Качан бистиҥ тӧрӧӧнисти эмезе јуук најыбысты эткен кинчегин алынбаганы учун јууннаҥ чыгарып салза, биске коркышту ачу болот. Јууннаҥ чыгарары керегинде библиялык јакаруны бӱдӱрип турганыс, Кудайды тыҥ сӱӱп турганысты ла Оныҥ тургускан јаҥына чындык болуп, јӧмӧжип турганысты кӧргӱзип јат *. Мыныла колбой бир канча сурактар кӧрӱп ийерис.

Јууннаҥ чыгарылган кижиге канайып баштанар керек? Агару Бичикте јӧп берилет: «Мен карындаш деп аданып, бойы балыр јӱрӱм јӱрӱп, ачыркап, чалуга бажырып, јамандап, аракыдап, тоноп турган улуска слерди бирикпезин деп бичидим. Андый улусла кожо ажанбагар да» (1 Коринфтегилерге 5:11). «Христостыҥ ӱредӱзинде јӱрбей» турган кижи керегинде: «[Оны] ӱйге кийдирбегер, уткыбагар да. Оны уткуучы, оныҥ јаман керектеринде туружат» — деп айдылат (Иоанныҥ 2-чи самаразы 9—11). Јууннаҥ чыгарылып калгандарла бис ич-кӧгӱс сурактар шӱӱшпей јадыс ла олорло куучындашпай јадыс. 1982 јылдыҥ тулаан айыныҥ 1-кы кӱниниҥ «Каруулчы баканазында», 17-чи бӱгинде, јӱк ле эзендешкени, куучын баштаарыныҥ, керек дезе најылажарыныҥ да баштапкы алтамы болор аргалу деп бичилген. Айдарда, јууннаҥ чыгарылган кижиге бу баштапкы алтамды эдер бедиҥ?

Чек куучындашпас керек пе? Эйе, не дезе мында бир канча шылтактар бар. Баштапкы шылтак, мында бистиҥ Кудайга ла Оныҥ Сӧзине берингенис ченелет. Бис јаҥыс та эптӱ тушта эмес, је кӱч те болзо, Иегованы угуп јадыс. Кудайды сӱӱп турганыс бисти Оныҥ ончо јасактарын бӱдӱрерге кӱӱнзедет, не дезе Кудай чындык, сӱӱштӱ ле Оныҥ јасактары бистерге јаан туза болуп турган деп, бис бӱдӱп јадыс (Исаия 48:17; Иоанныҥ 1-кы самаразы 5:3). Экинчи шылтак, бурузын алынбай турган кижинеҥ кыйып турзаас, бастыра јуун  да, бис бойыс та ич-кӧгӱс ле ак-чек јанынаҥ ару артарыс, мынайып јуунныҥ јаман ады чыкпас (1 Коринфтегилерге 5:6, 7). Ӱчинчи шылтак, библиялык принциптердеҥ бек тудунганыс, јууннаҥ чыгарылган кижиге туза болордоҥ айабас. Јаргыныҥ комитединиҥ чыгарган јӧбине јӧмӧжип тура, бис аксагалдардыҥ болужарга берген јӧбин алынбай турган кинчек эткен кижиниҥ јӱрегин томултар аргалу. Јуук улузыла куучындажар аргазын јылыйтып, ол санаа алынып, кандый уур кинчек эткенин оҥдоп, Иеговага кайра келерге алтамдар эдер болор (Лука 15:17).

Јууннаҥ тӧрӧӧн кижи чыгарылган болзо? Бу учуралда Кудайга чындык артары коркышту тыҥ ченелер аргалу, нениҥ учун дезе тӧрӧӧндӧр ортодо колбулар јуук болот. Чыгарылган тӧрӧӧн кижиге канайып баштанар керек? Кажы ла учуралды шиҥдеп болбозыс, је эҥ ле кӧп болуп турган учуралдардыҥ экӱзин кӧрӱп ийеектер.

Кезикте чыгарылган кижи билезиле кожо јадат. Јууннаҥ чыгарганы билелик колбуларды буспай јат, оныҥ учун билениҥ улузы кӱнӱҥ сайынгы керектерди кожо эткилеп јат. Је кинчектиҥ јолын талдаган кижи билезиниҥ кудайзак улузыла ич-кӧгӱс колбуларын јылыйткан. Оныҥ учун Кудайдаҥ айап турган тӧрӧӧндӧри оныла кӧгӱс јанынаҥ куучындашпас. Темдектезе, билелик бажырыш ӧткӱрер ӧйдӧ чыгарылган кижи кожо болзо, шӱӱжеринде оныҥ туружар аргазы јок. Је јажы јетпеген бала чыгарылган болзо, ада-энениҥ балазын ӱредер ле таскадар молјузы анайып ла артат. Оныҥ учун сӱӱштӱ ада-энелер балдарыла Агару Бичикти ӱренер деп шӱӱп алардаҥ айабас (Укаа сӧстӧр 6:20—22; 29:17) *.

Кезик учуралдарда чыгарылган кижи билезинеҥ башка јадат. Кезикте билениҥ кандый бир керектериниҥ аайына чыгар керек боло берет, је андый да болзо, канча ла кире ас куучындажып турза јакшы болор. Билениҥ кудайзак улузы олордоҥ башка јадып турган чыгарылган тӧрӧӧниле куучындажарга  шылтак бедиребей јат эмезе актанбай јат. Ого ӱзеери Иеговага ла Оныҥ организациязына чындык болгоны, олорды јууннаҥ чыгарары јанынаҥ суракта библиялык јакаруларды бӱдӱрерге кӱӱнзедет. Олор мынайып бек сананып алганыла кинчек эткен кижи керегинде сананып турганын кӧргӱзет, анайда ок ого бу тӱзедӱнеҥ ӱредӱ аларга болужар болор (Еврейлерге 12:11) *.