Makaguol gayod sa dihang ipalagpot ang usa ka paryente o suod nga higala gikan sa kongregasyon tungod sa wala-hinulsoli nga sala. Ang atong reaksiyon sa mga lagda sa Bibliya bahin niini magpadayag sa giladmon sa atong gugma sa Diyos ug pagsunod sa iyang kahikayan. * Tagda ang pipila ka pangutana bahin niini.

Unsaon nato pagtagad ang tawo nga gipalagpot? Ang Bibliya nag-ingon: “[Hunong] na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo.” (1 Corinto 5:11) Bahin sa usa nga “dili magpabilin diha sa pagtulon-an ni Kristo,” atong mabasa: “Ayaw gayod siya pasak-a sa inyong mga balay o mangomosta kaniya. Kay siya nga mangomosta kaniya maoy mag-aambit sa iyang daotang mga buhat.” (2 Juan 9-11) Dili kita makig-uban o makigsulti bahin sa relihiyosong mga butang sa mga gipalagpot. Ang Bantayanang Torre sa Marso 15, 1982, panid 19, nag-ingon: “Ang usa ka yanong ‘Hello’ sa usa ka tawo maoy unang lakang nga maugmad ang panagkolokabildo ug malagmit pa ngani panaghigalaay. Buot ba natong buhaton kanang unang lakang uban sa tawong gipalagpot?”

Kinahanglan bang likayan ang tanang pakigkontak sa mga gipalagpot? Oo, tungod sa pipila ka katarongan. Una, nalangkit niini ang pagkamaunongon ngadto sa Diyos ug sa iyang Pulong. Sugton nato si Jehova dili lang sa dihang kini sayon kondili bisan kon kini lisod. Ang atong gugma sa Diyos motukmod kanato sa pagsugot sa tanan niyang sugo, kay kita nasayod nga siya matarong ug mahigugmaon ug ang iyang mga balaod maoy alang sa atong kaayohan. (Isaias 48:17; 1 Juan 5:3) Ikaduha, ang pagpalayo sa dili-mahinulsolong mamumuhat ug daotan manalipod kanato ug sa uban sa kongregasyon batok sa espirituwal ug  moral nga kahugawan ug maampingan ang maayong dungog sa kongregasyon. (1 Corinto 5:6, 7) Ikatulo, ang atong pagtuman sa mga prinsipyo sa Bibliya tingali makaayo pa sa gipalagpot. Pinaagi sa pagpaluyo sa desisyon sa hudisyal nga komite, basin makatandog kita sa kasingkasing sa mamumuhat ug daotan nga nagmagahi sa dihang naningkamot ang mga ansiyano sa pagtabang kaniya. Kay ang iyang mga minahal dili na makig-uban kaniya, basin siya ‘makaamgo,’ nga makasabot sa pagkaseryoso sa daotan niyang buhat, ug mohimog mga tikang sa pagbalik kang Jehova.​—Lucas 15:17.

Komosta man kon paryente ang gipalagpot? Tungod sa pagkasuod sa mga membro sa pamilya, masulayan gayod ang atong pagkamatinumanon sa mga balaod sa Diyos. Unsaon nato pagtagad ang gipalagpot nga paryente? Dili nato mahisgotan dinhi ang tanang kahimtang nga mahimong motungha, apan makahisgot kitag duha.

Tingali may mga kahimtang nga ang gipalagpot nagpuyo gihapon sa samang balay ingong membro sa pamilya. Kay ang pagpalagpot kaniya wala man makabugto sa bugkos sa pamilya, ang adlaw-adlawng mga kalihokan ug pakiglabot sa pamilya makapadayon. Apan, iyang gipili ang pagbugto sa espirituwal nga bugkos uban sa iyang pamilya tungod sa iyang gibuhat. Busa ang maunongong mga membro sa pamilya dili na makig-uban kaniya sa mga kalihokang maylabot sa pagsimba sa Diyos. Pananglitan, kon presente ang gipalagpot, dili siya pakomentohon sa dihang ang pamilya magtuon sa Bibliya. Hinuon, kon menor-de-edad nga anak ang gipalagpot, kaakohan gihapon sa mga ginikanan ang pagtudlo ug pagdisiplina kaniya. Busa, ang mahigugmaong mga ginikanan makadumalag pagtuon sa Bibliya sa maong anak. *​—Proverbio 6:20-22; 29:17.

Sa ubang kahimtang, ang gipalagpot nga paryente tingali wala na magpuyo sa balay uban sa pamilya. Bisag kinahanglan tingaling makigkontak panagsa aron maasikaso ang usa ka hinungdanong pamilyahanong butang, kana angayng limitado  ra. Dili gayod mangitag mga pasangil ang matinumanong mga membro sa pamilya aron lang makigkontak sa gipalagpot nga paryente. Kasukwahi niana, paluyohan nila ang Kasulatanhong kahikayan sa pagpalagpot tungod sa ilang pagkamaunongon kang Jehova ug sa iyang organisasyon. Ang ilang pagkamaunongon makaayo gayod sa mamumuhat ug daotan ug kana basin makatabang nga siya makabenepisyo sa disiplina. *​—Hebreohanon 12:11.