Wawinjo malit ahinya ka ogol ng’at ma wat kata ma osiepwa ei kanyakla nikech otimo richo to otamore lokore. Gima wabiro timo kaluwore gi chik ma Muma chiwo kuom wachni biro nyiso okang’ ma waherogo Nyasaye kod kaka wariwo lwedo gadier chenro mare. * Par ane penjo moko kuom wachni.

Ere kaka onego wabed gi ng’at mogol ei kanyakla? Muma wacho kama: “Kik uwuothi kod ng’at miluongo ni owadu ka en ng’at ma terore, kata jagombo, kata ng’a ma lamo nyiseche manono, kata jayenyo, kata jamer, kata jamecho; kik uchiem ngang’ kod ng’at ma kama.” (1 Jo Korintho 5:11) Kuom ng’ato ang’ata ma ‘ok sik e puonj Kristo,’ wasomo kama: “Kik urwake e odu, kata kik umose; nikech ng’a ma mose lalore gi tichne maricho.” (2 Johana 9-11) Ok wariwre e weche mag lamo kod joma ogol ei kanyakla kata ok wariwre kodgi e weche mag mor. Ohinga mar Jarito ma Septemba 15, 1981 (Ingresa), ite mar 25, nowacho kama: “Moso amosa ng’ato ni ‘Misawa’ nyalo bedo okang’ mokwongo mar chako mbaka kata osiep. Be wadwaro kawo okang’ mokwongono gi ng’at ma ogol ei kanyakla?”

Be ochuno ni kik wariwre kodgi chuth? Ee, kendo gik momiyo thoth. Mokwongo, omulo wach riwo Nyasaye lwedo kaachiel gi Wachne. Wawinjo chik Jehova ok mana e seche ma timo kamano yotnwa, to bende sama timo mano nenore ni tek. Hero Nyasaye ema miyo warito chikne duto, ka wang’eyo ni en ja adier kendo jahera kendo ni chikene konyowa ahinya. (Isaiah 48:17; 1 Johana 5:3) Mar ariyo, weyo riwruok gi joricho ma ok lokre ritowa kaachiel kod kanyakla duto mondo kik waketh winjruokwa gi Nyasaye kod timbewa, kendo rito nying maber mar kanyakla. (1 Jo Korintho 5:6, 7) Mar adek, chung’wa motegno kuom rito puonj mag Muma nyalo bende konyo ng’at  mogol ei kanyaklano. Kuom riwo lwedo bura ma jodongo ong’ado, wanyalo mulo chuny jaketho ma ok oserwako kony ma jodongo temo miye kata sechego. Wito osiep maber gi jogo mohero nyalo konye mondo ‘parone oduogi,’ one rach mar gima notimo, kendo okaw okang’ mag duogo ir Jehova.—Luka 15:17.

To nade ka achiel kuom wedeni ema ogol ei kanyakla? E kinde machalo kamano, tudruok machiegni ahinya kaka joot nyalo bedo tem mar riwo chike Jehova lwedo. Ere kaka onego wabed gi ng’ama wat ma ogol ei kanyakla? Ok wanyal wuoyo kae kuom gigo duto manyalo timore, kata kamano, wane ane weche ariyo madongo kuomgi.

Seche moko, ng’at mogol ei kanyaklano nyalo bedo ni pod odak e ot achiel gi joodgi kaka achiel kuom joodno. Bedo ni ogole ei kanyakla ok keth wat gi joodgi, weche ma pile mag joot nyalo mana dhi nyime. Kata kamano, kuom timne, jalo oseyiero ng’ado tudruokne gi joodgi ma Jokristo kuom wach lamo Nyasaye. Omiyo joot mamoko ok nyal riwore kode e weche mag lamo Nyasaye. Kuom ranyisi, ka jalo mogol ei kanyakla nitie seche ma itimo puonjruok mar Muma kaka joot, en ok obi riwore kodgi e puonjruokno. Kata kamano, kapo ni jal mogol ei kanyaklano en nyathi ma pod tin, jonyuolne pod nigi ting’ mar puonje kendo rieye. Kuom mano, jonyuol ma johera nyalo timo chenro mondo gipuonjre Muma gi nyathino. *—Ngeche 6:20-22; 29:17.

E weche mamoko, ng’at ma wat mogol okono nyalo bedo ni odak kamachielo mopogore gi joodgi. Kata obedo ni wach moro mochuno nyalo miyo joot orom kode kadichiel, mano onego otimre mana e kinde manok. Joot ma Jokristo mariwo Jehova lwedo ok onego tem dwaro bedo gi weche manyalo miyo gitudre gi watgi ma ogol ei kanyakla ma ok odak kodgi  e ot achiel. Kar timo mano, nikech giriwo Jehova kaachiel gi riwruok mar ogandane lwedo, gimako motegno chenro mochiw e Ndiko mar golo ei kanyakla joma otimo richo. Gitimo kamano nikech gidwaro konyo ng’at mokethono mondo oyud ber kuom kum momiye. *—Jo Hibrania 12:11.