Njôghe i yé keñi ngandak ngéda ba nhéya liwanda joñ tole mut woñ lihaa ikété ntôñ inyule a mboñ béba keñi ibabé hielñem. I libak di nla bana ngéda jam li li mpémél bés, li ñunda too di ngwés toi Yéhôva ni too di ntéñbe i noñ matéak mé. * Di timbhe le ndég mambadga bôt ba mbadba mu jam li.

Mambe maada di nlama bana ni mut ba nhéya ikété ntôñ? Bibel i nkal le: “Ni meina bañ ni mut nu a nséblana le mantata, ibale a yé mut ndéñg, to mut a nhép ni nkus, to bégés bisat, to nôôma bôt, to mut lihiua, to mut ngadla, ni jéla bañ ni ndôñ mut i.” (1 Korintô 5:11) Inyu bet ba ‘ntéñbe bé ni maéba ma Kristô’, Bibel i nkal le: “Ni yis bañ nye ndap nan, to kal ni kal bañ nye le, di nyéga we; inyule mut ni mut a nkal nye le, me nyéga we, wee yak nye a ñadba ni minson nwé mimbe.” (2 Yôhanes 9-11) Di gwé bé maada i pes mbuu to i mam mape ni mut ba mpémés i ntôñ. Mbamble ni pulasi le La Tour de Garde nu 15 décembre 1981, i lipep 23, u nkal le: “ Minso mi mayéga u nla kal mut le ‘me nyéga,’ mi yé bibôdle bi nkwel tole bi jam li nla yila liwanda. Baa di gwé ngôñ i bana i bibôdle bi nkwel bi, ni mut ba mpémés i ntôñ?”

Baa hala a yé toi nseñ le di kit maada mo ki mo ni mut ba nhéya ntôñ? Ñ, inyu ngandak manjom. Jam li bisu li yé le, hala a ñunda le di tiñi ni Yéhôva lôñni Bañga yé. Di nôgôl bé ndigi Yéhôva ngéda hala a ntomb, ndi yak ngéda hala a yé nledek. Gwéha Nyambe i ntinde bés i nôgôl mambén mé momasôna inyule di nyi le a ngwés bés, le a téé sép ni le mambén mé ma yé ndik inyu loñge yés. (Yésaya 48:17; 1 Yôhanes 5:3) Jam li nyônôs iba li yé le, lipémés mboñbéba  nu a ntjél hielñem li nsôñ bés mbôda ni likoda jolisôna i libak li mbuu, ni le jôl li likoda li nyogba bañ mahindi. (1 Korintô 5:6, 7) Jam li nyônôs aa li yé le, makidik manan i nit matiñ ma Bibel, ma nla yak ba nseñ inyu nwet ba mpémés i ntôñ. Ibale di nit makidik juu li bikodlene li nyoñ, bebeg hala a nla tihba ñem wé. A neebe ki mahôla le bebeg a bé tjél ngéda bisu. Bebeg i nimis maada mé malam ni bôt a ngwés li nla hôla nye i témbna ‘mahoñol malam,’ kayéle a neebe le i yom a bi boñ i yé béba ngandak, a yoñ ki makidik i témb yak Yéhôva.​—Lukas 15:17.

Baa di nlama kit maada ni mut wés lihaa ba mpémés i ntôñ? Ha ngéda i, matjél ma lihaa ma nla kolba manôgla inyu mambén ma Yéhôva. Mambe maada di nlama ni bana ni mut wés lihaa ba nhéya i ntôñ? Di nla bé sima mam momasôna hana. Ndi di yoñ dihéga diba.

Ngim mangéda, i nla ba le mut wés lihaa ba mpémés i ntôñ a yiine nlélém ndap ni bés. A nla ba wada ikété bagwal bés tole man wés nu a ngi yii mañge wanda, a yénék ki ni bés. Kiki i pémés mut i ntôñ li mélés bé maada ma lihaa, di nla ke ni bisu i bana maada ma bôt ba lihaa ba ba niñ i nlélém ndap. Ndi di hôya bañ le i mboñbéba nunu, a mpohol i kit maada ma mbuu ipôla yé ni bôt bé ba lihaa ba ba ngi yii i ntôñ. Jon ibale di nsômbôl unda Yéhôva le di tiñi i gwés nye, di nlama ha bé yoñ ngaba i mam ma mbuu ni nwet ba nhéya i ntôñ. Kiki hihéga, ibale di yé i boñ yigil i ndap lihaa, ndi nwet ba nhéya i ntôñ a yé ha, a kôli bé yoñ hop mu yigil i. Ndi ibale nwet ba mpémés i ntôñ a yé mañge ntitigi, bagwal bé ba ngi gwé mbegee i niiga nye ni i ti nye maéba. Jon, i bagwal ba ba ngwés man wap, ba nla boñ nye yigil i Bibel. *​—Bingéngén 6:20-22; 29:17.

Mangéda mape, i nla ba le i mut wés lihaa ba mpémés i ntôñ, a nyén ha bé ni bés. To hala kiki i nla béda le di bana  ngim maada inyu mam ma nlôôha nseñ inyu lihaa, i maada ma, ma nlama ba ndég. Bijô bi lihaa bi bi tiñi ni Yéhôva, bi ga bot bé manjom inyu bana maada ni mut wap lihaa nu ba mpémés i ntôñ. Mahéñha ni hala, ndéñbe yap i gwés Yéhôva ni ntôñ wé, i ntinde bo i nit matiñ ma Bibel inyu bet ba mpémés i ntôñ. I libak li li ñunda le, ba ntôñ mboñbéba ni le ba nsômbôl ki hôla nye i kôs nseñ mu nôgôs ba nti nye. *​—Lôk Héber 12:11.