Ñambyasyeterei ningo oñemosẽ jave kongregasióngui peteĩ ñane hénte térã ñane amigoite. Péro upéva oiko haʼe nombyasýi rupi hembiapo vai. Péicha jave jajapóramo la Biblia heʼíva jahechaukáta jahayhuha Ñandejárape ha ñamombaʼeha iñeʼẽ. * Jahechamína mbaʼépa oiko jepi.

Mbaʼéichapa jatratavaʼerã peteĩ oñemosẽvape kongregasióngui? La Biblia heʼi: ‘Pejei umi ermáno guaʼúgui, oikóva kongregasión apytépe ha oikovahína gueteri upe tekokyʼápe, térã haʼenteséva, térã taʼanga omombaʼeguasúva, térã oñeʼẽ reíva hapicháre, térã okaʼúva, térã omondáva’ (1 Corintios 5:11, ÑÑB). Heʼi avei: “Ani pemog̃uahẽ pende rógape, ha ani pemomaitei. Cháke umi omomaiteíva umívape, omoirũ chupe imbaʼe vai apópe” (2 Juan 9-11). La Atalaya 15 de noviembre, 1981, páhina 19, heʼi: “Ikatu ñepyrũrã jaʼénte chupe: ‘Mbaʼéichapa’, péro upéi ñambopukuseve ha ñañemongeta hendive, ipahápe katu jajeheʼa meméma hese. Jajaposénepa upéva?”. Upéicharõ oĩ jave peteĩ oñemosẽva kongregasióngui ndajajeheʼaveimavaʼerã hese.

Tekotevẽ piko ndajajeheʼaveiete voi hese? Tekotevẽ. Jahechami mbaʼérepa. Primero ñande jahayhu Ñandejárape ha ñamombaʼe Iñeʼẽ. Ñaneñeʼẽrenduvaʼerã chupe opa mbaʼépe ijetuʼúramo jepe ñandéve. Haʼe ningo hekojoja ha ñanderayhu ha upévare  omeʼẽ ñandéve iléi jaiko porãve hag̃ua (Isaías 48:17; 1 Juan 5:3). Segundo oñemosẽvo kongregasióngui pe hembiapo vaívape oñeñangareko ermanokuérare ani hag̃ua ijúnta vai. Péicha avei noñeñeʼẽvaimoʼãi kongregasiónre (1 Corintios 5:6, 7). Ha tercero katu ojejapóvo la Biblia heʼíva ikatu oñepytyvõ pe hembiapo vaívape. Mbaʼéichapa? Jarrespetáramo umi ansiáno odesidíva ikatu ñamokyreʼỹ pe hembiapo vaívape oheja hag̃ua umi ansiáno toipytyvõ chupe. Ohechávo ndaikatuveimaha ojeheʼa umi ohayhúvare, ikatu ohechakuaa tuicha ojavy hague ha oñemoag̃uise jey Jehováre (Lucas 15:17).

Ha ñane héntepe oñemosẽramo? Upéicha jave ikatu ijetuʼu ñaneñeʼẽrendu Jehovápe. Mbaʼéichapa jatratavaʼerã chupe? Jahechami mokõi mbaʼe oikóva jepi.

Pe oñemosẽva oikóramo ñande rógape. Oñemosẽvo kongregasióngui ndeʼiséi ndahaʼeveimaha ñane hénte, upévare ikatu jaheja chupe toiko ñande rógape jepiveguáicha. Péro ndajahejamoʼãi ñanemoĩrũ jaadora jave Jehovápe. Haʼe ningo ndoservisevéima Jehovápe ñanendive. Pór ehémplo oĩséramo ñane família ostudia jave la Biblia, opytakuaa péro noñeʼẽivaʼerã. Oimérõ imitã gueteri, ituvakuéra omboʼe ha okorrehivaʼerã chupe (Proverbios 6:20-22; 29:17). *

Oiméramo pe oñemosẽvaʼekue ndoikói ñande rógape, ñañeʼẽvaʼerã hendive tekotevẽterei javénte.  Nañañeʼẽmoʼãi hendive oimeraẽ mbaʼe rehe. Jahayhúramo Jehovápe ha ñamombaʼe iñorganisasión jarrespetáta umi ansiáno odesidíva ha nañañemoĩmoʼãi pe oñemosẽvaʼekue ykére. Ñaneñeʼẽrendúvo Jehovápe ikatu ñaipytyvõ chupe oñembyasy hag̃ua ha oservi jey Jehovápe (Hebreos 12:11). *