Abui mam e nji taé nlem ane éyoñ ébu’a ya nda bôte jangan, nge ke mvôé jangan, ja tebe feñ amu na, ja te tyam atiñe Yéhôva teke jôban. Avale bia bo éyoñe bi tele aval été éte, da liti nge bia nye’e Yéhôva, nge bia kômbô ba’ale élate jangan a nye, a nge bia su’u nta’ane mame wé. * Bi tame zu yen minsili mi bôô a lat a ntebane feñ.

Aval avé bia yiane nyoñ môt a tele feñ? Kalate Zambe a jô na: “Mi bo te fulan [a] môt éziñ a lobane na, monyañ, a [ke binoñ mbia nkean], nge môte ya minyamete, nge nkañe bezambe befe, nge mbiasé bôt, nge nso’o vin, nge nyoñ abet; a aval môt ete momo, te dian a nye.” (1 Becorinthien 5:11) Éyoñ a kobô ajô “môt ase a . . . bo te tabe ñye’elane Krist été,” Kalate Zambe a jô na: “Te nyoñane nye nda jenan a te batane nye: amu na, nyô a batane nye nnye a nyoñ ngape ya mbia mimboane mi mam mié.” (2 Jean 9-11) Bi nji yiane laane mame ya nsisim a bôt be tele feñ, nge ke late ngbwa a be. Nkume mmombô a bete ya Ngon awôm a baa é too melu 15, mbu 1981, afep 23 a jô na: “Bia bese bia yeme na, minlañ a ngbwa bi wô’ô taté a mon éfia nyi: ‘Mbôlô.’ Ajô te, ye bia ye bele ve môt a tele feñ mbôlô nga?”

Ye sa’ale môt a tele feñ a volô jôm éziñ? Ôwé! Nalé a volô nya abui. Di ôsu, nalé a liti na bia ba’ale élate jangan a Yéhôva, a na, bia bo nye mewôk. Bi nji bo Yéhôva mewôk ve éyoñ nalé a ne tyi’ibi, bia bo fe nye mewôk éyoñ nalé a ne ayaé. Nye’an bia nye’e Yéhôva wo tindi bia na bi semé metiñe mé mese, amu bia yeme na a ne zôsôô a nye’an, a na, metiñe mé me ne asu mfi wongan. (Ésaïe 48:17; 1 Jean 5:3) Di baa, e sa’ale môt a tele feñ a kamane biabebien a akônda ése, na bi bo te kôébane mvite jé ya nsisim  a mbia mimboone mié; a volô fe na bi ba’ale ékôane Yéhôva mfuban. (1 Becorinthien 5:6, 7) Di lale, bia volô môt a tele feñ éyoñ bia tôñe miñye’elane ya Kalate Zambe. Éyoñe bia su’u ntyi’ane bemvendé ba nyoñ, jam ete é ne nambe nleme môt a tele feñ, a bo na a su’ulane semé ngul ése bemvendé ba te ve na be volô nye. Éyoñ a yene na a maneya jañele mbamba bemvôé bese a mbe a bili, jam ete e ne bo na a bi “fe’e nlem,” na a yemelan abé a te bo, a na, a nyoñ ntyi’ane ya bulane be Yéhôva.​—Luc 15:17.

Nge a ne ki ébu’a ya nda bôte jangan nje é tele feñ? Jam ete e ne telé élate jangan a Yéhôva meve’ele été. Bia yiane nyoñ ébu’a ya nda bôte jangan é tele feñ aya? Bi vo’o ki kobô mam mese kalate nyi, ve bia zu dañe fase beta be mam bebaé.

Di ôsu, ébu’a ya nda bôt é tele feñ é ngenan é nyiñi a nda bôte jé nda jia. Mbôl ntebane feñ wo tyame ki avumane ya metyi, môt a te tebe feñ a ne ke ôsu a nyoñe ngap a bisaé ya nda bôt, a ne fe yeñ abim éziñ a bibu’a bivo’o ya nda bôt. Ve amu mbia mboone wé, môt a tele feñ a tyi’i na a tyam élate ya nsisim é mbe zañe jé a bibu’a bivo’o ya nda bôt. Ajô te, bibu’a bivo’o ya nda bôt bi vo’o ke ôsu a laane mame ya nsisim a nye. Éyoñ ba bo ayé’é ya nda bôt, be nji yiane ve nye nkobô. Ve nge a ngenan mone mongô, bebiaé bé ba yiane ke ôsu a ye’ele nye, a lebe nye. Be ne fe tyi’i na ba bo ayé’é ya Kalate Zambe a nye. *​—Minkana 6:20-22; 29:17.

Di baa, ébu’a ya nda bôt é tele feñ ja nyiñe ke fe a nda bôte jé. Ja’a da sili na be bo be kobô mam méziñe ma fombô miñyiane ya nda bôt a nye, bibu’a bivo’o ya nda bôt bi nji yiane lôt abui éyoñ a nye éyoñ bia kobô mam mete. Bi nji yiane jeñe beamu ya vañe lôt éyoñ a môt a tele feñ.  Ve, mbôle bia kômbô ba’ale mbamba élat a Yéhôva, bia ve ngul ése na bi su’u nta’ane mame ya ékôane jé a lat a môt a tele feñ. Mbamba ntyi’ane bia nyoñ a liti na bia nye’e nye, a nalé a ne volô nye na a yene mfi ya melep bemvendé ba te ve nye. *​—Behébreu 12:11.