ɔ mi ngɛ yayami nɛ e pee nɛ e tsakee we e tsui ɔ he je. Bɔ nɛ wa peeɔ wa ní ngɛ Baiblo ɔ blɔ tsɔɔmi ngɛ sane nɛ ɔ he ɔ maa tsɔɔ kaa wa suɔ Mawu nɛ wa yeɔ e we asafo ɔ anɔkuale, aloo wa pee we jã. * Mo susu sane bimi komɛ nɛ kɔɔ sane nɛ ɔ he ɔ he nɛ o hyɛ.

Kɛ e sa kaa waa kɛ nɔ ko nɛ a fie lɛ kɛ je asafo ɔ mi nɛ hi si ha kɛɛ? Baiblo ɔ de ke: “Ke nɔ ko tsɛɔ e he Kristo se nyɛɛlɔ, nɛ e fiɛɔ nyumu kɛ yo yakayaka fiɛmi, loo e hɛ tsuɔ, loo e jaa wɔ, loo e jɛɔ nɔ, loo e tɔɔ dã, loo e juɔ ɔ, nyɛɛ kɛ lɛ ko bɔ. Nyɛɛ kɛ lɛ ko ye ní tete po.” (1 Korinto Bi 5:11) A ngma kɛ kɔ ‘nɔ tsuaa nɔ nɛ maa je Kristo tsɔɔmi ɔ se’ ɔ he ke: “Nyɛ ko he lɛ atuu, nɛ́ nyɛ ba de lɛ ke, ‘He manye!’ tete po. Ke nɔ ko ha lɛ hɛ mi ɔ, e tsɔɔ kaa e kɛ lɛ peeɔ kake kɛ tsuɔ ní yayamihi.” (2 Yohane 9-11) E sɛ kaa waa kɛ nihi nɛ a fie mɛ kɛ je asafo ɔ mi ɔ sɛɛɔ Mawu jami he nɔ́ ko, loo waa kɛ mɛ bɔɔ huɛ. A de ngɛ September 15, 1981 Blɛfo gbi Hwɔɔmi Mɔ ɔ, ba fa 25 ɔ ke: “Ke o bi nɔ ko ke, ‘kɛ ji lɛ kɛɛ?’ kɛkɛ po ɔ, lɔ ɔ ma nyɛ ma tsɛ ní sɛɛmi, kɛ eko ɔ huɛ bɔmi po kɛ ba nyɛ kpɛti. Anɛ wa maa suɔ kaa wa kpɛ ní sɛɛmi nya la ngɛ waa kɛ nɔ ko nɛ a fie lɛ ɔ wa kpɛti lo?”

Anɛ e sɛ kaa waa kɛ nɔ ko nɛ a fie lɛ ɔ nɛ bɔ ngɛ blɔ ko blɔ ko nɔ lo? Ee, e sɛ, ngɛ yi mi tomi komɛ a he je. Kekleekle ɔ, lɔ ɔ tsɔɔ kaa wa yeɔ Mawu kɛ e Munyu ɔ anɔkuale. Pi benɛ e ngɛ gbɔjɔɔ ha wɔ pɛ nɛ e sa kaa waa bu Yehowa tue, e sa kaa waa pee jã ke e he wa ha wɔ po. Suɔmi nɛ wa ngɛ ha Mawu ɔ woɔ wɔ he wami konɛ waa ye e mlaa amɛ tsuo a nɔ. Wa le kaa e ji dami sane yelɔ nɛ ngɛ suɔmi, nɛ e mlaa amɛ a he ngɛ se nami ha wɔ wawɛɛ nitsɛ. (Yesaya 48:17; 1 Yohane 5:3) Enyɔne ɔ, wa he nɛ wa maa yu ngɛ nɔ nɛ pee yayami nɛ e tsakee we e tsui ɔ he ɔ,  maa po huɛ bɔmi nɛ ngɛ waa kɛ Mawu wa kpɛti, kɛ wa je mi ba kpakpa he piɛ, konɛ asafo ɔ biɛ kpakpa a nɛ ko puɛ. (1 Korinto Bi 5:6, 7) Etɛne ɔ, Baiblo sisi tomi mlaahi a se nɛ wa ma fi ɔ he ma nyɛ maa ba se nami ha nɔ nɛ a fie lɛ ɔ. Ke wa fĩ sane yemi ajla toli ɔmɛ a juɛmi nɛ a pee ɔ se ɔ, lɔ ɔ ma nyɛ ma ha nɔ nɛ pee yayami nɛ e kplɛɛ we nikɔtɔma amɛ a ga womi nɔ ɔ nɛ tsake e tsui. Ke waa kɛ wa suɔlɔ ɔ bɔɛ hu ɔ, lɔ ɔ ma nyɛ maa ye bua nɔ ɔ nɛ ‘e hɛ mi ma tsɔ lɛ,’ konɛ e na hɛdɔ nɛ ngɛ nɔ́ nɛ e pee ɔ he, konɛ e kpale kɛ ba Yehowa ngɔ.​—Luka 15:17.

Ke a fie o weku no ko hu nɛɛ? Ke e ba jã a, suɔmi nɛ ngɛ waa kɛ wa weku mi bimɛ wa kpɛti ɔ ma nyɛ ma ha nɛ e he nɛ wa ha wɔ wawɛɛ kaa wa maa ye Yehowa mlaa amɛ a nɔ. Kɛ e sa kaa waa kɛ wa weku no nɛ a fie lɛ kɛ je asafo ɔ mi nɛ hi si ha kɛɛ? Wa be nyɛe maa tu si fɔfɔɛhi tsuo nɛ ma nyɛ maa ba a he munyu ngɛ womi nɛ ɔ mi, se ha nɛ wa susu ní titli enyɔ komɛ a he.

Be komɛ ɔ, e nyɛɔ baa mi kaa weku no nɛ a fie lɛ ɔ kɛ weku li kpa amɛ hii we kake mi. Akɛnɛ e fiemi ɔ pui weku kpa nɛ ngɛ e kɛ e weku li ɔmɛ a kpɛti ɔ mi he je ɔ, a ma nyɛ ma tsa si himi mi níhi nɛ a kɛ lɛ peeɔ daa ngɛ weku ɔ mi ɔ nɔ. Se blɔ yaya nɛ nɔ ɔ hia a puɛ Mawu jami mi huɛ bɔmi nɛ ngɛ e kɛ e weku li nɛ ngɛ asafo ɔ mi ɔ a kpɛti ɔ. Enɛ ɔ he ɔ, weku li nɛ yeɔ anɔkuale ɔ kɛ lɛ be blae kɛ pee níhi nɛ kɔɔ Mawu jami he hu. Kaa nɔ hyɛmi nɔ́ ɔ, ke weku ɔ bua a he nya konɛ a pee weku Mawu jami nɛ nɔ nɛ a fie lɛ ɔ ngɛ lejɛ ɔ, e sɛ kaa a haa lɛ blɔ nɛ e tuɔ munyu ngɛ ní kasemi ɔ mi. Se ke nɔ nɛ a fie lɛ ɔ ji jokuɛ ɔ, lɛɛ e ji fɔli ɔmɛ a blɔ nya ní tsumi kaa a maa ya nɔ nɛ a tsɔɔ lɛ ní nɛ a tsɔse lɛ. Enɛ ɔ tsɔɔ kaa fɔli nɛ ngɛ suɔmi ɔ maa to blɔ nya konɛ a kɛ a bi ɔ nɛ kase Baiblo ɔ. *​—Abɛ 6:20-22; 29:17.

Se be komɛ hu ngɛ nɛ weku no nɛ a fie lɛ ɔ kɛ weku ɔ be we kake mi. E ngɛ mi kaa weku sane komɛ ma bi kaa o kɛ lɛ nɛ tu munyu ngɛ be komɛ a mi mohu, se e sa kaa huzu nɛ hi he. E sɛ kaa Kristofohi nɛ yeɔ anɔkuale ɔ nɛ́ hla nya jemi ko nɛ a kɛ a  weku no nɛ a fie lɛ nɛ́ a kɛ lɛ be we kake mi ɔ nɛ hi ní sɛɛe. Mohu ɔ, anɔkuale yemi ha Yehowa kɛ e we asafo ɔ maa wo mɛ he wami konɛ a fĩ nɔ fiemi blɔ nya tomi nɛ je Ngmami ɔ mi ɔ se. Anɔkuale nɛ a maa ye ngɛ enɛ ɔ mi ɔ, he hia nɔ nɛ pee yayami ɔ, nɛ lɔ ɔ ma nyɛ maa ye bua lɛ konɛ e ná tsɔsemi nɛ a kɛ ha lɛ ɔ he se. *​—Hebri Bi 12:11.