Sihali ekindu ekikathwaghalhaya kutsibu ng’omuhughu kutse omunywani wawu erihighithwa omwa kithunga busana n’erikolha ekibi kandi iniaghana eriyisubamu. Ngoku thukathwalha erihabulha lye Biblia erihambire okwa mwatsi oyu, kyangana kangania nga thunanzire Nyamuhanga ya kutsibu kandi nga thukana sighika ndeke emitheghekere yiwe. * Thuthalebya ebibulyo ebikabuthuka ebihambire okwa mwatsi oyu.

Thwanga thwalha thuthi omundu oyuwabirihighithwa omwa kithunga? E Biblia yikabugha yithi: ‘Simuthambe n’omundu oyukayahulha mw’omukristo, oyuli musingiri, kutse omutsuri, kutse oyukasaba esyosanamu, kutse omutsumi, kutse oyuli mukundirya, kutse oyukahunga. Kwenene simwangalya n’omundu ng’oyo.’ (1 Abanya Korinto 5:11) Erikwamana n’omundu ‘oyuthesiba omw’ikangirirya lya Kristo,’ thukasoma thuthi: ‘Simumukokaye omwa nyumba yenyu kutse simumuhe obuholho. Kusangwa oyukamukeraya iniamasangira omwa mibiiri yiwe mibi.’ (2 Yoane 9-11) Sithwanga kania emyatsi ey’obunyakirimu kutse erikolangana n’ababirihighithwa. E Watchtower eya Seputemba 15, 1981, olhupapura 25, yikabugha yithi: “Ne ‘Ekuthi’ nyisa kyanganabya kiika ky’erimbere eky’eritsuka omukania kandi imwangana lhwiririra obunywani. Mbwino thwangananza erikolha ekiika ky’erimbere ekyo eky’erikolangana n’omundu oyuwabirihighithwa?”

Thuna tholere erithendi kolangana nahake n’omundu oyu? Ee, ahabw’esyonzumwa nyingyi. Ey’erimbere, ni kangania obuthaleghulha oku Nyamuhanga n’Ekinywe kiwe. Thukakenga Yehova omughulhu kyangabya ikyolhobire erimukenga n’omughulhu kyangabya ikikalire. Erianza Nyamuhanga likaleka ithwa kenga ebihano biwe ebyosi, kundi thukaminya ngoku awithe obulingirirania n’olhwanzo kandi ngoku ebihano biwe bikathughasira kutsibu. (Isaya 48:17; 1 Yoane 5:3) Eyakabiri, eriyihighulha okwa mukolha nabi oyuthe yisubamu kikathutheghaya haghuma n’ekithunga ekyosi okw’itsanda bunyakirimu n’omw’eby’esyongeso kandi  kikaleka ekithunga ikyabya ikine n’erina libuya. (1 Abanya Korinto 5:6, 7) Eyakasathu, ithwe erisighika emisingyi ye Biblia kyangana ghasira n’oyuwabirihighithwa omwa kithunga. Thwama sighika erithwamu ery’akathunga akakatswera, ithwangana leka omuthima ow’omukolha nabi oyuwasangawa iniabirighana obuwathikya bw’abasyakulhu iniahambwako. Erithendi thasyakolangana n’abanywani biwe ab’omwa kithunga kyangana leka ‘in’ibuka,’ inialhangira ekisobyo kiwe, neryo iniatsuka erikolha ebyanga muwathikya erisuba oku Yehova.—Luka 15:17.

Kandi ibbwa omuhughu amahighithwa? Eki kyamabya, obughuma obwa thuwithe n’abahughu bethu ibwangana leka obuthaleghulha bwethu oku Yehova ibwalengwako. Thwanga thwalha thuthi omuhughu oyuwabirihighithwa? Sithwanga thoka erikania okwa buli mibere eyanga banikaho, aliriryo thulebaye emibere ibiri emikulhu-mikulhu.

Okwa bundi buthuku, omuhughu oyuwabirihighithwa anganabya iniakin’ikere eka. Kundi erihighithwa siririleka akathendibya mughuma w’okw’eka eyo, angana lholha embere erikolha okwa mibiiri y’eka eya buli kiro n’eyindi myatsi. Aliriryo, busana n’ekya akolha, abirithwamu erithwa obughuma bwiwe obw’obunyakirimu obuli ahakathi-kathi kiwe n’eka yabu. Busana n’ekyo, Abakristayo abathaleghulha abali omw’eka sibanga kolangana nayu omwa myatsi ey’obunyakirimu. Ng’eky’erileberyako, oyuwabirihighithwa amabya omw’iramya ly’eka, isyanga sangira omw’iramya eryo. Aliriryo, oyuwabirihighithwa amabya iniakine mwana, ababuthi bakabya ibakina withe olhukwamirwa olhw’erimweghesya n’erimukunga. Kwesi, ababuthi ab’olhwanzo bangana hira h’endegheka ey’er’igha n’omwana wabu oyo e Biblia. *—Emisyo 6:20-22; 29:17.

Omwa yindi mibere, omuhughu oyuwabirihighithwa anganabya isyikere eka. Nomwakine indi kyangana yithaghisya eribya n’omundu oyu ahabw’akathambi kake busana n’emyatsi eyihambire okw’eka yenyu, thutholere ithwalhangira thuthi sikiribya kindu kya buli kiro. Abakristayo abathaleghulha ab’omw’eka eyo sibali sondaya esyonzumwa esy’eriyihambulyamu esyanga leka ibakolangana n’omuhughu oyuwabirihighithwa oyuth’ikere nabu. Aliriryo, erithendi leghulha oku Yehova n’ekithunga kiwe likaleka ibasighika endegheka eyiseghemere okw’Amasako ey’erihighitha omundu y’omwa kithunga. Erithendi leghulha lyabu likakanganaya ngoku batsomene omukolha nabi oyo kandi lyangana muwathikya erighasirwa omw’isuyirwa ery’abirihebwa. *—Abaebrania 12:11.