Talaga mataka-takì nu na-disfellow i parientes onu i madukkò nga kofuttam megafu ta ari nga mabbabawi ta nakaliwatanna. Ipasingan na reaksion tam taw i konag na ayâ tam ta Dios anna i pammakatalò tam ta unnugna. * Ikonsideram i karuan nga pakkiavu meyannung taw.

Kunnasi nakuan i pattratu tam ta na-disfellow? Kagian na Biblia: “Ari kamu nga mevulu ta tolay nga kagian na tu yaya ay wagi ta angngurug, ngem ta kakurugan na ay minaggannug, minakkelug, minaddaraya-rayaw ta sinan-dios ira, minammara-parake ta ikattolay na, minaggillellaw, onu minakkoko. Ari kamu nga makiyarubang ta akkakanan ta kunnaw nga tolay.” (1 Corinto 5:11) “I sinni laman nga ari nga kanayun nga mamarulo ta nituddu ni Cristo,” kagian na Biblia, “arian nu nga padulattan ta balay nu, ni tu maddios kamu sa. Ta sinni laman nga maddios tatun nga tolay, ay mesipo ta marakay nga kuan na.” (2 Juan 9-11) Ariattam makiergo onu makibbida nira meyannung ta espiritual onu maski anni nga gannug. Kagian na Marso 15, 1982 na Ang Bantayan, pahina 19-20: “I simple nga pangikagi tu ‘Hello’ ta maski sinni nga na-disfellow ay pamegafuanan na tulu-tuloy nga pakiyuvovug anna maski pakikkofun. Kayà tam kari i mangigafu tu komunikasion nira?”

Kawagan kari talaga nga interamente nga lillitan i na-disfellow? Wan, megafu ta karuan nga rason. Ollu, ipasinganna yatun i pammakatalò tam ta Dios anna ta Uvovugna. Mattuppal tam kani Jehova maski nu mariga nga kuan yatun. Tuppalattam i bili-bilinna megafu ta ayâ tam sa. Dayarayawattam yaya bilang Dios na hustisia anna ayâ megafu ta pakabenefisiowattam tu mapia i dorobna. (Isaias 48:17; 1 Juan 5:3) Mekadua, ariattam madapingan ta espiritual anna ta moral, kunne na gapa i kakongregasiottam. Mapattalupaddian paga i mapia nga reputasion na kongregasion. (1 Corinto 5: 6, 7) Mekatallu, makoffun ta na-disfellow nu talaga tuttulattam i prinsipio ira na Biblia. Nu suportattam i desision na hudisial nga komite, awayyana tu mapaguyu i futu na nakaliwà nga ari nagginna ta pappursigi na elder ira nga uffunan yaya. Nu iyemmattam i pakikavulu sa, moffunan yaya tapenu ‘manonòna gabbalaman i mapia,’ masinganna i kadammò na liwàna, anna magangngua tu dakkuà ira tape makatoli kani Jehova.​—Lucas 15:17.

Kunnasi nu kafamilia i na-disfellow? Awayyana tu mariga nga mammakatalò i miembro na familia nu na-disfellow i kafamiliada, megafu ta madukkò nga relasiodda. Kunnasi nakuan i pattratu tam ta na-disfellow nga kafamilia? Ariattam magigiammu taw ngamin i posible nga luttuag nga situasion, ngem innattam i dua nga maruddu nga situasion.

Nu karuan, awayyana tu kabbalay i na-disfellow nga kafamilia. Megafu ta ari gamma nga nagattà i relasiodda nga makkakafamilia, awayyana nga mattulu-tuloy lagapa i inaggaw nga aktibidad na familia anna i pakilallangda. Ngem megafu ta liwàna, awayyana tu ginattàna ngana i espiritual nga relasionna ta familiana. Yatutta ari ngana nga ipamavulun na matalò ira nga miembro na familia nga mevulu yaya ta espiritual nga aktibidad na familia. Angngariganna, nu presente i na-disfellow, ari puede nga makipartisipa yaya ta paddayarayaw na familia. Ngem nu menor-de-edad i na-disfellow, responsibilidad paga laman na maganà nga tudduan anna disiplinan yaya. Yari tu awayya na minangngiddù nga maganà nga mangikondukta tu paggigiammu ta Biblia ta anâna. *​—Proverbio 6:20-22; 29:17.

Ta karuan nga situasion, awayyana tu ari nga kabbalay i na-disfellow nga kafamilia. Maski nu kawagan nu karuan nga makiyuvovug sa megafu ta importante nga gannug ta familia, mawag tu ibita yatun adde ta posible. Ari nga magala-aleg tu rason i matalò ira nga miembro na familia tape laman makikomunika  ta arianna kabbalay nga na-disfellow. Mapaguyu lallagu ira na kinamatalòda kani Jehova anna ta organisasionna nga tuttulan i unnug na Biblia meyannung ta pad-disfellow. Pammakapianan lagapa na nakaliwà i pammakatalòda anna makoffun sa nga mabenefisiowan ta disiplina sa. *​—Hebreo 12:11.