Kʼajoʼ narahoʼk saʼ qachʼool naq junaq li qakomon malaj junaq li qamiiw naʼisiik saʼ li chʼuut xbʼaan naq inkʼaʼ naraj xjalbʼal xnaʼlebʼ. Wi tqakʼulubʼa chiʼus li xkʼulmank, tqakʼutbʼesi ma naqara li Jehobʼa ut ma tiik tzʼaqal li qachʼool chirix li naxye qe chirix li naʼlebʼ aʼin. * Joʼkan naq, qatzolaq kʼaru naru nakʼulmank.

Chanru tqilebʼ li isinbʼilebʼ saʼ li chʼuut? Li Santil Hu naxye: «Li kʼaru xinye, [...] chirixebʼ li nekeʼxye ribʼ naq aj paabʼanelebʼ ut yookebʼ chi xbʼaanunkil li moko uxk ta naraj. Maare naxye ribʼ naq aj paabʼanel ut aʼan aj yumbʼeet ut aj koʼbʼeet malaj aj rahol ru bʼihomal. Maare naloqʼonink jalanil yos, malaj aj hobʼonel. Maare aj kalajenaq malaj aj elqʼ. Inkʼaʼ texwanq saʼ xyanqebʼ aʼan chi moko texwaʼaq rochbʼeenebʼ» (1 Corintios 5:11, Wy). Li Santil Hu naxye ajwiʼ: «[Wi junaq] inkʼaʼ xaqxo saʼ li xkʼutum li Kriist ut naʼelk saʼ li xbʼehil [...] meekʼul saʼ leerochoch chi moko teekʼe xsahil xchʼool, xbʼaan naq ani taakʼehoq xsahil xchʼool, taaʼokenq saʼebʼ li xyibʼ aj bʼaanuhom» (2 Juan 9-11). Li tasal hu La Atalaya 15 re li po Noviembre re li chihabʼ 1981, saʼ li perel 19, naxye: «Maare kaʼajwiʼ rikʼin xyeebʼal: ‹Chan xaawil›, tooʼoq chi seeraqʼik rikʼin li poyanam aʼin ut chirix chik aʼan tooʼoq chi wank choʼq ramiiw. Ma twulaq raj chiqu xbʼaanunkil aʼin?». Joʼkan naq, inkʼaʼ chik nokooʼaatinak rikʼin chirix li qapaabʼal chi moko nokoochʼutlaak ta chik rikʼin re rajsinkil qu.

Ma aajel ru naq tqakanabʼ raatinankil chi junajwa? Heeheʼ, wank naabʼal xyaalal naq aajel ru naq tqabʼaanu aʼin. Li xbʼeen, tento tiikaq qachʼool chiru li Yos ut chiru li Raatin. Saʼ xkʼabʼaʼ naq naqara li Jehobʼa junelik naqaj abʼink chiru, usta wanq sut chʼaʼajkaq xbʼaanunkil. Li Yos tiik xchʼool, nokooxra ut chixjunil li xchaqʼrabʼ nokooxtenqʼa saʼ li qayuʼam (Isaias 48:17; 1 Juan 5:3). Li xkabʼ, li inkʼaʼ naraj xyotʼbʼal xchʼool inkʼaʼ us naq wanq saʼ xyanqebʼ laj paabʼanel. Joʼkan naq aajel ru naq t-isiiq saʼ qayanq  re naq chaabʼilaq qanaʼlebʼ, kawaq li qapaabʼal, saqaq ut maaʼani t-aatinaq chirix li qachʼuut (1 Corintios 5:6, 7). Li rox, us naq naʼisiik saʼ li chʼuut junaq li poyanam xbʼaan naq naru natenqʼaak chi sutqʼiik. Chanru nabʼaanumank aʼin? Wi tiik qachʼool chirix li naxye li Yos saʼ li Santil Hu, ut wi tqakʼulubʼa chi anchal qachʼool naq nekeʼraqok aatin ebʼ li cheekel winq, maare rikʼin li wiibʼ chi naʼlebʼ aʼin laj maak traj chik naq ttenqʼaaq chi xjalbʼal xnaʼlebʼ xbʼaanebʼ li cheekel winq. Joʼkan naq, li qanaʼlebʼ ut li qabʼaanuhom naru naxbʼaanu naq tqʼunaaq xchʼool junaq li poyanam ut traj xjalbʼal xnaʼlebʼ. Ut naq maakʼaʼaq chik saʼ aatin li xjunkabʼal rikʼin, «[tkʼulunq] xchʼool» ut tixkʼe reetal xnimal ru li xmaak ut t-oq wiʼ chik xsikʼbʼal li Jehobʼa (Lucas 15:17).

Ut wi qakomon li xʼisiik saʼ li chʼuut? Maare t-oq chi chʼinaak qachʼool rikʼin li Jehobʼa wi qakomon li xʼisiik saʼ li chʼuut. Ut wiʼ joʼkan raj, kʼaru tento tqabʼaanu? Usta inkʼaʼ tqatzol chixjunil ut li jalan jalanq chi naʼlebʼ chirix aʼin, us naq tqil wiibʼ rehebʼ li naʼlebʼ li nakʼulmank.

Kʼaru nakʼulmank wi li xʼisiik saʼ li chʼuut wank saʼ rochoch rikʼin li xjunkabʼal? Li naʼisiik saʼ li chʼuut moko naxkanabʼ ta wank choʼq xkomon li xjunkabʼal, joʼkan naq, toj nekeʼaatinak ut nekeʼxjunaji ribʼ rikʼin. Abʼanan, saʼ xkʼabʼaʼ naq oxloqʼ chiruhebʼ li Jehobʼa inkʼaʼ chik nekeʼaatinak rikʼin chirix li Yos, xbʼaan naq aʼan risi ribʼ saʼ xyanqebʼ joʼ aj paabʼanel. Abʼan truuq rabʼinkil naq teʼoq xloqʼoninkil li Yos saʼ junajil joʼ junkabʼal, abʼan inkʼaʼ ttzʼaqonq re xchʼolobʼankil malaj re xsumenkil li yookebʼ xtzolbʼal. Ut wi toj saaj li xʼisiik saʼ li chʼuut? Li xnaʼ malaj li xyuwaʼ naru natzolok re chirix li Santil Hu xbʼaan naq tenebʼanbʼil saʼ xbʼeenebʼ xkʼeebʼal xnaʼlebʼ ut xtijbʼal (Proverbios 6:20-22; 29:17). *

Ut, kʼaru nakʼulmank wi li xʼisiik saʼ li chʼuut moko wank ta chik rikʼin li xjunkabʼal? Ebʼ laj paabʼanel li tiikebʼ xchʼool chiru li Yos inkʼaʼ nekeʼxsikʼ chanru teʼaatinaq rikʼin, kaʼajwiʼ nekeʼxbʼaanu wi aajel ru naq wanq aʼan saʼ xyanq li xjunkabʼal naq  teʼaatinaq chirix junaq li nimla naʼlebʼ. Ut moko nekeʼxyoobʼ ta junaq li naʼlebʼ yal re raatinankil. Saʼ xkʼabʼaʼ naq nekeʼxra li Jehobʼa ut li Xmolam, nekeʼxpaabʼ li naxye li Santil Hu chirixebʼ li nekeʼisiik saʼ li chʼuut. Ebʼ li xkomon nekeʼraj li us choʼq re, ut rikʼinebʼ li xnaʼlebʼ nekeʼraj xtenqʼankil re naq tixkʼulubʼa li xqʼusbʼal (Hebreos 12:11). *