Ke bivulepo bitusansanga pamo bwa kumona mubutule nansha mulunda netu upangwa mu kipwilo pa mwanda wa kubulwa kwisāsa ku bubi. Inoko muswelo otwitaba ku buludiki bwa mu Bible pa uno mwanda ukalombola patōka bukatampe bwa buswe botuswele Yehova ne dikōkeji dyetu ku mpangiko yandi. * Imvwana bipangujo bimobimo bitala uno mwanda.

Le tukekala namani na muntu mupangwe? Bible unena’mba: “Muleke kupwana na muntu ye-yense witwa bu mwanetu aye’ko wa busekese nansha wa makomwa-meso nansha wa kutōta bilezaleza nansha wa kutukana nansha nkolwankolwa nansha wa manyengenyenge, lekai ne kudya kwine na muntu wa uno muswelo.” (1 Kodinda 5:11) Tutanga pangala pa “muntu ense wenda kulampe mu bufundiji bwa Kidishitu” amba: “Kemwakimutambulai nansha dimo mu enu mobo nansha kumwimuna kwine. Mwanda yewa umwimuna weabila nandi mingilo yandi mibi.” (2 Yoano 9-11) Ketusambangapo kipwano nansha kwisamba myanda ya ku mushipiditu na mupangwe. Kiteba kya Mulami kya Falanse kya 15 Kweji 12, 1981, paje 23 kinena’mba: “Kwimuna muntu amba ‘Wakamapo’ i ditabula dibajinji ditwala ku mīsambo pakwabo’nka ne ku bulunda. Lelo kudi uswele kutabula dino ditabula dibajinji na muntu mupangwe?”

Le i kyendele’mo kwepukididila bapangwe? Eyo, pa bubinga buvule. Dibanjiji, i mwanda utala dikōkeji kudi Yehova ne ku Kinenwa kyandi. Ketukōkelapo Yehova enka mu bintu bitupēlela, mhm, i ne mu bikomo mwine. Buswe botuswele Yehova bwitutononanga tukōkele mbila yandi, pa kuyuka amba i moloke ne wa buswe kadi amba bijila byandi bidi’ko pa mwanda wa kamweno ketu. (Isaya 48:17; 1 Yoano 5:3) Dya bubidi, kubulwa kupwana na nonga-bibi upela kwisāsa  kwitukiñanga batwe ne kipwilo ku disubi dya ku mushipiditu ne mu mwikadilo kadi kukwashanga kipwilo kileke kunenenwa bibi. (1 Kodinda 5:6, 7) Dya busatu, kulama kotulama ino misoñanya ya mu Bible kudi na kamweno ne ku mupangwe mwine. Potulunga kuboko ku butyibi bwakwatwa na komite wa butyibi, tuteñanga mutyima wa nonga-bibi upelele kwitaba ku bukomo bulonga bakulumpe bakimba kumukwasha. Kujimija kipwano kilēme na baswe bandi kukamulengeja ekale “kwilanga” pa bukatampe bwa bubi bwalongele, ne kujoka ajokele kudi Yehova.—Luka 15:17.

Le bikekala namani shi mubutule wapangwa? Shi kidi namino, bubutule bukekala ke ditompo dikatampe dya dikōkeji. Le tukekala nandi namani? Ketukokejapo kwisambila pa myanda yonso ibwanya kulupuka, ino tutalei ibidi’tu ya kyalwilo.

Kyaba kimo, mupangwe’wa i wa mu kyetu kisaka kadi ukidi ku njibo. Tukendelela kwingila nandi mingilo ya bukile-bukya ya mu kisaka mwanda kupangwa kwandi kekutyibilepo kijimba kya bubutule. Inoko, na mwiendelejo wandi watyibe kijimba kya ku mushipiditu kyadi nakyo na ba mu kisaka. Penepa ba mu kisaka bakidi na kikōkeji kebakapwanapo nandi ku mushipiditu. Kimfwa, mupangwe kakefundepo pamo na kisaka kifundwa kya Bible, nansha shi udi’po. Inoko, shi mupangwe’wa i mwana mutyetye, bambutwile bandi badi na kiselwa kya kumufundija ne kumudingila. Nanshi, bambutwile ba buswe bakakwata mpangiko ya kwifunda na mwana kifundwa kya Bible. *—Nkindi 6:20-22; 29:17.

Kyaba kikwabo, mupangwe ukokeja kwikala mubutule wa kulampe udi kwandi. Nansha byokukokeja kwikala kwitana nandi mu bitatyi bimobimo pa myanda itala kisaka, ino kuno kwitana kufwaninwe kwikala kwa na dimo’tu. Balongo bene Kidishitu ba dikōkeji kebadipo na bubinga bwa kufyamina mu bubutule mwanda wa kupwana na mupangwe kadipo  ku yabo njibo. Ino, dikōkeji dyabo kudi Yehova ne ku bulongolodi bwandi dikebatonona bakwatakanye mpangiko ya mu Bisonekwa itala pa bapangwe. Mwiendelejo wabo wa dikōkeji ukokeja kutenga mutyima wa nonga-bibi ne kumukwasha amwene mu madingi obamupele. *—Bahebelu 12:11.