Dhilobo dhiñgonovi sinnivoreya vaddiddi opitha opa oniwehu mmudhi obe mukwehu agathamagihiwa mmulogoni sabwa ya othega s’ohitxinuwa. Mukalelo onakulelihu mweeddihedho wa Bibilia mwaha wa obuddutxiwa mmulogoni podi olagiha mukalelo onimukwelihu Mulugu vina ororomeleya wehu mowiwanana na masasanyedho aye. * Katanaalela mavuzo mañgonovi antatamuwa sabwa ya eji.

Nimweeddihe dhavi muliba obuddutxiwa mmulogoni? Bibilia onologa: “Muheddege na abale aní: nili akristu, oku bali ajeberuwi, aliba nrima, anamebedha dhebewene, anamaba, anamalezela, ambava. N’athu aba, kamuje vamodha.” (1 Korinto 5:11) Mwaha wa muthu ‘oddule ompupuruwa, athiyá ofwara masunziho a Kristu’ ninowengesa: “Kammwakele [vatakulu venyu], kammulejele. Onimulejela onoya mmabasani mwaye otakala.” (2 Joau 9-11) Kaninandana obe kaninloga dhilobo dha omuyani na aliba obuddutxiwa mmulogoni. A Sentinela na 15 ya Dezembro 1981, nikuku 20, nihiloga: “Ologa ‘Alo’ bahi na muthu podi okala tharho yoroma enita makani vina podi oroma omarho. Nigahifuna othukula tharho eji yoroma na muthu obuddutxiwe mmulogoni?”

Eli yofuneya-wene otxatxama ofiyedhana wotene na aliba obuddutxiwa mmulogoni? Indde, na sabwa dhinjidhene. Sabwa yoroma, eji enlagiha ororomeleya vamentoni va Mulugu vamodha na Nzu naye. Ninimwiwelela Yehova kayo akala kinrutxa mbwenye vina okosawa eji ogakala worutxa vaddiddi. Omukwela Mulugu ononithukulela wiwelela malamulo aye otene, niziwaga yawila iyene ononikwela vina yawila malamulo aye anodhana majiho manddimuwa. (Izaiya 48:17; 1 Joau 5:3) Sabwa yanawili, omurebetha muliba othega ohintxinuwa ononibarela, iyo, vamodha na mulogo wotene opakeliwa omuyani vina mmweeddeloni nanda onokoyavi nzina naderetu na mulogo. (1 Korinto 5:6, 7) Mwaha  wanoraru, okamihedha kakamwe magano a Bibilia podi vina opureyamo wa namabuddutxiwaya mmulogoni. Modheela wakamihedha anddimuwaya ambuddutxile mmulogoni, iyo podi ofiyedha murima wa namathegaya okooddile mpaka mudhidhene obule orumeela guru ya anddimuwa a mmulogoni wila amukamihe. Omwaliwa omarho woñganimela na amudhi podi omukamiha ‘wubuwela,’ mpaka woona munuwelo wa ovirigana waye, nanda bathukula tharho wila eyelele wa Yehova.—Luka 15:17.

Ki mmudhi agabuddutxiwa mmulogoni? Eji egapadduwa, nifunddo na amudhi podi okala yoweha enddimuwa ya ororomeleya. Ki nimweeddihe dhavi mmudhi obuddutxiwe mmulogoni? Apano kaninalogevo mikalelo dhotene txino dhinapadduwe, mbwenye ndoweni nifwaseyele mikalelo mili dha makamaka.

Mwa dhotagiha dhiñgonovi, mmudhi obuddutxiwe mmulogoni txino podi okalagavi vatakulu vakakene ninga epaddi ya anamudhi a vakuvi. Vowila obuddutxiwa mmulogoni kungwadda omudhi, mabasa a siku na siku a anamudhi vina okala vamodha podi okalagawovi. Masiki dhaene, modheela dila yaye, muthuya osakulile otwa omudhi wa omuyani waye na murala wororomela. Noona amudhi ororomeleya kanfanyeela okaana viina wandana wa omuyani na iyene. Motagiha, akala muliba obuddutxiwa mmulogoni oli venevo, iyene kagafanyelile okosa epaddi ya otugumanela webedha wa vamuralani. Txibarene, akala muliba obuddutxiwaya mmulogoni mima, amambali ahikaanavi mabasa a omusunziha vina omulaga. Vina, amambali okwela podi omusasanyedhela mwanaya nsunzo na Bibilia. *—Gano dh’olelana 6:20-22; 29:17.

Mwaha mwina, mmudhi obuddutxiwe mmulogoni txino kankala takulu modhene na amudhi aye. Masiki vakalilani ofuneya wa weeddelana wopimeleleya mmidhidhini dhorameya vaddiddi wila atanaale dhofuneya dha murala,  weeddelana oku onofanyeela ovuguliwa. Murala wa Akristu oororomeleya kuntamela mwaha wa weeddelana na muthu obuddutxiwe mmulogoni ohinkala numba modhene. Mbwenye, ororomeleya vamentoni va Yehova vamodha na nikuru naye onowathukulela osoriha musasanyedho wa mmaleboni obuddutxiwa mmulogoni. Mweeddelo wawa wororomeleya ohikaana efunelo yaderetu mwa murima wa muliba obuddutxiwa mmulogoni nanda podi omukamiha opuramo nlagona nivahiwiye. *—Ahebreu 12:11.