Tu siab kawg li, thaum peb ib tug phoojywg lossis nruab ze raug rho tawm hauv lub koom txoos, vim nws ua txhaum thiab tsis kam ntxeev dua siab tshiab. Phau Vajlugkub qhia tias peb yuav tsum coj li cas nrog cov no. Yog tias peb ua raws li phau Vajlugkub hais, ces yuav qhia tias peb hlub Yehauvas thiab peb hwm nws tej kab ke npaum li cas. * Cia peb kawm txog ob peb lo lus nug no.

Peb yuav coj li cas nrog tus uas raug rho tawm? Phau Vajlugkub qhia tias: “Tsis txhob mus koom nrog cov uas hu ua kwvtij los tseem ua nkauj nraug, ntshaw luag tug, pe dab mlom, thuam luag, qaug dej qaug cawv, lossis txeeb luag tug, txawm yog yuav noj yuav haus los tsis txhob koom kiag li.” (1 Khaulee 5:11) Phau Vajlugkub qhia tias tus uas “tsis nyob hauv Khetos tej lus qhuab qhia . . . tsis txhob hu nws los tsev thiab tsis txhob fim nws kiag li, rau qhov tus uas fim nws kuj nrog nws koom ua phem.” (2 Yauhas 9-11) Peb yuav tsis nrog cov uas raug rho tawm tham pem ua si, lossis tham txog tej yam ntawm sab kev ntseeg. Phau ntawv The Watchtower lub Cuaj Hlis Ntuj, tim 15, 1981, sab 25, qhia tias: “Qhov uas peb hais ‘Nyob zoo’ xwb, yuav qheb kev rau peb xav nrog nws tham pem. Tej zaum tsis ntev, peb yuav xav nrog nws ntaus phoojywg thiab. Yog li ntawd, puas zoo rau peb qheb kev nrog nws txuas lus?”

Puas tsim nyog cais nws li ntawd? Yeej tsim nyog ua li ntawd. Vim li cas? Qhov ib, yog peb ua li ntawd yuav qhia tias peb muab siab npuab Vajtswv thiab hwm nws Txojlus. Tsis yog peb mloog Yehauvas lus thaum yoojyim xwb, tiamsis thaum nyuaj los, peb yuav tsum mloog huvsi thiab. Kev hlub rau Vajtswv yuav pab kom peb mloog Yehauvas tej lus nkaw txhua lo huvsi. Peb xam pom tias  Yehauvas yog tus ncaj ncees thiab muaj kev hlub. Nws tej kevcai yeej pab kom peb tau zoo xwb. (Yaxaya 48:17; 1 Yauhas 5:3) Qhov ob, yog peb cais ntawm ib tus neeg uas tsis kam ntxeev dua siab tshiab, ces yuav tiv thaiv tau peb thiab lub koom txoos ntawm sab kev ntseeg. Qhov ntawd kuj yuav pab kom lub koom txoos dawb huv thiab tsis raug thuam. (1 Khaulee 5:6, 7) Qhov peb, thaum peb tuav rawv Vajtswv tej kevcai, tej zaum yuav pab tau tus neeg uas raug rho tawm. Tej zaum nws twb tsis kam mloog thaum cov txwj laus nrhiav kev los pab nws. Tiamsis thaum peb coj raws li pab txwj laus txiav txim, tej zaum yuav ua rau nws hloov siab. Thaum txojkev sib raug zoo nrog cov neeg uas nws hlub tu lawm, ces tej zaum yuav ua rau nws “xav txog nws lub neej,” thiab pom tias nws tau ua txhaum loj npaum li cas, ces nws yuav tig rov qab los cuag Yehauvas.​—Luka 15:17.

Yuav ua li cas yog tias ib tug nruab ze raug rho tawm? Peb yuav tsum muab siab npuab Yehauvas tej kevcai tiag, vim tsis yoojyim thaum yus txheeb ze tus neeg uas raug rho tawm. Thaum ib tug neeg uas txheeb ze peb raug rho tawm, peb yuav coj li cas nrog nws? Yuav muaj ntau yam rau peb hais, tiamsis cia peb tham txog ob yam xwb.

Tej zaum tus neeg uas raug rho tawm ntawd, tseem nrog nws tsev neeg nyob ua ke, tsis tau faib cuab. Yog li ntawd, tej yam uas tsev neeg niaj hnub ua yuav tsis hloov. Tiamsis thaum tus neeg ntawd raug rho tawm lawm, nws tsev neeg yuav tsis nrog nws koom tej yam ntawm sab kev ntseeg, vim nws tau txiav nws txojkev sib raug zoo nrog Yehauvas lawm. Muab ua piv txwv li no, thaum tsev neeg los pe hawm Vajtswv ua ke, es tus neeg uas raug rho tawm nyob ntawd thiab, nws los zaum mloog los tau, tiamsis nws tsis muaj feem teb thiab ua tus coj. Tiamsis yog tias tus uas raug rho tawm yog ib tug menyuam uas tsis tau muaj hnub nyoog txaus, ces yog leej niam leej txiv tes haujlwm los mus cob qhia thiab ntuas nws. Leej niam leej txiv uas muaj kev hlub, yuav tsum teem ib lub  sijhawm los kawm Vajlugkub nrog tus menyuam ntawd. *​—Paj Lug 6:20-22; 29:17.

Ua li yog tias yus tsev neeg ib tug, uas raug rho tawm tsis nrog yus nyob ua ib tse lawm ne? Thaum muaj li ntawd yuav tsum tsis txhob nrog tus neeg ntawd txuas lus. Muaj qee lub caij uas tsim nyog hais mam hais xwb; xws li thaum muaj ib siab ob qeg li cas, es cheem tsum hais. Yog tias ib tse neeg muab siab npuab Yehauvas tiag, lawv yuav tsis nrhiav kev los txuas lus nrog tus neeg raug rho tawm, uas tsis nrog yus nyob ua ib tse lawm. Tiamsis vim lawv muab siab npuab Yehauvas thiab Nws lub koom haum, lawv yuav cais ntawm tus neeg ntawd, raws li tau npaj tseg hauv phau Vajlugkub. Qhov uas lawv ua raws li Yehauvas hais, yuav pab tus neeg txhaum thiab tej zaum kuj yuav pab tau kom nws ntxeev dua siab tshiab. *​—Henplais 12:11.