Fɛɛn caaman t’an niin tɔɔrɔ ka se koo nin ma: n’an somɔgɔ wala an teri sɔbɛ dɔ gwɛnna ka bɔ kafo kɔnɔ sabu a ye jurumu kɛ ani a ma nimisa o la. Bibulu be cikan minw di o koo la, an b’u ta cogo min na, o b’a yira an ka kanuya barika ye min ye Ala ta fan fɛ. O fana b’a yira an ka kantigiya ye min ye a ka labɛnw koo la. * An ka ɲiningali dɔw lajɛ o koo la.

Minw gwɛnna ka bɔ kafo kɔnɔ, an ka kan k’olu minɛ cogo di? Bibulu b’a fɔ ko: “Ni mɔgɔ min b’a yɛrɛ kɛ aw dɔ ye, k’a sɔrɔ o tigi ye kakala ye, sɔnjugu, josɔnla, walima mɔgɔ tɔgɔcɛnbaga, walima dɔrɔtɔ, ani soon ye, aw kana jɛn n’o tigi ye fewu, hali ka dumuni yɛrɛ kɛ n’a ye.” (1 Korɛntikaw 5:11). A fɔra fana ko: “Mɔgɔ o mɔgɔ te Krista ka kalan bato . . . aw kana sɔn o tigi ka don aw ka soo kɔnɔ. Aw kan’a fo yɛrɛ. Ni mɔgɔ min y’a fo, o tigi niin be don a ka kɛwali juguw la.” (2 Zan 9-11). Mɔgɔ minw gwɛnna ka bɔ kafo kɔnɔ, an tɛ teriya kɛ n’u ye, an fana tɛ jɛn n’u ye Alako si la. Saan 1981, desanburu tile 15nan ka La Tour de Garde, ɲɛɛ 23 b’a fɔ ko: “K’a fɔ dɔrɔn ko ‘a ni sɔgɔma,’ o ye koo fɔlɔ ye min be se k’a to an be baro daminɛ ni mɔgɔ dɔ ye wala ka teriya yɛrɛ kɛ n’a ye. Yala an b’a fɛ k’o koo fɔlɔ daminɛ ni mɔgɔ ye min gwɛnna ka bɔ kafo kɔnɔ wa?”

Tiɲɛn na, yala waajibiko lo an k’an mabɔ pewu a tigi la wa? Ɔnhɔn, kuun b’o la koo caaman kosɔn. A fɔlɔ, o b’an ka kantigiya yira Ala n’a ka Kuma ta fan fɛ. An tɛ kolo Jehova ye dɔrɔn n’a ka nɔgɔ k’o kɛ, nka an be kolo fana hali n’a ka gwɛlɛ kosɔbɛ. An be Ala kanu minkɛ, o b’an lasun k’a ka cikanw bɛɛ labato sabu an b’a lɔn ko kanu Ala lo, a tilennin lo ani a ka sariyaw b’an nafa kosɔbɛ (Ezayi 48:17; 1 Zan 5:3). A filanan, jurumukɛla min tɛ nimisa, n’an b’an mabɔ a la, o b’an yɛrɛ ani kafoden tɔɔw tanga. An ka Alako ani an sɔɔn tɛ tiɲɛ, ani  kafo tɔgɔ ɲuman fana be to (1 Korɛntikaw 5:6, 7). A sabanan, n’an be lɔ kelen kan ka Bibulu ka sariyaw labato, o yɛrɛ be se ka o mɔgɔ gwɛnnin nafa. Diinan mɔgɔkɔrɔw dɛsɛnin kɔ k’o jurumukɛla dɛmɛ, u ye kitiko min latigɛ, n’an b’o labato, n’a sɔrɔ an bena jurumukɛla dusu sɔrɔ. Komi a ka teri sɔbɛw y’a bila, n’a sɔrɔ a bena “hakili sɔrɔ” k’a faamu ko a ye kojuguba lo kɛ ani a bena a ɲini ka kɔsegi Jehova ma.—Luka 15:17, ABM.

N’an somɔgɔ dɔ lo gwɛnna ka bɔ kafo kɔnɔ do? O koo ɲɔgɔn be se ka denbayamɔgɔw ka kantigiya kɔrɔbɔ kosɔbɛ sabu jɛnɲɔgɔnya teriman tun be u ni ɲɔgɔn cɛ. N’an somɔgɔ dɔ gwɛnna ka bɔ kafo kɔnɔ, an ka kan k’o tigi minɛ cogo di? An tɛ se k’o bɛɛ ɲɛfɔ ka pereperelatigɛ yan. Nka, an ka koo jɔnjɔn fila lajɛ.

Fɔlɔ, a be se ka kɛ ko mɔgɔ min gwɛnna ka bɔ kafo kɔnɔ, a bele be soo kelen kɔnɔ ni denbayamɔgɔw ye. Hali ni mɔgɔ gwɛnna ka bɔ kafo kɔnɔ, o t’a yira ko jɛn min b’ale ni denbayamɔgɔw cɛ, o banna pewu. A tun be jɛn n’u ye ka sokɔnɔbaara minw kɛ, a bele be se k’o kɛ. Nka, Alako jɛnɲɔgɔnya min tun be a ni denbayamɔgɔ dannabagaw cɛ, ale yɛrɛ y’a latigɛ k’o tiɲɛ a tagamacogo fɛ. O kama, denbayamɔgɔ kantigimanw tɛ se ka jɛn n’a ye Alako si la tugun. Ɲɛyirali fɛ, n’u lajɛnna Bibulu kalan kama ani o mɔgɔ gwɛnnin be yen, a tɛ se ka jɛn n’u ye. Nka, n’o mɔgɔ gwɛnnin ye denmisɛn ye, bangebagaw bele ka kunkanbaara lo k’a kalan ani k’a kolo. O la, bangebaga kanutigiw bena labɛn kɛ walisa ka Bibulu kalan kɛ n’o deen ye. *—Talenw 6:20-22; 29:17.

Filanan, a be se ka kɛ ko an somɔgɔ min gwɛnna ka bɔ kafo kɔnɔ, o ni an tɛ gwa kelen kɔnɔ ani an siginin tɛ n’a ye soo kelen kɔnɔ. Hali n’a y’a sɔrɔ ko an be se ka jɛn n’o tigi ye tuma kelen kelen na ka denbayako dɔw ɲɛnabɔ, an k’an janto o kana kɛ delinanko ye an fɛ. Kerecɛn kantigimanw tɛ  sababuw ɲini ka koow kɛ n’u somɔgɔ dɔ ye n’a gwɛnna ka bɔ kafo kɔnɔ ani a tɛ soo kelen kɔnɔ n’u ye. Nka, u be kantigiya min kɛ Jehova n’a ka ɔriganisasiyɔn ye, o b’u lasun ka Bibulu ka cikanw labato mɔgɔ gwɛnni koo ta fan fɛ kafo kɔnɔ. U b’o kantigiya kɛ jurumukɛla ka ɲɛ kosɔn ani o be se k’a dɛmɛ ka nafa sɔrɔ kololi la. *—Eburuw 12:11.