Taem wan famle no fren blong yumi i no tanem tingting blong hem from wan bigfala sin we hem i mekem, nao kongregesen i putumaot hem, samting ya i save mekem yumi harem nogud bigwan. Sipos yumi jusum blong folem ol advaes blong Baebol long saed ya, no sipos yumi no wantem folem, hemia bambae i soemaot se lav blong yumi long God i bigwan olsem wanem mo bambae i soemaot tu sipos yumi rili wantem sapotem plan blong God. * Tingbaot sam kwestin we maet wanwan long yumi i askem long saed ya.

?Mi mas mekem olsem wanem long man we kongregesen i putumaot hem? Baebol i talem se: “Yufala i no mas go joen wetem ol man ya we oli stap talem se oli brata blong yumi, be oli stap . . . mekem ol fasin nogud wetem woman, no oli stap wantem tumas samting, no oli stap prea long ol narafala god . . . Sipos oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta.” (1 Korin 5:11) Baebol i tokbaot man we i “ova long mak blong ol tijing blong Kraes,” i se: “Bambae yufala i no tekem hem i kam insaed long haos blong yufala. Sipos man olsem i kam, be bambae yufala i no talem halo long hem, from we man we i stap talem halo long man olsem, hem i stap joen long hem long ol rabis wok blong hem.” (2 Jon 9-11) Yumi no storebaot trutok mo wosip blong yumi wetem man olsem, mo yumi no kakae no go samples tugeta. Wajtaoa blong Septemba 15, 1981, pej 25 long Inglis (Franis: Disemba 15, 1981 pej 23), i talem se: “Taem yu talem ‘halo’ long wan man, hemia i olsem we yu openem rod blong storian wetem hem mo maet yu openem rod blong yutufala i kam gudfala fren. ?Ale olsem wanem long man we kongregesen i putumaot hem? ?Yumi wantem openem rod ya long hem?”

?I rili impoten we yumi no moa mekem wan samting nating wetem man we kongregesen i putumaot hem? Yes i impoten blong mekem olsem. I gat plante risen blong samting ya. Faswan se: yumi wantem stap tru long God mo Tok blong hem. Yumi obei long Jeova, i no long taem  ya nomo we ol samting we hem i askem oli stret long tingting blong yumi. Nogat. Yumi obei tu taem i had long yumi. Sipos yumi lavem God yumi obei long olgeta tok blong hem. Yumi mekem olsem from we yumi luksave se ol fasin blong God oli stret mo hem i lavem yumi, mo olgeta loa blong hem oli blong mekem i gud long yumi. (Aesea 48:17; 1 Jon 5:3) Namba tu risen: taem yumi no joen wetem wan man we i no wantem tanem tingting blong hem from sin we hem i mekem, samting ya i protektem yumi mo kongregesen tu. Hem i protektem yumi blong i no gat samting i spolem fasin fren blong yumi wetem God, mo gudfala fasin blong yumi, mo gudnem blong kongregesen. (1 Korin 5:6, 7) Namba tri risen: fasin blong yumi blong obei gud long Baebol i save halpem man ya we kongregesen i putumaot hem. Man ya we i mekem sin, ol elda oli traem finis blong halpem hem, be hem i no jenis. Nao sipos yumi folem desisen we kot komiti i tekem, maet samting ya i save gat paoa long hem. Man ya i save harem nogud from we hem i no moa kampani wetem ol gudfala fren mo famle blong hem. Ale nao maet samting ya bambae i mekem “gudfala tingting i kambak long hem,” maet hem i luksave se rong blong hem i nogud tumas, mo maet hem i stat mekem samting blong kambak long Jeova.—Luk 15:17.

?Olsem wanem sipos man we kongregesen i putumaot hem, hem i wan famle blong yumi? Ol filing blong ol memba blong famle i save mekem we i had long yumi blong laekem mo sapotem desisen ya we i kamaot long Jeova. ?Yu mas mekem wanem long wan famle blong yu we kongregesen i putumaot hem? Yumi no save tokbaot evri samting we i save hapen long laef blong yumi evri dei, mo wanem we yumi mas mekem long ol taem olsem. Taswe bambae yumi tokbaot tu samting nomo.

Samtaem famle ya we kongregesen i putumaot hem, hem i stap long semfala haos wetem yumi. Kongregesen i putumaot hem, be hem i wan memba blong famle yet. Famle i save gohed nomo blong mekem ol samting olsem we oli stap mekem insaed long famle. Be i gat wan samting we oli no moa save mekem wetem hem. Bifo, man ya i bin joen wetem famle blong hem long wosip blong Jeova, be hem nomo i jusum blong no moa mekem olsem. From samting ya, ol memba blong famle we oli stap tru long God, oli no mas joen wetem man ya long wosip blong Jeova. Olsem nao, man ya bambae i no joen wetem famle taem oli mekem Baebol stadi tugeta. Be sipos hem i wan pikinini, papa mama blong hem i gat wok yet blong tijim mo stretem hem. Long taem olsem, from we papa mama i lavem hem, tufala i save tekem desisen se  bambae tufala i gohed blong mekem Baebol stadi wetem pikinini no yangfala ya blong olgeta. *—Ol Proveb 6:20-22; 29:17.

?Olsem wanem sipos famle ya we kongregesen i putumaot hem, hem i no laef long haos wetem yumi? Maet yumi mas toktok wetem hem from sam bisnes long saed blong famle, be long taem olsem tu i no nidim blong spenem fulap taem wetem hem. Ol memba blong wan Kristin famle we oli wantem stap tru long God, bambae oli no traem faenem eskius blong oli save joen wetem wan famle blong olgeta we kongregesen i putumaot hem, mo we i no laef wetem olgeta long semfala haos. Olgeta we oli laekem Jeova mo ogenaesesen blong hem, bambae oli respektem rul blong Baebol long saed blong man we kongregesen i putumaot hem. Fasin we olgeta ya i mekem long hemia we kongregesen i putumaot hem, i blong halpem hem blong hem i lanem samting from fasin stretem we hem i kasem. *—Hibrus 12:11.