Ndi lupwa witu nanti cuza witu wazingwa umu cilongano, pa mulandu nu kukana-lapila pa viipe vino akacita, cikatuwaya cuze. Ukuvwila vino Baibo yalaanda pa mulandu uu, i cingalangizya ukutemwa kuno twatemwa Leza alino nu kulanga ukuti fwefwe acisinka kuli aaliwe. * Lekini tusambilile apa mauzyo yamwi-yamwi apilyasi kwene lii.

Uzye tulinzile ukucita uli uku muntu uwazingwa? Baibo ikati: “Mutalinzile kuya mu utandano nu muntu akaitaka vino wene umwina winu, lino wene akacita ulenzyo, nanti uwa lwiswa, nanti akapepa tuluwi, nanti uwa ntumpu, nanti umukolesi, nanti umwivi. Mutaikala pansi nu kulya pamwi nu muntu wa musango uu.” (1 Kolinto 5:11) Baibo yalanda apa muntu aali wensi wino “asyakulondela usambilizyo wakwe Klistu,” ukuti: “Mutamupokelela mu ng’anda inu nanti ukumulamuka. Pano umuntu ali wensi akumulamuka ala nawe kwene wakumako ku viipe vino akacita.” (2 Yoane 9-11) Tutafwile ukwizizya pamwi nanti ukuombela pamwi ivintu vyakwe Leza nu muntu uwazingwa. Lupungu Lwa Mulinzi lwakwe 15 Sepetemba, 1981, ifwa 25, lukalanda ukuti: “Ndi cakuti tukulamuka umuntu umuzingiwe nanti sile apanono limwi ukukatusya ikasa ituti ‘uli we,’ ingaya iinzila ya kutandikilako ukulanzyanya nawe, nupya limwi tungatandika nu kupanga icuza na aliwe. Uzye tungalonda ukucita vivyo ivingalenga tutandike ukulanzyanya nu muntu umuzingwe?”

Uzye tutafwile ukucita iciliconsi nu muntu umuzingiwe? Ee, kwaya imilandu iingi ya kucitila vivyo. Inkoleelo, nga tukucita vivyo, ala tukulanga ukuti fwefwe acisinka kuli Leza ni Izwi lyakwe. Tutafwile ukuvwila sile Yeova lino ivintu vyangupala, lelo nanti iivitala uli, tufwile ukumuvwila. Ukutemwa kuno twatemwa Leza, u kukatulenga ukuti twauvwila amasunde yakwe yonsi, pano twamanya ukuti u wa cikuuku nupya waya nu kutemwa, nupya ukumvwila amasunde yakwe kukatulenga ukuya ansansa. (Ezaya 48:17; 1 Yoane 5:3) Cakwe ciili cino tutalinzile ukucitila icili consi nu muntu umuzingiwe, i cakuti ukucita vivyo, ala tukuicingilila fweineco nu  kucingilila amu cilongano ukuti tutaakowezya ukapepa witu, nupya cilalenga ukuti antu yauze yacindika ukupepa kwitu. (1 Kolinto 5:6, 7) Cakwe citatu i cakuti, umuntu muzingwe ndi walola vino tukauvwila ivisinte vya muli Baibo, limwi cingamulenga ukumanya ukuti vino wacisile vitaazifile foo. Ukutungilila vino komiti ya upinguzi yacisile, limwi cingavwa umuntu wiyo ukumanya ukuti vino wacisile ukukana uvwila ya eluda lino yamulungikanga, vitaazifile. Ndi cakuti ucuza nu muntu umuzingwe wasila alino musikucitila pamwi nawe ivintu, limwi angiluka api ifyo lino wacisile, icakuti angatemwa nu kuwelela kuli Yeova.—Luka 15:17.

Nga ndi cakuti umuzingwe a lupwa witu? Icintu cico ndi cacitika, cingalenga ukuti ucisinka witu uno twakwata uwa kuuvwila amasunde yakwe Yeova weziwe. Uzye tulinzile ukucita uli uku muntu uwazingwa ngi cakuti a lupwa witu? Asi vyonsi vino tungalandapo vino tufwile ukucita uku muntu wiyo, lelo katulande apa vintu viili sile apilyasi lii.

Insita zimwi cingacitika ukuti, lupwa umuzingwe limwi mucili mukaikala nawe apa ng’anda. Fwandi asi kuti nga wazingwa, ale na pa ng’anda kwene angazingwa, acino imilimo ya pa ng’anda yene mungaaombela pamwi. Lelo, vino wacita, waisoolwela umwineco ukuitalusya uku kucita vyakwe Leza pamwi na yalupwa ya kapepa. Fwandi yalupwa aaya na ucisinka kuli Yeova, yatalacitila pamwi vyakwe Leza na lupwa umuzingwe. Ndi cakuti wino wazingwa apano ali lino muli pa kupepa kwa lupwa, wene atalinzile ukulandapo nanti ukwasukapo. Nomba, ngi cakuti wino wazingwa u mwance, avyazi yacili yakweti umulimo wa kumutungulula nu kumulungika. Acino, avyazi aaya nu kutemwa limwi yangapekanya ukuti yasambilizya umwana wiyo Baibo. *—Mapinda 6:20-22; 29:17.

Limwi lupwa umuzingwe musi-ikala nawe pa ng’anda, limwi akaikala kuze. Nomba insita zimwi, cingacitika ukuti mukulonda ukulanzyanya nawe pa milandu imwi icindame sana, nga caya vivyo, mulinzile ukumanya apakupelela asi kulalanzyanya nawe cila-nsita. Yalupwa Aina Klistu aaya ni cisinka yasilondelezya umwakusombekezya pakuti yalanzyanya lyonsi na lupwa umuzingwe  wino yasi-ikala nawe apa ng’anda. Lelo, ukuya ni cisinka kuli Yeova alino nu kwiuvi lyakwe, i cikayalenga ukutwalilila ukuvwila vino Malembelo yakalanda apa muntu umuzingwe. Nga yalupwa yatwalilila na ucisinka kuli Yeova, yangalenga umuntu uwatacita iifyo ukumanya ukuti wacisile iviipe, nupya limwi cingamwavwa nu kumanya ukuti cali ningo vino yamulungike. *—Ayebulai 12:11.