Hañata, lu utwanga hahulu bumaswe kwa pilu muta wahabo luna kamba mulikanaa luna yo mutuna a zwisiwa mwa puteho kabakala ku sa bakela sibi. Mo lu ngela ketelelo ya Bibele mwa taba ye ku bonisa fo li kuma lilato la luna ku Mulimu ni busepahali bwa luna kwa tukiso ya hae. a Ha mu nyakisise lipuzo ze kona ku zuha fa taba ye.

Lu swanela ku nga cwañi mutu ya zwisizwe mwa puteho? Bibele i li: “Mu si ke mwa kopana ni ya ipiza mwanahabo mina, bo ki lihule, kamba ya lakaza bufumu, kamba ya lapela milimu, kamba lihata, kamba litahwa, kamba lisholi; ya cwalo, mu si ke mwa ca lico ni yena.” (1 Makorinte 5:11) Ka za mutu kaufela ya “sa ini mwa tuto ya Kreste,” lu bala kuli: “Mu si ke mwa mu amuhela mwa mandu a mina, mi mu si ke mwa mu lumelisa. Kakuli ya mu lumelisa u kopana ni yena mwa likezo za hae ze maswe.” (2 Joani 9-11) Ha lu swaneli ku eza sango ni batu ba ba zwisizwe mwa puteho kamba ku ambola litaba za bulapeli ni bona. Tawala ya Mulibeleli ya Sikuwa ya September 15, 1981, fa likepe 25, ne i ize: “Ku lumelisa mutu nihaiba feela ka pulelo ya kuli ‘Eni sha’ ku kona ku ba muhato wa pili wa ku kala ku ambola ni mutu kamba mane ku eza bulikani ni yena. Kana ne lu ka tabela ku nga muhato wa pili wo wa ku lumelisa mutu ya zwisizwe mwa puteho?”

Kana luli kwa lukela ku ambuka mutu ya zwisizwe mwa puteho? Eni, mi ku na ni mabaka ha lu swanela ku eza cwalo. Libaka la pili kikuli, lu bonisa busepahali bwa luna ku Mulimu ni kwa Linzwi la hae. Lu utwa Jehova ka nako kaufela—ibe ka nako ye ku li bunolo ku eza cwalo kamba ka nako ye lu fumana taata. Lilato la luna ku Mulimu li lu susueza ku mamela litaelo za hae kaufela; lu lemuha kuli ki Mulimu wa katulo ye lukile ni ya lilato mi lu fumana tuso ye tuna ka ku mamela milao ya hae. (Isaya 48:17; 1 Joani 5:3) Libaka la bubeli kikuli, ku ambuka sifosi ya sa baki  ku lu sileleza kwa moya ni kwa muzamao, ku sileleza ni puteho kaufela, mi ku bukeleza libizo le linde la puteho. (1 Makorinte 5:6, 7) Libaka la bulalu kikuli, ku kumalela likuka za Bibele mane ku kona ku tusa mutu ya zwisizwe mwa puteho. Ha lu bonisa kuli lwa lumelelana ni katulo ya katengo ka buatuli, lu kana lwa fita kwa pilu ya sifosi yo ya saa palezwi ku amuhela tuso ya baana-bahulu. Ku latehelwa ki sango se sinde sa naa banga ni sona ni mizwale ni likaizeli ba hae ku kona ku mu tusa ku “kengeyela” ka za bupilo bwa hae, ku lemuha butuna bwa bufosi bwa hae, ni ku nga mihato ya ku kutela ku Jehova.—Luka 15:17.

Ku cwañi haiba wahabo mina a zwisiwa mwa puteho? Mwa muinelo o cwalo, kutwano ye tuna ya mwa lubasi i kona ku lika hahulu busepahali bwa mina. Lu swanela ku sebelisana cwañi ni wahabo luna ya zwisizwe mwa puteho? Ha lu koni ku talusa miinelo kaufela ye kona ku zuha mwa taba ye, kono ha lu nyakisiseñi miinelo ye mibeli ye banga teñi hañata.

Fokuñwi, mwendi mutu wa mwa lubasi ya zwisizwe mwa puteho u sa pila hamoho ni lubasi lwa hae mwa ndu ye swana. Bakeñisa kuli ku zwisiwa kwa hae mwa puteho ha ku felisi buhabo bwa hae ni lubasi lwa hae, u sa kona ku swalisana ni banabahabo yena ku eza misebezi ya ka zazi ni zazi ya lubasi. Niteñi, mutu yo u ketile ku felisa swalisano ya hae ya kwa moya ni lubasi lwa hae kabakala za ezize. Kacwalo, lilama za lubasi ba ba sepahala ba swanela ku tuhela ku swalisana ni yena mwa misebezi ye ama bulapeli bwa bona ku Mulimu. Ka mutala, haiba mutu ya zwisizwe mwa puteho a fumaneha ka nako ye lu kopana lubasi ku ituta Bibele, haa na ku ba ni kabelo mwa tuto. Kono haiba ya zwisizwe mwa puteho yo ki mwanana, bashemi ba hae ba sa na ni buikalabelo bwa ku mu luta ni ku mu kalimela. Kacwalo, bashemi ba ba lilato ba ka eza litukiso za ku itutanga Bibele ni mwanaa bona. b—Liproverbia 6:20-22; 29:17.

Mwa miinelo ye miñwi, mwendi mutu ya zwisizwe mwa puteho haa pili hamoho ni lubasi lwa hae. Nihaike kuli ka linako ze  ñwi mutu yo u kana a tokwa ku swalisana ni lubasi lwa hae mwa litaba ze ñwi za lubasi, swalisano yeo ha i swaneli ku ba ye tulile tikanyo. Lilama za lubasi ba ba sepahala ha ba bata-bati mabaka fa ku swalisanela ni wahabo bona ya zwisizwe mwa puteho ili ya sa pili ndu iliñwi ni bona. Busepahali bwa bona ku Jehova ni kwa kopano ya hae bu ba susueza ku yemela tukiso ya mwa Mañolo ya ku zwisa batu ba ba sa baki mwa puteho. Ku sepahala kwa bona ku tusa sifosi, mi ku kona ku tahisa kuli a tusiwe ki kalimelo ya filwe. c—Maheberu 12:11.