OSHIGWEDHELWAKO
Nkene tu na okukala nomuntu ngoka a kondwa
Ohashi tu uvitha nayi noonkondo uuna omupambele nenge kuume ketu kopothingo a kondwa mo megongalo molwaashoka ini iyela ombedhi omolweyono lye. Momukalo moka hatu inyenge kewiliko lyOmbiimbeli moshinima shika otagu vulu okuulika kutya ohole yetu yokuhola Kalunga oyi thike peni nosho wo uudhiginini wetu kelongekidho lye. * Tala komapulo gamwe ngoka taga holoka moshikundathanwa shika.
Ongiini tu na okukala nomuntu ngoka a kondwa? Ombiimbeli otayi ti: “[Inamu] kwatathana nomuntu ngoka ti iningi a fa omukriste, nonando oye omuhondeli, omunalwiho, omusimaneki gwiimenka, omusheki, onkolwi nomuyugi. Nokuli inamu lya pamwe nomuntu a tya ngaaka.” (1 Kor. 5:11) Shi na ko nasha nakehe ngoka “itaa kala melongo lyaKristus,” Ombiimbeli otayi ti kutya “inamu mu taamba megumbo lyeni, ne inamu mu popitha nando okuli mu tye: ‘Ombili nayi kale nangoye.’ Oshoka shaa ngoka ta popitha omuntu a tya ngaaka, oye ota kwatathana niilonga iiwinayi mbyoka te yi longo.” (2 Joh. 9-11) Inatu pumbwa okupopya iinima yopambepo naamboka ya kondwa nenge tu endathane nayo. Oshungolangelo yOshiingilisa yo 15 Septemba 1981, epandja 25, otayi ti: “Okutya owala ‘wu uhala po’ komuntu ngoka otaku vulu okufala moonkundathana nomokupanga uukuume nokuli naye. Mbela otatu ka katuka onkatu yotango ndjoka tayi fala muukuume nomuntu ngoka a kondwa?”
Mbela otwa pumbwa oku mu yanda thiluthilu? Eeno, omolwomatompelo gontumba. Lyotango, otashi ulike kutya otu li aadhiginini kuKalunga nokOohapu dhe. Ihatu vulika owala kuJehova uuna tashi tu endele nawa, ihe nuuna wo shi li oshidhigu kutse. Ohole yokuhola Kalunga ohayi tu inyengitha tu vulike kiipango ye ayihe, nokutseya kutya ye omuyuuki nomunahole nosho wo kutya oompango dhe odhi lile po uuwanawa wetu. (Jes. 48:17; 1 Joh. 5:3) Etiyali, okukala kokule nomuyoni ini iyela ombedhi otashi tu gamene nosho wo egongalo alihe kokunyatekwa pambepo nopamikalo notashi kaleke po wo edhina ewanawa lyegongalo. (1 Kor. 5:6, 7) Etitatu, okukala twa dhiginina omakotampango gOmbiimbeli otashi etele wo omuntu ngoka a kondwa uuwanawa. Mokuyambidhidha etokolo lyokomitiye yopampangu, otashi vulu okuguma omutima gwomuyoni ngoka inaa hala okutaamba ko ekwatho ndyoka aakuluntugongalo ya hala oku mu pa. Okukanitha ekwatathano nookuume ke mboka e hole otashi vulu oku mu kwathela opo ‘i itedhulule,’ nokumona nkene eyono lye lya kwata miiti nokukatuka onkatu a galukile kuJehova. — Luk. 15:17, OB-1954.
Ongiini ngele omupambele gwoye a kondwa? Moshinima sha tya ngawo, ohashi kala emakelo enene kiilyo yuukwanegumbo mbyoka yi holathane okuulika uudhiginini wayo moompango dhaJehova. Ongiini tu na okukala nomupambele ngoka a kondwa? Itatu vulu okupopya kombinga yiinima ayihe mbyoka tayi vulu okuholoka po, ihe natu tumbule po iyali mbyoka ya simana.
Poompito dhimwe, otashi vulika hamu zi megumbo limwe nomupambele ngoka a kondwa. Molwaashoka okukondwa itaku ti kutya omuntu ke shi we oshilyo shuukwanegumbo, iilonga yesiku kehe nosho wo eendathano muukwanegumbo oyi na okutsikila. Ihe omolwoondjila dhe oombwiinayi, omuntu ngoka okwa tokola okuteya po ekwatathano lyopambepo pokati ke niilyo yuukwanegumbo mbyoka yi li ooitaali. Onkee ano, iilyo yuukwanegumbo mbyoka iidhiginini itayi vulu we okukala yi na eendathano lyopambepo naye. Pashiholelwa, pethimbo lyelongelokalunga lyuukwanegumbo, oshilyo shuukwanegumbo shoka sha kondwa kashi na okukutha ombinga moonkundathana. Ihe ngele ngoka a kondwa okanona natango, aavali oye na oshinakugwanithwa shoku ka longa noku ka putudha. Onkee ano aavali aanahole otaya vulu okuninga omalongekidho opo ya konakone Ombiimbeli nako. * — Omayel. 6:20-22; 29:17.
Ethimbo limwe, oshilyo shuukwanegumbo shoka sha kondwa ihatu zi megumbo limwe nasho. Nonando otashi vulika tu kwatathane nomuntu ngoka omalupita omolwiinima yi na ko nasha nuukwanegumbo, ekwatathano ndyoka oli na okukala lya ngambekwa. Iilyo yuukwanegumbo wopaKriste iidhiginini ihayi kongo omaipopilo opo yi kale tayi endathana nomupambele a kondwa ngoka ihaa zi megumbo limwe nayo. Pehala lyaashono, uudhiginini muJehova nokehangano lye otawu ke yi inyengitha ya taambe ko elongekidho lyopamanyolo li na ko nasha nokukondwa. Ngele oya kala iidhiginini kelongekidho ndyoka Jehova a tula po, otashi vulika yi kwathele omuyoni a mone uuwanawa megeeloputudho ndyoka a pewa. * — Heb. 12:11.
^ okat. 1 Omakotampango gOmbiimbeli ngoka ge na ko nasha nokukondwa otaga longo sha faathana nokaantu mboka yi iteta ko yo yene kegongalo.
^ okat. 2 Omolwuuyelele wa gwedhwa po kombinga yokanona ka kondwa noke li natango megumbo, tala Oshungonangelo ye 1 Kotoba 2001, epandja 27-28 nosho wo yOshiingilisa yo 15 Novemba 1988, epandja 20.
^ okat. 3 Omolwuuyelele wa gwedhwa po kombinga yankene to vulu okukala noshilyo shuukwanegumbo shoka sha kondwa, tala komayele gopamanyolo ngoka ga kundathanwa mOshungolangelo yOshiingilisa yo 15 Apilili 1988, epandja 26-31 nosho wo yo 15 Septemba 1981, epandja 26-31.
