Ti taonaki n te nanokawaki ae bati ngkana e a kabaneaki man te ekaretia ara koraki temanna ke raoraora ni kaan bwa e aki raira nanona man ana bure. E kona n oti korakoran tangiran te Atua iroura ao kakaonimakira nakon ana babaire, n arora ni butimwaea ana kaetieti te Baibara i aon aei. * Iangoi titiraki tabeua aika rio ni kaineti ma aei.

Tera arora ae riai nakon te aomata ae kabaneaki man te ekaretia? E taku te Baibara: “Kam na katoka te reitaki ma te aomata ae aranaki bwa te tari ma bon te tia wene ni bure ngaia, ke te aomata ae nanonrang, ke te tia taromaurii boua, ke te tia kabuakaka, ke te tia mamanging, ke te tia aonikai ni kuribwai, ao kam aki naba riai n amwarake ma te aeka n aomata anne.” (1 I-Korinto 5:11) Ni kaineti ma “ane riaon ana reirei te Kristo” ti wareka ae kangai: “Tai butimwaeia ni karinna n ami auti ke ni kamauria. Bwa ane kamauria ao e ibuokanibwai n ana mwakuri aika bubuaka.” (2 Ioane 9-11) Ti na aki reitaki ma aomata aika kabaneaki n taetae ma ngaiia ke ni maroroakini baika kaineti ma te onimaki. E taekinaki ae kangai n Te Taua-n-Tantani ae bwain Tebetembwa 15, 1981, iteraniba 25 n te taetae n Ingiriti: “Taekinan te taeka ae uarereke ae ‘Mauri’ nakon te aomata, e kona n riki bwa te moani mwaneka ae kauekea te maroro ao tao te iraorao naba. Te koaua bwa ti kani karaoa te moani mwaneka anne nakon te aomata ae kabaneaki?”

E bon riai bwa ti na rawa n reitaki naba teutana ma ake a kabaneaki? Eng, bwa iai bukina tabeua. Te moan, e kaota ara kakaonimaki nakon te Atua ao ana Taeka. Ti aki tii ongeaba iroun Iehova ngkana e bebete karaoana iroura, ma ti ongeaba naba ngkana e a rangi ni kangaanga. E kairira tangiran te Atua bwa ti na ongeaba n ana tua ni kabane, ngkai ti ataia bwa a eti arona ao e tatangira, ao a karekei kakabwaia aika rangi n  tamaroa ana tua. (Itaia 48:17; 1 Ioane 5:3) Te kauoua, kararoaan te tia bure ae aki raira nanona e kamanoira ao e kamanoia kaain te ekaretia mani kabarekaan aia onimaki ao aroaroia ni maiu, ao e kateimatoa raoiroin taekan te ekaretia. (1 I-Korinto 5:6, 7) Te katenua, teimatoara n taui ana boto n reirei te Baibara e kona naba ni karekea kabwaian te aomata ae kabaneaki. Ngkana ti boutokaa ana babaire te komete ni kaboowi ibukia unimwaane, ti kona naba iai n rota nanon te tia bure are e a tia ni kabwaka ni butimwaea aia kakorakora unimwaane ni kani buokia. Buan ana reitaki ae kakawaki ma raona aika tangiraki e kona ni buokia ni kaoka “ana iango,” n ataa kakaiakin ana bure, ao n toui mwaneka ake e na okira iai Iehova.—Ruka 15:17.

Ma tera arom ngkana e a kabaneaki am koraki? Ngkana e riki anne, e a kona te reitaki ae kaan i marenaia kaain te utu ni karekea te kataaki ae korakora nakon ara kakaonimaki n ana tua Iehova. Tera arora ae riai nakon ara koraki ae kabaneaki? Ti aki kona ni maroroakini bwaai ni kabane aika kona n riki, ma ti na kaatuui ara iango i aoni baika kakawaki aika uoua.

N tabetai, e boni kona kaain ara utu are kabaneaki n teimatoa n tiku n te auti bwa kaain te mwenga temanna. Kioina ngkai kabaneana man te ekaretia e aki nanona kabaneana man te utu, e kona n teimatoa te reitaki ao te waaki n te utu ma ngaia. Ma e ngae n anne, e a tia te aomata anne ni kaotia n arona bwa e kan urua reitakina n te onimaki ma kaain ana utu ake kaain te onimaki. Mangaia are a aikoa kona kaain te utu aika kakaonimaki n reitaki ma ngaia ni kaineti ma baika irekereke ma te onimaki. N te katoto, ngkana iai te aomata ae kabaneaki, e na aki anga ana kaeka ngkana a ikotaki n reirei n te Baibara kaain te utu. Ma ngkana e kabaneaki te nati ae tuai n inaomata mai aan aia tararua ana karo, bon tabeia ana karo bwa a na reireinna ao ni kaetia. A kona naba ni bairea kairan te reirei n te Baibara kaaro aika tatangira ma natiia anne. *—Taeka N Rabakau 6:20-22; 29:17.

 N te itera are teuana, e kona te aomata are kabaneaki na aki kaai ni maeka ma kaain ana utu n te auti ae tii teuana. E ngae ngke tao e kainnanoaki te reitaki ae uarereke n tabetai ibukini bwaai tabeua aika kakawaki ibukin te utu, ma e riai ni karako te reitaki anne. A aki riai kaain te utu ni Kristian aika kakaonimaki, ni karekei angaia bwa a aonga n reitaki ma kaain aia utu are kabaneaki are e aki maeka n aia auti. N oneani mwin anne, e na kairiia te kakaonimaki ni koaua nakon Iehova ao ana botaki bwa a na taua ana kaetieti te Baibara ibukin te kabaneaki. E kona n rotaki nanon te tia bure n aia kakaonimaki n tei n nene, ao e kona ni buokia ni karekea kabwaiana man te reirei ni kaetieti are e anganaki. *—I-Ebera 12:11.